| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
3. සච්‌චකථාවණ්‌ණනා
3. Saccakathāvaṇṇanā
452-454. ඉදානි සච්‌චකථා නාම හොති. තත්‌ථ යෙසං ‘‘චත්‌තාරිමානි, භික්‌ඛවෙ, තථානි අවිතථානී’’ති (සං. නි. 5.1090) සුත්‌තං නිස්‌සාය ‘‘චත්‌තාරි සච්‌චානි නිච්‌චානි අසඞ්‌ඛතානී’’ති ලද්‌ධි, සෙය්‍යථාපි පුබ්‌බසෙලියානං; තෙ සන්‌ධාය පුච්‌ඡා සකවාදිස්‌ස, පටිඤ්‌ඤා ඉතරස්‌ස. අයඤ්‌හිස්‌ස අධිප්‌පායො – දුක්‌ඛසමුදයමග්‌ගෙසු වත්‌ථුසච්‌චං සඞ්‌ඛතං, ලක්‌ඛණසච්‌චං අසඞ්‌ඛතං. නිරොධෙ වත්‌ථුසච්‌චං නාම නත්‌ථි අසඞ්‌ඛතමෙව තන්‌ති. තස්‌මා ආමන්‌තාති ආහ. තං පනස්‌ස ලද්‌ධිමත්‌තමෙව. සො හි දුක්‌ඛං වත්‌ථුසච්‌චං ඉච්‌ඡති, තථා සමුදයං මග්‌ගඤ්‌ච. යානි පන නෙසං බාධනපභවනිය්‍යානිකලක්‌ඛණානි, තානි ලක්‌ඛණසච්‌චං නාමාති, න ච බාධනලක්‌ඛණාදීහි අඤ්‌ඤානි දුක්‌ඛාදීනි නාම අත්‌ථීති. තාණානීතිආදීසු අධිප්‌පායො වුත්‌තනයෙනෙව වෙදිතබ්‌බො.
452-454. Idāni saccakathā nāma hoti. Tattha yesaṃ ‘‘cattārimāni, bhikkhave, tathāni avitathānī’’ti (saṃ. ni. 5.1090) suttaṃ nissāya ‘‘cattāri saccāni niccāni asaṅkhatānī’’ti laddhi, seyyathāpi pubbaseliyānaṃ; te sandhāya pucchā sakavādissa, paṭiññā itarassa. Ayañhissa adhippāyo – dukkhasamudayamaggesu vatthusaccaṃ saṅkhataṃ, lakkhaṇasaccaṃ asaṅkhataṃ. Nirodhe vatthusaccaṃ nāma natthi asaṅkhatameva tanti. Tasmā āmantāti āha. Taṃ panassa laddhimattameva. So hi dukkhaṃ vatthusaccaṃ icchati, tathā samudayaṃ maggañca. Yāni pana nesaṃ bādhanapabhavaniyyānikalakkhaṇāni, tāni lakkhaṇasaccaṃ nāmāti, na ca bādhanalakkhaṇādīhi aññāni dukkhādīni nāma atthīti. Tāṇānītiādīsu adhippāyo vuttanayeneva veditabbo.
දුක්‌ඛසච්‌චන්‌ති පඤ්‌හෙ ලද්‌ධිවසෙන ලක්‌ඛණං සන්‌ධාය පටිජානාති. දුක්‌ඛන්‌ති පඤ්‌හෙ වත්‌ථුං සන්‌ධාය පටික්‌ඛිපති. ඉතො පරං සුද්‌ධිකපඤ්‌හා ච සංසන්‌දනපඤ්‌හා ච සබ්‌බෙ පාළිඅනුසාරෙනෙව වෙදිතබ්‌බා. අවසානෙ ලද්‌ධිපතිට්‌ඨාපනත්‌ථං ආහටසුත්‌තං අත්‌ථස්‌ස මිච්‌ඡා ගහිතත්‌තා අනාහටසදිසමෙවාති.
Dukkhasaccanti pañhe laddhivasena lakkhaṇaṃ sandhāya paṭijānāti. Dukkhanti pañhe vatthuṃ sandhāya paṭikkhipati. Ito paraṃ suddhikapañhā ca saṃsandanapañhā ca sabbe pāḷianusāreneva veditabbā. Avasāne laddhipatiṭṭhāpanatthaṃ āhaṭasuttaṃ atthassa micchā gahitattā anāhaṭasadisamevāti.
සච්‌චකථාවණ්‌ණනා.
Saccakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (55) 3. සච්‌චකථා • (55) 3. Saccakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 3. සච්‌චකථාවණ්‌ණනා • 3. Saccakathāvaṇṇanā
