| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৩. সভোজনসিক্খাপদং
3. Sabhojanasikkhāpadaṃ
২৭৯. ততিযে ‘‘সযনিযঘরে’’তি ৰত্তব্বে যকারলোপং কত্ৰা ‘‘সযনিঘরে’’তি ৰুত্তন্তি আহ ‘‘সযনিঘরে’’তি। যতোতি এত্থ তোসদ্দো পঠমাদীসু অত্থেসু দিস্সতি। ‘‘যতোনিদান’’ন্তিআদীসু (সু॰ নি॰ ২৭৫) পঠমত্থে। ‘‘অন্তরাযে অসেসতো’’তিআদীসু (ধ॰ স॰ অট্ঠ॰ গন্থারম্ভকথা ৭) দুতিযত্থে । ‘‘অনিচ্চতো’’তিআদীসু (পট্ঠা॰ ১.১.৪০৯) ততিযত্থে। ‘‘মাতিতো পিতিতো’’তিআদীসু (দী॰ নি॰ ১.৩১১) পঞ্চম্যত্থে। ‘‘যং পরতো দানপচ্চযা’’তিআদীসু (জা॰ ২.২২.৫৮৫) ছট্ঠ্যত্থে। ‘‘পুরতো পচ্ছতো’’তিআদীসু (পাচি॰ ৫৭৬) সত্তম্যত্থে। ‘‘পদমতো’’তিআদীসু কারণত্থে দিস্সতি। ইধাপি কারণত্থেযেৰাতি আহ ‘‘যস্মা’’তি। যস্মা কারণা অয্যস্স ভিক্খা দিন্না, তস্মা গচ্ছথ ভন্তে তুম্হেতি অত্থো। যন্তি ভিক্খং। ৰোতি তুম্হেহি। অধিপ্পাযোতি পুরিসস্স অজ্ঝাসযো। ‘‘পরিযুট্ঠিতো’’তি সামঞ্ঞতো ৰুত্তেপি অত্থপকরণাদিতো রাগপরিযুট্ঠিতোৰাধিপ্পেতোতি আহ ‘‘রাগপরিযুট্ঠিতো’’তি, রাগেন পরিভৰিত্ৰা উট্ঠিতোতি অত্থো।
279. Tatiye ‘‘sayaniyaghare’’ti vattabbe yakāralopaṃ katvā ‘‘sayanighare’’ti vuttanti āha ‘‘sayanighare’’ti. Yatoti ettha tosaddo paṭhamādīsu atthesu dissati. ‘‘Yatonidāna’’ntiādīsu (su. ni. 275) paṭhamatthe. ‘‘Antarāye asesato’’tiādīsu (dha. sa. aṭṭha. ganthārambhakathā 7) dutiyatthe . ‘‘Aniccato’’tiādīsu (paṭṭhā. 1.1.409) tatiyatthe. ‘‘Mātito pitito’’tiādīsu (dī. ni. 1.311) pañcamyatthe. ‘‘Yaṃ parato dānapaccayā’’tiādīsu (jā. 2.22.585) chaṭṭhyatthe. ‘‘Purato pacchato’’tiādīsu (pāci. 576) sattamyatthe. ‘‘Padamato’’tiādīsu kāraṇatthe dissati. Idhāpi kāraṇattheyevāti āha ‘‘yasmā’’ti. Yasmā kāraṇā ayyassa bhikkhā dinnā, tasmā gacchatha bhante tumheti attho. Yanti bhikkhaṃ. Voti tumhehi. Adhippāyoti purisassa ajjhāsayo. ‘‘Pariyuṭṭhito’’ti sāmaññato vuttepi atthapakaraṇādito rāgapariyuṭṭhitovādhippetoti āha ‘‘rāgapariyuṭṭhito’’ti, rāgena paribhavitvā uṭṭhitoti attho.
২৮০. সভোজনন্তি এত্থ সকারো সহসদ্দকারিযো চ অকারুকারানং অসরূপত্তা অকারতো উকারস্স লোপো চ তীসু পদেসু পচ্ছিমানং দ্ৰিন্নং পদানং তুল্যত্থনিস্সিতসমাসো চ পুব্বপদেন সহ ভেদনিস্সিতবাহিরত্থসমাসো চ হোতি, ইতি ইমমত্থং দস্সেন্তো আহ ‘‘সহ উভোহি জনেহী’’তি। অথ ৰা ভুঞ্জিতব্বন্তি ভোজনং, সং ৰিজ্জতি ভোজনং অস্মিং কুলেতি সভোজনন্তি দস্সেন্তো আহ ‘‘অথ ৰা’’তিআদি। হীতি সচ্চং। তেনেৰাতি তেনেৰ অঞ্ঞমঞ্ঞং ভুঞ্জিতব্বত্তা। অস্সাতি ‘‘সভোজনে’’তিপদস্স। ঘরেতি এত্থ পুব্বো সযনিসদ্দো লোপোতি আহ ‘‘সযনিঘরে’’তি। ইমিনা ‘‘দত্তো’’তিআদীসু ৰিয পুব্বপদলোপসমাসং দস্সেতি। পিট্ঠসঙ্ঘাটস্সাতি এত্থ পিট্ঠসঙ্ঘাটো নাম ন অঞ্ঞস্স যস্স কস্সচি, অথ খো সযনিঘরগব্ভস্সেৰাতি আহ ‘‘তস্স সযনিঘরগব্ভস্সা’’তি। যথা ৰা তথা ৰাতি যেন ৰা তে ন ৰা আকারেন। কতস্সাতি পিট্ঠিৰংসং আরোপেত্ৰা ৰা অনারোপেত্ৰা ৰা কতস্সাতি। ততিযং।
280.Sabhojananti ettha sakāro sahasaddakāriyo ca akārukārānaṃ asarūpattā akārato ukārassa lopo ca tīsu padesu pacchimānaṃ dvinnaṃ padānaṃ tulyatthanissitasamāso ca pubbapadena saha bhedanissitabāhiratthasamāso ca hoti, iti imamatthaṃ dassento āha ‘‘saha ubhohi janehī’’ti. Atha vā bhuñjitabbanti bhojanaṃ, saṃ vijjati bhojanaṃ asmiṃ kuleti sabhojananti dassento āha ‘‘atha vā’’tiādi. Hīti saccaṃ. Tenevāti teneva aññamaññaṃ bhuñjitabbattā. Assāti ‘‘sabhojane’’tipadassa. Ghareti ettha pubbo sayanisaddo lopoti āha ‘‘sayanighare’’ti. Iminā ‘‘datto’’tiādīsu viya pubbapadalopasamāsaṃ dasseti. Piṭṭhasaṅghāṭassāti ettha piṭṭhasaṅghāṭo nāma na aññassa yassa kassaci, atha kho sayanigharagabbhassevāti āha ‘‘tassa sayanigharagabbhassā’’ti. Yathā vā tathā vāti yena vā te na vā ākārena. Katassāti piṭṭhivaṃsaṃ āropetvā vā anāropetvā vā katassāti. Tatiyaṃ.
২৮৪. চতুত্থপঞ্চমেসু যথা চ সভোজনসিক্খাপদং পঠমপারাজিকসমুট্ঠানং, এৰমেৰ তানিপীতি যোজনাতি। চতুত্থপঞ্চমানি।
284. Catutthapañcamesu yathā ca sabhojanasikkhāpadaṃ paṭhamapārājikasamuṭṭhānaṃ, evameva tānipīti yojanāti. Catutthapañcamāni.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৫. অচেলকৰগ্গো • 5. Acelakavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৩. সভোজনসিক্খাপদৰণ্ণনা • 3. Sabhojanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. সভোজনসিক্খাপদৰণ্ণনা • 3. Sabhojanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
৩. সভোজনসিক্খাপদৰণ্ণনা • 3. Sabhojanasikkhāpadavaṇṇanā
৪. রহোপটিচ্ছন্নসিক্খাপদৰণ্ণনা • 4. Rahopaṭicchannasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৩. সভোজনসিক্খাপদৰণ্ণনা • 3. Sabhojanasikkhāpadavaṇṇanā
