| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೧೪೯. ಸಬ್ಬನೀಲಿಕಾದಿಪಟಿಕ್ಖೇಪೋ
149. Sabbanīlikādipaṭikkhepo
೨೪೬. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಸಬ್ಬನೀಲಿಕಾ ಉಪಾಹನಾಯೋ ಧಾರೇನ್ತಿ…ಪೇ॰… ಸಬ್ಬಪೀತಿಕಾ ಉಪಾಹನಾಯೋ ಧಾರೇನ್ತಿ… ಸಬ್ಬಲೋಹಿತಿಕಾ ಉಪಾಹನಾಯೋ ಧಾರೇನ್ತಿ… ಸಬ್ಬಮಞ್ಜಿಟ್ಠಿಕಾ 1 ಉಪಾಹನಾಯೋ ಧಾರೇನ್ತಿ … ಸಬ್ಬಕಣ್ಹಾ ಉಪಾಹನಾಯೋ ಧಾರೇನ್ತಿ… ಸಬ್ಬಮಹಾರಙ್ಗರತ್ತಾ ಉಪಾಹನಾಯೋ ಧಾರೇನ್ತಿ… ಸಬ್ಬಮಹಾನಾಮರತ್ತಾ ಉಪಾಹನಾಯೋ ಧಾರೇನ್ತಿ। ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ, ‘‘ಸೇಯ್ಯಥಾಪಿ ಗಿಹೀ ಕಾಮಭೋಗಿನೋ’’ತಿ। ಭಗವತೋ ಏತಮತ್ಥಂ ಆರೋಚೇಸುಂ। ನ, ಭಿಕ್ಖವೇ, ಸಬ್ಬನೀಲಿಕಾ ಉಪಾಹನಾ ಧಾರೇತಬ್ಬಾ…ಪೇ॰… ನ ಸಬ್ಬಪೀತಿಕಾ ಉಪಾಹನಾ ಧಾರೇತಬ್ಬಾ, ನ ಸಬ್ಬಲೋಹಿತಿಕಾ ಉಪಾಹನಾ ಧಾರೇತಬ್ಬಾ, ನ ಸಬ್ಬಮಞ್ಜಿಟ್ಠಿಕಾ ಉಪಾಹನಾ ಧಾರೇತಬ್ಬಾ, ನ ಸಬ್ಬಕಣ್ಹಾ ಉಪಾಹನಾ ಧಾರೇತಬ್ಬಾ, ನ ಸಬ್ಬಮಹಾರಙ್ಗರತ್ತಾ ಉಪಾಹನಾ ಧಾರೇತಬ್ಬಾ, ನ ಸಬ್ಬಮಹಾನಾಮರತ್ತಾ ಉಪಾಹನಾ ಧಾರೇತಬ್ಬಾ। ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸಾತಿ।
246. Tena kho pana samayena chabbaggiyā bhikkhū sabbanīlikā upāhanāyo dhārenti…pe… sabbapītikā upāhanāyo dhārenti… sabbalohitikā upāhanāyo dhārenti… sabbamañjiṭṭhikā 2 upāhanāyo dhārenti … sabbakaṇhā upāhanāyo dhārenti… sabbamahāraṅgarattā upāhanāyo dhārenti… sabbamahānāmarattā upāhanāyo dhārenti. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, sabbanīlikā upāhanā dhāretabbā…pe… na sabbapītikā upāhanā dhāretabbā, na sabbalohitikā upāhanā dhāretabbā, na sabbamañjiṭṭhikā upāhanā dhāretabbā, na sabbakaṇhā upāhanā dhāretabbā, na sabbamahāraṅgarattā upāhanā dhāretabbā, na sabbamahānāmarattā upāhanā dhāretabbā. Yo dhāreyya, āpatti dukkaṭassāti.
ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ನೀಲಕವದ್ಧಿಕಾ 3 ಉಪಾಹನಾಯೋ ಧಾರೇನ್ತಿ, ಪೀತಕವದ್ಧಿಕಾ ಉಪಾಹನಾಯೋ ಧಾರೇನ್ತಿ, ಲೋಹಿತಕವದ್ಧಿಕಾ ಉಪಾಹನಾಯೋ ಧಾರೇನ್ತಿ, ಮಞ್ಜಿಟ್ಠಿಕವದ್ಧಿಕಾ ಉಪಾಹನಾಯೋ ಧಾರೇನ್ತಿ, ಕಣ್ಹವದ್ಧಿಕಾ ಉಪಾಹನಾಯೋ ಧಾರೇನ್ತಿ, ಮಹಾರಙ್ಗರತ್ತವದ್ಧಿಕಾ ಉಪಾಹನಾಯೋ ಧಾರೇನ್ತಿ, ಮಹಾನಾಮರತ್ತವದ್ಧಿಕಾ ಉಪಾಹನಾಯೋ ಧಾರೇನ್ತಿ। ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ, ‘‘ಸೇಯ್ಯಥಾಪಿ ಗಿಹೀ ಕಾಮಭೋಗಿನೋ’’ತಿ। ಭಗವತೋ ಏತಮತ್ಥಂ ಆರೋಚೇಸುಂ। ನ, ಭಿಕ್ಖವೇ, ನೀಲಕವದ್ಧಿಕಾ ಉಪಾಹನಾ ಧಾರೇತಬ್ಬಾ…ಪೇ॰… ನ ಪೀತಕವದ್ಧಿಕಾ ಉಪಾಹನಾ ಧಾರೇತಬ್ಬಾ, ನ ಲೋಹಿತಕವದ್ಧಿಕಾ ಉಪಾಹನಾ ಧಾರೇತಬ್ಬಾ, ನ ಮಞ್ಜಿಟ್ಠಿಕವದ್ಧಿಕಾ ಉಪಾಹನಾ ಧಾರೇತಬ್ಬಾ, ನ ಕಣ್ಹವದ್ಧಿಕಾ ಉಪಾಹನಾ ಧಾರೇತಬ್ಬಾ, ನ ಮಹಾರಙ್ಗರತ್ತವದ್ಧಿಕಾ ಉಪಾಹನಾ ಧಾರೇತಬ್ಬಾ, ನ ಮಹಾನಾಮರತ್ತವದ್ಧಿಕಾ ಉಪಾಹನಾ ಧಾರೇತಬ್ಬಾ। ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸಾತಿ।
Tena kho pana samayena chabbaggiyā bhikkhū nīlakavaddhikā 4 upāhanāyo dhārenti, pītakavaddhikā upāhanāyo dhārenti, lohitakavaddhikā upāhanāyo dhārenti, mañjiṭṭhikavaddhikā upāhanāyo dhārenti, kaṇhavaddhikā upāhanāyo dhārenti, mahāraṅgarattavaddhikā upāhanāyo dhārenti, mahānāmarattavaddhikā upāhanāyo dhārenti. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, nīlakavaddhikā upāhanā dhāretabbā…pe… na pītakavaddhikā upāhanā dhāretabbā, na lohitakavaddhikā upāhanā dhāretabbā, na mañjiṭṭhikavaddhikā upāhanā dhāretabbā, na kaṇhavaddhikā upāhanā dhāretabbā, na mahāraṅgarattavaddhikā upāhanā dhāretabbā, na mahānāmarattavaddhikā upāhanā dhāretabbā. Yo dhāreyya, āpatti dukkaṭassāti.
ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಖಲ್ಲಕಬದ್ಧಾ 5 ಉಪಾಹನಾಯೋ ಧಾರೇನ್ತಿ…ಪೇ॰… ಪುಟಬದ್ಧಾ ಉಪಾಹನಾಯೋ ಧಾರೇನ್ತಿ, ಪಾಲಿಗುಣ್ಠಿಮಾ ಉಪಾಹನಾಯೋ ಧಾರೇನ್ತಿ, ತೂಲಪುಣ್ಣಿಕಾ ಉಪಾಹನಾಯೋ ಧಾರೇನ್ತಿ , ತಿತ್ತಿರಪತ್ತಿಕಾ ಉಪಾಹನಾಯೋ ಧಾರೇನ್ತಿ, ಮೇಣ್ಡವಿಸಾಣವದ್ಧಿಕಾ ಉಪಾಹನಾಯೋ ಧಾರೇನ್ತಿ, ಅಜವಿಸಾಣವದ್ಧಿಕಾ ಉಪಾಹನಾಯೋ ಧಾರೇನ್ತಿ, ವಿಚ್ಛಿಕಾಳಿಕಾ ಉಪಾಹನಾಯೋ ಧಾರೇನ್ತಿ, ಮೋರಪಿಞ್ಛ 6 ಪರಿಸಿಬ್ಬಿತಾ ಉಪಾಹನಾಯೋ ಧಾರೇನ್ತಿ, ಚಿತ್ರಾ ಉಪಾಹನಾಯೋ ಧಾರೇನ್ತಿ। ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ, ‘‘ಸೇಯ್ಯಥಾಪಿ ಗಿಹೀ ಕಾಮಭೋಗಿನೋ’’ತಿ। ಭಗವತೋ ಏತಮತ್ಥಂ ಆರೋಚೇಸುಂ। ನ, ಭಿಕ್ಖವೇ , ಖಲ್ಲಕಬದ್ಧಾ ಉಪಾಹನಾ ಧಾರೇತಬ್ಬಾ…ಪೇ॰… ನ ಪುಟಬದ್ಧಾ ಉಪಾಹನಾ ಧಾರೇತಬ್ಬಾ, ನ ಪಾಲಿಗುಣ್ಠಿಮಾ ಉಪಾಹನಾ ಧಾರೇತಬ್ಬಾ, ನ ತೂಲಪುಣ್ಣಿಕಾ ಉಪಾಹನಾ ಧಾರೇತಬ್ಬಾ, ನ ತಿತ್ತಿರಪತ್ತಿಕಾ ಉಪಾಹನಾ ಧಾರೇತಬ್ಬಾ, ನ ಮೇಣ್ಡವಿಸಾಣವದ್ಧಿಕಾ ಉಪಾಹನಾ ಧಾರೇತಬ್ಬಾ, ನ ಅಜವಿಸಾಣವದ್ಧಿಕಾ ಉಪಾಹನಾ ಧಾರೇತಬ್ಬಾ, ನ ವಿಚ್ಛಿಕಾಳಿಕಾ ಉಪಾಹನಾ ಧಾರೇತಬ್ಬಾ, ನ ಮೋರಪಿಞ್ಛಪರಿಸಿಬ್ಬಿತಾ ಉಪಾಹನಾ ಧಾರೇತಬ್ಬಾ, ನ ಚಿತ್ರಾ ಉಪಾಹನಾ ಧಾರೇತಬ್ಬಾ। ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸಾತಿ।
Tena kho pana samayena chabbaggiyā bhikkhū khallakabaddhā 7 upāhanāyo dhārenti…pe… puṭabaddhā upāhanāyo dhārenti, pāliguṇṭhimā upāhanāyo dhārenti, tūlapuṇṇikā upāhanāyo dhārenti , tittirapattikā upāhanāyo dhārenti, meṇḍavisāṇavaddhikā upāhanāyo dhārenti, ajavisāṇavaddhikā upāhanāyo dhārenti, vicchikāḷikā upāhanāyo dhārenti, morapiñcha 8 parisibbitā upāhanāyo dhārenti, citrā upāhanāyo dhārenti. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave , khallakabaddhā upāhanā dhāretabbā…pe… na puṭabaddhā upāhanā dhāretabbā, na pāliguṇṭhimā upāhanā dhāretabbā, na tūlapuṇṇikā upāhanā dhāretabbā, na tittirapattikā upāhanā dhāretabbā, na meṇḍavisāṇavaddhikā upāhanā dhāretabbā, na ajavisāṇavaddhikā upāhanā dhāretabbā, na vicchikāḷikā upāhanā dhāretabbā, na morapiñchaparisibbitā upāhanā dhāretabbā, na citrā upāhanā dhāretabbā. Yo dhāreyya, āpatti dukkaṭassāti.
ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಸೀಹಚಮ್ಮಪರಿಕ್ಖಟಾ ಉಪಾಹನಾಯೋ ಧಾರೇನ್ತಿ…ಪೇ॰… ಬ್ಯಗ್ಘಚಮ್ಮಪರಿಕ್ಖಟಾ ಉಪಾಹನಾಯೋ ಧಾರೇನ್ತಿ, ದೀಪಿಚಮ್ಮಪರಿಕ್ಖಟಾ ಉಪಾಹನಾಯೋ ಧಾರೇನ್ತಿ, ಅಜಿನಚಮ್ಮಪರಿಕ್ಖಟಾ ಉಪಾಹನಾಯೋ ಧಾರೇನ್ತಿ, ಉದ್ದಚಮ್ಮಪರಿಕ್ಖಟಾ ಉಪಾಹನಾಯೋ ಧಾರೇನ್ತಿ, ಮಜ್ಜಾರಚಮ್ಮಪರಿಕ್ಖಟಾ ಉಪಾಹನಾಯೋ ಧಾರೇನ್ತಿ, ಕಾಳಕಚಮ್ಮಪರಿಕ್ಖಟಾ ಉಪಾಹನಾಯೋ ಧಾರೇನ್ತಿ, ಲುವಕಚಮ್ಮಪರಿಕ್ಖಟಾ 9 ಉಪಾಹನಾಯೋ ಧಾರೇನ್ತಿ। ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ, ‘‘ಸೇಯ್ಯಥಾಪಿ ಗಿಹೀ ಕಾಮಭೋಗಿನೋ’’ತಿ। ಭಗವತೋ ಏತಮತ್ಥಂ ಆರೋಚೇಸುಂ। ನ, ಭಿಕ್ಖವೇ, ಸೀಹಚಮ್ಮಪರಿಕ್ಖಟಾ ಉಪಾಹನಾ ಧಾರೇತಬ್ಬಾ…ಪೇ॰… ನ ಬ್ಯಗ್ಘಚಮ್ಮಪರಿಕ್ಖಟಾ ಉಪಾಹನಾ ಧಾರೇತಬ್ಬಾ, ನ ದೀಪಿಚಮ್ಮಪರಿಕ್ಖಟಾ ಉಪಾಹನಾ ಧಾರೇತಬ್ಬಾ, ನ ಅಜಿನಚಮ್ಮಪರಿಕ್ಖಟಾ ಉಪಾಹನಾ ಧಾರೇತಬ್ಬಾ, ನ ಉದ್ದಚಮ್ಮಪರಿಕ್ಖಟಾ ಉಪಾಹನಾ ಧಾರೇತಬ್ಬಾ, ನ ಮಜ್ಜಾರಚಮ್ಮಪರಿಕ್ಖಟಾ ಉಪಾಹನಾ ಧಾರೇತಬ್ಬಾ, ನ ಕಾಳಕಚಮ್ಮಪರಿಕ್ಖಟಾ ಉಪಾಹನಾ ಧಾರೇತಬ್ಬಾ, ನ ಲುವಕಚಮ್ಮಪರಿಕ್ಖಟಾ ಉಪಾಹನಾ ಧಾರೇತಬ್ಬಾ। ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸಾತಿ।
Tena kho pana samayena chabbaggiyā bhikkhū sīhacammaparikkhaṭā upāhanāyo dhārenti…pe… byagghacammaparikkhaṭā upāhanāyo dhārenti, dīpicammaparikkhaṭā upāhanāyo dhārenti, ajinacammaparikkhaṭā upāhanāyo dhārenti, uddacammaparikkhaṭā upāhanāyo dhārenti, majjāracammaparikkhaṭā upāhanāyo dhārenti, kāḷakacammaparikkhaṭā upāhanāyo dhārenti, luvakacammaparikkhaṭā 10 upāhanāyo dhārenti. Manussā ujjhāyanti khiyyanti vipācenti, ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, sīhacammaparikkhaṭā upāhanā dhāretabbā…pe… na byagghacammaparikkhaṭā upāhanā dhāretabbā, na dīpicammaparikkhaṭā upāhanā dhāretabbā, na ajinacammaparikkhaṭā upāhanā dhāretabbā, na uddacammaparikkhaṭā upāhanā dhāretabbā, na majjāracammaparikkhaṭā upāhanā dhāretabbā, na kāḷakacammaparikkhaṭā upāhanā dhāretabbā, na luvakacammaparikkhaṭā upāhanā dhāretabbā. Yo dhāreyya, āpatti dukkaṭassāti.
ಸಬ್ಬನೀಲಿಕಾದಿಪಟಿಕ್ಖೇಪೋ ನಿಟ್ಠಿತೋ।
Sabbanīlikādipaṭikkhepo niṭṭhito.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಸಬ್ಬನೀಲಿಕಾದಿಪಟಿಕ್ಖೇಪಕಥಾ • Sabbanīlikādipaṭikkhepakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಸಬ್ಬನೀಲಿಕಾದಿಪಟಿಕ್ಖೇಪಕಥಾವಣ್ಣನಾ • Sabbanīlikādipaṭikkhepakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಸಬ್ಬನೀಲಿಕಾದಿಪಟಿಕ್ಖೇಪಕಥಾವಣ್ಣನಾ • Sabbanīlikādipaṭikkhepakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ದಿಗುಣಾದಿಉಪಾಹನಪಟಿಕ್ಖೇಪಕಥಾವಣ್ಣನಾ • Diguṇādiupāhanapaṭikkhepakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧೪೯. ಸಬ್ಬನೀಲಿಕಾದಿಪಟಿಕ್ಖೇಪಕಥಾ • 149. Sabbanīlikādipaṭikkhepakathā
