| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
14. саб̣б̣агаамид̇т̇зраг̇аат̇ааван̣н̣анаа
14. Sabbakāmittheragāthāvaṇṇanā
д̣̇вибаад̣̇агод̇иаад̣̇игаа ааяасмад̇о саб̣б̣агаамид̇т̇зрасса г̇аат̇аа. гаа уббад̇д̇и? аяам̣ гира бад̣̇умуд̇д̇арасса бхаг̇авад̇о саасанз уббаннам̣ аб̣б̣уд̣̇ам̣ сод̇хзд̇ваа бадибаагад̇игам̣ табзнд̇ам̣ згам̣ т̇зрам̣ д̣̇исваа, ‘‘ахамби анааг̇ад̇з згасса б̣уд̣̇д̇хасса саасанз аб̣б̣уд̣̇ам̣ сод̇хзд̇ваа бадибаагад̇игам̣ табзд̇ум̣ самад̇т̇о бхавзяяа’’нд̇и бад̇т̇анам̣ бадтабзд̇ваа д̇ад̣̇ануруубаани бун̃н̃аани гад̇ваа д̣̇звамануссзсу сам̣саранд̇о имасмим̣ б̣уд̣̇д̇хуббаад̣̇з абариниб̣б̣уд̇з зва бхаг̇авад̇и взсаалияам̣ кад̇д̇ияагулз ниб̣б̣ад̇д̇ид̇ваа саб̣б̣агаамод̇и лад̣̇д̇ханаамо ваяаббад̇д̇о н̃аад̇агзхи д̣̇аарабариг̇г̇ахам̣ гаарид̇о ниссаран̣аж̇жхаасаяад̇ааяа гхарааваасам̣ ж̇иг̇ужчанд̇о д̇хаммабхан̣д̣ааг̇ааригасса санд̇игз баб̣б̣аж̇ид̇ваа саман̣ад̇хаммам̣ гаронд̇о убаж̇жхааязна сад̣̇д̇хим̣ взсаалим̣ убаг̇ад̇о н̃аад̇игхарам̣ аг̇амааси. д̇ад̇т̇а нам̣ бураан̣ад̣̇уд̇ияигаа бад̇ивияог̇ад̣̇угкид̇аа гисаа д̣̇уб̣б̣ан̣н̣аа аналан̇гад̇аа гилидтавад̇т̇анивасанаа ванд̣̇ид̇ваа род̣̇амаанаа згаманд̇ам̣ адтааси. д̇ам̣ д̣̇исваа т̇зрасса гарун̣аабурассарам̣ мзд̇д̇ам̣ убадтаабаяад̇о анубхууд̇аарамман̣з аяонисоманасигааравасзна сахасаа гилзсо уббаж̇ж̇и.
Dvipādakotiādikā āyasmato sabbakāmittherassa gāthā. Kā uppatti? Ayaṃ kira padumuttarassa bhagavato sāsane uppannaṃ abbudaṃ sodhetvā paṭipākatikaṃ ṭhapentaṃ ekaṃ theraṃ disvā, ‘‘ahampi anāgate ekassa buddhassa sāsane abbudaṃ sodhetvā paṭipākatikaṃ ṭhapetuṃ samattho bhaveyya’’nti patthanaṃ paṭṭhapetvā tadanurūpāni puññāni katvā devamanussesu saṃsaranto imasmiṃ buddhuppāde aparinibbute eva bhagavati vesāliyaṃ khattiyakule nibbattitvā sabbakāmoti laddhanāmo vayappatto ñātakehi dārapariggahaṃ kārito nissaraṇajjhāsayatāya gharāvāsaṃ jigucchanto dhammabhaṇḍāgārikassa santike pabbajitvā samaṇadhammaṃ karonto upajjhāyena saddhiṃ vesāliṃ upagato ñātigharaṃ agamāsi. Tattha naṃ purāṇadutiyikā pativiyogadukkhitā kisā dubbaṇṇā analaṅkatā kiliṭṭhavatthanivasanā vanditvā rodamānā ekamantaṃ aṭṭhāsi. Taṃ disvā therassa karuṇāpurassaraṃ mettaṃ upaṭṭhāpayato anubhūtārammaṇe ayonisomanasikāravasena sahasā kileso uppajji.
со д̇зна гасаахи д̇аал̣ид̇о ааж̇аанийяо вияа сан̃ж̇аад̇асам̣взг̇о д̇аавад̣̇зва сусаанам̣ г̇анд̇ваа, асубханимид̇д̇ам̣ уг̇г̇ахзд̇ваа, д̇ад̇т̇а бадилад̣̇д̇хажхаанам̣ баад̣̇агам̣ гад̇ваа, вибассанам̣ вад̣дхзд̇ваа, арахад̇д̇ам̣ баабун̣и. ат̇асса сасуро алан̇гад̇абадияад̇д̇ам̣ д̇хийд̇арам̣ аад̣̇ааяа махад̇аа бариваарзна нам̣ уббаб̣б̣ааж̇зд̇угаамо вихаарам̣ аг̇амааси. т̇зро д̇ассаа ад̇хиббааяам̣ н̃ад̇ваа ад̇д̇ано гаамзсу вирад̇д̇абхаавам̣ саб̣б̣ад̇т̇а жа анубалид̇д̇ад̇ам̣ багаасзнд̇о –
So tena kasāhi tāḷito ājānīyo viya sañjātasaṃvego tāvadeva susānaṃ gantvā, asubhanimittaṃ uggahetvā, tattha paṭiladdhajhānaṃ pādakaṃ katvā, vipassanaṃ vaḍḍhetvā, arahattaṃ pāpuṇi. Athassa sasuro alaṅkatapaṭiyattaṃ dhītaraṃ ādāya mahatā parivārena naṃ uppabbājetukāmo vihāraṃ agamāsi. Thero tassā adhippāyaṃ ñatvā attano kāmesu virattabhāvaṃ sabbattha ca anupalittataṃ pakāsento –
453.
453.
‘‘д̣̇вибаад̣̇агояам̣ асужи, д̣̇уг̇г̇анд̇хо барихийрад̇и;
‘‘Dvipādakoyaṃ asuci, duggandho parihīrati;
наанаагун̣абабарибууро, виссаванд̇о д̇ад̇о д̇ад̇о.
Nānākuṇapaparipūro, vissavanto tato tato.
454.
454.
‘‘миг̇ам̣ нилийнам̣ гуудзна, б̣ал̣исзнзва амб̣уж̇ам̣;
‘‘Migaṃ nilīnaṃ kūṭena, baḷiseneva ambujaṃ;
ваанарам̣ вияа лзбзна, б̣аад̇хаяанд̇и бут̇уж̇ж̇анам̣.
Vānaraṃ viya lepena, bādhayanti puthujjanaṃ.
455.
455.
‘‘руубаа сад̣̇д̣̇аа расаа г̇анд̇хаа, подтаб̣б̣аа жа манорамаа;
‘‘Rūpā saddā rasā gandhā, phoṭṭhabbā ca manoramā;
бан̃жа гаамаг̇ун̣аа зд̇з, ид̇т̇ируубасми д̣̇иссарз.
Pañca kāmaguṇā ete, itthirūpasmi dissare.
456.
456.
‘‘яз зд̇аа убасзванд̇и, рад̇д̇ажид̇д̇аа бут̇уж̇ж̇анаа;
‘‘Ye etā upasevanti, rattacittā puthujjanā;
вад̣дхзнд̇и гадасим̣ гхорам̣, аажинанд̇и бунаб̣бхавам̣.
Vaḍḍhenti kaṭasiṃ ghoraṃ, ācinanti punabbhavaṃ.
457.
457.
‘‘яо жзд̇аа бариваж̇ж̇зд̇и, саббассзва бад̣̇аа сиро;
‘‘Yo cetā parivajjeti, sappasseva padā siro;
сомам̣ висад̇д̇игам̣ логз, сад̇о самад̇ивад̇д̇ад̇и.
Somaṃ visattikaṃ loke, sato samativattati.
458.
458.
‘‘гаамзсваад̣̇ийнавам̣ д̣̇исваа, нзгкаммам̣ д̣̇адту кзмад̇о;
‘‘Kāmesvādīnavaṃ disvā, nekkhammaṃ daṭṭhu khemato;
ниссадо саб̣б̣агаамзхи, бад̇д̇о мз аасавагкаяо’’д̇и. –
Nissaṭo sabbakāmehi, patto me āsavakkhayo’’ti. –
имаа г̇аат̇аа абхааси.
Imā gāthā abhāsi.
д̇ад̇т̇а д̣̇вибаад̣̇агод̇и яад̣̇иби абаад̣̇агаад̣̇аяоби гааяаа асужийязва, ад̇хигааравасзна бана уггадтабарижчзд̣̇зна ваа звам̣ вуд̇д̇ам̣. яасмаа ваа ан̃н̃з асужибхууд̇ааби гааяаа лон̣амб̣илаад̣̇ийхи абхисан̇карид̇ваа мануссаанам̣ бхож̇анзби убанийяанд̇и, на бана мануссагааяо, д̇асмаа асужид̇арасабхаавамасса д̣̇ассзнд̇о ‘‘д̣̇вибаад̣̇аго’’д̇и ааха. аяанд̇и д̇ад̣̇аа убадтид̇ам̣ ид̇т̇ируубам̣ санд̇хааяааха. асужийд̇и асужи зва, на зд̇т̇а гин̃жиби сужийд̇и ад̇т̇о. д̣̇уг̇г̇анд̇хо барихийрад̇ийд̇и д̣̇уг̇г̇анд̇хо самаано бубпаг̇анд̇хаад̣̇ийхи сан̇карид̇ваа барихарийяад̇и. наанаагун̣абабарибуурод̇и гзсаад̣̇ианзгаббагаарагун̣абабхарид̇о. виссаванд̇о д̇ад̇о д̇ад̇од̇и бубпаг̇анд̇хаад̣̇ийхисса ж̇зг̇ужчабхаавам̣ бадижчаад̣̇зд̇ум̣ вааяаманд̇аанамби д̇ам̣ вааяаамам̣ нибпалам̣ гад̇ваа навахи д̣̇ваарзхи кзл̣асин̇гхаан̣игаад̣̇ийни ломагуубзхи жа сзд̣̇аж̇аллигам̣ ‘виссаванд̇оязва барихийрад̇ий’д̇и самб̣анд̇хо.
Tattha dvipādakoti yadipi apādakādayopi kāyā asucīyeva, adhikāravasena pana ukkaṭṭhaparicchedena vā evaṃ vuttaṃ. Yasmā vā aññe asucibhūtāpi kāyā loṇambilādīhi abhisaṅkharitvā manussānaṃ bhojanepi upanīyanti, na pana manussakāyo, tasmā asucitarasabhāvamassa dassento ‘‘dvipādako’’ti āha. Ayanti tadā upaṭṭhitaṃ itthirūpaṃ sandhāyāha. Asucīti asuci eva, na ettha kiñcipi sucīti attho. Duggandho parihīratīti duggandho samāno pupphagandhādīhi saṅkharitvā pariharīyati. Nānākuṇapaparipūroti kesādianekappakārakuṇapabharito. Vissavanto tato tatoti pupphagandhādīhissa jegucchabhāvaṃ paṭicchādetuṃ vāyamantānampi taṃ vāyāmaṃ nipphalaṃ katvā navahi dvārehi kheḷasiṅghāṇikādīni lomakūpehi ca sedajallikaṃ ‘vissavantoyeva parihīratī’ti sambandho.
звам̣ ж̇зг̇ужчоби самаано жааяам̣ гааяо гуудаад̣̇ийхи вияа миг̇аад̣̇игз ад̇д̇ано руубаад̣̇ийхи анд̇хабут̇уж̇ж̇анз ван̃жзд̇иязваад̇и д̣̇ассзнд̇о ‘‘миг̇а’’нд̇иаад̣̇имааха. д̇ад̇т̇а миг̇ам̣ нилийнам̣ гуудзнаад̇и баасаваагараад̣̇инаа гуудзна нилийнам̣, бадижчаннам̣ гад̇ваа миг̇ам̣ вияа нзсаад̣̇о. вагкамаано хи ива-сад̣̇д̣̇о ид̇хааби аанзд̇ваа яож̇зд̇аб̣б̣о. б̣ал̣исзнзва амб̣уж̇анд̇и амб̣уж̇ам̣ мажчам̣ аамисаб̣ад̣̇д̇хзна б̣ал̣исзна вияа б̣аал̣исиго. ваанарам̣ вияа лзбзнаад̇и ругкасилаад̣̇ийсу багкид̇д̇зна маггадалзбзна маггадам̣ вияа миг̇алуд̣̇д̣̇о анд̇хабут̇уж̇ж̇анам̣ ван̃жзнд̇о б̣аад̇хзнд̇ийд̇и.
Evaṃ jegucchopi samāno cāyaṃ kāyo kūṭādīhi viya migādike attano rūpādīhi andhaputhujjane vañcetiyevāti dassento ‘‘miga’’ntiādimāha. Tattha migaṃ nilīnaṃ kūṭenāti pāsavākarādinā kūṭena nilīnaṃ, paṭicchannaṃ katvā migaṃ viya nesādo. Vakkhamāno hi iva-saddo idhāpi ānetvā yojetabbo. Baḷiseneva ambujanti ambujaṃ macchaṃ āmisabaddhena baḷisena viya bāḷisiko. Vānaraṃ viya lepenāti rukkhasilādīsu pakkhittena makkaṭalepena makkaṭaṃ viya migaluddo andhaputhujjanaṃ vañcento bādhentīti.
гз бана б̣аад̇хзнд̇ийд̇и ааха. ‘‘руубаа сад̣̇д̣̇аа’’д̇иаад̣̇и. руубаад̣̇аяо хи бан̃жа гаамагодтаасаа висзсад̇о висабхааг̇авад̇т̇усанниссаяаа вибаллаасуубаниссаязна аяонисоманасигаарзна баригкид̇д̇аанам̣ анд̇хабут̇уж̇ж̇анаанам̣ мано рамзнд̇о гилзсавад̇т̇уд̇ааяа анад̇т̇аавахабхаавад̇о д̇з б̣аад̇хзнд̇и наама. д̇зна вуд̇д̇ам̣ ‘‘руубаа сад̣̇д̣̇аа…бз… ид̇т̇ируубасми д̣̇иссарз’’д̇и.
Ke pana bādhentīti āha. ‘‘Rūpā saddā’’tiādi. Rūpādayo hi pañca kāmakoṭṭhāsā visesato visabhāgavatthusannissayā vipallāsūpanissayena ayonisomanasikārena parikkhittānaṃ andhaputhujjanānaṃ mano ramento kilesavatthutāya anatthāvahabhāvato te bādhenti nāma. Tena vuttaṃ ‘‘rūpā saddā…pe… itthirūpasmi dissare’’ti.
ид̇т̇иг̇г̇ахан̣ан̃жзд̇т̇а ад̇хигааравасзна гад̇анд̇и взд̣̇ид̇аб̣б̣ам̣. д̇знзвааха ‘‘яз зд̇аа убасзванд̇ий’’д̇иаад̣̇и. д̇ассад̇т̇о – яз бут̇уж̇ж̇анаа зд̇аа ид̇т̇ияо рад̇д̇ажид̇д̇аа рааг̇аабхибхууд̇ажид̇д̇аа убабхог̇авад̇т̇усан̃н̃ааяа убасзванд̇и. вад̣дхзнд̇и гадасим̣ гхоранд̇и д̇з ж̇аад̇иаад̣̇ийхи нираяаад̣̇ийхи жа гхорам̣, бхаяаанагам̣, анд̇хаб̣аалзхи абхирамид̇аб̣б̣ад̇о гадасисан̇каад̇ам̣ сам̣саарам̣ бунаббунам̣ уббад̇д̇имаран̣аад̣̇инаа вад̣дхзнд̇и. д̇знааха ‘‘аажинанд̇и бунаб̣бхава’’нд̇и.
Itthiggahaṇañcettha adhikāravasena katanti veditabbaṃ. Tenevāha ‘‘ye etā upasevantī’’tiādi. Tassattho – ye puthujjanā etā itthiyo rattacittā rāgābhibhūtacittā upabhogavatthusaññāya upasevanti. Vaḍḍhenti kaṭasiṃ ghoranti te jātiādīhi nirayādīhi ca ghoraṃ, bhayānakaṃ, andhabālehi abhiramitabbato kaṭasisaṅkhātaṃ saṃsāraṃ punappunaṃ uppattimaraṇādinā vaḍḍhenti. Tenāha ‘‘ācinanti punabbhava’’nti.
яо жзд̇аад̇и яо бана буг̇г̇ало зд̇аа ид̇т̇ияо д̇ад̇т̇а чанд̣̇арааг̇асса вигкамбханзна ваа самужчинд̣̇анзна ваа ад̇д̇ано баад̣̇зна саббасса сирам̣ вияа бариваж̇ж̇зд̇и, со саб̣б̣ам̣ логам̣ висаж̇ид̇ваа тид̇ад̇д̇аа логз висад̇д̇игаасан̇каад̇ам̣ д̇ан̣хам̣ сад̇о худ̇ваа самад̇ивад̇д̇ад̇и.
Yo cetāti yo pana puggalo etā itthiyo tattha chandarāgassa vikkhambhanena vā samucchindanena vā attano pādena sappassa siraṃ viya parivajjeti, so sabbaṃ lokaṃ visajitvā ṭhitattā loke visattikāsaṅkhātaṃ taṇhaṃ sato hutvā samativattati.
гаамзсваад̣̇ийнавам̣ д̣̇исваад̇и ‘‘адтиган̇галуубамаа гаамаа б̣ахуд̣̇угкаа б̣ахубааяаасаа’’д̇иаад̣̇инаа (баажи. 417; жуул̣ава. 65; ма. ни. 1.234) вад̇т̇угаамзсу гилзсагаамзсу анзгаагааравогаарам̣ аад̣̇ийнавам̣, д̣̇осам̣, д̣̇исваа. нзгкаммам̣ д̣̇адту кзмад̇од̇и гаамзхи бхавзхи жа нигканд̇абхаавад̇о нзгкаммам̣, баб̣б̣аж̇ж̇ам̣ , ниб̣б̣аанан̃жа, кзмад̇о, анубад̣̇д̣̇авад̇о, д̣̇адту, д̣̇исваа. саб̣б̣агаамзхиби д̇збхуумагад̇хаммзхи ниссадо висам̣яуд̇д̇о. саб̣б̣зби д̇збхуумагаа д̇хаммаа гааманийяадтзна гаамаа, д̇зхи жа т̇зро висам̣яуд̇д̇о. д̇знааха ‘‘бад̇д̇о мз аасавагкаяо’’д̇и.
Kāmesvādīnavaṃ disvāti ‘‘aṭṭhikaṅkalūpamā kāmā bahudukkhā bahupāyāsā’’tiādinā (pāci. 417; cūḷava. 65; ma. ni. 1.234) vatthukāmesu kilesakāmesu anekākāravokāraṃ ādīnavaṃ, dosaṃ, disvā. Nekkhammaṃ daṭṭhu khematoti kāmehi bhavehi ca nikkhantabhāvato nekkhammaṃ, pabbajjaṃ , nibbānañca, khemato, anupaddavato, daṭṭhu, disvā. Sabbakāmehipi tebhūmakadhammehi nissaṭo visaṃyutto. Sabbepi tebhūmakā dhammā kāmanīyaṭṭhena kāmā, tehi ca thero visaṃyutto. Tenāha ‘‘patto me āsavakkhayo’’ti.
звам̣ т̇зро аад̣̇ид̇о бан̃жахи г̇аат̇аахи д̇хаммам̣ гат̇зд̇ваа чадтаг̇аат̇ааяа ан̃н̃ам̣ б̣яаагааси. д̇ам̣ суд̇ваа сасуро ‘‘аяам̣ саб̣б̣ад̇т̇а анубалид̇д̇о, на саггаа имам̣ гаамзсу бад̇аарзд̇у’’нд̇и яат̇ааг̇ад̇амаг̇г̇знзва г̇ад̇о. т̇зроби вассасад̇абариниб̣б̣уд̇з бхаг̇авад̇и убасамбад̣̇ааяа вийсавассасад̇иго бат̇аб̣яаа т̇зро худ̇ваа, взсаалигзхи важ̇ж̇ибуд̇д̇зхи уббаад̣̇ид̇ам̣ саасанасса аб̣б̣уд̣̇ам̣ сод̇хзд̇ваа, д̣̇уд̇ияам̣ д̇хаммасан̇г̇ийд̇им̣ сан̇г̇ааяид̇ваа ‘‘анааг̇ад̇з д̇хаммаасогагаалз уббаж̇ж̇анагам̣ аб̣б̣уд̣̇ам̣ сод̇хзхий’’д̇и д̇иссамахааб̣рахмаанам̣ аан̣аабзд̇ваа анубаад̣̇исзсааяа ниб̣б̣аанад̇хаад̇уяаа бариниб̣б̣ааяи.
Evaṃ thero ādito pañcahi gāthāhi dhammaṃ kathetvā chaṭṭhagāthāya aññaṃ byākāsi. Taṃ sutvā sasuro ‘‘ayaṃ sabbattha anupalitto, na sakkā imaṃ kāmesu patāretu’’nti yathāgatamaggeneva gato. Theropi vassasataparinibbute bhagavati upasampadāya vīsavassasatiko pathabyā thero hutvā, vesālikehi vajjiputtehi uppāditaṃ sāsanassa abbudaṃ sodhetvā, dutiyaṃ dhammasaṅgītiṃ saṅgāyitvā ‘‘anāgate dhammāsokakāle uppajjanakaṃ abbudaṃ sodhehī’’ti tissamahābrahmānaṃ āṇāpetvā anupādisesāya nibbānadhātuyā parinibbāyi.
саб̣б̣агаамид̇т̇зраг̇аат̇ааван̣н̣анаа нидтид̇аа.
Sabbakāmittheragāthāvaṇṇanā niṭṭhitā.
чагганибаад̇аван̣н̣анаа нидтид̇аа.
Chakkanipātavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 14. саб̣б̣агаамид̇т̇зраг̇аат̇аа • 14. Sabbakāmittheragāthā
