| Library / Tipiṭaka / ਤਿਪਿਟਕ • Tipiṭaka / ਪਟਿਸਮ੍ਭਿਦਾਮਗ੍ਗ-ਅਟ੍ਠਕਥਾ • Paṭisambhidāmagga-aṭṭhakathā |
੭. ਧਮ੍ਮਚਕ੍ਕਕਥਾ
7. Dhammacakkakathā
੧. ਸਚ੍ਚવਾਰવਣ੍ਣਨਾ
1. Saccavāravaṇṇanā
੩੯. ਪੁਨ ਧਮ੍ਮਚਕ੍ਕਪ੍ਪવਤ੍ਤਨਸੁਤ੍ਤਨ੍ਤਮੇવ ਪੁਬ੍ਬਙ੍ਗਮਂ ਕਤ੍વਾ ਕਥਿਤਾਯ ਧਮ੍ਮਚਕ੍ਕਕਥਾਯ ਅਪੁਬ੍ਬਤ੍ਥਾਨੁવਣ੍ਣਨਾ। ਤਤ੍ਥ ਦੁਕ੍ਖવਤ੍ਥੁਕਾਤਿ ਏਕਾਭਿਸਮਯવਸੇਨ ਦੁਕ੍ਖਂ વਤ੍ਥੁ ਏਤੇਸਨ੍ਤਿ ਦੁਕ੍ਖવਤ੍ਥੁਕਾ। ਤਦੇવ ਦੁਕ੍ਖਂ વਿਸੇਸੇਤ੍વਾ ਸਚ੍ਚવਤ੍ਥੁਕਾਤਿਆਦਿਮਾਹ। ਤਤ੍ਥ ਸਚ੍ਚਂ ਆਰਮ੍ਮਣਂ ਉਪਤ੍ਥਮ੍ਭੋ ਏਤੇਸਨ੍ਤਿ ਸਚ੍ਚਾਰਮ੍ਮਣਾ। ਸਚ੍ਚਂ ਗੋਚਰੋ વਿਸਯੋ ਏਤੇਸਨ੍ਤਿ ਸਚ੍ਚਗੋਚਰਾ। ਸਚ੍ਚਸਙ੍ਗਹਿਤਾਤਿ ਮਗ੍ਗਸਚ੍ਚੇਨ ਸਙ੍ਗਹਿਤਾ। ਸਚ੍ਚਪਰਿਯਾਪਨ੍ਨਾਤਿ ਮਗ੍ਗਸਚ੍ਚਾਯਤ੍ਤਾ। ਸਚ੍ਚੇ ਸਮੁਦਾਗਤਾਤਿ ਦੁਕ੍ਖਪਰਿਜਾਨਨੇਨ ਦੁਕ੍ਖਸਚ੍ਚੇ ਸਮੁਪ੍ਪਨ੍ਨਾ। ਤਥਾ ਤਤ੍ਥੇવ ਠਿਤਾ ਪਤਿਟ੍ਠਿਤਾ ਚ।
39. Puna dhammacakkappavattanasuttantameva pubbaṅgamaṃ katvā kathitāya dhammacakkakathāya apubbatthānuvaṇṇanā. Tattha dukkhavatthukāti ekābhisamayavasena dukkhaṃ vatthu etesanti dukkhavatthukā. Tadeva dukkhaṃ visesetvā saccavatthukātiādimāha. Tattha saccaṃ ārammaṇaṃ upatthambho etesanti saccārammaṇā. Saccaṃ gocaro visayo etesanti saccagocarā. Saccasaṅgahitāti maggasaccena saṅgahitā. Saccapariyāpannāti maggasaccāyattā. Sacce samudāgatāti dukkhaparijānanena dukkhasacce samuppannā. Tathā tattheva ṭhitā patiṭṭhitā ca.
੪੦. ਇਦਾਨਿ ‘‘ਪવਤ੍ਤਿਤੇ ਚ ਭਗવਤਾ ਧਮ੍ਮਚਕ੍ਕੇ’’ਤਿ વੁਤ੍ਤਂ ਧਮ੍ਮਚਕ੍ਕਂ ਨਿਦ੍ਦਿਸਿਤੁਕਾਮੋ ਧਮ੍ਮਚਕ੍ਕਨ੍ਤਿਆਦਿਮਾਹ। ਤਤ੍ਥ ਦੁવਿਧਂ ਧਮ੍ਮਚਕ੍ਕਂ ਪਟਿવੇਧਧਮ੍ਮਚਕ੍ਕਂ ਦੇਸਨਾਧਮ੍ਮਚਕ੍ਕਞ੍ਚ। ਪਟਿવੇਧਧਮ੍ਮਚਕ੍ਕਂ ਬੋਧਿਪਲ੍ਲਙ੍ਕੇ, ਦੇਸਨਾਧਮ੍ਮਚਕ੍ਕਂ ਇਸਿਪਤਨੇ। ਧਮ੍ਮਞ੍ਚ ਪવਤ੍ਤੇਤਿ ਚਕ੍ਕਞ੍ਚਾਤਿ ਪਟਿવੇਧਧਮ੍ਮਚਕ੍ਕਂ વੁਤ੍ਤਂ, ਚਕ੍ਕਞ੍ਚ ਪવਤ੍ਤੇਤਿ ਧਮ੍ਮਞ੍ਚਾਤਿ ਦੇਸਨਾਧਮ੍ਮਚਕ੍ਕਂ। ਕਥਂ? ਭਗવਾ ਹਿ ਬੋਧਿਪਲ੍ਲਙ੍ਕੇ ਨਿਸਿਨ੍ਨੋ ਮਗ੍ਗਕ੍ਖਣੇ ਇਨ੍ਦ੍ਰਿਯਬਲਬੋਜ੍ਝਙ੍ਗਮਗ੍ਗਙ੍ਗਾਦਿਭੇਦਂ ਧਮ੍ਮਞ੍ਚ ਪવਤ੍ਤੇਤਿ, ਸੋਯੇવ ਚ ਧਮ੍ਮੋ ਕਿਲੇਸਸਤ੍ਤੁਘਾਤਾਯ ਪવਤ੍ਤਨਤੋ ਪਹਰਣਚਕ੍ਕਂ વਿਯਾਤਿ ਚਕ੍ਕਞ੍ਚ। ਧਮ੍ਮਂ ਪવਤ੍ਤੇਨ੍ਤੋਯੇવ ਭਗવਾ ਤਂ ਚਕ੍ਕਂ ਪવਤ੍ਤੇਤਿ ਨਾਮ। ਏਤੇਨ ਧਮ੍ਮੋਯੇવ ਚਕ੍ਕਨ੍ਤਿ ਕਮ੍ਮਧਾਰਯਸਮਾਸਤਾ વੁਤ੍ਤਾ ਹੋਤਿ। ਇਸਿਪਤਨੇ ਨਿਸਿਨ੍ਨੋ ਭਗવਾ ਧਮ੍ਮਦੇਸਨਕ੍ਖਣੇ વੇਨੇਯ੍ਯਸਨ੍ਤਾਨੇ ਕਿਲੇਸਸਤ੍ਤੁਘਾਤਾਯ ਪવਤ੍ਤਨਤੋ ਪਹਰਣਚਕ੍ਕਸਦਿਸਂ ਦੇਸਨਾਚਕ੍ਕਞ੍ਚ ਪવਤ੍ਤੇਤਿ, વੇਨੇਯ੍ਯਸਨ੍ਤਾਨੇ ਇਨ੍ਦ੍ਰਿਯਬਲਬੋਜ੍ਝਙ੍ਗਮਗ੍ਗਙ੍ਗਾਦਿਭੇਦਂ ਧਮ੍ਮਚਕ੍ਕਞ੍ਚ ਪવਤ੍ਤੇਤਿ। ਏਤੇਨ ਧਮ੍ਮੋ ਚ ਚਕ੍ਕਞ੍ਚ ਧਮ੍ਮਚਕ੍ਕਨ੍ਤਿ ਦ੍વਨ੍ਦਸਮਾਸਤਾ વੁਤ੍ਤਾ ਹੋਤਿ। ਯਸ੍ਮਾ ਪਨ ਪવਤ੍ਤਕੇ ਸਤਿ ਪવਤ੍ਤਨਾ ਨਾਮ ਹੋਤਿ, ਤਸ੍ਮਾ ਸਬ੍ਬਤ੍ਥਾਪਿ ‘‘ਪવਤ੍ਤੇਤੀ’’ਤਿ વੁਤ੍ਤਂ, ਪવਤ੍ਤਨਟ੍ਠੇਨ ਪਨ ‘‘ਚਕ੍ਕ’’ਨ੍ਤਿ વੁਤ੍ਤਂ ਹੋਤੀਤਿ વੇਦਿਤਬ੍ਬਂ। ਧਮ੍ਮੇਨ ਪવਤ੍ਤੇਤੀਤਿ ਧਮ੍ਮਚਕ੍ਕਨ੍ਤਿਆਦੀਨਿ ਦੇਸਨਾਧਮ੍ਮਚਕ੍ਕਮੇવ ਸਨ੍ਧਾਯ વੁਤ੍ਤਾਨੀਤਿ વੇਦਿਤਬ੍ਬਾਨਿ।
40. Idāni ‘‘pavattite ca bhagavatā dhammacakke’’ti vuttaṃ dhammacakkaṃ niddisitukāmo dhammacakkantiādimāha. Tattha duvidhaṃ dhammacakkaṃ paṭivedhadhammacakkaṃ desanādhammacakkañca. Paṭivedhadhammacakkaṃ bodhipallaṅke, desanādhammacakkaṃ isipatane. Dhammañca pavatteti cakkañcāti paṭivedhadhammacakkaṃ vuttaṃ, cakkañca pavatteti dhammañcāti desanādhammacakkaṃ. Kathaṃ? Bhagavā hi bodhipallaṅke nisinno maggakkhaṇe indriyabalabojjhaṅgamaggaṅgādibhedaṃ dhammañca pavatteti, soyeva ca dhammo kilesasattughātāya pavattanato paharaṇacakkaṃ viyāti cakkañca. Dhammaṃ pavattentoyeva bhagavā taṃ cakkaṃ pavatteti nāma. Etena dhammoyeva cakkanti kammadhārayasamāsatā vuttā hoti. Isipatane nisinno bhagavā dhammadesanakkhaṇe veneyyasantāne kilesasattughātāya pavattanato paharaṇacakkasadisaṃ desanācakkañca pavatteti, veneyyasantāne indriyabalabojjhaṅgamaggaṅgādibhedaṃ dhammacakkañca pavatteti. Etena dhammo ca cakkañca dhammacakkanti dvandasamāsatā vuttā hoti. Yasmā pana pavattake sati pavattanā nāma hoti, tasmā sabbatthāpi ‘‘pavattetī’’ti vuttaṃ, pavattanaṭṭhena pana ‘‘cakka’’nti vuttaṃ hotīti veditabbaṃ. Dhammena pavattetīti dhammacakkantiādīni desanādhammacakkameva sandhāya vuttānīti veditabbāni.
ਤਤ੍ਥ ਧਮ੍ਮੇਨ ਪવਤ੍ਤੇਤੀਤਿ ਯਥਾਸਭਾવਤ੍ਤਾ ਧਮ੍ਮੇਨ ਪવਤ੍ਤਂ ਚਕ੍ਕਨ੍ਤਿ ਧਮ੍ਮਚਕ੍ਕਨ੍ਤਿ વੁਤ੍ਤਂ ਹੋਤਿ। ਧਮ੍ਮਚਰਿਯਾਯ ਪવਤ੍ਤੇਤੀਤਿ વੇਨੇਯ੍ਯਸਨ੍ਤਾਨੇ ਧਮ੍ਮਤ੍ਥਾਯ ਪવਤ੍ਤਂ ਚਕ੍ਕਨ੍ਤਿ ਧਮ੍ਮਚਕ੍ਕਨ੍ਤਿ વੁਤ੍ਤਂ ਹੋਤਿ। ਧਮ੍ਮੇ ਠਿਤੋਤਿਆਦੀਹਿ ਭਗવਤੋ ਧਮ੍ਮਭੂਤਤਾ ਧਮ੍ਮਸ੍ਸਾਮਿਤਾ ਚ વੁਤ੍ਤਾ ਹੋਤਿ। ਯਥਾਹ – ‘‘ਸੋ ਹਾવੁਸੋ, ਭਗવਾ ਜਾਨਂ ਜਾਨਾਤਿ ਪਸ੍ਸਂ ਪਸ੍ਸਤਿ ਚਕ੍ਖੁਭੂਤੋ ਞਾਣਭੂਤੋ ਧਮ੍ਮਭੂਤੋ ਬ੍ਰਹ੍ਮਭੂਤੋ વਤ੍ਤਾ ਪવਤ੍ਤਾ ਅਤ੍ਥਸ੍ਸ ਨਿਨ੍ਨੇਤਾ ਅਮਤਸ੍ਸ ਦਾਤਾ ਧਮ੍ਮਸ੍ਸਾਮੀ ਤਥਾਗਤੋ’’ਤਿ (ਮ॰ ਨਿ॰ ੧.੨੦੩)। ਤਸ੍ਮਾ ਤੇਹਿ ਧਮ੍ਮਸ੍ਸ ਚਕ੍ਕਨ੍ਤਿ ਧਮ੍ਮਚਕ੍ਕਨ੍ਤਿ વੁਤ੍ਤਂ ਹੋਤਿ। ਠਿਤੋਤਿ વਿਸਯੀਭਾવੇਨ ਠਿਤੋ। ਪਤਿਟ੍ਠਿਤੋਤਿ ਅਚਲਭਾવੇਨ ਪਤਿਟ੍ਠਿਤੋ। વਸਿਪ੍ਪਤ੍ਤੋਤਿ ਇਸ੍ਸਰਭਾવਂ ਪਤ੍ਤੋ। ਪਾਰਮਿਪ੍ਪਤ੍ਤੋਤਿ ਕੋਟਿਪ੍ਪਤ੍ਤੋ। વੇਸਾਰਜ੍ਜਪ੍ਪਤ੍ਤੋਤਿ વਿਸਾਰਦਭਾવਂ ਪਤ੍ਤੋ। ਧਮ੍ਮੇ ਪਤਿਟ੍ਠਾਪੇਨ੍ਤੋਤਿਆਦੀਹਿ વੇਨੇਯ੍ਯਸਨ੍ਤਾਨਮਪੇਕ੍ਖਿਤ੍વਾ વੁਤ੍ਤੇਹਿ ਪਨ વਚਨੇਹਿ ਧਮ੍ਮਸ੍ਸਾਮਿਤਾਯ ਚ ਧਮ੍ਮਤ੍ਥਾਯ ਚਕ੍ਕਨ੍ਤਿ વੁਤ੍ਤਂ ਹੋਤਿ। ਧਮ੍ਮਂ ਸਕ੍ਕਰੋਨ੍ਤੋਤਿਹਆਦੀਹਿ ਧਮ੍ਮਤ੍ਥਾਯ ਚਕ੍ਕਨ੍ਤਿ વੁਤ੍ਤਂ ਹੋਤਿ। ਯੋ ਹਿ ਧਮ੍ਮਂ ਸਕ੍ਕਾਰਾਦਿવਸੇਨ ਪવਤ੍ਤੇਤਿ, ਸੋ ਧਮ੍ਮਤ੍ਥਂ ਪવਤ੍ਤੇਤਿ। ਧਮ੍ਮਂ ਸਕ੍ਕਰੋਨ੍ਤੋਤਿ ਯਥਾ ਕਤੋ ਸੋ ਧਮ੍ਮੋ ਸੁਕਤੋ ਹੋਤਿ, ਏવਮੇવ ਨਂ ਕਰੋਨ੍ਤੋ। ਧਮ੍ਮਂ ਗਰੁਂ ਕਰੋਨ੍ਤੋਤਿ ਤਸ੍ਮਿਂ ਗਾਰવੁਪ੍ਪਤ੍ਤਿਯਾ ਤਂ ਗਰੁਂ ਕਰੋਨ੍ਤੋ। ਧਮ੍ਮਂ ਮਾਨੇਨ੍ਤੋਤਿ ਧਮ੍ਮਂ ਪਿਯਞ੍ਚ ਭਾવਨੀਯਞ੍ਚ ਕਤ੍વਾ વਿਹਰਨ੍ਤੋ। ਧਮ੍ਮਂ ਪੂਜੇਨ੍ਤੋਤਿ ਤਂ ਅਪਦਿਸਿਤ੍વਾ ਦੇਸਨਾਪਟਿਪਤ੍ਤਿਪੂਜਾਯ ਪੂਜਂ ਕਰੋਨ੍ਤੋ। ਧਮ੍ਮਂ ਅਪਚਾਯਮਾਨੋਤਿ ਤਸ੍ਸੇવ ਧਮ੍ਮਸ੍ਸ ਸਕ੍ਕਾਰਗਰੁਕਾਰੇਹਿ ਨੀਚવੁਤ੍ਤਿਤਂ ਕਰੋਨ੍ਤੋ। ਧਮ੍ਮਦ੍ਧਜੋ ਧਮ੍ਮਕੇਤੂਤਿ ਤਂ ਧਮ੍ਮਂ ਧਜਮਿવ ਪੁਰਕ੍ਖਤ੍વਾ ਕੇਤੁਮਿવ ਚ ਉਕ੍ਖਿਪਿਤ੍વਾ ਪવਤ੍ਤਿਯਾ ਧਮ੍ਮਦ੍ਧਜੋ ਧਮ੍ਮਕੇਤੁ ਚ ਹੁਤ੍વਾਤਿ ਅਤ੍ਥੋ। ਧਮ੍ਮਾਧਿਪਤੇਯ੍ਯੋਤਿ ਧਮ੍ਮਾਧਿਪਤਿਤੋ ਆਗਤੋ ਭਾવਨਾਧਮ੍ਮવਸੇਨੇવ ਚ ਸਬ੍ਬਕਿਰਿਯਾਨਂ ਕਰਣੇਨ ਧਮ੍ਮਾਧਿਪਤੇਯ੍ਯੋ ਹੁਤ੍વਾ। ਤਂ ਖੋ ਪਨ ਧਮ੍ਮਚਕ੍ਕਂ ਅਪ੍ਪਟਿવਤ੍ਤਿਯਨ੍ਤਿ ਕੇਨਚਿ ਨਿવਤ੍ਤੇਤੁਂ ਅਸਕ੍ਕੁਣੇਯ੍ਯਤਾਯ ਅਪ੍ਪਟਿਹਤਪવਤ੍ਤਿਤਾ વੁਤ੍ਤਾ। ਤਸ੍ਮਾ ਸੋ ਧਮ੍ਮੋ ਪવਤ੍ਤਨਟ੍ਠੇਨ ਚਕ੍ਕਨ੍ਤਿ વੁਤ੍ਤਂ ਹੋਤਿ।
Tattha dhammena pavattetīti yathāsabhāvattā dhammena pavattaṃ cakkanti dhammacakkanti vuttaṃ hoti. Dhammacariyāya pavattetīti veneyyasantāne dhammatthāya pavattaṃ cakkanti dhammacakkanti vuttaṃ hoti. Dhamme ṭhitotiādīhi bhagavato dhammabhūtatā dhammassāmitā ca vuttā hoti. Yathāha – ‘‘so hāvuso, bhagavā jānaṃ jānāti passaṃ passati cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammassāmī tathāgato’’ti (ma. ni. 1.203). Tasmā tehi dhammassa cakkanti dhammacakkanti vuttaṃ hoti. Ṭhitoti visayībhāvena ṭhito. Patiṭṭhitoti acalabhāvena patiṭṭhito. Vasippattoti issarabhāvaṃ patto. Pāramippattoti koṭippatto. Vesārajjappattoti visāradabhāvaṃ patto. Dhamme patiṭṭhāpentotiādīhi veneyyasantānamapekkhitvā vuttehi pana vacanehi dhammassāmitāya ca dhammatthāya cakkanti vuttaṃ hoti. Dhammaṃ sakkarontotihaādīhi dhammatthāya cakkanti vuttaṃ hoti. Yo hi dhammaṃ sakkārādivasena pavatteti, so dhammatthaṃ pavatteti. Dhammaṃ sakkarontoti yathā kato so dhammo sukato hoti, evameva naṃ karonto. Dhammaṃ garuṃ karontoti tasmiṃ gāravuppattiyā taṃ garuṃ karonto. Dhammaṃ mānentoti dhammaṃ piyañca bhāvanīyañca katvā viharanto. Dhammaṃ pūjentoti taṃ apadisitvā desanāpaṭipattipūjāya pūjaṃ karonto. Dhammaṃ apacāyamānoti tasseva dhammassa sakkāragarukārehi nīcavuttitaṃ karonto. Dhammaddhajo dhammaketūti taṃ dhammaṃ dhajamiva purakkhatvā ketumiva ca ukkhipitvā pavattiyā dhammaddhajo dhammaketu ca hutvāti attho. Dhammādhipateyyoti dhammādhipatito āgato bhāvanādhammavaseneva ca sabbakiriyānaṃ karaṇena dhammādhipateyyo hutvā. Taṃ kho pana dhammacakkaṃ appaṭivattiyanti kenaci nivattetuṃ asakkuṇeyyatāya appaṭihatapavattitā vuttā. Tasmā so dhammo pavattanaṭṭhena cakkanti vuttaṃ hoti.
ਸਦ੍ਧਿਨ੍ਦ੍ਰਿਯਂ ਧਮ੍ਮੋ, ਤਂ ਧਮ੍ਮਂ ਪવਤ੍ਤੇਤੀਤਿ વੇਨੇਯ੍ਯਸਨ੍ਤਾਨੇ ਮਗ੍ਗਸਮ੍ਪਯੁਤ੍ਤਸਦ੍ਧਿਨ੍ਦ੍ਰਿਯੁਪ੍ਪਾਦਨੇਨ ਤਂ ਸਦ੍ਧਿਨ੍ਦ੍ਰਿਯਂ ਧਮ੍ਮਂ ਪવਤ੍ਤੇਤੀਤਿ ਅਤ੍ਥੋ। ਏਸੇવ ਨਯੋ ਸੇਸੇਸੁਪਿ। ਸਚ੍ਚਾਤਿ ਸਚ੍ਚਞਾਣਾਨਿ। વਿਪਸ੍ਸਨਾ ਚ વਿਜ੍ਜਾ ਚ ਮਗ੍ਗਞਾਣਮੇવ। ਅਨੁਪ੍ਪਾਦੇ ਞਾਣਨ੍ਤਿ ਅਰਹਤ੍ਤਫਲੇ ਞਾਣਂ। ਤਮ੍ਪਿ વੇਨੇਯ੍ਯਸਨ੍ਤਾਨੇ ਪવਤ੍ਤੇਤਿਯੇવ, ਨਿਬ੍ਬਾਨਞ੍ਚ ਪਟਿવੇਧਂ ਕਰੋਨ੍ਤੋ ਪવਤ੍ਤੇਤਿਯੇવ ਨਾਮ।
Saddhindriyaṃ dhammo, taṃ dhammaṃ pavattetīti veneyyasantāne maggasampayuttasaddhindriyuppādanena taṃ saddhindriyaṃ dhammaṃ pavattetīti attho. Eseva nayo sesesupi. Saccāti saccañāṇāni. Vipassanā ca vijjā ca maggañāṇameva. Anuppāde ñāṇanti arahattaphale ñāṇaṃ. Tampi veneyyasantāne pavattetiyeva, nibbānañca paṭivedhaṃ karonto pavattetiyeva nāma.
ਸਮੁਦਯવਾਰਾਦੀਸੁ ਸਮੁਦਯવਤ੍ਥੁਕਾ ਨਿਰੋਧવਤ੍ਥੁਕਾ ਮਗ੍ਗવਤ੍ਥੁਕਾਤਿ વਿਸੇਸਪਦਂ ਦਸ੍ਸੇਤ੍વਾ ਸਙ੍ਖਿਤ੍ਤਾ। ਏਤ੍ਥਾਪਿ વੁਤ੍ਤਸਦਿਸਂ ਪਠਮਂ વੁਤ੍ਤਨਯੇਨੇવ વੇਦਿਤਬ੍ਬਂ।
Samudayavārādīsu samudayavatthukā nirodhavatthukā maggavatthukāti visesapadaṃ dassetvā saṅkhittā. Etthāpi vuttasadisaṃ paṭhamaṃ vuttanayeneva veditabbaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਪਟਿਸਮ੍ਭਿਦਾਮਗ੍ਗਪਾਲ਼ਿ • Paṭisambhidāmaggapāḷi / ੧. ਸਚ੍ਚવਾਰੋ • 1. Saccavāro
