| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā |
༢. སཙྩཀཐཱ
2. Saccakathā
སཙྩཀཐཱཝཎྞནཱ
Saccakathāvaṇṇanā
༨. ཨིདཱནི ཡུགནདྡྷགུཎསྶ ཨརིཡམགྒསྶ ཝསེན སཙྩཊྛཾ སཙྩཔཊིཝེདྷཝིསེསཾ སཙྩལཀྑཎཱདིཝིདྷཱནཉྩ དསྶེནྟེན ཀཐིཏཱཡ སུཏྟནྟཔུབྦངྒམཱཡ སཙྩཀཐཱཡ ཨཔུབྦཏྠཱནུཝཎྞནཱ། ཏཏྠ སུཏྟནྟེ ཏཱཝ ཏཐཱནཱིཏི ཡཐཱསབྷཱཝཝསེན ཏཙྪཱནི། ཡཐཱསབྷཱཝབྷཱུཏཱནེཝ ཧི དྷམྨཛཱཏཱནི སཙྩཊྛེན སཙྩཱནི། སཙྩཊྛོ པཋམཉཱཎནིདྡེསཝཎྞནཱཡཾ ཝུཏྟོ། ཨཝིཏཐཱནཱིཏི ཝུཏྟསབྷཱཝེ ཝིཔརིཡཱཡཝིརཧིཏཱནི། ན ཧི སཙྩཱནི ཨསཙྩཱནི ནཱམ ཧོནྟི། ཨནཉྙཐཱནཱིཏི ཨཉྙསབྷཱཝཝིརཧིཏཱནི། ན ཧི ཨསཙྩཱནི སཙྩཱནི ནཱམ ཧོནྟི། ཨིདཾ དུཀྑནྟི, བྷིཀྑཝེ, ཏཐམེཏནྟི བྷིཀྑཝེ, ཨིདཾ དུཀྑནྟི ཡཾ ཝུཙྩཏི, ཨེཏཾ ཡཐཱསབྷཱཝཏྟཱ ཏཐཾ། དུཀྑམེཝ ཧི དུཀྑཾ། ཝུཏྟསབྷཱཝེ ཝིཔརིཡཱཡཱབྷཱཝཏོ ཨཝིཏཐཾ། ན ཧི དུཀྑཾ ཨདུཀྑཾ ནཱམ ཧོཏི། ཨཉྙསབྷཱཝཝིརཧིཏཏྟཱ ཨནཉྙཐཾ། ན ཧི དུཀྑཾ སམུདཡཱདིསབྷཱཝཾ ཧོཏི། སམུདཡཱདཱིསུཔི ཨེསེཝ ནཡོ།
8. Idāni yuganaddhaguṇassa ariyamaggassa vasena saccaṭṭhaṃ saccapaṭivedhavisesaṃ saccalakkhaṇādividhānañca dassentena kathitāya suttantapubbaṅgamāya saccakathāya apubbatthānuvaṇṇanā. Tattha suttante tāva tathānīti yathāsabhāvavasena tacchāni. Yathāsabhāvabhūtāneva hi dhammajātāni saccaṭṭhena saccāni. Saccaṭṭho paṭhamañāṇaniddesavaṇṇanāyaṃ vutto. Avitathānīti vuttasabhāve vipariyāyavirahitāni. Na hi saccāni asaccāni nāma honti. Anaññathānīti aññasabhāvavirahitāni. Na hi asaccāni saccāni nāma honti. Idaṃ dukkhanti, bhikkhave, tathametanti bhikkhave, idaṃ dukkhanti yaṃ vuccati, etaṃ yathāsabhāvattā tathaṃ. Dukkhameva hi dukkhaṃ. Vuttasabhāve vipariyāyābhāvato avitathaṃ. Na hi dukkhaṃ adukkhaṃ nāma hoti. Aññasabhāvavirahitattā anaññathaṃ. Na hi dukkhaṃ samudayādisabhāvaṃ hoti. Samudayādīsupi eseva nayo.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / པཊིསམྦྷིདཱམགྒཔཱལི༹ • Paṭisambhidāmaggapāḷi / ༢. སཙྩཀཐཱ • 2. Saccakathā
