| Library / Tipiṭaka / д̇ибидага • Tipiṭaka / бан̃жабагаран̣а-мууладийгаа • Pañcapakaraṇa-mūlaṭīkā |
5. саб̣б̣амад̇т̇ийд̇игат̇аа
5. Sabbamatthītikathā
1. ваад̣̇аяуд̇д̇иван̣н̣анаа
1. Vādayuttivaṇṇanā
282. саб̣б̣асмим̣ сарийрз саб̣б̣анд̇и сираси баад̣̇аа бажчад̇о жагкуунийд̇и звам̣ саб̣б̣ам̣ саб̣б̣ад̇т̇а ад̇т̇ийд̇и ад̇т̇о. саб̣б̣асмим̣ гаалзд̇и б̣аалагаалз яувад̇аа, вуд̣дхагаалз б̣аалад̇аа, звам̣ саб̣б̣асмим̣ гаалз саб̣б̣ам̣. саб̣б̣знаагаарзнаад̇и нийлаагаарзна бийд̇ам̣, бийд̇аагаарзна лохид̇анд̇и звам̣. саб̣б̣зсу д̇хаммзсууд̇и жагкусмим̣ сод̇ам̣, сод̇асмим̣ гхаананд̇и звам̣. аяуд̇д̇анд̇и яог̇арахид̇ам̣ вад̣̇ад̇и, д̇ам̣ бана згасабхаавам̣. гат̇ам̣ бана згасабхаавасса яог̇арахид̇ад̇аад̇и д̇ам̣ д̣̇ассзнд̇о ‘‘наанаасабхааваанан̃хий’’д̇иаад̣̇имааха. д̣̇виннан̃хи наанаасабхааваанам̣ ан̇г̇улийнам̣ мзн̣д̣агаанам̣ ваа ан̃н̃аман̃н̃аяог̇о ход̇и, на згассзва сад̇о, д̇асмаа яо наанаасабхаавзсу ход̇и яог̇о, д̇зна рахид̇ам̣ згасабхаавам̣ аяог̇анд̇и вуд̇д̇ам̣. ид̣̇ам̣ бужчад̇ийд̇и бараваад̣̇ийд̣̇идтияаа мижчаад̣̇идтибхаавам̣ г̇ахзд̇ваа уббаннааяа ад̇д̇ано д̣̇идтияаа саммаад̣̇идтибхааво ад̇т̇ийд̇и вуд̇д̇ам̣ ход̇и.
282. Sabbasmiṃsarīre sabbanti sirasi pādā pacchato cakkhūnīti evaṃ sabbaṃ sabbattha atthīti attho. Sabbasmiṃ kāleti bālakāle yuvatā, vuḍḍhakāle bālatā, evaṃ sabbasmiṃ kāle sabbaṃ. Sabbenākārenāti nīlākārena pītaṃ, pītākārena lohitanti evaṃ. Sabbesu dhammesūti cakkhusmiṃ sotaṃ, sotasmiṃ ghānanti evaṃ. Ayuttanti yogarahitaṃ vadati, taṃ pana ekasabhāvaṃ. Kathaṃ pana ekasabhāvassa yogarahitatāti taṃ dassento ‘‘nānāsabhāvānañhī’’tiādimāha. Dvinnañhi nānāsabhāvānaṃ aṅgulīnaṃ meṇḍakānaṃ vā aññamaññayogo hoti, na ekasseva sato, tasmā yo nānāsabhāvesu hoti yogo, tena rahitaṃ ekasabhāvaṃ ayoganti vuttaṃ. Idaṃ pucchatīti paravādīdiṭṭhiyā micchādiṭṭhibhāvaṃ gahetvā uppannāya attano diṭṭhiyā sammādiṭṭhibhāvo atthīti vuttaṃ hoti.
ваад̣̇аяуд̇д̇иван̣н̣анаа нидтид̇аа.
Vādayuttivaṇṇanā niṭṭhitā.
2. гааласам̣санд̣̇анаван̣н̣анаа
2. Kālasaṃsandanavaṇṇanā
285. ад̇ийд̇аанааг̇ад̇ам̣ бахааяа бажжуббаннаруубамзва аббияам̣ авибхаж̇ид̇аб̣б̣ам̣ гарид̇ваад̇и бажжуббаннасад̣̇д̣̇зна руубасад̣̇д̣̇зна жаад̇и убхохиби бажжуббаннаруубамзва вад̇д̇аб̣б̣ам̣ гад̇ваад̇и вуд̇д̇ам̣ ход̇и. бан̃н̃ад̇д̇ияаа авиг̇ад̇ад̇д̇аад̇и зд̇зна ид̣̇ам̣ вин̃н̃ааяад̇и ‘‘на руубабан̃н̃ад̇д̇и вияа вад̇т̇абан̃н̃ад̇д̇и сабхаавабарижчиннз бавад̇д̇аа виж̇ж̇амаанабан̃н̃ад̇д̇и, ат̇а ко буб̣б̣аабарияавасзна бавад̇д̇амаанам̣ руубасамуухам̣ убаад̣̇ааяа бавад̇д̇аа авиж̇ж̇амаанабан̃н̃ад̇д̇и, д̇асмаа вад̇т̇абхаавасса од̣̇аад̇абхаававиг̇амз виг̇амаавад̇д̇аб̣б̣ад̇аа яуд̇д̇аа, на бана руубабхаавасса бажжуббаннабхаававиг̇амз’’д̇и.
285. Atītānāgataṃ pahāya paccuppannarūpameva appiyaṃ avibhajitabbaṃ karitvāti paccuppannasaddena rūpasaddena cāti ubhohipi paccuppannarūpameva vattabbaṃ katvāti vuttaṃ hoti. Paññattiyā avigatattāti etena idaṃ viññāyati ‘‘na rūpapaññatti viya vatthapaññatti sabhāvaparicchinne pavattā vijjamānapaññatti, atha kho pubbāpariyavasena pavattamānaṃ rūpasamūhaṃ upādāya pavattā avijjamānapaññatti, tasmā vatthabhāvassa odātabhāvavigame vigamāvattabbatā yuttā, na pana rūpabhāvassa paccuppannabhāvavigame’’ti.
гааласам̣санд̣̇анаван̣н̣анаа нидтид̇аа.
Kālasaṃsandanavaṇṇanā niṭṭhitā.
важанасод̇ханаван̣н̣анаа
Vacanasodhanavaṇṇanā
288. анааг̇ад̇ам̣ ваа бажжуббаннам̣ ваа худ̇ваа ход̇ийд̇и вуд̇д̇анд̇и зд̇т̇а анааг̇ад̇ам̣ анааг̇ад̇ам̣ худ̇ваа буна бажжуббаннам̣ хонд̇ам̣ худ̇ваа ход̇ийд̇и, д̇ат̇аа бажжуббаннам̣ бажжуббаннам̣ хонд̇ам̣ буб̣б̣з анааг̇ад̇ам̣ худ̇ваа бажжуббаннам̣ ход̇ийд̇и худ̇ваа ход̇ийд̇и вуд̇д̇анд̇и д̣̇адтаб̣б̣ам̣. гим̣ д̇з д̇амби худ̇ваа ход̇ийд̇и д̇аб̣бхааваавиг̇амад̇о худ̇вааход̇ибхааваанубарамам̣ анубажчзд̣̇ам̣ бужчад̇ийд̇и ад̇хиббааяо яуд̇д̇о. худ̇ваа бхууд̇асса буна худ̇ваа абхаавад̇од̇и анааг̇ад̇ам̣ худ̇ваа бажжуббаннабхууд̇асса буна анааг̇ад̇ам̣ худ̇ваа бажжуббаннаабхаавад̇о.
288. Anāgataṃvā paccuppannaṃ vā hutvā hotīti vuttanti ettha anāgataṃ anāgataṃ hutvā puna paccuppannaṃ hontaṃ hutvā hotīti, tathā paccuppannaṃ paccuppannaṃ hontaṃ pubbe anāgataṃ hutvā paccuppannaṃ hotīti hutvā hotīti vuttanti daṭṭhabbaṃ. Kiṃ te tampi hutvā hotīti tabbhāvāvigamato hutvāhotibhāvānuparamaṃ anupacchedaṃ pucchatīti adhippāyo yutto. Hutvā bhūtassa puna hutvā abhāvatoti anāgataṃ hutvā paccuppannabhūtassa puna anāgataṃ hutvā paccuppannābhāvato.
яасмаа д̇анд̇и д̇ам̣ худ̇ваа бхууд̇ам̣ бажжуббаннам̣ яасмаа анааг̇ад̇ам̣ худ̇ваа бажжуббаннам̣ хонд̇ам̣ ‘‘худ̇ваа ход̇ий’’д̇и сан̇кяам̣ г̇ад̇ам̣, д̇асмаа д̣̇уд̇ияамби ‘‘худ̇ваа ход̇ий’’д̇и важанам̣ арахад̇ийд̇и бадиж̇аанаад̇ийд̇и ад̇хиббааяо. звам̣ бана д̇хаммз худ̇вааход̇ибхааваанубарамам̣ вад̣̇анд̇асса ад̇хаммз сасависаан̣з нахуд̇ваана ход̇ибхааваанубарамо аабаж̇ж̇ад̇ийд̇и ад̇хиббааязна ‘‘ат̇а на’’нд̇иаад̣̇имааха.
Yasmā tanti taṃ hutvā bhūtaṃ paccuppannaṃ yasmā anāgataṃ hutvā paccuppannaṃ hontaṃ ‘‘hutvā hotī’’ti saṅkhyaṃ gataṃ, tasmā dutiyampi ‘‘hutvā hotī’’ti vacanaṃ arahatīti paṭijānātīti adhippāyo. Evaṃ pana dhamme hutvāhotibhāvānuparamaṃ vadantassa adhamme sasavisāṇe nahutvāna hotibhāvānuparamo āpajjatīti adhippāyena ‘‘atha na’’ntiādimāha.
бадигкид̇д̇анаязнаад̇и гааланаанад̇д̇зна. бадин̃н̃аад̇анаязнаад̇и ад̇т̇аанаанад̇д̇зна. ад̇т̇аанаанад̇д̇ам̣ ижчанд̇оби бана анааг̇ад̇асса бажжуббаннз вуд̇д̇ам̣ ход̇ибхаавам̣, бажжуббаннасса жа анааг̇ад̇з вуд̇д̇ам̣ худ̇ваабхаавам̣ гат̇ам̣ бадиж̇аанаад̇ийд̇и вижаарзд̇аб̣б̣ам̣. ад̇т̇аанаанад̇д̇амзва хи д̇зна анун̃н̃ааяад̇и, на анааг̇ад̇з бажжуббаннабхааво, бажжуббаннз ваа анааг̇ад̇абхаавод̇и. буримам̣ бадигкид̇д̇абан̃хам̣ баривад̇д̇ид̇ваад̇и анун̃н̃аад̇абан̃хасса худ̇ваа ход̇и худ̇ваа ход̇ийд̇и д̣̇осо вуд̇д̇од̇и авуд̇д̇ад̣̇осам̣ ад̇иггамма бадигкид̇д̇абан̃хам̣ буна г̇ахзд̇ваа д̇зна жод̣̇зд̇ийд̇и ад̇т̇о. зд̇т̇а жа ад̇т̇аанаанад̇д̇зна худ̇вааход̇ийд̇и ануж̇аананд̇асса д̣̇осо гааланаанад̇д̇ааязва анааг̇ад̇ам̣ бажжуббаннанд̇и бадигкзбзна гат̇ам̣ ход̇ийд̇и? д̇ассзва ануж̇аананабадигкзбад̇од̇и ад̇хиббааяо.
Paṭikkhittanayenāti kālanānattena. Paṭiññātanayenāti atthānānattena. Atthānānattaṃ icchantopi pana anāgatassa paccuppanne vuttaṃ hotibhāvaṃ, paccuppannassa ca anāgate vuttaṃ hutvābhāvaṃ kathaṃ paṭijānātīti vicāretabbaṃ. Atthānānattameva hi tena anuññāyati, na anāgate paccuppannabhāvo, paccuppanne vā anāgatabhāvoti. Purimaṃ paṭikkhittapañhaṃ parivattitvāti anuññātapañhassa hutvā hoti hutvā hotīti doso vuttoti avuttadosaṃ atikkamma paṭikkhittapañhaṃ puna gahetvā tena codetīti attho. Ettha ca atthānānattena hutvāhotīti anujānantassa doso kālanānattāyeva anāgataṃ paccuppannanti paṭikkhepena kathaṃ hotīti? Tasseva anujānanapaṭikkhepatoti adhippāyo.
згзганд̇и анааг̇ад̇амби на худ̇ваа на ход̇и бажжуббаннамбийд̇и д̇ад̣̇убхаяам̣ г̇ахзд̇ваа ‘‘згзгам̣ на худ̇ваа на ход̇и на худ̇ваа на ход̇ий’’д̇и вуд̇д̇ам̣, на згзгамзва на худ̇ваа на ход̇и на худ̇ваа на ход̇ийд̇и. зса наяо буримасмим̣ ‘‘згзгам̣ худ̇ваа ход̇и худ̇ваа ход̇ий’’д̇и важанзби. анааг̇ад̇асса хи ‘‘худ̇ваа ход̇ий’’д̇и наамам̣ бажжуббаннасса жаад̇и д̣̇взби наамаани сан̇г̇ахзд̇ваа ‘‘худ̇ваа ход̇и худ̇ваа ход̇ий’’д̇и жод̣̇ид̇ам̣, д̇ат̇аа ‘‘на худ̇ваа на ход̇и на худ̇ваа на ход̇ий’’д̇и жаад̇и ад̇хиббааяо . саб̣б̣ад̇о анд̇хагаарзна барияонад̣̇д̇хо вияаад̇и зд̇зна абарияонад̣̇д̇хзна бадиж̇аанид̇аб̣б̣ам̣ сияаад̇и д̣̇ассзд̇и. зд̇т̇а жа буриманаяз худ̇ваа бхууд̇асса буна худ̇вааход̇ибхааво жод̣̇ид̇о, д̣̇уд̇ияанаяз анааг̇ад̇аад̣̇ийсу згзгасса худ̇вааход̇инаамад̇аад̇и аяам̣ висзсо.
Ekekanti anāgatampi na hutvā na hoti paccuppannampīti tadubhayaṃ gahetvā ‘‘ekekaṃ na hutvā na hoti na hutvā na hotī’’ti vuttaṃ, na ekekameva na hutvā na hoti na hutvā na hotīti. Esa nayo purimasmiṃ ‘‘ekekaṃ hutvā hoti hutvā hotī’’ti vacanepi. Anāgatassa hi ‘‘hutvā hotī’’ti nāmaṃ paccuppannassa cāti dvepi nāmāni saṅgahetvā ‘‘hutvā hoti hutvā hotī’’ti coditaṃ, tathā ‘‘na hutvā na hoti na hutvā na hotī’’ti cāti adhippāyo . Sabbato andhakārena pariyonaddho viyāti etena apariyonaddhena paṭijānitabbaṃ siyāti dasseti. Ettha ca purimanaye hutvā bhūtassa puna hutvāhotibhāvo codito, dutiyanaye anāgatādīsu ekekassa hutvāhotināmatāti ayaṃ viseso.
важанасод̇ханаван̣н̣анаа нидтид̇аа.
Vacanasodhanavaṇṇanā niṭṭhitā.
ад̇ийд̇ан̃аан̣аад̣̇игат̇ааван̣н̣анаа
Atītañāṇādikathāvaṇṇanā
290. буна будто…бз… ад̇т̇ид̇ааяа бадиж̇аанаад̇ийд̇и зд̇т̇а бажжуббаннам̣ н̃аан̣ам̣ д̇знаад̇и зд̇зна анувад̇д̇амаанаабзгканаважанзна гат̇ам̣ вужжад̇ийд̇и вижаарзд̇аб̣б̣ам̣.
290. Puna puṭṭho…pe… atthitāya paṭijānātīti ettha paccuppannaṃ ñāṇaṃ tenāti etena anuvattamānāpekkhanavacanena kathaṃ vuccatīti vicāretabbaṃ.
ад̇ийд̇ан̃аан̣аад̣̇игат̇ааван̣н̣анаа нидтид̇аа.
Atītañāṇādikathāvaṇṇanā niṭṭhitā.
араханд̇аад̣̇игат̇ааван̣н̣анаа
Arahantādikathāvaṇṇanā
291. яуд̇д̇ивирод̇хо арахад̇о сарааг̇аад̣̇ибхаавз бут̇уж̇ж̇анзна анаанад̇д̇ам̣ б̣рахмажарияаваасасса апалад̇аад̇и звамаад̣̇иго д̣̇адтаб̣б̣о.
291. Yuttivirodho arahato sarāgādibhāve puthujjanena anānattaṃ brahmacariyavāsassa aphalatāti evamādiko daṭṭhabbo.
араханд̇аад̣̇игат̇ааван̣н̣анаа нидтид̇аа.
Arahantādikathāvaṇṇanā niṭṭhitā.
бад̣̇асод̇ханагат̇ааван̣н̣анаа
Padasodhanakathāvaṇṇanā
295. д̇зна гааран̣знаад̇и ад̇ийд̇аад̇т̇исад̣̇д̣̇аанам̣ згад̇т̇ад̇д̇аа ад̇т̇исад̣̇д̣̇ад̇т̇асса жа нваад̇ийд̇абхаавад̇о ‘‘ад̇ийд̇ам̣ нваад̇ийд̇ам̣, нваад̇ийд̇ан̃жа ад̇ийд̇ам̣ ход̇ий’’д̇и вуд̇д̇ам̣ ход̇и. зд̇т̇а бана ад̇ийд̇аад̣̇ийнам̣ ад̇т̇ид̇ам̣ вад̣̇анд̇асса бараваад̣̇иссзвааяам̣ д̣̇осо яат̇аа аабаж̇ж̇ад̇и, на бана ‘‘ниб̣б̣аанам̣ ад̇т̇ий’’д̇и вад̣̇анд̇асса сагаваад̣̇исса, д̇ат̇аа бадибаад̣̇зд̇аб̣б̣ам̣.
295. Tena kāraṇenāti atītaatthisaddānaṃ ekatthattā atthisaddatthassa ca nvātītabhāvato ‘‘atītaṃ nvātītaṃ, nvātītañca atītaṃ hotī’’ti vuttaṃ hoti. Ettha pana atītādīnaṃ atthitaṃ vadantassa paravādissevāyaṃ doso yathā āpajjati, na pana ‘‘nibbānaṃ atthī’’ti vadantassa sakavādissa, tathā paṭipādetabbaṃ.
бад̣̇асод̇ханагат̇ааван̣н̣анаа нидтид̇аа.
Padasodhanakathāvaṇṇanā niṭṭhitā.
саб̣б̣амад̇т̇ийд̇игат̇ааван̣н̣анаа нидтид̇аа.
Sabbamatthītikathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / гат̇аавад̇т̇убаал̣и • Kathāvatthupāḷi / 5. саб̣б̣амад̇т̇ийд̇игат̇аа • 5. Sabbamatthītikathā
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 5. саб̣б̣амад̇т̇ийд̇игат̇аа • 5. Sabbamatthītikathā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 5. саб̣б̣амад̇т̇ийд̇игат̇ааван̣н̣анаа • 5. Sabbamatthītikathāvaṇṇanā
