[241] 1. ஸப்³ப³தா³ட²ஜாதகவண்ணனா

[241] 1. Sabbadāṭhajātakavaṇṇanā

ஸிங்கா³லோ மானத்த²த்³தோ⁴தி இத³ங் ஸத்தா² வேளுவனே விஹரந்தோ தே³வத³த்தங் ஆரப்³ப⁴ கதே²ஸி. தே³வத³த்தோ அஜாதஸத்துங் பஸாதெ³த்வா உப்பாதி³தங் லாப⁴ஸக்காரங் சிரட்டி²திகங் காதுங் நாஸக்கி², நாளாகி³ரிபயோஜனே பாடிஹாரியஸ்ஸ தி³ட்ட²காலதோ பட்டா²ய தஸ்ஸ ஸோ லாப⁴ஸக்காரோ அந்தரதா⁴யி. அதே²கதி³வஸங் பி⁴க்கூ² த⁴ம்மஸபா⁴யங் கத²ங் ஸமுட்டா²பேஸுங் – ‘‘ஆவுஸோ, தே³வத³த்தோ லாப⁴ஸக்காரங் உப்பாதெ³த்வா சிரட்டி²திகங் காதுங் நாஸக்கீ²’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, தே³வத³த்தோ இதா³னேவ அத்தனோ உப்பன்னங் லாப⁴ஸக்காரங் அந்தரதா⁴பேதி, புப்³பே³பி அந்தரதா⁴பேஸியேவா’’தி வத்வா அதீதங் ஆஹரி.

Siṅgālomānatthaddhoti idaṃ satthā veḷuvane viharanto devadattaṃ ārabbha kathesi. Devadatto ajātasattuṃ pasādetvā uppāditaṃ lābhasakkāraṃ ciraṭṭhitikaṃ kātuṃ nāsakkhi, nāḷāgiripayojane pāṭihāriyassa diṭṭhakālato paṭṭhāya tassa so lābhasakkāro antaradhāyi. Athekadivasaṃ bhikkhū dhammasabhāyaṃ kathaṃ samuṭṭhāpesuṃ – ‘‘āvuso, devadatto lābhasakkāraṃ uppādetvā ciraṭṭhitikaṃ kātuṃ nāsakkhī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, devadatto idāneva attano uppannaṃ lābhasakkāraṃ antaradhāpeti, pubbepi antaradhāpesiyevā’’ti vatvā atītaṃ āhari.

அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ தஸ்ஸ புரோஹிதோ அஹோஸி திண்ணங் வேதா³னங் அட்டா²ரஸன்னஞ்ச ஸிப்பானங் பாரங் க³தோ. ஸோ பத²வீஜயமந்தங் நாம ஜானாதி. பத²வீஜயமந்தோதி ஆவட்டனமந்தோ வுச்சதி. அதே²கதி³வஸங் போ³தி⁴ஸத்தோ ‘‘தங் மந்தங் ஸஜ்ஜா²யிஸ்ஸாமீ’’தி ஏகஸ்மிங் அங்க³ணட்டா²னே பிட்டி²பாஸாணே நிஸீதி³த்வா ஸஜ்ஜா²யமகாஸி. தங் கிர மந்தங் அஞ்ஞவிஹிதங் தி⁴திவிரஹிதங் ஸாவேதுங் ந ஸக்கா, தஸ்மா நங் ஸோ ததா²ரூபே டா²னே ஸஜ்ஜா²யதி. அத²ஸ்ஸ ஸஜ்ஜா²யனகாலே ஏகோ ஸிங்கா³லோ ஏகஸ்மிங் பி³லே நிபன்னோ தங் மந்தங் ஸுத்வாவ பகு³ணமகாஸி. ஸோ கிர அனந்தராதீதே அத்தபா⁴வே பகு³ணபத²வீஜயமந்தோ ஏகோ ப்³ராஹ்மணோ அஹோஸி. போ³தி⁴ஸத்தோ ஸஜ்ஜா²யங் கத்வா உட்டா²ய ‘‘பகு³ணோ வத மே அயங் மந்தோ’’தி ஆஹ. ஸிங்கா³லோ பி³லா நிக்க²மித்வா ‘‘அம்போ⁴ ப்³ராஹ்மண, அயங் மந்தோ தயாபி மமேவ பகு³ணதரோ’’தி வத்வா பலாயி. போ³தி⁴ஸத்தோ ‘‘அயங் ஸிங்கா³லோ மஹந்தங் அகுஸலங் கரிஸ்ஸதீ’’தி ‘‘க³ண்ஹத² க³ண்ஹதா²’’தி தோ²கங் அனுப³ந்தி⁴. ஸிங்கா³லோ பலாயித்வா அரஞ்ஞங் பாவிஸி.

Atīte bārāṇasiyaṃ brahmadatte rajjaṃ kārente bodhisatto tassa purohito ahosi tiṇṇaṃ vedānaṃ aṭṭhārasannañca sippānaṃ pāraṃ gato. So pathavījayamantaṃ nāma jānāti. Pathavījayamantoti āvaṭṭanamanto vuccati. Athekadivasaṃ bodhisatto ‘‘taṃ mantaṃ sajjhāyissāmī’’ti ekasmiṃ aṅgaṇaṭṭhāne piṭṭhipāsāṇe nisīditvā sajjhāyamakāsi. Taṃ kira mantaṃ aññavihitaṃ dhitivirahitaṃ sāvetuṃ na sakkā, tasmā naṃ so tathārūpe ṭhāne sajjhāyati. Athassa sajjhāyanakāle eko siṅgālo ekasmiṃ bile nipanno taṃ mantaṃ sutvāva paguṇamakāsi. So kira anantarātīte attabhāve paguṇapathavījayamanto eko brāhmaṇo ahosi. Bodhisatto sajjhāyaṃ katvā uṭṭhāya ‘‘paguṇo vata me ayaṃ manto’’ti āha. Siṅgālo bilā nikkhamitvā ‘‘ambho brāhmaṇa, ayaṃ manto tayāpi mameva paguṇataro’’ti vatvā palāyi. Bodhisatto ‘‘ayaṃ siṅgālo mahantaṃ akusalaṃ karissatī’’ti ‘‘gaṇhatha gaṇhathā’’ti thokaṃ anubandhi. Siṅgālo palāyitvā araññaṃ pāvisi.

ஸோ க³ந்த்வா ஏகங் ஸிங்கா³லிங் தோ²கங் ஸரீரே ட³ங்ஸி, ‘‘கிங், ஸாமீ’’தி ச வுத்தே ‘‘மய்ஹங் ஜானாஸி ந ஜானாஸீ’’தி ஆஹ. ஸா ‘‘ஆம, ஜானாமீ’’தி ஸம்படிச்சி². ஸோ பத²வீஜயமந்தங் பரிவத்தெத்வா அனேகானி ஸிங்கா³லஸதானி ஆணாபெத்வா ஸப்³பே³பி ஹத்தி²அஸ்ஸஸீஹப்³யக்³க⁴ஸூகரமிகா³த³யோ சதுப்பதே³ அத்தனோ ஸந்திகே அகாஸி. கத்வா ச பன ஸப்³ப³தா³டோ² நாம ராஜா ஹுத்வா ஏகங் ஸிங்கா³லிங் அக்³க³மஹேஸிங் அகாஸி. த்³வின்னங் ஹத்தீ²னங் பிட்டே² ஸீஹோ திட்ட²தி, ஸீஹபிட்டே² ஸப்³ப³தா³டோ² ஸிங்கா³லோ ராஜா ஸிங்கா³லியா அக்³க³மஹேஸியா ஸத்³தி⁴ங் நிஸீத³தி, மஹந்தோ யஸோ அஹோஸி. ஸோ யஸமஹந்தேன பமஜ்ஜித்வா மானங் உப்பாதெ³த்வா ‘‘பா³ராணஸிரஜ்ஜங் க³ண்ஹிஸ்ஸாமீ’’தி ஸப்³ப³சதுப்பத³பரிவுதோ பா³ராணஸியா அவிதூ³ரட்டா²னங் ஸம்பாபுணி, பரிஸா த்³வாத³ஸயோஜனா அஹோஸி. ஸோ அவிதூ³ரே டி²தோயேவ ‘‘ரஜ்ஜங் வா தே³து, யுத்³த⁴ங் வா’’தி ரஞ்ஞோ ஸாஸனங் பேஸேஸி. பா³ராணஸிவாஸினோ பீ⁴ததஸிதா நக³ரத்³வாரானி பித³ஹித்வா அட்ட²ங்ஸு.

So gantvā ekaṃ siṅgāliṃ thokaṃ sarīre ḍaṃsi, ‘‘kiṃ, sāmī’’ti ca vutte ‘‘mayhaṃ jānāsi na jānāsī’’ti āha. Sā ‘‘āma, jānāmī’’ti sampaṭicchi. So pathavījayamantaṃ parivattetvā anekāni siṅgālasatāni āṇāpetvā sabbepi hatthiassasīhabyagghasūkaramigādayo catuppade attano santike akāsi. Katvā ca pana sabbadāṭho nāma rājā hutvā ekaṃ siṅgāliṃ aggamahesiṃ akāsi. Dvinnaṃ hatthīnaṃ piṭṭhe sīho tiṭṭhati, sīhapiṭṭhe sabbadāṭho siṅgālo rājā siṅgāliyā aggamahesiyā saddhiṃ nisīdati, mahanto yaso ahosi. So yasamahantena pamajjitvā mānaṃ uppādetvā ‘‘bārāṇasirajjaṃ gaṇhissāmī’’ti sabbacatuppadaparivuto bārāṇasiyā avidūraṭṭhānaṃ sampāpuṇi, parisā dvādasayojanā ahosi. So avidūre ṭhitoyeva ‘‘rajjaṃ vā detu, yuddhaṃ vā’’ti rañño sāsanaṃ pesesi. Bārāṇasivāsino bhītatasitā nagaradvārāni pidahitvā aṭṭhaṃsu.

போ³தி⁴ஸத்தோ ராஜானங் உபஸங்கமித்வா ‘‘மா பா⁴யி, மஹாராஜ, ஸப்³ப³தா³ட²ஸிங்கா³லேன ஸத்³தி⁴ங் யுத்³த⁴ங் மம பா⁴ரோ, ட²பெத்வா மங் அஞ்ஞோ தேன ஸத்³தி⁴ங் யுஜ்ஜி²துங் ஸமத்தோ² நாம நத்தீ²’’தி ராஜானஞ்ச நாக³ரே ச ஸமஸ்ஸாஸெத்வா ‘‘கிந்தி கத்வா நு கோ² ஸப்³ப³தா³டோ² ரஜ்ஜங் க³ஹெஸ்ஸதி, புச்சி²ஸ்ஸாமி தாவ ந’’ந்தி த்³வாரட்டாலகங் அபி⁴ருஹித்வா ‘‘ஸம்ம ஸப்³ப³தா³ட², கிந்தி கத்வா இமங் ரஜ்ஜங் க³ண்ஹிஸ்ஸஸீ’’தி புச்சி². ‘‘ஸீஹனாத³ங் நதா³பெத்வா மஹாஜனங் ஸத்³தே³ன ஸந்தாஸெத்வா க³ண்ஹிஸ்ஸாமீ’’தி. போ³தி⁴ஸத்தோ ‘‘அத்தே²த’’ந்தி ஞத்வா அட்டாலகா ஓருய்ஹ ‘‘ஸகலத்³வாத³ஸயோஜனிகபா³ராணஸினக³ரவாஸினோ கண்ணச்சி²த்³தா³னி மாஸபிட்டே²ன லஞ்ஜந்தூ’’தி பே⁴ரிங் சராபேஸி. மஹாஜனோ பே⁴ரியா ஆணங் ஸுத்வா அந்தமஸோ பி³ளாலே உபாதா³ய ஸப்³ப³சதுப்பதா³னஞ்சேவ அத்தனோ ச கண்ணச்சி²த்³தா³னி யதா² பரஸ்ஸ ஸத்³த³ங் ஸோதுங் ந ஸக்கா, ஏவங் மாஸபிட்டே²ன லஞ்ஜி.

Bodhisatto rājānaṃ upasaṅkamitvā ‘‘mā bhāyi, mahārāja, sabbadāṭhasiṅgālena saddhiṃ yuddhaṃ mama bhāro, ṭhapetvā maṃ añño tena saddhiṃ yujjhituṃ samattho nāma natthī’’ti rājānañca nāgare ca samassāsetvā ‘‘kinti katvā nu kho sabbadāṭho rajjaṃ gahessati, pucchissāmi tāva na’’nti dvāraṭṭālakaṃ abhiruhitvā ‘‘samma sabbadāṭha, kinti katvā imaṃ rajjaṃ gaṇhissasī’’ti pucchi. ‘‘Sīhanādaṃ nadāpetvā mahājanaṃ saddena santāsetvā gaṇhissāmī’’ti. Bodhisatto ‘‘attheta’’nti ñatvā aṭṭālakā oruyha ‘‘sakaladvādasayojanikabārāṇasinagaravāsino kaṇṇacchiddāni māsapiṭṭhena lañjantū’’ti bheriṃ carāpesi. Mahājano bheriyā āṇaṃ sutvā antamaso biḷāle upādāya sabbacatuppadānañceva attano ca kaṇṇacchiddāni yathā parassa saddaṃ sotuṃ na sakkā, evaṃ māsapiṭṭhena lañji.

அத² போ³தி⁴ஸத்தோ புன அட்டாலகங் அபி⁴ருஹித்வா ‘‘ஸப்³ப³தா³டா²’’தி ஆஹ. ‘‘கிங், ப்³ராஹ்மணா’’தி? ‘‘இமங் ரஜ்ஜங் கிந்தி கத்வா க³ண்ஹிஸ்ஸஸீ’’தி? ‘‘ஸீஹனாத³ங் நதா³பெத்வா மனுஸ்ஸே தாஸெத்வா ஜீவிதக்க²யங் பாபெத்வா க³ண்ஹிஸ்ஸாமீ’’தி. ‘‘ஸீஹனாத³ங் நதா³பேதுங் ந ஸக்கி²ஸ்ஸஸி. ஜாதிஸம்பன்னா ஹி ஸுரத்தஹத்த²பாதா³ கேஸரஸீஹராஜானோ தாதி³ஸஸ்ஸ ஜரஸிங்கா³லஸ்ஸ ஆணங் ந கரிஸ்ஸந்தீ’’தி. ஸிங்கா³லோ மானத்த²த்³தோ⁴ ஹுத்வா ‘‘அஞ்ஞே தாவ ஸீஹா திட்ட²ந்து, யஸ்ஸாஹங் பிட்டே² நிஸின்னோ, தஞ்ஞேவ நதா³பெஸ்ஸாமீ’’தி ஆஹ. ‘‘தேன ஹி நதா³பேஹி, யதி³ ஸக்கோஸீ’’தி. ஸோ யஸ்மிங் ஸீஹே நிஸின்னோ, தஸ்ஸ ‘‘நதா³ஹீ’’தி பாதே³ன ஸஞ்ஞங் அதா³ஸி. ஸீஹோ ஹத்தி²கும்பே⁴ முக²ங் உப்பீளெத்வா திக்க²த்துங் அப்படிவத்தியங் ஸீஹனாத³ங் நதி³. ஹத்தீ² ஸந்தாஸப்பத்தா ஹுத்வா ஸிங்கா³லங் பாத³மூலே பாதெத்வா பாதே³னஸ்ஸ ஸீஸங் அக்கமித்வா சுண்ணவிசுண்ணங் அகங்ஸு, ஸப்³ப³தா³டோ² தத்தே²வ ஜீவிதக்க²யங் பத்தோ. தேபி ஹத்தீ² ஸீஹனாத³ங் ஸுத்வா மரணப⁴யதஜ்ஜிதா அஞ்ஞமஞ்ஞங் ஓவிஜ்ஜி²த்வா தத்தே²வ ஜீவிதக்க²யங் பாபுணிங்ஸு, ட²பெத்வா ஸீஹே ஸேஸாபி மிக³ஸூகராத³யோ ஸஸபி³ளாரபரியோஸானா ஸப்³பே³ சதுப்பாதா³ தத்தே²வ ஜீவிதக்க²யங் பாபுணிங்ஸு. ஸீஹா பலாயித்வா அரஞ்ஞங் பவிஸிங்ஸு, த்³வாத³ஸயோஜனிகோ மங்ஸராஸி அஹோஸி. போ³தி⁴ஸத்தோ அட்டாலகா ஓதரித்வா நக³ரத்³வாரானி விவராபெத்வா ‘‘ஸப்³பே³ அத்தனோ கண்ணேஸு மாஸபிட்ட²ங் அபனெத்வா மங்ஸத்தி²கா மங்ஸங் ஆஹரந்தூ’’தி நக³ரே பே⁴ரிங் சராபேஸி. மனுஸ்ஸா அல்லமங்ஸங் கா²தி³த்வா ஸேஸங் ஸுக்கா²பெத்வா வல்லூரமகங்ஸு. தஸ்மிங் கிர காலே வல்லூரகரணங் உத³பாதீ³தி வத³ந்தி.

Atha bodhisatto puna aṭṭālakaṃ abhiruhitvā ‘‘sabbadāṭhā’’ti āha. ‘‘Kiṃ, brāhmaṇā’’ti? ‘‘Imaṃ rajjaṃ kinti katvā gaṇhissasī’’ti? ‘‘Sīhanādaṃ nadāpetvā manusse tāsetvā jīvitakkhayaṃ pāpetvā gaṇhissāmī’’ti. ‘‘Sīhanādaṃ nadāpetuṃ na sakkhissasi. Jātisampannā hi surattahatthapādā kesarasīharājāno tādisassa jarasiṅgālassa āṇaṃ na karissantī’’ti. Siṅgālo mānatthaddho hutvā ‘‘aññe tāva sīhā tiṭṭhantu, yassāhaṃ piṭṭhe nisinno, taññeva nadāpessāmī’’ti āha. ‘‘Tena hi nadāpehi, yadi sakkosī’’ti. So yasmiṃ sīhe nisinno, tassa ‘‘nadāhī’’ti pādena saññaṃ adāsi. Sīho hatthikumbhe mukhaṃ uppīḷetvā tikkhattuṃ appaṭivattiyaṃ sīhanādaṃ nadi. Hatthī santāsappattā hutvā siṅgālaṃ pādamūle pātetvā pādenassa sīsaṃ akkamitvā cuṇṇavicuṇṇaṃ akaṃsu, sabbadāṭho tattheva jīvitakkhayaṃ patto. Tepi hatthī sīhanādaṃ sutvā maraṇabhayatajjitā aññamaññaṃ ovijjhitvā tattheva jīvitakkhayaṃ pāpuṇiṃsu, ṭhapetvā sīhe sesāpi migasūkarādayo sasabiḷārapariyosānā sabbe catuppādā tattheva jīvitakkhayaṃ pāpuṇiṃsu. Sīhā palāyitvā araññaṃ pavisiṃsu, dvādasayojaniko maṃsarāsi ahosi. Bodhisatto aṭṭālakā otaritvā nagaradvārāni vivarāpetvā ‘‘sabbe attano kaṇṇesu māsapiṭṭhaṃ apanetvā maṃsatthikā maṃsaṃ āharantū’’ti nagare bheriṃ carāpesi. Manussā allamaṃsaṃ khāditvā sesaṃ sukkhāpetvā vallūramakaṃsu. Tasmiṃ kira kāle vallūrakaraṇaṃ udapādīti vadanti.

ஸத்தா² இமங் த⁴ம்மதே³ஸனங் ஆஹரித்வா இமா அபி⁴ஸம்பு³த்³த⁴கா³தா² வத்வா ஜாதகங் ஸமோதா⁴னேஸி –

Satthā imaṃ dhammadesanaṃ āharitvā imā abhisambuddhagāthā vatvā jātakaṃ samodhānesi –

182.

‘‘ஸிங்கா³லோ மானத்த²த்³தோ⁴ ச, பரிவாரேன அத்தி²கோ;

‘‘Siṅgālo mānatthaddho ca, parivārena atthiko;

பாபுணி மஹதிங் பூ⁴மிங், ராஜாஸி ஸப்³ப³தா³டி²னங்.

Pāpuṇi mahatiṃ bhūmiṃ, rājāsi sabbadāṭhinaṃ.

183.

‘‘ஏவமேவ மனுஸ்ஸேஸு, யோ ஹோதி பரிவாரவா;

‘‘Evameva manussesu, yo hoti parivāravā;

ஸோ ஹி தத்த² மஹா ஹோதி, ஸிங்கா³லோ விய தா³டி²ன’’ந்தி.

So hi tattha mahā hoti, siṅgālo viya dāṭhina’’nti.

தத்த² மானத்த²த்³தோ⁴தி பரிவாரங் நிஸ்ஸாய உப்பன்னேன மானேன த²த்³தோ⁴. பரிவாரேன அத்தி²கோதி உத்தரிம்பி பரிவாரேன அத்தி²கோ ஹுத்வா. மஹதிங் பூ⁴மிந்தி மஹந்தங் ஸம்பத்திங். ராஜாஸி ஸப்³ப³தா³டி²னந்தி ஸப்³பே³ஸங் தா³டீ²னங் ராஜா ஆஸி. ஸோ ஹி தத்த² மஹா ஹோதீதி ஸோ பரிவாரஸம்பன்னோ புரிஸோ தேஸு பரிவாரேஸு மஹா நாம ஹோதி. ஸிங்கா³லோ விய தா³டி²னந்தி யதா² ஸிங்கா³லோ தா³டீ²னங் மஹா அஹோஸி, ஏவங் மஹா ஹோதி, அத² ஸோ ஸிங்கா³லோ விய பமாத³ங் ஆபஜ்ஜித்வா தங் பரிவாரங் நிஸ்ஸாய வினாஸங் பாபுணாதீதி.

Tattha mānatthaddhoti parivāraṃ nissāya uppannena mānena thaddho. Parivārena atthikoti uttarimpi parivārena atthiko hutvā. Mahatiṃ bhūminti mahantaṃ sampattiṃ. Rājāsi sabbadāṭhinanti sabbesaṃ dāṭhīnaṃ rājā āsi. So hi tattha mahā hotīti so parivārasampanno puriso tesu parivāresu mahā nāma hoti. Siṅgālo viya dāṭhinanti yathā siṅgālo dāṭhīnaṃ mahā ahosi, evaṃ mahā hoti, atha so siṅgālo viya pamādaṃ āpajjitvā taṃ parivāraṃ nissāya vināsaṃ pāpuṇātīti.

‘‘ததா³ ஸிங்கா³லோ தே³வத³த்தோ அஹோஸி, ராஜா ஸாரிபுத்தோ, புரோஹிதோ பன அஹமேவ அஹோஸி’’ந்தி.

‘‘Tadā siṅgālo devadatto ahosi, rājā sāriputto, purohito pana ahameva ahosi’’nti.

ஸப்³ப³தா³ட²ஜாதகவண்ணனா பட²மா.

Sabbadāṭhajātakavaṇṇanā paṭhamā.

Next: [242] 2. ஸுனக²ஜாதகவண்ணனா • [242] 2. Sunakhajātakavaṇṇanā

Related texts:

திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 241. ஸப்³ப³தா³டி²ஜாதகங் • 241. Sabbadāṭhijātakaṃ

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact