| Library / Tipiṭaka / ཏིཔིཊཀ • Tipiṭaka / ཨིཏིཝུཏྟཀཔཱལི༹ • Itivuttakapāḷi |
༧. སབྲཧྨཀསུཏྟཾ
7. Sabrahmakasuttaṃ
༡༠༦. ཝུཏྟཉྷེཏཾ བྷགཝཏཱ, ཝུཏྟམརཧཏཱཏི མེ སུཏཾ –
106. Vuttañhetaṃ bhagavatā, vuttamarahatāti me sutaṃ –
‘‘སབྲཧྨཀཱནི, བྷིཀྑཝེ, ཏཱནི ཀུལཱནི ཡེསཾ པུཏྟཱནཾ མཱཏཱཔིཏརོ ཨཛ྄ཛྷཱགཱརེ པཱུཛིཏཱ ཧོནྟི། སཔུབྦདེཝཏཱནི , བྷིཀྑཝེ, ཏཱནི ཀུལཱནི ཡེསཾ པུཏྟཱནཾ མཱཏཱཔིཏརོ ཨཛ྄ཛྷཱགཱརེ པཱུཛིཏཱ ཧོནྟི། སཔུབྦཱཙརིཡཀཱནི, བྷིཀྑཝེ, ཏཱནི ཀུལཱནི ཡེསཾ པུཏྟཱནཾ མཱཏཱཔིཏརོ ཨཛ྄ཛྷཱགཱརེ པཱུཛིཏཱ ཧོནྟི། སཱཧུནེཡྻཀཱནི, བྷིཀྑཝེ, ཏཱནི ཀུལཱནི ཡེསཾ པུཏྟཱནཾ མཱཏཱཔིཏརོ ཨཛ྄ཛྷཱགཱརེ པཱུཛིཏཱ ཧོནྟི།
‘‘Sabrahmakāni, bhikkhave, tāni kulāni yesaṃ puttānaṃ mātāpitaro ajjhāgāre pūjitā honti. Sapubbadevatāni , bhikkhave, tāni kulāni yesaṃ puttānaṃ mātāpitaro ajjhāgāre pūjitā honti. Sapubbācariyakāni, bhikkhave, tāni kulāni yesaṃ puttānaṃ mātāpitaro ajjhāgāre pūjitā honti. Sāhuneyyakāni, bhikkhave, tāni kulāni yesaṃ puttānaṃ mātāpitaro ajjhāgāre pūjitā honti.
‘‘‘བྲཧྨཱ’ཏི, བྷིཀྑཝེ, མཱཏཱཔིཏཱུནཾ ཨེཏཾ ཨདྷིཝཙནཾ། ‘པུབྦདེཝཏཱ’ཏི, བྷིཀྑཝེ, མཱཏཱཔིཏཱུནཾ ཨེཏཾ ཨདྷིཝཙནཾ། ‘པུབྦཱཙརིཡཱ’ཏི, བྷིཀྑཝེ, མཱཏཱཔིཏཱུནཾ ཨེཏཾ ཨདྷིཝཙནཾ། ‘ཨཱཧུནེཡྻཱ’ཏི, བྷིཀྑཝེ, མཱཏཱཔིཏཱུནཾ ཨེཏཾ ཨདྷིཝཙནཾ། ཏཾ ཀིསྶ ཧེཏུ? བཧུཀཱརཱ, བྷིཀྑཝེ, མཱཏཱཔིཏརོ པུཏྟཱནཾ ཨཱཔཱདཀཱ པོསཀཱ ཨིམསྶ ལོཀསྶ དསྶེཏཱརོ’’ཏི། ཨེཏམཏྠཾ བྷགཝཱ ཨཝོཙ། ཏཏྠེཏཾ ཨིཏི ཝུཙྩཏི –
‘‘‘Brahmā’ti, bhikkhave, mātāpitūnaṃ etaṃ adhivacanaṃ. ‘Pubbadevatā’ti, bhikkhave, mātāpitūnaṃ etaṃ adhivacanaṃ. ‘Pubbācariyā’ti, bhikkhave, mātāpitūnaṃ etaṃ adhivacanaṃ. ‘Āhuneyyā’ti, bhikkhave, mātāpitūnaṃ etaṃ adhivacanaṃ. Taṃ kissa hetu? Bahukārā, bhikkhave, mātāpitaro puttānaṃ āpādakā posakā imassa lokassa dassetāro’’ti. Etamatthaṃ bhagavā avoca. Tatthetaṃ iti vuccati –
‘‘བྲཧྨཱཏི མཱཏཱཔིཏརོ, པུབྦཱཙརིཡཱཏི ཝུཙྩརེ།
‘‘Brahmāti mātāpitaro, pubbācariyāti vuccare;
ཨཱཧུནེཡྻཱ ཙ པུཏྟཱནཾ, པཛཱཡ ཨནུཀམྤཀཱ༎
Āhuneyyā ca puttānaṃ, pajāya anukampakā.
‘‘ཏསྨཱ ཧི ནེ ནམསྶེཡྻ, སཀྐརེཡྻ ཙ པཎྜིཏོ།
‘‘Tasmā hi ne namasseyya, sakkareyya ca paṇḍito;
ཨནྣེན ཨཐ པཱནེན, ཝཏྠེན སཡནེན ཙ།
Annena atha pānena, vatthena sayanena ca;
‘‘ཏཱཡ ནཾ པཱརིཙརིཡཱཡ, མཱཏཱཔིཏཱུསུ པཎྜིཏཱ།
‘‘Tāya naṃ pāricariyāya, mātāpitūsu paṇḍitā;
ཨིདྷེཝ ནཾ པསཾསནྟི, པེཙྩ སགྒེ པམོདཏཱི’’ཏི༎
Idheva naṃ pasaṃsanti, pecca sagge pamodatī’’ti.
ཨཡམྤི ཨཏྠོ ཝུཏྟོ བྷགཝཏཱ, ཨིཏི མེ སུཏནྟི། སཏྟམཾ།
Ayampi attho vutto bhagavatā, iti me sutanti. Sattamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ཨིཏིཝུཏྟཀ-ཨཊྛཀཐཱ • Itivuttaka-aṭṭhakathā / ༧. སབྲཧྨཀསུཏྟཝཎྞནཱ • 7. Sabrahmakasuttavaṇṇanā
