| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
3. ஸபோ⁴ஜனஸிக்கா²பத³வண்ணனா
3. Sabhojanasikkhāpadavaṇṇanā
‘‘ஸபோ⁴ஜனே’’தி பா³ஹிரத்த²ஸமாஸோயங், உப⁴ஸத்³தே³ உகாரஸ்ஸ ச லோபோதி ஆஹ ‘‘ஸஹ உபோ⁴ஹி ஜனேஹீ’’திஆதி³. தத்த² உபோ⁴ஹி ஜனேஹீதி ஜாயா ச பதி சாதி உபோ⁴ஹி ஜனேஹி. பு⁴ஞ்ஜிதப்³ப³ந்தி வா போ⁴ஜனங், இத்தீ² ச புரிஸோ ச, தேன ஸஹ வத்ததீதி ஸபோ⁴ஜனந்தி ஆஹ ‘‘அத² வா’’திஆதி³. ராக³பரியுட்டி²தஸ்ஸாதி மேது²னாதி⁴ப்பாயஸ்ஸ. ஸயனிக⁴ரந்தி ஸயனீயக⁴ரங், வாஸகே³ஹந்தி அத்தோ². மஹல்லகஸ்ஸாதி மஹல்லகஸ்ஸ ஸயனிக⁴ரஸ்ஸ. பிட்ட²ஸங்கா⁴டதோதி த்³வாரபா³ஹதோ கு²த்³த³கஸ்ஸ வாதி யதா² ததா² வா கதஸ்ஸ கு²த்³த³கஸ்ஸ ஸயனிக⁴ரஸ்ஸ. வேமஜ்ஜ²ங் அதிக்கமித்வா நிஸீதெ³ய்யாதி பிட்டி²வங்ஸங் அதிக்கமித்வா நிஸீதெ³ய்ய. கு²த்³த³கங் (ஸாரத்த²॰ டீ॰ பாசித்திய 3.280) நாம ஸயனிக⁴ரங் வித்தா²ரதோ பஞ்சஹத்த²ப்பமாணங் ஹோதி, தஸ்ஸ ச மஜ்ஜி²மட்டா²னங் பிட்ட²ஸங்கா⁴டதோ அட்³ட⁴தெய்யஹத்த²ப்பமாணமேவ ஹோதி, தஸ்மா தாதி³ஸே ஸயனிக⁴ரே பிட்ட²ஸங்கா⁴டதோ ஹத்த²பாஸங் விஜஹித்வா நிஸின்னோ பிட்டி²வங்ஸங் அதிக்கமித்வா நிஸின்னோ நாம ஹோதி. ஏவங் நிஸின்னோ ச வேமஜ்ஜ²ங் அதிக்கமித்வா நிஸின்னோ நாம ஹோதி. தேன வுத்தங் பாளியங் ‘‘பிட்டி²வங்ஸங் அதிக்கமித்வா நிஸீத³தீ’’தி (பாசி॰ 281). ஸசித்தகஞ்செத்த² அனுபவிஸித்வா நிஸீத³னசித்தேன த³ட்ட²ப்³ப³ங்.
‘‘Sabhojane’’ti bāhiratthasamāsoyaṃ, ubhasadde ukārassa ca lopoti āha ‘‘saha ubhohi janehī’’tiādi. Tattha ubhohi janehīti jāyā ca pati cāti ubhohi janehi. Bhuñjitabbanti vā bhojanaṃ, itthī ca puriso ca, tena saha vattatīti sabhojananti āha ‘‘atha vā’’tiādi. Rāgapariyuṭṭhitassāti methunādhippāyassa. Sayanigharanti sayanīyagharaṃ, vāsagehanti attho. Mahallakassāti mahallakassa sayanigharassa. Piṭṭhasaṅghāṭatoti dvārabāhato khuddakassavāti yathā tathā vā katassa khuddakassa sayanigharassa. Vemajjhaṃ atikkamitvā nisīdeyyāti piṭṭhivaṃsaṃ atikkamitvā nisīdeyya. Khuddakaṃ (sārattha. ṭī. pācittiya 3.280) nāma sayanigharaṃ vitthārato pañcahatthappamāṇaṃ hoti, tassa ca majjhimaṭṭhānaṃ piṭṭhasaṅghāṭato aḍḍhateyyahatthappamāṇameva hoti, tasmā tādise sayanighare piṭṭhasaṅghāṭato hatthapāsaṃ vijahitvā nisinno piṭṭhivaṃsaṃ atikkamitvā nisinno nāma hoti. Evaṃ nisinno ca vemajjhaṃ atikkamitvā nisinno nāma hoti. Tena vuttaṃ pāḷiyaṃ ‘‘piṭṭhivaṃsaṃ atikkamitvā nisīdatī’’ti (pāci. 281). Sacittakañcettha anupavisitvā nisīdanacittena daṭṭhabbaṃ.
ஸபோ⁴ஜனஸிக்கா²பத³வண்ணனா நிட்டி²தா.
Sabhojanasikkhāpadavaṇṇanā niṭṭhitā.
