| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৩. সচ্চকথাৰণ্ণনা
3. Saccakathāvaṇṇanā
৪৫২-৪৫৪. ইদানি সচ্চকথা নাম হোতি। তত্থ যেসং ‘‘চত্তারিমানি, ভিক্খৰে, তথানি অৰিতথানী’’তি (সং॰ নি॰ ৫.১০৯০) সুত্তং নিস্সায ‘‘চত্তারি সচ্চানি নিচ্চানি অসঙ্খতানী’’তি লদ্ধি, সেয্যথাপি পুব্বসেলিযানং; তে সন্ধায পুচ্ছা সকৰাদিস্স, পটিঞ্ঞা ইতরস্স। অযঞ্হিস্স অধিপ্পাযো – দুক্খসমুদযমগ্গেসু ৰত্থুসচ্চং সঙ্খতং, লক্খণসচ্চং অসঙ্খতং। নিরোধে ৰত্থুসচ্চং নাম নত্থি অসঙ্খতমেৰ তন্তি। তস্মা আমন্তাতি আহ। তং পনস্স লদ্ধিমত্তমেৰ। সো হি দুক্খং ৰত্থুসচ্চং ইচ্ছতি, তথা সমুদযং মগ্গঞ্চ। যানি পন নেসং বাধনপভৰনিয্যানিকলক্খণানি, তানি লক্খণসচ্চং নামাতি, ন চ বাধনলক্খণাদীহি অঞ্ঞানি দুক্খাদীনি নাম অত্থীতি। তাণানীতিআদীসু অধিপ্পাযো ৰুত্তনযেনেৰ ৰেদিতব্বো।
452-454. Idāni saccakathā nāma hoti. Tattha yesaṃ ‘‘cattārimāni, bhikkhave, tathāni avitathānī’’ti (saṃ. ni. 5.1090) suttaṃ nissāya ‘‘cattāri saccāni niccāni asaṅkhatānī’’ti laddhi, seyyathāpi pubbaseliyānaṃ; te sandhāya pucchā sakavādissa, paṭiññā itarassa. Ayañhissa adhippāyo – dukkhasamudayamaggesu vatthusaccaṃ saṅkhataṃ, lakkhaṇasaccaṃ asaṅkhataṃ. Nirodhe vatthusaccaṃ nāma natthi asaṅkhatameva tanti. Tasmā āmantāti āha. Taṃ panassa laddhimattameva. So hi dukkhaṃ vatthusaccaṃ icchati, tathā samudayaṃ maggañca. Yāni pana nesaṃ bādhanapabhavaniyyānikalakkhaṇāni, tāni lakkhaṇasaccaṃ nāmāti, na ca bādhanalakkhaṇādīhi aññāni dukkhādīni nāma atthīti. Tāṇānītiādīsu adhippāyo vuttanayeneva veditabbo.
দুক্খসচ্চন্তি পঞ্হে লদ্ধিৰসেন লক্খণং সন্ধায পটিজানাতি। দুক্খন্তি পঞ্হে ৰত্থুং সন্ধায পটিক্খিপতি। ইতো পরং সুদ্ধিকপঞ্হা চ সংসন্দনপঞ্হা চ সব্বে পাল়িঅনুসারেনেৰ ৰেদিতব্বা। অৰসানে লদ্ধিপতিট্ঠাপনত্থং আহটসুত্তং অত্থস্স মিচ্ছা গহিতত্তা অনাহটসদিসমেৰাতি।
Dukkhasaccanti pañhe laddhivasena lakkhaṇaṃ sandhāya paṭijānāti. Dukkhanti pañhe vatthuṃ sandhāya paṭikkhipati. Ito paraṃ suddhikapañhā ca saṃsandanapañhā ca sabbe pāḷianusāreneva veditabbā. Avasāne laddhipatiṭṭhāpanatthaṃ āhaṭasuttaṃ atthassa micchā gahitattā anāhaṭasadisamevāti.
সচ্চকথাৰণ্ণনা।
Saccakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৫৫) ৩. সচ্চকথা • (55) 3. Saccakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৩. সচ্চকথাৰণ্ণনা • 3. Saccakathāvaṇṇanā
