| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā |
೨. ಸಚ್ಚಕಥಾ
2. Saccakathā
ಸಚ್ಚಕಥಾವಣ್ಣನಾ
Saccakathāvaṇṇanā
೮. ಇದಾನಿ ಯುಗನದ್ಧಗುಣಸ್ಸ ಅರಿಯಮಗ್ಗಸ್ಸ ವಸೇನ ಸಚ್ಚಟ್ಠಂ ಸಚ್ಚಪಟಿವೇಧವಿಸೇಸಂ ಸಚ್ಚಲಕ್ಖಣಾದಿವಿಧಾನಞ್ಚ ದಸ್ಸೇನ್ತೇನ ಕಥಿತಾಯ ಸುತ್ತನ್ತಪುಬ್ಬಙ್ಗಮಾಯ ಸಚ್ಚಕಥಾಯ ಅಪುಬ್ಬತ್ಥಾನುವಣ್ಣನಾ। ತತ್ಥ ಸುತ್ತನ್ತೇ ತಾವ ತಥಾನೀತಿ ಯಥಾಸಭಾವವಸೇನ ತಚ್ಛಾನಿ। ಯಥಾಸಭಾವಭೂತಾನೇವ ಹಿ ಧಮ್ಮಜಾತಾನಿ ಸಚ್ಚಟ್ಠೇನ ಸಚ್ಚಾನಿ। ಸಚ್ಚಟ್ಠೋ ಪಠಮಞಾಣನಿದ್ದೇಸವಣ್ಣನಾಯಂ ವುತ್ತೋ। ಅವಿತಥಾನೀತಿ ವುತ್ತಸಭಾವೇ ವಿಪರಿಯಾಯವಿರಹಿತಾನಿ। ನ ಹಿ ಸಚ್ಚಾನಿ ಅಸಚ್ಚಾನಿ ನಾಮ ಹೋನ್ತಿ। ಅನಞ್ಞಥಾನೀತಿ ಅಞ್ಞಸಭಾವವಿರಹಿತಾನಿ। ನ ಹಿ ಅಸಚ್ಚಾನಿ ಸಚ್ಚಾನಿ ನಾಮ ಹೋನ್ತಿ। ಇದಂ ದುಕ್ಖನ್ತಿ, ಭಿಕ್ಖವೇ, ತಥಮೇತನ್ತಿ ಭಿಕ್ಖವೇ, ಇದಂ ದುಕ್ಖನ್ತಿ ಯಂ ವುಚ್ಚತಿ, ಏತಂ ಯಥಾಸಭಾವತ್ತಾ ತಥಂ। ದುಕ್ಖಮೇವ ಹಿ ದುಕ್ಖಂ। ವುತ್ತಸಭಾವೇ ವಿಪರಿಯಾಯಾಭಾವತೋ ಅವಿತಥಂ। ನ ಹಿ ದುಕ್ಖಂ ಅದುಕ್ಖಂ ನಾಮ ಹೋತಿ। ಅಞ್ಞಸಭಾವವಿರಹಿತತ್ತಾ ಅನಞ್ಞಥಂ। ನ ಹಿ ದುಕ್ಖಂ ಸಮುದಯಾದಿಸಭಾವಂ ಹೋತಿ। ಸಮುದಯಾದೀಸುಪಿ ಏಸೇವ ನಯೋ।
8. Idāni yuganaddhaguṇassa ariyamaggassa vasena saccaṭṭhaṃ saccapaṭivedhavisesaṃ saccalakkhaṇādividhānañca dassentena kathitāya suttantapubbaṅgamāya saccakathāya apubbatthānuvaṇṇanā. Tattha suttante tāva tathānīti yathāsabhāvavasena tacchāni. Yathāsabhāvabhūtāneva hi dhammajātāni saccaṭṭhena saccāni. Saccaṭṭho paṭhamañāṇaniddesavaṇṇanāyaṃ vutto. Avitathānīti vuttasabhāve vipariyāyavirahitāni. Na hi saccāni asaccāni nāma honti. Anaññathānīti aññasabhāvavirahitāni. Na hi asaccāni saccāni nāma honti. Idaṃ dukkhanti, bhikkhave, tathametanti bhikkhave, idaṃ dukkhanti yaṃ vuccati, etaṃ yathāsabhāvattā tathaṃ. Dukkhameva hi dukkhaṃ. Vuttasabhāve vipariyāyābhāvato avitathaṃ. Na hi dukkhaṃ adukkhaṃ nāma hoti. Aññasabhāvavirahitattā anaññathaṃ. Na hi dukkhaṃ samudayādisabhāvaṃ hoti. Samudayādīsupi eseva nayo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi / ೨. ಸಚ್ಚಕಥಾ • 2. Saccakathā
