| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൬. ഛട്ഠവഗ്ഗോ
6. Chaṭṭhavaggo
(൫൫) ൩. സച്ചകഥാ
(55) 3. Saccakathā
൪൫൨. ചത്താരി സച്ചാനി അസങ്ഖതാനീതി? ആമന്താ. ചത്താരി താണാനി ചത്താരി ലേണാനി ചത്താരി സരണാനി ചത്താരി പരായനാനി ചത്താരി അച്ചുതാനി ചത്താരി അമതാനി ചത്താരി നിബ്ബാനാനീതി? ന ഹേവം വത്തബ്ബേ…പേ॰… ചത്താരി നിബ്ബാനാനീതി? ആമന്താ. അത്ഥി ചതുന്നം നിബ്ബാനാനം ഉച്ചനീചതാ ഹീനപണീതതാ ഉക്കംസാവകംസോ സീമാ വാ ഭേദോ വാ രാജി വാ അന്തരികാ വാതി? ന ഹേവം വത്തബ്ബേ…പേ॰….
452. Cattāri saccāni asaṅkhatānīti? Āmantā. Cattāri tāṇāni cattāri leṇāni cattāri saraṇāni cattāri parāyanāni cattāri accutāni cattāri amatāni cattāri nibbānānīti? Na hevaṃ vattabbe…pe… cattāri nibbānānīti? Āmantā. Atthi catunnaṃ nibbānānaṃ uccanīcatā hīnapaṇītatā ukkaṃsāvakaṃso sīmā vā bhedo vā rāji vā antarikā vāti? Na hevaṃ vattabbe…pe….
ദുക്ഖസച്ചം അസങ്ഖതന്തി? ആമന്താ . ദുക്ഖം അസങ്ഖതന്തി? ന ഹേവം വത്തബ്ബേ…പേ॰… ദുക്ഖസച്ചം അസങ്ഖതന്തി? ആമന്താ. കായികം ദുക്ഖം ചേതസികം ദുക്ഖം സോകപരിദേവദുക്ഖദോമനസ്സഉപായാസാ അസങ്ഖതാതി? ന ഹേവം വത്തബ്ബേ…പേ॰… സമുദയസച്ചം അസങ്ഖതന്തി? ആമന്താ. സമുദയോ അസങ്ഖതോതി? ന ഹേവം വത്തബ്ബേ…പേ॰… സമുദയസച്ചം അസങ്ഖതന്തി? ആമന്താ. കാമതണ്ഹാ ഭവതണ്ഹാ വിഭവതണ്ഹാ അസങ്ഖതാതി? ന ഹേവം വത്തബ്ബേ…പേ॰… മഗ്ഗസച്ചം അസങ്ഖതന്തി? ആമന്താ. മഗ്ഗോ അസങ്ഖതോതി? ന ഹേവം വത്തബ്ബേ…പേ॰… മഗ്ഗസച്ചം അസങ്ഖതന്തി? ആമന്താ. സമ്മാദിട്ഠി…പേ॰… സമ്മാസമാധി അസങ്ഖതോതി? ന ഹേവം വത്തബ്ബേ…പേ॰….
Dukkhasaccaṃ asaṅkhatanti? Āmantā . Dukkhaṃ asaṅkhatanti? Na hevaṃ vattabbe…pe… dukkhasaccaṃ asaṅkhatanti? Āmantā. Kāyikaṃ dukkhaṃ cetasikaṃ dukkhaṃ sokaparidevadukkhadomanassaupāyāsā asaṅkhatāti? Na hevaṃ vattabbe…pe… samudayasaccaṃ asaṅkhatanti? Āmantā. Samudayo asaṅkhatoti? Na hevaṃ vattabbe…pe… samudayasaccaṃ asaṅkhatanti? Āmantā. Kāmataṇhā bhavataṇhā vibhavataṇhā asaṅkhatāti? Na hevaṃ vattabbe…pe… maggasaccaṃ asaṅkhatanti? Āmantā. Maggo asaṅkhatoti? Na hevaṃ vattabbe…pe… maggasaccaṃ asaṅkhatanti? Āmantā. Sammādiṭṭhi…pe… sammāsamādhi asaṅkhatoti? Na hevaṃ vattabbe…pe….
ദുക്ഖം സങ്ഖതന്തി? ആമന്താ. ദുക്ഖസച്ചം സങ്ഖതന്തി? ന ഹേവം വത്തബ്ബേ…പേ॰… കായികം ദുക്ഖം ചേതസികം ദുക്ഖം സോകപരിദേവദുക്ഖദോമനസ്സഉപായാസാ സങ്ഖതാതി? ആമന്താ. ദുക്ഖസച്ചം സങ്ഖതന്തി? ന ഹേവം വത്തബ്ബേ…പേ॰… സമുദയോ സങ്ഖതോതി? ആമന്താ. സമുദയസച്ചം സങ്ഖതന്തി? ന ഹേവം വത്തബ്ബേ…പേ॰… കാമതണ്ഹാ ഭവതണ്ഹാ വിഭവതണ്ഹാ സങ്ഖതാതി? ആമന്താ . സമുദയസച്ചം സങ്ഖതന്തി? ന ഹേവം വത്തബ്ബേ…പേ॰… മഗ്ഗോ സങ്ഖതോതി? ആമന്താ. മഗ്ഗസച്ചം സങ്ഖതന്തി? ന ഹേവം വത്തബ്ബേ…പേ॰… സമ്മാദിട്ഠി…പേ॰… സമ്മാസമാധി സങ്ഖതോതി? ആമന്താ. മഗ്ഗസച്ചം സങ്ഖതന്തി? ന ഹേവം വത്തബ്ബേ…പേ॰….
Dukkhaṃ saṅkhatanti? Āmantā. Dukkhasaccaṃ saṅkhatanti? Na hevaṃ vattabbe…pe… kāyikaṃ dukkhaṃ cetasikaṃ dukkhaṃ sokaparidevadukkhadomanassaupāyāsā saṅkhatāti? Āmantā. Dukkhasaccaṃ saṅkhatanti? Na hevaṃ vattabbe…pe… samudayo saṅkhatoti? Āmantā. Samudayasaccaṃ saṅkhatanti? Na hevaṃ vattabbe…pe… kāmataṇhā bhavataṇhā vibhavataṇhā saṅkhatāti? Āmantā . Samudayasaccaṃ saṅkhatanti? Na hevaṃ vattabbe…pe… maggo saṅkhatoti? Āmantā. Maggasaccaṃ saṅkhatanti? Na hevaṃ vattabbe…pe… sammādiṭṭhi…pe… sammāsamādhi saṅkhatoti? Āmantā. Maggasaccaṃ saṅkhatanti? Na hevaṃ vattabbe…pe….
൪൫൩. നിരോധസച്ചം അസങ്ഖതം, നിരോധോ അസങ്ഖതോതി? ആമന്താ. ദുക്ഖസച്ചം അസങ്ഖതം, ദുക്ഖം അസങ്ഖതന്തി? ന ഹേവം വത്തബ്ബേ…പേ॰… നിരോധസച്ചം അസങ്ഖതം, നിരോധോ അസങ്ഖതോതി? ആമന്താ. സമുദയസച്ചം അസങ്ഖതം, സമുദയോ അസങ്ഖതോതി? ന ഹേവം വത്തബ്ബേ…പേ॰… നിരോധസച്ചം അസങ്ഖതം, നിരോധോ അസങ്ഖതോതി? ആമന്താ. മഗ്ഗസച്ചം അസങ്ഖതം, മഗ്ഗോ അസങ്ഖതോതി? ന ഹേവം വത്തബ്ബേ…പേ॰….
453. Nirodhasaccaṃ asaṅkhataṃ, nirodho asaṅkhatoti? Āmantā. Dukkhasaccaṃ asaṅkhataṃ, dukkhaṃ asaṅkhatanti? Na hevaṃ vattabbe…pe… nirodhasaccaṃ asaṅkhataṃ, nirodho asaṅkhatoti? Āmantā. Samudayasaccaṃ asaṅkhataṃ, samudayo asaṅkhatoti? Na hevaṃ vattabbe…pe… nirodhasaccaṃ asaṅkhataṃ, nirodho asaṅkhatoti? Āmantā. Maggasaccaṃ asaṅkhataṃ, maggo asaṅkhatoti? Na hevaṃ vattabbe…pe….
ദുക്ഖസച്ചം അസങ്ഖതം, ദുക്ഖം സങ്ഖതന്തി? ആമന്താ. നിരോധസച്ചം അസങ്ഖതം, നിരോധോ സങ്ഖതോതി? ന ഹേവം വത്തബ്ബേ…പേ॰… സമുദയസച്ചം അസങ്ഖതം, സമുദയോ സങ്ഖതോതി? ആമന്താ. നിരോധസച്ചം അസങ്ഖതം, നിരോധോ സങ്ഖതോതി? ന ഹേവം വത്തബ്ബേ…പേ॰… മഗ്ഗസച്ചം അസങ്ഖതം, മഗ്ഗോ സങ്ഖതോതി? ആമന്താ. നിരോധസച്ചം അസങ്ഖതം, നിരോധോ സങ്ഖതോതി? ന ഹേവം വത്തബ്ബേ…പേ॰….
Dukkhasaccaṃ asaṅkhataṃ, dukkhaṃ saṅkhatanti? Āmantā. Nirodhasaccaṃ asaṅkhataṃ, nirodho saṅkhatoti? Na hevaṃ vattabbe…pe… samudayasaccaṃ asaṅkhataṃ, samudayo saṅkhatoti? Āmantā. Nirodhasaccaṃ asaṅkhataṃ, nirodho saṅkhatoti? Na hevaṃ vattabbe…pe… maggasaccaṃ asaṅkhataṃ, maggo saṅkhatoti? Āmantā. Nirodhasaccaṃ asaṅkhataṃ, nirodho saṅkhatoti? Na hevaṃ vattabbe…pe….
൪൫൪. ന വത്തബ്ബം – ‘‘ചത്താരി സച്ചാനി അസങ്ഖതാനീ’’തി? ആമന്താ . നനു വുത്തം ഭഗവതാ – ‘‘ചത്താരിമാനി, ഭിക്ഖവേ, തഥാനി അവിതഥാനി അനഞ്ഞഥാനി! കതമാനി ചത്താരി? ‘ഇദം ദുക്ഖ’ന്തി, ഭിക്ഖവേ, തഥമേതം അവിതഥമേതം അനഞ്ഞഥമേതം…പേ॰… ‘അയം ദുക്ഖസമുദയോ’തി…പേ॰… ‘അയം ദുക്ഖനിരോധോ’തി…പേ॰… ‘അയം ദുക്ഖനിരോധഗാമിനീ പടിപദാ’തി തഥമേതം അവിതഥമേതം അനഞ്ഞഥമേതം. ഇമാനി ഖോ, ഭിക്ഖവേ, ചത്താരി തഥാനി അവിതഥാനി അനഞ്ഞഥാനീ’’തി 1. അത്ഥേവ സുത്തന്തോതി? ആമന്താ. തേന ഹി ചത്താരി സച്ചാനി അസങ്ഖതാനീതി.
454. Na vattabbaṃ – ‘‘cattāri saccāni asaṅkhatānī’’ti? Āmantā . Nanu vuttaṃ bhagavatā – ‘‘cattārimāni, bhikkhave, tathāni avitathāni anaññathāni! Katamāni cattāri? ‘Idaṃ dukkha’nti, bhikkhave, tathametaṃ avitathametaṃ anaññathametaṃ…pe… ‘ayaṃ dukkhasamudayo’ti…pe… ‘ayaṃ dukkhanirodho’ti…pe… ‘ayaṃ dukkhanirodhagāminī paṭipadā’ti tathametaṃ avitathametaṃ anaññathametaṃ. Imāni kho, bhikkhave, cattāri tathāni avitathāni anaññathānī’’ti 2. Attheva suttantoti? Āmantā. Tena hi cattāri saccāni asaṅkhatānīti.
സച്ചകഥാ നിട്ഠിതാ.
Saccakathā niṭṭhitā.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൩. സച്ചകഥാവണ്ണനാ • 3. Saccakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൩. സച്ചകഥാവണ്ണനാ • 3. Saccakathāvaṇṇanā
