| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
১৪৯. সব্বনীলিকাদিপটিক্খেপকথা
149. Sabbanīlikādipaṭikkhepakathā
২৪৬. সব্বাৰ নীলিকাতি সব্বাৰ উপাহনাযো নীলিকা, সব্বট্ঠানেসু নীলমেতাসন্তি সব্বনীলিকাতিপি কাতব্বো। তত্থ চাতি তেসু নীলিকাদীসু চ। উম্মারপুপ্ফস্স ৰণ্ণো ৰিয ৰণ্ণো এতিস্সাতি উম্মারপুপ্ফৰণ্ণা। এৰং সেসেসুপি। অদ্দারিট্ঠকৰণ্ণাতি এত্থ অদ্দোতি অল্লো। অরিট্ঠোতি ফেণিলরুক্খো ৰা কাকো ৰা, তস্মা অদ্দো অল্লো অরিট্ঠো ফেণিলরুক্খো, কাকো ৰাতি অদ্দারিট্ঠো, তদেৰ অদ্দারিট্ঠকো, অদ্দারিট্ঠকস্স ৰণ্ণো ৰিয ৰণ্ণো এতিস্সাতি অদ্দারিট্ঠকৰণ্ণা । এতাসূতি সব্বনীলিকাদীসু। পুঞ্ছিত্ৰাতি পরিমজ্জিত্ৰা। অপ্পমত্তকেনাপীতি পিসদ্দো সম্ভাৰনে। সব্বনীলাদিকে ভিন্নে কা নাম কথাতি অত্থো।
246.Sabbāva nīlikāti sabbāva upāhanāyo nīlikā, sabbaṭṭhānesu nīlametāsanti sabbanīlikātipi kātabbo. Tattha cāti tesu nīlikādīsu ca. Ummārapupphassa vaṇṇo viya vaṇṇo etissāti ummārapupphavaṇṇā. Evaṃ sesesupi. Addāriṭṭhakavaṇṇāti ettha addoti allo. Ariṭṭhoti pheṇilarukkho vā kāko vā, tasmā addo allo ariṭṭho pheṇilarukkho, kāko vāti addāriṭṭho, tadeva addāriṭṭhako, addāriṭṭhakassa vaṇṇo viya vaṇṇo etissāti addāriṭṭhakavaṇṇā . Etāsūti sabbanīlikādīsu. Puñchitvāti parimajjitvā. Appamattakenāpīti pisaddo sambhāvane. Sabbanīlādike bhinne kā nāma kathāti attho.
‘‘যাসং ৰদ্ধাযেৰ নীলা’’তি ইমিনা নীলকা ৰদ্ধিকা এতাসন্তি নীলকৰদ্ধিকাতি ছট্ঠীবাহিরত্থসমাসং দস্সেতি। ৰদ্ধিকাতি চ নদ্ধি। সা হি উপাহনতলতো ৰদ্ধযতীতি ৰদ্ধিকাতি চ উপাহনতলং বন্ধতি ইমাযাতি ৰদ্ধিকাতি চ ৰুচ্চতি। সব্বত্থাতি সব্বেসু পীতকৰদ্ধিকাদীসু। এতাযোপীতি নীলকৰদ্ধিকাদিকা উপাহনাযোপি। তলেতি উপাহনায তলে। ‘‘খল্লকং বন্ধিত্ৰা’’তি ইমিনা খল্লকেন বন্ধিতব্বাতি খল্লকবদ্ধাতি ৰচনত্থং দস্সেতি। যোনকউপাহনাতি যোনকজাতীনং মনুস্সানং উপাহনা। পলিগুণ্ঠেত্ৰাতি পরিসমন্ততো ৰেঠেত্ৰা। ‘‘উপরি…পে॰… জঙ্ঘ’’ন্তি ইমিনা পুটবদ্ধতো ৰিসেসং দস্সেতি। তূলপিচুনাতি তূলসঙ্খাতেন পিচুনা। ‘‘তিত্তিরপত্তসদিসা’’তি ইমিনা তিত্তিরস্স পত্তং ৰিয তিত্তিরপত্তিকাতি ৰচনত্থং দস্সেতি। তিত্তিরোতি চ একো সকুণৰিসেসো। কণ্ণিকট্ঠানেতি দ্ৰিন্নং ৰদ্ধিকানং একতো সমাগমট্ঠানে। ‘‘মেণ্ড…পে॰… কতা’’তি ইমিনা মেণ্ডস্স ৰিসাণেন সদিসা ৰদ্ধিকা এতাসন্তি মেণ্ডৰিসাণৰদ্ধিকাতি ৰচনত্থং দস্সেতি। তথেৰাতি যথা মেণ্ডঅজসিঙ্গসণ্ঠানে ৰদ্ধে যোজেত্ৰা কতা, তথেৰাতি অত্থো। ‘‘ৰিচ্ছিকা…পে॰… কতা’’তি ইমিনা ৰিচ্ছিকায অল়ো ৰিচ্ছিকাল়ো, সো ৰিয ৰদ্ধিকা এতাসন্তি ৰিচ্ছিকাল়িকাতি ৰচনত্থং দস্সেতি। অল়সদ্দো ‘‘অল়চ্ছিন্নো’’তিআদীসু (মহাৰ॰ ১১৯) অঙ্গুট্ঠৰাচকো, ইধ পন নঙ্গুট্ঠৰাচকো, তস্মা ৰুত্তং ‘‘নঙ্গুট্ঠসণ্ঠানে’’তি। তলেসূতি উপাহনায তলেসু। ‘‘মোর…পে॰… সিব্বিকা’’তি ইমিনা মোরপিঞ্ছেহি পরিসমন্ততো, পরিক্খিপিত্ৰা ৰা সিব্বিতা মোরপিঞ্ছপরিসিব্বিতাতি ৰচনত্থং দস্সেতি। চিত্রা উপাহনাযোতি এত্থ চিত্রসদ্দো ৰিচিত্রত্থোতি আহ ‘‘ৰিচিত্রা’’তি। এতাসূতি খল্লকবদ্ধাদীসু। ৰল়ঞ্জেতব্বাতি পরিভুঞ্জিতব্বা। ৰল়জি পরিভোগেতি ধাতুপাঠো (সদ্দনীতিধাতুমালাযং ১৫ জকারন্তধাতু)। তালুজো ততিযো। তেসু পনাতি খল্লকাদীসু পন। সতি সন্তেসূতি যোজনা। সীহচম্মেন পরিক্খিপিতব্বাতি সীহচম্মপরিক্খতাতি ৰচনত্থং দস্সেন্তো আহ ‘‘পরিযন্তেসূ’’তিআদি। পক্খিবিল়ালোতি তুলিযো। সো হি পক্খযুত্তত্তা চ বিল়ালমুখসদিসমুখত্তা চ পক্খিবিল়ালোতি ৰুচ্চতি। ইমিনা লুৰকচম্মপরিক্খতাতি এত্থ লুৰকসদ্দো পক্খিবিল়ালপরিযাযোতি দস্সেতি। ‘‘উলূকচম্মপরিক্খতা’’তিপি পাঠো। এতাসুপীতি সীহচম্মপরিক্খতাদীসুপি। যা কাচি উপাহনাযোতি সম্বন্ধো।
‘‘Yāsaṃ vaddhāyeva nīlā’’ti iminā nīlakā vaddhikā etāsanti nīlakavaddhikāti chaṭṭhībāhiratthasamāsaṃ dasseti. Vaddhikāti ca naddhi. Sā hi upāhanatalato vaddhayatīti vaddhikāti ca upāhanatalaṃ bandhati imāyāti vaddhikāti ca vuccati. Sabbatthāti sabbesu pītakavaddhikādīsu. Etāyopīti nīlakavaddhikādikā upāhanāyopi. Taleti upāhanāya tale. ‘‘Khallakaṃ bandhitvā’’ti iminā khallakena bandhitabbāti khallakabaddhāti vacanatthaṃ dasseti. Yonakaupāhanāti yonakajātīnaṃ manussānaṃ upāhanā. Paliguṇṭhetvāti parisamantato veṭhetvā. ‘‘Upari…pe… jaṅgha’’nti iminā puṭabaddhato visesaṃ dasseti. Tūlapicunāti tūlasaṅkhātena picunā. ‘‘Tittirapattasadisā’’ti iminā tittirassa pattaṃ viya tittirapattikāti vacanatthaṃ dasseti. Tittiroti ca eko sakuṇaviseso. Kaṇṇikaṭṭhāneti dvinnaṃ vaddhikānaṃ ekato samāgamaṭṭhāne. ‘‘Meṇḍa…pe… katā’’ti iminā meṇḍassa visāṇena sadisā vaddhikā etāsanti meṇḍavisāṇavaddhikāti vacanatthaṃ dasseti. Tathevāti yathā meṇḍaajasiṅgasaṇṭhāne vaddhe yojetvā katā, tathevāti attho. ‘‘Vicchikā…pe… katā’’ti iminā vicchikāya aḷo vicchikāḷo, so viya vaddhikā etāsanti vicchikāḷikāti vacanatthaṃ dasseti. Aḷasaddo ‘‘aḷacchinno’’tiādīsu (mahāva. 119) aṅguṭṭhavācako, idha pana naṅguṭṭhavācako, tasmā vuttaṃ ‘‘naṅguṭṭhasaṇṭhāne’’ti. Talesūti upāhanāya talesu. ‘‘Mora…pe… sibbikā’’ti iminā morapiñchehi parisamantato, parikkhipitvā vā sibbitā morapiñchaparisibbitāti vacanatthaṃ dasseti. Citrā upāhanāyoti ettha citrasaddo vicitratthoti āha ‘‘vicitrā’’ti. Etāsūti khallakabaddhādīsu. Vaḷañjetabbāti paribhuñjitabbā. Vaḷaji paribhogeti dhātupāṭho (saddanītidhātumālāyaṃ 15 jakārantadhātu). Tālujo tatiyo. Tesu panāti khallakādīsu pana. Sati santesūti yojanā. Sīhacammena parikkhipitabbāti sīhacammaparikkhatāti vacanatthaṃ dassento āha ‘‘pariyantesū’’tiādi. Pakkhibiḷāloti tuliyo. So hi pakkhayuttattā ca biḷālamukhasadisamukhattā ca pakkhibiḷāloti vuccati. Iminā luvakacammaparikkhatāti ettha luvakasaddo pakkhibiḷālapariyāyoti dasseti. ‘‘Ulūkacammaparikkhatā’’tipi pāṭho. Etāsupīti sīhacammaparikkhatādīsupi. Yā kāci upāhanāyoti sambandho.
২৪৭. ওমুক্কন্তি এত্থ অৰত্যূপসগ্গস্স ৰিযোগত্থং দস্সেন্তো আহ ‘‘পটিমুঞ্চিত্ৰা অপনীত’’ন্তি। পুরাণং গুণঙ্গুণূপাহনন্তি অত্থো।
247.Omukkanti ettha avatyūpasaggassa viyogatthaṃ dassento āha ‘‘paṭimuñcitvā apanīta’’nti. Purāṇaṃ guṇaṅguṇūpāhananti attho.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
১৪৯. সব্বনীলিকাদিপটিক্খেপো • 149. Sabbanīlikādipaṭikkhepo
১৫০. ওমুক্কগুণঙ্গুণূপাহনানুজাননা • 150. Omukkaguṇaṅguṇūpāhanānujānanā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / সব্বনীলিকাদিপটিক্খেপকথা • Sabbanīlikādipaṭikkhepakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সব্বনীলিকাদিপটিক্খেপকথাৰণ্ণনা • Sabbanīlikādipaṭikkhepakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সব্বনীলিকাদিপটিক্খেপকথাৰণ্ণনা • Sabbanīlikādipaṭikkhepakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / দিগুণাদিউপাহনপটিক্খেপকথাৰণ্ণনা • Diguṇādiupāhanapaṭikkhepakathāvaṇṇanā
