| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၅. သဗ္ဗမတ္ထီတိကထာ
5. Sabbamatthītikathā
၁. ဝာဒယုတ္တိ
1. Vādayutti
၂၈၂. သဗ္ဗမတ္ထီတိ ? အာမန္တာ။ သဗ္ဗတ္ထ သဗ္ဗမတ္ထီတိ? န ဟေဝံ ဝတ္တဗ္ဗေ။ သဗ္ဗမတ္ထီတိ? အာမန္တာ။ သဗ္ဗဒာ သဗ္ဗမတ္ထီတိ? န ဟေဝံ ဝတ္တဗ္ဗေ။ သဗ္ဗမတ္ထီတိ? အာမန္တာ။ သဗ္ဗေန သဗ္ဗံ သဗ္ဗမတ္ထီတိ? န ဟေဝံ ဝတ္တဗ္ဗေ။ သဗ္ဗမတ္ထီတိ? အာမန္တာ။ သဗ္ဗေသု သဗ္ဗမတ္ထီတိ? န ဟေဝံ ဝတ္တဗ္ဗေ။ သဗ္ဗမတ္ထီတိ? အာမန္တာ။ အယောဂန္တိ ကတ္ဝာ သဗ္ဗမတ္ထီတိ? န ဟေဝံ ဝတ္တဗ္ဗေ။ သဗ္ဗမတ္ထီတိ? အာမန္တာ။ ယမ္ပိ နတ္ထိ, တမ္ပတ္ထီတိ? န ဟေဝံ ဝတ္တဗ္ဗေ။ သဗ္ဗမတ္ထီတိ? အာမန္တာ။ သဗ္ဗမတ္ထီတိ ယာ ဒိဋ္ဌိ သာ ဒိဋ္ဌိ မိစ္ဆာဒိဋ္ဌီတိ, ယာ ဒိဋ္ဌိ သာ ဒိဋ္ဌိ သမ္မာဒိဋ္ဌီတိ, ဟေဝမတ္ထီတိ? န ဟေဝံ ဝတ္တဗ္ဗေ။ (သံခိတ္တံ)။ ဝာဒယုတ္တိ။
282. Sabbamatthīti ? Āmantā. Sabbattha sabbamatthīti? Na hevaṃ vattabbe. Sabbamatthīti? Āmantā. Sabbadā sabbamatthīti? Na hevaṃ vattabbe. Sabbamatthīti? Āmantā. Sabbena sabbaṃ sabbamatthīti? Na hevaṃ vattabbe. Sabbamatthīti? Āmantā. Sabbesu sabbamatthīti? Na hevaṃ vattabbe. Sabbamatthīti? Āmantā. Ayoganti katvā sabbamatthīti? Na hevaṃ vattabbe. Sabbamatthīti? Āmantā. Yampi natthi, tampatthīti? Na hevaṃ vattabbe. Sabbamatthīti? Āmantā. Sabbamatthīti yā diṭṭhi sā diṭṭhi micchādiṭṭhīti, yā diṭṭhi sā diṭṭhi sammādiṭṭhīti, hevamatthīti? Na hevaṃ vattabbe. (Saṃkhittaṃ). Vādayutti.
၂. ကာလသံသန္ဒနာ
2. Kālasaṃsandanā
၂၈၃. အတီတံ အတ္ထီတိ? အာမန္တာ။ နနု အတီတံ နိရုဒ္ဓံ ဝိဂတံ ဝိပရိဏတံ အတ္ထင္ဂတံ အဗ္ဘတ္ထင္ဂတန္တိ? အာမန္တာ။ ဟဉ္စိ အတီတံ နိရုဒ္ဓံ ဝိဂတံ ဝိပရိဏတံ အတ္ထင္ဂတံ အဗ္ဘတ္ထင္ဂတံ, နော စ ဝတ ရေ ဝတ္တဗ္ဗေ – ‘‘အတီတံ အတ္ထီ’’တိ။
283. Atītaṃ atthīti? Āmantā. Nanu atītaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Āmantā. Hañci atītaṃ niruddhaṃ vigataṃ vipariṇataṃ atthaṅgataṃ abbhatthaṅgataṃ, no ca vata re vattabbe – ‘‘atītaṃ atthī’’ti.
အနာဂတံ အတ္ထီတိ? အာမန္တာ။ နနု အနာဂတံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပာတုဘူတန္တိ? အာမန္တာ။ ဟဉ္စိ အနာဂတံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပာတုဘူတံ, နော စ ဝတ ရေ ဝတ္တဗ္ဗေ – ‘‘အနာဂတံ အတ္ထီ’’တိ။
Anāgataṃ atthīti? Āmantā. Nanu anāgataṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Āmantā. Hañci anāgataṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtaṃ, no ca vata re vattabbe – ‘‘anāgataṃ atthī’’ti.
ပစ္စုပ္ပန္နံ အတ္ထိ ပစ္စုပ္ပန္နံ အနိရုဒ္ဓံ အဝိဂတံ အဝိပရိဏတံ န အတ္ထင္ဂတံ န အဗ္ဘတ္ထင္ဂတန္တိ? အာမန္တာ။ အတီတံ အတ္ထိ အတီတံ အနိရုဒ္ဓံ အဝိဂတံ အဝိပရိဏတံ န အတ္ထင္ဂတံ န အဗ္ဘတ္ထင္ဂတန္တိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ အတ္ထိ ပစ္စုပ္ပန္နံ ဇာတံ ဘူတံ သဉ္ဇာတံ နိဗ္ဗတ္တံ အဘိနိဗ္ဗတ္တံ ပာတုဘူတန္တိ? အာမန္တာ။ အနာဂတံ အတ္ထိ အနာဂတံ ဇာတံ ဘူတံ သဉ္ဇာတံ နိဗ္ဗတ္တံ အဘိနိဗ္ဗတ္တံ ပာတုဘူတန္တိ? န ဟေဝံ ဝတ္တဗ္ဗေ။ပေ.။။
Paccuppannaṃ atthi paccuppannaṃ aniruddhaṃ avigataṃ avipariṇataṃ na atthaṅgataṃ na abbhatthaṅgatanti? Āmantā. Atītaṃ atthi atītaṃ aniruddhaṃ avigataṃ avipariṇataṃ na atthaṅgataṃ na abbhatthaṅgatanti? Na hevaṃ vattabbe…pe… paccuppannaṃ atthi paccuppannaṃ jātaṃ bhūtaṃ sañjātaṃ nibbattaṃ abhinibbattaṃ pātubhūtanti? Āmantā. Anāgataṃ atthi anāgataṃ jātaṃ bhūtaṃ sañjātaṃ nibbattaṃ abhinibbattaṃ pātubhūtanti? Na hevaṃ vattabbe…pe….
အတီတံ အတ္ထိ အတီတံ နိရုဒ္ဓံ ဝိဂတံ ဝိပရိဏတံ အတ္ထင္ဂတံ အဗ္ဘတ္ထင္ဂတန္တိ? အာမန္တာ။ ပစ္စုပ္ပန္နံ အတ္ထိ ပစ္စုပ္ပန္နံ နိရုဒ္ဓံ ဝိဂတံ ဝိပရိဏတံ အတ္ထင္ဂတံ အဗ္ဘတ္ထင္ဂတန္တိ? န ဟေဝံ ဝတ္တဗ္ဗေ။ပေ.။ အနာဂတံ အတ္ထိ အနာဂတံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပာတုဘူတန္တိ? အာမန္တာ။ ပစ္စုပ္ပန္နံ အတ္ထိ ပစ္စုပ္ပန္နံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပာတုဘူတန္တိ? န ဟေဝံ ဝတ္တဗ္ဗေ။
Atītaṃ atthi atītaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Āmantā. Paccuppannaṃ atthi paccuppannaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Na hevaṃ vattabbe…pe… anāgataṃ atthi anāgataṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Āmantā. Paccuppannaṃ atthi paccuppannaṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Na hevaṃ vattabbe.
၂၈၄. အတီတံ ရူပံ အတ္ထီတိ? အာမန္တာ။ နနု အတီတံ ရူပံ နိရုဒ္ဓံ ဝိဂတံ ဝိပရိဏတံ အတ္ထင္ဂတံ အဗ္ဘတ္ထင္ဂတန္တိ? အာမန္တာ။ ဟဉ္စိ အတီတံ ရူပံ နိရုဒ္ဓံ။ပေ.။ အဗ္ဘတ္ထင္ဂတံ, နော စ ဝတ ရေ ဝတ္တဗ္ဗေ – ‘‘အတီတံ ရူပံ အတ္ထီ’’တိ။
284. Atītaṃ rūpaṃ atthīti? Āmantā. Nanu atītaṃ rūpaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Āmantā. Hañci atītaṃ rūpaṃ niruddhaṃ…pe… abbhatthaṅgataṃ, no ca vata re vattabbe – ‘‘atītaṃ rūpaṃ atthī’’ti.
အနာဂတံ ရူပံ အတ္ထီတိ? အာမန္တာ။ နနု အနာဂတံ ရူပံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပာတုဘူတန္တိ? အာမန္တာ။ ဟဉ္စိ အနာဂတံ ရူပံ အဇာတံ။ပေ.။ အပာတုဘူတံ, နော စ ဝတ ရေ ဝတ္တဗ္ဗေ – ‘‘အနာဂတံ ရူပံ အတ္ထီ’’တိ။
Anāgataṃ rūpaṃ atthīti? Āmantā. Nanu anāgataṃ rūpaṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Āmantā. Hañci anāgataṃ rūpaṃ ajātaṃ…pe… apātubhūtaṃ, no ca vata re vattabbe – ‘‘anāgataṃ rūpaṃ atthī’’ti.
ပစ္စုပ္ပန္နံ ရူပံ အတ္ထိ ပစ္စုပ္ပန္နံ ရူပံ အနိရုဒ္ဓံ အဝိဂတံ အဝိပရိဏတံ န အတ္ထင္ဂတံ န အဗ္ဘတ္ထင္ဂတန္တိ? အာမန္တာ။ အတီတံ ရူပံ အတ္ထိ အတီတံ ရူပံ အနိရုဒ္ဓံ အဝိဂတံ အဝိပရိဏတံ န အတ္ထင္ဂတံ န အဗ္ဘတ္ထင္ဂတန္တိ? န ဟေဝံ ဝတ္တဗ္ဗေ။
Paccuppannaṃ rūpaṃ atthi paccuppannaṃ rūpaṃ aniruddhaṃ avigataṃ avipariṇataṃ na atthaṅgataṃ na abbhatthaṅgatanti? Āmantā. Atītaṃ rūpaṃ atthi atītaṃ rūpaṃ aniruddhaṃ avigataṃ avipariṇataṃ na atthaṅgataṃ na abbhatthaṅgatanti? Na hevaṃ vattabbe.
ပစ္စုပ္ပန္နံ ရူပံ အတ္ထိ ပစ္စုပ္ပန္နံ ရူပံ ဇာတံ ဘူတံ သဉ္ဇာတံ နိဗ္ဗတ္တံ အဘိနိဗ္ဗတ္တံ ပာတုဘူတန္တိ? အာမန္တာ။ အနာဂတံ ရူပံ အတ္ထိ အနာဂတံ ရူပံ ဇာတံ ဘူတံ သဉ္ဇာတံ နိဗ္ဗတ္တံ အဘိနိဗ္ဗတ္တံ ပာတုဘူတန္တိ? န ဟေဝံ ဝတ္တဗ္ဗေ။
Paccuppannaṃ rūpaṃ atthi paccuppannaṃ rūpaṃ jātaṃ bhūtaṃ sañjātaṃ nibbattaṃ abhinibbattaṃ pātubhūtanti? Āmantā. Anāgataṃ rūpaṃ atthi anāgataṃ rūpaṃ jātaṃ bhūtaṃ sañjātaṃ nibbattaṃ abhinibbattaṃ pātubhūtanti? Na hevaṃ vattabbe.
အတီတံ ရူပံ အတ္ထိ အတီတံ ရူပံ နိရုဒ္ဓံ ဝိဂတံ ဝိပရိဏတံ အတ္ထင္ဂတံ အဗ္ဘတ္ထင္ဂတန္တိ? အာမန္တာ။ ပစ္စုပ္ပန္နံ ရူပံ အတ္ထိ ပစ္စုပ္ပန္နံ ရူပံ နိရုဒ္ဓံ ဝိဂတံ ဝိပရိဏတံ အတ္ထင္ဂတံ အဗ္ဘတ္ထင္ဂတန္တိ? န ဟေဝံ ဝတ္တဗ္ဗေ။
Atītaṃ rūpaṃ atthi atītaṃ rūpaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Āmantā. Paccuppannaṃ rūpaṃ atthi paccuppannaṃ rūpaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Na hevaṃ vattabbe.
အနာဂတံ ရူပံ အတ္ထိ အနာဂတံ ရူပံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပာတုဘူတန္တိ? အာမန္တာ။ ပစ္စုပ္ပန္နံ ရူပံ အတ္ထိ ပစ္စုပ္ပန္နံ ရူပံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပာတုဘူတန္တိ? န ဟေဝံ ဝတ္တဗ္ဗေ။
Anāgataṃ rūpaṃ atthi anāgataṃ rūpaṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Āmantā. Paccuppannaṃ rūpaṃ atthi paccuppannaṃ rūpaṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Na hevaṃ vattabbe.
အတီတာ ဝေဒနာ အတ္ထိ။ပေ.။ သညာ အတ္ထိ, သင္ခာရာ အတ္ထိ, ဝိညာဏံ အတ္ထီတိ? အာမန္တာ။ နနု အတီတံ ဝိညာဏံ နိရုဒ္ဓံ ဝိဂတံ ဝိပရိဏတံ အတ္ထင္ဂတံ အဗ္ဘတ္ထင္ဂတန္တိ? အာမန္တာ ။ ဟဉ္စိ အတီတံ ဝိညာဏံ နိရုဒ္ဓံ။ပေ.။ အဗ္ဘတ္ထင္ဂတံ, နော စ ဝတ ရေ ဝတ္တဗ္ဗေ – ‘‘အတီတံ ဝိညာဏံ အတ္ထီ’’တိ။
Atītā vedanā atthi…pe… saññā atthi, saṅkhārā atthi, viññāṇaṃ atthīti? Āmantā. Nanu atītaṃ viññāṇaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Āmantā . Hañci atītaṃ viññāṇaṃ niruddhaṃ…pe… abbhatthaṅgataṃ, no ca vata re vattabbe – ‘‘atītaṃ viññāṇaṃ atthī’’ti.
အနာဂတံ ဝိညာဏံ အတ္ထီတိ? အာမန္တာ။ နနု အနာဂတံ ဝိညာဏံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပာတုဘူတန္တိ? အာမန္တာ။ ဟဉ္စိ အနာဂတံ ဝိညာဏံ အဇာတံ။ပေ.။ အပာတုဘူတံ, နော စ ဝတ ရေ ဝတ္တဗ္ဗေ – ‘‘အနာဂတံ ဝိညာဏံ အတ္ထီ’’တိ။
Anāgataṃ viññāṇaṃ atthīti? Āmantā. Nanu anāgataṃ viññāṇaṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Āmantā. Hañci anāgataṃ viññāṇaṃ ajātaṃ…pe… apātubhūtaṃ, no ca vata re vattabbe – ‘‘anāgataṃ viññāṇaṃ atthī’’ti.
ပစ္စုပ္ပန္နံ ဝိညာဏံ အတ္ထိ ပစ္စုပ္ပန္နံ ဝိညာဏံ အနိရုဒ္ဓံ။ပေ.။ န အဗ္ဘတ္ထင္ဂတန္တိ? အာမန္တာ။ အတီတံ ဝိညာဏံ အတ္ထိ အတီတံ ဝိညာဏံ အနိရုဒ္ဓံ။ပေ.။ န အဗ္ဘတ္ထင္ဂတန္တိ? န ဟေဝံ ဝတ္တဗ္ဗေ။
Paccuppannaṃ viññāṇaṃ atthi paccuppannaṃ viññāṇaṃ aniruddhaṃ…pe… na abbhatthaṅgatanti? Āmantā. Atītaṃ viññāṇaṃ atthi atītaṃ viññāṇaṃ aniruddhaṃ…pe… na abbhatthaṅgatanti? Na hevaṃ vattabbe.
ပစ္စုပ္ပန္နံ ဝိညာဏံ အတ္ထိ ပစ္စုပ္ပန္နံ ဝိညာဏံ ဇာတံ။ပေ.။ ပာတုဘူတန္တိ? အာမန္တာ။ အနာဂတံ ဝိညာဏံ အတ္ထိ အနာဂတံ ဝိညာဏံ ဇာတံ။ပေ.။ ပာတုဘူတန္တိ? န ဟေဝံ ဝတ္တဗ္ဗေ။
Paccuppannaṃ viññāṇaṃ atthi paccuppannaṃ viññāṇaṃ jātaṃ…pe… pātubhūtanti? Āmantā. Anāgataṃ viññāṇaṃ atthi anāgataṃ viññāṇaṃ jātaṃ…pe… pātubhūtanti? Na hevaṃ vattabbe.
အတီတံ ဝိညာဏံ အတ္ထိ အတီတံ ဝိညာဏံ နိရုဒ္ဓံ။ပေ.။ အဗ္ဘတ္ထင္ဂတန္တိ? အာမန္တာ။ ပစ္စုပ္ပန္နံ ဝိညာဏံ အတ္ထိ ပစ္စုပ္ပန္နံ ဝိညာဏံ နိရုဒ္ဓံ။ပေ.။ အဗ္ဘတ္ထင္ဂတန္တိ? န ဟေဝံ ဝတ္တဗ္ဗေ။ အနာဂတံ ဝိညာဏံ အတ္ထိ အနာဂတံ ဝိညာဏံ အဇာတံ။ပေ.။ အပာတုဘူတန္တိ? အာမန္တာ။
Atītaṃ viññāṇaṃ atthi atītaṃ viññāṇaṃ niruddhaṃ…pe… abbhatthaṅgatanti? Āmantā. Paccuppannaṃ viññāṇaṃ atthi paccuppannaṃ viññāṇaṃ niruddhaṃ…pe… abbhatthaṅgatanti? Na hevaṃ vattabbe. Anāgataṃ viññāṇaṃ atthi anāgataṃ viññāṇaṃ ajātaṃ…pe… apātubhūtanti? Āmantā.
ပစ္စုပ္ပန္နံ ဝိညာဏံ အတ္ထိ ပစ္စုပ္ပန္နံ ဝိညာဏံ အဇာတံ။ပေ.။ အပာတုဘူတန္တိ? န ဟေဝံ ဝတ္တဗ္ဗေ။
Paccuppannaṃ viññāṇaṃ atthi paccuppannaṃ viññāṇaṃ ajātaṃ…pe… apātubhūtanti? Na hevaṃ vattabbe.
၂၈၅. ‘‘ပစ္စုပ္ပန္နန္တိ ဝာ ရူပ’’န္တိ ဝာ, ‘‘ရူပန္တိ ဝာ ပစ္စုပ္ပန္န’’န္တိ ဝာ ပစ္စုပ္ပန္နံ ရူပံ အပ္ပိယံ ကရိတ္ဝာ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? အာမန္တာ။ ပစ္စုပ္ပန္နံ ရူပံ နိရုဇ္ဈမာနံ ပစ္စုပ္ပန္နဘာဝံ ဇဟတီတိ? အာမန္တာ။ ရူပဘာဝံ ဇဟတီတိ? န ဟေဝံ ဝတ္တဗ္ဗေ။ပေ.။။
285. ‘‘Paccuppannanti vā rūpa’’nti vā, ‘‘rūpanti vā paccuppanna’’nti vā paccuppannaṃ rūpaṃ appiyaṃ karitvā esese ekaṭṭhe same samabhāge tajjāteti? Āmantā. Paccuppannaṃ rūpaṃ nirujjhamānaṃ paccuppannabhāvaṃ jahatīti? Āmantā. Rūpabhāvaṃ jahatīti? Na hevaṃ vattabbe…pe….
‘‘ပစ္စုပ္ပန္နန္တိ ဝာ ရူပ’’န္တိ ဝာ, ‘‘ရူပန္တိ ဝာ ပစ္စုပ္ပန္န’’န္တိ ဝာ ပစ္စုပ္ပန္နံ ရူပံ အပ္ပိယံ ကရိတ္ဝာ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? အာမန္တာ။ ပစ္စုပ္ပန္နံ ရူပံ နိရုဇ္ဈမာနံ ရူပဘာဝံ န ဇဟတီတိ? အာမန္တာ။ ပစ္စုပ္ပန္နဘာဝံ န ဇဟတီတိ? န ဟေဝံ ဝတ္တဗ္ဗေ။ပေ.။။
‘‘Paccuppannanti vā rūpa’’nti vā, ‘‘rūpanti vā paccuppanna’’nti vā paccuppannaṃ rūpaṃ appiyaṃ karitvā esese ekaṭṭhe same samabhāge tajjāteti? Āmantā. Paccuppannaṃ rūpaṃ nirujjhamānaṃ rūpabhāvaṃ na jahatīti? Āmantā. Paccuppannabhāvaṃ na jahatīti? Na hevaṃ vattabbe…pe….
‘‘ဩဒာတန္တိ ဝာ ဝတ္ထ’’န္တိ ဝာ, ‘‘ဝတ္ထန္တိ ဝာ ဩဒာတ’’န္တိ ဝာ ဩဒာတံ ဝတ္ထံ အပ္ပိယံ ကရိတ္ဝာ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? အာမန္တာ။ ဩဒာတံ ဝတ္ထံ ရဇ္ဇမာနံ ဩဒာတဘာဝံ ဇဟတီတိ? အာမန္တာ။ ဝတ္ထဘာဝံ ဇဟတီတိ? န ဟေဝံ ဝတ္တဗ္ဗေ။
‘‘Odātanti vā vattha’’nti vā, ‘‘vatthanti vā odāta’’nti vā odātaṃ vatthaṃ appiyaṃ karitvā esese ekaṭṭhe same samabhāge tajjāteti? Āmantā. Odātaṃ vatthaṃ rajjamānaṃ odātabhāvaṃ jahatīti? Āmantā. Vatthabhāvaṃ jahatīti? Na hevaṃ vattabbe.
‘‘ဩဒာတန္တိ ဝာ ဝတ္ထ’’န္တိ ဝာ, ‘‘ဝတ္ထန္တိ ဝာ ဩဒာတ’’န္တိ ဝာ ဩဒာတံ ဝတ္ထံ အပ္ပိယံ ကရိတ္ဝာ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? အာမန္တာ။ ဩဒာတံ ဝတ္ထံ ရဇ္ဇမာနံ ဝတ္ထဘာဝံ န ဇဟတီတိ? အာမန္တာ။ ဩဒာတဘာဝံ န ဇဟတီတိ? န ဟေဝံ ဝတ္တဗ္ဗေ။။ပေ.။။
‘‘Odātanti vā vattha’’nti vā, ‘‘vatthanti vā odāta’’nti vā odātaṃ vatthaṃ appiyaṃ karitvā esese ekaṭṭhe same samabhāge tajjāteti? Āmantā. Odātaṃ vatthaṃ rajjamānaṃ vatthabhāvaṃ na jahatīti? Āmantā. Odātabhāvaṃ na jahatīti? Na hevaṃ vattabbe.…Pe….
၂၈၆. ရူပံ ရူပဘာဝံ န ဇဟတီတိ? အာမန္တာ။ ရူပံ နိစ္စံ ဓုဝံ သသ္သတံ အဝိပရိဏာမဓမ္မန္တိ ? န ဟေဝံ ဝတ္တဗ္ဗေ။ နနု ရူပံ ရူပဘာဝံ န ဇဟတီတိ ရူပံ အနိစ္စံ အဓုဝံ အသသ္သတံ ဝိပရိဏာမဓမ္မန္တိ? အာမန္တာ။ ဟဉ္စိ ရူပံ အနိစ္စံ အဓုဝံ အသသ္သတံ ဝိပရိဏာမဓမ္မံ, နော စ ဝတ ရေ ဝတ္တဗ္ဗေ – ‘‘ရူပံ ရူပဘာဝံ န ဇဟတီ’’တိ။
286. Rūpaṃ rūpabhāvaṃ na jahatīti? Āmantā. Rūpaṃ niccaṃ dhuvaṃ sassataṃ avipariṇāmadhammanti ? Na hevaṃ vattabbe. Nanu rūpaṃ rūpabhāvaṃ na jahatīti rūpaṃ aniccaṃ adhuvaṃ asassataṃ vipariṇāmadhammanti? Āmantā. Hañci rūpaṃ aniccaṃ adhuvaṃ asassataṃ vipariṇāmadhammaṃ, no ca vata re vattabbe – ‘‘rūpaṃ rūpabhāvaṃ na jahatī’’ti.
နိဗ္ဗာနံ နိဗ္ဗာနဘာဝံ န ဇဟတီတိ နိဗ္ဗာနံ နိစ္စံ ဓုဝံ သသ္သတံ အဝိပရိဏာမဓမ္မန္တိ? အာမန္တာ။ ရူပံ ရူပဘာဝံ န ဇဟတီတိ 1 ရူပံ နိစ္စံ ဓုဝံ သသ္သတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ.။ ရူပံ ရူပဘာဝံ န ဇဟတိ ရူပံ အနိစ္စံ အဓုဝံ အသသ္သတံ ဝိပရိဏာမဓမ္မန္တိ? အာမန္တာ။ နိဗ္ဗာနံ နိဗ္ဗာနဘာဝံ န ဇဟတိ နိဗ္ဗာနံ အနိစ္စံ အဓုဝံ အသသ္သတံ ဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ.။။
Nibbānaṃ nibbānabhāvaṃ na jahatīti nibbānaṃ niccaṃ dhuvaṃ sassataṃ avipariṇāmadhammanti? Āmantā. Rūpaṃ rūpabhāvaṃ na jahatīti 2 rūpaṃ niccaṃ dhuvaṃ sassataṃ avipariṇāmadhammanti? Na hevaṃ vattabbe…pe… rūpaṃ rūpabhāvaṃ na jahati rūpaṃ aniccaṃ adhuvaṃ asassataṃ vipariṇāmadhammanti? Āmantā. Nibbānaṃ nibbānabhāvaṃ na jahati nibbānaṃ aniccaṃ adhuvaṃ asassataṃ vipariṇāmadhammanti? Na hevaṃ vattabbe…pe….
အတီတံ အတ္ထိ အတီတံ အတီတဘာဝံ န ဇဟတီတိ? အာမန္တာ။ အနာဂတံ အတ္ထိ အနာဂတံ အနာဂတဘာဝံ န ဇဟတီတိ? န ဟေဝံ ဝတ္တဗ္ဗေ။ အတီတံ အတ္ထိ အတီတံ အတီတဘာဝံ န ဇဟတီတိ? အာမန္တာ။ ပစ္စုပ္ပန္နံ အတ္ထိ ပစ္စုပ္ပန္နံ ပစ္စုပ္ပန္နဘာဝံ န ဇဟတီတိ? န ဟေဝံ ဝတ္တဗ္ဗေ။ပေ.။။
Atītaṃ atthi atītaṃ atītabhāvaṃ na jahatīti? Āmantā. Anāgataṃ atthi anāgataṃ anāgatabhāvaṃ na jahatīti? Na hevaṃ vattabbe. Atītaṃ atthi atītaṃ atītabhāvaṃ na jahatīti? Āmantā. Paccuppannaṃ atthi paccuppannaṃ paccuppannabhāvaṃ na jahatīti? Na hevaṃ vattabbe…pe….
အတီတံ အတ္ထိ အတီတံ အတီတဘာဝံ န ဇဟတီတိ? အာမန္တာ။ အတီတံ နိစ္စံ ဓုဝံ သသ္သတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ.။ နနု အတီတံ အနိစ္စံ အဓုဝံ အသသ္သတံ ဝိပရိဏာမဓမ္မန္တိ? အာမန္တာ။ ဟဉ္စိ အတီတံ အနိစ္စံ အဓုဝံ အသသ္သတံ ဝိပရိဏာမဓမ္မံ, နော စ ဝတ ရေ ဝတ္တဗ္ဗေ – ‘‘အတီတံ အတ္ထိ အတီတံ အတီတဘာဝံ န ဇဟတီ’’တိ။
Atītaṃ atthi atītaṃ atītabhāvaṃ na jahatīti? Āmantā. Atītaṃ niccaṃ dhuvaṃ sassataṃ avipariṇāmadhammanti? Na hevaṃ vattabbe…pe… nanu atītaṃ aniccaṃ adhuvaṃ asassataṃ vipariṇāmadhammanti? Āmantā. Hañci atītaṃ aniccaṃ adhuvaṃ asassataṃ vipariṇāmadhammaṃ, no ca vata re vattabbe – ‘‘atītaṃ atthi atītaṃ atītabhāvaṃ na jahatī’’ti.
နိဗ္ဗာနံ အတ္ထိ နိဗ္ဗာနံ နိဗ္ဗာနဘာဝံ န ဇဟတီတိ နိဗ္ဗာနံ နိစ္စံ ဓုဝံ သသ္သတံ အဝိပရိဏာမဓမ္မန္တိ ? အာမန္တာ။ အတီတံ အတ္ထိ အတီတံ အတီတဘာဝံ န ဇဟတီတိ အတီတံ နိစ္စံ ဓုဝံ သသ္သတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ.။။
Nibbānaṃ atthi nibbānaṃ nibbānabhāvaṃ na jahatīti nibbānaṃ niccaṃ dhuvaṃ sassataṃ avipariṇāmadhammanti ? Āmantā. Atītaṃ atthi atītaṃ atītabhāvaṃ na jahatīti atītaṃ niccaṃ dhuvaṃ sassataṃ avipariṇāmadhammanti? Na hevaṃ vattabbe…pe….
အတီတံ အတ္ထိ အတီတံ အတီတဘာဝံ န ဇဟတိ အတီတံ အနိစ္စံ အဓုဝံ အသသ္သတံ ဝိပရိဏာမဓမ္မန္တိ? အာမန္တာ။ နိဗ္ဗာနံ အတ္ထိ နိဗ္ဗာနံ နိဗ္ဗာနဘာဝံ န ဇဟတိ နိဗ္ဗာနံ အနိစ္စံ အဓုဝံ အသသ္သတံ ဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ.။။
Atītaṃ atthi atītaṃ atītabhāvaṃ na jahati atītaṃ aniccaṃ adhuvaṃ asassataṃ vipariṇāmadhammanti? Āmantā. Nibbānaṃ atthi nibbānaṃ nibbānabhāvaṃ na jahati nibbānaṃ aniccaṃ adhuvaṃ asassataṃ vipariṇāmadhammanti? Na hevaṃ vattabbe…pe….
၂၈၇. အတီတံ ရူပံ အတ္ထိ အတီတံ ရူပံ အတီတဘာဝံ န ဇဟတီတိ? အာမန္တာ။ အနာဂတံ ရူပံ အတ္ထိ အနာဂတံ ရူပံ အနာဂတဘာဝံ န ဇဟတီတိ? န ဟေဝံ ဝတ္တဗ္ဗေ။ပေ.။ အတီတံ ရူပံ အတ္ထိ အတီတံ ရူပံ အတီတဘာဝံ န ဇဟတီတိ? အာမန္တာ။ ပစ္စုပ္ပန္နံ ရူပံ အတ္ထိ ပစ္စုပ္ပန္နံ ရူပံ ပစ္စုပ္ပန္နဘာဝံ န ဇဟတီတိ? န ဟေဝံ ဝတ္တဗ္ဗေ။ပေ.။။
287. Atītaṃ rūpaṃ atthi atītaṃ rūpaṃ atītabhāvaṃ na jahatīti? Āmantā. Anāgataṃ rūpaṃ atthi anāgataṃ rūpaṃ anāgatabhāvaṃ na jahatīti? Na hevaṃ vattabbe…pe… atītaṃ rūpaṃ atthi atītaṃ rūpaṃ atītabhāvaṃ na jahatīti? Āmantā. Paccuppannaṃ rūpaṃ atthi paccuppannaṃ rūpaṃ paccuppannabhāvaṃ na jahatīti? Na hevaṃ vattabbe…pe….
အတီတံ ရူပံ အတ္ထိ အတီတံ ရူပံ အတီတဘာဝံ န ဇဟတီတိ? အာမန္တာ။ အတီတံ ရူပံ နိစ္စံ ဓုဝံ သသ္သတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ.။ နနု အတီတံ ရူပံ အနိစ္စံ အဓုဝံ အသသ္သတံ ဝိပရိဏာမဓမ္မန္တိ? အာမန္တာ။ ဟဉ္စိ အတီတံ ရူပံ အနိစ္စံ။ပေ.။ ဝိပရိဏာမဓမ္မံ, နော စ ဝတ ရေ ဝတ္တဗ္ဗေ – ‘‘အတီတံ ရူပံ အတ္ထိ အတီတံ ရူပံ အတီတဘာဝံ န ဇဟတီ’’တိ။
Atītaṃ rūpaṃ atthi atītaṃ rūpaṃ atītabhāvaṃ na jahatīti? Āmantā. Atītaṃ rūpaṃ niccaṃ dhuvaṃ sassataṃ avipariṇāmadhammanti? Na hevaṃ vattabbe…pe… nanu atītaṃ rūpaṃ aniccaṃ adhuvaṃ asassataṃ vipariṇāmadhammanti? Āmantā. Hañci atītaṃ rūpaṃ aniccaṃ…pe… vipariṇāmadhammaṃ, no ca vata re vattabbe – ‘‘atītaṃ rūpaṃ atthi atītaṃ rūpaṃ atītabhāvaṃ na jahatī’’ti.
အတီတံ ရူပံ အတ္ထိ အတီတံ ရူပံ အတီတဘာဝံ န ဇဟတိ အတီတံ ရူပံ အနိစ္စံ အဓုဝံ အသသ္သတံ ဝိပရိဏာမဓမ္မန္တိ? အာမန္တာ။ နိဗ္ဗာနံ အတ္ထိ နိဗ္ဗာနံ နိဗ္ဗာနဘာဝံ န ဇဟတိ နိဗ္ဗာနံ အနိစ္စံ အဓုဝံ အသသ္သတံ ဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ.။။
Atītaṃ rūpaṃ atthi atītaṃ rūpaṃ atītabhāvaṃ na jahati atītaṃ rūpaṃ aniccaṃ adhuvaṃ asassataṃ vipariṇāmadhammanti? Āmantā. Nibbānaṃ atthi nibbānaṃ nibbānabhāvaṃ na jahati nibbānaṃ aniccaṃ adhuvaṃ asassataṃ vipariṇāmadhammanti? Na hevaṃ vattabbe…pe….
အတီတာ ဝေဒနာ အတ္ထိ။ အတီတာ သညာ အတ္ထိ။ အတီတာ သင္ခာရာ အတ္ထိ။ အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ န ဇဟတီတိ? အာမန္တာ။ အနာဂတံ ဝိညာဏံ အတ္ထိ အနာဂတံ ဝိညာဏံ အနာဂတဘာဝံ န ဇဟတီတိ? န ဟေဝံ ဝတ္တဗ္ဗေ။ပေ.။ အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ န ဇဟတီတိ? အာမန္တာ။ ပစ္စုပ္ပန္နံ ဝိညာဏံ အတ္ထိ ပစ္စုပ္ပန္နံ ဝိညာဏံ ပစ္စုပ္ပန္နဘာဝံ န ဇဟတီတိ? န ဟေဝံ ဝတ္တဗ္ဗေ။ပေ.။။
Atītā vedanā atthi… atītā saññā atthi… atītā saṅkhārā atthi… atītaṃ viññāṇaṃ atthi atītaṃ viññāṇaṃ atītabhāvaṃ na jahatīti? Āmantā. Anāgataṃ viññāṇaṃ atthi anāgataṃ viññāṇaṃ anāgatabhāvaṃ na jahatīti? Na hevaṃ vattabbe…pe… atītaṃ viññāṇaṃ atthi atītaṃ viññāṇaṃ atītabhāvaṃ na jahatīti? Āmantā. Paccuppannaṃ viññāṇaṃ atthi paccuppannaṃ viññāṇaṃ paccuppannabhāvaṃ na jahatīti? Na hevaṃ vattabbe…pe….
အနာဂတံ ဝိညာဏံ အတ္ထိ အနာဂတံ ဝိညာဏံ အနာဂတဘာဝံ ဇဟတီတိ? အာမန္တာ။ အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ ဇဟတီတိ? န ဟေဝံ ဝတ္တဗ္ဗေ။ပေ.။။
Anāgataṃ viññāṇaṃ atthi anāgataṃ viññāṇaṃ anāgatabhāvaṃ jahatīti? Āmantā. Atītaṃ viññāṇaṃ atthi atītaṃ viññāṇaṃ atītabhāvaṃ jahatīti? Na hevaṃ vattabbe…pe….
အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ န ဇဟတီတိ? အာမန္တာ။ အတီတံ ဝိညာဏံ နိစ္စံ ဓုဝံ သသ္သတံ အဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ.။ နနု အတီတံ ဝိညာဏံ အနိစ္စံ အဓုဝံ အသသ္သတံ ဝိပရိဏာမဓမ္မန္တိ? အာမန္တာ။ ဟဉ္စိ အတီတံ ဝိညာဏံ အနိစ္စံ အဓုဝံ အသသ္သတံ ဝိပရိဏာမဓမ္မံ, နော စ ဝတ ရေ ဝတ္တဗ္ဗေ – ‘‘အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ န ဇဟတီ’’တိ။
Atītaṃ viññāṇaṃ atthi atītaṃ viññāṇaṃ atītabhāvaṃ na jahatīti? Āmantā. Atītaṃ viññāṇaṃ niccaṃ dhuvaṃ sassataṃ avipariṇāmadhammanti? Na hevaṃ vattabbe…pe… nanu atītaṃ viññāṇaṃ aniccaṃ adhuvaṃ asassataṃ vipariṇāmadhammanti? Āmantā. Hañci atītaṃ viññāṇaṃ aniccaṃ adhuvaṃ asassataṃ vipariṇāmadhammaṃ, no ca vata re vattabbe – ‘‘atītaṃ viññāṇaṃ atthi atītaṃ viññāṇaṃ atītabhāvaṃ na jahatī’’ti.
အတီတံ ဝိညာဏံ အတ္ထိ အတီတံ ဝိညာဏံ အတီတဘာဝံ န ဇဟတိ အတီတံ ဝိညာဏံ အနိစ္စံ အဓုဝံ အသသ္သတံ ဝိပရိဏာမဓမ္မန္တိ? အာမန္တာ။ နိဗ္ဗာနံ အတ္ထိ နိဗ္ဗာနံ နိဗ္ဗာနဘာဝံ န ဇဟတိ နိဗ္ဗာနံ အနိစ္စံ အဓုဝံ အသသ္သတံ ဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ.။။
Atītaṃ viññāṇaṃ atthi atītaṃ viññāṇaṃ atītabhāvaṃ na jahati atītaṃ viññāṇaṃ aniccaṃ adhuvaṃ asassataṃ vipariṇāmadhammanti? Āmantā. Nibbānaṃ atthi nibbānaṃ nibbānabhāvaṃ na jahati nibbānaṃ aniccaṃ adhuvaṃ asassataṃ vipariṇāmadhammanti? Na hevaṃ vattabbe…pe….
ဝစနသောဓနာ
Vacanasodhanā
၂၈၈. အတီတံ န္ဝတ္ထီတိ? အာမန္တာ။ ဟဉ္စိ အတီတံ န္ဝတ္ထိ, အတီတံ အတ္ထီတိ မိစ္ဆာ။ ဟဉ္စိ ဝာ ပန အတ္ထိ န္ဝာတီတံ, အတ္ထိ အတီတန္တိ မိစ္ဆာ။ အနာဂတံ န္ဝတ္ထီတိ? အာမန္တာ။ ဟဉ္စိ အနာဂတံ န္ဝတ္ထိ, အနာဂတံ အတ္ထီတိ မိစ္ဆာ။ ဟဉ္စိ ဝာ ပန အတ္ထိ န္ဝာနာဂတံ, အတ္ထိ အနာဂတန္တိ မိစ္ဆာ။
288. Atītaṃ nvatthīti? Āmantā. Hañci atītaṃ nvatthi, atītaṃ atthīti micchā. Hañci vā pana atthi nvātītaṃ, atthi atītanti micchā. Anāgataṃ nvatthīti? Āmantā. Hañci anāgataṃ nvatthi, anāgataṃ atthīti micchā. Hañci vā pana atthi nvānāgataṃ, atthi anāgatanti micchā.
အနာဂတံ ဟုတ္ဝာ ပစ္စုပ္ပန္နံ ဟောတီတိ? အာမန္တာ။ တညေဝ အနာဂတံ တံ ပစ္စုပ္ပန္နန္တိ? န ဟေဝံ ဝတ္တဗ္ဗေ။ပေ.။ တညေဝ အနာဂတံ တံ ပစ္စုပ္ပန္နန္တိ? အာမန္တာ။ ဟုတ္ဝာ ဟောတိ ဟုတ္ဝာ ဟောတီတိ? န ဟေဝံ ဝတ္တဗ္ဗေ။ပေ.။ ဟုတ္ဝာ ဟောတိ ဟုတ္ဝာ ဟောတီတိ? အာမန္တာ။ န ဟုတ္ဝာ န ဟောတိ န ဟုတ္ဝာ န ဟောတီတိ? န ဟေဝံ ဝတ္တဗ္ဗေ။ပေ.။။
Anāgataṃ hutvā paccuppannaṃ hotīti? Āmantā. Taññeva anāgataṃ taṃ paccuppannanti? Na hevaṃ vattabbe…pe… taññeva anāgataṃ taṃ paccuppannanti? Āmantā. Hutvā hoti hutvā hotīti? Na hevaṃ vattabbe…pe… hutvā hoti hutvā hotīti? Āmantā. Na hutvā na hoti na hutvā na hotīti? Na hevaṃ vattabbe…pe….
ပစ္စုပ္ပန္နံ ဟုတ္ဝာ အတီတံ ဟောတီတိ? အာမန္တာ။ တညေဝ ပစ္စုပ္ပန္နံ တံ အတီတန္တိ? န ဟေဝံ ဝတ္တဗ္ဗေ။ပေ.။ တညေဝ ပစ္စုပ္ပန္နံ တံ အတီတန္တိ? အာမန္တာ ။ ဟုတ္ဝာ ဟောတိ ဟုတ္ဝာ ဟောတီတိ? န ဟေဝံ ဝတ္တဗ္ဗေ။ပေ.။ ဟုတ္ဝာ ဟောတိ ဟုတ္ဝာ ဟောတီတိ? အာမန္တာ။ န ဟုတ္ဝာ န ဟောတိ န ဟုတ္ဝာ န ဟောတီတိ? န ဟေဝံ ဝတ္တဗ္ဗေ။ပေ.။။
Paccuppannaṃ hutvā atītaṃ hotīti? Āmantā. Taññeva paccuppannaṃ taṃ atītanti? Na hevaṃ vattabbe…pe… taññeva paccuppannaṃ taṃ atītanti? Āmantā . Hutvā hoti hutvā hotīti? Na hevaṃ vattabbe…pe… hutvā hoti hutvā hotīti? Āmantā. Na hutvā na hoti na hutvā na hotīti? Na hevaṃ vattabbe…pe….
အနာဂတံ ဟုတ္ဝာ ပစ္စုပ္ပန္နံ ဟောတိ, ပစ္စုပ္ပန္နံ ဟုတ္ဝာ အတီတံ ဟောတီတိ? အာမန္တာ။ တညေဝ အနာဂတံ တံ ပစ္စုပ္ပန္နံ တံ အတီတန္တိ? န ဟေဝံ ဝတ္တဗ္ဗေ။ပေ.။ တညေဝ အနာဂတံ တံ ပစ္စုပ္ပန္နံ တံ အတီတန္တိ? အာမန္တာ။ ဟုတ္ဝာ ဟောတိ ဟုတ္ဝာ ဟောတီတိ? န ဟေဝံ ဝတ္တဗ္ဗေ။ပေ.။ ဟုတ္ဝာ ဟောတိ ဟုတ္ဝာ ဟောတီတိ? အာမန္တာ။ န ဟုတ္ဝာ န ဟောတိ န ဟုတ္ဝာ န ဟောတီတိ? န ဟေဝံ ဝတ္တဗ္ဗေ။
Anāgataṃ hutvā paccuppannaṃ hoti, paccuppannaṃ hutvā atītaṃ hotīti? Āmantā. Taññeva anāgataṃ taṃ paccuppannaṃ taṃ atītanti? Na hevaṃ vattabbe…pe… taññeva anāgataṃ taṃ paccuppannaṃ taṃ atītanti? Āmantā. Hutvā hoti hutvā hotīti? Na hevaṃ vattabbe…pe… hutvā hoti hutvā hotīti? Āmantā. Na hutvā na hoti na hutvā na hotīti? Na hevaṃ vattabbe.
အတီတစက္ခုရူပာဒိကထာ
Atītacakkhurūpādikathā
၂၈၉. အတီတံ စက္ခုံ အတ္ထိ ရူပာ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထီတိ? အာမန္တာ။ အတီတေန စက္ခုနာ အတီတံ ရူပံ ပသ္သတီတိ? န ဟေဝံ ဝတ္တဗ္ဗေ။ပေ.။ အတီတံ သောတံ အတ္ထိ သဒ္ဒာ အတ္ထိ သောတဝိညာဏံ အတ္ထိ အာကာသော အတ္ထိ မနသိကာရော အတ္ထီတိ? အာမန္တာ။ အတီတေန သောတေန အတီတံ သဒ္ဒံ သုဏာတီတိ? န ဟေဝံ ဝတ္တဗ္ဗေ။ပေ.။ အတီတံ ဃာနံ အတ္ထိ ဂန္ဓာ အတ္ထိ ဃာနဝိညာဏံ အတ္ထိ ဝာယော အတ္ထိ မနသိကာရော အတ္ထီတိ? အာမန္တာ။ အတီတေန ဃာနေန အတီတံ ဂန္ဓံ ဃာယတီတိ? န ဟေဝံ ဝတ္တဗ္ဗေ။ပေ.။ အတီတာ ဇိဝ္ဟာ အတ္ထိ ရသာ အတ္ထိ ဇိဝ္ဟာဝိညာဏံ အတ္ထိ အာပော အတ္ထိ မနသိကာရော အတ္ထီတိ? အာမန္တာ ။ အတီတာယ ဇိဝ္ဟာယ အတီတံ ရသံ သာယတီတိ? န ဟေဝံ ဝတ္တဗ္ဗေ။ပေ.။ အတီတော ကာယော အတ္ထိ ဖောဋ္ဌဗ္ဗာ အတ္ထိ ကာယဝိညာဏံ အတ္ထိ ပထဝီ အတ္ထိ မနသိကာရော အတ္ထီတိ? အာမန္တာ။ အတီတေန ကာယေန အတီတံ ဖောဋ္ဌဗ္ဗံ ဖုသတီတိ? န ဟေဝံ ဝတ္တဗ္ဗေ။ပေ.။ အတီတော မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထီတိ? အာမန္တာ။ အတီတေန မနေန အတီတံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ.။။
289. Atītaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthīti? Āmantā. Atītena cakkhunā atītaṃ rūpaṃ passatīti? Na hevaṃ vattabbe…pe… atītaṃ sotaṃ atthi saddā atthi sotaviññāṇaṃ atthi ākāso atthi manasikāro atthīti? Āmantā. Atītena sotena atītaṃ saddaṃ suṇātīti? Na hevaṃ vattabbe…pe… atītaṃ ghānaṃ atthi gandhā atthi ghānaviññāṇaṃ atthi vāyo atthi manasikāro atthīti? Āmantā. Atītena ghānena atītaṃ gandhaṃ ghāyatīti? Na hevaṃ vattabbe…pe… atītā jivhā atthi rasā atthi jivhāviññāṇaṃ atthi āpo atthi manasikāro atthīti? Āmantā . Atītāya jivhāya atītaṃ rasaṃ sāyatīti? Na hevaṃ vattabbe…pe… atīto kāyo atthi phoṭṭhabbā atthi kāyaviññāṇaṃ atthi pathavī atthi manasikāro atthīti? Āmantā. Atītena kāyena atītaṃ phoṭṭhabbaṃ phusatīti? Na hevaṃ vattabbe…pe… atīto mano atthi dhammā atthi manoviññāṇaṃ atthi vatthuṃ atthi manasikāro atthīti? Āmantā. Atītena manena atītaṃ dhammaṃ vijānātīti? Na hevaṃ vattabbe…pe….
အနာဂတံ စက္ခုံ အတ္ထိ ရူပာ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထီတိ? အာမန္တာ။ အနာဂတေန စက္ခုနာ အနာဂတံ ရူပံ ပသ္သတီတိ? န ဟေဝံ ဝတ္တဗ္ဗေ။ပေ.။ အနာဂတံ သောတံ အတ္ထိ။ ဃာနံ အတ္ထိ။ ဇိဝ္ဟာ အတ္ထိ။ ကာယော အတ္ထိ ။ မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထီတိ? အာမန္တာ။ အနာဂတေန မနေန အနာဂတံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ.။။
Anāgataṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthīti? Āmantā. Anāgatena cakkhunā anāgataṃ rūpaṃ passatīti? Na hevaṃ vattabbe…pe… anāgataṃ sotaṃ atthi… ghānaṃ atthi… jivhā atthi… kāyo atthi … mano atthi dhammā atthi manoviññāṇaṃ atthi vatthuṃ atthi manasikāro atthīti? Āmantā. Anāgatena manena anāgataṃ dhammaṃ vijānātīti? Na hevaṃ vattabbe…pe….
ပစ္စုပ္ပန္နံ စက္ခုံ အတ္ထိ ရူပာ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ, ပစ္စုပ္ပန္နေန စက္ခုနာ ပစ္စုပ္ပန္နံ ရူပံ ပသ္သတီတိ? အာမန္တာ။ အတီတံ စက္ခုံ အတ္ထိ ရူပာ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ, အတီတေန စက္ခုနာ အတီတံ ရူပံ ပသ္သတီတိ? န ဟေဝံ ဝတ္တဗ္ဗေ။ပေ.။။ ပစ္စုပ္ပန္နံ သောတံ အတ္ထိ။ ဃာနံ အတ္ထိ။ ဇိဝ္ဟာ အတ္ထိ။ ကာယော အတ္ထိ။ မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ, ပစ္စုပ္ပန္နေန မနေန ပစ္စုပ္ပန္နံ ဓမ္မံ ဝိဇာနာတီတိ? အာမန္တာ။ အတီတော မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ, အတီတေန မနေန အတီတံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ.။။
Paccuppannaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, paccuppannena cakkhunā paccuppannaṃ rūpaṃ passatīti? Āmantā. Atītaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, atītena cakkhunā atītaṃ rūpaṃ passatīti? Na hevaṃ vattabbe…pe…. Paccuppannaṃ sotaṃ atthi… ghānaṃ atthi… jivhā atthi… kāyo atthi… mano atthi dhammā atthi manoviññāṇaṃ atthi vatthuṃ atthi manasikāro atthi, paccuppannena manena paccuppannaṃ dhammaṃ vijānātīti? Āmantā. Atīto mano atthi dhammā atthi manoviññāṇaṃ atthi vatthuṃ atthi manasikāro atthi, atītena manena atītaṃ dhammaṃ vijānātīti? Na hevaṃ vattabbe…pe….
ပစ္စုပ္ပန္နံ စက္ခုံ အတ္ထိ ရူပာ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ, ပစ္စုပ္ပန္နေန စက္ခုနာ ပစ္စုပ္ပန္နံ ရူပံ ပသ္သတီတိ? အာမန္တာ။ အနာဂတံ စက္ခုံ အတ္ထိ ရူပာ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ, အနာဂတေန စက္ခုနာ အနာဂတံ ရူပံ ပသ္သတီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ သောတံ အတ္ထိ။ ဃာနံ အတ္ထိ။ ဇိဝ္ဟာ အတ္ထိ။ ကာယော အတ္ထိ။ မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ, ပစ္စုပ္ပန္နေန မနေန ပစ္စုပ္ပန္နံ ဓမ္မံ ဝိဇာနာတီတိ? အာမန္တာ။ အနာဂတော မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ, အနာဂတေန မနေန အနာဂတံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ.။။
Paccuppannaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, paccuppannena cakkhunā paccuppannaṃ rūpaṃ passatīti? Āmantā. Anāgataṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, anāgatena cakkhunā anāgataṃ rūpaṃ passatīti? Na hevaṃ vattabbe…pe… paccuppannaṃ sotaṃ atthi… ghānaṃ atthi… jivhā atthi… kāyo atthi… mano atthi dhammā atthi manoviññāṇaṃ atthi vatthuṃ atthi manasikāro atthi, paccuppannena manena paccuppannaṃ dhammaṃ vijānātīti? Āmantā. Anāgato mano atthi dhammā atthi manoviññāṇaṃ atthi vatthuṃ atthi manasikāro atthi, anāgatena manena anāgataṃ dhammaṃ vijānātīti? Na hevaṃ vattabbe…pe….
အတီတံ စက္ခုံ အတ္ထိ ရူပာ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ, န စ အတီတေန စက္ခုနာ အတီတံ ရူပံ ပသ္သတီတိ? အာမန္တာ။ ပစ္စုပ္ပန္နံ စက္ခုံ အတ္ထိ ရူပာ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ, န စ ပစ္စုပ္ပန္နေန စက္ခုနာ ပစ္စုပ္ပန္နံ ရူပံ ပသ္သတီတိ? န ဟေဝံ ဝတ္တဗ္ဗေ။ပေ.။ အတီတံ သောတံ အတ္ထိ။ ဃာနံ အတ္ထိ။ ဇိဝ္ဟာ အတ္ထိ။ ကာယော အတ္ထိ။ မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ, န စ အတီတေန မနေန အတီတံ ဓမ္မံ ဝိဇာနာတီတိ? အာမန္တာ။ ပစ္စုပ္ပန္နော မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ, န စ ပစ္စုပ္ပန္နေန မနေန ပစ္စုပ္ပန္နံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ.။။
Atītaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, na ca atītena cakkhunā atītaṃ rūpaṃ passatīti? Āmantā. Paccuppannaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, na ca paccuppannena cakkhunā paccuppannaṃ rūpaṃ passatīti? Na hevaṃ vattabbe…pe… atītaṃ sotaṃ atthi… ghānaṃ atthi… jivhā atthi… kāyo atthi… mano atthi dhammā atthi manoviññāṇaṃ atthi vatthuṃ atthi manasikāro atthi, na ca atītena manena atītaṃ dhammaṃ vijānātīti? Āmantā. Paccuppanno mano atthi dhammā atthi manoviññāṇaṃ atthi vatthuṃ atthi manasikāro atthi, na ca paccuppannena manena paccuppannaṃ dhammaṃ vijānātīti? Na hevaṃ vattabbe…pe….
အနာဂတံ စက္ခုံ အတ္ထိ ရူပာ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ, န စ အနာဂတေန စက္ခုနာ အနာဂတံ ရူပံ ပသ္သတီတိ? အာမန္တာ။ ပစ္စုပ္ပန္နံ စက္ခုံ အတ္ထိ ရူပာ အတ္ထိ စက္ခုဝိညာဏံ အတ္ထိ အာလောကော အတ္ထိ မနသိကာရော အတ္ထိ, န စ ပစ္စုပ္ပန္နေန စက္ခုနာ ပစ္စုပ္ပန္နံ ရူပံ ပသ္သတီတိ? န ဟေဝံ ဝတ္တဗ္ဗေ။ပေ.။ အနာဂတံ သောတံ အတ္ထိ။ ဃာနံ အတ္ထိ။ ဇိဝ္ဟာ အတ္ထိ။ ကာယော အတ္ထိ။ မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ, န စ အနာဂတေန မနေန အနာဂတံ ဓမ္မံ ဝိဇာနာတီတိ ? အာမန္တာ။ ပစ္စုပ္ပန္နော မနော အတ္ထိ ဓမ္မာ အတ္ထိ မနောဝိညာဏံ အတ္ထိ ဝတ္ထုံ အတ္ထိ မနသိကာရော အတ္ထိ, န စ ပစ္စုပ္ပန္နေန မနေန ပစ္စုပ္ပန္နံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ.။။
Anāgataṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, na ca anāgatena cakkhunā anāgataṃ rūpaṃ passatīti? Āmantā. Paccuppannaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, na ca paccuppannena cakkhunā paccuppannaṃ rūpaṃ passatīti? Na hevaṃ vattabbe…pe… anāgataṃ sotaṃ atthi… ghānaṃ atthi… jivhā atthi… kāyo atthi… mano atthi dhammā atthi manoviññāṇaṃ atthi vatthuṃ atthi manasikāro atthi, na ca anāgatena manena anāgataṃ dhammaṃ vijānātīti ? Āmantā. Paccuppanno mano atthi dhammā atthi manoviññāṇaṃ atthi vatthuṃ atthi manasikāro atthi, na ca paccuppannena manena paccuppannaṃ dhammaṃ vijānātīti? Na hevaṃ vattabbe…pe….
အတီတဉာဏာဒိကထာ
Atītañāṇādikathā
၂၉၀. အတီတံ ဉာဏံ အတ္ထီတိ? အာမန္တာ။ တေန ဉာဏေန ဉာဏကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။ တေန ဉာဏေန ဉာဏကရဏီယံ ကရောတီတိ ? အာမန္တာ။ တေန ဉာဏေန ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
290. Atītaṃ ñāṇaṃ atthīti? Āmantā. Tena ñāṇena ñāṇakaraṇīyaṃ karotīti? Na hevaṃ vattabbe…pe… tena ñāṇena ñāṇakaraṇīyaṃ karotīti ? Āmantā. Tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
အနာဂတံ ဉာဏံ အတ္ထီတိ? အာမန္တာ။ တေန ဉာဏေန ဉာဏကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။ တေန ဉာဏေန ဉာဏကရဏီယံ ကရောတီတိ? အာမန္တာ။ တေန ဉာဏေန ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ , မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
Anāgataṃ ñāṇaṃ atthīti? Āmantā. Tena ñāṇena ñāṇakaraṇīyaṃ karotīti? Na hevaṃ vattabbe…pe… tena ñāṇena ñāṇakaraṇīyaṃ karotīti? Āmantā. Tena ñāṇena dukkhaṃ parijānāti, samudayaṃ pajahati, nirodhaṃ sacchikaroti , maggaṃ bhāvetīti? Na hevaṃ vattabbe…pe….
ပစ္စုပ္ပန္နံ ဉာဏံ အတ္ထိ, တေန ဉာဏေန ဉာဏကရဏီယံ ကရောတီတိ? အာမန္တာ။ အတီတံ ဉာဏံ အတ္ထိ, တေန ဉာဏေန ဉာဏကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ဉာဏံ အတ္ထိ, တေန ဉာဏေန ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? အာမန္တာ။ အတီတံ ဉာဏံ အတ္ထိ, တေန ဉာဏေန ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ဉာဏံ အတ္ထိ, တေန ဉာဏေန ဉာဏကရဏီယံ ကရောတီတိ? အာမန္တာ။ အနာဂတံ ဉာဏံ အတ္ထိ, တေန ဉာဏေန ဉာဏကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ဉာဏံ အတ္ထိ, တေန ဉာဏေန ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? အာမန္တာ ။ အနာဂတံ ဉာဏံ အတ္ထိ, တေန ဉာဏေန ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
Paccuppannaṃ ñāṇaṃ atthi, tena ñāṇena ñāṇakaraṇīyaṃ karotīti? Āmantā. Atītaṃ ñāṇaṃ atthi, tena ñāṇena ñāṇakaraṇīyaṃ karotīti? Na hevaṃ vattabbe…pe… paccuppannaṃ ñāṇaṃ atthi, tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Āmantā. Atītaṃ ñāṇaṃ atthi, tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe… paccuppannaṃ ñāṇaṃ atthi, tena ñāṇena ñāṇakaraṇīyaṃ karotīti? Āmantā. Anāgataṃ ñāṇaṃ atthi, tena ñāṇena ñāṇakaraṇīyaṃ karotīti? Na hevaṃ vattabbe…pe… paccuppannaṃ ñāṇaṃ atthi, tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Āmantā . Anāgataṃ ñāṇaṃ atthi, tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
အတီတံ ဉာဏံ အတ္ထိ, န စ တေန ဉာဏေန ဉာဏကရဏီယံ ကရောတီတိ? အာမန္တာ။ ပစ္စုပ္ပန္နံ ဉာဏံ အတ္ထိ, န စ တေန ဉာဏေန ဉာဏကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။ အတီတံ ဉာဏံ အတ္ထိ, န စ တေန ဉာဏေန ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? အာမန္တာ။ ပစ္စုပ္ပန္နံ ဉာဏံ အတ္ထိ, န စ တေန ဉာဏေန ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
Atītaṃ ñāṇaṃ atthi, na ca tena ñāṇena ñāṇakaraṇīyaṃ karotīti? Āmantā. Paccuppannaṃ ñāṇaṃ atthi, na ca tena ñāṇena ñāṇakaraṇīyaṃ karotīti? Na hevaṃ vattabbe…pe… atītaṃ ñāṇaṃ atthi, na ca tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Āmantā. Paccuppannaṃ ñāṇaṃ atthi, na ca tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
အနာဂတံ ဉာဏံ အတ္ထိ, န စ တေန ဉာဏေန ဉာဏကရဏီယံ ကရောတီတိ? အာမန္တာ။ ပစ္စုပ္ပန္နံ ဉာဏံ အတ္ထိ, န စ တေန ဉာဏေန ဉာဏကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။။ အနာဂတံ ဉာဏံ အတ္ထိ, န စ တေန ဉာဏေန ဒုက္ခံ ပရိဇာနာတိ, သမုဒယံ ပဇဟတိ , နိရောဓံ သစ္ဆိကရောတိ, မဂ္ဂံ ဘာဝေတီတိ? အာမန္တာ ။ ပစ္စုပ္ပန္နံ ဉာဏံ အတ္ထိ, န စ တေန ဉာဏေန ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
Anāgataṃ ñāṇaṃ atthi, na ca tena ñāṇena ñāṇakaraṇīyaṃ karotīti? Āmantā. Paccuppannaṃ ñāṇaṃ atthi, na ca tena ñāṇena ñāṇakaraṇīyaṃ karotīti? Na hevaṃ vattabbe…pe…. Anāgataṃ ñāṇaṃ atthi, na ca tena ñāṇena dukkhaṃ parijānāti, samudayaṃ pajahati , nirodhaṃ sacchikaroti, maggaṃ bhāvetīti? Āmantā . Paccuppannaṃ ñāṇaṃ atthi, na ca tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
အရဟန္တာဒိကထာ
Arahantādikathā
၂၉၁. အရဟတော အတီတော ရာဂော အတ္ထီတိ? အာမန္တာ။ အရဟာ တေန ရာဂေန သရာဂောတိ? န ဟေဝံ ဝတ္တဗ္ဗေ။ပေ.။ အရဟတော အတီတော ဒောသော အတ္ထီတိ? အာမန္တာ ။ အရဟာ တေန ဒောသေန သဒောသောတိ? န ဟေဝံ ဝတ္တဗ္ဗေ။ပေ.။ အရဟတော အတီတော မောဟော အတ္ထီတိ? အာမန္တာ။ အရဟာ တေန မောဟေန သမောဟောတိ? န ဟေဝံ ဝတ္တဗ္ဗေ။ပေ.။ အရဟတော အတီတော မာနော အတ္ထီတိ? အာမန္တာ။ အရဟာ တေန မာနေန သမာနောတိ? န ဟေဝံ ဝတ္တဗ္ဗေ။ပေ.။ အရဟတော အတီတာ ဒိဋ္ဌိ အတ္ထီတိ? အာမန္တာ။ အရဟာ တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ.။ အရဟတော အတီတာ ဝိစိကိစ္ဆာ အတ္ထီတိ? အာမန္တာ။ အရဟာ တာယ ဝိစိကိစ္ဆာယ သဝိစိကိစ္ဆောတိ? န ဟေဝံ ဝတ္တဗ္ဗေ။ပေ.။ အရဟတော အတီတံ ထိနံ အတ္ထီတိ? အာမန္တာ။ အရဟာ တေန ထိနေန သထိနောတိ? န ဟေဝံ ဝတ္တဗ္ဗေ။ပေ.။ အရဟတော အတီတံ ဥဒ္ဓစ္စံ အတ္ထီတိ? အာမန္တာ။ အရဟာ တေန ဥဒ္ဓစ္စေန သဥဒ္ဓစ္စောတိ? န ဟေဝံ ဝတ္တဗ္ဗေ။ပေ.။ အရဟတော အတီတံ အဟိရိကံ အတ္ထီတိ? အာမန္တာ။ အရဟာ တေန အဟိရိကေန သအဟိရိကောတိ? န ဟေဝံ ဝတ္တဗ္ဗေ။ပေ.။ အရဟတော အတီတံ အနောတ္တပ္ပံ အတ္ထီတိ? အာမန္တာ။ အရဟာ တေန အနောတ္တပ္ပေန သအနောတ္တပ္ပီတိ? န ဟေဝံ ဝတ္တဗ္ဗေ။ပေ.။။
291. Arahato atīto rāgo atthīti? Āmantā. Arahā tena rāgena sarāgoti? Na hevaṃ vattabbe…pe… arahato atīto doso atthīti? Āmantā . Arahā tena dosena sadosoti? Na hevaṃ vattabbe…pe… arahato atīto moho atthīti? Āmantā. Arahā tena mohena samohoti? Na hevaṃ vattabbe…pe… arahato atīto māno atthīti? Āmantā. Arahā tena mānena samānoti? Na hevaṃ vattabbe…pe… arahato atītā diṭṭhi atthīti? Āmantā. Arahā tāya diṭṭhiyā sadiṭṭhikoti? Na hevaṃ vattabbe…pe… arahato atītā vicikicchā atthīti? Āmantā. Arahā tāya vicikicchāya savicikicchoti? Na hevaṃ vattabbe…pe… arahato atītaṃ thinaṃ atthīti? Āmantā. Arahā tena thinena sathinoti? Na hevaṃ vattabbe…pe… arahato atītaṃ uddhaccaṃ atthīti? Āmantā. Arahā tena uddhaccena sauddhaccoti? Na hevaṃ vattabbe…pe… arahato atītaṃ ahirikaṃ atthīti? Āmantā. Arahā tena ahirikena saahirikoti? Na hevaṃ vattabbe…pe… arahato atītaṃ anottappaṃ atthīti? Āmantā. Arahā tena anottappena saanottappīti? Na hevaṃ vattabbe…pe….
အနာဂာမိသ္သ အတီတာ သက္ကာယဒိဋ္ဌိ အတ္ထီတိ? အာမန္တာ ။ အနာဂာမီ တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ.။ အနာဂာမိသ္သ အတီတာ ဝိစိကိစ္ဆာ အတ္ထိ။ အတီတော သီလဗ္ဗတပရာမာသော အတ္ထိ။ အတီတော အဏုသဟဂတော ကာမရာဂော အတ္ထိ။ အတီတော အဏုသဟဂတော ဗ္ယာပာဒော အတ္ထီတိ? အာမန္တာ။ အနာဂာမီ တေန ဗ္ယာပာဒေန ဗ္ယာပန္နစိတ္တောတိ? န ဟေဝံ ဝတ္တဗ္ဗေ။ပေ.။။
Anāgāmissa atītā sakkāyadiṭṭhi atthīti? Āmantā . Anāgāmī tāya diṭṭhiyā sadiṭṭhikoti? Na hevaṃ vattabbe…pe… anāgāmissa atītā vicikicchā atthi… atīto sīlabbataparāmāso atthi… atīto aṇusahagato kāmarāgo atthi… atīto aṇusahagato byāpādo atthīti? Āmantā. Anāgāmī tena byāpādena byāpannacittoti? Na hevaṃ vattabbe…pe….
သကဒာဂာမိသ္သ အတီတာ သက္ကာယဒိဋ္ဌိ အတ္ထီတိ? အာမန္တာ။ သကဒာဂာမီ တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ.။ သကဒာဂာမိသ္သ အတီတာ ဝိစိကိစ္ဆာ အတ္ထိ။ အတီတော သီလဗ္ဗတပရာမာသော အတ္ထိ။ အတီတော ဩဠာရိကော ကာမရာဂော အတ္ထိ။ အတီတော ဩဠာရိကော ဗ္ယာပာဒော အတ္ထီတိ? အာမန္တာ။ သကဒာဂာမီ တေန ဗ္ယာပာဒေန ဗ္ယာပန္နစိတ္တောတိ? န ဟေဝံ ဝတ္တဗ္ဗေ။ပေ.။။
Sakadāgāmissa atītā sakkāyadiṭṭhi atthīti? Āmantā. Sakadāgāmī tāya diṭṭhiyā sadiṭṭhikoti? Na hevaṃ vattabbe…pe… sakadāgāmissa atītā vicikicchā atthi… atīto sīlabbataparāmāso atthi… atīto oḷāriko kāmarāgo atthi… atīto oḷāriko byāpādo atthīti? Āmantā. Sakadāgāmī tena byāpādena byāpannacittoti? Na hevaṃ vattabbe…pe….
သောတာပန္နသ္သ အတီတာ သက္ကာယဒိဋ္ဌိ အတ္ထီတိ? အာမန္တာ။ သောတာပန္နော တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ.။ သောတာပန္နသ္သ အတီတာ ဝိစိကိစ္ဆာ အတ္ထိ။ အတီတော သီလဗ္ဗတပရာမာသော အတ္ထိ။ အတီတော အပာယဂမနီယော ရာဂော အတ္ထိ။ အတီတော အပာယဂမနီယော ဒောသော အတ္ထိ။ အတီတော အပာယဂမနီယော မောဟော အတ္ထီတိ? အာမန္တာ။ သောတာပန္နော တေန မောဟေန သမောဟောတိ? န ဟေဝံ ဝတ္တဗ္ဗေ။ပေ.။။
Sotāpannassa atītā sakkāyadiṭṭhi atthīti? Āmantā. Sotāpanno tāya diṭṭhiyā sadiṭṭhikoti? Na hevaṃ vattabbe…pe… sotāpannassa atītā vicikicchā atthi… atīto sīlabbataparāmāso atthi… atīto apāyagamanīyo rāgo atthi… atīto apāyagamanīyo doso atthi… atīto apāyagamanīyo moho atthīti? Āmantā. Sotāpanno tena mohena samohoti? Na hevaṃ vattabbe…pe….
၂၉၂. ပုထုဇ္ဇနသ္သ အတီတော ရာဂော အတ္ထိ, ပုထုဇ္ဇနော တေန ရာဂေန သရာဂောတိ? အာမန္တာ။ အရဟတော အတီတော ရာဂော အတ္ထိ, အရဟာ တေန ရာဂေန သရာဂောတိ? န ဟေဝံ ဝတ္တဗ္ဗေ။ပေ.။ ပုထုဇ္ဇနသ္သ အတီတော ဒောသော အတ္ထိ။ပေ.။ အတီတံ အနောတ္တပ္ပံ အတ္ထိ ပုထုဇ္ဇနော တေန အနောတ္တပ္ပေန အနောတ္တပ္ပီတိ? အာမန္တာ။ အရဟတော အတီတံ အနောတ္တပ္ပံ အတ္ထိ, အရဟာ တေန အနောတ္တပ္ပေန အနောတ္တပ္ပီတိ? န ဟေဝံ ဝတ္တဗ္ဗေ။ပေ.။။
292. Puthujjanassa atīto rāgo atthi, puthujjano tena rāgena sarāgoti? Āmantā. Arahato atīto rāgo atthi, arahā tena rāgena sarāgoti? Na hevaṃ vattabbe…pe… puthujjanassa atīto doso atthi…pe… atītaṃ anottappaṃ atthi puthujjano tena anottappena anottappīti? Āmantā. Arahato atītaṃ anottappaṃ atthi, arahā tena anottappena anottappīti? Na hevaṃ vattabbe…pe….
ပုထုဇ္ဇနသ္သ အတီတာ သက္ကာယဒိဋ္ဌိ အတ္ထိ, ပုထုဇ္ဇနော တာယ ဒိဋ္ဌိယာ သဒိဋ္ဌိကောတိ? အာမန္တာ။ အနာဂာမိသ္သ အတီတာ သက္ကာယဒိဋ္ဌိ အတ္ထိ, အနာဂာမီ တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ.။ ပုထုဇ္ဇနသ္သ အတီတာ ဝိစိကိစ္ဆာ အတ္ထိ။ပေ.။ အတီတော အဏုသဟဂတော ဗ္ယာပာဒော အတ္ထိ, ပုထုဇ္ဇနော တေန ဗ္ယာပာဒေန ဗ္ယာပန္နစိတ္တောတိ? အာမန္တာ။ အနာဂာမိသ္သ အတီတော အဏုသဟဂတော ဗ္ယာပာဒော အတ္ထိ, အနာဂာမီ တေန ဗ္ယာပာဒေန ဗ္ယာပန္နစိတ္တောတိ? န ဟေဝံ ဝတ္တဗ္ဗေ။ပေ.။။
Puthujjanassa atītā sakkāyadiṭṭhi atthi, puthujjano tāya diṭṭhiyā sadiṭṭhikoti? Āmantā. Anāgāmissa atītā sakkāyadiṭṭhi atthi, anāgāmī tāya diṭṭhiyā sadiṭṭhikoti? Na hevaṃ vattabbe…pe… puthujjanassa atītā vicikicchā atthi…pe… atīto aṇusahagato byāpādo atthi, puthujjano tena byāpādena byāpannacittoti? Āmantā. Anāgāmissa atīto aṇusahagato byāpādo atthi, anāgāmī tena byāpādena byāpannacittoti? Na hevaṃ vattabbe…pe….
ပုထုဇ္ဇနသ္သ အတီတာ သက္ကာယဒိဋ္ဌိ အတ္ထိ, ပုထုဇ္ဇနော တာယ ဒိဋ္ဌိယာ သဒိဋ္ဌိကောတိ? အာမန္တာ။ သကဒာဂာမိသ္သ အတီတာ သက္ကာယဒိဋ္ဌိ အတ္ထိ, သကဒာဂာမီ တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ.။ ပုထုဇ္ဇနသ္သ အတီတာ ဝိစိကိစ္ဆာ အတ္ထိ။ အတီတော ဩဠာရိကော ဗ္ယာပာဒော အတ္ထိ, ပုထုဇ္ဇနော တေန ဗ္ယာပာဒေန ဗ္ယာပန္နစိတ္တောတိ ? အာမန္တာ။ သကဒာဂာမိသ္သ အတီတော ဩဠာရိကော ဗ္ယာပာဒော အတ္ထိ, သကဒာဂာမီ တေန ဗ္ယာပာဒေန ဗ္ယာပန္နစိတ္တောတိ? န ဟေဝံ ဝတ္တဗ္ဗေ။ပေ.။။
Puthujjanassa atītā sakkāyadiṭṭhi atthi, puthujjano tāya diṭṭhiyā sadiṭṭhikoti? Āmantā. Sakadāgāmissa atītā sakkāyadiṭṭhi atthi, sakadāgāmī tāya diṭṭhiyā sadiṭṭhikoti? Na hevaṃ vattabbe…pe… puthujjanassa atītā vicikicchā atthi… atīto oḷāriko byāpādo atthi, puthujjano tena byāpādena byāpannacittoti ? Āmantā. Sakadāgāmissa atīto oḷāriko byāpādo atthi, sakadāgāmī tena byāpādena byāpannacittoti? Na hevaṃ vattabbe…pe….
ပုထုဇ္ဇနသ္သ အတီတာ သက္ကာယဒိဋ္ဌိ အတ္ထိ, ပုထုဇ္ဇနော တာယ ဒိဋ္ဌိယာ သဒိဋ္ဌိကောတိ? အာမန္တာ။ သောတာပန္နသ္သ အတီတာ သက္ကာယဒိဋ္ဌိ အတ္ထိ, သောတာပန္နော တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ.။ ပုထုဇ္ဇနသ္သ အတီတာ ဝိစိကိစ္ဆာ အတ္ထိ။ပေ.။ အတီတော အပာယဂမနီယော မောဟော အတ္ထိ, ပုထုဇ္ဇနော တေန မောဟေန သမောဟောတိ? အာမန္တာ။ သောတာပန္နသ္သ အတီတော အပာယဂမနီယော မောဟော အတ္ထိ, သောတာပန္နော တေန မောဟေန သမောဟောတိ? န ဟေဝံ ဝတ္တဗ္ဗေ။ပေ.။။
Puthujjanassa atītā sakkāyadiṭṭhi atthi, puthujjano tāya diṭṭhiyā sadiṭṭhikoti? Āmantā. Sotāpannassa atītā sakkāyadiṭṭhi atthi, sotāpanno tāya diṭṭhiyā sadiṭṭhikoti? Na hevaṃ vattabbe…pe… puthujjanassa atītā vicikicchā atthi…pe… atīto apāyagamanīyo moho atthi, puthujjano tena mohena samohoti? Āmantā. Sotāpannassa atīto apāyagamanīyo moho atthi, sotāpanno tena mohena samohoti? Na hevaṃ vattabbe…pe….
အရဟတော အတီတော ရာဂော အတ္ထိ, န စ အရဟာ တေန ရာဂေန သရာဂောတိ? အာမန္တာ။ ပုထုဇ္ဇနသ္သ အတီတော ရာဂော အတ္ထိ, န စ ပုထုဇ္ဇနော တေန ရာဂေန သရာဂောတိ? န ဟေဝံ ဝတ္တဗ္ဗေ။ပေ.။ အရဟတော အတီတော ဒောသော အတ္ထိ။ပေ.။ အတီတံ အနောတ္တပ္ပံ အတ္ထိ, န စ အရဟာ တေန အနောတ္တပ္ပေန အနောတ္တပ္ပီတိ? အာမန္တာ။ ပုထုဇ္ဇနသ္သ အတီတံ အနောတ္တပ္ပံ အတ္ထိ, န စ ပုထုဇ္ဇနော တေန အနောတ္တပ္ပေန အနောတ္တပ္ပီတိ? န ဟေဝံ ဝတ္တဗ္ဗေ။ပေ.။။
Arahato atīto rāgo atthi, na ca arahā tena rāgena sarāgoti? Āmantā. Puthujjanassa atīto rāgo atthi, na ca puthujjano tena rāgena sarāgoti? Na hevaṃ vattabbe…pe… arahato atīto doso atthi…pe… atītaṃ anottappaṃ atthi, na ca arahā tena anottappena anottappīti? Āmantā. Puthujjanassa atītaṃ anottappaṃ atthi, na ca puthujjano tena anottappena anottappīti? Na hevaṃ vattabbe…pe….
အနာဂာမိသ္သ အတီတာ သက္ကာယဒိဋ္ဌိ အတ္ထိ, န စ အနာဂာမီ တာယ ဒိဋ္ဌိယာ သဒိဋ္ဌိကောတိ? အာမန္တာ။ ပုထုဇ္ဇနသ္သ အတီတာ သက္ကာယဒိဋ္ဌိ အတ္ထိ, န စ ပုထုဇ္ဇနော တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ.။ အနာဂာမိသ္သ အတီတာ ဝိစိကိစ္ဆာ အတ္ထိ။ပေ.။ အတီတော အဏုသဟဂတော ဗ္ယာပာဒော အတ္ထိ, န စ အနာဂာမီ တေန ဗ္ယာပာဒေန ဗ္ယာပန္နစိတ္တောတိ ? အာမန္တာ။ ပုထုဇ္ဇနသ္သ အတီတော အဏုသဟဂတော ဗ္ယာပာဒော အတ္ထိ, န စ ပုထုဇ္ဇနော တေန ဗ္ယာပာဒေန ဗ္ယာပန္နစိတ္တောတိ? န ဟေဝံ ဝတ္တဗ္ဗေ။ပေ.။။
Anāgāmissa atītā sakkāyadiṭṭhi atthi, na ca anāgāmī tāya diṭṭhiyā sadiṭṭhikoti? Āmantā. Puthujjanassa atītā sakkāyadiṭṭhi atthi, na ca puthujjano tāya diṭṭhiyā sadiṭṭhikoti? Na hevaṃ vattabbe…pe… anāgāmissa atītā vicikicchā atthi…pe… atīto aṇusahagato byāpādo atthi, na ca anāgāmī tena byāpādena byāpannacittoti ? Āmantā. Puthujjanassa atīto aṇusahagato byāpādo atthi, na ca puthujjano tena byāpādena byāpannacittoti? Na hevaṃ vattabbe…pe….
သကဒာဂာမိသ္သ အတီတာ သက္ကာယဒိဋ္ဌိ အတ္ထိ, န စ သကဒာဂာမီ တာယ ဒိဋ္ဌိယာ သဒိဋ္ဌိကောတိ? အာမန္တာ။ ပုထုဇ္ဇနသ္သ အတီတာ သက္ကာယဒိဋ္ဌိ အတ္ထိ, န စ ပုထုဇ္ဇနော တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ.။ သကဒာဂာမိသ္သ အတီတာ ဝိစိကိစ္ဆာ အတ္ထိ။ပေ.။ အတီတော ဩဠာရိကော ဗ္ယာပာဒော အတ္ထိ, န စ သကဒာဂာမီ တေန ဗ္ယာပာဒေန ဗ္ယာပန္နစိတ္တောတိ? အာမန္တာ။ ပုထုဇ္ဇနသ္သ အတီတော ဩဠာရိကော ဗ္ယာပာဒော အတ္ထိ, န စ ပုထုဇ္ဇနော တေန ဗ္ယာပာဒေန ဗ္ယာပန္နစိတ္တောတိ? န ဟေဝံ ဝတ္တဗ္ဗေ။ပေ.။။
Sakadāgāmissa atītā sakkāyadiṭṭhi atthi, na ca sakadāgāmī tāya diṭṭhiyā sadiṭṭhikoti? Āmantā. Puthujjanassa atītā sakkāyadiṭṭhi atthi, na ca puthujjano tāya diṭṭhiyā sadiṭṭhikoti? Na hevaṃ vattabbe…pe… sakadāgāmissa atītā vicikicchā atthi…pe… atīto oḷāriko byāpādo atthi, na ca sakadāgāmī tena byāpādena byāpannacittoti? Āmantā. Puthujjanassa atīto oḷāriko byāpādo atthi, na ca puthujjano tena byāpādena byāpannacittoti? Na hevaṃ vattabbe…pe….
သောတာပန္နသ္သ အတီတာ သက္ကာယဒိဋ္ဌိ အတ္ထိ, န စ သောတာပန္နော တာယ ဒိဋ္ဌိယာ သဒိဋ္ဌိကောတိ? အာမန္တာ။ ပုထုဇ္ဇနသ္သ အတီတာ သက္ကာယဒိဋ္ဌိ အတ္ထိ, န စ ပုထုဇ္ဇနော တာယ ဒိဋ္ဌိယာ သဒိဋ္ဌိကောတိ? န ဟေဝံ ဝတ္တဗ္ဗေ။ပေ.။ သောတာပန္နသ္သ အတီတာ ဝိစိကိစ္ဆာ အတ္ထိ။ပေ.။ အတီတော အပာယဂမနီယော မောဟော အတ္ထိ, န စ သောတာပန္နော တေန မောဟေန သမောဟောတိ? အာမန္တာ။ ပုထုဇ္ဇနသ္သ အတီတော အပာယဂမနီယော မောဟော အတ္ထိ, န စ ပုထုဇ္ဇနော တေန မောဟေန သမောဟောတိ? န ဟေဝံ ဝတ္တဗ္ဗေ။ပေ.။။
Sotāpannassa atītā sakkāyadiṭṭhi atthi, na ca sotāpanno tāya diṭṭhiyā sadiṭṭhikoti? Āmantā. Puthujjanassa atītā sakkāyadiṭṭhi atthi, na ca puthujjano tāya diṭṭhiyā sadiṭṭhikoti? Na hevaṃ vattabbe…pe… sotāpannassa atītā vicikicchā atthi…pe… atīto apāyagamanīyo moho atthi, na ca sotāpanno tena mohena samohoti? Āmantā. Puthujjanassa atīto apāyagamanīyo moho atthi, na ca puthujjano tena mohena samohoti? Na hevaṃ vattabbe…pe….
အတီတဟတ္ထာဒိကထာ
Atītahatthādikathā
၂၉၃. အတီတာ ဟတ္ထာ အတ္ထီတိ? အာမန္တာ။ အတီတေသု ဟတ္ထေသု သတိ အာဒာနနိက္ခေပနံ ပညာယတီတိ? န ဟေဝံ ဝတ္တဗ္ဗေ။ပေ.။ အတီတာ ပာဒာ အတ္ထီတိ? အာမန္တာ။ အတီတေသု ပာဒေသု သတိ အဘိက္ကမပဋိက္ကမော ပညာယတီတိ? န ဟေဝံ ဝတ္တဗ္ဗေ။ပေ.။ အတီတာ ပဗ္ဗာ အတ္ထီတိ? အာမန္တာ။ အတီတေသု ပဗ္ဗေသု သတိ သမိဉ္ဇနပသာရဏံ ပညာယတီတိ? န ဟေဝံ ဝတ္တဗ္ဗေ။ပေ.။ အတီတော ကုစ္ဆိ အတ္ထီတိ? အာမန္တာ။ အတီတသ္မိံ ကုစ္ဆိသ္မိံ သတိ ဇိဃစ္ဆာ ပိပာသာ ပညာယတီတိ? န ဟေဝံ ဝတ္တဗ္ဗေ။ပေ.။။
293. Atītā hatthā atthīti? Āmantā. Atītesu hatthesu sati ādānanikkhepanaṃ paññāyatīti? Na hevaṃ vattabbe…pe… atītā pādā atthīti? Āmantā. Atītesu pādesu sati abhikkamapaṭikkamo paññāyatīti? Na hevaṃ vattabbe…pe… atītā pabbā atthīti? Āmantā. Atītesu pabbesu sati samiñjanapasāraṇaṃ paññāyatīti? Na hevaṃ vattabbe…pe… atīto kucchi atthīti? Āmantā. Atītasmiṃ kucchismiṃ sati jighacchā pipāsā paññāyatīti? Na hevaṃ vattabbe…pe….
အတီတော ကာယော အတ္ထီတိ? အာမန္တာ။ အတီတော ကာယော ပဂ္ဂဟနိဂ္ဂဟုပဂော ဆေဒနဘေဒနုပဂော ကာကေဟိ ဂိဇ္ဈေဟိ ကုလလေဟိ သာဓာရဏောတိ? န ဟေဝံ ဝတ္တဗ္ဗေ။ပေ.။ အတီတေ ကာယေ ဝိသံ ကမေယ္ယ , သတ္ထံ ကမေယ္ယ, အဂ္ဂိ ကမေယ္ယာတိ? န ဟေဝံ ဝတ္တဗ္ဗေ။ပေ.။ လဗ္ဘာ အတီတော ကာယော အဒ္ဒုဗန္ဓနေန ဗန္ဓိတုံ, ရဇ္ဇုဗန္ဓနေန ဗန္ဓိတုံ, သင္ခလိကဗန္ဓနေန ဗန္ဓိတုံ, ဂာမဗန္ဓနေန ဗန္ဓိတုံ, နိဂမဗန္ဓနေန ဗန္ဓိတုံ, နဂရဗန္ဓနေန ဗန္ဓိတုံ, ဇနပဒဗန္ဓနေန ဗန္ဓိတုံ, ကဏ္ဌပဉ္စမေဟိ ဗန္ဓနေဟိ ဗန္ဓိတုန္တိ? န ဟေဝံ ဝတ္တဗ္ဗေ။ပေ.။။
Atīto kāyo atthīti? Āmantā. Atīto kāyo paggahaniggahupago chedanabhedanupago kākehi gijjhehi kulalehi sādhāraṇoti? Na hevaṃ vattabbe…pe… atīte kāye visaṃ kameyya , satthaṃ kameyya, aggi kameyyāti? Na hevaṃ vattabbe…pe… labbhā atīto kāyo addubandhanena bandhituṃ, rajjubandhanena bandhituṃ, saṅkhalikabandhanena bandhituṃ, gāmabandhanena bandhituṃ, nigamabandhanena bandhituṃ, nagarabandhanena bandhituṃ, janapadabandhanena bandhituṃ, kaṇṭhapañcamehi bandhanehi bandhitunti? Na hevaṃ vattabbe…pe….
အတီတော အာပော အတ္ထီတိ? အာမန္တာ။ တေန အာပေန အာပကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။ အတီတော တေဇော အတ္ထီတိ? အာမန္တာ။ တေန တေဇေန တေဇကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။ အတီတော ဝာယော အတ္ထီတိ? အာမန္တာ။ တေန ဝာယေန ဝာယကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။။
Atīto āpo atthīti? Āmantā. Tena āpena āpakaraṇīyaṃ karotīti? Na hevaṃ vattabbe…pe… atīto tejo atthīti? Āmantā. Tena tejena tejakaraṇīyaṃ karotīti? Na hevaṃ vattabbe…pe… atīto vāyo atthīti? Āmantā. Tena vāyena vāyakaraṇīyaṃ karotīti? Na hevaṃ vattabbe…pe….
အတီတက္ခန္ဓာဒိသမောဓာနကထာ
Atītakkhandhādisamodhānakathā
၂၉၄. အတီတော ရူပက္ခန္ဓော အတ္ထိ, အနာဂတော ရူပက္ခန္ဓော အတ္ထိ, ပစ္စုပ္ပန္နော ရူပက္ခန္ဓော အတ္ထီတိ? အာမန္တာ။ တယော ရူပက္ခန္ဓာတိ? န ဟေဝံ ဝတ္တဗ္ဗေ ။ပေ.။ အတီတာ ပဉ္စက္ခန္ဓာ အတ္ထိ, အနာဂတာ ပဉ္စက္ခန္ဓာ အတ္ထိ, ပစ္စုပ္ပန္နာ ပဉ္စက္ခန္ဓာ အတ္ထီတိ? အာမန္တာ။ ပန္နရသက္ခန္ဓာတိ? န ဟေဝံ ဝတ္တဗ္ဗေ။ပေ.။။
294. Atīto rūpakkhandho atthi, anāgato rūpakkhandho atthi, paccuppanno rūpakkhandho atthīti? Āmantā. Tayo rūpakkhandhāti? Na hevaṃ vattabbe …pe… atītā pañcakkhandhā atthi, anāgatā pañcakkhandhā atthi, paccuppannā pañcakkhandhā atthīti? Āmantā. Pannarasakkhandhāti? Na hevaṃ vattabbe…pe….
အတီတံ စက္ခာယတနံ အတ္ထိ, အနာဂတံ စက္ခာယတနံ အတ္ထိ, ပစ္စုပ္ပန္နံ စက္ခာယတနံ အတ္ထီတိ? အာမန္တာ။ တီဏိ စက္ခာယတနာနီတိ? န ဟေဝံ ဝတ္တဗ္ဗေ။ပေ.။ အတီတာနိ ဒ္ဝာဒသာယတနာနိ အတ္ထိ, အနာဂတာနိ ဒ္ဝာဒသာယတနာနိ အတ္ထိ, ပစ္စုပ္ပန္နာနိ ဒ္ဝာဒသာယတနာနိ အတ္ထီတိ? အာမန္တာ။ ဆတ္တိံသာယတနာနီတိ? န ဟေဝံ ဝတ္တဗ္ဗေ။ပေ.။။
Atītaṃ cakkhāyatanaṃ atthi, anāgataṃ cakkhāyatanaṃ atthi, paccuppannaṃ cakkhāyatanaṃ atthīti? Āmantā. Tīṇi cakkhāyatanānīti? Na hevaṃ vattabbe…pe… atītāni dvādasāyatanāni atthi, anāgatāni dvādasāyatanāni atthi, paccuppannāni dvādasāyatanāni atthīti? Āmantā. Chattiṃsāyatanānīti? Na hevaṃ vattabbe…pe….
အတီတာ စက္ခုဓာတု အတ္ထိ, အနာဂတာ စက္ခုဓာတု အတ္ထိ, ပစ္စုပ္ပန္နာ စက္ခုဓာတု အတ္ထီတိ? အာမန္တာ။ တိသ္သော စက္ခုဓာတုယောတိ? န ဟေဝံ ဝတ္တဗ္ဗေ။ပေ.။ အတီတာ အဋ္ဌာရသ ဓာတုယော အတ္ထိ, အနာဂတာ အဋ္ဌာရသ ဓာတုယော အတ္ထိ, ပစ္စုပ္ပန္နာ အဋ္ဌာရသ ဓာတုယော အတ္ထီတိ? အာမန္တာ။ စတုပညာသ ဓာတုယောတိ? န ဟေဝံ ဝတ္တဗ္ဗေ။ပေ.။။
Atītā cakkhudhātu atthi, anāgatā cakkhudhātu atthi, paccuppannā cakkhudhātu atthīti? Āmantā. Tisso cakkhudhātuyoti? Na hevaṃ vattabbe…pe… atītā aṭṭhārasa dhātuyo atthi, anāgatā aṭṭhārasa dhātuyo atthi, paccuppannā aṭṭhārasa dhātuyo atthīti? Āmantā. Catupaññāsa dhātuyoti? Na hevaṃ vattabbe…pe….
အတီတံ စက္ခုန္ဒ္ရိယံ အတ္ထိ, အနာဂတံ စက္ခုန္ဒ္ရိယံ အတ္ထိ, ပစ္စုပ္ပန္နံ စက္ခုန္ဒ္ရိယံ အတ္ထီတိ ? အာမန္တာ။ တီဏိ စက္ခုန္ဒ္ရိယာနီတိ? န ဟေဝံ ဝတ္တဗ္ဗေ။ပေ.။ အတီတာနိ ဗာဝီသတိန္ဒ္ရိယာနိ အတ္ထိ, အနာဂတာနိ ဗာဝီသတိန္ဒ္ရိယာနိ အတ္ထိ, ပစ္စုပ္ပန္နာနိ ဗာဝီသတိန္ဒ္ရိယာနိ အတ္ထီတိ? အာမန္တာ။ ဆသဋ္ဌိန္ဒ္ရိယာနီတိ? န ဟေဝံ ဝတ္တဗ္ဗေ။ပေ.။။
Atītaṃ cakkhundriyaṃ atthi, anāgataṃ cakkhundriyaṃ atthi, paccuppannaṃ cakkhundriyaṃ atthīti ? Āmantā. Tīṇi cakkhundriyānīti? Na hevaṃ vattabbe…pe… atītāni bāvīsatindriyāni atthi, anāgatāni bāvīsatindriyāni atthi, paccuppannāni bāvīsatindriyāni atthīti? Āmantā. Chasaṭṭhindriyānīti? Na hevaṃ vattabbe…pe….
အတီတော ရာဇာ စက္ကဝတ္တီ အတ္ထိ, အနာဂတော ရာဇာ စက္ကဝတ္တီ အတ္ထိ, ပစ္စုပ္ပန္နော ရာဇာ စက္ကဝတ္တီ အတ္ထီတိ? အာမန္တာ။ တိဏ္ဏန္နံ ရာဇူနံ စက္ကဝတ္တီနံ သမ္မုခီဘာဝော ဟောတီတိ? န ဟေဝံ ဝတ္တဗ္ဗေ။ပေ.။။
Atīto rājā cakkavattī atthi, anāgato rājā cakkavattī atthi, paccuppanno rājā cakkavattī atthīti? Āmantā. Tiṇṇannaṃ rājūnaṃ cakkavattīnaṃ sammukhībhāvo hotīti? Na hevaṃ vattabbe…pe….
အတီတော သမ္မာသမ္မုဒ္ဓော အတ္ထိ, အနာဂတော သမ္မာသမ္ဗုဒ္ဓော အတ္ထိ, ပစ္စုပ္ပန္နော သမ္မာသမ္ဗုဒ္ဓော အတ္ထီတိ? အာမန္တာ။ တိဏ္ဏန္နံ သမ္မာသမ္ဗုဒ္ဓာနံ သမ္မုခီဘာဝော ဟောတီတိ? န ဟေဝံ ဝတ္တဗ္ဗေ။ပေ.။။
Atīto sammāsammuddho atthi, anāgato sammāsambuddho atthi, paccuppanno sammāsambuddho atthīti? Āmantā. Tiṇṇannaṃ sammāsambuddhānaṃ sammukhībhāvo hotīti? Na hevaṃ vattabbe…pe….
ပဒသောဓနကထာ
Padasodhanakathā
၂၉၅. အတီတံ အတ္ထီတိ? အာမန္တာ ။ အတ္ထိ အတီတန္တိ? အတ္ထိ သိယာ အတီတံ, သိယာ န္ဝာတီတန္တိ။
295. Atītaṃ atthīti? Āmantā . Atthi atītanti? Atthi siyā atītaṃ, siyā nvātītanti.
အာဇာနာဟိ နိဂ္ဂဟံ။ ဟဉ္စိ အတီတံ အတ္ထိ, အတ္ထိ သိယာ အတီတံ, သိယာ န္ဝာတီတံ, တေနာတီတံ န္ဝာတီတံ, န္ဝာတီတံ အတီတန္တိ။ ယံ တတ္ထ ဝဒေသိ – ‘‘ဝတ္တဗ္ဗေ ခော – ‘အတီတံ အတ္ထိ အတ္ထိ သိယာ အတီတံ, သိယာ န္ဝာတီတံ, တေနာတီတံ န္ဝာတီတံ, န္ဝာတီတံ အတီတ’’’န္တိ မိစ္ဆာ။
Ājānāhi niggahaṃ. Hañci atītaṃ atthi, atthi siyā atītaṃ, siyā nvātītaṃ, tenātītaṃ nvātītaṃ, nvātītaṃ atītanti. Yaṃ tattha vadesi – ‘‘vattabbe kho – ‘atītaṃ atthi atthi siyā atītaṃ, siyā nvātītaṃ, tenātītaṃ nvātītaṃ, nvātītaṃ atīta’’’nti micchā.
နော စေ ပန အတီတံ န္ဝာတီတံ န္ဝာတီတံ အတီတန္တိ, နော စ ဝတ ရေ ဝတ္တဗ္ဗေ – ‘‘အတီတံ အတ္ထိ အတ္ထိ သိယာ အတီတံ, သိယာ န္ဝာတီတ’’န္တိ။ ယံ တတ္ထ ဝဒေသိ – ‘‘ဝတ္တဗ္ဗေ ခော – ‘အတီတံ အတ္ထိ အတ္ထိ သိယာ အတီတံ, သိယာ န္ဝာတီတံ, တေနာတီတံ န္ဝာတီတံ, န္ဝာတီတံ အတီတ’’’န္တိ မိစ္ဆာ။
No ce pana atītaṃ nvātītaṃ nvātītaṃ atītanti, no ca vata re vattabbe – ‘‘atītaṃ atthi atthi siyā atītaṃ, siyā nvātīta’’nti. Yaṃ tattha vadesi – ‘‘vattabbe kho – ‘atītaṃ atthi atthi siyā atītaṃ, siyā nvātītaṃ, tenātītaṃ nvātītaṃ, nvātītaṃ atīta’’’nti micchā.
အနာဂတံ အတ္ထီတိ? အာမန္တာ။ အတ္ထိ အနာဂတန္တိ? အတ္ထိ သိယာ အနာဂတံ, သိယာ န္ဝာနာဂတန္တိ။
Anāgataṃ atthīti? Āmantā. Atthi anāgatanti? Atthi siyā anāgataṃ, siyā nvānāgatanti.
အာဇာနာဟိ နိဂ္ဂဟံ။ ဟဉ္စိ အနာဂတံ အတ္ထိ အတ္ထိ သိယာ အနာဂတံ သိယာ န္ဝာနာဂတံ, တေနာနာဂတံ န္ဝာနာဂတံ, န္ဝာနာဂတံ အနာဂတန္တိ။ ယံ တတ္ထ ဝဒေသိ – ‘‘ဝတ္တဗ္ဗေ ခော – ‘အနာဂတံ အတ္ထိ အတ္ထိ သိယာ အနာဂတံ, သိယာ န္ဝာနာဂတံ, တေနာနာဂတံ န္ဝာနာဂတံ, န္ဝာနာဂတံ အနာဂတ’’’န္တိ မိစ္ဆာ။
Ājānāhi niggahaṃ. Hañci anāgataṃ atthi atthi siyā anāgataṃ siyā nvānāgataṃ, tenānāgataṃ nvānāgataṃ, nvānāgataṃ anāgatanti. Yaṃ tattha vadesi – ‘‘vattabbe kho – ‘anāgataṃ atthi atthi siyā anāgataṃ, siyā nvānāgataṃ, tenānāgataṃ nvānāgataṃ, nvānāgataṃ anāgata’’’nti micchā.
နော စေ ပနာနာဂတံ န္ဝာနာဂတံ န္ဝာနာဂတံ အနာဂတန္တိ, နော စ ဝတ ရေ ဝတ္တဗ္ဗေ – ‘‘အနာဂတံ အတ္ထိ အတ္ထိ သိယာ အနာဂတံ, သိယာ န္ဝာနာဂတ’’န္တိ။ ယံ တတ္ထ ဝဒေသိ – ‘‘ဝတ္တဗ္ဗေ ခော – ‘အနာဂတံ အတ္ထိ အတ္ထိ သိယာ အနာဂတံ, သိယာ န္ဝာနာဂတံ, တေနာနာဂတံ န္ဝာနာဂတံ, န္ဝာနာဂတံ အနာဂတ’’’န္တိ မိစ္ဆာ။
No ce panānāgataṃ nvānāgataṃ nvānāgataṃ anāgatanti, no ca vata re vattabbe – ‘‘anāgataṃ atthi atthi siyā anāgataṃ, siyā nvānāgata’’nti. Yaṃ tattha vadesi – ‘‘vattabbe kho – ‘anāgataṃ atthi atthi siyā anāgataṃ, siyā nvānāgataṃ, tenānāgataṃ nvānāgataṃ, nvānāgataṃ anāgata’’’nti micchā.
ပစ္စုပ္ပန္နံ အတ္ထီတိ, အာမန္တာ။ အတ္ထိ ပစ္စုပ္ပန္နန္တိ? အတ္ထိ သိယာ ပစ္စုပ္ပန္နံ, သိယာ နော ပစ္စုပ္ပန္နန္တိ။
Paccuppannaṃ atthīti, āmantā. Atthi paccuppannanti? Atthi siyā paccuppannaṃ, siyā no paccuppannanti.
အာဇာနာဟိ နိဂ္ဂဟံ။ ဟဉ္စိ ပစ္စုပ္ပန္နံ အတ္ထိ အတ္ထိ သိယာ ပစ္စုပ္ပန္နံ, သိယာ နော ပစ္စုပ္ပန္နံ, တေန ပစ္စုပ္ပန္နံ, နော ပစ္စုပ္ပန္နံ, နော ပစ္စုပ္ပန္နံ ပစ္စုပ္ပန္နန္တိ။ ယံ တတ္ထ ဝဒေသိ – ‘‘ဝတ္တဗ္ဗေ ခော – ‘ပစ္စုပ္ပန္နံ အတ္ထိ အတ္ထိ သိယာ ပစ္စုပ္ပန္နံ, သိယာ နော ပစ္စုပ္ပန္နံ, တေန ပစ္စုပ္ပန္နံ နော ပစ္စုပ္ပန္နံ, နော ပစ္စုပ္ပန္နံ ပစ္စုပ္ပန္န’’’န္တိ မိစ္ဆာ။
Ājānāhi niggahaṃ. Hañci paccuppannaṃ atthi atthi siyā paccuppannaṃ, siyā no paccuppannaṃ, tena paccuppannaṃ, no paccuppannaṃ, no paccuppannaṃ paccuppannanti. Yaṃ tattha vadesi – ‘‘vattabbe kho – ‘paccuppannaṃ atthi atthi siyā paccuppannaṃ, siyā no paccuppannaṃ, tena paccuppannaṃ no paccuppannaṃ, no paccuppannaṃ paccuppanna’’’nti micchā.
နော စေ ပန ပစ္စုပ္ပန္နံ နော ပစ္စုပ္ပန္နံ, နော ပစ္စုပ္ပန္နံ ပစ္စုပ္ပန္နန္တိ, နော စ ဝတ ရေ ဝတ္တဗ္ဗေ – ‘‘ပစ္စုပ္ပန္နံ အတ္ထိ အတ္ထိ သိယာ ပစ္စုပ္ပန္နံ, သိယာ နော ပစ္စုပ္ပန္န’’န္တိ။ ယံ တတ္ထ ဝဒေသိ – ‘‘ဝတ္တဗ္ဗေ ခော – ‘ပစ္စုပ္ပန္နံ အတ္ထိ အတ္ထိ သိယာ ပစ္စုပ္ပန္နံ, သိယာ နော ပစ္စုပ္ပန္နံ, တေန ပစ္စုပ္ပန္နံ နော ပစ္စုပ္ပန္နံ, နော ပစ္စုပ္ပန္နံ ပစ္စုပ္ပန္န’’’န္တိ မိစ္ဆာ။
No ce pana paccuppannaṃ no paccuppannaṃ, no paccuppannaṃ paccuppannanti, no ca vata re vattabbe – ‘‘paccuppannaṃ atthi atthi siyā paccuppannaṃ, siyā no paccuppanna’’nti. Yaṃ tattha vadesi – ‘‘vattabbe kho – ‘paccuppannaṃ atthi atthi siyā paccuppannaṃ, siyā no paccuppannaṃ, tena paccuppannaṃ no paccuppannaṃ, no paccuppannaṃ paccuppanna’’’nti micchā.
နိဗ္ဗာနံ အတ္ထီတိ? အာမန္တာ။ အတ္ထိ နိဗ္ဗာနန္တိ? အတ္ထိ သိယာ နိဗ္ဗာနံ သိယာ နော နိဗ္ဗာနန္တိ။
Nibbānaṃ atthīti? Āmantā. Atthi nibbānanti? Atthi siyā nibbānaṃ siyā no nibbānanti.
အာဇာနာဟိ နိဂ္ဂဟံ။ ဟဉ္စိ နိဗ္ဗာနံ အတ္ထိ အတ္ထိ သိယာ နိဗ္ဗာနံ, သိယာ နော နိဗ္ဗာနံ, တေန နိဗ္ဗာနံ နော နိဗ္ဗာနံ, နော နိဗ္ဗာနံ နိဗ္ဗာနန္တိ။ ယံ တတ္ထ ဝဒေသိ – ‘‘ဝတ္တဗ္ဗေ ခော – ‘နိဗ္ဗာနံ အတ္ထိ အတ္ထိ သိယာ နိဗ္ဗာနံ, သိယာ နော နိဗ္ဗာနံ, တေန နိဗ္ဗာနံ နော နိဗ္ဗာနံ, နော နိဗ္ဗာနံ နိဗ္ဗာန’’’န္တိ မိစ္ဆာ။
Ājānāhi niggahaṃ. Hañci nibbānaṃ atthi atthi siyā nibbānaṃ, siyā no nibbānaṃ, tena nibbānaṃ no nibbānaṃ, no nibbānaṃ nibbānanti. Yaṃ tattha vadesi – ‘‘vattabbe kho – ‘nibbānaṃ atthi atthi siyā nibbānaṃ, siyā no nibbānaṃ, tena nibbānaṃ no nibbānaṃ, no nibbānaṃ nibbāna’’’nti micchā.
နော စေ ပန နိဗ္ဗာနံ နော နိဗ္ဗာနံ, နော နိဗ္ဗာနံ နိဗ္ဗာနန္တိ, နော စ ဝတ ရေ ဝတ္တဗ္ဗေ – ‘‘နိဗ္ဗာနံ အတ္ထိ အတ္ထိ သိယာ နိဗ္ဗာနံ, သိယာ နော နိဗ္ဗာန’’န္တိ။ ယံ တတ္ထ ဝဒေသိ – ‘‘ဝတ္တဗ္ဗေ ခော – ‘နိဗ္ဗာနံ အတ္ထိ အတ္ထိ သိယာ နိဗ္ဗာနံ, သိယာ နော နိဗ္ဗာနံ, တေန နိဗ္ဗာနံ နော နိဗ္ဗာနံ, နော နိဗ္ဗာနံ နိဗ္ဗာန’’’န္တိ မိစ္ဆာ။
No ce pana nibbānaṃ no nibbānaṃ, no nibbānaṃ nibbānanti, no ca vata re vattabbe – ‘‘nibbānaṃ atthi atthi siyā nibbānaṃ, siyā no nibbāna’’nti. Yaṃ tattha vadesi – ‘‘vattabbe kho – ‘nibbānaṃ atthi atthi siyā nibbānaṃ, siyā no nibbānaṃ, tena nibbānaṃ no nibbānaṃ, no nibbānaṃ nibbāna’’’nti micchā.
သုတ္တသာဓနံ
Suttasādhanaṃ
၂၉၆. န ဝတ္တဗ္ဗံ – ‘‘အတီတံ အတ္ထိ, အနာဂတံ အတ္ထီ’’တိ? အာမန္တာ။ နနု ဝုတ္တံ ဘဂဝတာ – ‘‘ယံ ကိဉ္စိ, ဘိက္ခဝေ, ရူပံ အတီတာနာဂတပစ္စုပ္ပန္နံ အဇ္ဈတ္တံ ဝာ ဗဟိဒ္ဓာ ဝာ ဩဠာရိကံ ဝာ သုခုမံ ဝာ ဟီနံ ဝာ ပဏီတံ ဝာ ယံ ဒူရေ သန္တိကေ ဝာ – အယံ ဝုစ္စတိ ရူပက္ခန္ဓော။ ယာ ကာစိ ဝေဒနာ။ ယာ ကာစိ သညာ။ ယေ ကေစိ သင္ခာရာ။ ယံ ကိဉ္စိ ဝိညာဏံ အတီတာနာဂတပစ္စုပ္ပန္နံ အဇ္ဈတ္တံ ဝာ ဗဟိဒ္ဓာ ဝာ ဩဠာရိကံ ဝာ သုခုမံ ဝာ ဟီနံ ဝာ ပဏီတံ ဝာ ယံ ဒူရေ သန္တိကေ ဝာ – အယံ ဝုစ္စတိ ဝိညာဏက္ခန္ဓော’’တိ 31။ အတ္ထေဝ သုတ္တန္တောတိ? အာမန္တာ။ တေန ဟိ အတီတံ အတ္ထိ, အနာဂတံ အတ္ထီတိ။
296. Na vattabbaṃ – ‘‘atītaṃ atthi, anāgataṃ atthī’’ti? Āmantā. Nanu vuttaṃ bhagavatā – ‘‘yaṃ kiñci, bhikkhave, rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā – ayaṃ vuccati rūpakkhandho. Yā kāci vedanā… yā kāci saññā… ye keci saṅkhārā… yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā – ayaṃ vuccati viññāṇakkhandho’’ti 32. Attheva suttantoti? Āmantā. Tena hi atītaṃ atthi, anāgataṃ atthīti.
အတီတံ အတ္ထိ, အနာဂတံ အတ္ထီတိ? အာမန္တာ။ နနု ဝုတ္တံ ဘဂဝတာ – ‘‘တယောမေ, ဘိက္ခဝေ, နိရုတ္တိပထာ အဓိဝစနပထာ ပညတ္တိပထာ အသင္ကိဏ္ဏာ အသင္ကိဏ္ဏပုဗ္ဗာ န သင္ကိယန္တိ န သင္ကိယိသ္သန္တိ အပ္ပဋိကုဋ္ဌာ သမဏေဟိ ဗ္ရာဟ္မဏေဟိ ဝိညူဟိ။ ကတမေ တယော? ယံ, ဘိက္ခဝေ, ရူပံ အတီတံ နိရုဒ္ဓံ ဝိဂတံ ဝိပရိဏတံ ‘အဟောသီ’တိ တသ္သ သင္ခာ, ‘အဟောသီ’တိ တသ္သ သမညာ, ‘အဟောသီ’တိ တသ္သ ပညတ္တိ; န တသ္သ သင္ခာ ‘အတ္ထီ’တိ, န တသ္သ သင္ခာ ‘ဘဝိသ္သတီ’တိ။ ယာ ဝေဒနာ။ပေ.။ ယာ သညာ။ ယေ သင္ခာရာ။ ယံ ဝိညာဏံ အတီတံ နိရုဒ္ဓံ ဝိဂတံ ဝိပရိဏတံ ‘အဟောသီ’တိ တသ္သ သင္ခာ, ‘အဟောသီ’တိ တသ္သ သမညာ, ‘အဟောသီ’တိ တသ္သ ပညတ္တိ; န တသ္သ သင္ခာ ‘အတ္ထီ’တိ, န တသ္သ သင္ခာ ‘ဘဝိသ္သတီ’တိ။
Atītaṃ atthi, anāgataṃ atthīti? Āmantā. Nanu vuttaṃ bhagavatā – ‘‘tayome, bhikkhave, niruttipathā adhivacanapathā paññattipathā asaṅkiṇṇā asaṅkiṇṇapubbā na saṅkiyanti na saṅkiyissanti appaṭikuṭṭhā samaṇehi brāhmaṇehi viññūhi. Katame tayo? Yaṃ, bhikkhave, rūpaṃ atītaṃ niruddhaṃ vigataṃ vipariṇataṃ ‘ahosī’ti tassa saṅkhā, ‘ahosī’ti tassa samaññā, ‘ahosī’ti tassa paññatti; na tassa saṅkhā ‘atthī’ti, na tassa saṅkhā ‘bhavissatī’ti. Yā vedanā…pe… yā saññā… ye saṅkhārā… yaṃ viññāṇaṃ atītaṃ niruddhaṃ vigataṃ vipariṇataṃ ‘ahosī’ti tassa saṅkhā, ‘ahosī’ti tassa samaññā, ‘ahosī’ti tassa paññatti; na tassa saṅkhā ‘atthī’ti, na tassa saṅkhā ‘bhavissatī’ti.
‘‘ယံ, ဘိက္ခဝေ, ရူပံ အဇာတံ အပာတုဘူတံ ‘ဘဝိသ္သတီ’တိ တသ္သ သင္ခာ, ‘ဘဝိသ္သတီ’တိ တသ္သ သမညာ, ‘ဘဝိသ္သတီ’တိ တသ္သ ပညတ္တိ; န တသ္သ သင္ခာ ‘အတ္ထီ’တိ, န တသ္သ သင္ခာ ‘အဟောသီ’တိ။ ယာ ဝေဒနာ။ပေ.။ ယာ သညာ။ ယေ သင္ခာရာ။ ယံ ဝိညာဏံ အဇာတံ အပာတုဘူတံ ‘ဘဝိသ္သတီ’တိ တသ္သ သင္ခာ, ‘ဘဝိသ္သတီ’တိ တသ္သ သမညာ, ‘ဘဝိသ္သတီ’တိ တသ္သ ပညတ္တိ; န တသ္သ သင္ခာ ‘အတ္ထီ’တိ, န တသ္သ သင္ခာ ‘အဟောသီ’တိ။
‘‘Yaṃ, bhikkhave, rūpaṃ ajātaṃ apātubhūtaṃ ‘bhavissatī’ti tassa saṅkhā, ‘bhavissatī’ti tassa samaññā, ‘bhavissatī’ti tassa paññatti; na tassa saṅkhā ‘atthī’ti, na tassa saṅkhā ‘ahosī’ti. Yā vedanā…pe… yā saññā… ye saṅkhārā… yaṃ viññāṇaṃ ajātaṃ apātubhūtaṃ ‘bhavissatī’ti tassa saṅkhā, ‘bhavissatī’ti tassa samaññā, ‘bhavissatī’ti tassa paññatti; na tassa saṅkhā ‘atthī’ti, na tassa saṅkhā ‘ahosī’ti.
‘‘ယံ, ဘိက္ခဝေ, ရူပံ ဇာတံ ပာတုဘူတံ ‘အတ္ထီ’တိ တသ္သ သင္ခာ, ‘အတ္ထီ’တိ တသ္သ သမညာ, ‘အတ္ထီ’တိ တသ္သ ပညတ္တိ; န တသ္သ သင္ခာ ‘အဟောသီ’တိ, န တသ္သ သင္ခာ ‘ဘဝိသ္သတီ’တိ။ ယာ ဝေဒနာ။ပေ.။ ယာ သညာ။ ယေ သင္ခာရာ။ ယံ ဝိညာဏံ ဇာတံ ပာတုဘူတံ ‘အတ္ထီ’တိ တသ္သ သင္ခာ, ‘အတ္ထီ’တိ တသ္သ သမညာ, ‘အတ္ထီ’တိ တသ္သ ပညတ္တိ; န တသ္သ သင္ခာ ‘အဟောသီ’တိ, န တသ္သ သင္ခာ ‘ဘဝိသ္သတီ’တိ။ ဣမေ ခော, ဘိက္ခဝေ, တယော နိရုတ္တိပထာ အဓိဝစနပထာ ပညတ္တိပထာ အသင္ကိဏ္ဏာ အသင္ကိဏ္ဏပုဗ္ဗာ န သင္ကိယန္တိ န သင္ကိယိသ္သန္တိ အပ္ပဋိကုဋ္ဌာ သမဏေဟိ ဗ္ရာဟ္မဏေဟိ ဝိညူဟိ။
‘‘Yaṃ, bhikkhave, rūpaṃ jātaṃ pātubhūtaṃ ‘atthī’ti tassa saṅkhā, ‘atthī’ti tassa samaññā, ‘atthī’ti tassa paññatti; na tassa saṅkhā ‘ahosī’ti, na tassa saṅkhā ‘bhavissatī’ti. Yā vedanā…pe… yā saññā… ye saṅkhārā… yaṃ viññāṇaṃ jātaṃ pātubhūtaṃ ‘atthī’ti tassa saṅkhā, ‘atthī’ti tassa samaññā, ‘atthī’ti tassa paññatti; na tassa saṅkhā ‘ahosī’ti, na tassa saṅkhā ‘bhavissatī’ti. Ime kho, bhikkhave, tayo niruttipathā adhivacanapathā paññattipathā asaṅkiṇṇā asaṅkiṇṇapubbā na saṅkiyanti na saṅkiyissanti appaṭikuṭṭhā samaṇehi brāhmaṇehi viññūhi.
‘‘ယေပိ တေ, ဘိက္ခဝေ, အဟေသုံ ဥက္ကလာ ဝသ္သဘညာ အဟေတုကဝာဒာ အကိရိယဝာဒာ နတ္ထိကဝာဒာ, တေပိမေ တယော နိရုတ္တိပထေ အဓိဝစနပထေ ပညတ္တိပထေ န ဂရဟိတဗ္ဗံ န ပဋိက္ကောသိတဗ္ဗံ အမညိံသု။ တံ ကိသ္သ ဟေတု? နိန္ဒာဗ္ယာရောသဥပာရမ္ဘဘယာ’’တိ 33။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘အတီတံ အတ္ထိ, အနာဂတံ အတ္ထီ’’တိ။
‘‘Yepi te, bhikkhave, ahesuṃ ukkalā vassabhaññā ahetukavādā akiriyavādā natthikavādā, tepime tayo niruttipathe adhivacanapathe paññattipathe na garahitabbaṃ na paṭikkositabbaṃ amaññiṃsu. Taṃ kissa hetu? Nindābyārosaupārambhabhayā’’ti 34. Attheva suttantoti? Āmantā. Tena hi na vattabbaṃ – ‘‘atītaṃ atthi, anāgataṃ atthī’’ti.
အတီတံ အတ္ထီတိ? အာမန္တာ။ နနု အာယသ္မာ ဖဂ္ဂုနော ဘဂဝန္တံ ဧတဒဝောစ – ‘‘အတ္ထိ နု ခော တံ, ဘန္တေ, စက္ခုံ ယေန စက္ခုနာ အတီတေ ဗုဒ္ဓေ ပရိနိဗ္ဗုတေ ဆိန္နပပဉ္စေ ဆိန္နဝဋုမေ ပရိယာဒိန္နဝဋ္ဋေ သဗ္ဗဒုက္ခဝီတိဝတ္တေ ပညာပယမာနော ပညာပေယ္ယာတိ။ အတ္ထိ နု ခော သာ, ဘန္တေ, ဇိဝ္ဟာ။ပေ.။ အတ္ထိ နု ခော သော, ဘန္တေ, မနော ယေန မနေန အတီတေ ဗုဒ္ဓေ ပရိနိဗ္ဗုတေ ဆိန္နပပဉ္စေ ဆိန္နဝဋုမေ ပရိယာဒိန္နဝဋ္ဋေ သဗ္ဗဒုက္ခဝီတိဝတ္တေ ပညာပယမာနော ပညာပေယ္ယာ’’တိ။
Atītaṃ atthīti? Āmantā. Nanu āyasmā phagguno bhagavantaṃ etadavoca – ‘‘atthi nu kho taṃ, bhante, cakkhuṃ yena cakkhunā atīte buddhe parinibbute chinnapapañce chinnavaṭume pariyādinnavaṭṭe sabbadukkhavītivatte paññāpayamāno paññāpeyyāti. Atthi nu kho sā, bhante, jivhā…pe… atthi nu kho so, bhante, mano yena manena atīte buddhe parinibbute chinnapapañce chinnavaṭume pariyādinnavaṭṭe sabbadukkhavītivatte paññāpayamāno paññāpeyyā’’ti.
‘‘နတ္ထိ ခော တံ, ဖဂ္ဂုန, စက္ခုံ ယေန စက္ခုနာ အတီတေ ဗုဒ္ဓေ ပရိနိဗ္ဗုတေ ဆိန္နပပဉ္စေ ဆိန္နဝဋုမေ ပရိယာဒိန္နဝဋ္ဋေ သဗ္ဗဒုက္ခဝီတိဝတ္တေ ပညာပယမာနော ပညာပေယ္ယ။ နတ္ထိ ခော သာ, ဖဂ္ဂုန, ဇိဝ္ဟာ။ပေ.။ နတ္ထိ နု ခော သော, ဖဂ္ဂုန, မနော ယေန မနေန အတီတေ ဗုဒ္ဓေ ပရိနိဗ္ဗုတေ ဆိန္နပပဉ္စေ ဆိန္နဝဋုမေ ပရိယာဒိန္နဝဋ္ဋေ သဗ္ဗဒုက္ခဝီတိဝတ္တေ ပညာပယမာနော ပညာပေယ္ယာ’’တိ 35။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘အတီတံ အတ္ထီ’’တိ။
‘‘Natthi kho taṃ, phagguna, cakkhuṃ yena cakkhunā atīte buddhe parinibbute chinnapapañce chinnavaṭume pariyādinnavaṭṭe sabbadukkhavītivatte paññāpayamāno paññāpeyya. Natthi kho sā, phagguna, jivhā…pe… natthi nu kho so, phagguna, mano yena manena atīte buddhe parinibbute chinnapapañce chinnavaṭume pariyādinnavaṭṭe sabbadukkhavītivatte paññāpayamāno paññāpeyyā’’ti 36. Attheva suttantoti? Āmantā. Tena hi na vattabbaṃ – ‘‘atītaṃ atthī’’ti.
အတီတံ အတ္ထီတိ? အာမန္တာ။ နနု အာယသ္မာ နန္ဒကော ဧတဒဝောစ – ‘‘အဟု ပုဗ္ဗေ လောဘော တဒဟု အကုသလံ, သော ဧတရဟိ နတ္ထိ, ဣစ္စေတံ ကုသလံ။ အဟု ပုဗ္ဗေ ဒောသော။ အဟု ပုဗ္ဗေ မောဟော, တဒဟု အကုသလံ, သော ဧတရဟိ နတ္ထိ, ဣစ္စေတံ ကုသလ’’န္တိ 37။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘အတီတံ အတ္ထီ’’တိ။
Atītaṃ atthīti? Āmantā. Nanu āyasmā nandako etadavoca – ‘‘ahu pubbe lobho tadahu akusalaṃ, so etarahi natthi, iccetaṃ kusalaṃ. Ahu pubbe doso… ahu pubbe moho, tadahu akusalaṃ, so etarahi natthi, iccetaṃ kusala’’nti 38. Attheva suttantoti? Āmantā. Tena hi na vattabbaṃ – ‘‘atītaṃ atthī’’ti.
န ဝတ္တဗ္ဗံ – ‘‘အနာဂတံ အတ္ထီ’’တိ? အာမန္တာ။ နနု ဝုတ္တံ ဘဂဝတာ – ‘‘ကဗဠီကာရေ စေ, ဘိက္ခဝေ, အာဟာရေ အတ္ထိ ရာဂော, အတ္ထိ နန္ဒီ, အတ္ထိ တဏ္ဟာ; ပတိဋ္ဌိတံ တတ္ထ ဝိညာဏံ ဝိရူဠ္ဟံ။ ယတ္ထ ပတိဋ္ဌိတံ ဝိညာဏံ ဝိရူဠ္ဟံ, အတ္ထိ တတ္ထ နာမရူပသ္သ အဝက္ကန္တိ။ ယတ္ထ အတ္ထိ နာမရူပသ္သ အဝက္ကန္တိ, အတ္ထိ တတ္ထ သင္ခာရာနံ ဝုဒ္ဓိ။ ယတ္ထ အတ္ထိ သင္ခာရာနံ ဝုဒ္ဓိ, အတ္ထိ တတ္ထ အာယတိံ ပုနဗ္ဘဝာဘိနိဗ္ဗတ္တိ။ ယတ္ထ အတ္ထိ အာယတိံ ပုနဗ္ဘဝာဘိနိဗ္ဗတ္တိ, အတ္ထိ တတ္ထ အာယတိံ ဇာတိဇရာမရဏံ။ ယတ္ထ အတ္ထိ အာယတိံ ဇာတိဇရာမရဏံ, သသောကံ တံ, ဘိက္ခဝေ, သရဇံ 39 သဥပာယာသန္တိ ဝဒာမိ။
Na vattabbaṃ – ‘‘anāgataṃ atthī’’ti? Āmantā. Nanu vuttaṃ bhagavatā – ‘‘kabaḷīkāre ce, bhikkhave, āhāre atthi rāgo, atthi nandī, atthi taṇhā; patiṭṭhitaṃ tattha viññāṇaṃ virūḷhaṃ. Yattha patiṭṭhitaṃ viññāṇaṃ virūḷhaṃ, atthi tattha nāmarūpassa avakkanti. Yattha atthi nāmarūpassa avakkanti, atthi tattha saṅkhārānaṃ vuddhi. Yattha atthi saṅkhārānaṃ vuddhi, atthi tattha āyatiṃ punabbhavābhinibbatti. Yattha atthi āyatiṃ punabbhavābhinibbatti, atthi tattha āyatiṃ jātijarāmaraṇaṃ. Yattha atthi āyatiṃ jātijarāmaraṇaṃ, sasokaṃ taṃ, bhikkhave, sarajaṃ 40 saupāyāsanti vadāmi.
‘‘ဖသ္သေ စေ, ဘိက္ခဝေ, အာဟာရေ။ မနောသဉ္စေတနာယ စေ, ဘိက္ခဝေ, အာဟာရေ။ ဝိညာဏေ စေ, ဘိက္ခဝေ, အာဟာရေ အတ္ထိ ရာဂော, အတ္ထိ နန္ဒီ။ပေ.။ သရဇံ သဥပာယာသန္တိ ဝဒာမီ’’တိ 41။ အတ္ထေဝ သုတ္တန္တောတိ? အာမန္တာ ။ တေန ဟိ အနာဂတံ အတ္ထီတိ။
‘‘Phasse ce, bhikkhave, āhāre… manosañcetanāya ce, bhikkhave, āhāre… viññāṇe ce, bhikkhave, āhāre atthi rāgo, atthi nandī…pe… sarajaṃ saupāyāsanti vadāmī’’ti 42. Attheva suttantoti? Āmantā . Tena hi anāgataṃ atthīti.
အနာဂတံ အတ္ထီတိ? အာမန္တာ။ နနု ဝုတ္တံ ဘဂဝတာ – ‘‘ကဗဠီကာရေ စေ, ဘိက္ခဝေ, အာဟာရေ နတ္ထိ ရာဂော, နတ္ထိ နန္ဒီ, နတ္ထိ တဏ္ဟာ; အပ္ပတိဋ္ဌိတံ တတ္ထ ဝိညာဏံ အဝိရူဠ္ဟံ။ ယတ္ထ ဝိညာဏံ အပ္ပတိဋ္ဌိတံ အဝိရူဠ္ဟံ, နတ္ထိ တတ္ထ နာမရူပသ္သ အဝက္ကန္တိ။ ယတ္ထ နတ္ထိ နာမရူပသ္သ အဝက္ကန္တိ, နတ္ထိ တတ္ထ သင္ခာရာနံ ဝုဒ္ဓိ။ ယတ္ထ နတ္ထိ သင္ခာရာနံ ဝုဒ္ဓိ, နတ္ထိ တတ္ထ အာယတိံ ပုနဗ္ဘဝာဘိနိဗ္ဗတ္တိ။ ယတ္ထ နတ္ထိ အာယတိံ ပုနဗ္ဘဝာဘိနိဗ္ဗတ္တိ, နတ္ထိ တတ္ထ အာယတိံ ဇာတိဇရာမရဏံ။ ယတ္ထ နတ္ထိ အာယတိံ ဇာတိဇရာမရဏံ, အသောကံ တံ, ဘိက္ခဝေ, အရဇံ အနုပာယာသန္တိ ဝဒာမိ။
Anāgataṃ atthīti? Āmantā. Nanu vuttaṃ bhagavatā – ‘‘kabaḷīkāre ce, bhikkhave, āhāre natthi rāgo, natthi nandī, natthi taṇhā; appatiṭṭhitaṃ tattha viññāṇaṃ avirūḷhaṃ. Yattha viññāṇaṃ appatiṭṭhitaṃ avirūḷhaṃ, natthi tattha nāmarūpassa avakkanti. Yattha natthi nāmarūpassa avakkanti, natthi tattha saṅkhārānaṃ vuddhi. Yattha natthi saṅkhārānaṃ vuddhi, natthi tattha āyatiṃ punabbhavābhinibbatti. Yattha natthi āyatiṃ punabbhavābhinibbatti, natthi tattha āyatiṃ jātijarāmaraṇaṃ. Yattha natthi āyatiṃ jātijarāmaraṇaṃ, asokaṃ taṃ, bhikkhave, arajaṃ anupāyāsanti vadāmi.
‘‘ဖသ္သေ စေ, ဘိက္ခဝေ, အာဟာရေ။ မနောသဉ္စေတနာယ စေ, ဘိက္ခဝေ, အာဟာရေ။ ဝိညာဏေ စေ, ဘိက္ခဝေ, အာဟာရေ နတ္ထိ ရာဂော, နတ္ထိ နန္ဒီ။ပေ.။ အရဇံ အနုပာယာသန္တိ ဝဒာမီ’’တိ 43။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘အနာဂတံ အတ္ထီ’’တိ။
‘‘Phasse ce, bhikkhave, āhāre… manosañcetanāya ce, bhikkhave, āhāre… viññāṇe ce, bhikkhave, āhāre natthi rāgo, natthi nandī…pe… arajaṃ anupāyāsanti vadāmī’’ti 44. Attheva suttantoti? Āmantā. Tena hi na vattabbaṃ – ‘‘anāgataṃ atthī’’ti.
သဗ္ဗမတ္ထီတိကထာ နိဋ္ဌိတာ။
Sabbamatthītikathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၅. သဗ္ဗမတ္ထီတိကထာ • 5. Sabbamatthītikathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၅. သဗ္ဗမတ္ထီတိကထာ • 5. Sabbamatthītikathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၅. သဗ္ဗမတ္ထီတိကထာဝဏ္ဏနာ • 5. Sabbamatthītikathāvaṇṇanā
