| Library / Tipiṭaka / ติปิฎก • Tipiṭaka / ปฎิสมฺภิทามคฺค-อฎฺฐกถา • Paṭisambhidāmagga-aṭṭhakathā |
๒. สจฺจกถา
2. Saccakathā
สจฺจกถาวณฺณนา
Saccakathāvaṇṇanā
๘. อิทานิ ยุคนทฺธคุณสฺส อริยมคฺคสฺส วเสน สจฺจฎฺฐํ สจฺจปฎิเวธวิเสสํ สจฺจลกฺขณาทิวิธานญฺจ ทเสฺสเนฺตน กถิตาย สุตฺตนฺตปุพฺพงฺคมาย สจฺจกถาย อปุพฺพตฺถานุวณฺณนาฯ ตตฺถ สุตฺตเนฺต ตาว ตถานีติ ยถาสภาววเสน ตจฺฉานิฯ ยถาสภาวภูตาเนว หิ ธมฺมชาตานิ สจฺจเฎฺฐน สจฺจานิฯ สจฺจโฎฺฐ ปฐมญาณนิเทฺทสวณฺณนายํ วุโตฺตฯ อวิตถานีติ วุตฺตสภาเว วิปริยายวิรหิตานิฯ น หิ สจฺจานิ อสจฺจานิ นาม โหนฺติฯ อนญฺญถานีติ อญฺญสภาววิรหิตานิฯ น หิ อสจฺจานิ สจฺจานิ นาม โหนฺติฯ อิทํ ทุกฺขนฺติ, ภิกฺขเว, ตถเมตนฺติ ภิกฺขเว, อิทํ ทุกฺขนฺติ ยํ วุจฺจติ, เอตํ ยถาสภาวตฺตา ตถํฯ ทุกฺขเมว หิ ทุกฺขํฯ วุตฺตสภาเว วิปริยายาภาวโต อวิตถํฯ น หิ ทุกฺขํ อทุกฺขํ นาม โหติฯ อญฺญสภาววิรหิตตฺตา อนญฺญถํฯ น หิ ทุกฺขํ สมุทยาทิสภาวํ โหติฯ สมุทยาทีสุปิ เอเสว นโยฯ
8. Idāni yuganaddhaguṇassa ariyamaggassa vasena saccaṭṭhaṃ saccapaṭivedhavisesaṃ saccalakkhaṇādividhānañca dassentena kathitāya suttantapubbaṅgamāya saccakathāya apubbatthānuvaṇṇanā. Tattha suttante tāva tathānīti yathāsabhāvavasena tacchāni. Yathāsabhāvabhūtāneva hi dhammajātāni saccaṭṭhena saccāni. Saccaṭṭho paṭhamañāṇaniddesavaṇṇanāyaṃ vutto. Avitathānīti vuttasabhāve vipariyāyavirahitāni. Na hi saccāni asaccāni nāma honti. Anaññathānīti aññasabhāvavirahitāni. Na hi asaccāni saccāni nāma honti. Idaṃ dukkhanti, bhikkhave, tathametanti bhikkhave, idaṃ dukkhanti yaṃ vuccati, etaṃ yathāsabhāvattā tathaṃ. Dukkhameva hi dukkhaṃ. Vuttasabhāve vipariyāyābhāvato avitathaṃ. Na hi dukkhaṃ adukkhaṃ nāma hoti. Aññasabhāvavirahitattā anaññathaṃ. Na hi dukkhaṃ samudayādisabhāvaṃ hoti. Samudayādīsupi eseva nayo.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / ขุทฺทกนิกาย • Khuddakanikāya / ปฎิสมฺภิทามคฺคปาฬิ • Paṭisambhidāmaggapāḷi / ๒. สจฺจกถา • 2. Saccakathā
