| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ஸப்³ப³சம்மபடிக்கே²பாதி³கதா²
Sabbacammapaṭikkhepādikathā
255. தீ³பிச்சா²போதி தீ³பிபோதகோ. ஓகு³ம்பி²யந்தீதி பி⁴த்தித³ண்ட³காதீ³ஸு வேடெ²த்வா ப³ந்த⁴ந்தி.
255.Dīpicchāpoti dīpipotako. Ogumphiyantīti bhittidaṇḍakādīsu veṭhetvā bandhanti.
256. அபி⁴னிஸீதி³துந்தி அபி⁴னிஸ்ஸாய நிஸீதி³துங்; அபஸ்ஸயங் கத்வா நிஸீதி³துந்தி அத்தோ². கி³லானேன பி⁴க்கு²னா ஸஉபாஹனேனாதி எத்த² கி³லானோ நாம யோ ந ஸக்கோதி அனுபாஹனோ கா³மங் பவிஸிதுங்.
256.Abhinisīditunti abhinissāya nisīdituṃ; apassayaṃ katvā nisīditunti attho. Gilānena bhikkhunā saupāhanenāti ettha gilāno nāma yo na sakkoti anupāhano gāmaṃ pavisituṃ.
257. குரரக⁴ரேதி ஏவங்னாமகே நக³ரே; ஏதேனஸ்ஸ கோ³சரகா³மோ வுத்தோ. பபதகே பப்³ப³தேதி பபதனாமகே பப்³ப³தே; ஏதேனஸ்ஸ நிவாஸனட்டா²னங் வுத்தங். ஸோணோதி தஸ்ஸ நாமங். கோடிஅக்³க⁴னகங் பன கண்ணபிளந்த⁴னகங் தா⁴ரேதி, தஸ்மா ‘‘குடிகண்ணோ’’தி வுச்சதி; கோடிகண்ணோதி அத்தோ². பாஸாதி³கந்தி பஸாத³ஜனகங். பஸாத³னீயந்தி இத³ங் தஸ்ஸேவ அத்த²வேவசனங். உத்தமத³மத²ஸமத²ந்தி உத்தமங் த³மத²ஞ்ச ஸமத²ஞ்ச பஞ்ஞஞ்ச ஸமாதி⁴ஞ்ச காயூபஸமஞ்ச சித்தூபஸமஞ்சாதிபி அத்தோ². த³ந்தந்தி ஸப்³பே³ஸங் விஸூகாயிகவிப்ப²ந்தி³தானங் உபச்சி²ன்னத்தா த³ந்தங்; கீ²ணகிலேஸந்தி அத்தோ². கு³த்தந்தி ஸங்வரகு³த்தியா கு³த்தங். ஸந்திந்த்³ரியந்தி யதிந்த்³ரியங். நாக³ந்தி ஆகு³விரஹிதங். திண்ணங் மே வஸ்ஸானங் அச்சயேனாதி மம பப்³ப³ஜ்ஜாதி³வஸதோ பட்டா²ய திண்ணங் வஸ்ஸானங் அச்சயேன. உபஸம்பத³ங் அலத்த²ந்தி அஹங் உபஸம்பத³ங் அலபி⁴ங் . கண்ஹுத்தராதி கண்ஹமத்திகுத்தரா; உபரி வட்³டி⁴தகண்ஹமத்திகாதி அத்தோ². கோ³கண்டகஹதாதி கு³ன்னங் கு²ரேஹி அக்கந்தபூ⁴மிதோ ஸமுட்டி²தேஹி கோ³கண்டகேஹி உபஹதா. தே கிர கோ³கண்டகே ஏகபடலிகா உபாஹனா ரக்கி²துங் ந ஸக்கொந்தி; ஏவங் க²ரா ஹொந்தி. ஏரகூ³, மோரகூ³, மஜ்ஜாரூ, ஜந்தூதி இமா சதஸ்ஸோபி திணஜாதியோ; ஏதேஹி கடஸாரகே ச தட்டிகாயோ ச கரொந்தி. எத்த² ஏரகூ³தி ஏரகதிணங்; தங் ஓளாரிகங். மோரகூ³திணங் தம்ப³ஸீஸங் முது³கங் ஸுக²ஸம்ப²ஸ்ஸங், தேன கததட்டிகா நிபஜ்ஜித்வா வுட்டி²தமத்தே புன உத்³து⁴மாதா ஹுத்வா திட்ட²தி. மஜ்ஜாருனா ஸாடகேபி கரொந்தி. ஜந்துஸ்ஸ மணிஸதி³ஸோ வண்ணோ ஹோதி. ஸேனாஸனங் பஞ்ஞபேஸீதி பி⁴ஸிங் வா கடஸாரகங் வா பஞ்ஞபேஸி; பஞ்ஞபெத்வா ச பன ஸோணஸ்ஸ ஆரோசேதி – ‘‘ஆவுஸோ ஸத்தா² தயா ஸத்³தி⁴ங் ஏகாவாஸே வஸிதுகாமோ, க³ந்த⁴குடியங்யேவ தே ஸேனாஸனங் பஞ்ஞத்த’’ந்தி.
257.Kuraraghareti evaṃnāmake nagare; etenassa gocaragāmo vutto. Papatake pabbateti papatanāmake pabbate; etenassa nivāsanaṭṭhānaṃ vuttaṃ. Soṇoti tassa nāmaṃ. Koṭiagghanakaṃ pana kaṇṇapiḷandhanakaṃ dhāreti, tasmā ‘‘kuṭikaṇṇo’’ti vuccati; koṭikaṇṇoti attho. Pāsādikanti pasādajanakaṃ. Pasādanīyanti idaṃ tasseva atthavevacanaṃ. Uttamadamathasamathanti uttamaṃ damathañca samathañca paññañca samādhiñca kāyūpasamañca cittūpasamañcātipi attho. Dantanti sabbesaṃ visūkāyikavipphanditānaṃ upacchinnattā dantaṃ; khīṇakilesanti attho. Guttanti saṃvaraguttiyā guttaṃ. Santindriyanti yatindriyaṃ. Nāganti āguvirahitaṃ. Tiṇṇaṃ me vassānaṃ accayenāti mama pabbajjādivasato paṭṭhāya tiṇṇaṃ vassānaṃ accayena. Upasampadaṃ alatthanti ahaṃ upasampadaṃ alabhiṃ . Kaṇhuttarāti kaṇhamattikuttarā; upari vaḍḍhitakaṇhamattikāti attho. Gokaṇṭakahatāti gunnaṃ khurehi akkantabhūmito samuṭṭhitehi gokaṇṭakehi upahatā. Te kira gokaṇṭake ekapaṭalikā upāhanā rakkhituṃ na sakkonti; evaṃ kharā honti. Eragū, moragū, majjārū, jantūti imā catassopi tiṇajātiyo; etehi kaṭasārake ca taṭṭikāyo ca karonti. Ettha eragūti erakatiṇaṃ; taṃ oḷārikaṃ. Moragūtiṇaṃ tambasīsaṃ mudukaṃ sukhasamphassaṃ, tena katataṭṭikā nipajjitvā vuṭṭhitamatte puna uddhumātā hutvā tiṭṭhati. Majjārunā sāṭakepi karonti. Jantussa maṇisadiso vaṇṇo hoti. Senāsanaṃ paññapesīti bhisiṃ vā kaṭasārakaṃ vā paññapesi; paññapetvā ca pana soṇassa āroceti – ‘‘āvuso satthā tayā saddhiṃ ekāvāse vasitukāmo, gandhakuṭiyaṃyeva te senāsanaṃ paññatta’’nti.
258. அயங் க்²வஸ்ஸ காலோதி அயங் கோ² காலோ ப⁴வெய்ய. பரித³ஸ்ஸீதி பரித³ஸ்ஸேஸி. ‘‘இத³ஞ்சித³ஞ்ச வதெ³ய்யாஸீதி யங் மே உபஜ்ஜா²யோ ஜானாபேஸி, தஸ்ஸ அயங் காலோ ப⁴வெய்ய, ஹந்த³ தா³னி ஆரோசேமி தங் ஸாஸன’’ந்தி அயமெத்த² அதி⁴ப்பாயோ.
258.Ayaṃ khvassa kāloti ayaṃ kho kālo bhaveyya. Paridassīti paridassesi. ‘‘Idañcidañca vadeyyāsīti yaṃ me upajjhāyo jānāpesi, tassa ayaṃ kālo bhaveyya, handa dāni ārocemi taṃ sāsana’’nti ayamettha adhippāyo.
259. வினயத⁴ரபஞ்சமேனாதி அனுஸ்ஸாவனாசரியபஞ்சமேன. அனுஜானாமி பி⁴க்க²வே ஸப்³ப³பச்சந்திமேஸு ஜனபதே³ஸு கு³ணங்கு³ணூபாஹனந்தி எத்த² மனுஸ்ஸசம்மங் ட²பெத்வா யேன கேனசி சம்மேன உபாஹனா வட்டதி. உபாஹனகோஸகஸத்த²கோஸககுஞ்சிககோஸகேஸுபி ஏஸேவ நயோ. சம்மானி அத்த²ரணானீதி எத்த² பன யங்கிஞ்சி ஏளகசம்மங் அஜசம்மஞ்ச அத்த²ரித்வா நிபஜ்ஜிதுங் வா நிஸீதி³துங் வா வட்டதி. மிக³சம்மே ஏணீமிகோ³ வாதமிகோ³ பஸத³மிகோ³ குரங்க³மிகோ³ மிக³மாதுகோ ரோஹிதமிகோ³தி ஏதேஸங்யேவ சம்மானி வட்டந்தி. அஞ்ஞேஸங் பன –
259.Vinayadharapañcamenāti anussāvanācariyapañcamena. Anujānāmi bhikkhave sabbapaccantimesu janapadesu guṇaṅguṇūpāhananti ettha manussacammaṃ ṭhapetvā yena kenaci cammena upāhanā vaṭṭati. Upāhanakosakasatthakosakakuñcikakosakesupi eseva nayo. Cammāni attharaṇānīti ettha pana yaṃkiñci eḷakacammaṃ ajacammañca attharitvā nipajjituṃ vā nisīdituṃ vā vaṭṭati. Migacamme eṇīmigo vātamigo pasadamigo kuraṅgamigo migamātuko rohitamigoti etesaṃyeva cammāni vaṭṭanti. Aññesaṃ pana –
மக்கடோ காளஸீஹோ ச, ஸரபோ⁴ கத³லீமிகோ³;
Makkaṭo kāḷasīho ca, sarabho kadalīmigo;
யே ச வாளமிகா³ கேசி, தேஸங் சம்மங் ந வட்டதி.
Ye ca vāḷamigā keci, tesaṃ cammaṃ na vaṭṭati.
தத்த² வாளமிகா³தி ஸீஹப்³யக்³க⁴அச்ச²தரச்சா²; ந கேவலஞ்ச ஏதேஸங்யேவ, யேஸங் பன சம்மங் வட்டதீதி வுத்தங், தே ட²பெத்வா அவஸேஸா அந்தமஸோ கோ³மஹிங்ஸஸஸபி³ளாராத³யோபி ஸப்³பே³ இமஸ்மிங் அத்தே² வாளமிகா³த்வேவ வேதி³தப்³பா³. ஏதேஸஞ்ஹி ஸப்³பே³ஸங் சம்மங் ந வட்டதி. ந தாவ தங் க³ணனூபக³ங் யாவ ந ஹத்த²ங் க³ச்ச²தீதி யாவ ஆஹரித்வா வா ந தி³ன்னங், தும்ஹாகங் ப⁴ந்தே சீவரங் உப்பன்னந்தி பஹிணித்வா வா நாரோசிதங், தாவ க³ணனங் ந உபேதி. ஸசே அனதி⁴ட்டி²தங், வட்டதி; அதி⁴ட்டி²தஞ்ச க³ணனங் ந உபேதீதி அத்தோ². யதா³ பன ஆனெத்வா வா தி³ன்னங் ஹோதி, உப்பன்னந்தி வா ஸுதங், ததோ பட்டா²ய த³ஸாஹமேவ பரிஹாரங் லப⁴தீதி.
Tattha vāḷamigāti sīhabyagghaacchataracchā; na kevalañca etesaṃyeva, yesaṃ pana cammaṃ vaṭṭatīti vuttaṃ, te ṭhapetvā avasesā antamaso gomahiṃsasasabiḷārādayopi sabbe imasmiṃ atthe vāḷamigātveva veditabbā. Etesañhi sabbesaṃ cammaṃ na vaṭṭati. Na tāva taṃ gaṇanūpagaṃ yāva na hatthaṃ gacchatīti yāva āharitvā vā na dinnaṃ, tumhākaṃ bhante cīvaraṃ uppannanti pahiṇitvā vā nārocitaṃ, tāva gaṇanaṃ na upeti. Sace anadhiṭṭhitaṃ, vaṭṭati; adhiṭṭhitañca gaṇanaṃ na upetīti attho. Yadā pana ānetvā vā dinnaṃ hoti, uppannanti vā sutaṃ, tato paṭṭhāya dasāhameva parihāraṃ labhatīti.
சம்மக்க²ந்த⁴கவண்ணனா நிட்டி²தா.
Cammakkhandhakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
155. ஸப்³ப³சம்மபடிக்கே²போ • 155. Sabbacammapaṭikkhepo
156. கி³ஹிவிகதானுஞ்ஞாதாதி³ • 156. Gihivikatānuññātādi
157. ஸோணகுடிகண்ணவத்து² • 157. Soṇakuṭikaṇṇavatthu
158. மஹாகச்சானஸ்ஸ பஞ்சவரபரித³ஸ்ஸனா • 158. Mahākaccānassa pañcavaraparidassanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
கி³ஹிவிகதானுஞ்ஞாதாதி³கதா²வண்ணனா • Gihivikatānuññātādikathāvaṇṇanā
ஸோணகுடிகண்ணவத்து²கதா²வண்ணனா • Soṇakuṭikaṇṇavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸப்³ப³சம்மபடிக்கே²பாதி³கதா²வண்ணனா • Sabbacammapaṭikkhepādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கி³ஹிவிகதானுஞ்ஞாதாதி³கதா²வண்ணனா • Gihivikatānuññātādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi
155. ஸப்³ப³சம்மபடிக்கே²பாதி³கதா² • 155. Sabbacammapaṭikkhepādikathā
157. ஸோணகுடிகண்ணவத்து²கதா² • 157. Soṇakuṭikaṇṇavatthukathā
