| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៦. ឆដ្ឋវគ្គោ
6. Chaṭṭhavaggo
(៥៥) ៣. សច្ចកថា
(55) 3. Saccakathā
៤៥២. ចត្តារិ សច្ចានិ អសង្ខតានីតិ? អាមន្តា។ ចត្តារិ តាណានិ ចត្តារិ លេណានិ ចត្តារិ សរណានិ ចត្តារិ បរាយនានិ ចត្តារិ អច្ចុតានិ ចត្តារិ អមតានិ ចត្តារិ និព្ពានានីតិ? ន ហេវំ វត្តព្ពេ…បេ.… ចត្តារិ និព្ពានានីតិ? អាមន្តា។ អត្ថិ ចតុន្នំ និព្ពានានំ ឧច្ចនីចតា ហីនបណីតតា ឧក្កំសាវកំសោ សីមា វា ភេទោ វា រាជិ វា អន្តរិកា វាតិ? ន ហេវំ វត្តព្ពេ…បេ.…។
452. Cattāri saccāni asaṅkhatānīti? Āmantā. Cattāri tāṇāni cattāri leṇāni cattāri saraṇāni cattāri parāyanāni cattāri accutāni cattāri amatāni cattāri nibbānānīti? Na hevaṃ vattabbe…pe… cattāri nibbānānīti? Āmantā. Atthi catunnaṃ nibbānānaṃ uccanīcatā hīnapaṇītatā ukkaṃsāvakaṃso sīmā vā bhedo vā rāji vā antarikā vāti? Na hevaṃ vattabbe…pe….
ទុក្ខសច្ចំ អសង្ខតន្តិ? អាមន្តា ។ ទុក្ខំ អសង្ខតន្តិ? ន ហេវំ វត្តព្ពេ…បេ.… ទុក្ខសច្ចំ អសង្ខតន្តិ? អាមន្តា។ កាយិកំ ទុក្ខំ ចេតសិកំ ទុក្ខំ សោកបរិទេវទុក្ខទោមនស្សឧបាយាសា អសង្ខតាតិ? ន ហេវំ វត្តព្ពេ…បេ.… សមុទយសច្ចំ អសង្ខតន្តិ? អាមន្តា។ សមុទយោ អសង្ខតោតិ? ន ហេវំ វត្តព្ពេ…បេ.… សមុទយសច្ចំ អសង្ខតន្តិ? អាមន្តា។ កាមតណ្ហា ភវតណ្ហា វិភវតណ្ហា អសង្ខតាតិ? ន ហេវំ វត្តព្ពេ…បេ.… មគ្គសច្ចំ អសង្ខតន្តិ? អាមន្តា។ មគ្គោ អសង្ខតោតិ? ន ហេវំ វត្តព្ពេ…បេ.… មគ្គសច្ចំ អសង្ខតន្តិ? អាមន្តា។ សម្មាទិដ្ឋិ…បេ.… សម្មាសមាធិ អសង្ខតោតិ? ន ហេវំ វត្តព្ពេ…បេ.…។
Dukkhasaccaṃ asaṅkhatanti? Āmantā . Dukkhaṃ asaṅkhatanti? Na hevaṃ vattabbe…pe… dukkhasaccaṃ asaṅkhatanti? Āmantā. Kāyikaṃ dukkhaṃ cetasikaṃ dukkhaṃ sokaparidevadukkhadomanassaupāyāsā asaṅkhatāti? Na hevaṃ vattabbe…pe… samudayasaccaṃ asaṅkhatanti? Āmantā. Samudayo asaṅkhatoti? Na hevaṃ vattabbe…pe… samudayasaccaṃ asaṅkhatanti? Āmantā. Kāmataṇhā bhavataṇhā vibhavataṇhā asaṅkhatāti? Na hevaṃ vattabbe…pe… maggasaccaṃ asaṅkhatanti? Āmantā. Maggo asaṅkhatoti? Na hevaṃ vattabbe…pe… maggasaccaṃ asaṅkhatanti? Āmantā. Sammādiṭṭhi…pe… sammāsamādhi asaṅkhatoti? Na hevaṃ vattabbe…pe….
ទុក្ខំ សង្ខតន្តិ? អាមន្តា។ ទុក្ខសច្ចំ សង្ខតន្តិ? ន ហេវំ វត្តព្ពេ…បេ.… កាយិកំ ទុក្ខំ ចេតសិកំ ទុក្ខំ សោកបរិទេវទុក្ខទោមនស្សឧបាយាសា សង្ខតាតិ? អាមន្តា។ ទុក្ខសច្ចំ សង្ខតន្តិ? ន ហេវំ វត្តព្ពេ…បេ.… សមុទយោ សង្ខតោតិ? អាមន្តា។ សមុទយសច្ចំ សង្ខតន្តិ? ន ហេវំ វត្តព្ពេ…បេ.… កាមតណ្ហា ភវតណ្ហា វិភវតណ្ហា សង្ខតាតិ? អាមន្តា ។ សមុទយសច្ចំ សង្ខតន្តិ? ន ហេវំ វត្តព្ពេ…បេ.… មគ្គោ សង្ខតោតិ? អាមន្តា។ មគ្គសច្ចំ សង្ខតន្តិ? ន ហេវំ វត្តព្ពេ…បេ.… សម្មាទិដ្ឋិ…បេ.… សម្មាសមាធិ សង្ខតោតិ? អាមន្តា។ មគ្គសច្ចំ សង្ខតន្តិ? ន ហេវំ វត្តព្ពេ…បេ.…។
Dukkhaṃ saṅkhatanti? Āmantā. Dukkhasaccaṃ saṅkhatanti? Na hevaṃ vattabbe…pe… kāyikaṃ dukkhaṃ cetasikaṃ dukkhaṃ sokaparidevadukkhadomanassaupāyāsā saṅkhatāti? Āmantā. Dukkhasaccaṃ saṅkhatanti? Na hevaṃ vattabbe…pe… samudayo saṅkhatoti? Āmantā. Samudayasaccaṃ saṅkhatanti? Na hevaṃ vattabbe…pe… kāmataṇhā bhavataṇhā vibhavataṇhā saṅkhatāti? Āmantā . Samudayasaccaṃ saṅkhatanti? Na hevaṃ vattabbe…pe… maggo saṅkhatoti? Āmantā. Maggasaccaṃ saṅkhatanti? Na hevaṃ vattabbe…pe… sammādiṭṭhi…pe… sammāsamādhi saṅkhatoti? Āmantā. Maggasaccaṃ saṅkhatanti? Na hevaṃ vattabbe…pe….
៤៥៣. និរោធសច្ចំ អសង្ខតំ, និរោធោ អសង្ខតោតិ? អាមន្តា។ ទុក្ខសច្ចំ អសង្ខតំ, ទុក្ខំ អសង្ខតន្តិ? ន ហេវំ វត្តព្ពេ…បេ.… និរោធសច្ចំ អសង្ខតំ, និរោធោ អសង្ខតោតិ? អាមន្តា។ សមុទយសច្ចំ អសង្ខតំ, សមុទយោ អសង្ខតោតិ? ន ហេវំ វត្តព្ពេ…បេ.… និរោធសច្ចំ អសង្ខតំ, និរោធោ អសង្ខតោតិ? អាមន្តា។ មគ្គសច្ចំ អសង្ខតំ, មគ្គោ អសង្ខតោតិ? ន ហេវំ វត្តព្ពេ…បេ.…។
453. Nirodhasaccaṃ asaṅkhataṃ, nirodho asaṅkhatoti? Āmantā. Dukkhasaccaṃ asaṅkhataṃ, dukkhaṃ asaṅkhatanti? Na hevaṃ vattabbe…pe… nirodhasaccaṃ asaṅkhataṃ, nirodho asaṅkhatoti? Āmantā. Samudayasaccaṃ asaṅkhataṃ, samudayo asaṅkhatoti? Na hevaṃ vattabbe…pe… nirodhasaccaṃ asaṅkhataṃ, nirodho asaṅkhatoti? Āmantā. Maggasaccaṃ asaṅkhataṃ, maggo asaṅkhatoti? Na hevaṃ vattabbe…pe….
ទុក្ខសច្ចំ អសង្ខតំ, ទុក្ខំ សង្ខតន្តិ? អាមន្តា។ និរោធសច្ចំ អសង្ខតំ, និរោធោ សង្ខតោតិ? ន ហេវំ វត្តព្ពេ…បេ.… សមុទយសច្ចំ អសង្ខតំ, សមុទយោ សង្ខតោតិ? អាមន្តា។ និរោធសច្ចំ អសង្ខតំ, និរោធោ សង្ខតោតិ? ន ហេវំ វត្តព្ពេ…បេ.… មគ្គសច្ចំ អសង្ខតំ, មគ្គោ សង្ខតោតិ? អាមន្តា។ និរោធសច្ចំ អសង្ខតំ, និរោធោ សង្ខតោតិ? ន ហេវំ វត្តព្ពេ…បេ.…។
Dukkhasaccaṃ asaṅkhataṃ, dukkhaṃ saṅkhatanti? Āmantā. Nirodhasaccaṃ asaṅkhataṃ, nirodho saṅkhatoti? Na hevaṃ vattabbe…pe… samudayasaccaṃ asaṅkhataṃ, samudayo saṅkhatoti? Āmantā. Nirodhasaccaṃ asaṅkhataṃ, nirodho saṅkhatoti? Na hevaṃ vattabbe…pe… maggasaccaṃ asaṅkhataṃ, maggo saṅkhatoti? Āmantā. Nirodhasaccaṃ asaṅkhataṃ, nirodho saṅkhatoti? Na hevaṃ vattabbe…pe….
៤៥៤. ន វត្តព្ពំ – ‘‘ចត្តារិ សច្ចានិ អសង្ខតានី’’តិ? អាមន្តា ។ ននុ វុត្តំ ភគវតា – ‘‘ចត្តារិមានិ, ភិក្ខវេ, តថានិ អវិតថានិ អនញ្ញថានិ! កតមានិ ចត្តារិ? ‘ឥទំ ទុក្ខ’ន្តិ, ភិក្ខវេ, តថមេតំ អវិតថមេតំ អនញ្ញថមេតំ…បេ.… ‘អយំ ទុក្ខសមុទយោ’តិ…បេ.… ‘អយំ ទុក្ខនិរោធោ’តិ…បេ.… ‘អយំ ទុក្ខនិរោធគាមិនី បដិបទា’តិ តថមេតំ អវិតថមេតំ អនញ្ញថមេតំ។ ឥមានិ ខោ, ភិក្ខវេ, ចត្តារិ តថានិ អវិតថានិ អនញ្ញថានី’’តិ 1។ អត្ថេវ សុត្តន្តោតិ? អាមន្តា។ តេន ហិ ចត្តារិ សច្ចានិ អសង្ខតានីតិ។
454. Na vattabbaṃ – ‘‘cattāri saccāni asaṅkhatānī’’ti? Āmantā . Nanu vuttaṃ bhagavatā – ‘‘cattārimāni, bhikkhave, tathāni avitathāni anaññathāni! Katamāni cattāri? ‘Idaṃ dukkha’nti, bhikkhave, tathametaṃ avitathametaṃ anaññathametaṃ…pe… ‘ayaṃ dukkhasamudayo’ti…pe… ‘ayaṃ dukkhanirodho’ti…pe… ‘ayaṃ dukkhanirodhagāminī paṭipadā’ti tathametaṃ avitathametaṃ anaññathametaṃ. Imāni kho, bhikkhave, cattāri tathāni avitathāni anaññathānī’’ti 2. Attheva suttantoti? Āmantā. Tena hi cattāri saccāni asaṅkhatānīti.
សច្ចកថា និដ្ឋិតា។
Saccakathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៣. សច្ចកថាវណ្ណនា • 3. Saccakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៣. សច្ចកថាវណ្ណនា • 3. Saccakathāvaṇṇanā
