| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ஸப்³ப³னீலிகாதி³படிக்கே²பகதா²
Sabbanīlikādipaṭikkhepakathā
246. ஸப்³ப³னீலிகாதி ஸப்³பா³வ நீலிகா. ஏஸ நயோ ஸப்³ப³பீதிகாதீ³ஸுபி. தத்த² ச நீலிகா உமாபுப்ப²வண்ணா ஹோதி, பீதிகா கணிகாரபுப்ப²வண்ணா, லோஹிதிகா ஜயஸுமனபுப்ப²வண்ணா , மஞ்ஜிட்டி²கா மஞ்ஜிட்ட²வண்ணா ஏவ, கண்ஹா அத்³தா³ரிட்ட²கவண்ணா, மஹாரங்க³ரத்தா ஸதபதி³பிட்டி²வண்ணா, மஹானாமரத்தா ஸம்பி⁴ன்னவண்ணா ஹோதி பண்டு³பலாஸவண்ணா. குருந்தி³யங் பன ‘‘பது³மபுப்ப²வண்ணா’’தி வுத்தா. ஏதாஸு யங்கிஞ்சி லபி⁴த்வா ரஜனங் சோளகேன புஞ்சி²த்வா வண்ணங் பி⁴ந்தி³த்வா தா⁴ரேதுங் வட்டதி. அப்பமத்தகேபி பி⁴ன்னே வட்டதியேவ.
246.Sabbanīlikāti sabbāva nīlikā. Esa nayo sabbapītikādīsupi. Tattha ca nīlikā umāpupphavaṇṇā hoti, pītikā kaṇikārapupphavaṇṇā, lohitikā jayasumanapupphavaṇṇā , mañjiṭṭhikā mañjiṭṭhavaṇṇā eva, kaṇhā addāriṭṭhakavaṇṇā, mahāraṅgarattā satapadipiṭṭhivaṇṇā, mahānāmarattā sambhinnavaṇṇā hoti paṇḍupalāsavaṇṇā. Kurundiyaṃ pana ‘‘padumapupphavaṇṇā’’ti vuttā. Etāsu yaṃkiñci labhitvā rajanaṃ coḷakena puñchitvā vaṇṇaṃ bhinditvā dhāretuṃ vaṭṭati. Appamattakepi bhinne vaṭṭatiyeva.
நீலகவத்³தி⁴காதி யாஸங் வத்³தா⁴யேவ நீலா. ஏஸேவ நயோ ஸப்³ப³த்த². ஏதாபி வண்ணபே⁴த³ங் கத்வா தா⁴ரேதப்³பா³. க²ல்லகப³த்³தா⁴தி பண்ஹிபிதா⁴னத்த²ங் தலே க²ல்லகங் ப³ந்தி⁴த்வா கதா. புடப³த்³தா⁴தி யோனகஉபாஹனா வுச்சதி, யா யாவஜங்க⁴தோ ஸப்³ப³பாத³ங் படிச்சா²தே³தி. பாலிகு³ண்டி²மாதி பலிகு³ண்டி²த்வா கதா; யா உபரி பாத³மத்தமேவ படிச்சா²தே³தி, ந ஜங்க⁴ங். தூலபுண்ணிகாதி தூலபிசுனா பூரெத்வா கதா. தித்திரபத்திகாதி தித்திரபத்தஸதி³ஸா விசித்தப³த்³தா⁴. மெண்ட³விஸாணவத்³தி⁴காதி கண்ணிகட்டா²னே மெண்ட³கஸிங்க³ஸண்டா²னே வத்³தே⁴ யோஜெத்வா கதா. அஜவிஸாணவத்³தி⁴காதீ³ஸுபி ஏஸேவ நயோ. விச்சி²காளிகாபி தத்தே²வ விச்சி²கனங்கு³ட்ட²ஸண்டா²னே வத்³தே⁴ யோஜெத்வா கதா. மோரபிஞ்ச²பரிஸிப்³பி³தாதி தலேஸு வா வத்³தே⁴ஸு வா மோரபிஞ்சே²ஹி ஸுத்தகஸதி³ஸேஹி பரிஸிப்³பி³தா. சித்ராதி விசித்ரா; ஏதாஸு யங்கிஞ்சி லபி⁴த்வா, ஸசே தானி க²ல்லகாதீ³னி அபனெத்வா ஸக்கா ஹொந்தி வளஞ்ஜிதுங், வளஞ்ஜேதப்³பா³. தேஸு பன ஸதி வளஞ்ஜந்தஸ்ஸ து³க்கடங். ஸீஹசம்மபரிக்க²டா நாம பரியந்தேஸு சீவரே அனுவாதங் விய ஸீஹசம்மங் யோஜெத்வா கதா. லூவகசம்மபரிக்க²டாதி பக்கி²பி³ளாலசம்மபரிக்க²டா . ஏதாஸுபி யா காசி லபி⁴த்வா தங் சம்மங் அபனெத்வா தா⁴ரேதப்³பா³.
Nīlakavaddhikāti yāsaṃ vaddhāyeva nīlā. Eseva nayo sabbattha. Etāpi vaṇṇabhedaṃ katvā dhāretabbā. Khallakabaddhāti paṇhipidhānatthaṃ tale khallakaṃ bandhitvā katā. Puṭabaddhāti yonakaupāhanā vuccati, yā yāvajaṅghato sabbapādaṃ paṭicchādeti. Pāliguṇṭhimāti paliguṇṭhitvā katā; yā upari pādamattameva paṭicchādeti, na jaṅghaṃ. Tūlapuṇṇikāti tūlapicunā pūretvā katā. Tittirapattikāti tittirapattasadisā vicittabaddhā. Meṇḍavisāṇavaddhikāti kaṇṇikaṭṭhāne meṇḍakasiṅgasaṇṭhāne vaddhe yojetvā katā. Ajavisāṇavaddhikādīsupi eseva nayo. Vicchikāḷikāpi tattheva vicchikanaṅguṭṭhasaṇṭhāne vaddhe yojetvā katā. Morapiñchaparisibbitāti talesu vā vaddhesu vā morapiñchehi suttakasadisehi parisibbitā. Citrāti vicitrā; etāsu yaṃkiñci labhitvā, sace tāni khallakādīni apanetvā sakkā honti vaḷañjituṃ, vaḷañjetabbā. Tesu pana sati vaḷañjantassa dukkaṭaṃ. Sīhacammaparikkhaṭā nāma pariyantesu cīvare anuvātaṃ viya sīhacammaṃ yojetvā katā. Lūvakacammaparikkhaṭāti pakkhibiḷālacammaparikkhaṭā . Etāsupi yā kāci labhitvā taṃ cammaṃ apanetvā dhāretabbā.
247. ஓமுக்கந்தி படிமுஞ்சித்வா அபனீதங். நவாதி அபரிபு⁴த்தா.
247.Omukkanti paṭimuñcitvā apanītaṃ. Navāti aparibhuttā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
149. ஸப்³ப³னீலிகாதி³படிக்கே²போ • 149. Sabbanīlikādipaṭikkhepo
150. ஓமுக்ககு³ணங்கு³ணூபாஹனானுஜானநா • 150. Omukkaguṇaṅguṇūpāhanānujānanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸப்³ப³னீலிகாதி³படிக்கே²பகதா²வண்ணனா • Sabbanīlikādipaṭikkhepakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸப்³ப³னீலிகாதி³படிக்கே²பகதா²வண்ணனா • Sabbanīlikādipaṭikkhepakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / தி³கு³ணாதி³உபாஹனபடிக்கே²பகதா²வண்ணனா • Diguṇādiupāhanapaṭikkhepakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 149. ஸப்³ப³னீலிகாதி³படிக்கே²பகதா² • 149. Sabbanīlikādipaṭikkhepakathā
