| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၃. သဗ္ဗဝဂ္ဂော
3. Sabbavaggo
၁. သဗ္ဗသုတ္တဝဏ္ဏနာ
1. Sabbasuttavaṇṇanā
၂၃. သဗ္ဗ-သဒ္ဒော ပကရဏဝသေန ကတ္ထစိ သပ္ပဒေသေပိ ပဝတ္တတီတိ တတော နိဝတ္တနတ္ထံ အနဝသေသဝိသယေန သဗ္ဗ-သဒ္ဒေန ဝိသေသေတ္ဝာ ဝုတ္တံ ‘‘သဗ္ဗသဗ္ဗ’’န္တိ, သဗ္ဗမေဝ ဟုတ္ဝာ သဗ္ဗန္တိ အတ္ထော။ အာယတနဘာဝံ သဗ္ဗံ အာယတနသဗ္ဗံ, သေသဒ္ဝယေပိ ဧသေဝ နယော။
23. Sabba-saddo pakaraṇavasena katthaci sappadesepi pavattatīti tato nivattanatthaṃ anavasesavisayena sabba-saddena visesetvā vuttaṃ ‘‘sabbasabba’’nti, sabbameva hutvā sabbanti attho. Āyatanabhāvaṃ sabbaṃ āyatanasabbaṃ, sesadvayepi eseva nayo.
တသ္သ အဝိသယာဘာဝတော န အဒ္ဒိဋ္ဌမိဓတ္ထိ ကိဉ္စီတိ။ ဣဓာတိ နိပာတမတ္တံ, ဣဓ ဝာ သဒေဝကေ လောကေ, ဒသ္သနဘူတေန ဉာဏေန အဒိဋ္ဌံ နာမ ကိဉ္စိ နတ္ထီတိ အတ္ထော။ ယဒိ ဧဝံ အနုမာနဝိသယံ နု ခော ကထန္တိ အာဟ ‘‘အထော အဝိညာတ’’န္တိ။ အညေသံ အပစ္စက္ခမ္ပိ အဝိညာတံ တသ္သ ကိဉ္စိ နတ္ထီတိ အဒိဋ္ဌံ အဝိညာတံ နတ္ထိ။ ပစ္စုပ္ပန္နံ အတီတမေဝ ဉေယ္ယံ ဂဟိတံ, အနာဂတံ နု ခော ကထန္တိ အာဟ – ‘‘အဇာနိတဗ္ဗ’’န္တိ, တသ္သ ကိဉ္စိ နတ္ထီတိ အာနေတ္ဝာ သမ္ဗန္ဓော။ ဇာနိတုံ ဉာတုံ အသက္ကုဏေယ္ယံ နာမ တသ္သ ကိဉ္စိ နတ္ထီတိ ဒသ္သေန္တော အာဟ ‘‘သဗ္ဗံ အဘိညာသီ’’တိအာဒိ။
Tassa avisayābhāvato na addiṭṭhamidhatthi kiñcīti. Idhāti nipātamattaṃ, idha vā sadevake loke, dassanabhūtena ñāṇena adiṭṭhaṃ nāma kiñci natthīti attho. Yadi evaṃ anumānavisayaṃ nu kho kathanti āha ‘‘atho aviññāta’’nti. Aññesaṃ apaccakkhampi aviññātaṃ tassa kiñci natthīti adiṭṭhaṃ aviññātaṃ natthi. Paccuppannaṃ atītameva ñeyyaṃ gahitaṃ, anāgataṃ nu kho kathanti āha – ‘‘ajānitabba’’nti, tassa kiñci natthīti ānetvā sambandho. Jānituṃ ñātuṃ asakkuṇeyyaṃ nāma tassa kiñci natthīti dassento āha ‘‘sabbaṃ abhiññāsī’’tiādi.
သကလသ္သ သက္ကာယဓမ္မသ္သ ပရိဂ္ဂဟိတတ္တာ သက္ကာယသဗ္ဗံ။ သဗ္ဗဓမ္မေသူတိ ပဉ္စန္နံ ဒ္ဝာရာနံ အာရမ္မဏဘူတေသု သဗ္ဗေသု ဓမ္မေသု။ ယသ္မာ ဆသုပိ အာရမ္မဏေသု ဂဟိတေသု ပဒေသသဗ္ဗံ နာမ န ဟောတိ, တသ္မာ ‘‘ပဉ္စာရမ္မဏမတ္တ’’န္တိ ဝုတ္တံ။ ပဒေသသဗ္ဗံ သက္ကာယသဗ္ဗံ န ပာပုဏာတိ တသ္သ တေဘူမကဓမ္မေသု ဧကဒေသသ္သ အသင္ဂဏ္ဟနတော။ သက္ကာယသဗ္ဗံ အာယတနသဗ္ဗံ န ပာပုဏာတိ လောကုတ္တရဓမ္မာနံ အသင္ဂဏ္ဟနတော။ အာယတနသဗ္ဗံ သဗ္ဗသဗ္ဗံ န ပာပုဏာတိ။ ယသ္မာ အာယတနသဗ္ဗေန စတုဘူမကဓမ္မာဝ ပရိဂ္ဂဟိတာ, န လက္ခဏပညတ္တိယော, ယသ္မာ သဗ္ဗသဗ္ဗံ ဒသ္သေန္တေန ဗုဒ္ဓဉာဏဝိသယော ဒသ္သိတော, တသ္မာ ‘‘သဗ္ဗသဗ္ဗံ န ပာပုဏာတီ’’တိ ဧတ္ထာပိ ‘‘ကသ္မာ။ပေ.။ နတ္ထိတာယာ’’တိ သဗ္ဗံ ဉာတာရမ္မဏေနေဝ ပုစ္ဆာဝိသ္သဇ္ဇနံ ကတံ။ ‘‘အာယတနသဗ္ဗေပိ ဣဓ ဝိပသ္သနုပဂဓမ္မာဝ ဂဟေတဗ္ဗာ အဘိညေယ္ယနိဒ္ဒေသဝသေနပိ သမ္မသနစာရသ္သေဝ ဣစ္ဆိတတ္တာ’’တိ ဝဒန္တိ။
Sakalassa sakkāyadhammassa pariggahitattā sakkāyasabbaṃ. Sabbadhammesūti pañcannaṃ dvārānaṃ ārammaṇabhūtesu sabbesu dhammesu. Yasmā chasupi ārammaṇesu gahitesu padesasabbaṃ nāma na hoti, tasmā ‘‘pañcārammaṇamatta’’nti vuttaṃ. Padesasabbaṃ sakkāyasabbaṃ na pāpuṇāti tassa tebhūmakadhammesu ekadesassa asaṅgaṇhanato. Sakkāyasabbaṃ āyatanasabbaṃ na pāpuṇāti lokuttaradhammānaṃ asaṅgaṇhanato. Āyatanasabbaṃ sabbasabbaṃ na pāpuṇāti. Yasmā āyatanasabbena catubhūmakadhammāva pariggahitā, na lakkhaṇapaññattiyo, yasmā sabbasabbaṃ dassentena buddhañāṇavisayo dassito, tasmā ‘‘sabbasabbaṃ na pāpuṇātī’’ti etthāpi ‘‘kasmā…pe… natthitāyā’’ti sabbaṃ ñātārammaṇeneva pucchāvissajjanaṃ kataṃ. ‘‘Āyatanasabbepi idha vipassanupagadhammāva gahetabbā abhiññeyyaniddesavasenapi sammasanacārasseva icchitattā’’ti vadanti.
ပဋိက္ခိပိတ္ဝာတိ ‘‘ဣဒံ သဗ္ဗံ နာမ န ဟောတီ’’တိ ဧဝံ ပဋိက္ခိပိတ္ဝာ။ တသ္သာတိ ‘‘အညံ သဗ္ဗံ ပညာပေသ္သာမီ’’တိ ဝဒန္တသ္သ။ ဝာစာယ ဝတ္တဗ္ဗဝတ္ထုမတ္တကမေဝာတိ ဝဉ္ဈာပုတ္တဂဂနကုသုမာဒိဝာစာ ဝိယ ဧတသ္သ ဝာစာယ ကေဝလံ ဝတ္တဗ္ဗဝတ္ထုကမေဝ ဘဝေယ္ယ, န အတ္ထော, ဝစနမတ္တကမေဝာတိ အတ္ထော ။ အတိက္ကမိတ္ဝာတိ အနာမသိတ္ဝာ အဂ္ဂဟေတ္ဝာ။ တံ ကိသ္သ ဟေတူတိ ဝိဃာတာပဇ္ဇနံ ကေန ဟေတုနာ။ ယထာ တံ အဝိသယသ္မိန္တိ ယထာ အညောပိ ကောစိ အဝိသယေ ဝာယမန္တော, ဧဝန္တိ အတ္ထော။ အဋ္ဌကထာယံ ပန ယသ္မာ ပာဠိယံ ‘‘တံ ကိသ္သ ဟေတူ’’တိ ဝုတ္တကာရဏမေဝ ဥပနယနဝသေန ဒသ္သေတုံ ‘‘ယထာ တ’’န္တိအာဒိ ဝုတ္တံ။ ကာရဏောပနယနဉ္စ ကာရဏမေဝာတိ ‘‘ယထာတိ ကာရဏဝစန’’န္တိ ဝုတ္တန္တိ ဒဋ္ဌဗ္ဗံ။ တေနေဝာဟ ‘‘ဧဝံ ဣမသ္မိမ္ပိ အဝိသယေ’’တိအာဒိ။
Paṭikkhipitvāti ‘‘idaṃ sabbaṃ nāma na hotī’’ti evaṃ paṭikkhipitvā. Tassāti ‘‘aññaṃ sabbaṃ paññāpessāmī’’ti vadantassa. Vācāya vattabbavatthumattakamevāti vañjhāputtagaganakusumādivācā viya etassa vācāya kevalaṃ vattabbavatthukameva bhaveyya, na attho, vacanamattakamevāti attho . Atikkamitvāti anāmasitvā aggahetvā. Taṃ kissa hetūti vighātāpajjanaṃ kena hetunā. Yathā taṃ avisayasminti yathā aññopi koci avisaye vāyamanto, evanti attho. Aṭṭhakathāyaṃ pana yasmā pāḷiyaṃ ‘‘taṃ kissa hetū’’ti vuttakāraṇameva upanayanavasena dassetuṃ ‘‘yathā ta’’ntiādi vuttaṃ. Kāraṇopanayanañca kāraṇamevāti ‘‘yathāti kāraṇavacana’’nti vuttanti daṭṭhabbaṃ. Tenevāha ‘‘evaṃ imasmimpi avisaye’’tiādi.
သဗ္ဗသုတ္တဝဏ္ဏနာ နိဋ္ဌိတာ။
Sabbasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. သဗ္ဗသုတ္တံ • 1. Sabbasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. သဗ္ဗသုတ္တဝဏ္ဏနာ • 1. Sabbasuttavaṇṇanā
