| Library / Tipiṭaka / तिपिटक • Tipiṭaka / पटिसम्भिदामग्ग-अट्ठकथा • Paṭisambhidāmagga-aṭṭhakathā |
२. सच्चकथा
2. Saccakathā
सच्चकथावण्णना
Saccakathāvaṇṇanā
८. इदानि युगनद्धगुणस्स अरियमग्गस्स वसेन सच्चट्ठं सच्चपटिवेधविसेसं सच्चलक्खणादिविधानञ्च दस्सेन्तेन कथिताय सुत्तन्तपुब्बङ्गमाय सच्चकथाय अपुब्बत्थानुवण्णना। तत्थ सुत्तन्ते ताव तथानीति यथासभाववसेन तच्छानि। यथासभावभूतानेव हि धम्मजातानि सच्चट्ठेन सच्चानि। सच्चट्ठो पठमञाणनिद्देसवण्णनायं वुत्तो। अवितथानीति वुत्तसभावे विपरियायविरहितानि। न हि सच्चानि असच्चानि नाम होन्ति। अनञ्ञथानीति अञ्ञसभावविरहितानि। न हि असच्चानि सच्चानि नाम होन्ति। इदं दुक्खन्ति, भिक्खवे, तथमेतन्ति भिक्खवे, इदं दुक्खन्ति यं वुच्चति, एतं यथासभावत्ता तथं। दुक्खमेव हि दुक्खं। वुत्तसभावे विपरियायाभावतो अवितथं। न हि दुक्खं अदुक्खं नाम होति। अञ्ञसभावविरहितत्ता अनञ्ञथं। न हि दुक्खं समुदयादिसभावं होति। समुदयादीसुपि एसेव नयो।
8. Idāni yuganaddhaguṇassa ariyamaggassa vasena saccaṭṭhaṃ saccapaṭivedhavisesaṃ saccalakkhaṇādividhānañca dassentena kathitāya suttantapubbaṅgamāya saccakathāya apubbatthānuvaṇṇanā. Tattha suttante tāva tathānīti yathāsabhāvavasena tacchāni. Yathāsabhāvabhūtāneva hi dhammajātāni saccaṭṭhena saccāni. Saccaṭṭho paṭhamañāṇaniddesavaṇṇanāyaṃ vutto. Avitathānīti vuttasabhāve vipariyāyavirahitāni. Na hi saccāni asaccāni nāma honti. Anaññathānīti aññasabhāvavirahitāni. Na hi asaccāni saccāni nāma honti. Idaṃ dukkhanti, bhikkhave, tathametanti bhikkhave, idaṃ dukkhanti yaṃ vuccati, etaṃ yathāsabhāvattā tathaṃ. Dukkhameva hi dukkhaṃ. Vuttasabhāve vipariyāyābhāvato avitathaṃ. Na hi dukkhaṃ adukkhaṃ nāma hoti. Aññasabhāvavirahitattā anaññathaṃ. Na hi dukkhaṃ samudayādisabhāvaṃ hoti. Samudayādīsupi eseva nayo.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / पटिसम्भिदामग्गपाळि • Paṭisambhidāmaggapāḷi / २. सच्चकथा • 2. Saccakathā
