| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๒. สพฺพญฺญูภาวปโญฺห
2. Sabbaññūbhāvapañho
๒. ราชา อาห ‘‘ภเนฺต นาคเสน, พุโทฺธ สพฺพญฺญู สพฺพทสฺสาวี’’ติ? ‘‘อาม, มหาราช, ภควา สพฺพญฺญู สพฺพทสฺสาวี’’ติฯ ‘‘อถ กิสฺส นุ โข, ภเนฺต นาคเสน, สาวกานํ อนุปุเพฺพน สิกฺขาปทํ ปญฺญเปสี’’ติ? ‘‘อตฺถิ ปน เต มหาราช, โกจิ เวโชฺช, โย อิมิสฺสํ ปถวิยํ สพฺพเภสชฺชานิ ชานาตี’’ติ? ‘‘อาม, ภเนฺต, อตฺถี’’ติฯ ‘‘กิํนุ โข, มหาราช, โส เวโชฺช คิลานกํ สมฺปเตฺต กาเล เภสชฺชํ ปาเยติ, อุทาหุ อสมฺปเตฺต กาเล’’ติ? ‘‘สมฺปเตฺต กาเล, ภเนฺต, คิลานกํ เภสชฺชํ ปาเยติ, โน อสมฺปเตฺต กาเล’’ติ? ‘‘เอวเมว โข, มหาราช, ภควา สพฺพญฺญู สพฺพทสฺสาวี น อสมฺปเตฺต กาเล สาวกานํ สิกฺขาปทํ ปญฺญาเปติ, สมฺปเตฺต กาเล สาวกานํ สิกฺขาปทํ ปญฺญาเปติ ยาวชีวํ อนติกฺกมนีย’’นฺติฯ
2. Rājā āha ‘‘bhante nāgasena, buddho sabbaññū sabbadassāvī’’ti? ‘‘Āma, mahārāja, bhagavā sabbaññū sabbadassāvī’’ti. ‘‘Atha kissa nu kho, bhante nāgasena, sāvakānaṃ anupubbena sikkhāpadaṃ paññapesī’’ti? ‘‘Atthi pana te mahārāja, koci vejjo, yo imissaṃ pathaviyaṃ sabbabhesajjāni jānātī’’ti? ‘‘Āma, bhante, atthī’’ti. ‘‘Kiṃnu kho, mahārāja, so vejjo gilānakaṃ sampatte kāle bhesajjaṃ pāyeti, udāhu asampatte kāle’’ti? ‘‘Sampatte kāle, bhante, gilānakaṃ bhesajjaṃ pāyeti, no asampatte kāle’’ti? ‘‘Evameva kho, mahārāja, bhagavā sabbaññū sabbadassāvī na asampatte kāle sāvakānaṃ sikkhāpadaṃ paññāpeti, sampatte kāle sāvakānaṃ sikkhāpadaṃ paññāpeti yāvajīvaṃ anatikkamanīya’’nti.
‘‘กโลฺลสิ, ภเนฺต นาคเสนา’’ติฯ
‘‘Kallosi, bhante nāgasenā’’ti.
สพฺพญฺญูภาวปโญฺห ทุติโยฯ
Sabbaññūbhāvapañho dutiyo.
