| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೫. ಸಬ್ಬಮತ್ಥೀತಿಕಥಾ
5. Sabbamatthītikathā
೧. ವಾದಯುತ್ತಿ
1. Vādayutti
೨೮೨. ಸಬ್ಬಮತ್ಥೀತಿ ? ಆಮನ್ತಾ। ಸಬ್ಬತ್ಥ ಸಬ್ಬಮತ್ಥೀತಿ? ನ ಹೇವಂ ವತ್ತಬ್ಬೇ। ಸಬ್ಬಮತ್ಥೀತಿ? ಆಮನ್ತಾ। ಸಬ್ಬದಾ ಸಬ್ಬಮತ್ಥೀತಿ? ನ ಹೇವಂ ವತ್ತಬ್ಬೇ। ಸಬ್ಬಮತ್ಥೀತಿ? ಆಮನ್ತಾ। ಸಬ್ಬೇನ ಸಬ್ಬಂ ಸಬ್ಬಮತ್ಥೀತಿ? ನ ಹೇವಂ ವತ್ತಬ್ಬೇ। ಸಬ್ಬಮತ್ಥೀತಿ? ಆಮನ್ತಾ। ಸಬ್ಬೇಸು ಸಬ್ಬಮತ್ಥೀತಿ? ನ ಹೇವಂ ವತ್ತಬ್ಬೇ। ಸಬ್ಬಮತ್ಥೀತಿ? ಆಮನ್ತಾ। ಅಯೋಗನ್ತಿ ಕತ್ವಾ ಸಬ್ಬಮತ್ಥೀತಿ? ನ ಹೇವಂ ವತ್ತಬ್ಬೇ। ಸಬ್ಬಮತ್ಥೀತಿ? ಆಮನ್ತಾ। ಯಮ್ಪಿ ನತ್ಥಿ, ತಮ್ಪತ್ಥೀತಿ? ನ ಹೇವಂ ವತ್ತಬ್ಬೇ। ಸಬ್ಬಮತ್ಥೀತಿ? ಆಮನ್ತಾ। ಸಬ್ಬಮತ್ಥೀತಿ ಯಾ ದಿಟ್ಠಿ ಸಾ ದಿಟ್ಠಿ ಮಿಚ್ಛಾದಿಟ್ಠೀತಿ, ಯಾ ದಿಟ್ಠಿ ಸಾ ದಿಟ್ಠಿ ಸಮ್ಮಾದಿಟ್ಠೀತಿ, ಹೇವಮತ್ಥೀತಿ? ನ ಹೇವಂ ವತ್ತಬ್ಬೇ। (ಸಂಖಿತ್ತಂ)। ವಾದಯುತ್ತಿ।
282. Sabbamatthīti ? Āmantā. Sabbattha sabbamatthīti? Na hevaṃ vattabbe. Sabbamatthīti? Āmantā. Sabbadā sabbamatthīti? Na hevaṃ vattabbe. Sabbamatthīti? Āmantā. Sabbena sabbaṃ sabbamatthīti? Na hevaṃ vattabbe. Sabbamatthīti? Āmantā. Sabbesu sabbamatthīti? Na hevaṃ vattabbe. Sabbamatthīti? Āmantā. Ayoganti katvā sabbamatthīti? Na hevaṃ vattabbe. Sabbamatthīti? Āmantā. Yampi natthi, tampatthīti? Na hevaṃ vattabbe. Sabbamatthīti? Āmantā. Sabbamatthīti yā diṭṭhi sā diṭṭhi micchādiṭṭhīti, yā diṭṭhi sā diṭṭhi sammādiṭṭhīti, hevamatthīti? Na hevaṃ vattabbe. (Saṃkhittaṃ). Vādayutti.
೨. ಕಾಲಸಂಸನ್ದನಾ
2. Kālasaṃsandanā
೨೮೩. ಅತೀತಂ ಅತ್ಥೀತಿ? ಆಮನ್ತಾ। ನನು ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ಆಮನ್ತಾ। ಹಞ್ಚಿ ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ಅತ್ಥೀ’’ತಿ।
283. Atītaṃ atthīti? Āmantā. Nanu atītaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Āmantā. Hañci atītaṃ niruddhaṃ vigataṃ vipariṇataṃ atthaṅgataṃ abbhatthaṅgataṃ, no ca vata re vattabbe – ‘‘atītaṃ atthī’’ti.
ಅನಾಗತಂ ಅತ್ಥೀತಿ? ಆಮನ್ತಾ। ನನು ಅನಾಗತಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ಆಮನ್ತಾ। ಹಞ್ಚಿ ಅನಾಗತಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತಂ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗತಂ ಅತ್ಥೀ’’ತಿ।
Anāgataṃ atthīti? Āmantā. Nanu anāgataṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Āmantā. Hañci anāgataṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtaṃ, no ca vata re vattabbe – ‘‘anāgataṃ atthī’’ti.
ಪಚ್ಚುಪ್ಪನ್ನಂ ಅತ್ಥಿ ಪಚ್ಚುಪ್ಪನ್ನಂ ಅನಿರುದ್ಧಂ ಅವಿಗತಂ ಅವಿಪರಿಣತಂ ನ ಅತ್ಥಙ್ಗತಂ ನ ಅಬ್ಭತ್ಥಙ್ಗತನ್ತಿ? ಆಮನ್ತಾ। ಅತೀತಂ ಅತ್ಥಿ ಅತೀತಂ ಅನಿರುದ್ಧಂ ಅವಿಗತಂ ಅವಿಪರಿಣತಂ ನ ಅತ್ಥಙ್ಗತಂ ನ ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಪಚ್ಚುಪ್ಪನ್ನಂ ಅತ್ಥಿ ಪಚ್ಚುಪ್ಪನ್ನಂ ಜಾತಂ ಭೂತಂ ಸಞ್ಜಾತಂ ನಿಬ್ಬತ್ತಂ ಅಭಿನಿಬ್ಬತ್ತಂ ಪಾತುಭೂತನ್ತಿ? ಆಮನ್ತಾ। ಅನಾಗತಂ ಅತ್ಥಿ ಅನಾಗತಂ ಜಾತಂ ಭೂತಂ ಸಞ್ಜಾತಂ ನಿಬ್ಬತ್ತಂ ಅಭಿನಿಬ್ಬತ್ತಂ ಪಾತುಭೂತನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Paccuppannaṃ atthi paccuppannaṃ aniruddhaṃ avigataṃ avipariṇataṃ na atthaṅgataṃ na abbhatthaṅgatanti? Āmantā. Atītaṃ atthi atītaṃ aniruddhaṃ avigataṃ avipariṇataṃ na atthaṅgataṃ na abbhatthaṅgatanti? Na hevaṃ vattabbe…pe… paccuppannaṃ atthi paccuppannaṃ jātaṃ bhūtaṃ sañjātaṃ nibbattaṃ abhinibbattaṃ pātubhūtanti? Āmantā. Anāgataṃ atthi anāgataṃ jātaṃ bhūtaṃ sañjātaṃ nibbattaṃ abhinibbattaṃ pātubhūtanti? Na hevaṃ vattabbe…pe….
ಅತೀತಂ ಅತ್ಥಿ ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ಆಮನ್ತಾ। ಪಚ್ಚುಪ್ಪನ್ನಂ ಅತ್ಥಿ ಪಚ್ಚುಪ್ಪನ್ನಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅನಾಗತಂ ಅತ್ಥಿ ಅನಾಗತಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ಆಮನ್ತಾ। ಪಚ್ಚುಪ್ಪನ್ನಂ ಅತ್ಥಿ ಪಚ್ಚುಪ್ಪನ್ನಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ನ ಹೇವಂ ವತ್ತಬ್ಬೇ।
Atītaṃ atthi atītaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Āmantā. Paccuppannaṃ atthi paccuppannaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Na hevaṃ vattabbe…pe… anāgataṃ atthi anāgataṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Āmantā. Paccuppannaṃ atthi paccuppannaṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Na hevaṃ vattabbe.
೨೮೪. ಅತೀತಂ ರೂಪಂ ಅತ್ಥೀತಿ? ಆಮನ್ತಾ। ನನು ಅತೀತಂ ರೂಪಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ಆಮನ್ತಾ। ಹಞ್ಚಿ ಅತೀತಂ ರೂಪಂ ನಿರುದ್ಧಂ…ಪೇ॰… ಅಬ್ಭತ್ಥಙ್ಗತಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ರೂಪಂ ಅತ್ಥೀ’’ತಿ।
284. Atītaṃ rūpaṃ atthīti? Āmantā. Nanu atītaṃ rūpaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Āmantā. Hañci atītaṃ rūpaṃ niruddhaṃ…pe… abbhatthaṅgataṃ, no ca vata re vattabbe – ‘‘atītaṃ rūpaṃ atthī’’ti.
ಅನಾಗತಂ ರೂಪಂ ಅತ್ಥೀತಿ? ಆಮನ್ತಾ। ನನು ಅನಾಗತಂ ರೂಪಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ಆಮನ್ತಾ। ಹಞ್ಚಿ ಅನಾಗತಂ ರೂಪಂ ಅಜಾತಂ…ಪೇ॰… ಅಪಾತುಭೂತಂ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗತಂ ರೂಪಂ ಅತ್ಥೀ’’ತಿ।
Anāgataṃ rūpaṃ atthīti? Āmantā. Nanu anāgataṃ rūpaṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Āmantā. Hañci anāgataṃ rūpaṃ ajātaṃ…pe… apātubhūtaṃ, no ca vata re vattabbe – ‘‘anāgataṃ rūpaṃ atthī’’ti.
ಪಚ್ಚುಪ್ಪನ್ನಂ ರೂಪಂ ಅತ್ಥಿ ಪಚ್ಚುಪ್ಪನ್ನಂ ರೂಪಂ ಅನಿರುದ್ಧಂ ಅವಿಗತಂ ಅವಿಪರಿಣತಂ ನ ಅತ್ಥಙ್ಗತಂ ನ ಅಬ್ಭತ್ಥಙ್ಗತನ್ತಿ? ಆಮನ್ತಾ। ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅನಿರುದ್ಧಂ ಅವಿಗತಂ ಅವಿಪರಿಣತಂ ನ ಅತ್ಥಙ್ಗತಂ ನ ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ।
Paccuppannaṃ rūpaṃ atthi paccuppannaṃ rūpaṃ aniruddhaṃ avigataṃ avipariṇataṃ na atthaṅgataṃ na abbhatthaṅgatanti? Āmantā. Atītaṃ rūpaṃ atthi atītaṃ rūpaṃ aniruddhaṃ avigataṃ avipariṇataṃ na atthaṅgataṃ na abbhatthaṅgatanti? Na hevaṃ vattabbe.
ಪಚ್ಚುಪ್ಪನ್ನಂ ರೂಪಂ ಅತ್ಥಿ ಪಚ್ಚುಪ್ಪನ್ನಂ ರೂಪಂ ಜಾತಂ ಭೂತಂ ಸಞ್ಜಾತಂ ನಿಬ್ಬತ್ತಂ ಅಭಿನಿಬ್ಬತ್ತಂ ಪಾತುಭೂತನ್ತಿ? ಆಮನ್ತಾ। ಅನಾಗತಂ ರೂಪಂ ಅತ್ಥಿ ಅನಾಗತಂ ರೂಪಂ ಜಾತಂ ಭೂತಂ ಸಞ್ಜಾತಂ ನಿಬ್ಬತ್ತಂ ಅಭಿನಿಬ್ಬತ್ತಂ ಪಾತುಭೂತನ್ತಿ? ನ ಹೇವಂ ವತ್ತಬ್ಬೇ।
Paccuppannaṃ rūpaṃ atthi paccuppannaṃ rūpaṃ jātaṃ bhūtaṃ sañjātaṃ nibbattaṃ abhinibbattaṃ pātubhūtanti? Āmantā. Anāgataṃ rūpaṃ atthi anāgataṃ rūpaṃ jātaṃ bhūtaṃ sañjātaṃ nibbattaṃ abhinibbattaṃ pātubhūtanti? Na hevaṃ vattabbe.
ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ಆಮನ್ತಾ। ಪಚ್ಚುಪ್ಪನ್ನಂ ರೂಪಂ ಅತ್ಥಿ ಪಚ್ಚುಪ್ಪನ್ನಂ ರೂಪಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ।
Atītaṃ rūpaṃ atthi atītaṃ rūpaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Āmantā. Paccuppannaṃ rūpaṃ atthi paccuppannaṃ rūpaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Na hevaṃ vattabbe.
ಅನಾಗತಂ ರೂಪಂ ಅತ್ಥಿ ಅನಾಗತಂ ರೂಪಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ಆಮನ್ತಾ। ಪಚ್ಚುಪ್ಪನ್ನಂ ರೂಪಂ ಅತ್ಥಿ ಪಚ್ಚುಪ್ಪನ್ನಂ ರೂಪಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ನ ಹೇವಂ ವತ್ತಬ್ಬೇ।
Anāgataṃ rūpaṃ atthi anāgataṃ rūpaṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Āmantā. Paccuppannaṃ rūpaṃ atthi paccuppannaṃ rūpaṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Na hevaṃ vattabbe.
ಅತೀತಾ ವೇದನಾ ಅತ್ಥಿ…ಪೇ॰… ಸಞ್ಞಾ ಅತ್ಥಿ, ಸಙ್ಖಾರಾ ಅತ್ಥಿ, ವಿಞ್ಞಾಣಂ ಅತ್ಥೀತಿ? ಆಮನ್ತಾ। ನನು ಅತೀತಂ ವಿಞ್ಞಾಣಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ಆಮನ್ತಾ । ಹಞ್ಚಿ ಅತೀತಂ ವಿಞ್ಞಾಣಂ ನಿರುದ್ಧಂ…ಪೇ॰… ಅಬ್ಭತ್ಥಙ್ಗತಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ವಿಞ್ಞಾಣಂ ಅತ್ಥೀ’’ತಿ।
Atītā vedanā atthi…pe… saññā atthi, saṅkhārā atthi, viññāṇaṃ atthīti? Āmantā. Nanu atītaṃ viññāṇaṃ niruddhaṃ vigataṃ vipariṇataṃ atthaṅgataṃ abbhatthaṅgatanti? Āmantā . Hañci atītaṃ viññāṇaṃ niruddhaṃ…pe… abbhatthaṅgataṃ, no ca vata re vattabbe – ‘‘atītaṃ viññāṇaṃ atthī’’ti.
ಅನಾಗತಂ ವಿಞ್ಞಾಣಂ ಅತ್ಥೀತಿ? ಆಮನ್ತಾ। ನನು ಅನಾಗತಂ ವಿಞ್ಞಾಣಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ಆಮನ್ತಾ। ಹಞ್ಚಿ ಅನಾಗತಂ ವಿಞ್ಞಾಣಂ ಅಜಾತಂ…ಪೇ॰… ಅಪಾತುಭೂತಂ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗತಂ ವಿಞ್ಞಾಣಂ ಅತ್ಥೀ’’ತಿ।
Anāgataṃ viññāṇaṃ atthīti? Āmantā. Nanu anāgataṃ viññāṇaṃ ajātaṃ abhūtaṃ asañjātaṃ anibbattaṃ anabhinibbattaṃ apātubhūtanti? Āmantā. Hañci anāgataṃ viññāṇaṃ ajātaṃ…pe… apātubhūtaṃ, no ca vata re vattabbe – ‘‘anāgataṃ viññāṇaṃ atthī’’ti.
ಪಚ್ಚುಪ್ಪನ್ನಂ ವಿಞ್ಞಾಣಂ ಅತ್ಥಿ ಪಚ್ಚುಪ್ಪನ್ನಂ ವಿಞ್ಞಾಣಂ ಅನಿರುದ್ಧಂ…ಪೇ॰… ನ ಅಬ್ಭತ್ಥಙ್ಗತನ್ತಿ? ಆಮನ್ತಾ। ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅನಿರುದ್ಧಂ…ಪೇ॰… ನ ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ।
Paccuppannaṃ viññāṇaṃ atthi paccuppannaṃ viññāṇaṃ aniruddhaṃ…pe… na abbhatthaṅgatanti? Āmantā. Atītaṃ viññāṇaṃ atthi atītaṃ viññāṇaṃ aniruddhaṃ…pe… na abbhatthaṅgatanti? Na hevaṃ vattabbe.
ಪಚ್ಚುಪ್ಪನ್ನಂ ವಿಞ್ಞಾಣಂ ಅತ್ಥಿ ಪಚ್ಚುಪ್ಪನ್ನಂ ವಿಞ್ಞಾಣಂ ಜಾತಂ…ಪೇ॰… ಪಾತುಭೂತನ್ತಿ? ಆಮನ್ತಾ। ಅನಾಗತಂ ವಿಞ್ಞಾಣಂ ಅತ್ಥಿ ಅನಾಗತಂ ವಿಞ್ಞಾಣಂ ಜಾತಂ…ಪೇ॰… ಪಾತುಭೂತನ್ತಿ? ನ ಹೇವಂ ವತ್ತಬ್ಬೇ।
Paccuppannaṃ viññāṇaṃ atthi paccuppannaṃ viññāṇaṃ jātaṃ…pe… pātubhūtanti? Āmantā. Anāgataṃ viññāṇaṃ atthi anāgataṃ viññāṇaṃ jātaṃ…pe… pātubhūtanti? Na hevaṃ vattabbe.
ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ನಿರುದ್ಧಂ…ಪೇ॰… ಅಬ್ಭತ್ಥಙ್ಗತನ್ತಿ? ಆಮನ್ತಾ। ಪಚ್ಚುಪ್ಪನ್ನಂ ವಿಞ್ಞಾಣಂ ಅತ್ಥಿ ಪಚ್ಚುಪ್ಪನ್ನಂ ವಿಞ್ಞಾಣಂ ನಿರುದ್ಧಂ…ಪೇ॰… ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ। ಅನಾಗತಂ ವಿಞ್ಞಾಣಂ ಅತ್ಥಿ ಅನಾಗತಂ ವಿಞ್ಞಾಣಂ ಅಜಾತಂ…ಪೇ॰… ಅಪಾತುಭೂತನ್ತಿ? ಆಮನ್ತಾ।
Atītaṃ viññāṇaṃ atthi atītaṃ viññāṇaṃ niruddhaṃ…pe… abbhatthaṅgatanti? Āmantā. Paccuppannaṃ viññāṇaṃ atthi paccuppannaṃ viññāṇaṃ niruddhaṃ…pe… abbhatthaṅgatanti? Na hevaṃ vattabbe. Anāgataṃ viññāṇaṃ atthi anāgataṃ viññāṇaṃ ajātaṃ…pe… apātubhūtanti? Āmantā.
ಪಚ್ಚುಪ್ಪನ್ನಂ ವಿಞ್ಞಾಣಂ ಅತ್ಥಿ ಪಚ್ಚುಪ್ಪನ್ನಂ ವಿಞ್ಞಾಣಂ ಅಜಾತಂ…ಪೇ॰… ಅಪಾತುಭೂತನ್ತಿ? ನ ಹೇವಂ ವತ್ತಬ್ಬೇ।
Paccuppannaṃ viññāṇaṃ atthi paccuppannaṃ viññāṇaṃ ajātaṃ…pe… apātubhūtanti? Na hevaṃ vattabbe.
೨೮೫. ‘‘ಪಚ್ಚುಪ್ಪನ್ನನ್ತಿ ವಾ ರೂಪ’’ನ್ತಿ ವಾ, ‘‘ರೂಪನ್ತಿ ವಾ ಪಚ್ಚುಪ್ಪನ್ನ’’ನ್ತಿ ವಾ ಪಚ್ಚುಪ್ಪನ್ನಂ ರೂಪಂ ಅಪ್ಪಿಯಂ ಕರಿತ್ವಾ ಏಸೇಸೇ ಏಕಟ್ಠೇ ಸಮೇ ಸಮಭಾಗೇ ತಜ್ಜಾತೇತಿ? ಆಮನ್ತಾ। ಪಚ್ಚುಪ್ಪನ್ನಂ ರೂಪಂ ನಿರುಜ್ಝಮಾನಂ ಪಚ್ಚುಪ್ಪನ್ನಭಾವಂ ಜಹತೀತಿ? ಆಮನ್ತಾ। ರೂಪಭಾವಂ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰…।
285. ‘‘Paccuppannanti vā rūpa’’nti vā, ‘‘rūpanti vā paccuppanna’’nti vā paccuppannaṃ rūpaṃ appiyaṃ karitvā esese ekaṭṭhe same samabhāge tajjāteti? Āmantā. Paccuppannaṃ rūpaṃ nirujjhamānaṃ paccuppannabhāvaṃ jahatīti? Āmantā. Rūpabhāvaṃ jahatīti? Na hevaṃ vattabbe…pe….
‘‘ಪಚ್ಚುಪ್ಪನ್ನನ್ತಿ ವಾ ರೂಪ’’ನ್ತಿ ವಾ, ‘‘ರೂಪನ್ತಿ ವಾ ಪಚ್ಚುಪ್ಪನ್ನ’’ನ್ತಿ ವಾ ಪಚ್ಚುಪ್ಪನ್ನಂ ರೂಪಂ ಅಪ್ಪಿಯಂ ಕರಿತ್ವಾ ಏಸೇಸೇ ಏಕಟ್ಠೇ ಸಮೇ ಸಮಭಾಗೇ ತಜ್ಜಾತೇತಿ? ಆಮನ್ತಾ। ಪಚ್ಚುಪ್ಪನ್ನಂ ರೂಪಂ ನಿರುಜ್ಝಮಾನಂ ರೂಪಭಾವಂ ನ ಜಹತೀತಿ? ಆಮನ್ತಾ। ಪಚ್ಚುಪ್ಪನ್ನಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰…।
‘‘Paccuppannanti vā rūpa’’nti vā, ‘‘rūpanti vā paccuppanna’’nti vā paccuppannaṃ rūpaṃ appiyaṃ karitvā esese ekaṭṭhe same samabhāge tajjāteti? Āmantā. Paccuppannaṃ rūpaṃ nirujjhamānaṃ rūpabhāvaṃ na jahatīti? Āmantā. Paccuppannabhāvaṃ na jahatīti? Na hevaṃ vattabbe…pe….
‘‘ಓದಾತನ್ತಿ ವಾ ವತ್ಥ’’ನ್ತಿ ವಾ, ‘‘ವತ್ಥನ್ತಿ ವಾ ಓದಾತ’’ನ್ತಿ ವಾ ಓದಾತಂ ವತ್ಥಂ ಅಪ್ಪಿಯಂ ಕರಿತ್ವಾ ಏಸೇಸೇ ಏಕಟ್ಠೇ ಸಮೇ ಸಮಭಾಗೇ ತಜ್ಜಾತೇತಿ? ಆಮನ್ತಾ। ಓದಾತಂ ವತ್ಥಂ ರಜ್ಜಮಾನಂ ಓದಾತಭಾವಂ ಜಹತೀತಿ? ಆಮನ್ತಾ। ವತ್ಥಭಾವಂ ಜಹತೀತಿ? ನ ಹೇವಂ ವತ್ತಬ್ಬೇ।
‘‘Odātanti vā vattha’’nti vā, ‘‘vatthanti vā odāta’’nti vā odātaṃ vatthaṃ appiyaṃ karitvā esese ekaṭṭhe same samabhāge tajjāteti? Āmantā. Odātaṃ vatthaṃ rajjamānaṃ odātabhāvaṃ jahatīti? Āmantā. Vatthabhāvaṃ jahatīti? Na hevaṃ vattabbe.
‘‘ಓದಾತನ್ತಿ ವಾ ವತ್ಥ’’ನ್ತಿ ವಾ, ‘‘ವತ್ಥನ್ತಿ ವಾ ಓದಾತ’’ನ್ತಿ ವಾ ಓದಾತಂ ವತ್ಥಂ ಅಪ್ಪಿಯಂ ಕರಿತ್ವಾ ಏಸೇಸೇ ಏಕಟ್ಠೇ ಸಮೇ ಸಮಭಾಗೇ ತಜ್ಜಾತೇತಿ? ಆಮನ್ತಾ। ಓದಾತಂ ವತ್ಥಂ ರಜ್ಜಮಾನಂ ವತ್ಥಭಾವಂ ನ ಜಹತೀತಿ? ಆಮನ್ತಾ। ಓದಾತಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ।…ಪೇ॰…।
‘‘Odātanti vā vattha’’nti vā, ‘‘vatthanti vā odāta’’nti vā odātaṃ vatthaṃ appiyaṃ karitvā esese ekaṭṭhe same samabhāge tajjāteti? Āmantā. Odātaṃ vatthaṃ rajjamānaṃ vatthabhāvaṃ na jahatīti? Āmantā. Odātabhāvaṃ na jahatīti? Na hevaṃ vattabbe.…Pe….
೨೮೬. ರೂಪಂ ರೂಪಭಾವಂ ನ ಜಹತೀತಿ? ಆಮನ್ತಾ। ರೂಪಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ ? ನ ಹೇವಂ ವತ್ತಬ್ಬೇ। ನನು ರೂಪಂ ರೂಪಭಾವಂ ನ ಜಹತೀತಿ ರೂಪಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ। ಹಞ್ಚಿ ರೂಪಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ರೂಪಂ ರೂಪಭಾವಂ ನ ಜಹತೀ’’ತಿ।
286. Rūpaṃ rūpabhāvaṃ na jahatīti? Āmantā. Rūpaṃ niccaṃ dhuvaṃ sassataṃ avipariṇāmadhammanti ? Na hevaṃ vattabbe. Nanu rūpaṃ rūpabhāvaṃ na jahatīti rūpaṃ aniccaṃ adhuvaṃ asassataṃ vipariṇāmadhammanti? Āmantā. Hañci rūpaṃ aniccaṃ adhuvaṃ asassataṃ vipariṇāmadhammaṃ, no ca vata re vattabbe – ‘‘rūpaṃ rūpabhāvaṃ na jahatī’’ti.
ನಿಬ್ಬಾನಂ ನಿಬ್ಬಾನಭಾವಂ ನ ಜಹತೀತಿ ನಿಬ್ಬಾನಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ಆಮನ್ತಾ। ರೂಪಂ ರೂಪಭಾವಂ ನ ಜಹತೀತಿ 1 ರೂಪಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰… ರೂಪಂ ರೂಪಭಾವಂ ನ ಜಹತಿ ರೂಪಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ। ನಿಬ್ಬಾನಂ ನಿಬ್ಬಾನಭಾವಂ ನ ಜಹತಿ ನಿಬ್ಬಾನಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Nibbānaṃ nibbānabhāvaṃ na jahatīti nibbānaṃ niccaṃ dhuvaṃ sassataṃ avipariṇāmadhammanti? Āmantā. Rūpaṃ rūpabhāvaṃ na jahatīti 2 rūpaṃ niccaṃ dhuvaṃ sassataṃ avipariṇāmadhammanti? Na hevaṃ vattabbe…pe… rūpaṃ rūpabhāvaṃ na jahati rūpaṃ aniccaṃ adhuvaṃ asassataṃ vipariṇāmadhammanti? Āmantā. Nibbānaṃ nibbānabhāvaṃ na jahati nibbānaṃ aniccaṃ adhuvaṃ asassataṃ vipariṇāmadhammanti? Na hevaṃ vattabbe…pe….
ಅತೀತಂ ಅತ್ಥಿ ಅತೀತಂ ಅತೀತಭಾವಂ ನ ಜಹತೀತಿ? ಆಮನ್ತಾ। ಅನಾಗತಂ ಅತ್ಥಿ ಅನಾಗತಂ ಅನಾಗತಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ। ಅತೀತಂ ಅತ್ಥಿ ಅತೀತಂ ಅತೀತಭಾವಂ ನ ಜಹತೀತಿ? ಆಮನ್ತಾ। ಪಚ್ಚುಪ್ಪನ್ನಂ ಅತ್ಥಿ ಪಚ್ಚುಪ್ಪನ್ನಂ ಪಚ್ಚುಪ್ಪನ್ನಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Atītaṃ atthi atītaṃ atītabhāvaṃ na jahatīti? Āmantā. Anāgataṃ atthi anāgataṃ anāgatabhāvaṃ na jahatīti? Na hevaṃ vattabbe. Atītaṃ atthi atītaṃ atītabhāvaṃ na jahatīti? Āmantā. Paccuppannaṃ atthi paccuppannaṃ paccuppannabhāvaṃ na jahatīti? Na hevaṃ vattabbe…pe….
ಅತೀತಂ ಅತ್ಥಿ ಅತೀತಂ ಅತೀತಭಾವಂ ನ ಜಹತೀತಿ? ಆಮನ್ತಾ। ಅತೀತಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰… ನನು ಅತೀತಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ। ಹಞ್ಚಿ ಅತೀತಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ಅತ್ಥಿ ಅತೀತಂ ಅತೀತಭಾವಂ ನ ಜಹತೀ’’ತಿ।
Atītaṃ atthi atītaṃ atītabhāvaṃ na jahatīti? Āmantā. Atītaṃ niccaṃ dhuvaṃ sassataṃ avipariṇāmadhammanti? Na hevaṃ vattabbe…pe… nanu atītaṃ aniccaṃ adhuvaṃ asassataṃ vipariṇāmadhammanti? Āmantā. Hañci atītaṃ aniccaṃ adhuvaṃ asassataṃ vipariṇāmadhammaṃ, no ca vata re vattabbe – ‘‘atītaṃ atthi atītaṃ atītabhāvaṃ na jahatī’’ti.
ನಿಬ್ಬಾನಂ ಅತ್ಥಿ ನಿಬ್ಬಾನಂ ನಿಬ್ಬಾನಭಾವಂ ನ ಜಹತೀತಿ ನಿಬ್ಬಾನಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ ? ಆಮನ್ತಾ। ಅತೀತಂ ಅತ್ಥಿ ಅತೀತಂ ಅತೀತಭಾವಂ ನ ಜಹತೀತಿ ಅತೀತಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Nibbānaṃ atthi nibbānaṃ nibbānabhāvaṃ na jahatīti nibbānaṃ niccaṃ dhuvaṃ sassataṃ avipariṇāmadhammanti ? Āmantā. Atītaṃ atthi atītaṃ atītabhāvaṃ na jahatīti atītaṃ niccaṃ dhuvaṃ sassataṃ avipariṇāmadhammanti? Na hevaṃ vattabbe…pe….
ಅತೀತಂ ಅತ್ಥಿ ಅತೀತಂ ಅತೀತಭಾವಂ ನ ಜಹತಿ ಅತೀತಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ। ನಿಬ್ಬಾನಂ ಅತ್ಥಿ ನಿಬ್ಬಾನಂ ನಿಬ್ಬಾನಭಾವಂ ನ ಜಹತಿ ನಿಬ್ಬಾನಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Atītaṃ atthi atītaṃ atītabhāvaṃ na jahati atītaṃ aniccaṃ adhuvaṃ asassataṃ vipariṇāmadhammanti? Āmantā. Nibbānaṃ atthi nibbānaṃ nibbānabhāvaṃ na jahati nibbānaṃ aniccaṃ adhuvaṃ asassataṃ vipariṇāmadhammanti? Na hevaṃ vattabbe…pe….
೨೮೭. ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ನ ಜಹತೀತಿ? ಆಮನ್ತಾ। ಅನಾಗತಂ ರೂಪಂ ಅತ್ಥಿ ಅನಾಗತಂ ರೂಪಂ ಅನಾಗತಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ನ ಜಹತೀತಿ? ಆಮನ್ತಾ। ಪಚ್ಚುಪ್ಪನ್ನಂ ರೂಪಂ ಅತ್ಥಿ ಪಚ್ಚುಪ್ಪನ್ನಂ ರೂಪಂ ಪಚ್ಚುಪ್ಪನ್ನಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰…।
287. Atītaṃ rūpaṃ atthi atītaṃ rūpaṃ atītabhāvaṃ na jahatīti? Āmantā. Anāgataṃ rūpaṃ atthi anāgataṃ rūpaṃ anāgatabhāvaṃ na jahatīti? Na hevaṃ vattabbe…pe… atītaṃ rūpaṃ atthi atītaṃ rūpaṃ atītabhāvaṃ na jahatīti? Āmantā. Paccuppannaṃ rūpaṃ atthi paccuppannaṃ rūpaṃ paccuppannabhāvaṃ na jahatīti? Na hevaṃ vattabbe…pe….
ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ನ ಜಹತೀತಿ? ಆಮನ್ತಾ। ಅತೀತಂ ರೂಪಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰… ನನು ಅತೀತಂ ರೂಪಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ। ಹಞ್ಚಿ ಅತೀತಂ ರೂಪಂ ಅನಿಚ್ಚಂ…ಪೇ॰… ವಿಪರಿಣಾಮಧಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ನ ಜಹತೀ’’ತಿ।
Atītaṃ rūpaṃ atthi atītaṃ rūpaṃ atītabhāvaṃ na jahatīti? Āmantā. Atītaṃ rūpaṃ niccaṃ dhuvaṃ sassataṃ avipariṇāmadhammanti? Na hevaṃ vattabbe…pe… nanu atītaṃ rūpaṃ aniccaṃ adhuvaṃ asassataṃ vipariṇāmadhammanti? Āmantā. Hañci atītaṃ rūpaṃ aniccaṃ…pe… vipariṇāmadhammaṃ, no ca vata re vattabbe – ‘‘atītaṃ rūpaṃ atthi atītaṃ rūpaṃ atītabhāvaṃ na jahatī’’ti.
ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ನ ಜಹತಿ ಅತೀತಂ ರೂಪಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ। ನಿಬ್ಬಾನಂ ಅತ್ಥಿ ನಿಬ್ಬಾನಂ ನಿಬ್ಬಾನಭಾವಂ ನ ಜಹತಿ ನಿಬ್ಬಾನಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Atītaṃ rūpaṃ atthi atītaṃ rūpaṃ atītabhāvaṃ na jahati atītaṃ rūpaṃ aniccaṃ adhuvaṃ asassataṃ vipariṇāmadhammanti? Āmantā. Nibbānaṃ atthi nibbānaṃ nibbānabhāvaṃ na jahati nibbānaṃ aniccaṃ adhuvaṃ asassataṃ vipariṇāmadhammanti? Na hevaṃ vattabbe…pe….
ಅತೀತಾ ವೇದನಾ ಅತ್ಥಿ… ಅತೀತಾ ಸಞ್ಞಾ ಅತ್ಥಿ… ಅತೀತಾ ಸಙ್ಖಾರಾ ಅತ್ಥಿ… ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ನ ಜಹತೀತಿ? ಆಮನ್ತಾ। ಅನಾಗತಂ ವಿಞ್ಞಾಣಂ ಅತ್ಥಿ ಅನಾಗತಂ ವಿಞ್ಞಾಣಂ ಅನಾಗತಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ನ ಜಹತೀತಿ? ಆಮನ್ತಾ। ಪಚ್ಚುಪ್ಪನ್ನಂ ವಿಞ್ಞಾಣಂ ಅತ್ಥಿ ಪಚ್ಚುಪ್ಪನ್ನಂ ವಿಞ್ಞಾಣಂ ಪಚ್ಚುಪ್ಪನ್ನಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Atītā vedanā atthi… atītā saññā atthi… atītā saṅkhārā atthi… atītaṃ viññāṇaṃ atthi atītaṃ viññāṇaṃ atītabhāvaṃ na jahatīti? Āmantā. Anāgataṃ viññāṇaṃ atthi anāgataṃ viññāṇaṃ anāgatabhāvaṃ na jahatīti? Na hevaṃ vattabbe…pe… atītaṃ viññāṇaṃ atthi atītaṃ viññāṇaṃ atītabhāvaṃ na jahatīti? Āmantā. Paccuppannaṃ viññāṇaṃ atthi paccuppannaṃ viññāṇaṃ paccuppannabhāvaṃ na jahatīti? Na hevaṃ vattabbe…pe….
ಅನಾಗತಂ ವಿಞ್ಞಾಣಂ ಅತ್ಥಿ ಅನಾಗತಂ ವಿಞ್ಞಾಣಂ ಅನಾಗತಭಾವಂ ಜಹತೀತಿ? ಆಮನ್ತಾ। ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Anāgataṃ viññāṇaṃ atthi anāgataṃ viññāṇaṃ anāgatabhāvaṃ jahatīti? Āmantā. Atītaṃ viññāṇaṃ atthi atītaṃ viññāṇaṃ atītabhāvaṃ jahatīti? Na hevaṃ vattabbe…pe….
ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ನ ಜಹತೀತಿ? ಆಮನ್ತಾ। ಅತೀತಂ ವಿಞ್ಞಾಣಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰… ನನು ಅತೀತಂ ವಿಞ್ಞಾಣಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ। ಹಞ್ಚಿ ಅತೀತಂ ವಿಞ್ಞಾಣಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ನ ಜಹತೀ’’ತಿ।
Atītaṃ viññāṇaṃ atthi atītaṃ viññāṇaṃ atītabhāvaṃ na jahatīti? Āmantā. Atītaṃ viññāṇaṃ niccaṃ dhuvaṃ sassataṃ avipariṇāmadhammanti? Na hevaṃ vattabbe…pe… nanu atītaṃ viññāṇaṃ aniccaṃ adhuvaṃ asassataṃ vipariṇāmadhammanti? Āmantā. Hañci atītaṃ viññāṇaṃ aniccaṃ adhuvaṃ asassataṃ vipariṇāmadhammaṃ, no ca vata re vattabbe – ‘‘atītaṃ viññāṇaṃ atthi atītaṃ viññāṇaṃ atītabhāvaṃ na jahatī’’ti.
ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ನ ಜಹತಿ ಅತೀತಂ ವಿಞ್ಞಾಣಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ। ನಿಬ್ಬಾನಂ ಅತ್ಥಿ ನಿಬ್ಬಾನಂ ನಿಬ್ಬಾನಭಾವಂ ನ ಜಹತಿ ನಿಬ್ಬಾನಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Atītaṃ viññāṇaṃ atthi atītaṃ viññāṇaṃ atītabhāvaṃ na jahati atītaṃ viññāṇaṃ aniccaṃ adhuvaṃ asassataṃ vipariṇāmadhammanti? Āmantā. Nibbānaṃ atthi nibbānaṃ nibbānabhāvaṃ na jahati nibbānaṃ aniccaṃ adhuvaṃ asassataṃ vipariṇāmadhammanti? Na hevaṃ vattabbe…pe….
ವಚನಸೋಧನಾ
Vacanasodhanā
೨೮೮. ಅತೀತಂ ನ್ವತ್ಥೀತಿ? ಆಮನ್ತಾ। ಹಞ್ಚಿ ಅತೀತಂ ನ್ವತ್ಥಿ, ಅತೀತಂ ಅತ್ಥೀತಿ ಮಿಚ್ಛಾ। ಹಞ್ಚಿ ವಾ ಪನ ಅತ್ಥಿ ನ್ವಾತೀತಂ, ಅತ್ಥಿ ಅತೀತನ್ತಿ ಮಿಚ್ಛಾ। ಅನಾಗತಂ ನ್ವತ್ಥೀತಿ? ಆಮನ್ತಾ। ಹಞ್ಚಿ ಅನಾಗತಂ ನ್ವತ್ಥಿ, ಅನಾಗತಂ ಅತ್ಥೀತಿ ಮಿಚ್ಛಾ। ಹಞ್ಚಿ ವಾ ಪನ ಅತ್ಥಿ ನ್ವಾನಾಗತಂ, ಅತ್ಥಿ ಅನಾಗತನ್ತಿ ಮಿಚ್ಛಾ।
288. Atītaṃ nvatthīti? Āmantā. Hañci atītaṃ nvatthi, atītaṃ atthīti micchā. Hañci vā pana atthi nvātītaṃ, atthi atītanti micchā. Anāgataṃ nvatthīti? Āmantā. Hañci anāgataṃ nvatthi, anāgataṃ atthīti micchā. Hañci vā pana atthi nvānāgataṃ, atthi anāgatanti micchā.
ಅನಾಗತಂ ಹುತ್ವಾ ಪಚ್ಚುಪ್ಪನ್ನಂ ಹೋತೀತಿ? ಆಮನ್ತಾ। ತಞ್ಞೇವ ಅನಾಗತಂ ತಂ ಪಚ್ಚುಪ್ಪನ್ನನ್ತಿ? ನ ಹೇವಂ ವತ್ತಬ್ಬೇ…ಪೇ॰… ತಞ್ಞೇವ ಅನಾಗತಂ ತಂ ಪಚ್ಚುಪ್ಪನ್ನನ್ತಿ? ಆಮನ್ತಾ। ಹುತ್ವಾ ಹೋತಿ ಹುತ್ವಾ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ॰… ಹುತ್ವಾ ಹೋತಿ ಹುತ್ವಾ ಹೋತೀತಿ? ಆಮನ್ತಾ। ನ ಹುತ್ವಾ ನ ಹೋತಿ ನ ಹುತ್ವಾ ನ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Anāgataṃ hutvā paccuppannaṃ hotīti? Āmantā. Taññeva anāgataṃ taṃ paccuppannanti? Na hevaṃ vattabbe…pe… taññeva anāgataṃ taṃ paccuppannanti? Āmantā. Hutvā hoti hutvā hotīti? Na hevaṃ vattabbe…pe… hutvā hoti hutvā hotīti? Āmantā. Na hutvā na hoti na hutvā na hotīti? Na hevaṃ vattabbe…pe….
ಪಚ್ಚುಪ್ಪನ್ನಂ ಹುತ್ವಾ ಅತೀತಂ ಹೋತೀತಿ? ಆಮನ್ತಾ। ತಞ್ಞೇವ ಪಚ್ಚುಪ್ಪನ್ನಂ ತಂ ಅತೀತನ್ತಿ? ನ ಹೇವಂ ವತ್ತಬ್ಬೇ…ಪೇ॰… ತಞ್ಞೇವ ಪಚ್ಚುಪ್ಪನ್ನಂ ತಂ ಅತೀತನ್ತಿ? ಆಮನ್ತಾ । ಹುತ್ವಾ ಹೋತಿ ಹುತ್ವಾ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ॰… ಹುತ್ವಾ ಹೋತಿ ಹುತ್ವಾ ಹೋತೀತಿ? ಆಮನ್ತಾ। ನ ಹುತ್ವಾ ನ ಹೋತಿ ನ ಹುತ್ವಾ ನ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Paccuppannaṃ hutvā atītaṃ hotīti? Āmantā. Taññeva paccuppannaṃ taṃ atītanti? Na hevaṃ vattabbe…pe… taññeva paccuppannaṃ taṃ atītanti? Āmantā . Hutvā hoti hutvā hotīti? Na hevaṃ vattabbe…pe… hutvā hoti hutvā hotīti? Āmantā. Na hutvā na hoti na hutvā na hotīti? Na hevaṃ vattabbe…pe….
ಅನಾಗತಂ ಹುತ್ವಾ ಪಚ್ಚುಪ್ಪನ್ನಂ ಹೋತಿ, ಪಚ್ಚುಪ್ಪನ್ನಂ ಹುತ್ವಾ ಅತೀತಂ ಹೋತೀತಿ? ಆಮನ್ತಾ। ತಞ್ಞೇವ ಅನಾಗತಂ ತಂ ಪಚ್ಚುಪ್ಪನ್ನಂ ತಂ ಅತೀತನ್ತಿ? ನ ಹೇವಂ ವತ್ತಬ್ಬೇ…ಪೇ॰… ತಞ್ಞೇವ ಅನಾಗತಂ ತಂ ಪಚ್ಚುಪ್ಪನ್ನಂ ತಂ ಅತೀತನ್ತಿ? ಆಮನ್ತಾ। ಹುತ್ವಾ ಹೋತಿ ಹುತ್ವಾ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ॰… ಹುತ್ವಾ ಹೋತಿ ಹುತ್ವಾ ಹೋತೀತಿ? ಆಮನ್ತಾ। ನ ಹುತ್ವಾ ನ ಹೋತಿ ನ ಹುತ್ವಾ ನ ಹೋತೀತಿ? ನ ಹೇವಂ ವತ್ತಬ್ಬೇ।
Anāgataṃ hutvā paccuppannaṃ hoti, paccuppannaṃ hutvā atītaṃ hotīti? Āmantā. Taññeva anāgataṃ taṃ paccuppannaṃ taṃ atītanti? Na hevaṃ vattabbe…pe… taññeva anāgataṃ taṃ paccuppannaṃ taṃ atītanti? Āmantā. Hutvā hoti hutvā hotīti? Na hevaṃ vattabbe…pe… hutvā hoti hutvā hotīti? Āmantā. Na hutvā na hoti na hutvā na hotīti? Na hevaṃ vattabbe.
ಅತೀತಚಕ್ಖುರೂಪಾದಿಕಥಾ
Atītacakkhurūpādikathā
೨೮೯. ಅತೀತಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ। ಅತೀತೇನ ಚಕ್ಖುನಾ ಅತೀತಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತಂ ಸೋತಂ ಅತ್ಥಿ ಸದ್ದಾ ಅತ್ಥಿ ಸೋತವಿಞ್ಞಾಣಂ ಅತ್ಥಿ ಆಕಾಸೋ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ। ಅತೀತೇನ ಸೋತೇನ ಅತೀತಂ ಸದ್ದಂ ಸುಣಾತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತಂ ಘಾನಂ ಅತ್ಥಿ ಗನ್ಧಾ ಅತ್ಥಿ ಘಾನವಿಞ್ಞಾಣಂ ಅತ್ಥಿ ವಾಯೋ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ। ಅತೀತೇನ ಘಾನೇನ ಅತೀತಂ ಗನ್ಧಂ ಘಾಯತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತಾ ಜಿವ್ಹಾ ಅತ್ಥಿ ರಸಾ ಅತ್ಥಿ ಜಿವ್ಹಾವಿಞ್ಞಾಣಂ ಅತ್ಥಿ ಆಪೋ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ । ಅತೀತಾಯ ಜಿವ್ಹಾಯ ಅತೀತಂ ರಸಂ ಸಾಯತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತೋ ಕಾಯೋ ಅತ್ಥಿ ಫೋಟ್ಠಬ್ಬಾ ಅತ್ಥಿ ಕಾಯವಿಞ್ಞಾಣಂ ಅತ್ಥಿ ಪಥವೀ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ। ಅತೀತೇನ ಕಾಯೇನ ಅತೀತಂ ಫೋಟ್ಠಬ್ಬಂ ಫುಸತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತೋ ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ। ಅತೀತೇನ ಮನೇನ ಅತೀತಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ॰…।
289. Atītaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthīti? Āmantā. Atītena cakkhunā atītaṃ rūpaṃ passatīti? Na hevaṃ vattabbe…pe… atītaṃ sotaṃ atthi saddā atthi sotaviññāṇaṃ atthi ākāso atthi manasikāro atthīti? Āmantā. Atītena sotena atītaṃ saddaṃ suṇātīti? Na hevaṃ vattabbe…pe… atītaṃ ghānaṃ atthi gandhā atthi ghānaviññāṇaṃ atthi vāyo atthi manasikāro atthīti? Āmantā. Atītena ghānena atītaṃ gandhaṃ ghāyatīti? Na hevaṃ vattabbe…pe… atītā jivhā atthi rasā atthi jivhāviññāṇaṃ atthi āpo atthi manasikāro atthīti? Āmantā . Atītāya jivhāya atītaṃ rasaṃ sāyatīti? Na hevaṃ vattabbe…pe… atīto kāyo atthi phoṭṭhabbā atthi kāyaviññāṇaṃ atthi pathavī atthi manasikāro atthīti? Āmantā. Atītena kāyena atītaṃ phoṭṭhabbaṃ phusatīti? Na hevaṃ vattabbe…pe… atīto mano atthi dhammā atthi manoviññāṇaṃ atthi vatthuṃ atthi manasikāro atthīti? Āmantā. Atītena manena atītaṃ dhammaṃ vijānātīti? Na hevaṃ vattabbe…pe….
ಅನಾಗತಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ। ಅನಾಗತೇನ ಚಕ್ಖುನಾ ಅನಾಗತಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅನಾಗತಂ ಸೋತಂ ಅತ್ಥಿ… ಘಾನಂ ಅತ್ಥಿ… ಜಿವ್ಹಾ ಅತ್ಥಿ… ಕಾಯೋ ಅತ್ಥಿ … ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ। ಅನಾಗತೇನ ಮನೇನ ಅನಾಗತಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Anāgataṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthīti? Āmantā. Anāgatena cakkhunā anāgataṃ rūpaṃ passatīti? Na hevaṃ vattabbe…pe… anāgataṃ sotaṃ atthi… ghānaṃ atthi… jivhā atthi… kāyo atthi … mano atthi dhammā atthi manoviññāṇaṃ atthi vatthuṃ atthi manasikāro atthīti? Āmantā. Anāgatena manena anāgataṃ dhammaṃ vijānātīti? Na hevaṃ vattabbe…pe….
ಪಚ್ಚುಪ್ಪನ್ನಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ಪಚ್ಚುಪ್ಪನ್ನೇನ ಚಕ್ಖುನಾ ಪಚ್ಚುಪ್ಪನ್ನಂ ರೂಪಂ ಪಸ್ಸತೀತಿ? ಆಮನ್ತಾ। ಅತೀತಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ಅತೀತೇನ ಚಕ್ಖುನಾ ಅತೀತಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ॰…। ಪಚ್ಚುಪ್ಪನ್ನಂ ಸೋತಂ ಅತ್ಥಿ… ಘಾನಂ ಅತ್ಥಿ… ಜಿವ್ಹಾ ಅತ್ಥಿ… ಕಾಯೋ ಅತ್ಥಿ… ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ಪಚ್ಚುಪ್ಪನ್ನೇನ ಮನೇನ ಪಚ್ಚುಪ್ಪನ್ನಂ ಧಮ್ಮಂ ವಿಜಾನಾತೀತಿ? ಆಮನ್ತಾ। ಅತೀತೋ ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ಅತೀತೇನ ಮನೇನ ಅತೀತಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Paccuppannaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, paccuppannena cakkhunā paccuppannaṃ rūpaṃ passatīti? Āmantā. Atītaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, atītena cakkhunā atītaṃ rūpaṃ passatīti? Na hevaṃ vattabbe…pe…. Paccuppannaṃ sotaṃ atthi… ghānaṃ atthi… jivhā atthi… kāyo atthi… mano atthi dhammā atthi manoviññāṇaṃ atthi vatthuṃ atthi manasikāro atthi, paccuppannena manena paccuppannaṃ dhammaṃ vijānātīti? Āmantā. Atīto mano atthi dhammā atthi manoviññāṇaṃ atthi vatthuṃ atthi manasikāro atthi, atītena manena atītaṃ dhammaṃ vijānātīti? Na hevaṃ vattabbe…pe….
ಪಚ್ಚುಪ್ಪನ್ನಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ಪಚ್ಚುಪ್ಪನ್ನೇನ ಚಕ್ಖುನಾ ಪಚ್ಚುಪ್ಪನ್ನಂ ರೂಪಂ ಪಸ್ಸತೀತಿ? ಆಮನ್ತಾ। ಅನಾಗತಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ಅನಾಗತೇನ ಚಕ್ಖುನಾ ಅನಾಗತಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ॰… ಪಚ್ಚುಪ್ಪನ್ನಂ ಸೋತಂ ಅತ್ಥಿ… ಘಾನಂ ಅತ್ಥಿ… ಜಿವ್ಹಾ ಅತ್ಥಿ… ಕಾಯೋ ಅತ್ಥಿ… ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ಪಚ್ಚುಪ್ಪನ್ನೇನ ಮನೇನ ಪಚ್ಚುಪ್ಪನ್ನಂ ಧಮ್ಮಂ ವಿಜಾನಾತೀತಿ? ಆಮನ್ತಾ। ಅನಾಗತೋ ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ಅನಾಗತೇನ ಮನೇನ ಅನಾಗತಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Paccuppannaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, paccuppannena cakkhunā paccuppannaṃ rūpaṃ passatīti? Āmantā. Anāgataṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, anāgatena cakkhunā anāgataṃ rūpaṃ passatīti? Na hevaṃ vattabbe…pe… paccuppannaṃ sotaṃ atthi… ghānaṃ atthi… jivhā atthi… kāyo atthi… mano atthi dhammā atthi manoviññāṇaṃ atthi vatthuṃ atthi manasikāro atthi, paccuppannena manena paccuppannaṃ dhammaṃ vijānātīti? Āmantā. Anāgato mano atthi dhammā atthi manoviññāṇaṃ atthi vatthuṃ atthi manasikāro atthi, anāgatena manena anāgataṃ dhammaṃ vijānātīti? Na hevaṃ vattabbe…pe….
ಅತೀತಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಅತೀತೇನ ಚಕ್ಖುನಾ ಅತೀತಂ ರೂಪಂ ಪಸ್ಸತೀತಿ? ಆಮನ್ತಾ। ಪಚ್ಚುಪ್ಪನ್ನಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಪಚ್ಚುಪ್ಪನ್ನೇನ ಚಕ್ಖುನಾ ಪಚ್ಚುಪ್ಪನ್ನಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತಂ ಸೋತಂ ಅತ್ಥಿ… ಘಾನಂ ಅತ್ಥಿ… ಜಿವ್ಹಾ ಅತ್ಥಿ… ಕಾಯೋ ಅತ್ಥಿ… ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಅತೀತೇನ ಮನೇನ ಅತೀತಂ ಧಮ್ಮಂ ವಿಜಾನಾತೀತಿ? ಆಮನ್ತಾ। ಪಚ್ಚುಪ್ಪನ್ನೋ ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಪಚ್ಚುಪ್ಪನ್ನೇನ ಮನೇನ ಪಚ್ಚುಪ್ಪನ್ನಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Atītaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, na ca atītena cakkhunā atītaṃ rūpaṃ passatīti? Āmantā. Paccuppannaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, na ca paccuppannena cakkhunā paccuppannaṃ rūpaṃ passatīti? Na hevaṃ vattabbe…pe… atītaṃ sotaṃ atthi… ghānaṃ atthi… jivhā atthi… kāyo atthi… mano atthi dhammā atthi manoviññāṇaṃ atthi vatthuṃ atthi manasikāro atthi, na ca atītena manena atītaṃ dhammaṃ vijānātīti? Āmantā. Paccuppanno mano atthi dhammā atthi manoviññāṇaṃ atthi vatthuṃ atthi manasikāro atthi, na ca paccuppannena manena paccuppannaṃ dhammaṃ vijānātīti? Na hevaṃ vattabbe…pe….
ಅನಾಗತಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಅನಾಗತೇನ ಚಕ್ಖುನಾ ಅನಾಗತಂ ರೂಪಂ ಪಸ್ಸತೀತಿ? ಆಮನ್ತಾ। ಪಚ್ಚುಪ್ಪನ್ನಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಪಚ್ಚುಪ್ಪನ್ನೇನ ಚಕ್ಖುನಾ ಪಚ್ಚುಪ್ಪನ್ನಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅನಾಗತಂ ಸೋತಂ ಅತ್ಥಿ… ಘಾನಂ ಅತ್ಥಿ… ಜಿವ್ಹಾ ಅತ್ಥಿ… ಕಾಯೋ ಅತ್ಥಿ… ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಅನಾಗತೇನ ಮನೇನ ಅನಾಗತಂ ಧಮ್ಮಂ ವಿಜಾನಾತೀತಿ ? ಆಮನ್ತಾ। ಪಚ್ಚುಪ್ಪನ್ನೋ ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಪಚ್ಚುಪ್ಪನ್ನೇನ ಮನೇನ ಪಚ್ಚುಪ್ಪನ್ನಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Anāgataṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, na ca anāgatena cakkhunā anāgataṃ rūpaṃ passatīti? Āmantā. Paccuppannaṃ cakkhuṃ atthi rūpā atthi cakkhuviññāṇaṃ atthi āloko atthi manasikāro atthi, na ca paccuppannena cakkhunā paccuppannaṃ rūpaṃ passatīti? Na hevaṃ vattabbe…pe… anāgataṃ sotaṃ atthi… ghānaṃ atthi… jivhā atthi… kāyo atthi… mano atthi dhammā atthi manoviññāṇaṃ atthi vatthuṃ atthi manasikāro atthi, na ca anāgatena manena anāgataṃ dhammaṃ vijānātīti ? Āmantā. Paccuppanno mano atthi dhammā atthi manoviññāṇaṃ atthi vatthuṃ atthi manasikāro atthi, na ca paccuppannena manena paccuppannaṃ dhammaṃ vijānātīti? Na hevaṃ vattabbe…pe….
ಅತೀತಞಾಣಾದಿಕಥಾ
Atītañāṇādikathā
೨೯೦. ಅತೀತಂ ಞಾಣಂ ಅತ್ಥೀತಿ? ಆಮನ್ತಾ। ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ॰… ತೇನ ಞಾಣೇನ ಞಾಣಕರಣೀಯಂ ಕರೋತೀತಿ ? ಆಮನ್ತಾ। ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ॰…।
290. Atītaṃ ñāṇaṃ atthīti? Āmantā. Tena ñāṇena ñāṇakaraṇīyaṃ karotīti? Na hevaṃ vattabbe…pe… tena ñāṇena ñāṇakaraṇīyaṃ karotīti ? Āmantā. Tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
ಅನಾಗತಂ ಞಾಣಂ ಅತ್ಥೀತಿ? ಆಮನ್ತಾ। ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ॰… ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ಆಮನ್ತಾ। ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ , ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Anāgataṃ ñāṇaṃ atthīti? Āmantā. Tena ñāṇena ñāṇakaraṇīyaṃ karotīti? Na hevaṃ vattabbe…pe… tena ñāṇena ñāṇakaraṇīyaṃ karotīti? Āmantā. Tena ñāṇena dukkhaṃ parijānāti, samudayaṃ pajahati, nirodhaṃ sacchikaroti , maggaṃ bhāvetīti? Na hevaṃ vattabbe…pe….
ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ಆಮನ್ತಾ। ಅತೀತಂ ಞಾಣಂ ಅತ್ಥಿ, ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ॰… ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ಆಮನ್ತಾ। ಅತೀತಂ ಞಾಣಂ ಅತ್ಥಿ, ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ॰… ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ಆಮನ್ತಾ। ಅನಾಗತಂ ಞಾಣಂ ಅತ್ಥಿ, ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ॰… ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ಆಮನ್ತಾ । ಅನಾಗತಂ ಞಾಣಂ ಅತ್ಥಿ, ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Paccuppannaṃ ñāṇaṃ atthi, tena ñāṇena ñāṇakaraṇīyaṃ karotīti? Āmantā. Atītaṃ ñāṇaṃ atthi, tena ñāṇena ñāṇakaraṇīyaṃ karotīti? Na hevaṃ vattabbe…pe… paccuppannaṃ ñāṇaṃ atthi, tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Āmantā. Atītaṃ ñāṇaṃ atthi, tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe… paccuppannaṃ ñāṇaṃ atthi, tena ñāṇena ñāṇakaraṇīyaṃ karotīti? Āmantā. Anāgataṃ ñāṇaṃ atthi, tena ñāṇena ñāṇakaraṇīyaṃ karotīti? Na hevaṃ vattabbe…pe… paccuppannaṃ ñāṇaṃ atthi, tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Āmantā . Anāgataṃ ñāṇaṃ atthi, tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
ಅತೀತಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ಆಮನ್ತಾ। ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ಆಮನ್ತಾ। ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Atītaṃ ñāṇaṃ atthi, na ca tena ñāṇena ñāṇakaraṇīyaṃ karotīti? Āmantā. Paccuppannaṃ ñāṇaṃ atthi, na ca tena ñāṇena ñāṇakaraṇīyaṃ karotīti? Na hevaṃ vattabbe…pe… atītaṃ ñāṇaṃ atthi, na ca tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Āmantā. Paccuppannaṃ ñāṇaṃ atthi, na ca tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
ಅನಾಗತಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ಆಮನ್ತಾ। ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ॰…। ಅನಾಗತಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ , ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ಆಮನ್ತಾ । ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Anāgataṃ ñāṇaṃ atthi, na ca tena ñāṇena ñāṇakaraṇīyaṃ karotīti? Āmantā. Paccuppannaṃ ñāṇaṃ atthi, na ca tena ñāṇena ñāṇakaraṇīyaṃ karotīti? Na hevaṃ vattabbe…pe…. Anāgataṃ ñāṇaṃ atthi, na ca tena ñāṇena dukkhaṃ parijānāti, samudayaṃ pajahati , nirodhaṃ sacchikaroti, maggaṃ bhāvetīti? Āmantā . Paccuppannaṃ ñāṇaṃ atthi, na ca tena ñāṇena dukkhaṃ parijānāti, samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
ಅರಹನ್ತಾದಿಕಥಾ
Arahantādikathā
೨೯೧. ಅರಹತೋ ಅತೀತೋ ರಾಗೋ ಅತ್ಥೀತಿ? ಆಮನ್ತಾ। ಅರಹಾ ತೇನ ರಾಗೇನ ಸರಾಗೋತಿ? ನ ಹೇವಂ ವತ್ತಬ್ಬೇ…ಪೇ॰… ಅರಹತೋ ಅತೀತೋ ದೋಸೋ ಅತ್ಥೀತಿ? ಆಮನ್ತಾ । ಅರಹಾ ತೇನ ದೋಸೇನ ಸದೋಸೋತಿ? ನ ಹೇವಂ ವತ್ತಬ್ಬೇ…ಪೇ॰… ಅರಹತೋ ಅತೀತೋ ಮೋಹೋ ಅತ್ಥೀತಿ? ಆಮನ್ತಾ। ಅರಹಾ ತೇನ ಮೋಹೇನ ಸಮೋಹೋತಿ? ನ ಹೇವಂ ವತ್ತಬ್ಬೇ…ಪೇ॰… ಅರಹತೋ ಅತೀತೋ ಮಾನೋ ಅತ್ಥೀತಿ? ಆಮನ್ತಾ। ಅರಹಾ ತೇನ ಮಾನೇನ ಸಮಾನೋತಿ? ನ ಹೇವಂ ವತ್ತಬ್ಬೇ…ಪೇ॰… ಅರಹತೋ ಅತೀತಾ ದಿಟ್ಠಿ ಅತ್ಥೀತಿ? ಆಮನ್ತಾ। ಅರಹಾ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ॰… ಅರಹತೋ ಅತೀತಾ ವಿಚಿಕಿಚ್ಛಾ ಅತ್ಥೀತಿ? ಆಮನ್ತಾ। ಅರಹಾ ತಾಯ ವಿಚಿಕಿಚ್ಛಾಯ ಸವಿಚಿಕಿಚ್ಛೋತಿ? ನ ಹೇವಂ ವತ್ತಬ್ಬೇ…ಪೇ॰… ಅರಹತೋ ಅತೀತಂ ಥಿನಂ ಅತ್ಥೀತಿ? ಆಮನ್ತಾ। ಅರಹಾ ತೇನ ಥಿನೇನ ಸಥಿನೋತಿ? ನ ಹೇವಂ ವತ್ತಬ್ಬೇ…ಪೇ॰… ಅರಹತೋ ಅತೀತಂ ಉದ್ಧಚ್ಚಂ ಅತ್ಥೀತಿ? ಆಮನ್ತಾ। ಅರಹಾ ತೇನ ಉದ್ಧಚ್ಚೇನ ಸಉದ್ಧಚ್ಚೋತಿ? ನ ಹೇವಂ ವತ್ತಬ್ಬೇ…ಪೇ॰… ಅರಹತೋ ಅತೀತಂ ಅಹಿರಿಕಂ ಅತ್ಥೀತಿ? ಆಮನ್ತಾ। ಅರಹಾ ತೇನ ಅಹಿರಿಕೇನ ಸಅಹಿರಿಕೋತಿ? ನ ಹೇವಂ ವತ್ತಬ್ಬೇ…ಪೇ॰… ಅರಹತೋ ಅತೀತಂ ಅನೋತ್ತಪ್ಪಂ ಅತ್ಥೀತಿ? ಆಮನ್ತಾ। ಅರಹಾ ತೇನ ಅನೋತ್ತಪ್ಪೇನ ಸಅನೋತ್ತಪ್ಪೀತಿ? ನ ಹೇವಂ ವತ್ತಬ್ಬೇ…ಪೇ॰…।
291. Arahato atīto rāgo atthīti? Āmantā. Arahā tena rāgena sarāgoti? Na hevaṃ vattabbe…pe… arahato atīto doso atthīti? Āmantā . Arahā tena dosena sadosoti? Na hevaṃ vattabbe…pe… arahato atīto moho atthīti? Āmantā. Arahā tena mohena samohoti? Na hevaṃ vattabbe…pe… arahato atīto māno atthīti? Āmantā. Arahā tena mānena samānoti? Na hevaṃ vattabbe…pe… arahato atītā diṭṭhi atthīti? Āmantā. Arahā tāya diṭṭhiyā sadiṭṭhikoti? Na hevaṃ vattabbe…pe… arahato atītā vicikicchā atthīti? Āmantā. Arahā tāya vicikicchāya savicikicchoti? Na hevaṃ vattabbe…pe… arahato atītaṃ thinaṃ atthīti? Āmantā. Arahā tena thinena sathinoti? Na hevaṃ vattabbe…pe… arahato atītaṃ uddhaccaṃ atthīti? Āmantā. Arahā tena uddhaccena sauddhaccoti? Na hevaṃ vattabbe…pe… arahato atītaṃ ahirikaṃ atthīti? Āmantā. Arahā tena ahirikena saahirikoti? Na hevaṃ vattabbe…pe… arahato atītaṃ anottappaṃ atthīti? Āmantā. Arahā tena anottappena saanottappīti? Na hevaṃ vattabbe…pe….
ಅನಾಗಾಮಿಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥೀತಿ? ಆಮನ್ತಾ । ಅನಾಗಾಮೀ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ॰… ಅನಾಗಾಮಿಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ… ಅತೀತೋ ಸೀಲಬ್ಬತಪರಾಮಾಸೋ ಅತ್ಥಿ… ಅತೀತೋ ಅಣುಸಹಗತೋ ಕಾಮರಾಗೋ ಅತ್ಥಿ… ಅತೀತೋ ಅಣುಸಹಗತೋ ಬ್ಯಾಪಾದೋ ಅತ್ಥೀತಿ? ಆಮನ್ತಾ। ಅನಾಗಾಮೀ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ॰…।
Anāgāmissa atītā sakkāyadiṭṭhi atthīti? Āmantā . Anāgāmī tāya diṭṭhiyā sadiṭṭhikoti? Na hevaṃ vattabbe…pe… anāgāmissa atītā vicikicchā atthi… atīto sīlabbataparāmāso atthi… atīto aṇusahagato kāmarāgo atthi… atīto aṇusahagato byāpādo atthīti? Āmantā. Anāgāmī tena byāpādena byāpannacittoti? Na hevaṃ vattabbe…pe….
ಸಕದಾಗಾಮಿಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥೀತಿ? ಆಮನ್ತಾ। ಸಕದಾಗಾಮೀ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ॰… ಸಕದಾಗಾಮಿಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ… ಅತೀತೋ ಸೀಲಬ್ಬತಪರಾಮಾಸೋ ಅತ್ಥಿ… ಅತೀತೋ ಓಳಾರಿಕೋ ಕಾಮರಾಗೋ ಅತ್ಥಿ… ಅತೀತೋ ಓಳಾರಿಕೋ ಬ್ಯಾಪಾದೋ ಅತ್ಥೀತಿ? ಆಮನ್ತಾ। ಸಕದಾಗಾಮೀ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ॰…।
Sakadāgāmissa atītā sakkāyadiṭṭhi atthīti? Āmantā. Sakadāgāmī tāya diṭṭhiyā sadiṭṭhikoti? Na hevaṃ vattabbe…pe… sakadāgāmissa atītā vicikicchā atthi… atīto sīlabbataparāmāso atthi… atīto oḷāriko kāmarāgo atthi… atīto oḷāriko byāpādo atthīti? Āmantā. Sakadāgāmī tena byāpādena byāpannacittoti? Na hevaṃ vattabbe…pe….
ಸೋತಾಪನ್ನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥೀತಿ? ಆಮನ್ತಾ। ಸೋತಾಪನ್ನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ॰… ಸೋತಾಪನ್ನಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ… ಅತೀತೋ ಸೀಲಬ್ಬತಪರಾಮಾಸೋ ಅತ್ಥಿ… ಅತೀತೋ ಅಪಾಯಗಮನೀಯೋ ರಾಗೋ ಅತ್ಥಿ… ಅತೀತೋ ಅಪಾಯಗಮನೀಯೋ ದೋಸೋ ಅತ್ಥಿ… ಅತೀತೋ ಅಪಾಯಗಮನೀಯೋ ಮೋಹೋ ಅತ್ಥೀತಿ? ಆಮನ್ತಾ। ಸೋತಾಪನ್ನೋ ತೇನ ಮೋಹೇನ ಸಮೋಹೋತಿ? ನ ಹೇವಂ ವತ್ತಬ್ಬೇ…ಪೇ॰…।
Sotāpannassa atītā sakkāyadiṭṭhi atthīti? Āmantā. Sotāpanno tāya diṭṭhiyā sadiṭṭhikoti? Na hevaṃ vattabbe…pe… sotāpannassa atītā vicikicchā atthi… atīto sīlabbataparāmāso atthi… atīto apāyagamanīyo rāgo atthi… atīto apāyagamanīyo doso atthi… atīto apāyagamanīyo moho atthīti? Āmantā. Sotāpanno tena mohena samohoti? Na hevaṃ vattabbe…pe….
೨೯೨. ಪುಥುಜ್ಜನಸ್ಸ ಅತೀತೋ ರಾಗೋ ಅತ್ಥಿ, ಪುಥುಜ್ಜನೋ ತೇನ ರಾಗೇನ ಸರಾಗೋತಿ? ಆಮನ್ತಾ। ಅರಹತೋ ಅತೀತೋ ರಾಗೋ ಅತ್ಥಿ, ಅರಹಾ ತೇನ ರಾಗೇನ ಸರಾಗೋತಿ? ನ ಹೇವಂ ವತ್ತಬ್ಬೇ…ಪೇ॰… ಪುಥುಜ್ಜನಸ್ಸ ಅತೀತೋ ದೋಸೋ ಅತ್ಥಿ…ಪೇ॰… ಅತೀತಂ ಅನೋತ್ತಪ್ಪಂ ಅತ್ಥಿ ಪುಥುಜ್ಜನೋ ತೇನ ಅನೋತ್ತಪ್ಪೇನ ಅನೋತ್ತಪ್ಪೀತಿ? ಆಮನ್ತಾ। ಅರಹತೋ ಅತೀತಂ ಅನೋತ್ತಪ್ಪಂ ಅತ್ಥಿ, ಅರಹಾ ತೇನ ಅನೋತ್ತಪ್ಪೇನ ಅನೋತ್ತಪ್ಪೀತಿ? ನ ಹೇವಂ ವತ್ತಬ್ಬೇ…ಪೇ॰…।
292. Puthujjanassa atīto rāgo atthi, puthujjano tena rāgena sarāgoti? Āmantā. Arahato atīto rāgo atthi, arahā tena rāgena sarāgoti? Na hevaṃ vattabbe…pe… puthujjanassa atīto doso atthi…pe… atītaṃ anottappaṃ atthi puthujjano tena anottappena anottappīti? Āmantā. Arahato atītaṃ anottappaṃ atthi, arahā tena anottappena anottappīti? Na hevaṃ vattabbe…pe….
ಪುಥುಜ್ಜನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ಪುಥುಜ್ಜನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ಆಮನ್ತಾ। ಅನಾಗಾಮಿಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ಅನಾಗಾಮೀ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ॰… ಪುಥುಜ್ಜನಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ…ಪೇ॰… ಅತೀತೋ ಅಣುಸಹಗತೋ ಬ್ಯಾಪಾದೋ ಅತ್ಥಿ, ಪುಥುಜ್ಜನೋ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ಆಮನ್ತಾ। ಅನಾಗಾಮಿಸ್ಸ ಅತೀತೋ ಅಣುಸಹಗತೋ ಬ್ಯಾಪಾದೋ ಅತ್ಥಿ, ಅನಾಗಾಮೀ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ॰…।
Puthujjanassa atītā sakkāyadiṭṭhi atthi, puthujjano tāya diṭṭhiyā sadiṭṭhikoti? Āmantā. Anāgāmissa atītā sakkāyadiṭṭhi atthi, anāgāmī tāya diṭṭhiyā sadiṭṭhikoti? Na hevaṃ vattabbe…pe… puthujjanassa atītā vicikicchā atthi…pe… atīto aṇusahagato byāpādo atthi, puthujjano tena byāpādena byāpannacittoti? Āmantā. Anāgāmissa atīto aṇusahagato byāpādo atthi, anāgāmī tena byāpādena byāpannacittoti? Na hevaṃ vattabbe…pe….
ಪುಥುಜ್ಜನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ಪುಥುಜ್ಜನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ಆಮನ್ತಾ। ಸಕದಾಗಾಮಿಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ಸಕದಾಗಾಮೀ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ॰… ಪುಥುಜ್ಜನಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ… ಅತೀತೋ ಓಳಾರಿಕೋ ಬ್ಯಾಪಾದೋ ಅತ್ಥಿ, ಪುಥುಜ್ಜನೋ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ ? ಆಮನ್ತಾ। ಸಕದಾಗಾಮಿಸ್ಸ ಅತೀತೋ ಓಳಾರಿಕೋ ಬ್ಯಾಪಾದೋ ಅತ್ಥಿ, ಸಕದಾಗಾಮೀ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ॰…।
Puthujjanassa atītā sakkāyadiṭṭhi atthi, puthujjano tāya diṭṭhiyā sadiṭṭhikoti? Āmantā. Sakadāgāmissa atītā sakkāyadiṭṭhi atthi, sakadāgāmī tāya diṭṭhiyā sadiṭṭhikoti? Na hevaṃ vattabbe…pe… puthujjanassa atītā vicikicchā atthi… atīto oḷāriko byāpādo atthi, puthujjano tena byāpādena byāpannacittoti ? Āmantā. Sakadāgāmissa atīto oḷāriko byāpādo atthi, sakadāgāmī tena byāpādena byāpannacittoti? Na hevaṃ vattabbe…pe….
ಪುಥುಜ್ಜನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ಪುಥುಜ್ಜನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ಆಮನ್ತಾ। ಸೋತಾಪನ್ನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ಸೋತಾಪನ್ನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ॰… ಪುಥುಜ್ಜನಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ…ಪೇ॰… ಅತೀತೋ ಅಪಾಯಗಮನೀಯೋ ಮೋಹೋ ಅತ್ಥಿ, ಪುಥುಜ್ಜನೋ ತೇನ ಮೋಹೇನ ಸಮೋಹೋತಿ? ಆಮನ್ತಾ। ಸೋತಾಪನ್ನಸ್ಸ ಅತೀತೋ ಅಪಾಯಗಮನೀಯೋ ಮೋಹೋ ಅತ್ಥಿ, ಸೋತಾಪನ್ನೋ ತೇನ ಮೋಹೇನ ಸಮೋಹೋತಿ? ನ ಹೇವಂ ವತ್ತಬ್ಬೇ…ಪೇ॰…।
Puthujjanassa atītā sakkāyadiṭṭhi atthi, puthujjano tāya diṭṭhiyā sadiṭṭhikoti? Āmantā. Sotāpannassa atītā sakkāyadiṭṭhi atthi, sotāpanno tāya diṭṭhiyā sadiṭṭhikoti? Na hevaṃ vattabbe…pe… puthujjanassa atītā vicikicchā atthi…pe… atīto apāyagamanīyo moho atthi, puthujjano tena mohena samohoti? Āmantā. Sotāpannassa atīto apāyagamanīyo moho atthi, sotāpanno tena mohena samohoti? Na hevaṃ vattabbe…pe….
ಅರಹತೋ ಅತೀತೋ ರಾಗೋ ಅತ್ಥಿ, ನ ಚ ಅರಹಾ ತೇನ ರಾಗೇನ ಸರಾಗೋತಿ? ಆಮನ್ತಾ। ಪುಥುಜ್ಜನಸ್ಸ ಅತೀತೋ ರಾಗೋ ಅತ್ಥಿ, ನ ಚ ಪುಥುಜ್ಜನೋ ತೇನ ರಾಗೇನ ಸರಾಗೋತಿ? ನ ಹೇವಂ ವತ್ತಬ್ಬೇ…ಪೇ॰… ಅರಹತೋ ಅತೀತೋ ದೋಸೋ ಅತ್ಥಿ…ಪೇ॰… ಅತೀತಂ ಅನೋತ್ತಪ್ಪಂ ಅತ್ಥಿ, ನ ಚ ಅರಹಾ ತೇನ ಅನೋತ್ತಪ್ಪೇನ ಅನೋತ್ತಪ್ಪೀತಿ? ಆಮನ್ತಾ। ಪುಥುಜ್ಜನಸ್ಸ ಅತೀತಂ ಅನೋತ್ತಪ್ಪಂ ಅತ್ಥಿ, ನ ಚ ಪುಥುಜ್ಜನೋ ತೇನ ಅನೋತ್ತಪ್ಪೇನ ಅನೋತ್ತಪ್ಪೀತಿ? ನ ಹೇವಂ ವತ್ತಬ್ಬೇ…ಪೇ॰…।
Arahato atīto rāgo atthi, na ca arahā tena rāgena sarāgoti? Āmantā. Puthujjanassa atīto rāgo atthi, na ca puthujjano tena rāgena sarāgoti? Na hevaṃ vattabbe…pe… arahato atīto doso atthi…pe… atītaṃ anottappaṃ atthi, na ca arahā tena anottappena anottappīti? Āmantā. Puthujjanassa atītaṃ anottappaṃ atthi, na ca puthujjano tena anottappena anottappīti? Na hevaṃ vattabbe…pe….
ಅನಾಗಾಮಿಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ನ ಚ ಅನಾಗಾಮೀ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ಆಮನ್ತಾ। ಪುಥುಜ್ಜನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ನ ಚ ಪುಥುಜ್ಜನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ॰… ಅನಾಗಾಮಿಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ…ಪೇ॰… ಅತೀತೋ ಅಣುಸಹಗತೋ ಬ್ಯಾಪಾದೋ ಅತ್ಥಿ, ನ ಚ ಅನಾಗಾಮೀ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ ? ಆಮನ್ತಾ। ಪುಥುಜ್ಜನಸ್ಸ ಅತೀತೋ ಅಣುಸಹಗತೋ ಬ್ಯಾಪಾದೋ ಅತ್ಥಿ, ನ ಚ ಪುಥುಜ್ಜನೋ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ॰…।
Anāgāmissa atītā sakkāyadiṭṭhi atthi, na ca anāgāmī tāya diṭṭhiyā sadiṭṭhikoti? Āmantā. Puthujjanassa atītā sakkāyadiṭṭhi atthi, na ca puthujjano tāya diṭṭhiyā sadiṭṭhikoti? Na hevaṃ vattabbe…pe… anāgāmissa atītā vicikicchā atthi…pe… atīto aṇusahagato byāpādo atthi, na ca anāgāmī tena byāpādena byāpannacittoti ? Āmantā. Puthujjanassa atīto aṇusahagato byāpādo atthi, na ca puthujjano tena byāpādena byāpannacittoti? Na hevaṃ vattabbe…pe….
ಸಕದಾಗಾಮಿಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ನ ಚ ಸಕದಾಗಾಮೀ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ಆಮನ್ತಾ। ಪುಥುಜ್ಜನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ನ ಚ ಪುಥುಜ್ಜನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ॰… ಸಕದಾಗಾಮಿಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ…ಪೇ॰… ಅತೀತೋ ಓಳಾರಿಕೋ ಬ್ಯಾಪಾದೋ ಅತ್ಥಿ, ನ ಚ ಸಕದಾಗಾಮೀ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ಆಮನ್ತಾ। ಪುಥುಜ್ಜನಸ್ಸ ಅತೀತೋ ಓಳಾರಿಕೋ ಬ್ಯಾಪಾದೋ ಅತ್ಥಿ, ನ ಚ ಪುಥುಜ್ಜನೋ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ॰…।
Sakadāgāmissa atītā sakkāyadiṭṭhi atthi, na ca sakadāgāmī tāya diṭṭhiyā sadiṭṭhikoti? Āmantā. Puthujjanassa atītā sakkāyadiṭṭhi atthi, na ca puthujjano tāya diṭṭhiyā sadiṭṭhikoti? Na hevaṃ vattabbe…pe… sakadāgāmissa atītā vicikicchā atthi…pe… atīto oḷāriko byāpādo atthi, na ca sakadāgāmī tena byāpādena byāpannacittoti? Āmantā. Puthujjanassa atīto oḷāriko byāpādo atthi, na ca puthujjano tena byāpādena byāpannacittoti? Na hevaṃ vattabbe…pe….
ಸೋತಾಪನ್ನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ನ ಚ ಸೋತಾಪನ್ನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ಆಮನ್ತಾ। ಪುಥುಜ್ಜನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ನ ಚ ಪುಥುಜ್ಜನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ॰… ಸೋತಾಪನ್ನಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ…ಪೇ॰… ಅತೀತೋ ಅಪಾಯಗಮನೀಯೋ ಮೋಹೋ ಅತ್ಥಿ, ನ ಚ ಸೋತಾಪನ್ನೋ ತೇನ ಮೋಹೇನ ಸಮೋಹೋತಿ? ಆಮನ್ತಾ। ಪುಥುಜ್ಜನಸ್ಸ ಅತೀತೋ ಅಪಾಯಗಮನೀಯೋ ಮೋಹೋ ಅತ್ಥಿ, ನ ಚ ಪುಥುಜ್ಜನೋ ತೇನ ಮೋಹೇನ ಸಮೋಹೋತಿ? ನ ಹೇವಂ ವತ್ತಬ್ಬೇ…ಪೇ॰…।
Sotāpannassa atītā sakkāyadiṭṭhi atthi, na ca sotāpanno tāya diṭṭhiyā sadiṭṭhikoti? Āmantā. Puthujjanassa atītā sakkāyadiṭṭhi atthi, na ca puthujjano tāya diṭṭhiyā sadiṭṭhikoti? Na hevaṃ vattabbe…pe… sotāpannassa atītā vicikicchā atthi…pe… atīto apāyagamanīyo moho atthi, na ca sotāpanno tena mohena samohoti? Āmantā. Puthujjanassa atīto apāyagamanīyo moho atthi, na ca puthujjano tena mohena samohoti? Na hevaṃ vattabbe…pe….
ಅತೀತಹತ್ಥಾದಿಕಥಾ
Atītahatthādikathā
೨೯೩. ಅತೀತಾ ಹತ್ಥಾ ಅತ್ಥೀತಿ? ಆಮನ್ತಾ। ಅತೀತೇಸು ಹತ್ಥೇಸು ಸತಿ ಆದಾನನಿಕ್ಖೇಪನಂ ಪಞ್ಞಾಯತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತಾ ಪಾದಾ ಅತ್ಥೀತಿ? ಆಮನ್ತಾ। ಅತೀತೇಸು ಪಾದೇಸು ಸತಿ ಅಭಿಕ್ಕಮಪಟಿಕ್ಕಮೋ ಪಞ್ಞಾಯತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತಾ ಪಬ್ಬಾ ಅತ್ಥೀತಿ? ಆಮನ್ತಾ। ಅತೀತೇಸು ಪಬ್ಬೇಸು ಸತಿ ಸಮಿಞ್ಜನಪಸಾರಣಂ ಪಞ್ಞಾಯತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತೋ ಕುಚ್ಛಿ ಅತ್ಥೀತಿ? ಆಮನ್ತಾ। ಅತೀತಸ್ಮಿಂ ಕುಚ್ಛಿಸ್ಮಿಂ ಸತಿ ಜಿಘಚ್ಛಾ ಪಿಪಾಸಾ ಪಞ್ಞಾಯತೀತಿ? ನ ಹೇವಂ ವತ್ತಬ್ಬೇ…ಪೇ॰…।
293. Atītā hatthā atthīti? Āmantā. Atītesu hatthesu sati ādānanikkhepanaṃ paññāyatīti? Na hevaṃ vattabbe…pe… atītā pādā atthīti? Āmantā. Atītesu pādesu sati abhikkamapaṭikkamo paññāyatīti? Na hevaṃ vattabbe…pe… atītā pabbā atthīti? Āmantā. Atītesu pabbesu sati samiñjanapasāraṇaṃ paññāyatīti? Na hevaṃ vattabbe…pe… atīto kucchi atthīti? Āmantā. Atītasmiṃ kucchismiṃ sati jighacchā pipāsā paññāyatīti? Na hevaṃ vattabbe…pe….
ಅತೀತೋ ಕಾಯೋ ಅತ್ಥೀತಿ? ಆಮನ್ತಾ। ಅತೀತೋ ಕಾಯೋ ಪಗ್ಗಹನಿಗ್ಗಹುಪಗೋ ಛೇದನಭೇದನುಪಗೋ ಕಾಕೇಹಿ ಗಿಜ್ಝೇಹಿ ಕುಲಲೇಹಿ ಸಾಧಾರಣೋತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತೇ ಕಾಯೇ ವಿಸಂ ಕಮೇಯ್ಯ , ಸತ್ಥಂ ಕಮೇಯ್ಯ, ಅಗ್ಗಿ ಕಮೇಯ್ಯಾತಿ? ನ ಹೇವಂ ವತ್ತಬ್ಬೇ…ಪೇ॰… ಲಬ್ಭಾ ಅತೀತೋ ಕಾಯೋ ಅದ್ದುಬನ್ಧನೇನ ಬನ್ಧಿತುಂ, ರಜ್ಜುಬನ್ಧನೇನ ಬನ್ಧಿತುಂ, ಸಙ್ಖಲಿಕಬನ್ಧನೇನ ಬನ್ಧಿತುಂ, ಗಾಮಬನ್ಧನೇನ ಬನ್ಧಿತುಂ, ನಿಗಮಬನ್ಧನೇನ ಬನ್ಧಿತುಂ, ನಗರಬನ್ಧನೇನ ಬನ್ಧಿತುಂ, ಜನಪದಬನ್ಧನೇನ ಬನ್ಧಿತುಂ, ಕಣ್ಠಪಞ್ಚಮೇಹಿ ಬನ್ಧನೇಹಿ ಬನ್ಧಿತುನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Atīto kāyo atthīti? Āmantā. Atīto kāyo paggahaniggahupago chedanabhedanupago kākehi gijjhehi kulalehi sādhāraṇoti? Na hevaṃ vattabbe…pe… atīte kāye visaṃ kameyya , satthaṃ kameyya, aggi kameyyāti? Na hevaṃ vattabbe…pe… labbhā atīto kāyo addubandhanena bandhituṃ, rajjubandhanena bandhituṃ, saṅkhalikabandhanena bandhituṃ, gāmabandhanena bandhituṃ, nigamabandhanena bandhituṃ, nagarabandhanena bandhituṃ, janapadabandhanena bandhituṃ, kaṇṭhapañcamehi bandhanehi bandhitunti? Na hevaṃ vattabbe…pe….
ಅತೀತೋ ಆಪೋ ಅತ್ಥೀತಿ? ಆಮನ್ತಾ। ತೇನ ಆಪೇನ ಆಪಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತೋ ತೇಜೋ ಅತ್ಥೀತಿ? ಆಮನ್ತಾ। ತೇನ ತೇಜೇನ ತೇಜಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತೋ ವಾಯೋ ಅತ್ಥೀತಿ? ಆಮನ್ತಾ। ತೇನ ವಾಯೇನ ವಾಯಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Atīto āpo atthīti? Āmantā. Tena āpena āpakaraṇīyaṃ karotīti? Na hevaṃ vattabbe…pe… atīto tejo atthīti? Āmantā. Tena tejena tejakaraṇīyaṃ karotīti? Na hevaṃ vattabbe…pe… atīto vāyo atthīti? Āmantā. Tena vāyena vāyakaraṇīyaṃ karotīti? Na hevaṃ vattabbe…pe….
ಅತೀತಕ್ಖನ್ಧಾದಿಸಮೋಧಾನಕಥಾ
Atītakkhandhādisamodhānakathā
೨೯೪. ಅತೀತೋ ರೂಪಕ್ಖನ್ಧೋ ಅತ್ಥಿ, ಅನಾಗತೋ ರೂಪಕ್ಖನ್ಧೋ ಅತ್ಥಿ, ಪಚ್ಚುಪ್ಪನ್ನೋ ರೂಪಕ್ಖನ್ಧೋ ಅತ್ಥೀತಿ? ಆಮನ್ತಾ। ತಯೋ ರೂಪಕ್ಖನ್ಧಾತಿ? ನ ಹೇವಂ ವತ್ತಬ್ಬೇ …ಪೇ॰… ಅತೀತಾ ಪಞ್ಚಕ್ಖನ್ಧಾ ಅತ್ಥಿ, ಅನಾಗತಾ ಪಞ್ಚಕ್ಖನ್ಧಾ ಅತ್ಥಿ, ಪಚ್ಚುಪ್ಪನ್ನಾ ಪಞ್ಚಕ್ಖನ್ಧಾ ಅತ್ಥೀತಿ? ಆಮನ್ತಾ। ಪನ್ನರಸಕ್ಖನ್ಧಾತಿ? ನ ಹೇವಂ ವತ್ತಬ್ಬೇ…ಪೇ॰…।
294. Atīto rūpakkhandho atthi, anāgato rūpakkhandho atthi, paccuppanno rūpakkhandho atthīti? Āmantā. Tayo rūpakkhandhāti? Na hevaṃ vattabbe …pe… atītā pañcakkhandhā atthi, anāgatā pañcakkhandhā atthi, paccuppannā pañcakkhandhā atthīti? Āmantā. Pannarasakkhandhāti? Na hevaṃ vattabbe…pe….
ಅತೀತಂ ಚಕ್ಖಾಯತನಂ ಅತ್ಥಿ, ಅನಾಗತಂ ಚಕ್ಖಾಯತನಂ ಅತ್ಥಿ, ಪಚ್ಚುಪ್ಪನ್ನಂ ಚಕ್ಖಾಯತನಂ ಅತ್ಥೀತಿ? ಆಮನ್ತಾ। ತೀಣಿ ಚಕ್ಖಾಯತನಾನೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತಾನಿ ದ್ವಾದಸಾಯತನಾನಿ ಅತ್ಥಿ, ಅನಾಗತಾನಿ ದ್ವಾದಸಾಯತನಾನಿ ಅತ್ಥಿ, ಪಚ್ಚುಪ್ಪನ್ನಾನಿ ದ್ವಾದಸಾಯತನಾನಿ ಅತ್ಥೀತಿ? ಆಮನ್ತಾ। ಛತ್ತಿಂಸಾಯತನಾನೀತಿ? ನ ಹೇವಂ ವತ್ತಬ್ಬೇ…ಪೇ॰…।
Atītaṃ cakkhāyatanaṃ atthi, anāgataṃ cakkhāyatanaṃ atthi, paccuppannaṃ cakkhāyatanaṃ atthīti? Āmantā. Tīṇi cakkhāyatanānīti? Na hevaṃ vattabbe…pe… atītāni dvādasāyatanāni atthi, anāgatāni dvādasāyatanāni atthi, paccuppannāni dvādasāyatanāni atthīti? Āmantā. Chattiṃsāyatanānīti? Na hevaṃ vattabbe…pe….
ಅತೀತಾ ಚಕ್ಖುಧಾತು ಅತ್ಥಿ, ಅನಾಗತಾ ಚಕ್ಖುಧಾತು ಅತ್ಥಿ, ಪಚ್ಚುಪ್ಪನ್ನಾ ಚಕ್ಖುಧಾತು ಅತ್ಥೀತಿ? ಆಮನ್ತಾ। ತಿಸ್ಸೋ ಚಕ್ಖುಧಾತುಯೋತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತಾ ಅಟ್ಠಾರಸ ಧಾತುಯೋ ಅತ್ಥಿ, ಅನಾಗತಾ ಅಟ್ಠಾರಸ ಧಾತುಯೋ ಅತ್ಥಿ, ಪಚ್ಚುಪ್ಪನ್ನಾ ಅಟ್ಠಾರಸ ಧಾತುಯೋ ಅತ್ಥೀತಿ? ಆಮನ್ತಾ। ಚತುಪಞ್ಞಾಸ ಧಾತುಯೋತಿ? ನ ಹೇವಂ ವತ್ತಬ್ಬೇ…ಪೇ॰…।
Atītā cakkhudhātu atthi, anāgatā cakkhudhātu atthi, paccuppannā cakkhudhātu atthīti? Āmantā. Tisso cakkhudhātuyoti? Na hevaṃ vattabbe…pe… atītā aṭṭhārasa dhātuyo atthi, anāgatā aṭṭhārasa dhātuyo atthi, paccuppannā aṭṭhārasa dhātuyo atthīti? Āmantā. Catupaññāsa dhātuyoti? Na hevaṃ vattabbe…pe….
ಅತೀತಂ ಚಕ್ಖುನ್ದ್ರಿಯಂ ಅತ್ಥಿ, ಅನಾಗತಂ ಚಕ್ಖುನ್ದ್ರಿಯಂ ಅತ್ಥಿ, ಪಚ್ಚುಪ್ಪನ್ನಂ ಚಕ್ಖುನ್ದ್ರಿಯಂ ಅತ್ಥೀತಿ ? ಆಮನ್ತಾ। ತೀಣಿ ಚಕ್ಖುನ್ದ್ರಿಯಾನೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತೀತಾನಿ ಬಾವೀಸತಿನ್ದ್ರಿಯಾನಿ ಅತ್ಥಿ, ಅನಾಗತಾನಿ ಬಾವೀಸತಿನ್ದ್ರಿಯಾನಿ ಅತ್ಥಿ, ಪಚ್ಚುಪ್ಪನ್ನಾನಿ ಬಾವೀಸತಿನ್ದ್ರಿಯಾನಿ ಅತ್ಥೀತಿ? ಆಮನ್ತಾ। ಛಸಟ್ಠಿನ್ದ್ರಿಯಾನೀತಿ? ನ ಹೇವಂ ವತ್ತಬ್ಬೇ…ಪೇ॰…।
Atītaṃ cakkhundriyaṃ atthi, anāgataṃ cakkhundriyaṃ atthi, paccuppannaṃ cakkhundriyaṃ atthīti ? Āmantā. Tīṇi cakkhundriyānīti? Na hevaṃ vattabbe…pe… atītāni bāvīsatindriyāni atthi, anāgatāni bāvīsatindriyāni atthi, paccuppannāni bāvīsatindriyāni atthīti? Āmantā. Chasaṭṭhindriyānīti? Na hevaṃ vattabbe…pe….
ಅತೀತೋ ರಾಜಾ ಚಕ್ಕವತ್ತೀ ಅತ್ಥಿ, ಅನಾಗತೋ ರಾಜಾ ಚಕ್ಕವತ್ತೀ ಅತ್ಥಿ, ಪಚ್ಚುಪ್ಪನ್ನೋ ರಾಜಾ ಚಕ್ಕವತ್ತೀ ಅತ್ಥೀತಿ? ಆಮನ್ತಾ। ತಿಣ್ಣನ್ನಂ ರಾಜೂನಂ ಚಕ್ಕವತ್ತೀನಂ ಸಮ್ಮುಖೀಭಾವೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Atīto rājā cakkavattī atthi, anāgato rājā cakkavattī atthi, paccuppanno rājā cakkavattī atthīti? Āmantā. Tiṇṇannaṃ rājūnaṃ cakkavattīnaṃ sammukhībhāvo hotīti? Na hevaṃ vattabbe…pe….
ಅತೀತೋ ಸಮ್ಮಾಸಮ್ಮುದ್ಧೋ ಅತ್ಥಿ, ಅನಾಗತೋ ಸಮ್ಮಾಸಮ್ಬುದ್ಧೋ ಅತ್ಥಿ, ಪಚ್ಚುಪ್ಪನ್ನೋ ಸಮ್ಮಾಸಮ್ಬುದ್ಧೋ ಅತ್ಥೀತಿ? ಆಮನ್ತಾ। ತಿಣ್ಣನ್ನಂ ಸಮ್ಮಾಸಮ್ಬುದ್ಧಾನಂ ಸಮ್ಮುಖೀಭಾವೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Atīto sammāsammuddho atthi, anāgato sammāsambuddho atthi, paccuppanno sammāsambuddho atthīti? Āmantā. Tiṇṇannaṃ sammāsambuddhānaṃ sammukhībhāvo hotīti? Na hevaṃ vattabbe…pe….
ಪದಸೋಧನಕಥಾ
Padasodhanakathā
೨೯೫. ಅತೀತಂ ಅತ್ಥೀತಿ? ಆಮನ್ತಾ । ಅತ್ಥಿ ಅತೀತನ್ತಿ? ಅತ್ಥಿ ಸಿಯಾ ಅತೀತಂ, ಸಿಯಾ ನ್ವಾತೀತನ್ತಿ।
295. Atītaṃ atthīti? Āmantā . Atthi atītanti? Atthi siyā atītaṃ, siyā nvātītanti.
ಆಜಾನಾಹಿ ನಿಗ್ಗಹಂ। ಹಞ್ಚಿ ಅತೀತಂ ಅತ್ಥಿ, ಅತ್ಥಿ ಸಿಯಾ ಅತೀತಂ, ಸಿಯಾ ನ್ವಾತೀತಂ, ತೇನಾತೀತಂ ನ್ವಾತೀತಂ, ನ್ವಾತೀತಂ ಅತೀತನ್ತಿ। ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಅತೀತಂ ಅತ್ಥಿ ಅತ್ಥಿ ಸಿಯಾ ಅತೀತಂ, ಸಿಯಾ ನ್ವಾತೀತಂ, ತೇನಾತೀತಂ ನ್ವಾತೀತಂ, ನ್ವಾತೀತಂ ಅತೀತ’’’ನ್ತಿ ಮಿಚ್ಛಾ।
Ājānāhi niggahaṃ. Hañci atītaṃ atthi, atthi siyā atītaṃ, siyā nvātītaṃ, tenātītaṃ nvātītaṃ, nvātītaṃ atītanti. Yaṃ tattha vadesi – ‘‘vattabbe kho – ‘atītaṃ atthi atthi siyā atītaṃ, siyā nvātītaṃ, tenātītaṃ nvātītaṃ, nvātītaṃ atīta’’’nti micchā.
ನೋ ಚೇ ಪನ ಅತೀತಂ ನ್ವಾತೀತಂ ನ್ವಾತೀತಂ ಅತೀತನ್ತಿ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ಅತ್ಥಿ ಅತ್ಥಿ ಸಿಯಾ ಅತೀತಂ, ಸಿಯಾ ನ್ವಾತೀತ’’ನ್ತಿ। ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಅತೀತಂ ಅತ್ಥಿ ಅತ್ಥಿ ಸಿಯಾ ಅತೀತಂ, ಸಿಯಾ ನ್ವಾತೀತಂ, ತೇನಾತೀತಂ ನ್ವಾತೀತಂ, ನ್ವಾತೀತಂ ಅತೀತ’’’ನ್ತಿ ಮಿಚ್ಛಾ।
No ce pana atītaṃ nvātītaṃ nvātītaṃ atītanti, no ca vata re vattabbe – ‘‘atītaṃ atthi atthi siyā atītaṃ, siyā nvātīta’’nti. Yaṃ tattha vadesi – ‘‘vattabbe kho – ‘atītaṃ atthi atthi siyā atītaṃ, siyā nvātītaṃ, tenātītaṃ nvātītaṃ, nvātītaṃ atīta’’’nti micchā.
ಅನಾಗತಂ ಅತ್ಥೀತಿ? ಆಮನ್ತಾ। ಅತ್ಥಿ ಅನಾಗತನ್ತಿ? ಅತ್ಥಿ ಸಿಯಾ ಅನಾಗತಂ, ಸಿಯಾ ನ್ವಾನಾಗತನ್ತಿ।
Anāgataṃ atthīti? Āmantā. Atthi anāgatanti? Atthi siyā anāgataṃ, siyā nvānāgatanti.
ಆಜಾನಾಹಿ ನಿಗ್ಗಹಂ। ಹಞ್ಚಿ ಅನಾಗತಂ ಅತ್ಥಿ ಅತ್ಥಿ ಸಿಯಾ ಅನಾಗತಂ ಸಿಯಾ ನ್ವಾನಾಗತಂ, ತೇನಾನಾಗತಂ ನ್ವಾನಾಗತಂ, ನ್ವಾನಾಗತಂ ಅನಾಗತನ್ತಿ। ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಅನಾಗತಂ ಅತ್ಥಿ ಅತ್ಥಿ ಸಿಯಾ ಅನಾಗತಂ, ಸಿಯಾ ನ್ವಾನಾಗತಂ, ತೇನಾನಾಗತಂ ನ್ವಾನಾಗತಂ, ನ್ವಾನಾಗತಂ ಅನಾಗತ’’’ನ್ತಿ ಮಿಚ್ಛಾ।
Ājānāhi niggahaṃ. Hañci anāgataṃ atthi atthi siyā anāgataṃ siyā nvānāgataṃ, tenānāgataṃ nvānāgataṃ, nvānāgataṃ anāgatanti. Yaṃ tattha vadesi – ‘‘vattabbe kho – ‘anāgataṃ atthi atthi siyā anāgataṃ, siyā nvānāgataṃ, tenānāgataṃ nvānāgataṃ, nvānāgataṃ anāgata’’’nti micchā.
ನೋ ಚೇ ಪನಾನಾಗತಂ ನ್ವಾನಾಗತಂ ನ್ವಾನಾಗತಂ ಅನಾಗತನ್ತಿ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗತಂ ಅತ್ಥಿ ಅತ್ಥಿ ಸಿಯಾ ಅನಾಗತಂ, ಸಿಯಾ ನ್ವಾನಾಗತ’’ನ್ತಿ। ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಅನಾಗತಂ ಅತ್ಥಿ ಅತ್ಥಿ ಸಿಯಾ ಅನಾಗತಂ, ಸಿಯಾ ನ್ವಾನಾಗತಂ, ತೇನಾನಾಗತಂ ನ್ವಾನಾಗತಂ, ನ್ವಾನಾಗತಂ ಅನಾಗತ’’’ನ್ತಿ ಮಿಚ್ಛಾ।
No ce panānāgataṃ nvānāgataṃ nvānāgataṃ anāgatanti, no ca vata re vattabbe – ‘‘anāgataṃ atthi atthi siyā anāgataṃ, siyā nvānāgata’’nti. Yaṃ tattha vadesi – ‘‘vattabbe kho – ‘anāgataṃ atthi atthi siyā anāgataṃ, siyā nvānāgataṃ, tenānāgataṃ nvānāgataṃ, nvānāgataṃ anāgata’’’nti micchā.
ಪಚ್ಚುಪ್ಪನ್ನಂ ಅತ್ಥೀತಿ, ಆಮನ್ತಾ। ಅತ್ಥಿ ಪಚ್ಚುಪ್ಪನ್ನನ್ತಿ? ಅತ್ಥಿ ಸಿಯಾ ಪಚ್ಚುಪ್ಪನ್ನಂ, ಸಿಯಾ ನೋ ಪಚ್ಚುಪ್ಪನ್ನನ್ತಿ।
Paccuppannaṃ atthīti, āmantā. Atthi paccuppannanti? Atthi siyā paccuppannaṃ, siyā no paccuppannanti.
ಆಜಾನಾಹಿ ನಿಗ್ಗಹಂ। ಹಞ್ಚಿ ಪಚ್ಚುಪ್ಪನ್ನಂ ಅತ್ಥಿ ಅತ್ಥಿ ಸಿಯಾ ಪಚ್ಚುಪ್ಪನ್ನಂ, ಸಿಯಾ ನೋ ಪಚ್ಚುಪ್ಪನ್ನಂ, ತೇನ ಪಚ್ಚುಪ್ಪನ್ನಂ, ನೋ ಪಚ್ಚುಪ್ಪನ್ನಂ, ನೋ ಪಚ್ಚುಪ್ಪನ್ನಂ ಪಚ್ಚುಪ್ಪನ್ನನ್ತಿ। ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪಚ್ಚುಪ್ಪನ್ನಂ ಅತ್ಥಿ ಅತ್ಥಿ ಸಿಯಾ ಪಚ್ಚುಪ್ಪನ್ನಂ, ಸಿಯಾ ನೋ ಪಚ್ಚುಪ್ಪನ್ನಂ, ತೇನ ಪಚ್ಚುಪ್ಪನ್ನಂ ನೋ ಪಚ್ಚುಪ್ಪನ್ನಂ, ನೋ ಪಚ್ಚುಪ್ಪನ್ನಂ ಪಚ್ಚುಪ್ಪನ್ನ’’’ನ್ತಿ ಮಿಚ್ಛಾ।
Ājānāhi niggahaṃ. Hañci paccuppannaṃ atthi atthi siyā paccuppannaṃ, siyā no paccuppannaṃ, tena paccuppannaṃ, no paccuppannaṃ, no paccuppannaṃ paccuppannanti. Yaṃ tattha vadesi – ‘‘vattabbe kho – ‘paccuppannaṃ atthi atthi siyā paccuppannaṃ, siyā no paccuppannaṃ, tena paccuppannaṃ no paccuppannaṃ, no paccuppannaṃ paccuppanna’’’nti micchā.
ನೋ ಚೇ ಪನ ಪಚ್ಚುಪ್ಪನ್ನಂ ನೋ ಪಚ್ಚುಪ್ಪನ್ನಂ, ನೋ ಪಚ್ಚುಪ್ಪನ್ನಂ ಪಚ್ಚುಪ್ಪನ್ನನ್ತಿ, ನೋ ಚ ವತ ರೇ ವತ್ತಬ್ಬೇ – ‘‘ಪಚ್ಚುಪ್ಪನ್ನಂ ಅತ್ಥಿ ಅತ್ಥಿ ಸಿಯಾ ಪಚ್ಚುಪ್ಪನ್ನಂ, ಸಿಯಾ ನೋ ಪಚ್ಚುಪ್ಪನ್ನ’’ನ್ತಿ। ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪಚ್ಚುಪ್ಪನ್ನಂ ಅತ್ಥಿ ಅತ್ಥಿ ಸಿಯಾ ಪಚ್ಚುಪ್ಪನ್ನಂ, ಸಿಯಾ ನೋ ಪಚ್ಚುಪ್ಪನ್ನಂ, ತೇನ ಪಚ್ಚುಪ್ಪನ್ನಂ ನೋ ಪಚ್ಚುಪ್ಪನ್ನಂ, ನೋ ಪಚ್ಚುಪ್ಪನ್ನಂ ಪಚ್ಚುಪ್ಪನ್ನ’’’ನ್ತಿ ಮಿಚ್ಛಾ।
No ce pana paccuppannaṃ no paccuppannaṃ, no paccuppannaṃ paccuppannanti, no ca vata re vattabbe – ‘‘paccuppannaṃ atthi atthi siyā paccuppannaṃ, siyā no paccuppanna’’nti. Yaṃ tattha vadesi – ‘‘vattabbe kho – ‘paccuppannaṃ atthi atthi siyā paccuppannaṃ, siyā no paccuppannaṃ, tena paccuppannaṃ no paccuppannaṃ, no paccuppannaṃ paccuppanna’’’nti micchā.
ನಿಬ್ಬಾನಂ ಅತ್ಥೀತಿ? ಆಮನ್ತಾ। ಅತ್ಥಿ ನಿಬ್ಬಾನನ್ತಿ? ಅತ್ಥಿ ಸಿಯಾ ನಿಬ್ಬಾನಂ ಸಿಯಾ ನೋ ನಿಬ್ಬಾನನ್ತಿ।
Nibbānaṃ atthīti? Āmantā. Atthi nibbānanti? Atthi siyā nibbānaṃ siyā no nibbānanti.
ಆಜಾನಾಹಿ ನಿಗ್ಗಹಂ। ಹಞ್ಚಿ ನಿಬ್ಬಾನಂ ಅತ್ಥಿ ಅತ್ಥಿ ಸಿಯಾ ನಿಬ್ಬಾನಂ, ಸಿಯಾ ನೋ ನಿಬ್ಬಾನಂ, ತೇನ ನಿಬ್ಬಾನಂ ನೋ ನಿಬ್ಬಾನಂ, ನೋ ನಿಬ್ಬಾನಂ ನಿಬ್ಬಾನನ್ತಿ। ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ನಿಬ್ಬಾನಂ ಅತ್ಥಿ ಅತ್ಥಿ ಸಿಯಾ ನಿಬ್ಬಾನಂ, ಸಿಯಾ ನೋ ನಿಬ್ಬಾನಂ, ತೇನ ನಿಬ್ಬಾನಂ ನೋ ನಿಬ್ಬಾನಂ, ನೋ ನಿಬ್ಬಾನಂ ನಿಬ್ಬಾನ’’’ನ್ತಿ ಮಿಚ್ಛಾ।
Ājānāhi niggahaṃ. Hañci nibbānaṃ atthi atthi siyā nibbānaṃ, siyā no nibbānaṃ, tena nibbānaṃ no nibbānaṃ, no nibbānaṃ nibbānanti. Yaṃ tattha vadesi – ‘‘vattabbe kho – ‘nibbānaṃ atthi atthi siyā nibbānaṃ, siyā no nibbānaṃ, tena nibbānaṃ no nibbānaṃ, no nibbānaṃ nibbāna’’’nti micchā.
ನೋ ಚೇ ಪನ ನಿಬ್ಬಾನಂ ನೋ ನಿಬ್ಬಾನಂ, ನೋ ನಿಬ್ಬಾನಂ ನಿಬ್ಬಾನನ್ತಿ, ನೋ ಚ ವತ ರೇ ವತ್ತಬ್ಬೇ – ‘‘ನಿಬ್ಬಾನಂ ಅತ್ಥಿ ಅತ್ಥಿ ಸಿಯಾ ನಿಬ್ಬಾನಂ, ಸಿಯಾ ನೋ ನಿಬ್ಬಾನ’’ನ್ತಿ। ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ನಿಬ್ಬಾನಂ ಅತ್ಥಿ ಅತ್ಥಿ ಸಿಯಾ ನಿಬ್ಬಾನಂ, ಸಿಯಾ ನೋ ನಿಬ್ಬಾನಂ, ತೇನ ನಿಬ್ಬಾನಂ ನೋ ನಿಬ್ಬಾನಂ, ನೋ ನಿಬ್ಬಾನಂ ನಿಬ್ಬಾನ’’’ನ್ತಿ ಮಿಚ್ಛಾ।
No ce pana nibbānaṃ no nibbānaṃ, no nibbānaṃ nibbānanti, no ca vata re vattabbe – ‘‘nibbānaṃ atthi atthi siyā nibbānaṃ, siyā no nibbāna’’nti. Yaṃ tattha vadesi – ‘‘vattabbe kho – ‘nibbānaṃ atthi atthi siyā nibbānaṃ, siyā no nibbānaṃ, tena nibbānaṃ no nibbānaṃ, no nibbānaṃ nibbāna’’’nti micchā.
ಸುತ್ತಸಾಧನಂ
Suttasādhanaṃ
೨೯೬. ನ ವತ್ತಬ್ಬಂ – ‘‘ಅತೀತಂ ಅತ್ಥಿ, ಅನಾಗತಂ ಅತ್ಥೀ’’ತಿ? ಆಮನ್ತಾ। ನನು ವುತ್ತಂ ಭಗವತಾ – ‘‘ಯಂ ಕಿಞ್ಚಿ, ಭಿಕ್ಖವೇ, ರೂಪಂ ಅತೀತಾನಾಗತಪಚ್ಚುಪ್ಪನ್ನಂ ಅಜ್ಝತ್ತಂ ವಾ ಬಹಿದ್ಧಾ ವಾ ಓಳಾರಿಕಂ ವಾ ಸುಖುಮಂ ವಾ ಹೀನಂ ವಾ ಪಣೀತಂ ವಾ ಯಂ ದೂರೇ ಸನ್ತಿಕೇ ವಾ – ಅಯಂ ವುಚ್ಚತಿ ರೂಪಕ್ಖನ್ಧೋ। ಯಾ ಕಾಚಿ ವೇದನಾ… ಯಾ ಕಾಚಿ ಸಞ್ಞಾ… ಯೇ ಕೇಚಿ ಸಙ್ಖಾರಾ… ಯಂ ಕಿಞ್ಚಿ ವಿಞ್ಞಾಣಂ ಅತೀತಾನಾಗತಪಚ್ಚುಪ್ಪನ್ನಂ ಅಜ್ಝತ್ತಂ ವಾ ಬಹಿದ್ಧಾ ವಾ ಓಳಾರಿಕಂ ವಾ ಸುಖುಮಂ ವಾ ಹೀನಂ ವಾ ಪಣೀತಂ ವಾ ಯಂ ದೂರೇ ಸನ್ತಿಕೇ ವಾ – ಅಯಂ ವುಚ್ಚತಿ ವಿಞ್ಞಾಣಕ್ಖನ್ಧೋ’’ತಿ 31। ಅತ್ಥೇವ ಸುತ್ತನ್ತೋತಿ? ಆಮನ್ತಾ। ತೇನ ಹಿ ಅತೀತಂ ಅತ್ಥಿ, ಅನಾಗತಂ ಅತ್ಥೀತಿ।
296. Na vattabbaṃ – ‘‘atītaṃ atthi, anāgataṃ atthī’’ti? Āmantā. Nanu vuttaṃ bhagavatā – ‘‘yaṃ kiñci, bhikkhave, rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā – ayaṃ vuccati rūpakkhandho. Yā kāci vedanā… yā kāci saññā… ye keci saṅkhārā… yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā – ayaṃ vuccati viññāṇakkhandho’’ti 32. Attheva suttantoti? Āmantā. Tena hi atītaṃ atthi, anāgataṃ atthīti.
ಅತೀತಂ ಅತ್ಥಿ, ಅನಾಗತಂ ಅತ್ಥೀತಿ? ಆಮನ್ತಾ। ನನು ವುತ್ತಂ ಭಗವತಾ – ‘‘ತಯೋಮೇ, ಭಿಕ್ಖವೇ, ನಿರುತ್ತಿಪಥಾ ಅಧಿವಚನಪಥಾ ಪಞ್ಞತ್ತಿಪಥಾ ಅಸಙ್ಕಿಣ್ಣಾ ಅಸಙ್ಕಿಣ್ಣಪುಬ್ಬಾ ನ ಸಙ್ಕಿಯನ್ತಿ ನ ಸಙ್ಕಿಯಿಸ್ಸನ್ತಿ ಅಪ್ಪಟಿಕುಟ್ಠಾ ಸಮಣೇಹಿ ಬ್ರಾಹ್ಮಣೇಹಿ ವಿಞ್ಞೂಹಿ। ಕತಮೇ ತಯೋ? ಯಂ, ಭಿಕ್ಖವೇ, ರೂಪಂ ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ‘ಅಹೋಸೀ’ತಿ ತಸ್ಸ ಸಙ್ಖಾ, ‘ಅಹೋಸೀ’ತಿ ತಸ್ಸ ಸಮಞ್ಞಾ, ‘ಅಹೋಸೀ’ತಿ ತಸ್ಸ ಪಞ್ಞತ್ತಿ; ನ ತಸ್ಸ ಸಙ್ಖಾ ‘ಅತ್ಥೀ’ತಿ, ನ ತಸ್ಸ ಸಙ್ಖಾ ‘ಭವಿಸ್ಸತೀ’ತಿ। ಯಾ ವೇದನಾ…ಪೇ॰… ಯಾ ಸಞ್ಞಾ… ಯೇ ಸಙ್ಖಾರಾ… ಯಂ ವಿಞ್ಞಾಣಂ ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ‘ಅಹೋಸೀ’ತಿ ತಸ್ಸ ಸಙ್ಖಾ, ‘ಅಹೋಸೀ’ತಿ ತಸ್ಸ ಸಮಞ್ಞಾ, ‘ಅಹೋಸೀ’ತಿ ತಸ್ಸ ಪಞ್ಞತ್ತಿ; ನ ತಸ್ಸ ಸಙ್ಖಾ ‘ಅತ್ಥೀ’ತಿ, ನ ತಸ್ಸ ಸಙ್ಖಾ ‘ಭವಿಸ್ಸತೀ’ತಿ।
Atītaṃ atthi, anāgataṃ atthīti? Āmantā. Nanu vuttaṃ bhagavatā – ‘‘tayome, bhikkhave, niruttipathā adhivacanapathā paññattipathā asaṅkiṇṇā asaṅkiṇṇapubbā na saṅkiyanti na saṅkiyissanti appaṭikuṭṭhā samaṇehi brāhmaṇehi viññūhi. Katame tayo? Yaṃ, bhikkhave, rūpaṃ atītaṃ niruddhaṃ vigataṃ vipariṇataṃ ‘ahosī’ti tassa saṅkhā, ‘ahosī’ti tassa samaññā, ‘ahosī’ti tassa paññatti; na tassa saṅkhā ‘atthī’ti, na tassa saṅkhā ‘bhavissatī’ti. Yā vedanā…pe… yā saññā… ye saṅkhārā… yaṃ viññāṇaṃ atītaṃ niruddhaṃ vigataṃ vipariṇataṃ ‘ahosī’ti tassa saṅkhā, ‘ahosī’ti tassa samaññā, ‘ahosī’ti tassa paññatti; na tassa saṅkhā ‘atthī’ti, na tassa saṅkhā ‘bhavissatī’ti.
‘‘ಯಂ, ಭಿಕ್ಖವೇ, ರೂಪಂ ಅಜಾತಂ ಅಪಾತುಭೂತಂ ‘ಭವಿಸ್ಸತೀ’ತಿ ತಸ್ಸ ಸಙ್ಖಾ, ‘ಭವಿಸ್ಸತೀ’ತಿ ತಸ್ಸ ಸಮಞ್ಞಾ, ‘ಭವಿಸ್ಸತೀ’ತಿ ತಸ್ಸ ಪಞ್ಞತ್ತಿ; ನ ತಸ್ಸ ಸಙ್ಖಾ ‘ಅತ್ಥೀ’ತಿ, ನ ತಸ್ಸ ಸಙ್ಖಾ ‘ಅಹೋಸೀ’ತಿ। ಯಾ ವೇದನಾ…ಪೇ॰… ಯಾ ಸಞ್ಞಾ… ಯೇ ಸಙ್ಖಾರಾ… ಯಂ ವಿಞ್ಞಾಣಂ ಅಜಾತಂ ಅಪಾತುಭೂತಂ ‘ಭವಿಸ್ಸತೀ’ತಿ ತಸ್ಸ ಸಙ್ಖಾ, ‘ಭವಿಸ್ಸತೀ’ತಿ ತಸ್ಸ ಸಮಞ್ಞಾ, ‘ಭವಿಸ್ಸತೀ’ತಿ ತಸ್ಸ ಪಞ್ಞತ್ತಿ; ನ ತಸ್ಸ ಸಙ್ಖಾ ‘ಅತ್ಥೀ’ತಿ, ನ ತಸ್ಸ ಸಙ್ಖಾ ‘ಅಹೋಸೀ’ತಿ।
‘‘Yaṃ, bhikkhave, rūpaṃ ajātaṃ apātubhūtaṃ ‘bhavissatī’ti tassa saṅkhā, ‘bhavissatī’ti tassa samaññā, ‘bhavissatī’ti tassa paññatti; na tassa saṅkhā ‘atthī’ti, na tassa saṅkhā ‘ahosī’ti. Yā vedanā…pe… yā saññā… ye saṅkhārā… yaṃ viññāṇaṃ ajātaṃ apātubhūtaṃ ‘bhavissatī’ti tassa saṅkhā, ‘bhavissatī’ti tassa samaññā, ‘bhavissatī’ti tassa paññatti; na tassa saṅkhā ‘atthī’ti, na tassa saṅkhā ‘ahosī’ti.
‘‘ಯಂ, ಭಿಕ್ಖವೇ, ರೂಪಂ ಜಾತಂ ಪಾತುಭೂತಂ ‘ಅತ್ಥೀ’ತಿ ತಸ್ಸ ಸಙ್ಖಾ, ‘ಅತ್ಥೀ’ತಿ ತಸ್ಸ ಸಮಞ್ಞಾ, ‘ಅತ್ಥೀ’ತಿ ತಸ್ಸ ಪಞ್ಞತ್ತಿ; ನ ತಸ್ಸ ಸಙ್ಖಾ ‘ಅಹೋಸೀ’ತಿ, ನ ತಸ್ಸ ಸಙ್ಖಾ ‘ಭವಿಸ್ಸತೀ’ತಿ। ಯಾ ವೇದನಾ…ಪೇ॰… ಯಾ ಸಞ್ಞಾ… ಯೇ ಸಙ್ಖಾರಾ… ಯಂ ವಿಞ್ಞಾಣಂ ಜಾತಂ ಪಾತುಭೂತಂ ‘ಅತ್ಥೀ’ತಿ ತಸ್ಸ ಸಙ್ಖಾ, ‘ಅತ್ಥೀ’ತಿ ತಸ್ಸ ಸಮಞ್ಞಾ, ‘ಅತ್ಥೀ’ತಿ ತಸ್ಸ ಪಞ್ಞತ್ತಿ; ನ ತಸ್ಸ ಸಙ್ಖಾ ‘ಅಹೋಸೀ’ತಿ, ನ ತಸ್ಸ ಸಙ್ಖಾ ‘ಭವಿಸ್ಸತೀ’ತಿ। ಇಮೇ ಖೋ, ಭಿಕ್ಖವೇ, ತಯೋ ನಿರುತ್ತಿಪಥಾ ಅಧಿವಚನಪಥಾ ಪಞ್ಞತ್ತಿಪಥಾ ಅಸಙ್ಕಿಣ್ಣಾ ಅಸಙ್ಕಿಣ್ಣಪುಬ್ಬಾ ನ ಸಙ್ಕಿಯನ್ತಿ ನ ಸಙ್ಕಿಯಿಸ್ಸನ್ತಿ ಅಪ್ಪಟಿಕುಟ್ಠಾ ಸಮಣೇಹಿ ಬ್ರಾಹ್ಮಣೇಹಿ ವಿಞ್ಞೂಹಿ।
‘‘Yaṃ, bhikkhave, rūpaṃ jātaṃ pātubhūtaṃ ‘atthī’ti tassa saṅkhā, ‘atthī’ti tassa samaññā, ‘atthī’ti tassa paññatti; na tassa saṅkhā ‘ahosī’ti, na tassa saṅkhā ‘bhavissatī’ti. Yā vedanā…pe… yā saññā… ye saṅkhārā… yaṃ viññāṇaṃ jātaṃ pātubhūtaṃ ‘atthī’ti tassa saṅkhā, ‘atthī’ti tassa samaññā, ‘atthī’ti tassa paññatti; na tassa saṅkhā ‘ahosī’ti, na tassa saṅkhā ‘bhavissatī’ti. Ime kho, bhikkhave, tayo niruttipathā adhivacanapathā paññattipathā asaṅkiṇṇā asaṅkiṇṇapubbā na saṅkiyanti na saṅkiyissanti appaṭikuṭṭhā samaṇehi brāhmaṇehi viññūhi.
‘‘ಯೇಪಿ ತೇ, ಭಿಕ್ಖವೇ, ಅಹೇಸುಂ ಉಕ್ಕಲಾ ವಸ್ಸಭಞ್ಞಾ ಅಹೇತುಕವಾದಾ ಅಕಿರಿಯವಾದಾ ನತ್ಥಿಕವಾದಾ, ತೇಪಿಮೇ ತಯೋ ನಿರುತ್ತಿಪಥೇ ಅಧಿವಚನಪಥೇ ಪಞ್ಞತ್ತಿಪಥೇ ನ ಗರಹಿತಬ್ಬಂ ನ ಪಟಿಕ್ಕೋಸಿತಬ್ಬಂ ಅಮಞ್ಞಿಂಸು। ತಂ ಕಿಸ್ಸ ಹೇತು? ನಿನ್ದಾಬ್ಯಾರೋಸಉಪಾರಮ್ಭಭಯಾ’’ತಿ 33। ಅತ್ಥೇವ ಸುತ್ತನ್ತೋತಿ? ಆಮನ್ತಾ। ತೇನ ಹಿ ನ ವತ್ತಬ್ಬಂ – ‘‘ಅತೀತಂ ಅತ್ಥಿ, ಅನಾಗತಂ ಅತ್ಥೀ’’ತಿ।
‘‘Yepi te, bhikkhave, ahesuṃ ukkalā vassabhaññā ahetukavādā akiriyavādā natthikavādā, tepime tayo niruttipathe adhivacanapathe paññattipathe na garahitabbaṃ na paṭikkositabbaṃ amaññiṃsu. Taṃ kissa hetu? Nindābyārosaupārambhabhayā’’ti 34. Attheva suttantoti? Āmantā. Tena hi na vattabbaṃ – ‘‘atītaṃ atthi, anāgataṃ atthī’’ti.
ಅತೀತಂ ಅತ್ಥೀತಿ? ಆಮನ್ತಾ। ನನು ಆಯಸ್ಮಾ ಫಗ್ಗುನೋ ಭಗವನ್ತಂ ಏತದವೋಚ – ‘‘ಅತ್ಥಿ ನು ಖೋ ತಂ, ಭನ್ತೇ, ಚಕ್ಖುಂ ಯೇನ ಚಕ್ಖುನಾ ಅತೀತೇ ಬುದ್ಧೇ ಪರಿನಿಬ್ಬುತೇ ಛಿನ್ನಪಪಞ್ಚೇ ಛಿನ್ನವಟುಮೇ ಪರಿಯಾದಿನ್ನವಟ್ಟೇ ಸಬ್ಬದುಕ್ಖವೀತಿವತ್ತೇ ಪಞ್ಞಾಪಯಮಾನೋ ಪಞ್ಞಾಪೇಯ್ಯಾತಿ। ಅತ್ಥಿ ನು ಖೋ ಸಾ, ಭನ್ತೇ, ಜಿವ್ಹಾ…ಪೇ॰… ಅತ್ಥಿ ನು ಖೋ ಸೋ, ಭನ್ತೇ, ಮನೋ ಯೇನ ಮನೇನ ಅತೀತೇ ಬುದ್ಧೇ ಪರಿನಿಬ್ಬುತೇ ಛಿನ್ನಪಪಞ್ಚೇ ಛಿನ್ನವಟುಮೇ ಪರಿಯಾದಿನ್ನವಟ್ಟೇ ಸಬ್ಬದುಕ್ಖವೀತಿವತ್ತೇ ಪಞ್ಞಾಪಯಮಾನೋ ಪಞ್ಞಾಪೇಯ್ಯಾ’’ತಿ।
Atītaṃ atthīti? Āmantā. Nanu āyasmā phagguno bhagavantaṃ etadavoca – ‘‘atthi nu kho taṃ, bhante, cakkhuṃ yena cakkhunā atīte buddhe parinibbute chinnapapañce chinnavaṭume pariyādinnavaṭṭe sabbadukkhavītivatte paññāpayamāno paññāpeyyāti. Atthi nu kho sā, bhante, jivhā…pe… atthi nu kho so, bhante, mano yena manena atīte buddhe parinibbute chinnapapañce chinnavaṭume pariyādinnavaṭṭe sabbadukkhavītivatte paññāpayamāno paññāpeyyā’’ti.
‘‘ನತ್ಥಿ ಖೋ ತಂ, ಫಗ್ಗುನ, ಚಕ್ಖುಂ ಯೇನ ಚಕ್ಖುನಾ ಅತೀತೇ ಬುದ್ಧೇ ಪರಿನಿಬ್ಬುತೇ ಛಿನ್ನಪಪಞ್ಚೇ ಛಿನ್ನವಟುಮೇ ಪರಿಯಾದಿನ್ನವಟ್ಟೇ ಸಬ್ಬದುಕ್ಖವೀತಿವತ್ತೇ ಪಞ್ಞಾಪಯಮಾನೋ ಪಞ್ಞಾಪೇಯ್ಯ। ನತ್ಥಿ ಖೋ ಸಾ, ಫಗ್ಗುನ, ಜಿವ್ಹಾ…ಪೇ॰… ನತ್ಥಿ ನು ಖೋ ಸೋ, ಫಗ್ಗುನ, ಮನೋ ಯೇನ ಮನೇನ ಅತೀತೇ ಬುದ್ಧೇ ಪರಿನಿಬ್ಬುತೇ ಛಿನ್ನಪಪಞ್ಚೇ ಛಿನ್ನವಟುಮೇ ಪರಿಯಾದಿನ್ನವಟ್ಟೇ ಸಬ್ಬದುಕ್ಖವೀತಿವತ್ತೇ ಪಞ್ಞಾಪಯಮಾನೋ ಪಞ್ಞಾಪೇಯ್ಯಾ’’ತಿ 35। ಅತ್ಥೇವ ಸುತ್ತನ್ತೋತಿ? ಆಮನ್ತಾ। ತೇನ ಹಿ ನ ವತ್ತಬ್ಬಂ – ‘‘ಅತೀತಂ ಅತ್ಥೀ’’ತಿ।
‘‘Natthi kho taṃ, phagguna, cakkhuṃ yena cakkhunā atīte buddhe parinibbute chinnapapañce chinnavaṭume pariyādinnavaṭṭe sabbadukkhavītivatte paññāpayamāno paññāpeyya. Natthi kho sā, phagguna, jivhā…pe… natthi nu kho so, phagguna, mano yena manena atīte buddhe parinibbute chinnapapañce chinnavaṭume pariyādinnavaṭṭe sabbadukkhavītivatte paññāpayamāno paññāpeyyā’’ti 36. Attheva suttantoti? Āmantā. Tena hi na vattabbaṃ – ‘‘atītaṃ atthī’’ti.
ಅತೀತಂ ಅತ್ಥೀತಿ? ಆಮನ್ತಾ। ನನು ಆಯಸ್ಮಾ ನನ್ದಕೋ ಏತದವೋಚ – ‘‘ಅಹು ಪುಬ್ಬೇ ಲೋಭೋ ತದಹು ಅಕುಸಲಂ, ಸೋ ಏತರಹಿ ನತ್ಥಿ, ಇಚ್ಚೇತಂ ಕುಸಲಂ। ಅಹು ಪುಬ್ಬೇ ದೋಸೋ… ಅಹು ಪುಬ್ಬೇ ಮೋಹೋ, ತದಹು ಅಕುಸಲಂ, ಸೋ ಏತರಹಿ ನತ್ಥಿ, ಇಚ್ಚೇತಂ ಕುಸಲ’’ನ್ತಿ 37। ಅತ್ಥೇವ ಸುತ್ತನ್ತೋತಿ? ಆಮನ್ತಾ। ತೇನ ಹಿ ನ ವತ್ತಬ್ಬಂ – ‘‘ಅತೀತಂ ಅತ್ಥೀ’’ತಿ।
Atītaṃ atthīti? Āmantā. Nanu āyasmā nandako etadavoca – ‘‘ahu pubbe lobho tadahu akusalaṃ, so etarahi natthi, iccetaṃ kusalaṃ. Ahu pubbe doso… ahu pubbe moho, tadahu akusalaṃ, so etarahi natthi, iccetaṃ kusala’’nti 38. Attheva suttantoti? Āmantā. Tena hi na vattabbaṃ – ‘‘atītaṃ atthī’’ti.
ನ ವತ್ತಬ್ಬಂ – ‘‘ಅನಾಗತಂ ಅತ್ಥೀ’’ತಿ? ಆಮನ್ತಾ। ನನು ವುತ್ತಂ ಭಗವತಾ – ‘‘ಕಬಳೀಕಾರೇ ಚೇ, ಭಿಕ್ಖವೇ, ಆಹಾರೇ ಅತ್ಥಿ ರಾಗೋ, ಅತ್ಥಿ ನನ್ದೀ, ಅತ್ಥಿ ತಣ್ಹಾ; ಪತಿಟ್ಠಿತಂ ತತ್ಥ ವಿಞ್ಞಾಣಂ ವಿರೂಳ್ಹಂ। ಯತ್ಥ ಪತಿಟ್ಠಿತಂ ವಿಞ್ಞಾಣಂ ವಿರೂಳ್ಹಂ, ಅತ್ಥಿ ತತ್ಥ ನಾಮರೂಪಸ್ಸ ಅವಕ್ಕನ್ತಿ। ಯತ್ಥ ಅತ್ಥಿ ನಾಮರೂಪಸ್ಸ ಅವಕ್ಕನ್ತಿ, ಅತ್ಥಿ ತತ್ಥ ಸಙ್ಖಾರಾನಂ ವುದ್ಧಿ। ಯತ್ಥ ಅತ್ಥಿ ಸಙ್ಖಾರಾನಂ ವುದ್ಧಿ, ಅತ್ಥಿ ತತ್ಥ ಆಯತಿಂ ಪುನಬ್ಭವಾಭಿನಿಬ್ಬತ್ತಿ। ಯತ್ಥ ಅತ್ಥಿ ಆಯತಿಂ ಪುನಬ್ಭವಾಭಿನಿಬ್ಬತ್ತಿ, ಅತ್ಥಿ ತತ್ಥ ಆಯತಿಂ ಜಾತಿಜರಾಮರಣಂ। ಯತ್ಥ ಅತ್ಥಿ ಆಯತಿಂ ಜಾತಿಜರಾಮರಣಂ, ಸಸೋಕಂ ತಂ, ಭಿಕ್ಖವೇ, ಸರಜಂ 39 ಸಉಪಾಯಾಸನ್ತಿ ವದಾಮಿ।
Na vattabbaṃ – ‘‘anāgataṃ atthī’’ti? Āmantā. Nanu vuttaṃ bhagavatā – ‘‘kabaḷīkāre ce, bhikkhave, āhāre atthi rāgo, atthi nandī, atthi taṇhā; patiṭṭhitaṃ tattha viññāṇaṃ virūḷhaṃ. Yattha patiṭṭhitaṃ viññāṇaṃ virūḷhaṃ, atthi tattha nāmarūpassa avakkanti. Yattha atthi nāmarūpassa avakkanti, atthi tattha saṅkhārānaṃ vuddhi. Yattha atthi saṅkhārānaṃ vuddhi, atthi tattha āyatiṃ punabbhavābhinibbatti. Yattha atthi āyatiṃ punabbhavābhinibbatti, atthi tattha āyatiṃ jātijarāmaraṇaṃ. Yattha atthi āyatiṃ jātijarāmaraṇaṃ, sasokaṃ taṃ, bhikkhave, sarajaṃ 40 saupāyāsanti vadāmi.
‘‘ಫಸ್ಸೇ ಚೇ, ಭಿಕ್ಖವೇ, ಆಹಾರೇ… ಮನೋಸಞ್ಚೇತನಾಯ ಚೇ, ಭಿಕ್ಖವೇ, ಆಹಾರೇ… ವಿಞ್ಞಾಣೇ ಚೇ, ಭಿಕ್ಖವೇ, ಆಹಾರೇ ಅತ್ಥಿ ರಾಗೋ, ಅತ್ಥಿ ನನ್ದೀ…ಪೇ॰… ಸರಜಂ ಸಉಪಾಯಾಸನ್ತಿ ವದಾಮೀ’’ತಿ 41। ಅತ್ಥೇವ ಸುತ್ತನ್ತೋತಿ? ಆಮನ್ತಾ । ತೇನ ಹಿ ಅನಾಗತಂ ಅತ್ಥೀತಿ।
‘‘Phasse ce, bhikkhave, āhāre… manosañcetanāya ce, bhikkhave, āhāre… viññāṇe ce, bhikkhave, āhāre atthi rāgo, atthi nandī…pe… sarajaṃ saupāyāsanti vadāmī’’ti 42. Attheva suttantoti? Āmantā . Tena hi anāgataṃ atthīti.
ಅನಾಗತಂ ಅತ್ಥೀತಿ? ಆಮನ್ತಾ। ನನು ವುತ್ತಂ ಭಗವತಾ – ‘‘ಕಬಳೀಕಾರೇ ಚೇ, ಭಿಕ್ಖವೇ, ಆಹಾರೇ ನತ್ಥಿ ರಾಗೋ, ನತ್ಥಿ ನನ್ದೀ, ನತ್ಥಿ ತಣ್ಹಾ; ಅಪ್ಪತಿಟ್ಠಿತಂ ತತ್ಥ ವಿಞ್ಞಾಣಂ ಅವಿರೂಳ್ಹಂ। ಯತ್ಥ ವಿಞ್ಞಾಣಂ ಅಪ್ಪತಿಟ್ಠಿತಂ ಅವಿರೂಳ್ಹಂ, ನತ್ಥಿ ತತ್ಥ ನಾಮರೂಪಸ್ಸ ಅವಕ್ಕನ್ತಿ। ಯತ್ಥ ನತ್ಥಿ ನಾಮರೂಪಸ್ಸ ಅವಕ್ಕನ್ತಿ, ನತ್ಥಿ ತತ್ಥ ಸಙ್ಖಾರಾನಂ ವುದ್ಧಿ। ಯತ್ಥ ನತ್ಥಿ ಸಙ್ಖಾರಾನಂ ವುದ್ಧಿ, ನತ್ಥಿ ತತ್ಥ ಆಯತಿಂ ಪುನಬ್ಭವಾಭಿನಿಬ್ಬತ್ತಿ। ಯತ್ಥ ನತ್ಥಿ ಆಯತಿಂ ಪುನಬ್ಭವಾಭಿನಿಬ್ಬತ್ತಿ, ನತ್ಥಿ ತತ್ಥ ಆಯತಿಂ ಜಾತಿಜರಾಮರಣಂ। ಯತ್ಥ ನತ್ಥಿ ಆಯತಿಂ ಜಾತಿಜರಾಮರಣಂ, ಅಸೋಕಂ ತಂ, ಭಿಕ್ಖವೇ, ಅರಜಂ ಅನುಪಾಯಾಸನ್ತಿ ವದಾಮಿ।
Anāgataṃ atthīti? Āmantā. Nanu vuttaṃ bhagavatā – ‘‘kabaḷīkāre ce, bhikkhave, āhāre natthi rāgo, natthi nandī, natthi taṇhā; appatiṭṭhitaṃ tattha viññāṇaṃ avirūḷhaṃ. Yattha viññāṇaṃ appatiṭṭhitaṃ avirūḷhaṃ, natthi tattha nāmarūpassa avakkanti. Yattha natthi nāmarūpassa avakkanti, natthi tattha saṅkhārānaṃ vuddhi. Yattha natthi saṅkhārānaṃ vuddhi, natthi tattha āyatiṃ punabbhavābhinibbatti. Yattha natthi āyatiṃ punabbhavābhinibbatti, natthi tattha āyatiṃ jātijarāmaraṇaṃ. Yattha natthi āyatiṃ jātijarāmaraṇaṃ, asokaṃ taṃ, bhikkhave, arajaṃ anupāyāsanti vadāmi.
‘‘ಫಸ್ಸೇ ಚೇ, ಭಿಕ್ಖವೇ, ಆಹಾರೇ… ಮನೋಸಞ್ಚೇತನಾಯ ಚೇ, ಭಿಕ್ಖವೇ, ಆಹಾರೇ… ವಿಞ್ಞಾಣೇ ಚೇ, ಭಿಕ್ಖವೇ, ಆಹಾರೇ ನತ್ಥಿ ರಾಗೋ, ನತ್ಥಿ ನನ್ದೀ…ಪೇ॰… ಅರಜಂ ಅನುಪಾಯಾಸನ್ತಿ ವದಾಮೀ’’ತಿ 43। ಅತ್ಥೇವ ಸುತ್ತನ್ತೋತಿ? ಆಮನ್ತಾ। ತೇನ ಹಿ ನ ವತ್ತಬ್ಬಂ – ‘‘ಅನಾಗತಂ ಅತ್ಥೀ’’ತಿ।
‘‘Phasse ce, bhikkhave, āhāre… manosañcetanāya ce, bhikkhave, āhāre… viññāṇe ce, bhikkhave, āhāre natthi rāgo, natthi nandī…pe… arajaṃ anupāyāsanti vadāmī’’ti 44. Attheva suttantoti? Āmantā. Tena hi na vattabbaṃ – ‘‘anāgataṃ atthī’’ti.
ಸಬ್ಬಮತ್ಥೀತಿಕಥಾ ನಿಟ್ಠಿತಾ।
Sabbamatthītikathā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೫. ಸಬ್ಬಮತ್ಥೀತಿಕಥಾ • 5. Sabbamatthītikathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೫. ಸಬ್ಬಮತ್ಥೀತಿಕಥಾ • 5. Sabbamatthītikathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೫. ಸಬ್ಬಮತ್ಥೀತಿಕಥಾವಣ್ಣನಾ • 5. Sabbamatthītikathāvaṇṇanā
