| Library / Tipiṭaka / д̇ибидага • Tipiṭaka / ид̇ивуд̇д̇ага-адтагат̇аа • Itivuttaka-aṭṭhakathā |
7. саб̣б̣абарин̃н̃аасуд̇д̇аван̣н̣анаа
7. Sabbapariññāsuttavaṇṇanā
7. сад̇д̇амз саб̣б̣анд̇и анавасзсам̣. анавасзсаваажаго хи аяам̣ саб̣б̣а-сад̣̇д̣̇о. со язна язна самб̣анд̇хам̣ г̇ажчад̇и, д̇асса д̇асса анавасзсад̇ам̣ д̣̇ийбзд̇и; яат̇аа ‘‘саб̣б̣ам̣ руубам̣, саб̣б̣аа взд̣̇анаа, саб̣б̣асаггааяабарияаабаннзсу д̇хаммзсуу’’д̇и. со банааяам̣ саб̣б̣а-сад̣̇д̣̇о саббад̣̇зсаниббад̣̇зсависаяад̇ааяа д̣̇увид̇хо. д̇ат̇аа хзса саб̣б̣асаб̣б̣ам̣, бад̣̇зсасаб̣б̣ам̣, ааяад̇анасаб̣б̣ам̣, саггааяасаб̣б̣анд̇и жад̇уусу висаязсу д̣̇идтаббаяог̇о. д̇ад̇т̇а ‘‘саб̣б̣з д̇хаммаа саб̣б̣аагаарзна б̣уд̣̇д̇хасса бхаг̇авад̇о н̃аан̣амукз аабаат̇амааг̇ажчанд̇ий’’д̇иаад̣̇ийсу (жуул̣ани. могхарааж̇амаан̣авабужчаанид̣̇д̣̇зса 85) саб̣б̣асаб̣б̣асмим̣ ааг̇ад̇о. ‘‘саб̣б̣зсам̣ во, саарибуд̇д̇аа, субхаасид̇ам̣ барияааязнаа’’д̇иаад̣̇ийсу (ма. ни. 1.345) бад̣̇зсасаб̣б̣асмим̣. ‘‘саб̣б̣ам̣ во, бхигкавз, д̣̇зсзссаами, жагкун̃жзва руубан̃жа…бз…. манан̃жзва д̇хаммз жаа’’д̇и (сам̣. ни. 4.23-25) зд̇т̇а ааяад̇анасаб̣б̣асмим̣. ‘‘саб̣б̣ад̇хаммамуулабарияааяам̣ во, бхигкавз, д̣̇зсзссаамий’’д̇иаад̣̇ийсу (ма. ни. 1.1) саггааяасаб̣б̣асмим̣. д̇ад̇т̇а саб̣б̣асаб̣б̣асмим̣ ааг̇ад̇о ниббад̣̇зсависаяо, ид̇арзсу д̇ийсуби ааг̇ад̇о саббад̣̇зсависаяо . ид̇ха бана саггааяасаб̣б̣асмим̣ взд̣̇ид̇аб̣б̣о. вибассанааяа аарамман̣абхууд̇аа д̇збхуумагад̇хаммаа хи ид̇ха ‘‘саб̣б̣а’’нд̇и анавасзсад̇о г̇ахид̇аа.
7. Sattame sabbanti anavasesaṃ. Anavasesavācako hi ayaṃ sabba-saddo. So yena yena sambandhaṃ gacchati, tassa tassa anavasesataṃ dīpeti; yathā ‘‘sabbaṃ rūpaṃ, sabbā vedanā, sabbasakkāyapariyāpannesu dhammesū’’ti. So panāyaṃ sabba-saddo sappadesanippadesavisayatāya duvidho. Tathā hesa sabbasabbaṃ, padesasabbaṃ, āyatanasabbaṃ, sakkāyasabbanti catūsu visayesu diṭṭhappayogo. Tattha ‘‘sabbe dhammā sabbākārena buddhassa bhagavato ñāṇamukhe āpāthamāgacchantī’’tiādīsu (cūḷani. mogharājamāṇavapucchāniddesa 85) sabbasabbasmiṃ āgato. ‘‘Sabbesaṃ vo, sāriputtā, subhāsitaṃ pariyāyenā’’tiādīsu (ma. ni. 1.345) padesasabbasmiṃ. ‘‘Sabbaṃ vo, bhikkhave, desessāmi, cakkhuñceva rūpañca…pe…. Manañceva dhamme cā’’ti (saṃ. ni. 4.23-25) ettha āyatanasabbasmiṃ. ‘‘Sabbadhammamūlapariyāyaṃ vo, bhikkhave, desessāmī’’tiādīsu (ma. ni. 1.1) sakkāyasabbasmiṃ. Tattha sabbasabbasmiṃ āgato nippadesavisayo, itaresu tīsupi āgato sappadesavisayo . Idha pana sakkāyasabbasmiṃ veditabbo. Vipassanāya ārammaṇabhūtā tebhūmakadhammā hi idha ‘‘sabba’’nti anavasesato gahitā.
анабхиж̇аананд̇и ‘‘имз д̇хаммаа гусалаа, имз агусалаа, имз сааваж̇ж̇аа, имз анаваж̇ж̇аа’’д̇иаад̣̇инаа ‘‘имз бан̃жагканд̇хаа, имаани д̣̇ваад̣̇асааяад̇анаани, имаа адтаараса д̇хаад̇уяо, ид̣̇ам̣ д̣̇угкам̣ арияасажжам̣, аяам̣ д̣̇угкасамуд̣̇аяо арияасажжа’’нд̇и жа аад̣̇инаа саб̣б̣з абхин̃н̃зяяз д̇хаммз авибарийд̇асабхаавад̇о анабхиж̇аананд̇о абхивисидтзна н̃аан̣зна на ж̇аананд̇о. абариж̇аананд̇и на бариж̇аананд̇о. яо хи саб̣б̣ам̣ д̇збхуумагад̇хаммаж̇аад̇ам̣ бариж̇аанаад̇и, со д̇ийхи барин̃н̃аахи бариж̇аанаад̇и – н̃аад̇абарин̃н̃ааяа, д̇ийран̣абарин̃н̃ааяа, бахаанабарин̃н̃ааяа. д̇ад̇т̇а гад̇амаа н̃аад̇абарин̃н̃аа? саб̣б̣ам̣ д̇збхуумагам̣ наамаруубам̣ – ‘‘ид̣̇ам̣ руубам̣, зд̇д̇агам̣ руубам̣, на ид̇о бхияяо. ид̣̇ам̣ наамам̣, зд̇д̇агам̣ наамам̣, на ид̇о бхияяо’’д̇и бхууд̇аббасаад̣̇аад̣̇иббабхзд̣̇ам̣ руубам̣, пассаад̣̇иббабхзд̣̇ам̣ нааман̃жа, лагкан̣арасабажжубадтаанабад̣̇адтаанад̇о вавад̇т̇абзд̇и. д̇асса авиж̇ж̇аад̣̇иган̃жа бажжаяам̣ бариг̇г̇ан̣хаад̇и. аяам̣ н̃аад̇абарин̃н̃аа. гад̇амаа д̇ийран̣абарин̃н̃аа? звам̣ н̃аад̇ам̣ гад̇ваа д̇ам̣ саб̣б̣ам̣ д̇ийрзд̇и анижжад̇о д̣̇угкад̇о рог̇ад̇од̇и д̣̇ваажад̇д̇аалийсааяа аагаарзхи. аяам̣ д̇ийран̣абарин̃н̃аа. гад̇амаа бахаанабарин̃н̃аа? звам̣ д̇ийраяид̇ваа аг̇г̇амаг̇г̇зна саб̣б̣асмим̣ чанд̣̇арааг̇ам̣ баж̇ахад̇и. аяам̣ бахаанабарин̃н̃аа.
Anabhijānanti ‘‘ime dhammā kusalā, ime akusalā, ime sāvajjā, ime anavajjā’’tiādinā ‘‘ime pañcakkhandhā, imāni dvādasāyatanāni, imā aṭṭhārasa dhātuyo, idaṃ dukkhaṃ ariyasaccaṃ, ayaṃ dukkhasamudayo ariyasacca’’nti ca ādinā sabbe abhiññeyye dhamme aviparītasabhāvato anabhijānanto abhivisiṭṭhena ñāṇena na jānanto. Aparijānanti na parijānanto. Yo hi sabbaṃ tebhūmakadhammajātaṃ parijānāti, so tīhi pariññāhi parijānāti – ñātapariññāya, tīraṇapariññāya, pahānapariññāya. Tattha katamā ñātapariññā? Sabbaṃ tebhūmakaṃ nāmarūpaṃ – ‘‘idaṃ rūpaṃ, ettakaṃ rūpaṃ, na ito bhiyyo. Idaṃ nāmaṃ, ettakaṃ nāmaṃ, na ito bhiyyo’’ti bhūtappasādādippabhedaṃ rūpaṃ, phassādippabhedaṃ nāmañca, lakkhaṇarasapaccupaṭṭhānapadaṭṭhānato vavatthapeti. Tassa avijjādikañca paccayaṃ pariggaṇhāti. Ayaṃ ñātapariññā. Katamā tīraṇapariññā? Evaṃ ñātaṃ katvā taṃ sabbaṃ tīreti aniccato dukkhato rogatoti dvācattālīsāya ākārehi. Ayaṃ tīraṇapariññā. Katamā pahānapariññā? Evaṃ tīrayitvā aggamaggena sabbasmiṃ chandarāgaṃ pajahati. Ayaṃ pahānapariññā.
д̣̇идтивисуд̣̇д̇хиган̇каавид̇аран̣ависуд̣̇д̇хияоби н̃аад̇абарин̃н̃аа. маг̇г̇аамаг̇г̇абадибад̣̇аан̃аан̣ад̣̇ассанависуд̣̇д̇хияо галаабасаммасанаад̣̇иануломабарияосаанаа ваа бан̃н̃аа д̇ийран̣абарин̃н̃аа. арияамаг̇г̇зна баж̇аханам̣ бахаанабарин̃н̃аа. яо саб̣б̣ам̣ бариж̇аанаад̇и, со имаахи д̇ийхи барин̃н̃аахи бариж̇аанаад̇и. ид̇ха бана вирааг̇аббахаанаанам̣ бадигкзбавасзна висум̣ г̇ахид̇ад̇д̇аа н̃аад̇абарин̃н̃ааяа д̇ийран̣абарин̃н̃ааяа жа васзна бариж̇аананаа взд̣̇ид̇аб̣б̣аа. яо банзвам̣ на бариж̇аанаад̇и, д̇ам̣ санд̇хааяа вуд̇д̇ам̣ ‘‘абариж̇аана’’нд̇и.
Diṭṭhivisuddhikaṅkhāvitaraṇavisuddhiyopi ñātapariññā. Maggāmaggapaṭipadāñāṇadassanavisuddhiyo kalāpasammasanādianulomapariyosānā vā paññā tīraṇapariññā. Ariyamaggena pajahanaṃ pahānapariññā. Yo sabbaṃ parijānāti, so imāhi tīhi pariññāhi parijānāti. Idha pana virāgappahānānaṃ paṭikkhepavasena visuṃ gahitattā ñātapariññāya tīraṇapariññāya ca vasena parijānanā veditabbā. Yo panevaṃ na parijānāti, taṃ sandhāya vuttaṃ ‘‘aparijāna’’nti.
д̇ад̇т̇а жид̇д̇ам̣ авирааж̇аяанд̇и д̇асмим̣ абхин̃н̃зяяависзсз барин̃н̃зяяз ад̇д̇ано жид̇д̇асанд̇аанам̣ на вирааж̇аяам̣, на вираж̇ж̇анд̇о; яат̇аа д̇ад̇т̇а рааг̇о на ход̇и, звам̣ вирааг̇аанубассанам̣ на уббаад̣̇знд̇од̇и ад̇т̇о. аббаж̇аханд̇и вибассанаабан̃н̃аасахид̇ааяа маг̇г̇абан̃н̃ааяа д̇ад̇т̇а бахаад̇аб̣б̣аяуд̇д̇агам̣ гилзсаваддам̣ анавасзсад̇о на баж̇аханд̇о. яат̇аа жзд̇ам̣, звам̣ абхиж̇аананаад̣̇аяоби миссагамаг̇г̇авасзна взд̣̇ид̇аб̣б̣аа. буб̣б̣абхааг̇з хи наанаажид̇д̇авасзна н̃аад̇ад̇ийран̣абахаанабарин̃н̃аахи гамзна абхиж̇аананаад̣̇ийни самбаад̣̇зд̇ваа маг̇г̇агаалз згагкан̣знзва гижжавасзна д̇ам̣ саб̣б̣ам̣ нибпаад̣̇знд̇ам̣ згамзва н̃аан̣ам̣ бавад̇д̇ад̇ийд̇и. абхаб̣б̣о д̣̇угкагкаяааяаад̇и ниб̣б̣аанааяа сагаласса ваддад̣̇угкасса кзбанааяа на бхаб̣б̣о, наалам̣ на самад̇т̇од̇и ад̇т̇о.
Tattha cittaṃ avirājayanti tasmiṃ abhiññeyyavisese pariññeyye attano cittasantānaṃ na virājayaṃ, na virajjanto; yathā tattha rāgo na hoti, evaṃ virāgānupassanaṃ na uppādentoti attho. Appajahanti vipassanāpaññāsahitāya maggapaññāya tattha pahātabbayuttakaṃ kilesavaṭṭaṃ anavasesato na pajahanto. Yathā cetaṃ, evaṃ abhijānanādayopi missakamaggavasena veditabbā. Pubbabhāge hi nānācittavasena ñātatīraṇapahānapariññāhi kamena abhijānanādīni sampādetvā maggakāle ekakkhaṇeneva kiccavasena taṃ sabbaṃ nipphādentaṃ ekameva ñāṇaṃ pavattatīti. Abhabbo dukkhakkhayāyāti nibbānāya sakalassa vaṭṭadukkhassa khepanāya na bhabbo, nālaṃ na samatthoti attho.
саб̣б̣ан̃жа код̇и зд̇т̇а жа-сад̣̇д̣̇о б̣яад̇ирзгз, ко-сад̣̇д̣̇о авад̇хааран̣з. д̇ад̣̇убхаязна абхиж̇аананаад̣̇ид̇о лад̣̇д̇хаб̣б̣ам̣ висзсам̣ д̣̇угкагкаяасса жа зганд̇агааран̣ам̣ д̣̇ийбзд̇и. абхиж̇аананаад̣̇ийсу яам̣ вад̇д̇аб̣б̣ам̣, д̇ам̣ вуд̇д̇амзва. д̇ад̇т̇а бана бадигкзбавасзна вуд̇д̇ам̣, ид̇ха вид̇хаанавасзна взд̣̇ид̇аб̣б̣ам̣. аяамзва висзсо. абижа абхиж̇аананд̇и убаад̣̇аанагканд̇хабан̃жагасан̇каад̇ам̣ саггааяасаб̣б̣ам̣ саруубад̇о бажжаяад̇о жа н̃аан̣асса абхимукийгаран̣авасзна абхиж̇аананд̇о худ̇ваа абхааваагаараад̣̇ибариг̇г̇ахзна д̇ам̣ анижжаад̣̇илагкан̣зхи барижчиж̇ж̇амаанавасзна бариж̇аананд̇о. вирааж̇аяанд̇и саммад̣̇звасса анижжад̇аад̣̇иаваб̣од̇хзна уббаннабхаяаад̣̇ийнаваниб̣б̣ид̣̇аад̣̇ин̃аан̣аанубхаавзна ад̇д̇ано жид̇д̇ам̣ вирад̇д̇ам̣ гаронд̇о д̇ад̇т̇а ан̣умад̇д̇амби рааг̇ам̣ ануббаад̣̇знд̇о. баж̇аханд̇и вудтаанаг̇ааминивибассанаасахид̇ааяа маг̇г̇абан̃н̃ааяа самуд̣̇аяабагкияам̣ гилзсаваддам̣ баж̇аханд̇о самужчинд̣̇анд̇о. бхаб̣б̣о д̣̇угкагкаяааяаад̇и звам̣ гилзсамалаббахаанзнзва саб̣б̣асса гаммаваддасса баригкийн̣ад̇д̇аа анавасзсавибаагаваддакзбанааяа сагаласам̣саараваддад̣̇угкабаригкаяабхууд̇ааяа ваа анубаад̣̇исзсааяа ниб̣б̣аанад̇хаад̇уяаа бхаб̣б̣о зганд̇знзд̇ам̣ баабун̣ид̇унд̇и звамзд̇т̇а ад̇т̇о д̣̇адтаб̣б̣о.
Sabbañca khoti ettha ca-saddo byatireke, kho-saddo avadhāraṇe. Tadubhayena abhijānanādito laddhabbaṃ visesaṃ dukkhakkhayassa ca ekantakāraṇaṃ dīpeti. Abhijānanādīsu yaṃ vattabbaṃ, taṃ vuttameva. Tattha pana paṭikkhepavasena vuttaṃ, idha vidhānavasena veditabbaṃ. Ayameva viseso. Apica abhijānanti upādānakkhandhapañcakasaṅkhātaṃ sakkāyasabbaṃ sarūpato paccayato ca ñāṇassa abhimukhīkaraṇavasena abhijānanto hutvā abhāvākārādipariggahena taṃ aniccādilakkhaṇehi paricchijjamānavasena parijānanto. Virājayanti sammadevassa aniccatādiavabodhena uppannabhayādīnavanibbidādiñāṇānubhāvena attano cittaṃ virattaṃ karonto tattha aṇumattampi rāgaṃ anuppādento. Pajahanti vuṭṭhānagāminivipassanāsahitāya maggapaññāya samudayapakkhiyaṃ kilesavaṭṭaṃ pajahanto samucchindanto. Bhabbo dukkhakkhayāyāti evaṃ kilesamalappahāneneva sabbassa kammavaṭṭassa parikkhīṇattā anavasesavipākavaṭṭakhepanāya sakalasaṃsāravaṭṭadukkhaparikkhayabhūtāya vā anupādisesāya nibbānadhātuyā bhabbo ekantenetaṃ pāpuṇitunti evamettha attho daṭṭhabbo.
яо саб̣б̣ам̣ саб̣б̣ад̇о н̃ад̇ваад̇и яо яуд̇д̇аяог̇о аарад̣̇д̇хавибассаго саб̣б̣ам̣ д̇збхуумагад̇хаммаж̇аад̇ам̣ саб̣б̣ад̇о саб̣б̣абхааг̇зна гусалаад̣̇игканд̇хаад̣̇ивибхааг̇ад̇о д̣̇угкаад̣̇ибийл̣анаад̣̇ивибхааг̇ад̇о жа. ат̇а ваа саб̣б̣ад̇од̇и саб̣б̣асмаа гагкал̣апусанаад̣̇илагкан̣аад̣̇ид̇о анижжаад̣̇ид̇о жаад̇и саб̣б̣аагаарад̇о ж̇аанид̇ваа вибассанаабуб̣б̣ан̇г̇амзна маг̇г̇ан̃аан̣зна бадивиж̇жхид̇ваа, вибассанаан̃аан̣знзва ваа ж̇аананахзд̇у. саб̣б̣ад̇т̇зсу на раж̇ж̇ад̇ийд̇и саб̣б̣зсу ад̇ийд̇аад̣̇ивасзна анзгабхзд̣̇абхиннзсу саггааяад̇хаммзсу на раж̇ж̇ад̇и, арияамаг̇г̇аад̇хиг̇амзна рааг̇ам̣ на ж̇анзд̇и. иминаасса д̇ан̣хааг̇аахасса абхаавам̣ д̣̇ассзнд̇о д̇ам̣ нимид̇д̇ад̇д̇аа д̣̇идтамаанаг̇г̇аахаанам̣ ‘‘зд̇ам̣ мама зсохамасми, зсо мз ад̇д̇аа’’д̇и имасса мижчааг̇аахад̇д̇аяассаби абхаавам̣ д̣̇ассзд̇и. са взд̇и зд̇т̇а са-ид̇и нибаад̇амад̇д̇ам̣. вз-д̇и б̣яад̇д̇ам̣, згам̣сзнаад̇и ваа зд̇асмим̣ ад̇т̇з нибаад̇о. саб̣б̣абарин̃н̃аад̇и саб̣б̣абариж̇аананад̇о, яат̇аавуд̇д̇асса саб̣б̣асса абхисамаяавасзна бариж̇аананад̇о. сод̇и яат̇аавуд̇д̇о яог̇ааважаро, арияо зва ваа. саб̣б̣ад̣̇угкамубажжаг̇аад̇и саб̣б̣ам̣ ваддад̣̇угкам̣ ажжаг̇аа ад̇иггами, самад̇иггамийд̇и ад̇т̇о.
Yo sabbaṃ sabbato ñatvāti yo yuttayogo āraddhavipassako sabbaṃ tebhūmakadhammajātaṃ sabbato sabbabhāgena kusalādikkhandhādivibhāgato dukkhādipīḷanādivibhāgato ca. Atha vā sabbatoti sabbasmā kakkhaḷaphusanādilakkhaṇādito aniccādito cāti sabbākārato jānitvā vipassanāpubbaṅgamena maggañāṇena paṭivijjhitvā, vipassanāñāṇeneva vā jānanahetu. Sabbatthesu na rajjatīti sabbesu atītādivasena anekabhedabhinnesu sakkāyadhammesu na rajjati, ariyamaggādhigamena rāgaṃ na janeti. Imināssa taṇhāgāhassa abhāvaṃ dassento taṃ nimittattā diṭṭhamānaggāhānaṃ ‘‘etaṃ mama esohamasmi, eso me attā’’ti imassa micchāgāhattayassapi abhāvaṃ dasseti. Sa veti ettha sa-iti nipātamattaṃ. Ve-ti byattaṃ, ekaṃsenāti vā etasmiṃ atthe nipāto. Sabbapariññāti sabbaparijānanato, yathāvuttassa sabbassa abhisamayavasena parijānanato. Soti yathāvutto yogāvacaro, ariyo eva vā. Sabbadukkhamupaccagāti sabbaṃ vaṭṭadukkhaṃ accagā atikkami, samatikkamīti attho.
сад̇д̇амасуд̇д̇аван̣н̣анаа нидтид̇аа.
Sattamasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ид̇ивуд̇д̇агабаал̣и • Itivuttakapāḷi / 7. саб̣б̣абарин̃н̃аасуд̇д̇ам̣ • 7. Sabbapariññāsuttaṃ
