| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
१७. सत्तरसमवग्गो
17. Sattarasamavaggo
(१६८) ३. सब्बमिदं कम्मतोतिकथा
(168) 3. Sabbamidaṃ kammatotikathā
७८३. सब्बमिदं कम्मतोति? आमन्ता। कम्मम्पि कम्मतोति? न हेवं वत्तब्बे…पे॰… सब्बमिदं कम्मतोति? आमन्ता। सब्बमिदं पुब्बेकतहेतूति? न हेवं वत्तब्बे…पे॰… सब्बमिदं कम्मतोति? आमन्ता। सब्बमिदं कम्मविपाकतोति? न हेवं वत्तब्बे…पे॰…।
783. Sabbamidaṃ kammatoti? Āmantā. Kammampi kammatoti? Na hevaṃ vattabbe…pe… sabbamidaṃ kammatoti? Āmantā. Sabbamidaṃ pubbekatahetūti? Na hevaṃ vattabbe…pe… sabbamidaṃ kammatoti? Āmantā. Sabbamidaṃ kammavipākatoti? Na hevaṃ vattabbe…pe….
७८४. सब्बमिदं कम्मविपाकतोति? आमन्ता। कम्मविपाकेन पाणं हनेय्याति? आमन्ता। पाणातिपातो सफलोति? आमन्ता। कम्मविपाको सफलोति? न हेवं वत्तब्बे…पे॰… कम्मविपाको अफलोति? आमन्ता। पाणातिपातो अफलोति? न हेवं वत्तब्बे…पे॰…।
784. Sabbamidaṃ kammavipākatoti? Āmantā. Kammavipākena pāṇaṃ haneyyāti? Āmantā. Pāṇātipāto saphaloti? Āmantā. Kammavipāko saphaloti? Na hevaṃ vattabbe…pe… kammavipāko aphaloti? Āmantā. Pāṇātipāto aphaloti? Na hevaṃ vattabbe…pe….
कम्मविपाकेन अदिन्नं आदियेय्य…पे॰… मुसा भणेय्य… पिसुणं भणेय्य… फरुसं भणेय्य… सम्फं पलपेय्य… सन्धिं छिन्देय्य… निल्लोपं हरेय्य… एकागारिकं करेय्य… परिपन्थे तिट्ठेय्य… परदारं गच्छेय्य… गामघातकं करेय्य… निगमघातकं करेय्य… कम्मविपाकेन दानं ददेय्य… चीवरं ददेय्य … पिण्डपातं ददेय्य… सेनासनं ददेय्य… गिलानपच्चयभेसज्जपरिक्खारं ददेय्याति? आमन्ता। गिलानपच्चयभेसज्जपरिक्खारो सफलोति? आमन्ता। कम्मविपाको सफलोति? न हेवं वत्तब्बे…पे॰… कम्मविपाको अफलोति? आमन्ता। गिलानपच्चयभेसज्जपरिक्खारो अफलोति? न हेवं वत्तब्बे…पे॰…।
Kammavipākena adinnaṃ ādiyeyya…pe… musā bhaṇeyya… pisuṇaṃ bhaṇeyya… pharusaṃ bhaṇeyya… samphaṃ palapeyya… sandhiṃ chindeyya… nillopaṃ hareyya… ekāgārikaṃ kareyya… paripanthe tiṭṭheyya… paradāraṃ gaccheyya… gāmaghātakaṃ kareyya… nigamaghātakaṃ kareyya… kammavipākena dānaṃ dadeyya… cīvaraṃ dadeyya … piṇḍapātaṃ dadeyya… senāsanaṃ dadeyya… gilānapaccayabhesajjaparikkhāraṃ dadeyyāti? Āmantā. Gilānapaccayabhesajjaparikkhāro saphaloti? Āmantā. Kammavipāko saphaloti? Na hevaṃ vattabbe…pe… kammavipāko aphaloti? Āmantā. Gilānapaccayabhesajjaparikkhāro aphaloti? Na hevaṃ vattabbe…pe….
७८५. न वत्तब्बं – ‘‘सब्बमिदं कम्मतो’’ति? आमन्ता। ननु वुत्तं भगवता –
785. Na vattabbaṃ – ‘‘sabbamidaṃ kammato’’ti? Āmantā. Nanu vuttaṃ bhagavatā –
‘‘कम्मेन कित्तिं लभते पसंसं,
‘‘Kammena kittiṃ labhate pasaṃsaṃ,
कम्मेन जानिञ्च वधञ्च बन्धं।
Kammena jāniñca vadhañca bandhaṃ;
तं कम्मं नानाकरणं विदित्वा,
Taṃ kammaṃ nānākaraṇaṃ viditvā,
कस्मा वदे नत्थि कम्मन्ति लोके’’ति॥
Kasmā vade natthi kammanti loke’’ti.
अत्थेव सुत्तन्तोति? आमन्ता। तेन हि ‘‘सब्बमिदं कम्मतो’’ति।
Attheva suttantoti? Āmantā. Tena hi ‘‘sabbamidaṃ kammato’’ti.
सब्बमिदं कम्मतोतिकथा निट्ठिता।
Sabbamidaṃ kammatotikathā niṭṭhitā.
Footnotes:
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ३. सब्बमिदं कम्मतोतिकथावण्णना • 3. Sabbamidaṃ kammatotikathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / ३. सब्बमिदंकम्मतोतिकथावण्णना • 3. Sabbamidaṃkammatotikathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ३. सब्बमिदंकम्मतोतिकथावण्णना • 3. Sabbamidaṃkammatotikathāvaṇṇanā
