| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၂၈. သဗ္ဗနီလကာဒိပဋိက္ခေပကထာ
228. Sabbanīlakādipaṭikkhepakathā
၃၇၂. တေန ခော ပန သမယေန ဆဗ္ဗဂ္ဂိယာ ဘိက္ခူ သဗ္ဗနီလကာနိ စီဝရာနိ ဓာရေန္တိ။ပေ.။ သဗ္ဗပီတကာနိ စီဝရာနိ ဓာရေန္တိ။ပေ.။ သဗ္ဗလောဟိတကာနိ စီဝရာနိ ဓာရေန္တိ။ပေ.။ သဗ္ဗမဉ္ဇိဋ္ဌကာနိ 1 စီဝရာနိ ဓာရေန္တိ။ပေ.။ သဗ္ဗကဏ္ဟာနိ စီဝရာနိ ဓာရေန္တိ ။ပေ.။ သဗ္ဗမဟာရင္ဂရတ္တာနိ စီဝရာနိ ဓာရေန္တိ။ပေ.။ သဗ္ဗမဟာနာမရတ္တာနိ စီဝရာနိ ဓာရေန္တိ။ပေ.။ အစ္ဆိန္နဒသာနိ စီဝရာနိ ဓာရေန္တိ။ပေ.။ ဒီဃဒသာနိ စီဝရာနိ ဓာရေန္တိ။ပေ.။ ပုပ္ဖဒသာနိ စီဝရာနိ ဓာရေန္တိ။ပေ.။ ဖဏဒသာနိ 2 စီဝရာနိ ဓာရေန္တိ။ပေ.။ ကဉ္စုကံ ဓာရေန္တိ။ပေ.။ တိရီဋကံ ဓာရေန္တိ။ပေ.။ ဝေဌနံ ဓာရေန္တိ။ မနုသ္သာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ သမဏာ သက္ယပုတ္တိယာ ဝေဌနံ ဓာရေသ္သန္တိ, သေယ္ယထာပိ ဂိဟီ ကာမဘောဂိနော’’တိ။ ဘဂဝတော ဧတမတ္ထံ အာရောစေသုံ ။ န, ဘိက္ခဝေ, သဗ္ဗနီလကာနိ စီဝရာနိ ဓာရေတဗ္ဗာနိ, န သဗ္ဗပီတကာနိ စီဝရာနိ ဓာရေတဗ္ဗာနိ, န သဗ္ဗလောဟိတကာနိ စီဝရာနိ ဓာရေတဗ္ဗာနိ, န သဗ္ဗမဉ္ဇိဋ္ဌကာနိ စီဝရာနိ ဓာရေတဗ္ဗာနိ, န သဗ္ဗကဏ္ဟာနိ စီဝရာနိ ဓာရေတဗ္ဗာနိ, န သဗ္ဗမဟာရင္ဂရတ္တာနိ စီဝရာနိ ဓာရေတဗ္ဗာနိ, န သဗ္ဗမဟာနာမရတ္တာနိ စီဝရာနိ ဓာရေတဗ္ဗာနိ, န အစ္ဆိန္နဒသာနိ စီဝရာနိ ဓာရေတဗ္ဗာနိ, န ဒီဃဒသာနိ စီဝရာနိ ဓာရေတဗ္ဗာနိ, န ပုပ္ဖဒသာနိ စီဝရာနိ ဓာရေတဗ္ဗာနိ, န ဖဏဒသာနိ စီဝရာနိ ဓာရေတဗ္ဗာနိ, န ကဉ္စုကံ ဓာရေတဗ္ဗံ, န တိရီဋကံ ဓာရေတဗ္ဗံ, န ဝေဌနံ ဓာရေတဗ္ဗံ။ ယော ဓာရေယ္ယ, အာပတ္တိ ဒုက္ကဋသ္သာတိ။
372. Tena kho pana samayena chabbaggiyā bhikkhū sabbanīlakāni cīvarāni dhārenti…pe… sabbapītakāni cīvarāni dhārenti…pe… sabbalohitakāni cīvarāni dhārenti…pe… sabbamañjiṭṭhakāni 3 cīvarāni dhārenti…pe… sabbakaṇhāni cīvarāni dhārenti …pe… sabbamahāraṅgarattāni cīvarāni dhārenti…pe… sabbamahānāmarattāni cīvarāni dhārenti…pe… acchinnadasāni cīvarāni dhārenti…pe… dīghadasāni cīvarāni dhārenti…pe… pupphadasāni cīvarāni dhārenti…pe… phaṇadasāni 4 cīvarāni dhārenti…pe… kañcukaṃ dhārenti…pe… tirīṭakaṃ dhārenti…pe… veṭhanaṃ dhārenti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā veṭhanaṃ dhāressanti, seyyathāpi gihī kāmabhogino’’ti. Bhagavato etamatthaṃ ārocesuṃ . Na, bhikkhave, sabbanīlakāni cīvarāni dhāretabbāni, na sabbapītakāni cīvarāni dhāretabbāni, na sabbalohitakāni cīvarāni dhāretabbāni, na sabbamañjiṭṭhakāni cīvarāni dhāretabbāni, na sabbakaṇhāni cīvarāni dhāretabbāni, na sabbamahāraṅgarattāni cīvarāni dhāretabbāni, na sabbamahānāmarattāni cīvarāni dhāretabbāni, na acchinnadasāni cīvarāni dhāretabbāni, na dīghadasāni cīvarāni dhāretabbāni, na pupphadasāni cīvarāni dhāretabbāni, na phaṇadasāni cīvarāni dhāretabbāni, na kañcukaṃ dhāretabbaṃ, na tirīṭakaṃ dhāretabbaṃ, na veṭhanaṃ dhāretabbaṃ. Yo dhāreyya, āpatti dukkaṭassāti.
သဗ္ဗနီလကာဒိပဋိက္ခေပကထာ နိဋ္ဌိတာ။
Sabbanīlakādipaṭikkhepakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ကုသစီရာဒိပဋိက္ခေပကထာ • Kusacīrādipaṭikkhepakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / မတသန္တကကထာဒိဝဏ္ဏနာ • Matasantakakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂၂၇. ကုသစီရာဒိပဋိက္ခေပကထာ • 227. Kusacīrādipaṭikkhepakathā
