| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
18. த⁴ம்மஹத³யவிப⁴ங்கோ³
18. Dhammahadayavibhaṅgo
1. ஸப்³ப³ஸங்கா³ஹிகவாரவண்ணனா
1. Sabbasaṅgāhikavāravaṇṇanā
978. இதா³னி தத³னந்தரே த⁴ம்மஹத³யவிப⁴ங்கே³ பாளிபரிச்சே²தோ³ தாவ ஏவங் வேதி³தப்³போ³ – எத்த² ஹி ஆதி³தோவ க²ந்தா⁴தீ³னங் த்³வாத³ஸன்னங் கொட்டா²ஸானங் வஸேன ஸப்³ப³ஸங்கா³ஹிகவாரோ நாம வுத்தோ. து³தியோ தேஸங்யேவ த⁴ம்மானங் காமதா⁴துஆதீ³ஸு உப்பத்தானுப்பத்தித³ஸ்ஸனவாரோ நாம. ததியோ தத்தே²வ பரியாபன்னாபரியாபன்னத³ஸ்ஸனவாரோ நாம. சதுத்தோ² தீஸு பூ⁴மீஸு உப்பத்திக்க²ணே விஜ்ஜமானாவிஜ்ஜமானத⁴ம்மத³ஸ்ஸனவாரோ நாம. பஞ்சமோ தேஸங் த⁴ம்மானங் பூ⁴மந்தரவஸேன த³ஸ்ஸனவாரோ நாம. ச²ட்டோ² க³தீஸு உப்பாத³ககம்மஆயுப்பமாணத³ஸ்ஸனவாரோ நாம. ஸத்தமோ அபி⁴ஞ்ஞெய்யாதி³வாரோ நாம. அட்ட²மோ ஸாரம்மணானாரம்மணவாரோ நாம. நவமோ தேஸங் க²ந்தா⁴தி³த⁴ம்மானங் தி³ட்ட²ஸுதாதி³வஸேன ஸங்க³ஹெத்வா த³ஸ்ஸனவாரோ நாம. த³ஸமோ குஸலத்திகாதி³வஸேன ஸங்க³ஹெத்வா த³ஸ்ஸனவாரோ நாம.
978. Idāni tadanantare dhammahadayavibhaṅge pāḷiparicchedo tāva evaṃ veditabbo – ettha hi āditova khandhādīnaṃ dvādasannaṃ koṭṭhāsānaṃ vasena sabbasaṅgāhikavāro nāma vutto. Dutiyo tesaṃyeva dhammānaṃ kāmadhātuādīsu uppattānuppattidassanavāro nāma. Tatiyo tattheva pariyāpannāpariyāpannadassanavāro nāma. Catuttho tīsu bhūmīsu uppattikkhaṇe vijjamānāvijjamānadhammadassanavāro nāma. Pañcamo tesaṃ dhammānaṃ bhūmantaravasena dassanavāro nāma. Chaṭṭho gatīsu uppādakakammaāyuppamāṇadassanavāro nāma. Sattamo abhiññeyyādivāro nāma. Aṭṭhamo sārammaṇānārammaṇavāro nāma. Navamo tesaṃ khandhādidhammānaṃ diṭṭhasutādivasena saṅgahetvā dassanavāro nāma. Dasamo kusalattikādivasena saṅgahetvā dassanavāro nāma.
979. ஏவங் த³ஸஹி வாரேஹி பரிச்சி²ன்னாய பாளியா பட²மே தாவ ஸப்³ப³ஸங்கா³ஹிகவாரே ‘‘அவீசிதோ யாவ ப⁴வக்³க³ங் எத்த²ந்தரே கதி க²ந்தா⁴’’தி புச்சி²தே ‘‘ஏகோதி வா…பே॰… சத்தாரோதி வா சா²தி வா அவத்வா பஞ்சாதி வத்துங் ஸமத்தோ² அஞ்ஞோ நத்தீ²’’தி அத்தனோ ஞாணப³லங் தீ³பெந்தோ பஞ்சக்க²ந்தா⁴தி புச்சா²னுரூபங் விஸ்ஸஜ்ஜனங் ஆஹ. யதா²புச்ச²ங் விஸ்ஸஜ்ஜனஞ்ஹி ஸப்³ப³ஞ்ஞுப்³யாகரணங் நாமாதி வுச்சதி. த்³வாத³ஸாயதனானீதிஆதீ³ஸுபி ஏஸேவ நயோ. ரூபக்க²ந்தா⁴தீ³னங் பபே⁴தோ³ க²ந்த⁴விப⁴ங்கா³தீ³ஸு வுத்தனயேனேவ வேதி³தப்³போ³.
979. Evaṃ dasahi vārehi paricchinnāya pāḷiyā paṭhame tāva sabbasaṅgāhikavāre ‘‘avīcito yāva bhavaggaṃ etthantare kati khandhā’’ti pucchite ‘‘ekoti vā…pe… cattāroti vā chāti vā avatvā pañcāti vattuṃ samattho añño natthī’’ti attano ñāṇabalaṃ dīpento pañcakkhandhāti pucchānurūpaṃ vissajjanaṃ āha. Yathāpucchaṃ vissajjanañhi sabbaññubyākaraṇaṃ nāmāti vuccati. Dvādasāyatanānītiādīsupi eseva nayo. Rūpakkhandhādīnaṃ pabhedo khandhavibhaṅgādīsu vuttanayeneva veditabbo.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 18. த⁴ம்மஹத³யவிப⁴ங்கோ³ • 18. Dhammahadayavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 18. த⁴ம்மஹத³யவிப⁴ங்கோ³ • 18. Dhammahadayavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 18. த⁴ம்மஹத³யவிப⁴ங்கோ³ • 18. Dhammahadayavibhaṅgo
