| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၂. သဗ္ဗညူဘာဝပဉ္ဟော
2. Sabbaññūbhāvapañho
၂. ရာဇာ အာဟ ‘‘ဘန္တေ နာဂသေန, ဗုဒ္ဓော သဗ္ဗညူ သဗ္ဗဒသ္သာဝီ’’တိ? ‘‘အာမ, မဟာရာဇ, ဘဂဝာ သဗ္ဗညူ သဗ္ဗဒသ္သာဝီ’’တိ။ ‘‘အထ ကိသ္သ နု ခော, ဘန္တေ နာဂသေန, သာဝကာနံ အနုပုဗ္ဗေန သိက္ခာပဒံ ပညပေသီ’’တိ? ‘‘အတ္ထိ ပန တေ မဟာရာဇ, ကောစိ ဝေဇ္ဇော, ယော ဣမိသ္သံ ပထဝိယံ သဗ္ဗဘေသဇ္ဇာနိ ဇာနာတီ’’တိ? ‘‘အာမ, ဘန္တေ, အတ္ထီ’’တိ။ ‘‘ကိံနု ခော, မဟာရာဇ, သော ဝေဇ္ဇော ဂိလာနကံ သမ္ပတ္တေ ကာလေ ဘေသဇ္ဇံ ပာယေတိ, ဥဒာဟု အသမ္ပတ္တေ ကာလေ’’တိ? ‘‘သမ္ပတ္တေ ကာလေ, ဘန္တေ, ဂိလာနကံ ဘေသဇ္ဇံ ပာယေတိ, နော အသမ္ပတ္တေ ကာလေ’’တိ? ‘‘ဧဝမေဝ ခော, မဟာရာဇ, ဘဂဝာ သဗ္ဗညူ သဗ္ဗဒသ္သာဝီ န အသမ္ပတ္တေ ကာလေ သာဝကာနံ သိက္ခာပဒံ ပညာပေတိ, သမ္ပတ္တေ ကာလေ သာဝကာနံ သိက္ခာပဒံ ပညာပေတိ ယာဝဇီဝံ အနတိက္ကမနီယ’’န္တိ။
2. Rājā āha ‘‘bhante nāgasena, buddho sabbaññū sabbadassāvī’’ti? ‘‘Āma, mahārāja, bhagavā sabbaññū sabbadassāvī’’ti. ‘‘Atha kissa nu kho, bhante nāgasena, sāvakānaṃ anupubbena sikkhāpadaṃ paññapesī’’ti? ‘‘Atthi pana te mahārāja, koci vejjo, yo imissaṃ pathaviyaṃ sabbabhesajjāni jānātī’’ti? ‘‘Āma, bhante, atthī’’ti. ‘‘Kiṃnu kho, mahārāja, so vejjo gilānakaṃ sampatte kāle bhesajjaṃ pāyeti, udāhu asampatte kāle’’ti? ‘‘Sampatte kāle, bhante, gilānakaṃ bhesajjaṃ pāyeti, no asampatte kāle’’ti? ‘‘Evameva kho, mahārāja, bhagavā sabbaññū sabbadassāvī na asampatte kāle sāvakānaṃ sikkhāpadaṃ paññāpeti, sampatte kāle sāvakānaṃ sikkhāpadaṃ paññāpeti yāvajīvaṃ anatikkamanīya’’nti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
သဗ္ဗညူဘာဝပဉ္ဟော ဒုတိယော။
Sabbaññūbhāvapañho dutiyo.
