| Library / Tipiṭaka / তিপিটক • Tipiṭaka / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā |
৭. ধম্মচক্ককথা
7. Dhammacakkakathā
১. সচ্চৰারৰণ্ণনা
1. Saccavāravaṇṇanā
৩৯. পুন ধম্মচক্কপ্পৰত্তনসুত্তন্তমেৰ পুব্বঙ্গমং কত্ৰা কথিতায ধম্মচক্ককথায অপুব্বত্থানুৰণ্ণনা। তত্থ দুক্খৰত্থুকাতি একাভিসমযৰসেন দুক্খং ৰত্থু এতেসন্তি দুক্খৰত্থুকা। তদেৰ দুক্খং ৰিসেসেত্ৰা সচ্চৰত্থুকাতিআদিমাহ। তত্থ সচ্চং আরম্মণং উপত্থম্ভো এতেসন্তি সচ্চারম্মণা। সচ্চং গোচরো ৰিসযো এতেসন্তি সচ্চগোচরা। সচ্চসঙ্গহিতাতি মগ্গসচ্চেন সঙ্গহিতা। সচ্চপরিযাপন্নাতি মগ্গসচ্চাযত্তা। সচ্চে সমুদাগতাতি দুক্খপরিজাননেন দুক্খসচ্চে সমুপ্পন্না। তথা তত্থেৰ ঠিতা পতিট্ঠিতা চ।
39. Puna dhammacakkappavattanasuttantameva pubbaṅgamaṃ katvā kathitāya dhammacakkakathāya apubbatthānuvaṇṇanā. Tattha dukkhavatthukāti ekābhisamayavasena dukkhaṃ vatthu etesanti dukkhavatthukā. Tadeva dukkhaṃ visesetvā saccavatthukātiādimāha. Tattha saccaṃ ārammaṇaṃ upatthambho etesanti saccārammaṇā. Saccaṃ gocaro visayo etesanti saccagocarā. Saccasaṅgahitāti maggasaccena saṅgahitā. Saccapariyāpannāti maggasaccāyattā. Sacce samudāgatāti dukkhaparijānanena dukkhasacce samuppannā. Tathā tattheva ṭhitā patiṭṭhitā ca.
৪০. ইদানি ‘‘পৰত্তিতে চ ভগৰতা ধম্মচক্কে’’তি ৰুত্তং ধম্মচক্কং নিদ্দিসিতুকামো ধম্মচক্কন্তিআদিমাহ। তত্থ দুৰিধং ধম্মচক্কং পটিৰেধধম্মচক্কং দেসনাধম্মচক্কঞ্চ। পটিৰেধধম্মচক্কং বোধিপল্লঙ্কে, দেসনাধম্মচক্কং ইসিপতনে। ধম্মঞ্চ পৰত্তেতি চক্কঞ্চাতি পটিৰেধধম্মচক্কং ৰুত্তং, চক্কঞ্চ পৰত্তেতি ধম্মঞ্চাতি দেসনাধম্মচক্কং। কথং? ভগৰা হি বোধিপল্লঙ্কে নিসিন্নো মগ্গক্খণে ইন্দ্রিযবলবোজ্ঝঙ্গমগ্গঙ্গাদিভেদং ধম্মঞ্চ পৰত্তেতি, সোযেৰ চ ধম্মো কিলেসসত্তুঘাতায পৰত্তনতো পহরণচক্কং ৰিযাতি চক্কঞ্চ। ধম্মং পৰত্তেন্তোযেৰ ভগৰা তং চক্কং পৰত্তেতি নাম। এতেন ধম্মোযেৰ চক্কন্তি কম্মধারযসমাসতা ৰুত্তা হোতি। ইসিপতনে নিসিন্নো ভগৰা ধম্মদেসনক্খণে ৰেনেয্যসন্তানে কিলেসসত্তুঘাতায পৰত্তনতো পহরণচক্কসদিসং দেসনাচক্কঞ্চ পৰত্তেতি, ৰেনেয্যসন্তানে ইন্দ্রিযবলবোজ্ঝঙ্গমগ্গঙ্গাদিভেদং ধম্মচক্কঞ্চ পৰত্তেতি। এতেন ধম্মো চ চক্কঞ্চ ধম্মচক্কন্তি দ্ৰন্দসমাসতা ৰুত্তা হোতি। যস্মা পন পৰত্তকে সতি পৰত্তনা নাম হোতি, তস্মা সব্বত্থাপি ‘‘পৰত্তেতী’’তি ৰুত্তং, পৰত্তনট্ঠেন পন ‘‘চক্ক’’ন্তি ৰুত্তং হোতীতি ৰেদিতব্বং। ধম্মেন পৰত্তেতীতি ধম্মচক্কন্তিআদীনি দেসনাধম্মচক্কমেৰ সন্ধায ৰুত্তানীতি ৰেদিতব্বানি।
40. Idāni ‘‘pavattite ca bhagavatā dhammacakke’’ti vuttaṃ dhammacakkaṃ niddisitukāmo dhammacakkantiādimāha. Tattha duvidhaṃ dhammacakkaṃ paṭivedhadhammacakkaṃ desanādhammacakkañca. Paṭivedhadhammacakkaṃ bodhipallaṅke, desanādhammacakkaṃ isipatane. Dhammañca pavatteti cakkañcāti paṭivedhadhammacakkaṃ vuttaṃ, cakkañca pavatteti dhammañcāti desanādhammacakkaṃ. Kathaṃ? Bhagavā hi bodhipallaṅke nisinno maggakkhaṇe indriyabalabojjhaṅgamaggaṅgādibhedaṃ dhammañca pavatteti, soyeva ca dhammo kilesasattughātāya pavattanato paharaṇacakkaṃ viyāti cakkañca. Dhammaṃ pavattentoyeva bhagavā taṃ cakkaṃ pavatteti nāma. Etena dhammoyeva cakkanti kammadhārayasamāsatā vuttā hoti. Isipatane nisinno bhagavā dhammadesanakkhaṇe veneyyasantāne kilesasattughātāya pavattanato paharaṇacakkasadisaṃ desanācakkañca pavatteti, veneyyasantāne indriyabalabojjhaṅgamaggaṅgādibhedaṃ dhammacakkañca pavatteti. Etena dhammo ca cakkañca dhammacakkanti dvandasamāsatā vuttā hoti. Yasmā pana pavattake sati pavattanā nāma hoti, tasmā sabbatthāpi ‘‘pavattetī’’ti vuttaṃ, pavattanaṭṭhena pana ‘‘cakka’’nti vuttaṃ hotīti veditabbaṃ. Dhammena pavattetīti dhammacakkantiādīni desanādhammacakkameva sandhāya vuttānīti veditabbāni.
তত্থ ধম্মেন পৰত্তেতীতি যথাসভাৰত্তা ধম্মেন পৰত্তং চক্কন্তি ধম্মচক্কন্তি ৰুত্তং হোতি। ধম্মচরিযায পৰত্তেতীতি ৰেনেয্যসন্তানে ধম্মত্থায পৰত্তং চক্কন্তি ধম্মচক্কন্তি ৰুত্তং হোতি। ধম্মে ঠিতোতিআদীহি ভগৰতো ধম্মভূততা ধম্মস্সামিতা চ ৰুত্তা হোতি। যথাহ – ‘‘সো হাৰুসো, ভগৰা জানং জানাতি পস্সং পস্সতি চক্খুভূতো ঞাণভূতো ধম্মভূতো ব্রহ্মভূতো ৰত্তা পৰত্তা অত্থস্স নিন্নেতা অমতস্স দাতা ধম্মস্সামী তথাগতো’’তি (ম॰ নি॰ ১.২০৩)। তস্মা তেহি ধম্মস্স চক্কন্তি ধম্মচক্কন্তি ৰুত্তং হোতি। ঠিতোতি ৰিসযীভাৰেন ঠিতো। পতিট্ঠিতোতি অচলভাৰেন পতিট্ঠিতো। ৰসিপ্পত্তোতি ইস্সরভাৰং পত্তো। পারমিপ্পত্তোতি কোটিপ্পত্তো। ৰেসারজ্জপ্পত্তোতি ৰিসারদভাৰং পত্তো। ধম্মে পতিট্ঠাপেন্তোতিআদীহি ৰেনেয্যসন্তানমপেক্খিত্ৰা ৰুত্তেহি পন ৰচনেহি ধম্মস্সামিতায চ ধম্মত্থায চক্কন্তি ৰুত্তং হোতি। ধম্মং সক্করোন্তোতিহআদীহি ধম্মত্থায চক্কন্তি ৰুত্তং হোতি। যো হি ধম্মং সক্কারাদিৰসেন পৰত্তেতি, সো ধম্মত্থং পৰত্তেতি। ধম্মং সক্করোন্তোতি যথা কতো সো ধম্মো সুকতো হোতি, এৰমেৰ নং করোন্তো। ধম্মং গরুং করোন্তোতি তস্মিং গারৰুপ্পত্তিযা তং গরুং করোন্তো। ধম্মং মানেন্তোতি ধম্মং পিযঞ্চ ভাৰনীযঞ্চ কত্ৰা ৰিহরন্তো। ধম্মং পূজেন্তোতি তং অপদিসিত্ৰা দেসনাপটিপত্তিপূজায পূজং করোন্তো। ধম্মং অপচাযমানোতি তস্সেৰ ধম্মস্স সক্কারগরুকারেহি নীচৰুত্তিতং করোন্তো। ধম্মদ্ধজো ধম্মকেতূতি তং ধম্মং ধজমিৰ পুরক্খত্ৰা কেতুমিৰ চ উক্খিপিত্ৰা পৰত্তিযা ধম্মদ্ধজো ধম্মকেতু চ হুত্ৰাতি অত্থো। ধম্মাধিপতেয্যোতি ধম্মাধিপতিতো আগতো ভাৰনাধম্মৰসেনেৰ চ সব্বকিরিযানং করণেন ধম্মাধিপতেয্যো হুত্ৰা। তং খো পন ধম্মচক্কং অপ্পটিৰত্তিযন্তি কেনচি নিৰত্তেতুং অসক্কুণেয্যতায অপ্পটিহতপৰত্তিতা ৰুত্তা। তস্মা সো ধম্মো পৰত্তনট্ঠেন চক্কন্তি ৰুত্তং হোতি।
Tattha dhammena pavattetīti yathāsabhāvattā dhammena pavattaṃ cakkanti dhammacakkanti vuttaṃ hoti. Dhammacariyāya pavattetīti veneyyasantāne dhammatthāya pavattaṃ cakkanti dhammacakkanti vuttaṃ hoti. Dhamme ṭhitotiādīhi bhagavato dhammabhūtatā dhammassāmitā ca vuttā hoti. Yathāha – ‘‘so hāvuso, bhagavā jānaṃ jānāti passaṃ passati cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammassāmī tathāgato’’ti (ma. ni. 1.203). Tasmā tehi dhammassa cakkanti dhammacakkanti vuttaṃ hoti. Ṭhitoti visayībhāvena ṭhito. Patiṭṭhitoti acalabhāvena patiṭṭhito. Vasippattoti issarabhāvaṃ patto. Pāramippattoti koṭippatto. Vesārajjappattoti visāradabhāvaṃ patto. Dhamme patiṭṭhāpentotiādīhi veneyyasantānamapekkhitvā vuttehi pana vacanehi dhammassāmitāya ca dhammatthāya cakkanti vuttaṃ hoti. Dhammaṃ sakkarontotihaādīhi dhammatthāya cakkanti vuttaṃ hoti. Yo hi dhammaṃ sakkārādivasena pavatteti, so dhammatthaṃ pavatteti. Dhammaṃ sakkarontoti yathā kato so dhammo sukato hoti, evameva naṃ karonto. Dhammaṃ garuṃ karontoti tasmiṃ gāravuppattiyā taṃ garuṃ karonto. Dhammaṃ mānentoti dhammaṃ piyañca bhāvanīyañca katvā viharanto. Dhammaṃ pūjentoti taṃ apadisitvā desanāpaṭipattipūjāya pūjaṃ karonto. Dhammaṃ apacāyamānoti tasseva dhammassa sakkāragarukārehi nīcavuttitaṃ karonto. Dhammaddhajo dhammaketūti taṃ dhammaṃ dhajamiva purakkhatvā ketumiva ca ukkhipitvā pavattiyā dhammaddhajo dhammaketu ca hutvāti attho. Dhammādhipateyyoti dhammādhipatito āgato bhāvanādhammavaseneva ca sabbakiriyānaṃ karaṇena dhammādhipateyyo hutvā. Taṃ kho pana dhammacakkaṃ appaṭivattiyanti kenaci nivattetuṃ asakkuṇeyyatāya appaṭihatapavattitā vuttā. Tasmā so dhammo pavattanaṭṭhena cakkanti vuttaṃ hoti.
সদ্ধিন্দ্রিযং ধম্মো, তং ধম্মং পৰত্তেতীতি ৰেনেয্যসন্তানে মগ্গসম্পযুত্তসদ্ধিন্দ্রিযুপ্পাদনেন তং সদ্ধিন্দ্রিযং ধম্মং পৰত্তেতীতি অত্থো। এসেৰ নযো সেসেসুপি। সচ্চাতি সচ্চঞাণানি। ৰিপস্সনা চ ৰিজ্জা চ মগ্গঞাণমেৰ। অনুপ্পাদে ঞাণন্তি অরহত্তফলে ঞাণং। তম্পি ৰেনেয্যসন্তানে পৰত্তেতিযেৰ, নিব্বানঞ্চ পটিৰেধং করোন্তো পৰত্তেতিযেৰ নাম।
Saddhindriyaṃ dhammo, taṃ dhammaṃ pavattetīti veneyyasantāne maggasampayuttasaddhindriyuppādanena taṃ saddhindriyaṃ dhammaṃ pavattetīti attho. Eseva nayo sesesupi. Saccāti saccañāṇāni. Vipassanā ca vijjā ca maggañāṇameva. Anuppāde ñāṇanti arahattaphale ñāṇaṃ. Tampi veneyyasantāne pavattetiyeva, nibbānañca paṭivedhaṃ karonto pavattetiyeva nāma.
সমুদযৰারাদীসু সমুদযৰত্থুকা নিরোধৰত্থুকা মগ্গৰত্থুকাতি ৰিসেসপদং দস্সেত্ৰা সঙ্খিত্তা। এত্থাপি ৰুত্তসদিসং পঠমং ৰুত্তনযেনেৰ ৰেদিতব্বং।
Samudayavārādīsu samudayavatthukā nirodhavatthukā maggavatthukāti visesapadaṃ dassetvā saṅkhittā. Etthāpi vuttasadisaṃ paṭhamaṃ vuttanayeneva veditabbaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পটিসম্ভিদামগ্গপাল়ি • Paṭisambhidāmaggapāḷi / ১. সচ্চৰারো • 1. Saccavāro
