| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
2. සබ්‌බඤ්‌ඤූභාවපඤ්‌හො
2. Sabbaññūbhāvapañho
2. රාජා ආහ ‘‘භන්‌තෙ නාගසෙන, බුද්‌ධො සබ්‌බඤ්‌ඤූ සබ්‌බදස්‌සාවී’’ති? ‘‘ආම, මහාරාජ, භගවා සබ්‌බඤ්‌ඤූ සබ්‌බදස්‌සාවී’’ති. ‘‘අථ කිස්‌ස නු ඛො, භන්‌තෙ නාගසෙන, සාවකානං අනුපුබ්‌බෙන සික්‌ඛාපදං පඤ්‌ඤපෙසී’’ති? ‘‘අත්‌ථි පන තෙ මහාරාජ, කොචි වෙජ්‌ජො, යො ඉමිස්‌සං පථවියං සබ්‌බභෙසජ්‌ජානි ජානාතී’’ති? ‘‘ආම, භන්‌තෙ, අත්‌ථී’’ති. ‘‘කිංනු ඛො, මහාරාජ, සො වෙජ්‌ජො ගිලානකං සම්‌පත්‌තෙ කාලෙ භෙසජ්‌ජං පායෙති, උදාහු අසම්‌පත්‌තෙ කාලෙ’’ති? ‘‘සම්‌පත්‌තෙ කාලෙ, භන්‌තෙ, ගිලානකං භෙසජ්‌ජං පායෙති, නො අසම්‌පත්‌තෙ කාලෙ’’ති? ‘‘එවමෙව ඛො, මහාරාජ, භගවා සබ්‌බඤ්‌ඤූ සබ්‌බදස්‌සාවී න අසම්‌පත්‌තෙ කාලෙ සාවකානං සික්‌ඛාපදං පඤ්‌ඤාපෙති, සම්‌පත්‌තෙ කාලෙ සාවකානං සික්‌ඛාපදං පඤ්‌ඤාපෙති යාවජීවං අනතික්‌කමනීය’’න්‌ති.
2. Rājā āha ‘‘bhante nāgasena, buddho sabbaññū sabbadassāvī’’ti? ‘‘Āma, mahārāja, bhagavā sabbaññū sabbadassāvī’’ti. ‘‘Atha kissa nu kho, bhante nāgasena, sāvakānaṃ anupubbena sikkhāpadaṃ paññapesī’’ti? ‘‘Atthi pana te mahārāja, koci vejjo, yo imissaṃ pathaviyaṃ sabbabhesajjāni jānātī’’ti? ‘‘Āma, bhante, atthī’’ti. ‘‘Kiṃnu kho, mahārāja, so vejjo gilānakaṃ sampatte kāle bhesajjaṃ pāyeti, udāhu asampatte kāle’’ti? ‘‘Sampatte kāle, bhante, gilānakaṃ bhesajjaṃ pāyeti, no asampatte kāle’’ti? ‘‘Evameva kho, mahārāja, bhagavā sabbaññū sabbadassāvī na asampatte kāle sāvakānaṃ sikkhāpadaṃ paññāpeti, sampatte kāle sāvakānaṃ sikkhāpadaṃ paññāpeti yāvajīvaṃ anatikkamanīya’’nti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
සබ්‌බඤ්‌ඤූභාවපඤ්‌හො දුතියො.
Sabbaññūbhāvapañho dutiyo.
