| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၂၇. သဘာဂာပတ္တိပဋိကမ္မဝိဓိ
127. Sabhāgāpattipaṭikammavidhi
၂၂၁. တေန ခော ပန သမယေန အညတရသ္မိံ အာဝာသေ တဒဟု ပဝာရဏာယ သဗ္ဗော သင္ဃော သဘာဂံ အာပတ္တိံ အာပန္နော ဟောတိ။ အထ ခော တေသံ ဘိက္ခူနံ ဧတဒဟောသိ – ‘‘ဘဂဝတာ ပညတ္တံ ‘န သဘာဂာ အာပတ္တိ ဒေသေတဗ္ဗာ, န သဘာဂာ အာပတ္တိ ပဋိဂ္ဂဟေတဗ္ဗာ’တိ။ အယဉ္စ သဗ္ဗော သင္ဃော သဘာဂံ အာပတ္တိံ အာပန္နော။ ကထံ နု ခော အမ္ဟေဟိ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။
221. Tena kho pana samayena aññatarasmiṃ āvāse tadahu pavāraṇāya sabbo saṅgho sabhāgaṃ āpattiṃ āpanno hoti. Atha kho tesaṃ bhikkhūnaṃ etadahosi – ‘‘bhagavatā paññattaṃ ‘na sabhāgā āpatti desetabbā, na sabhāgā āpatti paṭiggahetabbā’ti. Ayañca sabbo saṅgho sabhāgaṃ āpattiṃ āpanno. Kathaṃ nu kho amhehi paṭipajjitabba’’nti? Bhagavato etamatthaṃ ārocesuṃ.
ဣဓ ပန, ဘိက္ခဝေ, အညတရသ္မိံ အာဝာသေ တဒဟု ပဝာရဏာယ သဗ္ဗော သင္ဃော သဘာဂံ အာပတ္တိံ အာပန္နော ဟောတိ။ တေဟိ, ဘိက္ခဝေ, ဘိက္ခူဟိ ဧကော ဘိက္ခု သာမန္တာ အာဝာသာ သဇ္ဇုကံ ပာဟေတဗ္ဗော – ဂစ္ဆာဝုသော, တံ အာပတ္တိံ ပဋိကရိတ္ဝာ အာဂစ္ဆ, မယံ တေ သန္တိကေ တံ အာပတ္တိံ ပဋိကရိသ္သာမာတိ။ ဧဝဉ္စေတံ လဘေထ, ဣစ္စေတံ ကုသလံ။ နော စေ လဘေထ, ဗ္ယတ္တေန ဘိက္ခုနာ ပဋိဗလေန သင္ဃော ဉာပေတဗ္ဗော –
Idha pana, bhikkhave, aññatarasmiṃ āvāse tadahu pavāraṇāya sabbo saṅgho sabhāgaṃ āpattiṃ āpanno hoti. Tehi, bhikkhave, bhikkhūhi eko bhikkhu sāmantā āvāsā sajjukaṃ pāhetabbo – gacchāvuso, taṃ āpattiṃ paṭikaritvā āgaccha, mayaṃ te santike taṃ āpattiṃ paṭikarissāmāti. Evañcetaṃ labhetha, iccetaṃ kusalaṃ. No ce labhetha, byattena bhikkhunā paṭibalena saṅgho ñāpetabbo –
‘‘သုဏာတု မေ, ဘန္တေ, သင္ဃော။ အယံ သဗ္ဗော သင္ဃော သဘာဂံ အာပတ္တိံ အာပန္နော။ ယဒာ အညံ ဘိက္ခုံ သုဒ္ဓံ အနာပတ္တိကံ ပသ္သိသ္သတိ တဒာ တသ္သ သန္တိကေ တံ အာပတ္တိံ ပဋိကရိသ္သတီ’’တိ ဝတ္ဝာ ပဝာရေတဗ္ဗံ; န တ္ဝေဝ တပ္ပစ္စယာ ပဝာရဏာယ အန္တရာယော ကာတဗ္ဗော။
‘‘Suṇātu me, bhante, saṅgho. Ayaṃ sabbo saṅgho sabhāgaṃ āpattiṃ āpanno. Yadā aññaṃ bhikkhuṃ suddhaṃ anāpattikaṃ passissati tadā tassa santike taṃ āpattiṃ paṭikarissatī’’ti vatvā pavāretabbaṃ; na tveva tappaccayā pavāraṇāya antarāyo kātabbo.
ဣဓ ပန, ဘိက္ခဝေ, အညတရသ္မိံ အာဝာသေ တဒဟု ပဝာရဏာယ သဗ္ဗော သင္ဃော သဘာဂာယ အာပတ္တိယာ ဝေမတိကော ဟောတိ။ ဗ္ယတ္တေန ဘိက္ခုနာ ပဋိဗလေန သင္ဃော ဉာပေတဗ္ဗော –
Idha pana, bhikkhave, aññatarasmiṃ āvāse tadahu pavāraṇāya sabbo saṅgho sabhāgāya āpattiyā vematiko hoti. Byattena bhikkhunā paṭibalena saṅgho ñāpetabbo –
‘‘သုဏာတု မေ, ဘန္တေ, သင္ဃော။ အယံ သဗ္ဗော သင္ဃော သဘာဂာယ အာပတ္တိယာ ဝေမတိကော။ ယဒာ နိဗ္ဗေမတိကော ဘဝိသ္သတိ တဒာ တံ အာပတ္တိံ ပဋိကရိသ္သတီ’’တိ ဝတ္ဝာ, ပဝာရေတဗ္ဗံ, န တ္ဝေဝ တပ္ပစ္စယာ ပဝာရဏာယ အန္တရာယော ကာတဗ္ဗောတိ။
‘‘Suṇātu me, bhante, saṅgho. Ayaṃ sabbo saṅgho sabhāgāya āpattiyā vematiko. Yadā nibbematiko bhavissati tadā taṃ āpattiṃ paṭikarissatī’’ti vatvā, pavāretabbaṃ, na tveva tappaccayā pavāraṇāya antarāyo kātabboti.
သဘာဂာပတ္တိပဋိကမ္မဝိဓိ နိဋ္ဌိတာ။
Sabhāgāpattipaṭikammavidhi niṭṭhitā.
ပဌမဘာဏဝာရော နိဋ္ဌိတော။
Paṭhamabhāṇavāro niṭṭhito.
