| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၃. သဘောဇနသိက္ခာပဒဝဏ္ဏနာ
3. Sabhojanasikkhāpadavaṇṇanā
၂၇၉. တတိယသိက္ခာပဒေ – သယနိဃရေတိ သယနိယဃရေ။ ယတော အယ္ယသ္သ ဘိက္ခာ ဒိန္နာတိ ယသ္မာ ဘိက္ခာ ဒိန္နာ, ယံ အာဂတေန လဒ္ဓဗ္ဗံ တံ ဝော လဒ္ဓံ; ဂစ္ဆထာတိ အဓိပ္ပာယော။ ပရိယုဋ္ဌိတောတိ ရာဂပရိယုဋ္ဌိတော; မေထုနာဓိပ္ပာယောတိ အတ္ထော။
279. Tatiyasikkhāpade – sayanighareti sayaniyaghare. Yato ayyassa bhikkhā dinnāti yasmā bhikkhā dinnā, yaṃ āgatena laddhabbaṃ taṃ vo laddhaṃ; gacchathāti adhippāyo. Pariyuṭṭhitoti rāgapariyuṭṭhito; methunādhippāyoti attho.
၂၈၀. သဟ ဥဘောဟိ ဇနေဟီတိ သဘောဇနံ; တသ္မိံ သဘောဇနေ။ အထ ဝာ သဘောဇနေတိ သဘောဂေ။ ရာဂပရိယုဋ္ဌိတသ္သ ဟိ ပုရိသသ္သ ဣတ္ထီ ဘောဂော ဣတ္ထိယာ စ ပုရိသော။ တေနေဝသ္သ ပဒဘာဇနေ – ‘‘ဣတ္ထီ စေဝ ဟောတိ ပုရိသော စာ’’တိအာဒိ ဝုတ္တံ။ မဟလ္လကေ ဃရေတိ မဟလ္လကေ သယနိဃရေ။ ပိဋ္ဌသင္ဃာဋသ္သ ဟတ္ထပာသံ ဝိဇဟိတ္ဝာတိ တသ္သ သယနိဃရေ ဂဗ္ဘသ္သ ယော ပိဋ္ဌသင္ဃာဋော, တသ္သ ဟတ္ထပာသံ ဝိဇဟိတ္ဝာ; အန္တောသယနသ္သ အာသန္နေ ဌာနေ နိသီဒတီတိ အတ္ထော။ ဤဒိသဉ္စ သယနိဃရံ မဟာစတုသ္သာလာဒီသု ဟောတိ။ ပိဋ္ဌိဝံသံ အတိက္ကမိတ္ဝာတိ ဣမိနာ မဇ္ဈာတိက္ကမံ ဒသ္သေတိ။ တသ္မာ ယထာ ဝာ တထာ ဝာ ကတသ္သ ခုဒ္ဒကသ္သ သယနိဃရသ္သ မဇ္ဈာတိက္ကမေ အာပတ္တိ ဝေဒိတဗ္ဗာ။ သေသမေတ္ထ ဥတ္တာနမေဝ။
280. Saha ubhohi janehīti sabhojanaṃ; tasmiṃ sabhojane. Atha vā sabhojaneti sabhoge. Rāgapariyuṭṭhitassa hi purisassa itthī bhogo itthiyā ca puriso. Tenevassa padabhājane – ‘‘itthī ceva hoti puriso cā’’tiādi vuttaṃ. Mahallake ghareti mahallake sayanighare. Piṭṭhasaṅghāṭassa hatthapāsaṃ vijahitvāti tassa sayanighare gabbhassa yo piṭṭhasaṅghāṭo, tassa hatthapāsaṃ vijahitvā; antosayanassa āsanne ṭhāne nisīdatīti attho. Īdisañca sayanigharaṃ mahācatussālādīsu hoti. Piṭṭhivaṃsaṃ atikkamitvāti iminā majjhātikkamaṃ dasseti. Tasmā yathā vā tathā vā katassa khuddakassa sayanigharassa majjhātikkame āpatti veditabbā. Sesamettha uttānameva.
ပဌမပာရာဇိကသမုဋ္ဌာနံ – ကိရိယံ, သညာဝိမောက္ခံ, သစိတ္တကံ, လောကဝဇ္ဇံ, ကာယကမ္မံ, အကုသလစိတ္တံ, ဒ္ဝိဝေဒနန္တိ။
Paṭhamapārājikasamuṭṭhānaṃ – kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, akusalacittaṃ, dvivedananti.
သဘောဇနသိက္ခာပဒံ တတိယံ။
Sabhojanasikkhāpadaṃ tatiyaṃ.
၂၈၄. စတုတ္ထပဉ္စမသိက္ခာပဒေသု ယံ ဝတ္တဗ္ဗံ သိယာ, တံ သဗ္ဗံ အနိယတဒ္ဝယေ ဝုတ္တနယမေဝ။ ယထာ စ သဘောဇနသိက္ခာပဒံ , ဧဝမေတာနိပိ ပဌမပာရာဇိကသမုဋ္ဌာနာနေဝာတိ။
284. Catutthapañcamasikkhāpadesu yaṃ vattabbaṃ siyā, taṃ sabbaṃ aniyatadvaye vuttanayameva. Yathā ca sabhojanasikkhāpadaṃ , evametānipi paṭhamapārājikasamuṭṭhānānevāti.
ရဟောပဋိစ္ဆန္နသိက္ခာပဒံ စတုတ္ထံ, ရဟောနိသဇ္ဇသိက္ခာပဒံ ပဉ္စမံ။
Rahopaṭicchannasikkhāpadaṃ catutthaṃ, rahonisajjasikkhāpadaṃ pañcamaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၅. အစေလကဝဂ္ဂော • 5. Acelakavaggo
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၃. သဘောဇနသိက္ခာပဒဝဏ္ဏနာ • 3. Sabhojanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā
၃. သဘောဇနသိက္ခာပဒဝဏ္ဏနာ • 3. Sabhojanasikkhāpadavaṇṇanā
၄. ရဟောပဋိစ္ဆန္နသိက္ခာပဒဝဏ္ဏနာ • 4. Rahopaṭicchannasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၃. သဘောဇနသိက္ခာပဒဝဏ္ဏနာ • 3. Sabhojanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၃. သဘောဇနသိက္ခာပဒံ • 3. Sabhojanasikkhāpadaṃ
