| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. ஸப்³ப³வக்³கோ³
3. Sabbavaggo
1. ஸப்³ப³ஸுத்தவண்ணனா
1. Sabbasuttavaṇṇanā
23. ஸப்³ப³வக்³க³ஸ்ஸ பட²மே ஸப்³ப³ங் வோ, பி⁴க்க²வேதி ஸப்³ப³ங் நாம சதுப்³பி³த⁴ங் – ஸப்³ப³ஸப்³ப³ங், ஆயதனஸப்³ப³ங், ஸக்காயஸப்³ப³ங், பதே³ஸஸப்³ப³ந்தி. தத்த² –
23. Sabbavaggassa paṭhame sabbaṃ vo, bhikkhaveti sabbaṃ nāma catubbidhaṃ – sabbasabbaṃ, āyatanasabbaṃ, sakkāyasabbaṃ, padesasabbanti. Tattha –
‘‘ந தஸ்ஸ அத்³தி³ட்ட²மித⁴அத்தி² கிஞ்சி,
‘‘Na tassa addiṭṭhamidhaatthi kiñci,
அதோ² அவிஞ்ஞாதமஜானிதப்³ப³ங்;
Atho aviññātamajānitabbaṃ;
ஸப்³ப³ங் அபி⁴ஞ்ஞாஸி யத³த்தி² நெய்யங்,
Sabbaṃ abhiññāsi yadatthi neyyaṃ,
ததா²க³தோ தேன ஸமந்தசக்கூ²’’தி. (மஹானி॰ 156; சூளனி॰ தோ⁴தகமாணவபுச்சா²னித்³தே³ஸோ 32; படி॰ ம॰ 1.121) –
Tathāgato tena samantacakkhū’’ti. (mahāni. 156; cūḷani. dhotakamāṇavapucchāniddeso 32; paṭi. ma. 1.121) –
இத³ங் ஸப்³ப³ஸப்³ப³ங் நாம. ‘‘ஸப்³ப³ங் வோ, பி⁴க்க²வே, தே³ஸெஸ்ஸாமி, தங் ஸுணாதா²’’தி (ஸங்॰ நி॰ 4.24) இத³ங் ஆயதனஸப்³ப³ங் நாம. ‘‘ஸப்³ப³த⁴ம்மமூலபரியாயங் வோ, பி⁴க்க²வே, தே³ஸெஸ்ஸாமீ’’தி (ம॰ நி॰ 1.1) இத³ங் ஸக்காயஸப்³ப³ங் நாம. ‘‘ஸப்³ப³த⁴ம்மேஸு வா பன பட²மஸமன்னாஹாரோ உப்பஜ்ஜதி சித்தங் மனோ மானஸங்…பே॰… தஜ்ஜாமனோதா⁴தூ’’தி இத³ங் பதே³ஸஸப்³ப³ங் நாம. இதி பஞ்சாரம்மணமத்தங் பதே³ஸஸப்³ப³ங். தேபூ⁴மகத⁴ம்மா ஸக்காயஸப்³ப³ங். சதுபூ⁴மகத⁴ம்மா ஆயதனஸப்³ப³ங். யங்கிஞ்சி நெய்யங் ஸப்³ப³ஸப்³ப³ங். பதே³ஸஸப்³ப³ங் ஸக்காயஸப்³ப³ங் ந பாபுணாதி, ஸக்காயஸப்³ப³ங் ஆயதனஸப்³ப³ங் ந பாபுணாதி, ஆயதனஸப்³ப³ங் ஸப்³ப³ஸப்³ப³ங் ந பாபுணாதி. கஸ்மா? ஸப்³ப³ஞ்ஞுதஞ்ஞாணஸ்ஸ அயங் நாம த⁴ம்மோ ஆரம்மணங் ந ஹோதீதி நத்தி²தாய. இமஸ்மிங் பன ஸுத்தே ஆயதனஸப்³ப³ங் அதி⁴ப்பேதங்.
Idaṃ sabbasabbaṃ nāma. ‘‘Sabbaṃ vo, bhikkhave, desessāmi, taṃ suṇāthā’’ti (saṃ. ni. 4.24) idaṃ āyatanasabbaṃ nāma. ‘‘Sabbadhammamūlapariyāyaṃ vo, bhikkhave, desessāmī’’ti (ma. ni. 1.1) idaṃ sakkāyasabbaṃ nāma. ‘‘Sabbadhammesu vā pana paṭhamasamannāhāro uppajjati cittaṃ mano mānasaṃ…pe… tajjāmanodhātū’’ti idaṃ padesasabbaṃ nāma. Iti pañcārammaṇamattaṃ padesasabbaṃ. Tebhūmakadhammā sakkāyasabbaṃ. Catubhūmakadhammā āyatanasabbaṃ. Yaṃkiñci neyyaṃ sabbasabbaṃ. Padesasabbaṃ sakkāyasabbaṃ na pāpuṇāti, sakkāyasabbaṃ āyatanasabbaṃ na pāpuṇāti, āyatanasabbaṃ sabbasabbaṃ na pāpuṇāti. Kasmā? Sabbaññutaññāṇassa ayaṃ nāma dhammo ārammaṇaṃ na hotīti natthitāya. Imasmiṃ pana sutte āyatanasabbaṃ adhippetaṃ.
பச்சக்கா²யாதி படிக்கி²பித்வா. வாசாவத்து²கமேவஸ்ஸாதி, வாசாய வத்தப்³ப³வத்து²மத்தகமேவ ப⁴வெய்ய. இமானி பன த்³வாத³ஸாயதனானி அதிக்கமித்வா அயங் நாம அஞ்ஞோ ஸபா⁴வத⁴ம்மோ அத்தீ²தி த³ஸ்ஸேதுங் ந ஸக்குணெய்ய. புட்டோ² ச ந ஸம்பாயெய்யாதி, ‘‘கதமங் அஞ்ஞங் ஸப்³ப³ங் நாமா’’தி? புச்சி²தோ, ‘‘இத³ங் நாமா’’தி வசனேன ஸம்பாதே³துங் ந ஸக்குணெய்ய. விகா⁴தங் ஆபஜ்ஜெய்யாதி து³க்க²ங் ஆபஜ்ஜெய்ய. யதா² தங், பி⁴க்க²வே, அவிஸயஸ்மிந்தி எத்த² தந்தி நிபாதமத்தங். யதா²தி காரணவசனங், யஸ்மா அவிஸயே புட்டோ²தி அத்தோ². அவிஸயஸ்மிஞ்ஹி ஸத்தானங் விகா⁴தோவ ஹோதி, கூடாகா³ரமத்தங் ஸிலங் ஸீஸேன உக்கி²பித்வா க³ம்பீ⁴ரே உத³கே தரணங் அவிஸயோ, ததா² சந்தி³மஸூரியானங் ஆகட்³டி⁴த்வா பாதனங், தஸ்மிங் அவிஸயே வாயமந்தோ விகா⁴தமேவ ஆபஜ்ஜதி, ஏவங் இமஸ்மிம்பி அவிஸயே விகா⁴தமேவ ஆபஜ்ஜெய்யாதி அதி⁴ப்பாயோ.
Paccakkhāyāti paṭikkhipitvā. Vācāvatthukamevassāti, vācāya vattabbavatthumattakameva bhaveyya. Imāni pana dvādasāyatanāni atikkamitvā ayaṃ nāma añño sabhāvadhammo atthīti dassetuṃ na sakkuṇeyya. Puṭṭho ca na sampāyeyyāti, ‘‘katamaṃ aññaṃ sabbaṃ nāmā’’ti? Pucchito, ‘‘idaṃ nāmā’’ti vacanena sampādetuṃ na sakkuṇeyya. Vighātaṃ āpajjeyyāti dukkhaṃ āpajjeyya. Yathā taṃ, bhikkhave, avisayasminti ettha tanti nipātamattaṃ. Yathāti kāraṇavacanaṃ, yasmā avisaye puṭṭhoti attho. Avisayasmiñhi sattānaṃ vighātova hoti, kūṭāgāramattaṃ silaṃ sīsena ukkhipitvā gambhīre udake taraṇaṃ avisayo, tathā candimasūriyānaṃ ākaḍḍhitvā pātanaṃ, tasmiṃ avisaye vāyamanto vighātameva āpajjati, evaṃ imasmimpi avisaye vighātameva āpajjeyyāti adhippāyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸப்³ப³ஸுத்தங் • 1. Sabbasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஸப்³ப³ஸுத்தவண்ணனா • 1. Sabbasuttavaṇṇanā
