| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. தே³வதூ³தவக்³கோ³
4. Devadūtavaggo
1. ஸப்³ரஹ்மகஸுத்தவண்ணனா
1. Sabrahmakasuttavaṇṇanā
31. சதுத்த²ஸ்ஸ பட²மே ஸப்³ரஹ்மகானீதி ஸஸெட்ட²கானி. யேஸந்தி யேஸங் குலானங். புத்தானந்தி புத்தேஹி. பூஜிதஸத்³த³யோகே³ன ஹி இத³ங் கரணத்தே² ஸாமிவசனங். தேனாதி ஆஹாராதி³னா. படிஜக்³கி³தா கோ³பிதாதி யதா²காலங் தஸ்ஸ தஸ்ஸ தா³தப்³ப³ஸ்ஸ தா³னேன வெய்யாவச்சஸ்ஸ ச கரணேன படிஜக்³கி³தா சேவ உப்பன்னானத்த²ப்பஹரணேன கோ³பிதா ச ஹொந்தி. தேஸந்தி மாதாபிதூனங். ப்³ரஹ்மாதி³பா⁴வஸாத⁴னத்த²ந்தி தேஸங் கு³ணானங் அத்தி²தாய லோகே ப்³ரஹ்மா நாம வுச்சதி, ஆசரியோ நாம வுச்சதி, ஆஹுனெய்யோ நாம வுச்சதி, தே மாதாபிதூனங் புத்தகங் படிலப⁴ந்தீதி த³ஸ்ஸனவஸேன நேஸங் ப்³ரஹ்மாதி³பா⁴வஸாத⁴னத்த²ங் ‘‘ப³ஹுகாரா’’தி, வத்வா தங் தேஸங் ப³ஹுகாரதங் நானாகாரதோ த³ஸ்ஸேதுங் ‘‘ஆபாத³கா’’திஆதி³ வுத்தங். மாதாபிதரோ ஹி புத்தானங் ஜீவிதஸ்ஸ ஆபாத³கா, ஸரீரஸ்ஸ போஸகா, ஆசாரஸமாசாரானங் ஸிக்கா²பகா ஸகலஸ்ஸபி இமஸ்ஸ லோகஸ்ஸ த³ஸ்ஸேதாரோ. தேனாஹ ‘‘புத்தானங் ஹீ’’திஆதி³. இட்டா²ரம்மணங் தாவ தே த³ஸ்ஸெந்து, அனிட்டா²ரம்மணங் கத²ந்தி? தம்பி த³ஸ்ஸேதப்³ப³மேவ வஜ்ஜனீயபா⁴வஜானாபனத்த²ங்.
31. Catutthassa paṭhame sabrahmakānīti saseṭṭhakāni. Yesanti yesaṃ kulānaṃ. Puttānanti puttehi. Pūjitasaddayogena hi idaṃ karaṇatthe sāmivacanaṃ. Tenāti āhārādinā. Paṭijaggitā gopitāti yathākālaṃ tassa tassa dātabbassa dānena veyyāvaccassa ca karaṇena paṭijaggitā ceva uppannānatthappaharaṇena gopitā ca honti. Tesanti mātāpitūnaṃ. Brahmādibhāvasādhanatthanti tesaṃ guṇānaṃ atthitāya loke brahmā nāma vuccati, ācariyo nāma vuccati, āhuneyyo nāma vuccati, te mātāpitūnaṃ puttakaṃ paṭilabhantīti dassanavasena nesaṃ brahmādibhāvasādhanatthaṃ ‘‘bahukārā’’ti, vatvā taṃ tesaṃ bahukārataṃ nānākārato dassetuṃ ‘‘āpādakā’’tiādi vuttaṃ. Mātāpitaro hi puttānaṃ jīvitassa āpādakā, sarīrassa posakā, ācārasamācārānaṃ sikkhāpakā sakalassapi imassa lokassa dassetāro. Tenāha ‘‘puttānaṃ hī’’tiādi. Iṭṭhārammaṇaṃ tāva te dassentu, aniṭṭhārammaṇaṃ kathanti? Tampi dassetabbameva vajjanīyabhāvajānāpanatthaṃ.
அவிஜஹிதா ஹொந்தீதி தாஸங் பா⁴வனாய ப்³ரஹ்மானங் ப்³ரஹ்மலோகே உப்பன்னத்தா அவிஜஹிதா ஹொந்தி பா⁴வனா. லோப⁴னீயவயஸ்மிங் பட²மயொப்³ப³னே அதிவிய முது³பா⁴வப்பத்தத³ஸ்ஸனத்த²ங் ஸதவிஹதக்³க³ஹணங். பாடியேக்கந்தி விஸுங். இமினா காரணேனாதி இமினா யதா²வுத்தேன புத்தேஸு பவத்திதேஹி அதிக்கமேன மெத்தாதி³ஸமுப்பத்திஸங்கா²தேன காரணேன.
Avijahitā hontīti tāsaṃ bhāvanāya brahmānaṃ brahmaloke uppannattā avijahitā honti bhāvanā. Lobhanīyavayasmiṃ paṭhamayobbane ativiya mudubhāvappattadassanatthaṃ satavihataggahaṇaṃ. Pāṭiyekkanti visuṃ. Iminā kāraṇenāti iminā yathāvuttena puttesu pavattitehi atikkamena mettādisamuppattisaṅkhātena kāraṇena.
த²ருஸிப்பந்தி அஸிஸத்திகுந்தகலாபாதி³ஆயுத⁴ஸிப்பங். முத்³தா³க³ணனாதி அங்கு³லிஸங்கோசனாதி³னா ஹத்த²முத்³தா³ய க³ணனா. ஆதி³ஸத்³தே³ன பாணாதீ³னங் ஸங்க³ஹோ. பச்சா²சரியா நாம மாதாபிதூனங் ஸந்திகே உக்³க³ஹிதக³ஹட்ட²வத்தஸ்ஸேவ புக்³க³லஸ்ஸ யதா²ஸகங் ஹத்தா²சரியாதீ³னங் ஸிப்பக்³கா³ஹாபனந்தி கத்வா ஸப்³ப³பட²மங் ஆசரியா நாமாதி யோஜேதப்³ப³ங். ஆனீய ஹுதங் ஆஹுதங். பகாரேஹி ஹுதங் பாஹுதங். அபி⁴ஸங்க²தந்தி தஸ்ஸேவ வேவசனங்.
Tharusippanti asisattikuntakalāpādiāyudhasippaṃ. Muddāgaṇanāti aṅgulisaṃkocanādinā hatthamuddāya gaṇanā. Ādisaddena pāṇādīnaṃ saṅgaho. Pacchācariyā nāma mātāpitūnaṃ santike uggahitagahaṭṭhavattasseva puggalassa yathāsakaṃ hatthācariyādīnaṃ sippaggāhāpananti katvā sabbapaṭhamaṃ ācariyā nāmāti yojetabbaṃ. Ānīya hutaṃ āhutaṃ. Pakārehi hutaṃ pāhutaṃ. Abhisaṅkhatanti tasseva vevacanaṃ.
நமோ கரெய்யாதி ஸாயங் பாதங் உபட்டா²னங் க³ந்த்வா ‘‘இத³ங் மய்ஹங் உத்தமபுஞ்ஞக்கெ²த்த’’ந்தி நமக்காரங் கரெய்ய. தாய நங் பாரிசரியாயாதி எத்த² நந்தி நிபாதமத்தங், யதா²வுத்தபரிசரணேனாதி அத்தோ² . அத² வா பாரிசரியாயாதி ப⁴ரணகிச்சகரணகுலவங்ஸப்பதிட்டா²னாபனாதி³னா பஞ்சவித⁴உபட்டா²னேன. வுத்தஞ்ஹேதங் –
Namo kareyyāti sāyaṃ pātaṃ upaṭṭhānaṃ gantvā ‘‘idaṃ mayhaṃ uttamapuññakkhetta’’nti namakkāraṃ kareyya. Tāya naṃ pāricariyāyāti ettha nanti nipātamattaṃ, yathāvuttaparicaraṇenāti attho . Atha vā pāricariyāyāti bharaṇakiccakaraṇakulavaṃsappatiṭṭhānāpanādinā pañcavidhaupaṭṭhānena. Vuttañhetaṃ –
‘‘பஞ்சஹி கோ², க³ஹபதிபுத்த, டா²னேஹி புத்தேன புரத்தி²மா தி³ஸா மாதாபிதரோ பச்சுபட்டா²தப்³பா³ – ‘ப⁴தோ நேஸங் ப⁴ரிஸ்ஸாமி, கிச்சங் நேஸங் கரிஸ்ஸாமி, குலவங்ஸங் ட²பெஸ்ஸாமி, தா³யஜ்ஜங் படிபஜ்ஜாமி, அத² வா பன பேதானங் காலகதானங் த³க்கி²ணங் அனுப்பத³ஸ்ஸாமீ’தி. இமேஹி கோ², க³ஹபதிபுத்த, பஞ்சஹி டா²னேஹி புத்தேன புரத்தி²மா தி³ஸா மாதாபிதரோ பச்சுபட்டி²தா பஞ்சஹி டா²னேஹி புத்தங் அனுகம்பந்தி, பாபா நிவாரெந்தி, கல்யாணே நிவேஸெந்தி, ஸிப்பங் ஸிக்கா²பெந்தி, பதிரூபேன தா³ரேன ஸங்யோஜெந்தி, ஸமயே தா³யஜ்ஜங் நிய்யாதெ³ந்தீ’’தி (தீ³॰ நி॰ 3.267).
‘‘Pañcahi kho, gahapatiputta, ṭhānehi puttena puratthimā disā mātāpitaro paccupaṭṭhātabbā – ‘bhato nesaṃ bharissāmi, kiccaṃ nesaṃ karissāmi, kulavaṃsaṃ ṭhapessāmi, dāyajjaṃ paṭipajjāmi, atha vā pana petānaṃ kālakatānaṃ dakkhiṇaṃ anuppadassāmī’ti. Imehi kho, gahapatiputta, pañcahi ṭhānehi puttena puratthimā disā mātāpitaro paccupaṭṭhitā pañcahi ṭhānehi puttaṃ anukampanti, pāpā nivārenti, kalyāṇe nivesenti, sippaṃ sikkhāpenti, patirūpena dārena saṃyojenti, samaye dāyajjaṃ niyyādentī’’ti (dī. ni. 3.267).
அபிச யோ மாதாபிதரோ தீஸு வத்தூ²ஸு அபி⁴ப்பஸன்னே கத்வா ஸீலேஸு வா பதிட்டா²பெத்வா பப்³ப³ஜ்ஜாய வா நியோஜெத்வா உபட்ட²ஹதி, அயங் மாதாபிதூபட்டா²கானங் அக்³கோ³தி வேதி³தப்³போ³. ஸா பனாயங் பாரிசரியா புத்தஸ்ஸ உப⁴யலோகஹிதஸுகா²வஹாதி தங் த³ஸ்ஸேதுங் ‘‘இதே⁴வ நங் பஸங்ஸந்தி, பேச்ச ஸக்³கே³ பமோத³தீ’’தி வுத்தங். பஸங்ஸந்தீதி ‘‘அயங் புக்³க³லோ மத்தெய்யோ பெத்தெய்யோ ஸக்³க³ஸங்வத்தனியங் படிபத³ங் பூரேதீ’’தி இதே⁴வ நங் பஸங்ஸந்தி. ஆமோத³தி ஆதி³தோ பட்டா²ய மோத³ப்பத்தியா. பமோத³தி நானப்பகாரமோத³ஸம்பவத்தியா.
Apica yo mātāpitaro tīsu vatthūsu abhippasanne katvā sīlesu vā patiṭṭhāpetvā pabbajjāya vā niyojetvā upaṭṭhahati, ayaṃ mātāpitūpaṭṭhākānaṃ aggoti veditabbo. Sā panāyaṃ pāricariyā puttassa ubhayalokahitasukhāvahāti taṃ dassetuṃ ‘‘idheva naṃ pasaṃsanti, pecca sagge pamodatī’’ti vuttaṃ. Pasaṃsantīti ‘‘ayaṃ puggalo matteyyo petteyyo saggasaṃvattaniyaṃ paṭipadaṃ pūretī’’ti idheva naṃ pasaṃsanti. Āmodati ādito paṭṭhāya modappattiyā. Pamodati nānappakāramodasampavattiyā.
ஸப்³ரஹ்மகஸுத்தவண்ணனா நிட்டி²தா.
Sabrahmakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1.ஸப்³ரஹ்மகஸுத்தங் • 1. Sabrahmakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. ஸப்³ரஹ்மகஸுத்தவண்ணனா • 1. Sabrahmakasuttavaṇṇanā
