| Library / Tipiṭaka / তিপিটক • Tipiṭaka / চরিযাপিটক-অট্ঠকথা • Cariyāpiṭaka-aṭṭhakathā |
৮. সচ্চতাপসচরিযাৰণ্ণনা
8. Saccatāpasacariyāvaṇṇanā
অট্ঠমে তাপসো সচ্চসৰ্হযোতি সচ্চসদ্দেন অৰ্হাতব্বো সচ্চনামকো তাপসো যদা যস্মিং কালে হোমি, তদা। সচ্চেন লোকং পালেসিন্তি অত্তনো অৰিসংৰাদিভাৰেন সত্তলোকং জম্বুদীপে তত্থ তত্থ সত্তনিকাযং পাপতো নানাৰিধা অনত্থতো চ রক্খিং। সমগ্গং জনমকাসহন্তি তত্থ তত্থ কলহৰিগ্গহৰিৰাদাপন্নং মহাজনং কলহে আদীনৰং দস্সেত্ৰা সামগ্গিযং আনিসংসকথনেন সমগ্গং অৰিৰদমানং সম্মোদমানং অহমকাসিং।
Aṭṭhame tāpaso saccasavhayoti saccasaddena avhātabbo saccanāmako tāpaso yadā yasmiṃ kāle homi, tadā. Saccena lokaṃ pālesinti attano avisaṃvādibhāvena sattalokaṃ jambudīpe tattha tattha sattanikāyaṃ pāpato nānāvidhā anatthato ca rakkhiṃ. Samaggaṃ janamakāsahanti tattha tattha kalahaviggahavivādāpannaṃ mahājanaṃ kalahe ādīnavaṃ dassetvā sāmaggiyaṃ ānisaṃsakathanena samaggaṃ avivadamānaṃ sammodamānaṃ ahamakāsiṃ.
তদা হি বোধিসত্তো বারাণসিযং অঞ্ঞতরস্মিং ব্রাহ্মণমহাসালকুলে নিব্বত্তি। তস্স ‘‘সচ্চো’’তি নামং করিংসু। সো ৰযপ্পত্তো তক্কসিলং গন্ত্ৰা দিসাপামোক্খস্স আচরিযস্স সন্তিকে সিপ্পং উগ্গণ্হিত্ৰা নচিরস্সেৰ সব্বসিপ্পানং নিপ্ফত্তিং পত্তো। আচরিযেন অনুঞ্ঞাতো বারাণসিং পচ্চাগন্ত্ৰা মাতাপিতরো ৰন্দিত্ৰা তেহি অভিনন্দিযমানো তেসং চিত্তানুরক্খণত্থং কতিপাহং তেসং সন্তিকে ৰসি। অথ নং মাতাপিতরো পতিরূপেন দারেন সংযোজেতুকামা সব্বং ৰিভৰজাতং আচিক্খিত্ৰা ঘরাৰাসেন নিমন্তেসুং।
Tadā hi bodhisatto bārāṇasiyaṃ aññatarasmiṃ brāhmaṇamahāsālakule nibbatti. Tassa ‘‘sacco’’ti nāmaṃ kariṃsu. So vayappatto takkasilaṃ gantvā disāpāmokkhassa ācariyassa santike sippaṃ uggaṇhitvā nacirasseva sabbasippānaṃ nipphattiṃ patto. Ācariyena anuññāto bārāṇasiṃ paccāgantvā mātāpitaro vanditvā tehi abhinandiyamāno tesaṃ cittānurakkhaṇatthaṃ katipāhaṃ tesaṃ santike vasi. Atha naṃ mātāpitaro patirūpena dārena saṃyojetukāmā sabbaṃ vibhavajātaṃ ācikkhitvā gharāvāsena nimantesuṃ.
মহাসত্তো নেক্খম্মজ্ঝাসযো অত্তনো নেক্খম্মপারমিং পরিব্রূহেতুকামো ঘরাৰাসে আদীনৰং পব্বজ্জায আনিসংসঞ্চ নানপ্পকারতো কথেত্ৰা মাতাপিতূনং অস্সুমুখানং রোদমানানং অপরিমাণং ভোগক্খন্ধং অনন্তং যসং মহন্তঞ্চ ঞাতিপরিৰট্টং পহায মহানাগোৰ অযসঙ্খলিকং ঘরবন্ধনং ছিন্দন্তো নিক্খমিত্ৰা হিমৰন্তপ্পদেসং পৰিসিত্ৰা ইসিপব্বজ্জং পব্বজিত্ৰা ৰনমূলফলাফলেহি যাপেন্তো নচিরস্সেৰ অট্ঠ সমাপত্তিযো পঞ্চ চ অভিঞ্ঞাযো নিব্বত্তেত্ৰা ঝানকীল়ং কীল়যমানো সমাপত্তিৰিহারেন ৰিহরতি।
Mahāsatto nekkhammajjhāsayo attano nekkhammapāramiṃ paribrūhetukāmo gharāvāse ādīnavaṃ pabbajjāya ānisaṃsañca nānappakārato kathetvā mātāpitūnaṃ assumukhānaṃ rodamānānaṃ aparimāṇaṃ bhogakkhandhaṃ anantaṃ yasaṃ mahantañca ñātiparivaṭṭaṃ pahāya mahānāgova ayasaṅkhalikaṃ gharabandhanaṃ chindanto nikkhamitvā himavantappadesaṃ pavisitvā isipabbajjaṃ pabbajitvā vanamūlaphalāphalehi yāpento nacirasseva aṭṭha samāpattiyo pañca ca abhiññāyo nibbattetvā jhānakīḷaṃ kīḷayamāno samāpattivihārena viharati.
সো একদিৰসং দিব্বচক্খুনা লোকং ওলোকেন্তো অদ্দস সকলজম্বুদীপে মনুস্সে যেভুয্যেন পাণাতিপাতাদিদসঅকুসলকম্মপথপসুতে কামনিদানং কামাধিকরণং অঞ্ঞমঞ্ঞং ৰিৰাদাপন্নে। দিস্ৰা এৰং চিন্তেসি – ‘‘ন খো পন মেতং পতিরূপং, যদিদং ইমে সত্তে এৰং পাপপসুতে ৰিৰাদাপন্নে চ দিস্ৰা অজ্ঝুপেক্খণং। অহঞ্হি ‘সত্তে সংসারপঙ্কতো উদ্ধরিত্ৰা নিব্বানথলে পতিট্ঠপেস্সামী’তি মহাসম্বোধিযানং পটিপন্নো, তস্মা তং পটিঞ্ঞং অৰিসংৰাদেন্তো যংনূনাহং মনুস্সপথং গন্ত্ৰা তে তে সত্তে পাপতো ওরমাপেয্যং, ৰিৰাদঞ্চ নেসং ৰূপসমেয্য’’ন্তি।
So ekadivasaṃ dibbacakkhunā lokaṃ olokento addasa sakalajambudīpe manusse yebhuyyena pāṇātipātādidasaakusalakammapathapasute kāmanidānaṃ kāmādhikaraṇaṃ aññamaññaṃ vivādāpanne. Disvā evaṃ cintesi – ‘‘na kho pana metaṃ patirūpaṃ, yadidaṃ ime satte evaṃ pāpapasute vivādāpanne ca disvā ajjhupekkhaṇaṃ. Ahañhi ‘satte saṃsārapaṅkato uddharitvā nibbānathale patiṭṭhapessāmī’ti mahāsambodhiyānaṃ paṭipanno, tasmā taṃ paṭiññaṃ avisaṃvādento yaṃnūnāhaṃ manussapathaṃ gantvā te te satte pāpato oramāpeyyaṃ, vivādañca nesaṃ vūpasameyya’’nti.
এৰং পন চিন্তেত্ৰা মহাসত্তো মহাকরুণায সমুস্সাহিতো সন্তং সমাপত্তিসুখং পহায ইদ্ধিযা তত্থ তত্থ গন্ত্ৰা তেসং চিত্তানুকূলং ধম্মং দেসেন্তো কলহৰিগ্গহৰিৰাদাপন্নে সত্তে দিট্ঠধম্মিকঞ্চ সম্পরাযিকঞ্চ ৰিরোধে আদীনৰং দস্সেত্ৰা অঞ্ঞমঞ্ঞং সমগ্গে সহিতে অকাসি। অনেকাকারৰোকারঞ্চ পাপে আদীনৰং ৰিভাৰেন্তো ততো সত্তে ৰিৰেচেত্ৰা একচ্চে দসসু কুসলকম্মপথধম্মেসু পতিট্ঠাপেসি। একচ্চে পব্বাজেত্ৰা সীলসংৰরে ইন্দ্রিযগুত্তিযং সতিসম্পজঞ্ঞে পৰিৰেকৰাসে ঝানাভিঞ্ঞাসু চ যথারহং পতিট্ঠাপেসি। তেন ৰুত্তং –
Evaṃ pana cintetvā mahāsatto mahākaruṇāya samussāhito santaṃ samāpattisukhaṃ pahāya iddhiyā tattha tattha gantvā tesaṃ cittānukūlaṃ dhammaṃ desento kalahaviggahavivādāpanne satte diṭṭhadhammikañca samparāyikañca virodhe ādīnavaṃ dassetvā aññamaññaṃ samagge sahite akāsi. Anekākāravokārañca pāpe ādīnavaṃ vibhāvento tato satte vivecetvā ekacce dasasu kusalakammapathadhammesu patiṭṭhāpesi. Ekacce pabbājetvā sīlasaṃvare indriyaguttiyaṃ satisampajaññe pavivekavāse jhānābhiññāsu ca yathārahaṃ patiṭṭhāpesi. Tena vuttaṃ –
৭১.
71.
‘‘পুনাপরং যদা হোমি, তাপসো সচ্চসৰ্হযো।
‘‘Punāparaṃ yadā homi, tāpaso saccasavhayo;
সচ্চেন লোকং পালেসিং, সমগ্গং জনমকাসহ’’ন্তি॥
Saccena lokaṃ pālesiṃ, samaggaṃ janamakāsaha’’nti.
ইধাপি মহাপুরিসস্স হেট্ঠা ৰুত্তনযেনেৰ সেসপারমিযো নিদ্ধারেতব্বা। তথা গুণানুভাৰা চ ৰিভাৰেতব্বাতি।
Idhāpi mahāpurisassa heṭṭhā vuttanayeneva sesapāramiyo niddhāretabbā. Tathā guṇānubhāvā ca vibhāvetabbāti.
সচ্চতাপসচরিযাৰণ্ণনা নিট্ঠিতা।
Saccatāpasacariyāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / চরিযাপিটকপাল়ি • Cariyāpiṭakapāḷi / ৮. সচ্চতাপসচরিযা • 8. Saccatāpasacariyā
