| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
17. සත්‌තරසමවග්‌ගො
17. Sattarasamavaggo
(168) 3. සබ්‌බමිදං කම්‌මතොතිකථා
(168) 3. Sabbamidaṃ kammatotikathā
783. සබ්‌බමිදං කම්‌මතොති? ආමන්‌තා. කම්‌මම්‌පි කම්‌මතොති? න හෙවං වත්‌තබ්‌බෙ…පෙ.… සබ්‌බමිදං කම්‌මතොති? ආමන්‌තා. සබ්‌බමිදං පුබ්‌බෙකතහෙතූති? න හෙවං වත්‌තබ්‌බෙ…පෙ.… සබ්‌බමිදං කම්‌මතොති? ආමන්‌තා. සබ්‌බමිදං කම්‌මවිපාකතොති? න හෙවං වත්‌තබ්‌බෙ…පෙ.….
783. Sabbamidaṃ kammatoti? Āmantā. Kammampi kammatoti? Na hevaṃ vattabbe…pe… sabbamidaṃ kammatoti? Āmantā. Sabbamidaṃ pubbekatahetūti? Na hevaṃ vattabbe…pe… sabbamidaṃ kammatoti? Āmantā. Sabbamidaṃ kammavipākatoti? Na hevaṃ vattabbe…pe….
784. සබ්‌බමිදං කම්‌මවිපාකතොති? ආමන්‌තා. කම්‌මවිපාකෙන පාණං හනෙය්‍යාති? ආමන්‌තා. පාණාතිපාතො සඵලොති? ආමන්‌තා. කම්‌මවිපාකො සඵලොති? න හෙවං වත්‌තබ්‌බෙ…පෙ.… කම්‌මවිපාකො අඵලොති? ආමන්‌තා. පාණාතිපාතො අඵලොති? න හෙවං වත්‌තබ්‌බෙ…පෙ.….
784. Sabbamidaṃ kammavipākatoti? Āmantā. Kammavipākena pāṇaṃ haneyyāti? Āmantā. Pāṇātipāto saphaloti? Āmantā. Kammavipāko saphaloti? Na hevaṃ vattabbe…pe… kammavipāko aphaloti? Āmantā. Pāṇātipāto aphaloti? Na hevaṃ vattabbe…pe….
කම්‌මවිපාකෙන අදින්‌නං ආදියෙය්‍ය…පෙ.… මුසා භණෙය්‍ය… පිසුණං භණෙය්‍ය… ඵරුසං භණෙය්‍ය… සම්‌ඵං පලපෙය්‍ය… සන්‌ධිං ඡින්‌දෙය්‍ය… නිල්‌ලොපං හරෙය්‍ය… එකාගාරිකං කරෙය්‍ය… පරිපන්‌ථෙ තිට්‌ඨෙය්‍ය… පරදාරං ගච්‌ඡෙය්‍ය… ගාමඝාතකං කරෙය්‍ය… නිගමඝාතකං කරෙය්‍ය… කම්‌මවිපාකෙන දානං දදෙය්‍ය… චීවරං දදෙය්‍ය … පිණ්‌ඩපාතං දදෙය්‍ය… සෙනාසනං දදෙය්‍ය… ගිලානපච්‌චයභෙසජ්‌ජපරික්‌ඛාරං දදෙය්‍යාති? ආමන්‌තා. ගිලානපච්‌චයභෙසජ්‌ජපරික්‌ඛාරො සඵලොති? ආමන්‌තා. කම්‌මවිපාකො සඵලොති? න හෙවං වත්‌තබ්‌බෙ…පෙ.… කම්‌මවිපාකො අඵලොති? ආමන්‌තා. ගිලානපච්‌චයභෙසජ්‌ජපරික්‌ඛාරො අඵලොති? න හෙවං වත්‌තබ්‌බෙ…පෙ.….
Kammavipākena adinnaṃ ādiyeyya…pe… musā bhaṇeyya… pisuṇaṃ bhaṇeyya… pharusaṃ bhaṇeyya… samphaṃ palapeyya… sandhiṃ chindeyya… nillopaṃ hareyya… ekāgārikaṃ kareyya… paripanthe tiṭṭheyya… paradāraṃ gaccheyya… gāmaghātakaṃ kareyya… nigamaghātakaṃ kareyya… kammavipākena dānaṃ dadeyya… cīvaraṃ dadeyya … piṇḍapātaṃ dadeyya… senāsanaṃ dadeyya… gilānapaccayabhesajjaparikkhāraṃ dadeyyāti? Āmantā. Gilānapaccayabhesajjaparikkhāro saphaloti? Āmantā. Kammavipāko saphaloti? Na hevaṃ vattabbe…pe… kammavipāko aphaloti? Āmantā. Gilānapaccayabhesajjaparikkhāro aphaloti? Na hevaṃ vattabbe…pe….
785. න වත්‌තබ්‌බං – ‘‘සබ්‌බමිදං කම්‌මතො’’ති? ආමන්‌තා. නනු වුත්‌තං භගවතා –
785. Na vattabbaṃ – ‘‘sabbamidaṃ kammato’’ti? Āmantā. Nanu vuttaṃ bhagavatā –
‘‘කම්‌මෙන කිත්‌තිං ලභතෙ පසංසං,
‘‘Kammena kittiṃ labhate pasaṃsaṃ,
කම්‌මෙන ජානිඤ්‌ච වධඤ්‌ච බන්‌ධං;
Kammena jāniñca vadhañca bandhaṃ;
තං කම්‌මං නානාකරණං විදිත්‌වා,
Taṃ kammaṃ nānākaraṇaṃ viditvā,
කස්‌මා වදෙ නත්‌ථි කම්‌මන්‌ති ලොකෙ’’ති.
Kasmā vade natthi kammanti loke’’ti.
අත්‌ථෙව සුත්‌තන්‌තොති? ආමන්‌තා. තෙන හි ‘‘සබ්‌බමිදං කම්‌මතො’’ති.
Attheva suttantoti? Āmantā. Tena hi ‘‘sabbamidaṃ kammato’’ti.
සබ්‌බමිදං කම්‌මතොතිකථා නිට්‌ඨිතා.
Sabbamidaṃ kammatotikathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 3. සබ්‌බමිදං කම්‌මතොතිකථාවණ්‌ණනා • 3. Sabbamidaṃ kammatotikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 3. සබ්‌බමිදංකම්‌මතොතිකථාවණ්‌ණනා • 3. Sabbamidaṃkammatotikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 3. සබ්‌බමිදංකම්‌මතොතිකථාවණ්‌ණනා • 3. Sabbamidaṃkammatotikathāvaṇṇanā
