| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[482] 9. рурумиг̇арааж̇аж̇аад̇агаван̣н̣анаа
[482] 9. Rurumigarājajātakavaṇṇanā
д̇асса г̇аамаварам̣ д̣̇аммийд̇и ид̣̇ам̣ сад̇т̇аа взл̣уванз вихаранд̇о д̣̇звад̣̇ад̇д̇ам̣ аараб̣бха гат̇зси. со гира бхигкуухи ‘‘б̣ахуубагааро д̇з аавусо, д̣̇звад̣̇ад̇д̇асад̇т̇аа, д̇вам̣ д̇ат̇ааг̇ад̇ам̣ ниссааяа баб̣б̣аж̇ж̇ам̣ лабхи, д̇ийн̣и бидагаани уг̇г̇ан̣хи, лаабхасаггаарам̣ баабун̣ий’’д̇и вуд̇д̇о ‘‘аавусо, сад̇т̇аараа мама д̇ин̣аг̇г̇амад̇д̇оби убагааро на гад̇о, ахам̣ саяамзва баб̣б̣аж̇им̣, саяам̣ д̇ийн̣и бидагаани уг̇г̇ан̣хим̣, саяам̣ лаабхасаггаарам̣ баабун̣и’’нд̇и гат̇зси. бхигкуу д̇хаммасабхааяам̣ гат̇ам̣ самудтаабзсум̣ ‘‘агад̇ан̃н̃уу аавусо, д̣̇звад̣̇ад̇д̇о агад̇авзд̣̇ий’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, д̣̇звад̣̇ад̇д̇о ид̣̇аанзва агад̇ан̃н̃уу, буб̣б̣зби агад̇ан̃н̃ууязва, буб̣б̣збзса маяаа ж̇ийвид̇з д̣̇иннзби мама г̇ун̣амад̇д̇ам̣ на ж̇аанаад̇ий’’д̇и вад̇ваа ад̇ийд̇ам̣ аахари.
Tassagāmavaraṃ dammīti idaṃ satthā veḷuvane viharanto devadattaṃ ārabbha kathesi. So kira bhikkhūhi ‘‘bahūpakāro te āvuso, devadattasatthā, tvaṃ tathāgataṃ nissāya pabbajjaṃ labhi, tīṇi piṭakāni uggaṇhi, lābhasakkāraṃ pāpuṇī’’ti vutto ‘‘āvuso, satthārā mama tiṇaggamattopi upakāro na kato, ahaṃ sayameva pabbajiṃ, sayaṃ tīṇi piṭakāni uggaṇhiṃ, sayaṃ lābhasakkāraṃ pāpuṇi’’nti kathesi. Bhikkhū dhammasabhāyaṃ kathaṃ samuṭṭhāpesuṃ ‘‘akataññū āvuso, devadatto akatavedī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, devadatto idāneva akataññū, pubbepi akataññūyeva, pubbepesa mayā jīvite dinnepi mama guṇamattaṃ na jānātī’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з зго асийд̇игодивибхаво сздти буд̇д̇ам̣ лабхид̇ваа ‘‘махаад̇ханаго’’д̇исса, наамам̣ гад̇ваа ‘‘сиббам̣ уг̇г̇ан̣ханд̇о мама буд̇д̇о гиламиссад̇ий’’д̇и на гин̃жи сиббам̣ уг̇г̇ан̣хаабзси. со г̇ийд̇анажжаваад̣̇ид̇акаад̣̇анабхож̇анад̇о уд̣̇д̇хам̣ на гин̃жи ан̃н̃ааси. д̇ам̣ ваяаббад̇д̇ам̣ бад̇ируубзна д̣̇аарзна сам̣яож̇зд̇ваа маад̇аабид̇аро гааламагам̣су. со д̇зсам̣ ажжаязна ид̇т̇ид̇худ̇д̇асураад̇худ̇д̇аад̣̇ийхи баривуд̇о наанааб̣яасанамукзхи ин̣ам̣ аад̣̇ааяа д̇ам̣ д̣̇аад̇ум̣ асаггонд̇о ин̣ааяигзхи жод̣̇ияамаано жинд̇зси ‘‘гим̣ маяхам̣ ж̇ийвид̇зна, згзнамхи ад̇д̇абхаавзна ан̃н̃о вияа ж̇аад̇о, мад̇ам̣ мз сзяяо’’д̇и. со ин̣ааяигз ааха – ‘‘д̇умхаагам̣ ин̣абан̣н̣аани г̇ахзд̇ваа ааг̇ажчат̇а, г̇ан̇г̇аад̇ийрз мз нид̣̇ахид̇ам̣ гуласанд̇агам̣ д̇ханам̣ ад̇т̇и, д̇ам̣ во д̣̇ассаамий’’д̇и. д̇з д̇зна сад̣̇д̇хим̣ аг̇амам̣су. со ‘‘ид̇ха д̇хана’’нд̇и нид̇хидтаанам̣ аажигканд̇о вияа ‘‘г̇ан̇г̇ааяам̣ бад̇ид̇ваа мариссаамий’’д̇и балааяид̇ваа г̇ан̇г̇ааяам̣ бад̇и. со жан̣д̣асод̇зна вуяханд̇о гаарун̃н̃аравам̣ вирави.
Atīte bārāṇasiyaṃ brahmadatte rajjaṃ kārente eko asītikoṭivibhavo seṭṭhi puttaṃ labhitvā ‘‘mahādhanako’’tissa, nāmaṃ katvā ‘‘sippaṃ uggaṇhanto mama putto kilamissatī’’ti na kiñci sippaṃ uggaṇhāpesi. So gītanaccavāditakhādanabhojanato uddhaṃ na kiñci aññāsi. Taṃ vayappattaṃ patirūpena dārena saṃyojetvā mātāpitaro kālamakaṃsu. So tesaṃ accayena itthidhuttasurādhuttādīhi parivuto nānābyasanamukhehi iṇaṃ ādāya taṃ dātuṃ asakkonto iṇāyikehi codiyamāno cintesi ‘‘kiṃ mayhaṃ jīvitena, ekenamhi attabhāvena añño viya jāto, mataṃ me seyyo’’ti. So iṇāyike āha – ‘‘tumhākaṃ iṇapaṇṇāni gahetvā āgacchatha, gaṅgātīre me nidahitaṃ kulasantakaṃ dhanaṃ atthi, taṃ vo dassāmī’’ti. Te tena saddhiṃ agamaṃsu. So ‘‘idha dhana’’nti nidhiṭṭhānaṃ ācikkhanto viya ‘‘gaṅgāyaṃ patitvā marissāmī’’ti palāyitvā gaṅgāyaṃ pati. So caṇḍasotena vuyhanto kāruññaravaṃ viravi.
д̇ад̣̇аа махаасад̇д̇о рурумиг̇аяонияам̣ ниб̣б̣ад̇д̇ид̇ваа бариваарам̣ чад̣д̣зд̇ваа згагова г̇ан̇г̇аанивад̇д̇анз раман̣ийяз сааламиссагз субубпид̇аамб̣аванз васад̇и убосат̇ам̣ убавуд̇т̇ааяа. д̇асса сарийражчави сумаж̇ж̇ид̇аган̃жанабаддаван̣н̣аа ахоси, хад̇т̇абаад̣̇аа лаакаарасабаригаммагад̇аа вияа, нан̇г̇удтам̣ жаамарийнан̇г̇удтам̣ вияа, син̇г̇аани раж̇ад̇ад̣̇аамасад̣̇исаани, агкийни сумаж̇ж̇ид̇аман̣иг̇ул̣игаа вияа, мукам̣ од̣̇ахид̇ваа табид̇арад̇д̇агамб̣алаг̇зн̣д̣угам̣ вияа. зваруубам̣ д̇асса руубам̣ ахоси. со ад̣дхарад̇д̇асамаяз д̇асса гаарун̃н̃асад̣̇д̣̇ам̣ суд̇ваа ‘‘мануссасад̣̇д̣̇о сууяад̇и, маа маяи д̇харанд̇з марад̇у, ж̇ийвид̇амасса д̣̇ассаамий’’д̇и жинд̇зд̇ваа саяанаг̇умб̣аа удтааяа над̣̇ийд̇ийрам̣ г̇анд̇ваа ‘‘амбхо буриса, маа бхааяи, ж̇ийвид̇ам̣ д̇з д̣̇ассаамий’’д̇и ассаасзд̇ваа сод̇ам̣ чинд̣̇анд̇о г̇анд̇ваа д̇ам̣ бидтияам̣ ааробзд̇ваа д̇ийрам̣ баабзд̇ваа ад̇д̇ано васанадтаанам̣ нзд̇ваа палаапалаани д̣̇ад̇ваа д̣̇вийхад̇ийхажжаязна ‘‘бхо буриса, ахам̣ д̇ам̣ ид̇о аран̃н̃ад̇о нийхарид̇ваа б̣аараан̣асимаг̇г̇з табзссаами, д̇вам̣ сод̇т̇инаа г̇амиссаси, абижа ко бана д̇вам̣ ‘асугадтаанз наама ган̃жанамиг̇о васад̇ий’д̇и д̇ханагааран̣аа мам̣ ран̃н̃о жзва рааж̇амахаамад̇д̇асса жа маа аажигкаахий’’д̇и ааха. со ‘‘саад̇ху саамий’’д̇и самбадижчи.
Tadā mahāsatto rurumigayoniyaṃ nibbattitvā parivāraṃ chaḍḍetvā ekakova gaṅgānivattane ramaṇīye sālamissake supupphitaambavane vasati uposathaṃ upavutthāya. Tassa sarīracchavi sumajjitakañcanapaṭṭavaṇṇā ahosi, hatthapādā lākhārasaparikammakatā viya, naṅguṭṭhaṃ cāmarīnaṅguṭṭhaṃ viya, siṅgāni rajatadāmasadisāni, akkhīni sumajjitamaṇiguḷikā viya, mukhaṃ odahitvā ṭhapitarattakambalageṇḍukaṃ viya. Evarūpaṃ tassa rūpaṃ ahosi. So aḍḍharattasamaye tassa kāruññasaddaṃ sutvā ‘‘manussasaddo sūyati, mā mayi dharante maratu, jīvitamassa dassāmī’’ti cintetvā sayanagumbā uṭṭhāya nadītīraṃ gantvā ‘‘ambho purisa, mā bhāyi, jīvitaṃ te dassāmī’’ti assāsetvā sotaṃ chindanto gantvā taṃ piṭṭhiyaṃ āropetvā tīraṃ pāpetvā attano vasanaṭṭhānaṃ netvā phalāphalāni datvā dvīhatīhaccayena ‘‘bho purisa, ahaṃ taṃ ito araññato nīharitvā bārāṇasimagge ṭhapessāmi, tvaṃ sotthinā gamissasi, apica kho pana tvaṃ ‘asukaṭṭhāne nāma kañcanamigo vasatī’ti dhanakāraṇā maṃ rañño ceva rājamahāmattassa ca mā ācikkhāhī’’ti āha. So ‘‘sādhu sāmī’’ti sampaṭicchi.
махаасад̇д̇о д̇асса бадин̃н̃ам̣ г̇ахзд̇ваа д̇ам̣ ад̇д̇ано бидтияам̣ ааробзд̇ваа б̣аараан̣асимаг̇г̇з од̇аарзд̇ваа нивад̇д̇и. д̇асса б̣аараан̣асибависанад̣̇ивасзязва кзмаа наама ран̃н̃о аг̇г̇амахзсий бажжуусагаалз субинанд̇з суван̣н̣аван̣н̣ам̣ миг̇ам̣ ад̇д̇ано д̇хаммам̣ д̣̇зсзнд̇ам̣ д̣̇исваа жинд̇зси ‘‘сажз зваруубо миг̇о на бхавзяяа, наахам̣ субинз бассзяяам̣, ад̣̇д̇хаа бхависсад̇и, ран̃н̃о аарожзссаамий’’д̇и. саа рааж̇аанам̣ убасан̇гамид̇ваа ‘‘махаарааж̇а, ахам̣ суван̣н̣аван̣н̣ам̣ миг̇ам̣ бассид̇ум̣ ижчаами, суван̣н̣аван̣н̣амиг̇асса д̇хаммам̣ сод̇угаамаамхи, лабхиссаами жз, ж̇ийвзяяам̣, но жз, над̇т̇и мз ж̇ийвид̇а’’нд̇и ааха. рааж̇аа д̇ам̣ ассаасзд̇ваа ‘‘сажз мануссалогз ад̇т̇и, лабхиссасий’’д̇и вад̇ваа б̣раахман̣з баггосаабзд̇ваа ‘‘суван̣н̣аван̣н̣аа миг̇аа наама хонд̇ий’’д̇и бужчид̇ваа ‘‘аама, д̣̇зва, хонд̇ий’’д̇и суд̇ваа алан̇гад̇ахад̇т̇игканд̇хз суван̣н̣ажан̇годагз сахассат̇авигам̣ табзд̇ваа яо суван̣н̣аван̣н̣ам̣ миг̇ам̣ аажигкиссад̇и, д̇асса сад̣̇д̇хим̣ сахассат̇авигасуван̣н̣ажан̇годагзна д̇ан̃жа хад̇т̇им̣ д̇ад̇о жа уд̇д̇ари д̣̇аад̇угаамо худ̇ваа суван̣н̣абаддз г̇аат̇ам̣ ликаабзд̇ваа згам̣ амажжам̣ баггосаабзд̇ваа ‘‘зхи д̇аад̇а, мама важанзна имам̣ г̇аат̇ам̣ наг̇араваасийнам̣ гат̇зхий’’д̇и имасмим̣ ж̇аад̇агз батамам̣ г̇аат̇амааха –
Mahāsatto tassa paṭiññaṃ gahetvā taṃ attano piṭṭhiyaṃ āropetvā bārāṇasimagge otāretvā nivatti. Tassa bārāṇasipavisanadivaseyeva khemā nāma rañño aggamahesī paccūsakāle supinante suvaṇṇavaṇṇaṃ migaṃ attano dhammaṃ desentaṃ disvā cintesi ‘‘sace evarūpo migo na bhaveyya, nāhaṃ supine passeyyaṃ, addhā bhavissati, rañño ārocessāmī’’ti. Sā rājānaṃ upasaṅkamitvā ‘‘mahārāja, ahaṃ suvaṇṇavaṇṇaṃ migaṃ passituṃ icchāmi, suvaṇṇavaṇṇamigassa dhammaṃ sotukāmāmhi, labhissāmi ce, jīveyyaṃ, no ce, natthi me jīvita’’nti āha. Rājā taṃ assāsetvā ‘‘sace manussaloke atthi, labhissasī’’ti vatvā brāhmaṇe pakkosāpetvā ‘‘suvaṇṇavaṇṇā migā nāma hontī’’ti pucchitvā ‘‘āma, deva, hontī’’ti sutvā alaṅkatahatthikkhandhe suvaṇṇacaṅkoṭake sahassathavikaṃ ṭhapetvā yo suvaṇṇavaṇṇaṃ migaṃ ācikkhissati, tassa saddhiṃ sahassathavikasuvaṇṇacaṅkoṭakena tañca hatthiṃ tato ca uttari dātukāmo hutvā suvaṇṇapaṭṭe gāthaṃ likhāpetvā ekaṃ amaccaṃ pakkosāpetvā ‘‘ehi tāta, mama vacanena imaṃ gāthaṃ nagaravāsīnaṃ kathehī’’ti imasmiṃ jātake paṭhamaṃ gāthamāha –
117.
117.
‘‘д̇асса г̇аамаварам̣ д̣̇амми, наарияо жа алан̇гад̇аа;
‘‘Tassa gāmavaraṃ dammi, nāriyo ca alaṅkatā;
яо мз д̇ам̣ миг̇амагкаад̇и, миг̇аанам̣ миг̇амуд̇д̇ама’’нд̇и.
Yo me taṃ migamakkhāti, migānaṃ migamuttama’’nti.
амажжо суван̣н̣абаддам̣ г̇ахзд̇ваа сагаланаг̇арз ваажаабзси. ат̇а со сздтибуд̇д̇о б̣аараан̣асим̣ бависанд̇ова д̇ам̣ гат̇ам̣ суд̇ваа амажжасса санд̇игам̣ г̇анд̇ваа ‘‘ахам̣ ран̃н̃о зваруубам̣ миг̇ам̣ аажигкиссаами, мам̣ ран̃н̃о д̣̇ассзхий’’д̇и ааха. амажжо хад̇т̇игканд̇хад̇о од̇арид̇ваа д̇ам̣ ран̃н̃о санд̇игам̣ нзд̇ваа ‘‘аяам̣ гира, д̣̇зва, д̇ам̣ миг̇ам̣ аажигкиссад̇ий’’д̇и д̣̇ассзси. рааж̇аа ‘‘сажжам̣ амбхо бурисаа’’д̇и бужчи. со ‘‘сажжам̣ махаарааж̇а, д̇вам̣ зд̇ам̣ яасам̣ маяхам̣ д̣̇зхий’’д̇и вад̣̇анд̇о д̣̇уд̇ияам̣ г̇аат̇амааха –
Amacco suvaṇṇapaṭṭaṃ gahetvā sakalanagare vācāpesi. Atha so seṭṭhiputto bārāṇasiṃ pavisantova taṃ kathaṃ sutvā amaccassa santikaṃ gantvā ‘‘ahaṃ rañño evarūpaṃ migaṃ ācikkhissāmi, maṃ rañño dassehī’’ti āha. Amacco hatthikkhandhato otaritvā taṃ rañño santikaṃ netvā ‘‘ayaṃ kira, deva, taṃ migaṃ ācikkhissatī’’ti dassesi. Rājā ‘‘saccaṃ ambho purisā’’ti pucchi. So ‘‘saccaṃ mahārāja, tvaṃ etaṃ yasaṃ mayhaṃ dehī’’ti vadanto dutiyaṃ gāthamāha –
118.
118.
‘‘маяхам̣ г̇аамаварам̣ д̣̇зхи, наарияо жа алан̇гад̇аа;
‘‘Mayhaṃ gāmavaraṃ dehi, nāriyo ca alaṅkatā;
ахам̣ д̇з миг̇амагкиссам̣, миг̇аанам̣ миг̇амуд̇д̇ама’’нд̇и.
Ahaṃ te migamakkhissaṃ, migānaṃ migamuttama’’nti.
д̇ам̣ суд̇ваа рааж̇аа д̇асса мид̇д̇ад̣̇уб̣бхисса д̇уссид̇ваа ‘‘аб̣бхо гухим̣ со миг̇о васад̇ий’’д̇и бужчид̇ваа ‘‘асугадтаанз наама д̣̇зваа’’д̇и вуд̇д̇з д̇амзва маг̇г̇ад̣̇зсагам̣ гад̇ваа маханд̇зна бариваарзна д̇ам̣ таанам̣ аг̇амааси. ат̇а нам̣ со мид̇д̇ад̣̇уб̣бхий ‘‘сзнам̣, д̣̇зва, саннисийд̣̇аабзхий’’д̇и вад̇ваа саннисиннааяа сзнааяа зсо, д̣̇зва, суван̣н̣амиг̇о зд̇асмим̣ ванз васад̇ий’’д̇и хад̇т̇ам̣ басаарзд̇ваа аажигканд̇о д̇ад̇ияам̣ г̇аат̇амааха –
Taṃ sutvā rājā tassa mittadubbhissa tussitvā ‘‘abbho kuhiṃ so migo vasatī’’ti pucchitvā ‘‘asukaṭṭhāne nāma devā’’ti vutte tameva maggadesakaṃ katvā mahantena parivārena taṃ ṭhānaṃ agamāsi. Atha naṃ so mittadubbhī ‘‘senaṃ, deva, sannisīdāpehī’’ti vatvā sannisinnāya senāya eso, deva, suvaṇṇamigo etasmiṃ vane vasatī’’ti hatthaṃ pasāretvā ācikkhanto tatiyaṃ gāthamāha –
119.
119.
‘‘зд̇асмим̣ ванасан̣д̣асмим̣, амб̣аа саалаа жа бубпид̇аа;
‘‘Etasmiṃ vanasaṇḍasmiṃ, ambā sālā ca pupphitā;
инд̣̇аг̇обагасан̃чаннаа, зд̇т̇зсо д̇идтад̇з миг̇о’’д̇и.
Indagopakasañchannā, ettheso tiṭṭhate migo’’ti.
д̇ад̇т̇а инд̣̇аг̇обагасан̃чаннаад̇и зд̇асса ванасан̣д̣асса бхууми инд̣̇аг̇обагаван̣н̣ааяа рад̇д̇ааяа сукасампассааяа д̇ин̣аж̇аад̇ияаа сан̃чаннаа, сасагужчи вияа муд̣̇угаа, зд̇т̇а зд̇асмим̣ раман̣ийяз ванасан̣д̣з зсо д̇идтад̇ийд̇и д̣̇ассзд̇и.
Tattha indagopakasañchannāti etassa vanasaṇḍassa bhūmi indagopakavaṇṇāya rattāya sukhasamphassāya tiṇajātiyā sañchannā, sasakucchi viya mudukā, ettha etasmiṃ ramaṇīye vanasaṇḍe eso tiṭṭhatīti dasseti.
рааж̇аа д̇асса важанам̣ суд̇ваа амажжз аан̣аабзси ‘‘д̇асса миг̇асса балааяид̇ум̣ ад̣̇ад̇ваа киббам̣ аавуд̇хахад̇т̇зхи бурисзхи сад̣̇д̇хим̣ ванасан̣д̣ам̣ бариваарзт̇аа’’д̇и. д̇з д̇ат̇аа гад̇ваа уннад̣̇им̣су. рааж̇аа гад̇ибаязхи ж̇анзхи сад̣̇д̇хим̣ згаманд̇ам̣ адтааси, собисса авид̣̇уурз адтааси. махаасад̇д̇о д̇ам̣ сад̣̇д̣̇ам̣ суд̇ваа жинд̇зси ‘‘маханд̇о б̣алагааяасад̣̇д̣̇о, д̇амхаа мз бурисаа бхаязна уббаннзна бхавид̇аб̣б̣а’’нд̇и . со удтааяа сагалабарисам̣ ологзд̇ваа ран̃н̃о тид̇адтаанам̣ д̣̇исваа ‘‘ран̃н̃о тид̇адтаанзязва мз сод̇т̇и бхависсад̇и, зд̇т̇зва маяаа г̇анд̇ум̣ ваддад̇ий’’д̇и жинд̇зд̇ваа рааж̇аабхимуко бааяааси. рааж̇аа д̇ам̣ ааг̇ажчанд̇ам̣ д̣̇исваа ‘‘нааг̇аб̣ало миг̇о авад̇т̇аранд̇о вияа ааг̇ажчзяяа, сарам̣ саннаяхид̇ваа имам̣ миг̇ам̣ санд̇аасзд̇ваа сажз балааяад̇и, виж̇жхид̇ваа д̣̇уб̣б̣алам̣ гад̇ваа г̇ан̣хиссаамий’’д̇и д̇ханум̣ ааробзд̇ваа б̣од̇хисад̇д̇аабхимуко ахоси. д̇амад̇т̇ам̣ багаасзнд̇о сад̇т̇аа имам̣ г̇аат̇аад̣̇ваяамааха –
Rājā tassa vacanaṃ sutvā amacce āṇāpesi ‘‘tassa migassa palāyituṃ adatvā khippaṃ āvudhahatthehi purisehi saddhiṃ vanasaṇḍaṃ parivārethā’’ti. Te tathā katvā unnadiṃsu. Rājā katipayehi janehi saddhiṃ ekamantaṃ aṭṭhāsi, sopissa avidūre aṭṭhāsi. Mahāsatto taṃ saddaṃ sutvā cintesi ‘‘mahanto balakāyasaddo, tamhā me purisā bhayena uppannena bhavitabba’’nti . So uṭṭhāya sakalaparisaṃ oloketvā rañño ṭhitaṭṭhānaṃ disvā ‘‘rañño ṭhitaṭṭhāneyeva me sotthi bhavissati, ettheva mayā gantuṃ vaṭṭatī’’ti cintetvā rājābhimukho pāyāsi. Rājā taṃ āgacchantaṃ disvā ‘‘nāgabalo migo avattharanto viya āgaccheyya, saraṃ sannayhitvā imaṃ migaṃ santāsetvā sace palāyati, vijjhitvā dubbalaṃ katvā gaṇhissāmī’’ti dhanuṃ āropetvā bodhisattābhimukho ahosi. Tamatthaṃ pakāsento satthā imaṃ gāthādvayamāha –
120.
120.
‘‘д̇ханум̣ ад̣̇взж̇жхам̣ гад̇ваана, усум̣ саннаяхубааг̇ами;
‘‘Dhanuṃ advejjhaṃ katvāna, usuṃ sannayhupāgami;
миг̇о жа д̣̇исваа рааж̇аанам̣, д̣̇уурад̇о аж̇жхабхаасат̇а.
Migo ca disvā rājānaṃ, dūrato ajjhabhāsatha.
121.
121.
‘‘ааг̇амзхи махаарааж̇а, маа мам̣ виж̇жхи рат̇зсабха;
‘‘Āgamehi mahārāja, mā maṃ vijjhi rathesabha;
го ну д̇з ид̣̇амагкааси, зд̇т̇зсо д̇идтад̇з миг̇о’’д̇и.
Ko nu te idamakkhāsi, ettheso tiṭṭhate migo’’ti.
д̇ад̇т̇а ад̣̇взж̇жхам̣ гад̇ваанаад̇и ж̇ияааяа жа сарзна жа сад̣̇д̇хим̣ згамзва гад̇ваа. саннаяхаад̇и саннаяхид̇ваа. ааг̇амзхийд̇и ‘‘д̇идта, махаарааж̇а, маа мам̣ виж̇жхи, ж̇ийваг̇г̇аахамзва г̇ан̣хаахий’’д̇и мад̇хурааяа мануссаваажааяа абхааси.
Tattha advejjhaṃ katvānāti jiyāya ca sarena ca saddhiṃ ekameva katvā. Sannayhāti sannayhitvā. Āgamehīti ‘‘tiṭṭha, mahārāja, mā maṃ vijjhi, jīvaggāhameva gaṇhāhī’’ti madhurāya manussavācāya abhāsi.
рааж̇аа д̇асса мад̇хурагат̇ааяа б̣анд̇хид̇ваа д̇ханум̣ од̇аарзд̇ваа г̇ааравзна адтааси. махаасад̇д̇оби рааж̇аанам̣ убасан̇гамид̇ваа мад̇хурабадисант̇аарам̣ гад̇ваа згаманд̇ам̣ адтааси. махааж̇аноби саб̣б̣аавуд̇хаани чад̣д̣зд̇ваа ааг̇анд̇ваа рааж̇аанам̣ бариваарзси. д̇асмим̣ кан̣з махаасад̇д̇о суван̣н̣агин̇гин̣игам̣ жаалзнд̇о вияа мад̇хурзна сарзна рааж̇аанам̣ бужчи ‘‘го ну д̇з ид̣̇амагкааси, зд̇т̇зсо д̇идтад̇з миг̇о’’д̇и? д̇асмим̣ кан̣з баабабурисо т̇огам̣ бадиггамид̇ваа сод̇абат̇зва адтааси. рааж̇аа ‘‘иминаа мз д̣̇ассид̇о’’д̇и гат̇знд̇о чадтам̣ г̇аат̇амааха –
Rājā tassa madhurakathāya bandhitvā dhanuṃ otāretvā gāravena aṭṭhāsi. Mahāsattopi rājānaṃ upasaṅkamitvā madhurapaṭisanthāraṃ katvā ekamantaṃ aṭṭhāsi. Mahājanopi sabbāvudhāni chaḍḍetvā āgantvā rājānaṃ parivāresi. Tasmiṃ khaṇe mahāsatto suvaṇṇakiṅkiṇikaṃ cālento viya madhurena sarena rājānaṃ pucchi ‘‘ko nu te idamakkhāsi, ettheso tiṭṭhate migo’’ti? Tasmiṃ khaṇe pāpapuriso thokaṃ paṭikkamitvā sotapatheva aṭṭhāsi. Rājā ‘‘iminā me dassito’’ti kathento chaṭṭhaṃ gāthamāha –
122.
122.
‘‘зса баабажаро босо, самма д̇идтад̇и аарагаа;
‘‘Esa pāpacaro poso, samma tiṭṭhati ārakā;
сояам̣ мз ид̣̇амагкааси, зд̇т̇зсо д̇идтад̇з миг̇о’’д̇и.
Soyaṃ me idamakkhāsi, ettheso tiṭṭhate migo’’ti.
д̇ад̇т̇а баабажарод̇и виссадтаажааро.
Tattha pāpacaroti vissaṭṭhācāro.
д̇ам̣ суд̇ваа махаасад̇д̇о д̇ам̣ мид̇д̇ад̣̇уб̣бхим̣ г̇арахид̇ваа ран̃н̃аа сад̣̇д̇хим̣ саллабанд̇о сад̇д̇амам̣ г̇аат̇амааха –
Taṃ sutvā mahāsatto taṃ mittadubbhiṃ garahitvā raññā saddhiṃ sallapanto sattamaṃ gāthamāha –
123.
123.
‘‘сажжам̣ гирзва маахам̣су, нараа згажжияаа ид̇ха;
‘‘Saccaṃ kireva māhaṃsu, narā ekacciyā idha;
гадтам̣ ниблавид̇ам̣ сзяяо, на д̇взвзгажжияо наро’’д̇и.
Kaṭṭhaṃ niplavitaṃ seyyo, na tvevekacciyo naro’’ti.
д̇ад̇т̇а ниблавид̇анд̇и уд̇д̇аарид̇ам̣. згажжияод̇и згажжо бана мид̇д̇ад̣̇уб̣бхий баабабуг̇г̇ало уд̣̇агз бад̇анд̇оби уд̇д̇аарид̇о на д̇взва сзяяо. гадтан̃хи наанаббагаарзна убагаарааяа сам̣вад̇д̇ад̇и, мид̇д̇ад̣̇уб̣бхий бана баабабуг̇г̇ало винаасааяа, д̇асмаа д̇ад̇о гадтамзва варад̇аранд̇и бораан̣агабан̣д̣ид̇аа гат̇аяим̣су, маяаа бана д̇зсам̣ важанам̣ на гад̇анд̇и.
Tattha niplavitanti uttāritaṃ. Ekacciyoti ekacco pana mittadubbhī pāpapuggalo udake patantopi uttārito na tveva seyyo. Kaṭṭhañhi nānappakārena upakārāya saṃvattati, mittadubbhī pana pāpapuggalo vināsāya, tasmā tato kaṭṭhameva varataranti porāṇakapaṇḍitā kathayiṃsu, mayā pana tesaṃ vacanaṃ na katanti.
д̇ам̣ суд̇ваа рааж̇аа ид̇арам̣ г̇аат̇амааха –
Taṃ sutvā rājā itaraṃ gāthamāha –
124.
124.
‘‘гим̣ ну руру г̇арахаси миг̇аанам̣, гим̣ багкийнам̣ гим̣ бана маанусаанам̣;
‘‘Kiṃ nu ruru garahasi migānaṃ, kiṃ pakkhīnaṃ kiṃ pana mānusānaṃ;
бхаяам̣ хи мам̣ винд̣̇ад̇инаббаруубам̣, суд̇ваана д̇ам̣ маанусим̣ бхаасамаана’’нд̇и.
Bhayaṃ hi maṃ vindatinapparūpaṃ, sutvāna taṃ mānusiṃ bhāsamāna’’nti.
д̇ад̇т̇а миг̇аананд̇и миг̇аанаман̃н̃ад̇арам̣ г̇арахаси, уд̣̇ааху багкийнам̣, маанусаананд̇и бужчи. бхаяан̃хи мам̣ винд̣̇ад̇ийд̇и бхаяам̣ мам̣ бадилабхад̇и, ахам̣ ад̇д̇ани аниссаро бхаяасанд̇аго вияа хоми. анаббаруубанд̇и маханд̇ам̣.
Tattha migānanti migānamaññataraṃ garahasi, udāhu pakkhīnaṃ, mānusānanti pucchi. Bhayañhi maṃ vindatīti bhayaṃ maṃ paṭilabhati, ahaṃ attani anissaro bhayasantako viya homi. Anapparūpanti mahantaṃ.
д̇ад̇о махаасад̇д̇о ‘‘махаарааж̇а, на миг̇ам̣, на багким̣ г̇арахаами, мануссам̣ бана г̇арахаамий’’д̇и д̣̇ассзнд̇о навамам̣ г̇аат̇амааха –
Tato mahāsatto ‘‘mahārāja, na migaṃ, na pakkhiṃ garahāmi, manussaṃ pana garahāmī’’ti dassento navamaṃ gāthamāha –
125.
125.
‘‘яамуд̣̇д̇харим̣ вааханз вуяхамаанам̣, маход̣̇агз салилз сийгхасод̇з;
‘‘Yamuddhariṃ vāhane vuyhamānaṃ, mahodake salile sīghasote;
д̇ад̇онид̣̇аанам̣ бхаяамааг̇ад̇ам̣ мама, д̣̇угко хавз рааж̇а асаб̣бхи сан̇г̇амо’’д̇и.
Tatonidānaṃ bhayamāgataṃ mama, dukkho have rāja asabbhi saṅgamo’’ti.
д̇ад̇т̇а вааханзд̇и бад̇ид̇абад̇ид̇з вахид̇ум̣ самад̇т̇з г̇ан̇г̇аавахз. маход̣̇агз салилзд̇и махаауд̣̇агз махаасалилзд̇и ад̇т̇о. убхаязнааби г̇ан̇г̇аавахассзва б̣ахууд̣̇агад̇ам̣ д̣̇ассзд̇и. д̇ад̇онид̣̇аананд̇и махаарааж̇а, яо маяхам̣ д̇аяаа д̣̇ассид̇о бурисо, зсо маяаа г̇ан̇г̇ааяа вуяхамаано ад̣дхарад̇д̇асамаяз гаарун̃н̃аравам̣ вираванд̇о уд̣̇д̇харид̇о, д̇ад̇онид̣̇аанам̣ мз ид̣̇амаж̇ж̇а бхаяам̣ ааг̇ад̇ам̣, асаббурисзхи самааг̇амо наама д̣̇угко, махаарааж̇аад̇и.
Tattha vāhaneti patitapatite vahituṃ samatthe gaṅgāvahe. Mahodake salileti mahāudake mahāsalileti attho. Ubhayenāpi gaṅgāvahasseva bahuudakataṃ dasseti. Tatonidānanti mahārāja, yo mayhaṃ tayā dassito puriso, eso mayā gaṅgāya vuyhamāno aḍḍharattasamaye kāruññaravaṃ viravanto uddharito, tatonidānaṃ me idamajja bhayaṃ āgataṃ, asappurisehi samāgamo nāma dukkho, mahārājāti.
д̇ам̣ суд̇ваа рааж̇аа д̇асса гуж̇жхид̇ваа ‘‘звам̣ б̣ахуубагаарасса наама г̇ун̣ам̣ на ж̇аанаад̇и, виж̇жхид̇ваа нам̣ ж̇ийвид̇агкаяам̣ баабзссаамий’’д̇и д̣̇асамам̣ г̇аат̇амааха –
Taṃ sutvā rājā tassa kujjhitvā ‘‘evaṃ bahūpakārassa nāma guṇaṃ na jānāti, vijjhitvā naṃ jīvitakkhayaṃ pāpessāmī’’ti dasamaṃ gāthamāha –
126.
126.
‘‘сохам̣ жад̇уббад̇д̇амимам̣ вихан̇г̇амам̣, д̇анужчид̣̇ам̣ хад̣̇аяз оссаж̇аами;
‘‘Sohaṃ catuppattamimaṃ vihaṅgamaṃ, tanucchidaṃ hadaye ossajāmi;
ханаами д̇ам̣ мид̇д̇ад̣̇уб̣бхим̣ агижжагаарим̣, яо д̇аад̣̇исам̣ гаммагад̇ам̣ на ж̇аанз’’д̇и.
Hanāmi taṃ mittadubbhiṃ akiccakāriṃ, yo tādisaṃ kammakataṃ na jāne’’ti.
д̇ад̇т̇а жад̇уббад̇д̇анд̇и жад̇уухи вааж̇абад̇д̇зхи саманнааг̇ад̇ам̣. вихан̇г̇аманд̇и аагаасаг̇аамим̣. д̇анужчид̣̇анд̇и сарийрачинд̣̇анам̣. оссаж̇аамийд̇и зд̇асса хад̣̇аяз виссаж̇ж̇зми.
Tattha catuppattanti catūhi vājapattehi samannāgataṃ. Vihaṅgamanti ākāsagāmiṃ. Tanucchidanti sarīrachindanaṃ. Ossajāmīti etassa hadaye vissajjemi.
д̇ад̇о махаасад̇д̇о ‘‘маа зса мам̣ ниссааяа нассад̇уу’’д̇и жинд̇зд̇ваа згаад̣̇асамам̣ г̇аат̇амааха –
Tato mahāsatto ‘‘mā esa maṃ nissāya nassatū’’ti cintetvā ekādasamaṃ gāthamāha –
127.
127.
‘‘д̇хийрасса б̣ааласса хавз ж̇анинд̣̇а, санд̇о вад̇хам̣ наббасам̣санд̇и ж̇аад̇у;
‘‘Dhīrassa bālassa have janinda, santo vadhaṃ nappasaṃsanti jātu;
гаамам̣ гхарам̣ г̇ажчад̇у баабад̇хаммо, яан̃жасса бхадтам̣ д̇ад̣̇зд̇асса д̣̇зхи;
Kāmaṃ gharaṃ gacchatu pāpadhammo, yañcassa bhaṭṭhaṃ tadetassa dehi;
ахан̃жа д̇з гаамагаро бхаваамий’’д̇и.
Ahañca te kāmakaro bhavāmī’’ti.
д̇ад̇т̇а гааманд̇и гаамзна яат̇ааружияаа ад̇д̇ано гхарам̣ г̇ажчад̇у. яан̃жасса бхадтам̣ д̇ад̣̇зд̇асса д̣̇зхийд̇и яан̃жа д̇асса ‘‘ид̣̇ам̣ наама д̇з д̣̇ассаамий’’д̇и д̇аяаа гат̇ид̇ам̣, д̇ам̣ д̇асса д̣̇зхи. гаамагарод̇и ижчаагаро, яам̣ ижчаси, д̇ам̣ гарохи, мам̣сам̣ ваа мз каад̣̇а, гийл̣аамиг̇ам̣ ваа гарохи, саб̣б̣ад̇т̇а д̇з анугуулавад̇д̇ий бхависсаамийд̇и ад̇т̇о.
Tattha kāmanti kāmena yathāruciyā attano gharaṃ gacchatu. Yañcassa bhaṭṭhaṃ tadetassa dehīti yañca tassa ‘‘idaṃ nāma te dassāmī’’ti tayā kathitaṃ, taṃ tassa dehi. Kāmakaroti icchākaro, yaṃ icchasi, taṃ karohi, maṃsaṃ vā me khāda, kīḷāmigaṃ vā karohi, sabbattha te anukūlavattī bhavissāmīti attho.
д̇ам̣ суд̇ваа рааж̇аа д̇удтамаанасо махаасад̇д̇асса т̇уд̇им̣ гаронд̇о ананд̇арам̣ г̇аат̇амааха –
Taṃ sutvā rājā tuṭṭhamānaso mahāsattassa thutiṃ karonto anantaraṃ gāthamāha –
128.
128.
‘‘ад̣̇д̇хаа руруу ан̃н̃ад̇аро сад̇ам̣ со, яо д̣̇уб̣бхад̇о маанусасса на д̣̇уб̣бхи;
‘‘Addhā rurū aññataro sataṃ so, yo dubbhato mānusassa na dubbhi;
гаамам̣ гхарам̣ г̇ажчад̇у баабад̇хаммо, яан̃жасса бхадтам̣ д̇ад̣̇зд̇асса д̣̇амми;
Kāmaṃ gharaṃ gacchatu pāpadhammo, yañcassa bhaṭṭhaṃ tadetassa dammi;
ахан̃жа д̇з гаамажаарам̣ д̣̇ад̣̇аамий’’д̇и.
Ahañca te kāmacāraṃ dadāmī’’ti.
д̇ад̇т̇а сад̇ам̣ сод̇и ад̣̇д̇хаа д̇вам̣ сад̇ам̣ бан̣д̣ид̇аанам̣ ан̃н̃ад̇аро. гаамажааранд̇и ахам̣ д̇ава д̇хаммагат̇ааяа басийд̣̇ид̇ваа д̇уяхам̣ гаамажаарам̣ абхаяам̣ д̣̇ад̣̇аами, ид̇о бадтааяа д̇умхз ниб̣бхаяаа яат̇ааружияаа вихарат̇аад̇и махаасад̇д̇асса варам̣ ад̣̇ааси.
Tattha sataṃ soti addhā tvaṃ sataṃ paṇḍitānaṃ aññataro. Kāmacāranti ahaṃ tava dhammakathāya pasīditvā tuyhaṃ kāmacāraṃ abhayaṃ dadāmi, ito paṭṭhāya tumhe nibbhayā yathāruciyā viharathāti mahāsattassa varaṃ adāsi.
ат̇а нам̣ махаасад̇д̇о ‘‘махаарааж̇а, мануссаа наама ан̃н̃ам̣ мукзна бхаасанд̇и, ан̃н̃ам̣ гааязна гаронд̇ий’’д̇и бариг̇г̇ан̣ханд̇о д̣̇вз г̇аат̇аа абхааси –
Atha naṃ mahāsatto ‘‘mahārāja, manussā nāma aññaṃ mukhena bhāsanti, aññaṃ kāyena karontī’’ti pariggaṇhanto dve gāthā abhāsi –
129.
129.
‘‘сувиж̇аанам̣ син̇г̇аалаанам̣, сагун̣аанан̃жа вассид̇ам̣;
‘‘Suvijānaṃ siṅgālānaṃ, sakuṇānañca vassitaṃ;
мануссавассид̇ам̣ рааж̇а, д̣̇уб̣б̣иж̇аанад̇арам̣ д̇ад̇о.
Manussavassitaṃ rāja, dubbijānataraṃ tato.
130.
130.
‘‘аби жз ман̃н̃ад̇ий босо, н̃аад̇и мид̇д̇о сакаад̇и ваа;
‘‘Api ce maññatī poso, ñāti mitto sakhāti vā;
яо буб̣б̣з сумано худ̇ваа, бажчаа самбаж̇ж̇ад̇з д̣̇исо’’д̇и.
Yo pubbe sumano hutvā, pacchā sampajjate diso’’ti.
д̇ам̣ суд̇ваа рааж̇аа ‘‘миг̇арааж̇а, маа мам̣ звам̣ ман̃н̃и, ахан̃хи раж̇ж̇ам̣ ж̇аханд̇оби на д̇уяхам̣ д̣̇иннаварам̣ ж̇ахиссам̣, сад̣̇д̣̇ахат̇а, маяха’’нд̇и варам̣ ад̣̇ааси. махаасад̇д̇о д̇асса санд̇игз варам̣ г̇ан̣ханд̇о ад̇д̇аанам̣ аад̣̇им̣ гад̇ваа саб̣б̣асад̇д̇аанам̣ абхаяад̣̇аанам̣ варам̣ г̇ан̣хи. рааж̇ааби д̇ам̣ варам̣ д̣̇ад̇ваа б̣од̇хисад̇д̇ам̣ наг̇арам̣ нзд̇ваа махаасад̇д̇ан̃жа наг̇аран̃жа алан̇гаараабзд̇ваа д̣̇звияаа д̇хаммам̣ д̣̇зсаабзси. махаасад̇д̇о д̣̇звим̣ аад̣̇им̣ гад̇ваа ран̃н̃о жа рааж̇абарисааяа жа мад̇хурааяа мануссабхаасааяа д̇хаммам̣ д̣̇зсзд̇ваа рааж̇аанам̣ д̣̇асахи рааж̇ад̇хаммзхи овад̣̇ид̇ваа махааж̇анам̣ анусаасид̇ваа аран̃н̃ам̣ бависид̇ваа миг̇аг̇ан̣абаривуд̇о ваасам̣ габбзси. рааж̇аа ‘‘саб̣б̣зсам̣ сад̇д̇аанам̣ абхаяам̣ д̣̇аммий’’д̇и наг̇арз бхзрим̣ жараабзси. д̇ад̇о бадтааяа миг̇абагкийнам̣ гожи хад̇т̇ам̣ басаарзд̇ум̣ самад̇т̇о наама наахоси. миг̇аг̇ан̣о мануссаанам̣ сассаани каад̣̇ад̇и, гожи ваарзд̇ум̣ на саггод̇и. махааж̇ано рааж̇ан̇г̇ан̣ам̣ г̇анд̇ваа убаггоси. д̇амад̇т̇ам̣ багаасзнд̇о сад̇т̇аа имам̣ г̇аат̇амааха –
Taṃ sutvā rājā ‘‘migarāja, mā maṃ evaṃ maññi, ahañhi rajjaṃ jahantopi na tuyhaṃ dinnavaraṃ jahissaṃ, saddahatha, mayha’’nti varaṃ adāsi. Mahāsatto tassa santike varaṃ gaṇhanto attānaṃ ādiṃ katvā sabbasattānaṃ abhayadānaṃ varaṃ gaṇhi. Rājāpi taṃ varaṃ datvā bodhisattaṃ nagaraṃ netvā mahāsattañca nagarañca alaṅkārāpetvā deviyā dhammaṃ desāpesi. Mahāsatto deviṃ ādiṃ katvā rañño ca rājaparisāya ca madhurāya manussabhāsāya dhammaṃ desetvā rājānaṃ dasahi rājadhammehi ovaditvā mahājanaṃ anusāsitvā araññaṃ pavisitvā migagaṇaparivuto vāsaṃ kappesi. Rājā ‘‘sabbesaṃ sattānaṃ abhayaṃ dammī’’ti nagare bheriṃ carāpesi. Tato paṭṭhāya migapakkhīnaṃ koci hatthaṃ pasāretuṃ samattho nāma nāhosi. Migagaṇo manussānaṃ sassāni khādati, koci vāretuṃ na sakkoti. Mahājano rājaṅgaṇaṃ gantvā upakkosi. Tamatthaṃ pakāsento satthā imaṃ gāthamāha –
131.
131.
‘‘самааг̇ад̇аа ж̇аанабад̣̇аа, нзг̇амаа жа самааг̇ад̇аа;
‘‘Samāgatā jānapadā, negamā ca samāgatā;
миг̇аа сассаани каад̣̇анд̇и, д̇ам̣ д̣̇зво бадисзд̇хад̇уу’’д̇и.
Migā sassāni khādanti, taṃ devo paṭisedhatū’’ti.
д̇ад̇т̇а д̇ам̣ д̣̇звод̇и д̇ам̣ миг̇аг̇ан̣ам̣ д̣̇зво бадисзд̇хад̇ууд̇и.
Tattha taṃ devoti taṃ migagaṇaṃ devo paṭisedhatūti.
д̇ам̣ суд̇ваа рааж̇аа г̇аат̇аад̣̇ваяамааха –
Taṃ sutvā rājā gāthādvayamāha –
132.
132.
‘‘гаамам̣ ж̇анабад̣̇о мааси, радтан̃жааби винассад̇у;
‘‘Kāmaṃ janapado māsi, raṭṭhañcāpi vinassatu;
на д̇взваахам̣ рурум̣ д̣̇уб̣бхз, д̣̇ад̇ваа абхаяад̣̇агкин̣ам̣.
Na tvevāhaṃ ruruṃ dubbhe, datvā abhayadakkhiṇaṃ.
133.
133.
‘‘маа мз ж̇анабад̣̇о ааси, радтан̃жааби винассад̇у;
‘‘Mā me janapado āsi, raṭṭhañcāpi vinassatu;
на д̇взваахам̣ миг̇арааж̇асса, варам̣ д̣̇ад̇ваа мусаа бхан̣з’’д̇и.
Na tvevāhaṃ migarājassa, varaṃ datvā musā bhaṇe’’ti.
д̇ад̇т̇а маасийд̇и гаамам̣ маяхам̣ ж̇анабад̣̇о маа ход̇у. рурунд̇и на д̇взва ахам̣ суван̣н̣аван̣н̣асса рурумиг̇арааж̇асса абхаяад̣̇агкин̣ам̣ д̣̇ад̇ваа д̣̇уб̣бхиссаамийд̇и.
Tattha māsīti kāmaṃ mayhaṃ janapado mā hotu. Rurunti na tveva ahaṃ suvaṇṇavaṇṇassa rurumigarājassa abhayadakkhiṇaṃ datvā dubbhissāmīti.
махааж̇ано ран̃н̃о важанам̣ суд̇ваа гин̃жи вад̇д̇ум̣ ависаханд̇о бадиггами. саа гат̇аа вид̇т̇ааригаа ахоси. д̇ам̣ суд̇ваа махаасад̇д̇о миг̇аг̇ан̣ам̣ саннибаад̇аабзд̇ваа ‘‘ид̇о бадтааяа мануссаанам̣ сассаани маа каад̣̇ат̇аа’’д̇и овад̣̇ид̇ваа ‘‘ад̇д̇ано кзд̇д̇зсу бан̣н̣асан̃н̃ам̣ б̣анд̇ханд̇уу’’д̇и мануссаанам̣ гхосаабзси. д̇з д̇ат̇аа б̣анд̇хим̣су, д̇ааяа сан̃н̃ааяа миг̇аа яааваж̇ж̇ад̇анаа сассаани на каад̣̇анд̇и.
Mahājano rañño vacanaṃ sutvā kiñci vattuṃ avisahanto paṭikkami. Sā kathā vitthārikā ahosi. Taṃ sutvā mahāsatto migagaṇaṃ sannipātāpetvā ‘‘ito paṭṭhāya manussānaṃ sassāni mā khādathā’’ti ovaditvā ‘‘attano khettesu paṇṇasaññaṃ bandhantū’’ti manussānaṃ ghosāpesi. Te tathā bandhiṃsu, tāya saññāya migā yāvajjatanā sassāni na khādanti.
сад̇т̇аа имам̣ д̇хаммад̣̇зсанам̣ аахарид̇ваа ‘‘на, бхигкавз, ид̣̇аанзва, буб̣б̣зби д̣̇звад̣̇ад̇д̇о агад̇ан̃н̃ууязваа’’д̇и вад̇ваа ж̇аад̇агам̣ самод̇хаанзси ‘‘д̇ад̣̇аа сздтибуд̇д̇о д̣̇звад̣̇ад̇д̇о ахоси, рааж̇аа аананд̣̇о, рурумиг̇арааж̇аа бана ахамзва ахоси’’нд̇и.
Satthā imaṃ dhammadesanaṃ āharitvā ‘‘na, bhikkhave, idāneva, pubbepi devadatto akataññūyevā’’ti vatvā jātakaṃ samodhānesi ‘‘tadā seṭṭhiputto devadatto ahosi, rājā ānando, rurumigarājā pana ahameva ahosi’’nti.
рурумиг̇арааж̇аж̇аад̇агаван̣н̣анаа навамаа.
Rurumigarājajātakavaṇṇanā navamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 482. рурумиг̇арааж̇аж̇аад̇агам̣ • 482. Rurumigarājajātakaṃ
