| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā |
༧༢-༧༣. སབྦཉྙུཏཉྙཱཎནིདྡེསཝཎྞནཱ
72-73. Sabbaññutaññāṇaniddesavaṇṇanā
༡༡༩. སབྦཉྙུཏཉྙཱཎནིདྡེསེ ཀཏམཾ ཏཐཱགཏསྶ སབྦཉྙུཏཉྙཱཎནྟི པུཙྪིཏྭཱ ཏེན སམགཏིཀཏྟཱ ཏེནེཝ སཧ ཨནཱཝརཎཉཱཎཾ ནིདྡིཊྛཾ། ན ཧི ཨནཱཝརཎཉཱཎཾ དྷམྨཏོ ཝིསུཾ ཨཏྠི, ཨེཀམེཝ ཧེཏཾ ཉཱཎཾ ཨཱཀཱརབྷེདཏོ དྭེདྷཱ ཝུཙྩཏི སདྡྷིནྡྲིཡསདྡྷཱབལཱདཱིནི ཝིཡ། སབྦཉྙུཏཉྙཱཎམེཝ ཧི ནཏྠི ཨེཏསྶ ཨཱཝརཎནྟི, ཀེནཙི དྷམྨེན, པུགྒལེན ཝཱ ཨཱཝརཎཾ ཀཱཏུཾ ཨསཀྐུཎེཡྻཏཱཡ ཨནཱཝརཎནྟི ཝུཙྩཏི ཨཱཝཛྫནཔཊིབདྡྷཏྟཱ སབྦདྷམྨཱནཾ། ཨཉྙེ པན ཨཱཝཛྫིཏྭཱཔི ན ཛཱནནྟི། ཀེཙི པནཱཧུ ‘‘མནོཝིཉྙཱཎཾ ཝིཡ སབྦཱརམྨཎིཀཏྟཱ སབྦཉྙུཏཉྙཱཎཾ ། ཏཾཡེཝ ཉཱཎཾ ཨིནྡཝཛིརཾ ཝིཡ ཝིསཡེསུ ཨཔྤཊིཧཏཏྟཱ ཨནཱཝརཎཉཱཎཾ། ཨནུཔུབྦསབྦཉྙུཏཱཔཊིཀྑེཔོ སབྦཉྙུཏཉྙཱཎཾ, སཀིཾསབྦཉྙུཏཱཔཊིཀྑེཔོ ཨནཱཝརཎཉཱཎཾ, བྷགཝཱ སབྦཉྙུཏཉྙཱཎཔཊིལཱབྷེནཔི སབྦཉྙཱུཏི ཝུཙྩཏི, ན ཙ ཨནུཔུབྦསབྦཉྙཱུ། ཨནཱཝརཎཉཱཎཔཊིལཱབྷེནཔི སབྦཉྙཱུཏི ཝུཙྩཏི, ན ཙ སཀིཾསབྦཉྙཱུ’’ཏི།
119. Sabbaññutaññāṇaniddese katamaṃ tathāgatassa sabbaññutaññāṇanti pucchitvā tena samagatikattā teneva saha anāvaraṇañāṇaṃ niddiṭṭhaṃ. Na hi anāvaraṇañāṇaṃ dhammato visuṃ atthi, ekameva hetaṃ ñāṇaṃ ākārabhedato dvedhā vuccati saddhindriyasaddhābalādīni viya. Sabbaññutaññāṇameva hi natthi etassa āvaraṇanti, kenaci dhammena, puggalena vā āvaraṇaṃ kātuṃ asakkuṇeyyatāya anāvaraṇanti vuccati āvajjanapaṭibaddhattā sabbadhammānaṃ. Aññe pana āvajjitvāpi na jānanti. Keci panāhu ‘‘manoviññāṇaṃ viya sabbārammaṇikattā sabbaññutaññāṇaṃ . Taṃyeva ñāṇaṃ indavajiraṃ viya visayesu appaṭihatattā anāvaraṇañāṇaṃ. Anupubbasabbaññutāpaṭikkhepo sabbaññutaññāṇaṃ, sakiṃsabbaññutāpaṭikkhepo anāvaraṇañāṇaṃ, bhagavā sabbaññutaññāṇapaṭilābhenapi sabbaññūti vuccati, na ca anupubbasabbaññū. Anāvaraṇañāṇapaṭilābhenapi sabbaññūti vuccati, na ca sakiṃsabbaññū’’ti.
སབྦཾ སངྑཏམསངྑཏཾ ཨནཝསེསཾ ཛཱནཱཏཱིཏི ཨེཏྠ སབྦནྟི ཛཱཏིཝསེན སབྦདྷམྨཱནཾ ནིསྶེསཔརིཡཱདཱནཾ། ཨནཝསེསནྟི ཨེཀེཀསྶེཝ དྷམྨསྶ སབྦཱཀཱརཝསེན ནིསྶེསཔརིཡཱདཱནཾ། སངྑཏམསངྑཏནྟི དྭིདྷཱ པབྷེདདསྶནཾ། སངྑཏཉྷི ཨེཀོ པབྷེདོ, ཨསངྑཏཾ ཨེཀོ པབྷེདོ། པཙྩཡེཧི སངྒམྨ ཀཏནྟི སངྑཏཾ། ཁནྡྷཔཉྩཀཾ། ཏཐཱ ན སངྑཏནྟི ཨསངྑཏཾ། ནིབྦཱནཾ། སངྑཏཾ ཨནིཙྩདུཀྑཱནཏྟཱདཱིཧི ཨཱཀཱརེཧི ཨནཝསེསཾ ཛཱནཱཏི, ཨསངྑཏཾ སུཉྙཏཱནིམིཏྟཨཔྤཎིཧིཏཱདཱིཧི ཨཱཀཱརེཧི ཨནཝསེསཾ ཛཱནཱཏི། ནཏྠི ཨེཏསྶ སངྑཏསྶ ཨསངྑཏསྶ ཙ ཨཝསེསོཏི ཨནཝསེསཾ། སངྑཏཾ ཨསངྑཏཉྩ། ཨནེཀབྷེདཱཔི པཉྙཏྟི པཙྩཡེཧི ཨཀཏཏྟཱ ཨསངྑཏཔཀྑཾ བྷཛཏི། སབྦཉྙུཏཉྙཱཎཉྷི སབྦཱཔི པཉྙཏྟིཡོ ཨནེཀབྷེདཏོ ཛཱནཱཏི། ཨཐ ཝཱ སབྦནྟི སབྦདྷམྨགྒཧཎཾ། ཨནཝསེསནྟི ནིཔྤདེསགྒཧཎཾ། ཏཏྠ ཨཱཝརཎཾ ནཏྠཱིཏི ཏཏྠ ཏསྨིཾ ཨནཝསེསེ སངྑཏཱསངྑཏེ ནིསྶངྒཏྟཱ སབྦཉྙུཏཉྙཱཎསྶ ཨཱཝརཎཾ ནཏྠཱིཏི ཏདེཝ སབྦཉྙུཏཉྙཱཎཾ ཨནཱཝརཎཉཱཎཾ ནཱམཱཏི ཨཏྠོ།
Sabbaṃ saṅkhatamasaṅkhataṃ anavasesaṃ jānātīti ettha sabbanti jātivasena sabbadhammānaṃ nissesapariyādānaṃ. Anavasesanti ekekasseva dhammassa sabbākāravasena nissesapariyādānaṃ. Saṅkhatamasaṅkhatanti dvidhā pabhedadassanaṃ. Saṅkhatañhi eko pabhedo, asaṅkhataṃ eko pabhedo. Paccayehi saṅgamma katanti saṅkhataṃ. Khandhapañcakaṃ. Tathā na saṅkhatanti asaṅkhataṃ. Nibbānaṃ. Saṅkhataṃ aniccadukkhānattādīhi ākārehi anavasesaṃ jānāti, asaṅkhataṃ suññatānimittaappaṇihitādīhi ākārehi anavasesaṃ jānāti. Natthi etassa saṅkhatassa asaṅkhatassa ca avasesoti anavasesaṃ. Saṅkhataṃ asaṅkhatañca. Anekabhedāpi paññatti paccayehi akatattā asaṅkhatapakkhaṃ bhajati. Sabbaññutaññāṇañhi sabbāpi paññattiyo anekabhedato jānāti. Atha vā sabbanti sabbadhammaggahaṇaṃ. Anavasesanti nippadesaggahaṇaṃ. Tattha āvaraṇaṃ natthīti tattha tasmiṃ anavasese saṅkhatāsaṅkhate nissaṅgattā sabbaññutaññāṇassa āvaraṇaṃ natthīti tadeva sabbaññutaññāṇaṃ anāvaraṇañāṇaṃ nāmāti attho.
༡༢༠. ཨིདཱནི ཨནེཀཝིསཡབྷེདཏོ དསྶེཏུཾ ཨཏཱིཏནྟིཨཱདིམཱཧ། ཏཏྠ ཨཏཱིཏཾ ཨནཱགཏཾ པཙྩུཔྤནྣནྟི ཀཱལབྷེདཏོ དསྶིཏཾ, ཙཀྑུ ཙེཝ རཱུཔཱ ཙཱཏིཨཱདི ཝཏྠཱརམྨཎབྷེདཏོ། ཨེཝཾ ཏཾ སབྦནྟི ཏེསཾ ཙཀྑུརཱུཔཱནཾ ཨནཝསེསཔརིཡཱདཱནཾ། ཨེཝཾ སེསེསུ། ཡཱཝཏཱཏི ཨནཝསེསཔརིཡཱདཱནཾ། ཨནིཙྩཊྛནྟིཨཱདི སཱམཉྙལཀྑཎབྷེདཏོ དསྶིཏཾ། ཨནིཙྩཊྛནྟི ཙ ཨནིཙྩཱཀཱརཾ། པཙྩཏྟཏྠེ ཝཱ ཨུཔཡོགཝཙནཾ། ཨེས ནཡོ ཨེདིསེསུ། རཱུཔསྶཱཏིཨཱདི ཁནྡྷབྷེདཏོ དསྶིཏཾ། ཙཀྑུསྶ…པེ॰… ཛརཱམརཎསྶཱཏི ཧེཊྛཱ ཝུཏྟཔེཡྻཱལནཡེན ཡོཛེཏབྦཾ། ཨབྷིཉྙཱཡཱཏིཨཱདཱིསུ ཧེཊྛཱ ཝུཏྟཉཱཎཱནེཝ། ཨབྷིཉྙཊྛནྟི ཨབྷིཛཱནནསབྷཱཝཾ། ཨེས ནཡོ ཨེདིསེསུ། ཁནྡྷཱནཾ ཁནྡྷཊྛནྟིཨཱདི ཧེཊྛཱ ཝུཏྟནཡེནེཝ ཝེདིཏབྦཾ། ཀུསལེ དྷམྨེཏིཨཱདི ཀུསལཏྟིཀཝསེན བྷེདོ། ཀཱམཱཝཙརེ དྷམྨེཏིཨཱདི ཙཏུབྷཱུམཀཝསེན། ཨུབྷཡཏྠཱཔི ‘‘སབྦེ ཛཱནཱཏཱི’’ཏི བཧུཝཙནཔཱཋོ སུནྡརོ། ཨེཀཝཙནསོཏེ པཏིཏཏྟཱ པན པོཏྠཀེསུ ཨེཀཝཙནེན ལིཁིཏཾ། དུཀྑསྶཱཏིཨཱདི ཙུདྡསནྣཾ བུདྡྷཉཱཎཱནཾ ཝིསཡབྷེདོ། ཨིནྡྲིཡཔརོཔརིཡཏྟེ ཉཱཎནྟིཨཱདཱིནི ཙཏྟཱརི ཉཱཎཱནི ཝཏྭཱ སབྦཉྙུཏཉྙཱཎཾ ཀསྨཱ ན ཝུཏྟནྟི ཙེ? ཝུཙྩམཱནསྶ སབྦཉྙུཏཉྙཱཎཏྟཱ། ཝིསཡབྷེདཏོ ཧི སབྦཉྙུཏཉྙཱཎེ ཝུཙྩམཱནེ ཏཾ ཉཱཎཾ ན ཝཏྟབྦཾ ཧོཏི, སབྦཉྙུཏཉྙཱཎཾ པན སབྦཉྙུཏཉྙཱཎསྶ ཝིསཡོ ཧོཏིཡེཝ།
120. Idāni anekavisayabhedato dassetuṃ atītantiādimāha. Tattha atītaṃ anāgataṃ paccuppannanti kālabhedato dassitaṃ, cakkhu ceva rūpā cātiādi vatthārammaṇabhedato. Evaṃ taṃ sabbanti tesaṃ cakkhurūpānaṃ anavasesapariyādānaṃ. Evaṃ sesesu. Yāvatāti anavasesapariyādānaṃ. Aniccaṭṭhantiādi sāmaññalakkhaṇabhedato dassitaṃ. Aniccaṭṭhanti ca aniccākāraṃ. Paccattatthe vā upayogavacanaṃ. Esa nayo edisesu. Rūpassātiādi khandhabhedato dassitaṃ. Cakkhussa…pe… jarāmaraṇassāti heṭṭhā vuttapeyyālanayena yojetabbaṃ. Abhiññāyātiādīsu heṭṭhā vuttañāṇāneva. Abhiññaṭṭhanti abhijānanasabhāvaṃ. Esa nayo edisesu. Khandhānaṃ khandhaṭṭhantiādi heṭṭhā vuttanayeneva veditabbaṃ. Kusale dhammetiādi kusalattikavasena bhedo. Kāmāvacare dhammetiādi catubhūmakavasena. Ubhayatthāpi ‘‘sabbe jānātī’’ti bahuvacanapāṭho sundaro. Ekavacanasote patitattā pana potthakesu ekavacanena likhitaṃ. Dukkhassātiādi cuddasannaṃ buddhañāṇānaṃ visayabhedo. Indriyaparopariyatte ñāṇantiādīni cattāri ñāṇāni vatvā sabbaññutaññāṇaṃ kasmā na vuttanti ce? Vuccamānassa sabbaññutaññāṇattā. Visayabhedato hi sabbaññutaññāṇe vuccamāne taṃ ñāṇaṃ na vattabbaṃ hoti, sabbaññutaññāṇaṃ pana sabbaññutaññāṇassa visayo hotiyeva.
པུན ཀཱལ༹ཀཱརཱམསུཏྟནྟཱདཱིསུ (ཨ॰ ནི॰ ༤.༢༤) ཝུཏྟནཡེན སབྦཉྙུཏཉྙཱཎབྷཱུམིཾ དསྶེནྟོ ཡཱཝཏཱ སདེཝཀསྶ ལོཀསྶཱཏིཨཱདིམཱཧ། ཏཏྠ སཧ དེཝེཧི སདེཝཀསྶ། སཧ མཱརེན སམཱརཀསྶ ། སཧ བྲཧྨུནཱ སབྲཧྨཀསྶ ལོཀསྶ། སཧ སམཎབྲཱཧྨཎེཧི སསྶམཎབྲཱཧྨཎིཡཱ། སཧ དེཝམནུསྶེཧི སདེཝམནུསྶཱཡ པཛཱཡ། པཛཱཏཏྟཱ པཛཱཏི སཏྟལོཀསྶ པརིཡཱཡཝཙནམེཏཾ། ཏཏྠ སདེཝཀཝཙནེན པཉྩཀཱམཱཝཙརདེཝགྒཧཎཾ, སམཱརཀཝཙནེན ཚཊྛཀཱམཱཝཙརདེཝགྒཧཎཾ, སབྲཧྨཀཝཙནེན བྲཧྨཀཱཡིཀཱདིབྲཧྨགྒཧཎཾ, སསྶམཎབྲཱཧྨཎིཝཙནེན སཱསནསྶ པཙྩཏྠིཀཔཙྩཱམིཏྟསམཎབྲཱཧྨཎགྒཧཎཾ སམིཏཔཱཔབཱཧིཏཔཱཔསམཎབྲཱཧྨཎགྒཧཎཉྩ, པཛཱཝཙནེན སཏྟལོཀགྒཧཎཾ, སདེཝམནུསྶཝཙནེན སམྨུཏིདེཝསེསམནུསྶགྒཧཎཾ ཝེདིཏབྦཾ། ཨེཝམེཏྠ ཏཱིཧི པདེཧི ཨོཀཱསལོཀོ, དྭཱིཧི པཛཱཝསེན སཏྟལོཀོ གཧིཏོཏི ཝེདིཏབྦོ།
Puna kāḷakārāmasuttantādīsu (a. ni. 4.24) vuttanayena sabbaññutaññāṇabhūmiṃ dassento yāvatā sadevakassa lokassātiādimāha. Tattha saha devehi sadevakassa. Saha mārena samārakassa. Saha brahmunā sabrahmakassa lokassa. Saha samaṇabrāhmaṇehi sassamaṇabrāhmaṇiyā. Saha devamanussehi sadevamanussāya pajāya. Pajātattā pajāti sattalokassa pariyāyavacanametaṃ. Tattha sadevakavacanena pañcakāmāvacaradevaggahaṇaṃ, samārakavacanena chaṭṭhakāmāvacaradevaggahaṇaṃ, sabrahmakavacanena brahmakāyikādibrahmaggahaṇaṃ, sassamaṇabrāhmaṇivacanena sāsanassa paccatthikapaccāmittasamaṇabrāhmaṇaggahaṇaṃ samitapāpabāhitapāpasamaṇabrāhmaṇaggahaṇañca, pajāvacanena sattalokaggahaṇaṃ, sadevamanussavacanena sammutidevasesamanussaggahaṇaṃ veditabbaṃ. Evamettha tīhi padehi okāsaloko, dvīhi pajāvasena sattaloko gahitoti veditabbo.
ཨཔརོ ནཡོ – སདེཝཀགྒཧཎེན ཨརཱུཔཱཝཙརལོཀོ གཧིཏོ, སམཱརཀགྒཧཎེན ཚཀཱམཱཝཙརདེཝལོཀོ, སབྲཧྨཀགྒཧཎེན རཱུཔཱཝཙརབྲཧྨལོཀོ, སསྶམཎབྲཱཧྨཎཱདིགྒཧཎེན ཙཏུཔརིསཝསེན, སམྨུཏིདེཝེཧི ཝཱ སཧ མནུསྶལོཀོ, ཨཝསེསསཏྟལོཀོ ཝཱ།
Aparo nayo – sadevakaggahaṇena arūpāvacaraloko gahito, samārakaggahaṇena chakāmāvacaradevaloko, sabrahmakaggahaṇena rūpāvacarabrahmaloko, sassamaṇabrāhmaṇādiggahaṇena catuparisavasena, sammutidevehi vā saha manussaloko, avasesasattaloko vā.
ཨཔིཙེཏྠ སདེཝཀཝཙནེན ཨུཀྐཊྛཔརིཙྪེདཏོ སབྦསྶཔི ལོཀསྶ དིཊྛཱདིཛཱནནབྷཱཝཾ སཱདྷེཏི། ཏཏོ ཡེསཾ སིཡཱ ‘‘མཱརོ མཧཱནུབྷཱཝོ ཚཀཱམཱཝཙརིསྶརོ ཝསཝཏྟཱི, ཀིཾ ཏསྶཱཔི དིཊྛཱདིཾ ཛཱནཱཏཱི’’ཏི, ཏེསཾ ཝིམཏིཾ ཝིདྷམནྟོ ‘‘སམཱརཀསྶཱ’’ཏི ཨཱཧ། ཡེསཾ པན སིཡཱ ‘‘བྲཧྨཱ མཧཱནུབྷཱཝོ ཨེཀངྒུལིཡཱ ཨེཀསྨིཾ ཙཀྐཝཱལ༹སཧསྶེ ཨཱལོཀཾ ཕརཏི, དྭཱིཧི…པེ॰… དསཧི ཨངྒུལཱིཧི དསསུ ཙཀྐཝཱལ༹སཧསྶེསུ ཨཱལོཀཾ ཕརཏི, ཨནུཏྟརཉྩ ཛྷཱནསམཱཔཏྟིསུཁཾ པཊིསཾཝེདེཏི, ཀིཾ ཏསྶཱཔི དིཊྛཱདིཾ ཛཱནཱཏཱི’’ཏི, ཏེསཾ ཝིམཏིཾ ཝིདྷམནྟོ ‘‘སབྲཧྨཀསྶཱ’’ཏི ཨཱཧ། ཏཏོ ཡེསཾ སིཡཱ ‘‘པུཐཱུ སམཎབྲཱཧྨཎཱ སཱསནསྶ པཙྩཏྠིཀཱ, ཀིཾ ཏེསམྤི དིཊྛཱདིཾ ཛཱནཱཏཱི’’ཏི, ཏེསཾ ཝིམཏིཾ ཝིདྷམནྟོ ‘‘སསྶམཎབྲཱཧྨཎིཡཱ པཛཱཡཱ’’ཏི ཨཱཧ། ཨེཝཾ ཨུཀྐཊྛཱནཾ དིཊྛཱདིཛཱནནབྷཱཝཾ པཀཱསེཏྭཱ ཨཐ སམྨུཏིདེཝེ ཨཝསེསམནུསྶེ ཙ ཨུཔཱདཱཡ ཨུཀྐཊྛཔརིཙྪེདཝསེན སེསསཏྟལོཀསྶ དིཊྛཱདིཛཱནནབྷཱཝཾ པཀཱསེཏི། ཨཡམེཏྠ ཨནུསནྡྷིཀྐམོ། པོརཱཎཱ པནཱཧུ – སདེཝཀསྶཱཏི དེཝཏཱཧི སདྡྷིཾ ཨཝསེསལོཀསྶ ། སམཱརཀསྶཱཏི མཱརེན སདྡྷིཾ ཨཝསེསལོཀསྶ། སབྲཧྨཀསྶཱཏི བྲཧྨེཧི སདྡྷིཾ ཨཝསེསལོཀསྶ། ཨེཝཾ སབྦེཔི ཏིབྷཝཱུཔགེ སཏྟེ ཏཱིཧཱཀཱརེཧི ཏཱིསུ པདེསུ པཀྑིཔིཏྭཱ པུན དྭཱིཧཱཀཱརེཧི པརིཡཱདཱཏུཾ སསྶམཎབྲཱཧྨཎིཡཱ པཛཱཡ སདེཝམནུསྶཱཡཱཏི ཝུཏྟཾ། ཨེཝཾ པཉྩཧི པདེཧི ཏེན ཏེན ཨཱཀཱརེན ཏེདྷཱཏུཀམེཝ པརིཡཱདིནྣཾ ཧོཏཱིཏི།
Apicettha sadevakavacanena ukkaṭṭhaparicchedato sabbassapi lokassa diṭṭhādijānanabhāvaṃ sādheti. Tato yesaṃ siyā ‘‘māro mahānubhāvo chakāmāvacarissaro vasavattī, kiṃ tassāpi diṭṭhādiṃ jānātī’’ti, tesaṃ vimatiṃ vidhamanto ‘‘samārakassā’’ti āha. Yesaṃ pana siyā ‘‘brahmā mahānubhāvo ekaṅguliyā ekasmiṃ cakkavāḷasahasse ālokaṃ pharati, dvīhi…pe… dasahi aṅgulīhi dasasu cakkavāḷasahassesu ālokaṃ pharati, anuttarañca jhānasamāpattisukhaṃ paṭisaṃvedeti, kiṃ tassāpi diṭṭhādiṃ jānātī’’ti, tesaṃ vimatiṃ vidhamanto ‘‘sabrahmakassā’’ti āha. Tato yesaṃ siyā ‘‘puthū samaṇabrāhmaṇā sāsanassa paccatthikā, kiṃ tesampi diṭṭhādiṃ jānātī’’ti, tesaṃ vimatiṃ vidhamanto ‘‘sassamaṇabrāhmaṇiyā pajāyā’’ti āha. Evaṃ ukkaṭṭhānaṃ diṭṭhādijānanabhāvaṃ pakāsetvā atha sammutideve avasesamanusse ca upādāya ukkaṭṭhaparicchedavasena sesasattalokassa diṭṭhādijānanabhāvaṃ pakāseti. Ayamettha anusandhikkamo. Porāṇā panāhu – sadevakassāti devatāhi saddhiṃ avasesalokassa . Samārakassāti mārena saddhiṃ avasesalokassa. Sabrahmakassāti brahmehi saddhiṃ avasesalokassa. Evaṃ sabbepi tibhavūpage satte tīhākārehi tīsu padesu pakkhipitvā puna dvīhākārehi pariyādātuṃ sassamaṇabrāhmaṇiyā pajāya sadevamanussāyāti vuttaṃ. Evaṃ pañcahi padehi tena tena ākārena tedhātukameva pariyādinnaṃ hotīti.
དིཊྛནྟི རཱུཔཱཡཏནཾ། སུཏནྟི སདྡཱཡཏནཾ། མུཏནྟི པཏྭཱ གཧེཏབྦཏོ གནྡྷཱཡཏནཾ, རསཱཡཏནཾ, ཕོཊྛབྦཱཡཏནཾ། ཝིཉྙཱཏནྟི སུཁདུཀྑཱདིདྷམྨཱརམྨཎཾ། པཏྟནྟི པརིཡེསིཏྭཱ ཝཱ ཨཔརིཡེསིཏྭཱ ཝཱ པཏྟཾ། པརིཡེསིཏནྟི པཏྟཾ ཝཱ ཨཔྤཏྟཾ ཝཱ པརིཡེསིཏཾ། ཨནུཝིཙརིཏཾ མནསཱཏི ཙིཏྟེན ཨནུསཉྩརིཏཾ། སབྦཾ ཛཱནཱཏཱིཏི ཨིམིནཱ ཨེཏཾ དསྶེཏི – ཡཾ ཨཔརིམཱནཱསུ ལོཀདྷཱཏཱུསུ ཨིམསྶ སདེཝཀསྶ ལོཀསྶ ‘‘ནཱིལཾ པཱིཏ’’ནྟིཨཱདི (དྷ॰ ས॰ ༦༡༩) རཱུཔཱརམྨཎཾ ཙཀྑུདྭཱརེ ཨཱཔཱཐཾ ཨཱགཙྪཏི, ཨཡཾ སཏྟོ ཨིམསྨིཾ ཁཎེ ཨིམཾ ནཱམ རཱུཔཱརམྨཎཾ དིསྭཱ སུམནོ ཝཱ དུམྨནོ ཝཱ མཛ྄ཛྷཏྟོ ཝཱ ཛཱཏོཏི ཏཾ སབྦཾ ཏཐཱགཏསྶ སབྦཉྙུཏཉྙཱཎཾ ཛཱནཱཏི། ཏཐཱ ཡཾ ཨཔརིམཱཎཱསུ ལོཀདྷཱཏཱུསུ ཨིམསྶ སདེཝཀསྶ ལོཀསྶ ‘‘བྷེརིསདྡོ, མུདིངྒསདྡོ’’ཏིཨཱདི སདྡཱརམྨཎཾ སོཏདྭཱརེ ཨཱཔཱཐཾ ཨཱགཙྪཏི, ‘‘མཱུལགནྡྷོ ཏཙགནྡྷོ’’ཏིཨཱདི (དྷ॰ ས॰ ༦༢༤-༦༢༧) གནྡྷཱརམྨཎཾ གྷཱནདྭཱརེ ཨཱཔཱཐཾ ཨཱགཙྪཏི, ‘‘མཱུལརསོ, ཁནྡྷརསོ’’ཏིཨཱདི (དྷ॰ ས॰ ༦༢༨-༦༣༡) རསཱརམྨཎཾ ཛིཝ྄ཧཱདྭཱརེ ཨཱཔཱཐཾ ཨཱགཙྪཏི, ‘‘ཀཀྑལ༹ཾ, མུདུཀ’’ནྟིཨཱདི (དྷ॰ ས॰ ༦༤༧-༦༥༠) པཐཝཱིདྷཱཏུཏེཛོདྷཱཏུཝཱཡོདྷཱཏུབྷེདཾ ཕོཊྛབྦཱརམྨཎཾ ཀཱཡདྭཱརེ ཨཱཔཱཐཾ ཨཱགཙྪཏི, ཨཡཾ སཏྟོ ཨིམསྨིཾ ཁཎེ ཨིམཾ ནཱམ ཕོཊྛབྦཱརམྨཎཾ ཕུསིཏྭཱ སུམནོ ཝཱ དུམྨནོ ཝཱ མཛ྄ཛྷཏྟོ ཝཱ ཛཱཏོཏི ཏཾ སབྦཾ ཏཐཱགཏསྶ སབྦཉྙུཏཉྙཱཎཾ ཛཱནཱཏི། ཏཐཱ ཡཾ ཨཔརིམཱཎཱསུ ལོཀདྷཱཏཱུསུ ཨིམསྶ སདེཝཀསྶ ལོཀསྶ སུཁདུཀྑཱདིབྷེདཾ དྷམྨཱརམྨཎཾ མནོདྭཱརེ ཨཱཔཱཐཾ ཨཱགཙྪཏི, ཨཡཾ སཏྟོ ཨིམསྨིཾ ཁཎེ ཨིམཾ ནཱམ དྷམྨཱརམྨཎཾ ཝིཛཱནིཏྭཱ སུམནོ ཝཱ དུམྨནོ ཝཱ མཛ྄ཛྷཏྟོ ཝཱ ཛཱཏོཏི ཏཾ སབྦཾ ཏཐཱགཏསྶ སབྦཉྙུཏཉྙཱཎཾ ཛཱནཱཏི། ཨིམསྶ པན མཧཱཛནསྶ པརིཡེསིཏྭཱ ཨཔྤཏྟམྤི ཨཏྠི, པརིཡེསིཏྭཱ པཏྟམྤི ཨཏྠི། ཨཔརིཡེསིཏྭཱ ཨཔྤཏྟམྤི ཨཏྠི, ཨཔརིཡེསིཏྭཱ པཏྟམྤི ཨཏྠི། སབྦཾ ཏཐཱགཏསྶ སབྦཉྙུཏཉྙཱཎེན ཨཔྤཏྟཾ ནཱམ ནཏྠཱིཏི།
Diṭṭhanti rūpāyatanaṃ. Sutanti saddāyatanaṃ. Mutanti patvā gahetabbato gandhāyatanaṃ, rasāyatanaṃ, phoṭṭhabbāyatanaṃ. Viññātanti sukhadukkhādidhammārammaṇaṃ. Pattanti pariyesitvā vā apariyesitvā vā pattaṃ. Pariyesitanti pattaṃ vā appattaṃ vā pariyesitaṃ. Anuvicaritaṃ manasāti cittena anusañcaritaṃ. Sabbaṃ jānātīti iminā etaṃ dasseti – yaṃ aparimānāsu lokadhātūsu imassa sadevakassa lokassa ‘‘nīlaṃ pīta’’ntiādi (dha. sa. 619) rūpārammaṇaṃ cakkhudvāre āpāthaṃ āgacchati, ayaṃ satto imasmiṃ khaṇe imaṃ nāma rūpārammaṇaṃ disvā sumano vā dummano vā majjhatto vā jātoti taṃ sabbaṃ tathāgatassa sabbaññutaññāṇaṃ jānāti. Tathā yaṃ aparimāṇāsu lokadhātūsu imassa sadevakassa lokassa ‘‘bherisaddo, mudiṅgasaddo’’tiādi saddārammaṇaṃ sotadvāre āpāthaṃ āgacchati, ‘‘mūlagandho tacagandho’’tiādi (dha. sa. 624-627) gandhārammaṇaṃ ghānadvāre āpāthaṃ āgacchati, ‘‘mūlaraso, khandharaso’’tiādi (dha. sa. 628-631) rasārammaṇaṃ jivhādvāre āpāthaṃ āgacchati, ‘‘kakkhaḷaṃ, muduka’’ntiādi (dha. sa. 647-650) pathavīdhātutejodhātuvāyodhātubhedaṃ phoṭṭhabbārammaṇaṃ kāyadvāre āpāthaṃ āgacchati, ayaṃ satto imasmiṃ khaṇe imaṃ nāma phoṭṭhabbārammaṇaṃ phusitvā sumano vā dummano vā majjhatto vā jātoti taṃ sabbaṃ tathāgatassa sabbaññutaññāṇaṃ jānāti. Tathā yaṃ aparimāṇāsu lokadhātūsu imassa sadevakassa lokassa sukhadukkhādibhedaṃ dhammārammaṇaṃ manodvāre āpāthaṃ āgacchati, ayaṃ satto imasmiṃ khaṇe imaṃ nāma dhammārammaṇaṃ vijānitvā sumano vā dummano vā majjhatto vā jātoti taṃ sabbaṃ tathāgatassa sabbaññutaññāṇaṃ jānāti. Imassa pana mahājanassa pariyesitvā appattampi atthi, pariyesitvā pattampi atthi. Apariyesitvā appattampi atthi, apariyesitvā pattampi atthi. Sabbaṃ tathāgatassa sabbaññutaññāṇena appattaṃ nāma natthīti.
༡༢༡. པུན ཨཔརེན པརིཡཱཡེན སབྦཉྙུཏཉྙཱཎབྷཱཝསཱདྷནཏྠཾ ན ཏསྶཱཏི གཱཐམཱཧ། ཏཏྠ ན ཏསྶ ཨདྡིཊྛམིདྷཏྠི ཀིཉྩཱིཏི ཏསྶ ཏཐཱགཏསྶ ཨིདྷ ཨིམསྨིཾ ཏེདྷཱཏུཀེ ལོཀེ, ཨིམསྨིཾ པཙྩུཔྤནྣཀཱལེ ཝཱ པཉྙཱཙཀྑུནཱ ཨདྡིཊྛཾ ནཱམ ཀིཉྩི ཨཔྤམཏྟཀམྤི ན ཨཏྠི ན སཾཝིཛྫཏི། ཨཏྠཱིཏི ཨིདཾ ཝཏྟམཱནཀཱལིཀཾ ཨཱཁྱཱཏཔདཾ། ཨིམིནཱ པཙྩུཔྤནྣཀཱལིཀསྶ སབྦདྷམྨསྶ ཉཱཏབྷཱཝཾ དསྶེཏི། གཱཐཱབནྡྷསུཁཏྠཾ པནེཏྠ ད-ཀཱརོ སཾཡུཏྟོ། ཨཐོ ཨཝིཉྙཱཏནྟི ཨེཏྠ ཨཐོཨིཏི ཝཙནོཔཱདཱནེ ནིཔཱཏོ། ཨཝིཉྙཱཏནྟི ཨཏཱིཏཀཱལིཀཾ ཨཝིཉྙཱཏཾ ནཱམ ཀིཉྩི དྷམྨཛཱཏཾ། ནཱཧོསཱིཏི པཱཋསེསོ། ཨབྱཡབྷཱུཏསྶ ཨཏྠིསདྡསྶ གཧཎེ པཱཋསེསཾ ཝིནཱཔི ཡུཛྫཏིཡེཝ། ཨིམིནཱ ཨཏཱིཏཀཱལིཀསྶ སབྦདྷམྨསྶ ཉཱཏབྷཱཝཾ དསྶེཏི ། ཨཛཱནིཏབྦནྟི ཨནཱགཏཀཱལིཀཾ ཨཛཱནིཏབྦཾ ནཱམ དྷམྨཛཱཏཾ ན བྷཝིསྶཏི, ནཏྠི ཝཱ། ཨིམིནཱ ཨནཱགཏཀཱལིཀསྶ སབྦདྷམྨསྶ ཉཱཏབྷཱཝཾ དསྶེཏི། ཛཱནནཀིརིཡཱཝིསེསནམཏྟམེཝ ཝཱ ཨེཏྠ ཨ-ཀཱརོ། སབྦཾ ཨབྷིཉྙཱསི ཡདཏྠི ནེཡྻནྟི ཨེཏྠ ཡཾ ཏེཀཱལིཀཾ ཝཱ ཀཱལཝིམུཏྟཾ ཝཱ ནེཡྻཾ ཛཱནིཏབྦཾ ཀིཉྩི དྷམྨཛཱཏཾ ཨཏྠི, ཏཾ སབྦཾ ཏཐཱགཏོ ཨབྷིཉྙཱསི ཨདྷིཀེན སབྦཉྙུཏཉྙཱཎེན ཛཱནི པཊིཝིཛ྄ཛྷི། ཨེཏྠ ཨཏྠིསདྡེན ཏེཀཱལིཀསྶ ཀཱལཝིམུཏྟསྶ ཙ གཧཎཱ ཨཏྠི-སདྡོ ཨབྱཡབྷཱུཏོཡེཝ དཊྛབྦོ། ཏཐཱགཏོ ཏེན སམནྟཙཀྑཱུཏི ཀཱལཝསེན ཨོཀཱསཝསེན ཙ ནིཔྤདེསཏྟཱ སམནྟཱ སབྦཏོ པཝཏྟཾ ཉཱཎཙཀྑུ ཨསྶཱཏི སམནྟཙཀྑུ། ཏེན ཡཐཱཝུཏྟེན ཀཱརཎེན ཏཐཱགཏོ སམནྟཙཀྑུ, སབྦཉྙཱུཏི ཝུཏྟཾ ཧོཏི། ཨིམིསྶཱ གཱཐཱཡ པུགྒལཱདྷིཊྛཱནཱཡ དེསནཱཡ སབྦཉྙུཏཉྙཱཎཾ སཱདྷིཏཾ།
121. Puna aparena pariyāyena sabbaññutaññāṇabhāvasādhanatthaṃ na tassāti gāthamāha. Tattha na tassa addiṭṭhamidhatthi kiñcīti tassa tathāgatassa idha imasmiṃ tedhātuke loke, imasmiṃ paccuppannakāle vā paññācakkhunā addiṭṭhaṃ nāma kiñci appamattakampi na atthi na saṃvijjati. Atthīti idaṃ vattamānakālikaṃ ākhyātapadaṃ. Iminā paccuppannakālikassa sabbadhammassa ñātabhāvaṃ dasseti. Gāthābandhasukhatthaṃ panettha da-kāro saṃyutto. Atho aviññātanti ettha athoiti vacanopādāne nipāto. Aviññātanti atītakālikaṃ aviññātaṃ nāma kiñci dhammajātaṃ. Nāhosīti pāṭhaseso. Abyayabhūtassa atthisaddassa gahaṇe pāṭhasesaṃ vināpi yujjatiyeva. Iminā atītakālikassa sabbadhammassa ñātabhāvaṃ dasseti . Ajānitabbanti anāgatakālikaṃ ajānitabbaṃ nāma dhammajātaṃ na bhavissati, natthi vā. Iminā anāgatakālikassa sabbadhammassa ñātabhāvaṃ dasseti. Jānanakiriyāvisesanamattameva vā ettha a-kāro. Sabbaṃ abhiññāsi yadatthi neyyanti ettha yaṃ tekālikaṃ vā kālavimuttaṃ vā neyyaṃ jānitabbaṃ kiñci dhammajātaṃ atthi, taṃ sabbaṃ tathāgato abhiññāsi adhikena sabbaññutaññāṇena jāni paṭivijjhi. Ettha atthisaddena tekālikassa kālavimuttassa ca gahaṇā atthi-saddo abyayabhūtoyeva daṭṭhabbo. Tathāgato tena samantacakkhūti kālavasena okāsavasena ca nippadesattā samantā sabbato pavattaṃ ñāṇacakkhu assāti samantacakkhu. Tena yathāvuttena kāraṇena tathāgato samantacakkhu, sabbaññūti vuttaṃ hoti. Imissā gāthāya puggalādhiṭṭhānāya desanāya sabbaññutaññāṇaṃ sādhitaṃ.
པུན བུདྡྷཉཱཎཱནཾ ཝིསཡཝསེན སབྦཉྙུཏཉྙཱཎཾ དསྶེཏུཀཱམོ སམནྟཙཀྑཱུཏི ཀེནཊྛེན སམནྟཙཀྑཱུཏིཨཱདིམཱཧ། ཏཏྠ གཱཐཱཡ སམནྟཙཀྑཱུཏི ཝུཏྟཔདེ ཡཾ ཏཾ སམནྟཙཀྑུ, ཏཾ ཀེནཊྛེན སམནྟཙཀྑཱུཏི ཨཏྠོ། ཨཏྠོ པནསྶ ཡཱཝཏཱ དུཀྑསྶ དུཀྑཊྛོཏིཨཱདཱིཧི ཝུཏྟོཡེཝ ཧོཏི། སབྦཉྙུཏཉྙཱཎཉྷི སམནྟཙཀྑུ། ཡཐཱཧ – ‘‘སམནྟཙཀྑུ ཝུཙྩཏི སབྦཉྙུཏཉྙཱཎ’’ནྟི (ཙཱུལ༹ནི॰ དྷོཏཀམཱཎཝཔུཙྪཱནིདྡེས ༣༢)། ཏསྨིཾ སབྦཉྙུཏཉྙཱཎཊྛེ ཝུཏྟེ སམནྟཙཀྑུཊྛོ ཝུཏྟོཡེཝ ཧོཏཱིཏི། བུདྡྷསྶེཝ ཉཱཎཱནཱིཏི བུདྡྷཉཱཎཱནི། དུཀྑེ ཉཱཎཱདཱིནིཔི ཧི སབྦཱཀཱརེན བུདྡྷསྶེཝ བྷགཝཏོ པཝཏྟནྟི, ཨིཏརེསཾ པན ཨེཀདེསམཏྟེནེཝ པཝཏྟནྟི། སཱཝཀསཱདྷཱརཎཱནཱིཏི པན ཨེཀདེསེནཱཔི ཨཏྠིཏཾ སནྡྷཱཡ ཝུཏྟཾ། སབྦོ ཉཱཏོཏི སབྦོ ཉཱཎེན ཉཱཏོ། ཨཉྙཱཏོ དུཀྑཊྛོ ནཏྠཱིཏི ཝུཏྟམེཝ ཨཏྠཾ པཊིསེདྷེན ཝིབྷཱཝེཏི། སབྦོ དིཊྛོཏི ན ཀེཝལཾ ཉཱཏམཏྟོཡེཝ, ཨཐ ཁོ ཙཀྑུནཱ དིཊྛོ ཝིཡ ཀཏོ། སབྦོ ཝིདིཏོཏི ན ཀེཝལཾ དིཊྛམཏྟོཡེཝ, ཨཐ ཁོ པཱཀཊོ། སབྦོ སཙྪིཀཏོཏི ན ཀེཝལཾ ཝིདིཏོཡེཝ, ཨཐ ཁོ ཏཏྠ ཉཱཎཔཊིལཱབྷཝསེན པཙྩཀྑཱིཀཏོ། སབྦོ ཕསྶིཏོཏི ན ཀེཝལཾ སཙྪིཀཏོཡེཝ, ཨཐ ཁོ པུནཔྤུནཾ ཡཐཱརུཙི སམུདཱཙཱརཝསེན ཕུཊྛོཏི། ཨཐ ཝཱ ཉཱཏོ སབྷཱཝལཀྑཎཝསེན། དིཊྛོ སཱམཉྙལཀྑཎཝསེན། ཝིདིཏོ རསཝསེན། སཙྪིཀཏོ པཙྩུཔཊྛཱནཝསེན ། ཕསྶིཏོ པདཊྛཱནཝསེན། ཨཐ ཝཱ ཉཱཏོ ཉཱཎུཔྤཱདཝསེན། དིཊྛོ ཙཀྑུཔྤཱདཝསེན། ཝིདིཏོ པཉྙུཔྤཱདཝསེན། སཙྪིཀཏོ ཝིཛྫུཔྤཱདཝསེན། ཕསྶིཏོ ཨཱལོཀུཔྤཱདཝསེན། ‘‘ཡཱཝཏཱ དུཀྑསྶ དུཀྑཊྛོ, སབྦོ དིཊྛོ, ཨདིཊྛོ དུཀྑཊྛོ ནཏྠཱི’’ཏིཨཱདིནཱ ནཡེན ཙ ‘‘ཡཱཝཏཱ སདེཝཀསྶ ལོཀསྶ…པེ॰… ཨནུཝིཙརིཏཾ མནསཱ, སབྦཾ ཉཱཏཾ, ཨཉྙཱཏཾ ནཏྠཱི’’ཏིཨཱདིནཱ ནཡེན ཙ ཝིཏྠཱརོ ཝེདིཏབྦོ། པཋམཾ ཝུཏྟགཱཐཱ ནིགམནཝསེན པུན ཝུཏྟཱ། ཏཾནིགམནེཡེཝ ཧི ཀཏེ ཉཱཎནིགམནམྤི ཀཏམེཝ ཧོཏཱིཏི།
Puna buddhañāṇānaṃ visayavasena sabbaññutaññāṇaṃ dassetukāmo samantacakkhūti kenaṭṭhena samantacakkhūtiādimāha. Tattha gāthāya samantacakkhūti vuttapade yaṃ taṃ samantacakkhu, taṃ kenaṭṭhena samantacakkhūti attho. Attho panassa yāvatādukkhassa dukkhaṭṭhotiādīhi vuttoyeva hoti. Sabbaññutaññāṇañhi samantacakkhu. Yathāha – ‘‘samantacakkhu vuccati sabbaññutaññāṇa’’nti (cūḷani. dhotakamāṇavapucchāniddesa 32). Tasmiṃ sabbaññutaññāṇaṭṭhe vutte samantacakkhuṭṭho vuttoyeva hotīti. Buddhasseva ñāṇānīti buddhañāṇāni. Dukkhe ñāṇādīnipi hi sabbākārena buddhasseva bhagavato pavattanti, itaresaṃ pana ekadesamatteneva pavattanti. Sāvakasādhāraṇānīti pana ekadesenāpi atthitaṃ sandhāya vuttaṃ. Sabbo ñātoti sabbo ñāṇena ñāto. Aññāto dukkhaṭṭho natthīti vuttameva atthaṃ paṭisedhena vibhāveti. Sabbo diṭṭhoti na kevalaṃ ñātamattoyeva, atha kho cakkhunā diṭṭho viya kato. Sabbo viditoti na kevalaṃ diṭṭhamattoyeva, atha kho pākaṭo. Sabbo sacchikatoti na kevalaṃ viditoyeva, atha kho tattha ñāṇapaṭilābhavasena paccakkhīkato. Sabbo phassitoti na kevalaṃ sacchikatoyeva, atha kho punappunaṃ yathāruci samudācāravasena phuṭṭhoti. Atha vā ñāto sabhāvalakkhaṇavasena. Diṭṭho sāmaññalakkhaṇavasena. Vidito rasavasena. Sacchikato paccupaṭṭhānavasena . Phassito padaṭṭhānavasena. Atha vā ñāto ñāṇuppādavasena. Diṭṭho cakkhuppādavasena. Vidito paññuppādavasena. Sacchikato vijjuppādavasena. Phassito ālokuppādavasena. ‘‘Yāvatā dukkhassa dukkhaṭṭho, sabbo diṭṭho, adiṭṭho dukkhaṭṭho natthī’’tiādinā nayena ca ‘‘yāvatā sadevakassa lokassa…pe… anuvicaritaṃ manasā, sabbaṃ ñātaṃ, aññātaṃ natthī’’tiādinā nayena ca vitthāro veditabbo. Paṭhamaṃ vuttagāthā nigamanavasena puna vuttā. Taṃnigamaneyeva hi kate ñāṇanigamanampi katameva hotīti.
སབྦཉྙུཏཉྙཱཎནིདྡེསཝཎྞནཱ ནིཊྛིཏཱ།
Sabbaññutaññāṇaniddesavaṇṇanā niṭṭhitā.
སདྡྷམྨཔྤཀཱསིནིཡཱ པཊིསམྦྷིདཱམགྒ-ཨཊྛཀཐཱཡ
Saddhammappakāsiniyā paṭisambhidāmagga-aṭṭhakathāya
ཉཱཎཀཐཱཝཎྞནཱ ནིཊྛིཏཱ།
Ñāṇakathāvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / པཊིསམྦྷིདཱམགྒཔཱལི༹ • Paṭisambhidāmaggapāḷi / ༧༢-༧༣. སབྦཉྙུཏཉཱཎནིདྡེསོ • 72-73. Sabbaññutañāṇaniddeso
