| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
72-73. ஸப்³ப³ஞ்ஞுதஞ்ஞாணனித்³தே³ஸவண்ணனா
72-73. Sabbaññutaññāṇaniddesavaṇṇanā
119. ஸப்³ப³ஞ்ஞுதஞ்ஞாணனித்³தே³ஸே கதமங் ததா²க³தஸ்ஸ ஸப்³ப³ஞ்ஞுதஞ்ஞாணந்தி புச்சி²த்வா தேன ஸமக³திகத்தா தேனேவ ஸஹ அனாவரணஞாணங் நித்³தி³ட்ட²ங். ந ஹி அனாவரணஞாணங் த⁴ம்மதோ விஸுங் அத்தி², ஏகமேவ ஹேதங் ஞாணங் ஆகாரபே⁴த³தோ த்³வேதா⁴ வுச்சதி ஸத்³தி⁴ந்த்³ரியஸத்³தா⁴ப³லாதீ³னி விய. ஸப்³ப³ஞ்ஞுதஞ்ஞாணமேவ ஹி நத்தி² ஏதஸ்ஸ ஆவரணந்தி, கேனசி த⁴ம்மேன, புக்³க³லேன வா ஆவரணங் காதுங் அஸக்குணெய்யதாய அனாவரணந்தி வுச்சதி ஆவஜ்ஜனபடிப³த்³த⁴த்தா ஸப்³ப³த⁴ம்மானங். அஞ்ஞே பன ஆவஜ்ஜித்வாபி ந ஜானந்தி. கேசி பனாஹு ‘‘மனோவிஞ்ஞாணங் விய ஸப்³பா³ரம்மணிகத்தா ஸப்³ப³ஞ்ஞுதஞ்ஞாணங் . தங்யேவ ஞாணங் இந்த³வஜிரங் விய விஸயேஸு அப்படிஹதத்தா அனாவரணஞாணங். அனுபுப்³ப³ஸப்³ப³ஞ்ஞுதாபடிக்கே²போ ஸப்³ப³ஞ்ஞுதஞ்ஞாணங், ஸகிங்ஸப்³ப³ஞ்ஞுதாபடிக்கே²போ அனாவரணஞாணங், ப⁴க³வா ஸப்³ப³ஞ்ஞுதஞ்ஞாணபடிலாபே⁴னபி ஸப்³ப³ஞ்ஞூதி வுச்சதி, ந ச அனுபுப்³ப³ஸப்³ப³ஞ்ஞூ. அனாவரணஞாணபடிலாபே⁴னபி ஸப்³ப³ஞ்ஞூதி வுச்சதி, ந ச ஸகிங்ஸப்³ப³ஞ்ஞூ’’தி.
119. Sabbaññutaññāṇaniddese katamaṃ tathāgatassa sabbaññutaññāṇanti pucchitvā tena samagatikattā teneva saha anāvaraṇañāṇaṃ niddiṭṭhaṃ. Na hi anāvaraṇañāṇaṃ dhammato visuṃ atthi, ekameva hetaṃ ñāṇaṃ ākārabhedato dvedhā vuccati saddhindriyasaddhābalādīni viya. Sabbaññutaññāṇameva hi natthi etassa āvaraṇanti, kenaci dhammena, puggalena vā āvaraṇaṃ kātuṃ asakkuṇeyyatāya anāvaraṇanti vuccati āvajjanapaṭibaddhattā sabbadhammānaṃ. Aññe pana āvajjitvāpi na jānanti. Keci panāhu ‘‘manoviññāṇaṃ viya sabbārammaṇikattā sabbaññutaññāṇaṃ . Taṃyeva ñāṇaṃ indavajiraṃ viya visayesu appaṭihatattā anāvaraṇañāṇaṃ. Anupubbasabbaññutāpaṭikkhepo sabbaññutaññāṇaṃ, sakiṃsabbaññutāpaṭikkhepo anāvaraṇañāṇaṃ, bhagavā sabbaññutaññāṇapaṭilābhenapi sabbaññūti vuccati, na ca anupubbasabbaññū. Anāvaraṇañāṇapaṭilābhenapi sabbaññūti vuccati, na ca sakiṃsabbaññū’’ti.
ஸப்³ப³ங் ஸங்க²தமஸங்க²தங் அனவஸேஸங் ஜானாதீதி எத்த² ஸப்³ப³ந்தி ஜாதிவஸேன ஸப்³ப³த⁴ம்மானங் நிஸ்ஸேஸபரியாதா³னங். அனவஸேஸந்தி ஏகேகஸ்ஸேவ த⁴ம்மஸ்ஸ ஸப்³பா³காரவஸேன நிஸ்ஸேஸபரியாதா³னங். ஸங்க²தமஸங்க²தந்தி த்³விதா⁴ பபே⁴த³த³ஸ்ஸனங். ஸங்க²தஞ்ஹி ஏகோ பபே⁴தோ³, அஸங்க²தங் ஏகோ பபே⁴தோ³. பச்சயேஹி ஸங்க³ம்ம கதந்தி ஸங்க²தங். க²ந்த⁴பஞ்சகங். ததா² ந ஸங்க²தந்தி அஸங்க²தங். நிப்³பா³னங். ஸங்க²தங் அனிச்சது³க்கா²னத்தாதீ³ஹி ஆகாரேஹி அனவஸேஸங் ஜானாதி, அஸங்க²தங் ஸுஞ்ஞதானிமித்தஅப்பணிஹிதாதீ³ஹி ஆகாரேஹி அனவஸேஸங் ஜானாதி. நத்தி² ஏதஸ்ஸ ஸங்க²தஸ்ஸ அஸங்க²தஸ்ஸ ச அவஸேஸோதி அனவஸேஸங். ஸங்க²தங் அஸங்க²தஞ்ச. அனேகபே⁴தா³பி பஞ்ஞத்தி பச்சயேஹி அகதத்தா அஸங்க²தபக்க²ங் ப⁴ஜதி. ஸப்³ப³ஞ்ஞுதஞ்ஞாணஞ்ஹி ஸப்³பா³பி பஞ்ஞத்தியோ அனேகபே⁴த³தோ ஜானாதி. அத² வா ஸப்³ப³ந்தி ஸப்³ப³த⁴ம்மக்³க³ஹணங். அனவஸேஸந்தி நிப்பதே³ஸக்³க³ஹணங். தத்த² ஆவரணங் நத்தீ²தி தத்த² தஸ்மிங் அனவஸேஸே ஸங்க²தாஸங்க²தே நிஸ்ஸங்க³த்தா ஸப்³ப³ஞ்ஞுதஞ்ஞாணஸ்ஸ ஆவரணங் நத்தீ²தி ததே³வ ஸப்³ப³ஞ்ஞுதஞ்ஞாணங் அனாவரணஞாணங் நாமாதி அத்தோ².
Sabbaṃ saṅkhatamasaṅkhataṃ anavasesaṃ jānātīti ettha sabbanti jātivasena sabbadhammānaṃ nissesapariyādānaṃ. Anavasesanti ekekasseva dhammassa sabbākāravasena nissesapariyādānaṃ. Saṅkhatamasaṅkhatanti dvidhā pabhedadassanaṃ. Saṅkhatañhi eko pabhedo, asaṅkhataṃ eko pabhedo. Paccayehi saṅgamma katanti saṅkhataṃ. Khandhapañcakaṃ. Tathā na saṅkhatanti asaṅkhataṃ. Nibbānaṃ. Saṅkhataṃ aniccadukkhānattādīhi ākārehi anavasesaṃ jānāti, asaṅkhataṃ suññatānimittaappaṇihitādīhi ākārehi anavasesaṃ jānāti. Natthi etassa saṅkhatassa asaṅkhatassa ca avasesoti anavasesaṃ. Saṅkhataṃ asaṅkhatañca. Anekabhedāpi paññatti paccayehi akatattā asaṅkhatapakkhaṃ bhajati. Sabbaññutaññāṇañhi sabbāpi paññattiyo anekabhedato jānāti. Atha vā sabbanti sabbadhammaggahaṇaṃ. Anavasesanti nippadesaggahaṇaṃ. Tattha āvaraṇaṃ natthīti tattha tasmiṃ anavasese saṅkhatāsaṅkhate nissaṅgattā sabbaññutaññāṇassa āvaraṇaṃ natthīti tadeva sabbaññutaññāṇaṃ anāvaraṇañāṇaṃ nāmāti attho.
120. இதா³னி அனேகவிஸயபே⁴த³தோ த³ஸ்ஸேதுங் அதீதந்திஆதி³மாஹ. தத்த² அதீதங் அனாக³தங் பச்சுப்பன்னந்தி காலபே⁴த³தோ த³ஸ்ஸிதங், சக்கு² சேவ ரூபா சாதிஆதி³ வத்தா²ரம்மணபே⁴த³தோ. ஏவங் தங் ஸப்³ப³ந்தி தேஸங் சக்கு²ரூபானங் அனவஸேஸபரியாதா³னங். ஏவங் ஸேஸேஸு. யாவதாதி அனவஸேஸபரியாதா³னங். அனிச்சட்ட²ந்திஆதி³ ஸாமஞ்ஞலக்க²ணபே⁴த³தோ த³ஸ்ஸிதங். அனிச்சட்ட²ந்தி ச அனிச்சாகாரங். பச்சத்தத்தே² வா உபயோக³வசனங். ஏஸ நயோ ஏதி³ஸேஸு. ரூபஸ்ஸாதிஆதி³ க²ந்த⁴பே⁴த³தோ த³ஸ்ஸிதங். சக்கு²ஸ்ஸ…பே॰… ஜராமரணஸ்ஸாதி ஹெட்டா² வுத்தபெய்யாலனயேன யோஜேதப்³ப³ங். அபி⁴ஞ்ஞாயாதிஆதீ³ஸு ஹெட்டா² வுத்தஞாணானேவ. அபி⁴ஞ்ஞட்ட²ந்தி அபி⁴ஜானநஸபா⁴வங். ஏஸ நயோ ஏதி³ஸேஸு. க²ந்தா⁴னங் க²ந்த⁴ட்ட²ந்திஆதி³ ஹெட்டா² வுத்தனயேனேவ வேதி³தப்³ப³ங். குஸலே த⁴ம்மேதிஆதி³ குஸலத்திகவஸேன பே⁴தோ³. காமாவசரே த⁴ம்மேதிஆதி³ சதுபூ⁴மகவஸேன. உப⁴யத்தா²பி ‘‘ஸப்³பே³ ஜானாதீ’’தி ப³ஹுவசனபாடோ² ஸுந்த³ரோ. ஏகவசனஸோதே பதிதத்தா பன பொத்த²கேஸு ஏகவசனேன லிகி²தங். து³க்க²ஸ்ஸாதிஆதி³ சுத்³த³ஸன்னங் பு³த்³த⁴ஞாணானங் விஸயபே⁴தோ³. இந்த்³ரியபரோபரியத்தே ஞாணந்திஆதீ³னி சத்தாரி ஞாணானி வத்வா ஸப்³ப³ஞ்ஞுதஞ்ஞாணங் கஸ்மா ந வுத்தந்தி சே? வுச்சமானஸ்ஸ ஸப்³ப³ஞ்ஞுதஞ்ஞாணத்தா. விஸயபே⁴த³தோ ஹி ஸப்³ப³ஞ்ஞுதஞ்ஞாணே வுச்சமானே தங் ஞாணங் ந வத்தப்³ப³ங் ஹோதி, ஸப்³ப³ஞ்ஞுதஞ்ஞாணங் பன ஸப்³ப³ஞ்ஞுதஞ்ஞாணஸ்ஸ விஸயோ ஹோதியேவ.
120. Idāni anekavisayabhedato dassetuṃ atītantiādimāha. Tattha atītaṃ anāgataṃ paccuppannanti kālabhedato dassitaṃ, cakkhu ceva rūpā cātiādi vatthārammaṇabhedato. Evaṃ taṃ sabbanti tesaṃ cakkhurūpānaṃ anavasesapariyādānaṃ. Evaṃ sesesu. Yāvatāti anavasesapariyādānaṃ. Aniccaṭṭhantiādi sāmaññalakkhaṇabhedato dassitaṃ. Aniccaṭṭhanti ca aniccākāraṃ. Paccattatthe vā upayogavacanaṃ. Esa nayo edisesu. Rūpassātiādi khandhabhedato dassitaṃ. Cakkhussa…pe… jarāmaraṇassāti heṭṭhā vuttapeyyālanayena yojetabbaṃ. Abhiññāyātiādīsu heṭṭhā vuttañāṇāneva. Abhiññaṭṭhanti abhijānanasabhāvaṃ. Esa nayo edisesu. Khandhānaṃ khandhaṭṭhantiādi heṭṭhā vuttanayeneva veditabbaṃ. Kusale dhammetiādi kusalattikavasena bhedo. Kāmāvacare dhammetiādi catubhūmakavasena. Ubhayatthāpi ‘‘sabbe jānātī’’ti bahuvacanapāṭho sundaro. Ekavacanasote patitattā pana potthakesu ekavacanena likhitaṃ. Dukkhassātiādi cuddasannaṃ buddhañāṇānaṃ visayabhedo. Indriyaparopariyatte ñāṇantiādīni cattāri ñāṇāni vatvā sabbaññutaññāṇaṃ kasmā na vuttanti ce? Vuccamānassa sabbaññutaññāṇattā. Visayabhedato hi sabbaññutaññāṇe vuccamāne taṃ ñāṇaṃ na vattabbaṃ hoti, sabbaññutaññāṇaṃ pana sabbaññutaññāṇassa visayo hotiyeva.
புன காளகாராமஸுத்தந்தாதீ³ஸு (அ॰ நி॰ 4.24) வுத்தனயேன ஸப்³ப³ஞ்ஞுதஞ்ஞாணபூ⁴மிங் த³ஸ்ஸெந்தோ யாவதா ஸதே³வகஸ்ஸ லோகஸ்ஸாதிஆதி³மாஹ. தத்த² ஸஹ தே³வேஹி ஸதே³வகஸ்ஸ. ஸஹ மாரேன ஸமாரகஸ்ஸ . ஸஹ ப்³ரஹ்முனா ஸப்³ரஹ்மகஸ்ஸ லோகஸ்ஸ. ஸஹ ஸமணப்³ராஹ்மணேஹி ஸஸ்ஸமணப்³ராஹ்மணியா. ஸஹ தே³வமனுஸ்ஸேஹி ஸதே³வமனுஸ்ஸாய பஜாய. பஜாதத்தா பஜாதி ஸத்தலோகஸ்ஸ பரியாயவசனமேதங். தத்த² ஸதே³வகவசனேன பஞ்சகாமாவசரதே³வக்³க³ஹணங், ஸமாரகவசனேன ச²ட்ட²காமாவசரதே³வக்³க³ஹணங், ஸப்³ரஹ்மகவசனேன ப்³ரஹ்மகாயிகாதி³ப்³ரஹ்மக்³க³ஹணங், ஸஸ்ஸமணப்³ராஹ்மணிவசனேன ஸாஸனஸ்ஸ பச்சத்தி²கபச்சாமித்தஸமணப்³ராஹ்மணக்³க³ஹணங் ஸமிதபாபபா³ஹிதபாபஸமணப்³ராஹ்மணக்³க³ஹணஞ்ச, பஜாவசனேன ஸத்தலோகக்³க³ஹணங், ஸதே³வமனுஸ்ஸவசனேன ஸம்முதிதே³வஸேஸமனுஸ்ஸக்³க³ஹணங் வேதி³தப்³ப³ங். ஏவமெத்த² தீஹி பதே³ஹி ஓகாஸலோகோ, த்³வீஹி பஜாவஸேன ஸத்தலோகோ க³ஹிதோதி வேதி³தப்³போ³.
Puna kāḷakārāmasuttantādīsu (a. ni. 4.24) vuttanayena sabbaññutaññāṇabhūmiṃ dassento yāvatā sadevakassa lokassātiādimāha. Tattha saha devehi sadevakassa. Saha mārena samārakassa. Saha brahmunā sabrahmakassa lokassa. Saha samaṇabrāhmaṇehi sassamaṇabrāhmaṇiyā. Saha devamanussehi sadevamanussāya pajāya. Pajātattā pajāti sattalokassa pariyāyavacanametaṃ. Tattha sadevakavacanena pañcakāmāvacaradevaggahaṇaṃ, samārakavacanena chaṭṭhakāmāvacaradevaggahaṇaṃ, sabrahmakavacanena brahmakāyikādibrahmaggahaṇaṃ, sassamaṇabrāhmaṇivacanena sāsanassa paccatthikapaccāmittasamaṇabrāhmaṇaggahaṇaṃ samitapāpabāhitapāpasamaṇabrāhmaṇaggahaṇañca, pajāvacanena sattalokaggahaṇaṃ, sadevamanussavacanena sammutidevasesamanussaggahaṇaṃ veditabbaṃ. Evamettha tīhi padehi okāsaloko, dvīhi pajāvasena sattaloko gahitoti veditabbo.
அபரோ நயோ – ஸதே³வகக்³க³ஹணேன அரூபாவசரலோகோ க³ஹிதோ, ஸமாரகக்³க³ஹணேன ச²காமாவசரதே³வலோகோ, ஸப்³ரஹ்மகக்³க³ஹணேன ரூபாவசரப்³ரஹ்மலோகோ, ஸஸ்ஸமணப்³ராஹ்மணாதி³க்³க³ஹணேன சதுபரிஸவஸேன, ஸம்முதிதே³வேஹி வா ஸஹ மனுஸ்ஸலோகோ, அவஸேஸஸத்தலோகோ வா.
Aparo nayo – sadevakaggahaṇena arūpāvacaraloko gahito, samārakaggahaṇena chakāmāvacaradevaloko, sabrahmakaggahaṇena rūpāvacarabrahmaloko, sassamaṇabrāhmaṇādiggahaṇena catuparisavasena, sammutidevehi vā saha manussaloko, avasesasattaloko vā.
அபிசெத்த² ஸதே³வகவசனேன உக்கட்ட²பரிச்சே²த³தோ ஸப்³ப³ஸ்ஸபி லோகஸ்ஸ தி³ட்டா²தி³ஜானநபா⁴வங் ஸாதே⁴தி. ததோ யேஸங் ஸியா ‘‘மாரோ மஹானுபா⁴வோ ச²காமாவசரிஸ்ஸரோ வஸவத்தீ, கிங் தஸ்ஸாபி தி³ட்டா²தி³ங் ஜானாதீ’’தி, தேஸங் விமதிங் வித⁴மந்தோ ‘‘ஸமாரகஸ்ஸா’’தி ஆஹ. யேஸங் பன ஸியா ‘‘ப்³ரஹ்மா மஹானுபா⁴வோ ஏகங்கு³லியா ஏகஸ்மிங் சக்கவாளஸஹஸ்ஸே ஆலோகங் ப²ரதி, த்³வீஹி…பே॰… த³ஸஹி அங்கு³லீஹி த³ஸஸு சக்கவாளஸஹஸ்ஸேஸு ஆலோகங் ப²ரதி, அனுத்தரஞ்ச ஜா²னஸமாபத்திஸுக²ங் படிஸங்வேதே³தி, கிங் தஸ்ஸாபி தி³ட்டா²தி³ங் ஜானாதீ’’தி, தேஸங் விமதிங் வித⁴மந்தோ ‘‘ஸப்³ரஹ்மகஸ்ஸா’’தி ஆஹ. ததோ யேஸங் ஸியா ‘‘புதூ² ஸமணப்³ராஹ்மணா ஸாஸனஸ்ஸ பச்சத்தி²கா, கிங் தேஸம்பி தி³ட்டா²தி³ங் ஜானாதீ’’தி, தேஸங் விமதிங் வித⁴மந்தோ ‘‘ஸஸ்ஸமணப்³ராஹ்மணியா பஜாயா’’தி ஆஹ. ஏவங் உக்கட்டா²னங் தி³ட்டா²தி³ஜானநபா⁴வங் பகாஸெத்வா அத² ஸம்முதிதே³வே அவஸேஸமனுஸ்ஸே ச உபாதா³ய உக்கட்ட²பரிச்சே²த³வஸேன ஸேஸஸத்தலோகஸ்ஸ தி³ட்டா²தி³ஜானநபா⁴வங் பகாஸேதி. அயமெத்த² அனுஸந்தி⁴க்கமோ. போராணா பனாஹு – ஸதே³வகஸ்ஸாதி தே³வதாஹி ஸத்³தி⁴ங் அவஸேஸலோகஸ்ஸ . ஸமாரகஸ்ஸாதி மாரேன ஸத்³தி⁴ங் அவஸேஸலோகஸ்ஸ. ஸப்³ரஹ்மகஸ்ஸாதி ப்³ரஹ்மேஹி ஸத்³தி⁴ங் அவஸேஸலோகஸ்ஸ. ஏவங் ஸப்³பே³பி திப⁴வூபகே³ ஸத்தே தீஹாகாரேஹி தீஸு பதே³ஸு பக்கி²பித்வா புன த்³வீஹாகாரேஹி பரியாதா³துங் ஸஸ்ஸமணப்³ராஹ்மணியா பஜாய ஸதே³வமனுஸ்ஸாயாதி வுத்தங். ஏவங் பஞ்சஹி பதே³ஹி தேன தேன ஆகாரேன தேதா⁴துகமேவ பரியாதி³ன்னங் ஹோதீதி.
Apicettha sadevakavacanena ukkaṭṭhaparicchedato sabbassapi lokassa diṭṭhādijānanabhāvaṃ sādheti. Tato yesaṃ siyā ‘‘māro mahānubhāvo chakāmāvacarissaro vasavattī, kiṃ tassāpi diṭṭhādiṃ jānātī’’ti, tesaṃ vimatiṃ vidhamanto ‘‘samārakassā’’ti āha. Yesaṃ pana siyā ‘‘brahmā mahānubhāvo ekaṅguliyā ekasmiṃ cakkavāḷasahasse ālokaṃ pharati, dvīhi…pe… dasahi aṅgulīhi dasasu cakkavāḷasahassesu ālokaṃ pharati, anuttarañca jhānasamāpattisukhaṃ paṭisaṃvedeti, kiṃ tassāpi diṭṭhādiṃ jānātī’’ti, tesaṃ vimatiṃ vidhamanto ‘‘sabrahmakassā’’ti āha. Tato yesaṃ siyā ‘‘puthū samaṇabrāhmaṇā sāsanassa paccatthikā, kiṃ tesampi diṭṭhādiṃ jānātī’’ti, tesaṃ vimatiṃ vidhamanto ‘‘sassamaṇabrāhmaṇiyā pajāyā’’ti āha. Evaṃ ukkaṭṭhānaṃ diṭṭhādijānanabhāvaṃ pakāsetvā atha sammutideve avasesamanusse ca upādāya ukkaṭṭhaparicchedavasena sesasattalokassa diṭṭhādijānanabhāvaṃ pakāseti. Ayamettha anusandhikkamo. Porāṇā panāhu – sadevakassāti devatāhi saddhiṃ avasesalokassa . Samārakassāti mārena saddhiṃ avasesalokassa. Sabrahmakassāti brahmehi saddhiṃ avasesalokassa. Evaṃ sabbepi tibhavūpage satte tīhākārehi tīsu padesu pakkhipitvā puna dvīhākārehi pariyādātuṃ sassamaṇabrāhmaṇiyā pajāya sadevamanussāyāti vuttaṃ. Evaṃ pañcahi padehi tena tena ākārena tedhātukameva pariyādinnaṃ hotīti.
தி³ட்ட²ந்தி ரூபாயதனங். ஸுதந்தி ஸத்³தா³யதனங். முதந்தி பத்வா க³ஹேதப்³ப³தோ க³ந்தா⁴யதனங், ரஸாயதனங், பொ²ட்ட²ப்³பா³யதனங். விஞ்ஞாதந்தி ஸுக²து³க்கா²தி³த⁴ம்மாரம்மணங். பத்தந்தி பரியேஸித்வா வா அபரியேஸித்வா வா பத்தங். பரியேஸிதந்தி பத்தங் வா அப்பத்தங் வா பரியேஸிதங். அனுவிசரிதங் மனஸாதி சித்தேன அனுஸஞ்சரிதங். ஸப்³ப³ங் ஜானாதீதி இமினா ஏதங் த³ஸ்ஸேதி – யங் அபரிமானாஸு லோகதா⁴தூஸு இமஸ்ஸ ஸதே³வகஸ்ஸ லோகஸ்ஸ ‘‘நீலங் பீத’’ந்திஆதி³ (த⁴॰ ஸ॰ 619) ரூபாரம்மணங் சக்கு²த்³வாரே ஆபாத²ங் ஆக³ச்ச²தி, அயங் ஸத்தோ இமஸ்மிங் க²ணே இமங் நாம ரூபாரம்மணங் தி³ஸ்வா ஸுமனோ வா து³ம்மனோ வா மஜ்ஜ²த்தோ வா ஜாதோதி தங் ஸப்³ப³ங் ததா²க³தஸ்ஸ ஸப்³ப³ஞ்ஞுதஞ்ஞாணங் ஜானாதி. ததா² யங் அபரிமாணாஸு லோகதா⁴தூஸு இமஸ்ஸ ஸதே³வகஸ்ஸ லோகஸ்ஸ ‘‘பே⁴ரிஸத்³தோ³, முதி³ங்க³ஸத்³தோ³’’திஆதி³ ஸத்³தா³ரம்மணங் ஸோதத்³வாரே ஆபாத²ங் ஆக³ச்ச²தி, ‘‘மூலக³ந்தோ⁴ தசக³ந்தோ⁴’’திஆதி³ (த⁴॰ ஸ॰ 624-627) க³ந்தா⁴ரம்மணங் கா⁴னத்³வாரே ஆபாத²ங் ஆக³ச்ச²தி, ‘‘மூலரஸோ, க²ந்த⁴ரஸோ’’திஆதி³ (த⁴॰ ஸ॰ 628-631) ரஸாரம்மணங் ஜிவ்ஹாத்³வாரே ஆபாத²ங் ஆக³ச்ச²தி, ‘‘கக்க²ளங், முது³க’’ந்திஆதி³ (த⁴॰ ஸ॰ 647-650) பத²வீதா⁴துதேஜோதா⁴துவாயோதா⁴துபே⁴த³ங் பொ²ட்ட²ப்³பா³ரம்மணங் காயத்³வாரே ஆபாத²ங் ஆக³ச்ச²தி, அயங் ஸத்தோ இமஸ்மிங் க²ணே இமங் நாம பொ²ட்ட²ப்³பா³ரம்மணங் பு²ஸித்வா ஸுமனோ வா து³ம்மனோ வா மஜ்ஜ²த்தோ வா ஜாதோதி தங் ஸப்³ப³ங் ததா²க³தஸ்ஸ ஸப்³ப³ஞ்ஞுதஞ்ஞாணங் ஜானாதி. ததா² யங் அபரிமாணாஸு லோகதா⁴தூஸு இமஸ்ஸ ஸதே³வகஸ்ஸ லோகஸ்ஸ ஸுக²து³க்கா²தி³பே⁴த³ங் த⁴ம்மாரம்மணங் மனொத்³வாரே ஆபாத²ங் ஆக³ச்ச²தி, அயங் ஸத்தோ இமஸ்மிங் க²ணே இமங் நாம த⁴ம்மாரம்மணங் விஜானித்வா ஸுமனோ வா து³ம்மனோ வா மஜ்ஜ²த்தோ வா ஜாதோதி தங் ஸப்³ப³ங் ததா²க³தஸ்ஸ ஸப்³ப³ஞ்ஞுதஞ்ஞாணங் ஜானாதி. இமஸ்ஸ பன மஹாஜனஸ்ஸ பரியேஸித்வா அப்பத்தம்பி அத்தி², பரியேஸித்வா பத்தம்பி அத்தி². அபரியேஸித்வா அப்பத்தம்பி அத்தி², அபரியேஸித்வா பத்தம்பி அத்தி². ஸப்³ப³ங் ததா²க³தஸ்ஸ ஸப்³ப³ஞ்ஞுதஞ்ஞாணேன அப்பத்தங் நாம நத்தீ²தி.
Diṭṭhanti rūpāyatanaṃ. Sutanti saddāyatanaṃ. Mutanti patvā gahetabbato gandhāyatanaṃ, rasāyatanaṃ, phoṭṭhabbāyatanaṃ. Viññātanti sukhadukkhādidhammārammaṇaṃ. Pattanti pariyesitvā vā apariyesitvā vā pattaṃ. Pariyesitanti pattaṃ vā appattaṃ vā pariyesitaṃ. Anuvicaritaṃ manasāti cittena anusañcaritaṃ. Sabbaṃ jānātīti iminā etaṃ dasseti – yaṃ aparimānāsu lokadhātūsu imassa sadevakassa lokassa ‘‘nīlaṃ pīta’’ntiādi (dha. sa. 619) rūpārammaṇaṃ cakkhudvāre āpāthaṃ āgacchati, ayaṃ satto imasmiṃ khaṇe imaṃ nāma rūpārammaṇaṃ disvā sumano vā dummano vā majjhatto vā jātoti taṃ sabbaṃ tathāgatassa sabbaññutaññāṇaṃ jānāti. Tathā yaṃ aparimāṇāsu lokadhātūsu imassa sadevakassa lokassa ‘‘bherisaddo, mudiṅgasaddo’’tiādi saddārammaṇaṃ sotadvāre āpāthaṃ āgacchati, ‘‘mūlagandho tacagandho’’tiādi (dha. sa. 624-627) gandhārammaṇaṃ ghānadvāre āpāthaṃ āgacchati, ‘‘mūlaraso, khandharaso’’tiādi (dha. sa. 628-631) rasārammaṇaṃ jivhādvāre āpāthaṃ āgacchati, ‘‘kakkhaḷaṃ, muduka’’ntiādi (dha. sa. 647-650) pathavīdhātutejodhātuvāyodhātubhedaṃ phoṭṭhabbārammaṇaṃ kāyadvāre āpāthaṃ āgacchati, ayaṃ satto imasmiṃ khaṇe imaṃ nāma phoṭṭhabbārammaṇaṃ phusitvā sumano vā dummano vā majjhatto vā jātoti taṃ sabbaṃ tathāgatassa sabbaññutaññāṇaṃ jānāti. Tathā yaṃ aparimāṇāsu lokadhātūsu imassa sadevakassa lokassa sukhadukkhādibhedaṃ dhammārammaṇaṃ manodvāre āpāthaṃ āgacchati, ayaṃ satto imasmiṃ khaṇe imaṃ nāma dhammārammaṇaṃ vijānitvā sumano vā dummano vā majjhatto vā jātoti taṃ sabbaṃ tathāgatassa sabbaññutaññāṇaṃ jānāti. Imassa pana mahājanassa pariyesitvā appattampi atthi, pariyesitvā pattampi atthi. Apariyesitvā appattampi atthi, apariyesitvā pattampi atthi. Sabbaṃ tathāgatassa sabbaññutaññāṇena appattaṃ nāma natthīti.
121. புன அபரேன பரியாயேன ஸப்³ப³ஞ்ஞுதஞ்ஞாணபா⁴வஸாத⁴னத்த²ங் ந தஸ்ஸாதி கா³த²மாஹ. தத்த² ந தஸ்ஸ அத்³தி³ட்ட²மித⁴த்தி² கிஞ்சீதி தஸ்ஸ ததா²க³தஸ்ஸ இத⁴ இமஸ்மிங் தேதா⁴துகே லோகே, இமஸ்மிங் பச்சுப்பன்னகாலே வா பஞ்ஞாசக்கு²னா அத்³தி³ட்ட²ங் நாம கிஞ்சி அப்பமத்தகம்பி ந அத்தி² ந ஸங்விஜ்ஜதி. அத்தீ²தி இத³ங் வத்தமானகாலிகங் ஆக்²யாதபத³ங். இமினா பச்சுப்பன்னகாலிகஸ்ஸ ஸப்³ப³த⁴ம்மஸ்ஸ ஞாதபா⁴வங் த³ஸ்ஸேதி. கா³தா²ப³ந்த⁴ஸுக²த்த²ங் பனெத்த² த³-காரோ ஸங்யுத்தோ. அதோ² அவிஞ்ஞாதந்தி எத்த² அதோ²இதி வசனோபாதா³னே நிபாதோ. அவிஞ்ஞாதந்தி அதீதகாலிகங் அவிஞ்ஞாதங் நாம கிஞ்சி த⁴ம்மஜாதங். நாஹோஸீதி பாட²ஸேஸோ. அப்³யயபூ⁴தஸ்ஸ அத்தி²ஸத்³த³ஸ்ஸ க³ஹணே பாட²ஸேஸங் வினாபி யுஜ்ஜதியேவ. இமினா அதீதகாலிகஸ்ஸ ஸப்³ப³த⁴ம்மஸ்ஸ ஞாதபா⁴வங் த³ஸ்ஸேதி . அஜானிதப்³ப³ந்தி அனாக³தகாலிகங் அஜானிதப்³ப³ங் நாம த⁴ம்மஜாதங் ந ப⁴விஸ்ஸதி, நத்தி² வா. இமினா அனாக³தகாலிகஸ்ஸ ஸப்³ப³த⁴ம்மஸ்ஸ ஞாதபா⁴வங் த³ஸ்ஸேதி. ஜானநகிரியாவிஸேஸனமத்தமேவ வா எத்த² அ-காரோ. ஸப்³ப³ங் அபி⁴ஞ்ஞாஸி யத³த்தி² நெய்யந்தி எத்த² யங் தேகாலிகங் வா காலவிமுத்தங் வா நெய்யங் ஜானிதப்³ப³ங் கிஞ்சி த⁴ம்மஜாதங் அத்தி², தங் ஸப்³ப³ங் ததா²க³தோ அபி⁴ஞ்ஞாஸி அதி⁴கேன ஸப்³ப³ஞ்ஞுதஞ்ஞாணேன ஜானி படிவிஜ்ஜி². எத்த² அத்தி²ஸத்³தே³ன தேகாலிகஸ்ஸ காலவிமுத்தஸ்ஸ ச க³ஹணா அத்தி²-ஸத்³தோ³ அப்³யயபூ⁴தோயேவ த³ட்ட²ப்³போ³. ததா²க³தோ தேன ஸமந்தசக்கூ²தி காலவஸேன ஓகாஸவஸேன ச நிப்பதே³ஸத்தா ஸமந்தா ஸப்³ப³தோ பவத்தங் ஞாணசக்கு² அஸ்ஸாதி ஸமந்தசக்கு². தேன யதா²வுத்தேன காரணேன ததா²க³தோ ஸமந்தசக்கு², ஸப்³ப³ஞ்ஞூதி வுத்தங் ஹோதி. இமிஸ்ஸா கா³தா²ய புக்³க³லாதி⁴ட்டா²னாய தே³ஸனாய ஸப்³ப³ஞ்ஞுதஞ்ஞாணங் ஸாதி⁴தங்.
121. Puna aparena pariyāyena sabbaññutaññāṇabhāvasādhanatthaṃ na tassāti gāthamāha. Tattha na tassa addiṭṭhamidhatthi kiñcīti tassa tathāgatassa idha imasmiṃ tedhātuke loke, imasmiṃ paccuppannakāle vā paññācakkhunā addiṭṭhaṃ nāma kiñci appamattakampi na atthi na saṃvijjati. Atthīti idaṃ vattamānakālikaṃ ākhyātapadaṃ. Iminā paccuppannakālikassa sabbadhammassa ñātabhāvaṃ dasseti. Gāthābandhasukhatthaṃ panettha da-kāro saṃyutto. Atho aviññātanti ettha athoiti vacanopādāne nipāto. Aviññātanti atītakālikaṃ aviññātaṃ nāma kiñci dhammajātaṃ. Nāhosīti pāṭhaseso. Abyayabhūtassa atthisaddassa gahaṇe pāṭhasesaṃ vināpi yujjatiyeva. Iminā atītakālikassa sabbadhammassa ñātabhāvaṃ dasseti . Ajānitabbanti anāgatakālikaṃ ajānitabbaṃ nāma dhammajātaṃ na bhavissati, natthi vā. Iminā anāgatakālikassa sabbadhammassa ñātabhāvaṃ dasseti. Jānanakiriyāvisesanamattameva vā ettha a-kāro. Sabbaṃ abhiññāsi yadatthi neyyanti ettha yaṃ tekālikaṃ vā kālavimuttaṃ vā neyyaṃ jānitabbaṃ kiñci dhammajātaṃ atthi, taṃ sabbaṃ tathāgato abhiññāsi adhikena sabbaññutaññāṇena jāni paṭivijjhi. Ettha atthisaddena tekālikassa kālavimuttassa ca gahaṇā atthi-saddo abyayabhūtoyeva daṭṭhabbo. Tathāgato tena samantacakkhūti kālavasena okāsavasena ca nippadesattā samantā sabbato pavattaṃ ñāṇacakkhu assāti samantacakkhu. Tena yathāvuttena kāraṇena tathāgato samantacakkhu, sabbaññūti vuttaṃ hoti. Imissā gāthāya puggalādhiṭṭhānāya desanāya sabbaññutaññāṇaṃ sādhitaṃ.
புன பு³த்³த⁴ஞாணானங் விஸயவஸேன ஸப்³ப³ஞ்ஞுதஞ்ஞாணங் த³ஸ்ஸேதுகாமோ ஸமந்தசக்கூ²தி கேனட்டே²ன ஸமந்தசக்கூ²திஆதி³மாஹ. தத்த² கா³தா²ய ஸமந்தசக்கூ²தி வுத்தபதே³ யங் தங் ஸமந்தசக்கு², தங் கேனட்டே²ன ஸமந்தசக்கூ²தி அத்தோ². அத்தோ² பனஸ்ஸ யாவதா து³க்க²ஸ்ஸ து³க்க²ட்டோ²திஆதீ³ஹி வுத்தோயேவ ஹோதி. ஸப்³ப³ஞ்ஞுதஞ்ஞாணஞ்ஹி ஸமந்தசக்கு². யதா²ஹ – ‘‘ஸமந்தசக்கு² வுச்சதி ஸப்³ப³ஞ்ஞுதஞ்ஞாண’’ந்தி (சூளனி॰ தோ⁴தகமாணவபுச்சா²னித்³தே³ஸ 32). தஸ்மிங் ஸப்³ப³ஞ்ஞுதஞ்ஞாணட்டே² வுத்தே ஸமந்தசக்கு²ட்டோ² வுத்தோயேவ ஹோதீதி. பு³த்³த⁴ஸ்ஸேவ ஞாணானீதி பு³த்³த⁴ஞாணானி. து³க்கே² ஞாணாதீ³னிபி ஹி ஸப்³பா³காரேன பு³த்³த⁴ஸ்ஸேவ ப⁴க³வதோ பவத்தந்தி, இதரேஸங் பன ஏகதே³ஸமத்தேனேவ பவத்தந்தி. ஸாவகஸாதா⁴ரணானீதி பன ஏகதே³ஸேனாபி அத்தி²தங் ஸந்தா⁴ய வுத்தங். ஸப்³போ³ ஞாதோதி ஸப்³போ³ ஞாணேன ஞாதோ. அஞ்ஞாதோ து³க்க²ட்டோ² நத்தீ²தி வுத்தமேவ அத்த²ங் படிஸேதே⁴ன விபா⁴வேதி. ஸப்³போ³ தி³ட்டோ²தி ந கேவலங் ஞாதமத்தோயேவ, அத² கோ² சக்கு²னா தி³ட்டோ² விய கதோ. ஸப்³போ³ விதி³தோதி ந கேவலங் தி³ட்ட²மத்தோயேவ, அத² கோ² பாகடோ. ஸப்³போ³ ஸச்சி²கதோதி ந கேவலங் விதி³தோயேவ, அத² கோ² தத்த² ஞாணபடிலாப⁴வஸேன பச்சக்கீ²கதோ. ஸப்³போ³ ப²ஸ்ஸிதோதி ந கேவலங் ஸச்சி²கதோயேவ, அத² கோ² புனப்புனங் யதா²ருசி ஸமுதா³சாரவஸேன பு²ட்டோ²தி. அத² வா ஞாதோ ஸபா⁴வலக்க²ணவஸேன. தி³ட்டோ² ஸாமஞ்ஞலக்க²ணவஸேன. விதி³தோ ரஸவஸேன. ஸச்சி²கதோ பச்சுபட்டா²னவஸேன . ப²ஸ்ஸிதோ பத³ட்டா²னவஸேன. அத² வா ஞாதோ ஞாணுப்பாத³வஸேன. தி³ட்டோ² சக்கு²ப்பாத³வஸேன. விதி³தோ பஞ்ஞுப்பாத³வஸேன. ஸச்சி²கதோ விஜ்ஜுப்பாத³வஸேன. ப²ஸ்ஸிதோ ஆலோகுப்பாத³வஸேன. ‘‘யாவதா து³க்க²ஸ்ஸ து³க்க²ட்டோ², ஸப்³போ³ தி³ட்டோ², அதி³ட்டோ² து³க்க²ட்டோ² நத்தீ²’’திஆதி³னா நயேன ச ‘‘யாவதா ஸதே³வகஸ்ஸ லோகஸ்ஸ…பே॰… அனுவிசரிதங் மனஸா, ஸப்³ப³ங் ஞாதங், அஞ்ஞாதங் நத்தீ²’’திஆதி³னா நயேன ச வித்தா²ரோ வேதி³தப்³போ³. பட²மங் வுத்தகா³தா² நிக³மனவஸேன புன வுத்தா. தங்னிக³மனேயேவ ஹி கதே ஞாணனிக³மனம்பி கதமேவ ஹோதீதி.
Puna buddhañāṇānaṃ visayavasena sabbaññutaññāṇaṃ dassetukāmo samantacakkhūti kenaṭṭhena samantacakkhūtiādimāha. Tattha gāthāya samantacakkhūti vuttapade yaṃ taṃ samantacakkhu, taṃ kenaṭṭhena samantacakkhūti attho. Attho panassa yāvatādukkhassa dukkhaṭṭhotiādīhi vuttoyeva hoti. Sabbaññutaññāṇañhi samantacakkhu. Yathāha – ‘‘samantacakkhu vuccati sabbaññutaññāṇa’’nti (cūḷani. dhotakamāṇavapucchāniddesa 32). Tasmiṃ sabbaññutaññāṇaṭṭhe vutte samantacakkhuṭṭho vuttoyeva hotīti. Buddhasseva ñāṇānīti buddhañāṇāni. Dukkhe ñāṇādīnipi hi sabbākārena buddhasseva bhagavato pavattanti, itaresaṃ pana ekadesamatteneva pavattanti. Sāvakasādhāraṇānīti pana ekadesenāpi atthitaṃ sandhāya vuttaṃ. Sabbo ñātoti sabbo ñāṇena ñāto. Aññāto dukkhaṭṭho natthīti vuttameva atthaṃ paṭisedhena vibhāveti. Sabbo diṭṭhoti na kevalaṃ ñātamattoyeva, atha kho cakkhunā diṭṭho viya kato. Sabbo viditoti na kevalaṃ diṭṭhamattoyeva, atha kho pākaṭo. Sabbo sacchikatoti na kevalaṃ viditoyeva, atha kho tattha ñāṇapaṭilābhavasena paccakkhīkato. Sabbo phassitoti na kevalaṃ sacchikatoyeva, atha kho punappunaṃ yathāruci samudācāravasena phuṭṭhoti. Atha vā ñāto sabhāvalakkhaṇavasena. Diṭṭho sāmaññalakkhaṇavasena. Vidito rasavasena. Sacchikato paccupaṭṭhānavasena . Phassito padaṭṭhānavasena. Atha vā ñāto ñāṇuppādavasena. Diṭṭho cakkhuppādavasena. Vidito paññuppādavasena. Sacchikato vijjuppādavasena. Phassito ālokuppādavasena. ‘‘Yāvatā dukkhassa dukkhaṭṭho, sabbo diṭṭho, adiṭṭho dukkhaṭṭho natthī’’tiādinā nayena ca ‘‘yāvatā sadevakassa lokassa…pe… anuvicaritaṃ manasā, sabbaṃ ñātaṃ, aññātaṃ natthī’’tiādinā nayena ca vitthāro veditabbo. Paṭhamaṃ vuttagāthā nigamanavasena puna vuttā. Taṃnigamaneyeva hi kate ñāṇanigamanampi katameva hotīti.
ஸப்³ப³ஞ்ஞுதஞ்ஞாணனித்³தே³ஸவண்ணனா நிட்டி²தா.
Sabbaññutaññāṇaniddesavaṇṇanā niṭṭhitā.
ஸத்³த⁴ம்மப்பகாஸினியா படிஸம்பி⁴தா³மக்³க³-அட்ட²கதா²ய
Saddhammappakāsiniyā paṭisambhidāmagga-aṭṭhakathāya
ஞாணகதா²வண்ணனா நிட்டி²தா.
Ñāṇakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 72-73. ஸப்³ப³ஞ்ஞுதஞாணனித்³தே³ஸோ • 72-73. Sabbaññutañāṇaniddeso
