| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৭. ধম্মচক্ককথা
7. Dhammacakkakathā
১. সচ্চৰারো
1. Saccavāro
৩৯. একং সমযং ভগৰা বারাণসিযং ৰিহরতি…পে॰… ইতি হিদং আযস্মতো কোণ্ডঞ্ঞস্স ‘‘অঞ্ঞাসিকোণ্ডঞ্ঞো’’ ত্ৰেৰ নামং অহোসি।
39. Ekaṃ samayaṃ bhagavā bārāṇasiyaṃ viharati…pe… iti hidaṃ āyasmato koṇḍaññassa ‘‘aññāsikoṇḍañño’’ tveva nāmaṃ ahosi.
[ক] ‘‘ইদং দুক্খং অরিযসচ্চ’’ন্তি পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৰিজ্জা উদপাদি, আলোকো উদপাদি।
[Ka] ‘‘idaṃ dukkhaṃ ariyasacca’’nti pubbe ananussutesu dhammesu cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.
চক্খুং উদপাদীতি – কেনট্ঠেন? ঞাণং উদপাদীতি – কেনট্ঠেন? পঞ্ঞা উদপাদীতি – কেনট্ঠেন? ৰিজ্জা উদপাদীতি – কেনট্ঠেন? আলোকো উদপাদীতি – কেনট্ঠেন? চক্খুং উদপাদীতি – দস্সনট্ঠেন। ঞাণং উদপাদীতি – ঞাতট্ঠেন। পঞ্ঞা উদপাদীতি – পজাননট্ঠেন । ৰিজ্জা উদপাদীতি – পটিৰেধট্ঠেন। আলোকো উদপাদীতি – ওভাসট্ঠেন।
Cakkhuṃ udapādīti – kenaṭṭhena? Ñāṇaṃ udapādīti – kenaṭṭhena? Paññā udapādīti – kenaṭṭhena? Vijjā udapādīti – kenaṭṭhena? Āloko udapādīti – kenaṭṭhena? Cakkhuṃ udapādīti – dassanaṭṭhena. Ñāṇaṃ udapādīti – ñātaṭṭhena. Paññā udapādīti – pajānanaṭṭhena . Vijjā udapādīti – paṭivedhaṭṭhena. Āloko udapādīti – obhāsaṭṭhena.
চক্খুং ধম্মো, দস্সনট্ঠো অত্থো। ঞাণং ধম্মো, ঞাতট্ঠো অত্থো। পঞ্ঞা ধম্মো, পজাননট্ঠো অত্থো। ৰিজ্জা ধম্মো, পটিৰেধট্ঠো অত্থো। আলোকো ধম্মো, ওভাসট্ঠো অত্থো। ইমে পঞ্চ ধম্মা পঞ্চ অত্থা দুক্খৰত্থুকা সচ্চৰত্থুকা সচ্চারম্মণা সচ্চগোচরা সচ্চসঙ্গহিতা সচ্চপরিযাপন্না সচ্চে সমুদাগতা সচ্চে ঠিতা সচ্চে পতিট্ঠিতা।
Cakkhuṃ dhammo, dassanaṭṭho attho. Ñāṇaṃ dhammo, ñātaṭṭho attho. Paññā dhammo, pajānanaṭṭho attho. Vijjā dhammo, paṭivedhaṭṭho attho. Āloko dhammo, obhāsaṭṭho attho. Ime pañca dhammā pañca atthā dukkhavatthukā saccavatthukā saccārammaṇā saccagocarā saccasaṅgahitā saccapariyāpannā sacce samudāgatā sacce ṭhitā sacce patiṭṭhitā.
৪০. ধম্মচক্কন্তি কেনট্ঠেন ধম্মচক্কং? ধম্মঞ্চ পৰত্তেতি চক্কঞ্চাতি – ধম্মচক্কং। চক্কঞ্চ পৰত্তেতি ধম্মঞ্চাতি – ধম্মচক্কং। ধম্মেন পৰত্তেতীতি – ধম্মচক্কং। ধম্মচরিযায পৰত্তেতীতি – ধম্মচক্কং। ধম্মে ঠিতো পৰত্তেতীতি – ধম্মচক্কং। ধম্মে পতিট্ঠিতো পৰত্তেতীতি – ধম্মচক্কং। ধম্মে পতিট্ঠাপেন্তো পৰত্তেতীতি – ধম্মচক্কং। ধম্মে ৰসিপ্পত্তো পৰত্তেতীতি – ধম্মচক্কং। ধম্মে ৰসিং পাপেন্তো পৰত্তেতীতি – ধম্মচক্কং । ধম্মে পারমিপ্পত্তো পৰত্তেতীতি – ধম্মচক্কং। ধম্মে পারমিং পাপেন্তো পৰত্তেতীতি – ধম্মচক্কং। ধম্মে ৰেসারজ্জপ্পত্তো পৰত্তেতীতি – ধম্মচক্কং। ধম্মে ৰেসারজ্জং পাপেন্তো পৰত্তেতীতি – ধম্মচক্কং। ধম্মং সক্করোন্তো পৰত্তেতীতি – ধম্মচক্কং। ধম্মং গরুং করোন্তো 1 পৰত্তেতীতি – ধম্মচক্কং। ধম্মং মানেন্তো পৰত্তেতীতি – ধম্মচক্কং। ধম্মং পূজেন্তো পৰত্তেতীতি – ধম্মচক্কং । ধম্মং অপচাযমানো পৰত্তেতীতি – ধম্মচক্কং। ধম্মদ্ধজো পৰত্তেতীতি – ধম্মচক্কং। ধম্মকেতু পৰত্তেতীতি – ধম্মচক্কং। ধম্মাধিপতেয্যো পৰত্তেতীতি – ধম্মচক্কং। তং খো পন ধম্মচক্কং অপ্পটিৰত্তিযং সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা কেনচি ৰা লোকস্মিন্তি – ধম্মচক্কং।
40.Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammacariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ. Dhamme patiṭṭhāpento pavattetīti – dhammacakkaṃ. Dhamme vasippatto pavattetīti – dhammacakkaṃ. Dhamme vasiṃ pāpento pavattetīti – dhammacakkaṃ . Dhamme pāramippatto pavattetīti – dhammacakkaṃ. Dhamme pāramiṃ pāpento pavattetīti – dhammacakkaṃ. Dhamme vesārajjappatto pavattetīti – dhammacakkaṃ. Dhamme vesārajjaṃ pāpento pavattetīti – dhammacakkaṃ. Dhammaṃ sakkaronto pavattetīti – dhammacakkaṃ. Dhammaṃ garuṃ karonto 2 pavattetīti – dhammacakkaṃ. Dhammaṃ mānento pavattetīti – dhammacakkaṃ. Dhammaṃ pūjento pavattetīti – dhammacakkaṃ . Dhammaṃ apacāyamāno pavattetīti – dhammacakkaṃ. Dhammaddhajo pavattetīti – dhammacakkaṃ. Dhammaketu pavattetīti – dhammacakkaṃ. Dhammādhipateyyo pavattetīti – dhammacakkaṃ. Taṃ kho pana dhammacakkaṃ appaṭivattiyaṃ samaṇena vā brāhmaṇena vā devena vā mārena vā brahmunā vā kenaci vā lokasminti – dhammacakkaṃ.
সদ্ধিন্দ্রিযং ধম্মো। তং ধম্মং পৰত্তেতীতি – ধম্মচক্কং। ৰীরিযিন্দ্রিযং ধম্মো। তং ধম্মং পৰত্তেতীতি – ধম্মচক্কং। সতিন্দ্রিযং ধম্মো। তং ধম্মং পৰত্তেতীতি – ধম্মচক্কং। সমাধিন্দ্রিযং ধম্মো। তং ধম্মং পৰত্তেতীতি – ধম্মচক্কং। পঞ্ঞিন্দ্রিযং ধম্মো। তং ধম্মং পৰত্তেতীতি – ধম্মচক্কং। সদ্ধাবলং ধম্মো। তং ধম্মং পৰত্তেতীতি – ধম্মচক্কং। ৰীরিযবলং ধম্মো। তং ধম্মং পৰত্তেতীতি – ধম্মচক্কং। সতিবলং ধম্মো। তং ধম্মং পৰত্তেতীতি – ধম্মচক্কং। সমাধিবলং ধম্মো। তং ধম্মং পৰত্তেতীতি – ধম্মচক্কং। পঞ্ঞাবলং ধম্মো। তং ধম্মং পৰত্তেতীতি – ধম্মচক্কং। সতিসম্বোজ্ঝঙ্গো ধম্মো। তং ধম্মং পৰত্তেতীতি – ধম্মচক্কং। ধম্মৰিচযসম্বোজ্ঝঙ্গো ধম্মো। তং ধম্মং পৰত্তেতীতি – ধম্মচক্কং। ৰীরিযসম্বোজ্ঝঙ্গো ধম্মো। তং ধম্মং পৰত্তেতীতি – ধম্মচক্কং। পীতিসম্বোজ্ঝঙ্গো ধম্মো। তং ধম্মং পৰত্তেতীতি – ধম্মচক্কং। পস্সদ্ধিসম্বোজ্ঝঙ্গো ধম্মো। তং ধম্মং পৰত্তেতীতি – ধম্মচক্কং। সমাধিসম্বোজ্ঝঙ্গো ধম্মো। তং ধম্মং পৰত্তেতীতি – ধম্মচক্কং। উপেক্খাসম্বোজ্ঝঙ্গো ধম্মো। তং ধম্মং পৰত্তেতীতি – ধম্মচক্কং । সম্মাদিট্ঠি ধম্মো। তং ধম্মং পৰত্তেতীতি – ধম্মচক্কং। সম্মাসঙ্কপ্পো ধম্মো। তং ধম্মং পৰত্তেতীতি – ধম্মচক্কং। সম্মাৰাচা ধম্মো। তং ধম্মং পৰত্তেতীতি – ধম্মচক্কং। সম্মাকম্মন্তো ধম্মো। তং ধম্মং পৰত্তেতীতি – ধম্মচক্কং। সম্মাআজীৰো ধম্মো। তং ধম্মং পৰত্তেতীতি – ধম্মচক্কং। সম্মাৰাযামো ধম্মো। তং ধম্মং পৰত্তেতীতি – ধম্মচক্কং। সম্মাসতি ধম্মো। তং ধম্মং পৰত্তেতীতি – ধম্মচক্কং। সম্মাসমাধি ধম্মো। তং ধম্মং পৰত্তেতীতি – ধম্মচক্কং।
Saddhindriyaṃ dhammo. Taṃ dhammaṃ pavattetīti – dhammacakkaṃ. Vīriyindriyaṃ dhammo. Taṃ dhammaṃ pavattetīti – dhammacakkaṃ. Satindriyaṃ dhammo. Taṃ dhammaṃ pavattetīti – dhammacakkaṃ. Samādhindriyaṃ dhammo. Taṃ dhammaṃ pavattetīti – dhammacakkaṃ. Paññindriyaṃ dhammo. Taṃ dhammaṃ pavattetīti – dhammacakkaṃ. Saddhābalaṃ dhammo. Taṃ dhammaṃ pavattetīti – dhammacakkaṃ. Vīriyabalaṃ dhammo. Taṃ dhammaṃ pavattetīti – dhammacakkaṃ. Satibalaṃ dhammo. Taṃ dhammaṃ pavattetīti – dhammacakkaṃ. Samādhibalaṃ dhammo. Taṃ dhammaṃ pavattetīti – dhammacakkaṃ. Paññābalaṃ dhammo. Taṃ dhammaṃ pavattetīti – dhammacakkaṃ. Satisambojjhaṅgo dhammo. Taṃ dhammaṃ pavattetīti – dhammacakkaṃ. Dhammavicayasambojjhaṅgo dhammo. Taṃ dhammaṃ pavattetīti – dhammacakkaṃ. Vīriyasambojjhaṅgo dhammo. Taṃ dhammaṃ pavattetīti – dhammacakkaṃ. Pītisambojjhaṅgo dhammo. Taṃ dhammaṃ pavattetīti – dhammacakkaṃ. Passaddhisambojjhaṅgo dhammo. Taṃ dhammaṃ pavattetīti – dhammacakkaṃ. Samādhisambojjhaṅgo dhammo. Taṃ dhammaṃ pavattetīti – dhammacakkaṃ. Upekkhāsambojjhaṅgo dhammo. Taṃ dhammaṃ pavattetīti – dhammacakkaṃ . Sammādiṭṭhi dhammo. Taṃ dhammaṃ pavattetīti – dhammacakkaṃ. Sammāsaṅkappo dhammo. Taṃ dhammaṃ pavattetīti – dhammacakkaṃ. Sammāvācā dhammo. Taṃ dhammaṃ pavattetīti – dhammacakkaṃ. Sammākammanto dhammo. Taṃ dhammaṃ pavattetīti – dhammacakkaṃ. Sammāājīvo dhammo. Taṃ dhammaṃ pavattetīti – dhammacakkaṃ. Sammāvāyāmo dhammo. Taṃ dhammaṃ pavattetīti – dhammacakkaṃ. Sammāsati dhammo. Taṃ dhammaṃ pavattetīti – dhammacakkaṃ. Sammāsamādhi dhammo. Taṃ dhammaṃ pavattetīti – dhammacakkaṃ.
আধিপতেয্যট্ঠেন ইন্দ্রিযং ধম্মো। তং ধম্মং পৰত্তেতীতি – ধম্মচক্কং। অকম্পিযট্ঠেন বলং ধম্মো। তং ধম্মং পৰত্তেতীতি – ধম্মচক্কং। নিয্যানিকট্ঠেন বোজ্ঝঙ্গো ধম্মো। তং ধম্মং পৰত্তেতীতি – ধম্মচক্কং। হেতুট্ঠেন মগ্গো ধম্মো। তং ধম্মং পৰত্তেতীতি – ধম্মচক্কং। উপট্ঠানট্ঠেন সতিপট্ঠানা ধম্মো। তং ধম্মং পৰত্তেতীতি – ধম্মচক্কং। পদহনট্ঠেন সম্মপ্পধানা ধম্মো। তং ধম্মং পৰত্তেতীতি – ধম্মচক্কং। ইজ্ঝনট্ঠেন ইদ্ধিপাদা ধম্মো। তং ধম্মং পৰত্তেতীতি – ধম্মচক্কং। তথট্ঠেন সচ্চা ধম্মো। তং ধম্মং পৰত্তেতীতি – ধম্মচক্কং। অৰিক্খেপট্ঠেন সমথো ধম্মো। তং ধম্মং পৰত্তেতীতি – ধম্মচক্কং। অনুপস্সনট্ঠেন ৰিপস্সনা ধম্মো। তং ধম্মং পৰত্তেতীতি – ধম্মচক্কং। একরসট্ঠেন সমথৰিপস্সনা ধম্মো। তং ধম্মং পৰত্তেতীতি – ধম্মচক্কং। অনতিৰত্তনট্ঠেন যুগনদ্ধং ধম্মো। তং ধম্মং পৰত্তেতীতি – ধম্মচক্কং। সংৰরট্ঠেন সীলৰিসুদ্ধি ধম্মো। তং ধম্মং পৰত্তেতীতি – ধম্মচক্কং। অৰিক্খেপট্ঠেন চিত্তৰিসুদ্ধি ধম্মো। তং ধম্মং পৰত্তেতীতি – ধম্মচক্কং। দস্সনট্ঠেন দিট্ঠিৰিসুদ্ধি ধম্মো। তং ধম্মং পৰত্তেতীতি – ধম্মচক্কং। মুত্তট্ঠেন ৰিমোক্খো ধম্মো। তং ধম্মং পৰত্তেতীতি – ধম্মচক্কং। পটিৰেধট্ঠেন ৰিজ্জা ধম্মো। তং ধম্মং পৰত্তেতীতি – ধম্মচক্কং। পরিচ্চাগট্ঠেন ৰিমুত্তি ধম্মো । তং ধম্মং পৰত্তেতীতি – ধম্মচক্কং। সমুচ্ছেদট্ঠেন খযে ঞাণং ধম্মো। তং ধম্মং পৰত্তেতীতি – ধম্মচক্কং। পটিপ্পস্সদ্ধট্ঠেন অনুপ্পাদে ঞাণং ধম্মো। তং ধম্মং পৰত্তেতীতি – ধম্মচক্কং। ছন্দো মূলট্ঠেন ধম্মো। তং ধম্মো পৰত্তেতীতি – ধম্মচক্কং। মনসিকারো সমুট্ঠানট্ঠেন ধম্মো। তং ধম্মং পৰত্তেতীতি – ধম্মচক্কং। ফস্সো সমোধানট্ঠেন ধম্মো। তং ধম্মং পৰত্তেতীতি – ধম্মচক্কং। ৰেদনা সমোসরণট্ঠেন ধম্মো। তং ধম্মং পৰত্তেতীতি – ধম্মচক্কং। সমাধি পমুখট্ঠেন ধম্মো। তং ধম্মং পৰত্তেতীতি – ধম্মচক্কং। সতি আধিপতেয্যট্ঠেন ধম্মো। তং ধম্মং পৰত্তেতীতি – ধম্মচক্কং। পঞ্ঞা ততুত্তরট্ঠেন ধম্মো। তং ধম্মং পৰত্তেতীতি – ধম্মচক্কং। ৰিমুত্তি সারট্ঠেন ধম্মো। তং ধম্মং পৰত্তেতীতি – ধম্মচক্কং। অমতোগধং নিব্বানং পরিযোসানট্ঠেন ধম্মো। তং ধম্মং পৰত্তেতীতি – ধম্মচক্কং।
Ādhipateyyaṭṭhena indriyaṃ dhammo. Taṃ dhammaṃ pavattetīti – dhammacakkaṃ. Akampiyaṭṭhena balaṃ dhammo. Taṃ dhammaṃ pavattetīti – dhammacakkaṃ. Niyyānikaṭṭhena bojjhaṅgo dhammo. Taṃ dhammaṃ pavattetīti – dhammacakkaṃ. Hetuṭṭhena maggo dhammo. Taṃ dhammaṃ pavattetīti – dhammacakkaṃ. Upaṭṭhānaṭṭhena satipaṭṭhānā dhammo. Taṃ dhammaṃ pavattetīti – dhammacakkaṃ. Padahanaṭṭhena sammappadhānā dhammo. Taṃ dhammaṃ pavattetīti – dhammacakkaṃ. Ijjhanaṭṭhena iddhipādā dhammo. Taṃ dhammaṃ pavattetīti – dhammacakkaṃ. Tathaṭṭhena saccā dhammo. Taṃ dhammaṃ pavattetīti – dhammacakkaṃ. Avikkhepaṭṭhena samatho dhammo. Taṃ dhammaṃ pavattetīti – dhammacakkaṃ. Anupassanaṭṭhena vipassanā dhammo. Taṃ dhammaṃ pavattetīti – dhammacakkaṃ. Ekarasaṭṭhena samathavipassanā dhammo. Taṃ dhammaṃ pavattetīti – dhammacakkaṃ. Anativattanaṭṭhena yuganaddhaṃ dhammo. Taṃ dhammaṃ pavattetīti – dhammacakkaṃ. Saṃvaraṭṭhena sīlavisuddhi dhammo. Taṃ dhammaṃ pavattetīti – dhammacakkaṃ. Avikkhepaṭṭhena cittavisuddhi dhammo. Taṃ dhammaṃ pavattetīti – dhammacakkaṃ. Dassanaṭṭhena diṭṭhivisuddhi dhammo. Taṃ dhammaṃ pavattetīti – dhammacakkaṃ. Muttaṭṭhena vimokkho dhammo. Taṃ dhammaṃ pavattetīti – dhammacakkaṃ. Paṭivedhaṭṭhena vijjā dhammo. Taṃ dhammaṃ pavattetīti – dhammacakkaṃ. Pariccāgaṭṭhena vimutti dhammo . Taṃ dhammaṃ pavattetīti – dhammacakkaṃ. Samucchedaṭṭhena khaye ñāṇaṃ dhammo. Taṃ dhammaṃ pavattetīti – dhammacakkaṃ. Paṭippassaddhaṭṭhena anuppāde ñāṇaṃ dhammo. Taṃ dhammaṃ pavattetīti – dhammacakkaṃ. Chando mūlaṭṭhena dhammo. Taṃ dhammo pavattetīti – dhammacakkaṃ. Manasikāro samuṭṭhānaṭṭhena dhammo. Taṃ dhammaṃ pavattetīti – dhammacakkaṃ. Phasso samodhānaṭṭhena dhammo. Taṃ dhammaṃ pavattetīti – dhammacakkaṃ. Vedanā samosaraṇaṭṭhena dhammo. Taṃ dhammaṃ pavattetīti – dhammacakkaṃ. Samādhi pamukhaṭṭhena dhammo. Taṃ dhammaṃ pavattetīti – dhammacakkaṃ. Sati ādhipateyyaṭṭhena dhammo. Taṃ dhammaṃ pavattetīti – dhammacakkaṃ. Paññā tatuttaraṭṭhena dhammo. Taṃ dhammaṃ pavattetīti – dhammacakkaṃ. Vimutti sāraṭṭhena dhammo. Taṃ dhammaṃ pavattetīti – dhammacakkaṃ. Amatogadhaṃ nibbānaṃ pariyosānaṭṭhena dhammo. Taṃ dhammaṃ pavattetīti – dhammacakkaṃ.
‘‘তং খো পনিদং দুক্খং অরিযসচ্চং পরিঞ্ঞেয্য’’ন্তি…পে॰… পরিঞ্ঞাতন্তি পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি।
‘‘Taṃ kho panidaṃ dukkhaṃ ariyasaccaṃ pariññeyya’’nti…pe… pariññātanti pubbe ananussutesu dhammesu cakkhuṃ udapādi…pe… āloko udapādi.
চক্খুং উদপাদীতি – কেনট্ঠেন…পে॰… আলোকো উদপাদীতি – কেনট্ঠেন? চক্খুং উদপাদীতি – দস্সনট্ঠেন…পে॰… আলোকো উদপাদীতি – ওভাসট্ঠেন। চক্খুং ধম্মো, দস্সনট্ঠো অত্থো…পে॰… আলোকো ধম্মো, ওভাসট্ঠো অত্থো। ইমে পঞ্চ ধম্মা পঞ্চ অত্থা দুক্খৰত্থুকা সচ্চৰত্থুকা সচ্চারম্মণা সচ্চগোচরা সচ্চসঙ্গহিতা সচ্চপরিযাপন্না সচ্চে সমুদাগতা সচ্চে ঠিতা সচ্চে পতিট্ঠিতা।
Cakkhuṃ udapādīti – kenaṭṭhena…pe… āloko udapādīti – kenaṭṭhena? Cakkhuṃ udapādīti – dassanaṭṭhena…pe… āloko udapādīti – obhāsaṭṭhena. Cakkhuṃ dhammo, dassanaṭṭho attho…pe… āloko dhammo, obhāsaṭṭho attho. Ime pañca dhammā pañca atthā dukkhavatthukā saccavatthukā saccārammaṇā saccagocarā saccasaṅgahitā saccapariyāpannā sacce samudāgatā sacce ṭhitā sacce patiṭṭhitā.
ধম্মচক্কন্তি কেনট্ঠেন ধম্মচক্কং? ধম্মঞ্চ পৰত্তেতি চক্কঞ্চাতি – ধম্মচক্কং। চক্কঞ্চ পৰত্তেতি ধম্মঞ্চাতি – ধম্মচক্কং। ধম্মেন পৰত্তেতীতি – ধম্মচক্কং। ধম্মপরিযায পৰত্তেতীতি – ধম্মচক্কং। ধম্মে ঠিতো পৰত্তেতীতি – ধম্মচক্কং। ধম্মে পতিট্ঠিতো পৰত্তেতীতি – ধম্মচক্কং…পে॰… অমতোগধং নিব্বানং পরিযোসানট্ঠেন ধম্মো তং ধম্মং পৰত্তেতীতি – ধম্মচক্কং।
Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammapariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ…pe… amatogadhaṃ nibbānaṃ pariyosānaṭṭhena dhammo taṃ dhammaṃ pavattetīti – dhammacakkaṃ.
[খ-ঘ] ‘‘ইদং দুক্খসমুদযং অরিযসচ্চ’’ন্তি পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি…পে॰… ‘‘তং খো পনিদং দুক্খসমুদযং অরিযসচ্চং পহাতব্ব’’ন্তি…পে॰… ‘‘পহীন’’ন্তি পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি।
[Kha-gha] ‘‘idaṃ dukkhasamudayaṃ ariyasacca’’nti pubbe ananussutesu dhammesu cakkhuṃ udapādi…pe… āloko udapādi…pe… ‘‘taṃ kho panidaṃ dukkhasamudayaṃ ariyasaccaṃ pahātabba’’nti…pe… ‘‘pahīna’’nti pubbe ananussutesu dhammesu cakkhuṃ udapādi…pe… āloko udapādi.
চক্খুং উদপাদীতি – কেনট্ঠেন…পে॰… আলোকো উদপাদীতি – কেনট্ঠেন? চক্খুং উদপাদীতি – দস্সনট্ঠেন…পে॰… আলোকো উদপাদীতি – ওভাসট্ঠেন।
Cakkhuṃ udapādīti – kenaṭṭhena…pe… āloko udapādīti – kenaṭṭhena? Cakkhuṃ udapādīti – dassanaṭṭhena…pe… āloko udapādīti – obhāsaṭṭhena.
চক্খুং ধম্মো, দস্সনট্ঠো অত্থো…পে॰… আলোকো ধম্মো, ওভাসট্ঠো অত্থো। ইমে পঞ্চ ধম্মা পঞ্চ অত্থা সমুদযৰত্থুকা সচ্চৰত্থুকা…পে॰… নিরোধৰত্থুকা সচ্চৰত্থুকা…পে॰… মগ্গৰত্থুকা সচ্চৰত্থুকা সচ্চারম্মণা সচ্চগোচরা সচ্চসঙ্গহিতা সচ্চপরিযাপন্না সচ্চে সমুদাগতা সচ্চে ঠিতা সচ্চে পতিট্ঠিতা।
Cakkhuṃ dhammo, dassanaṭṭho attho…pe… āloko dhammo, obhāsaṭṭho attho. Ime pañca dhammā pañca atthā samudayavatthukā saccavatthukā…pe… nirodhavatthukā saccavatthukā…pe… maggavatthukā saccavatthukā saccārammaṇā saccagocarā saccasaṅgahitā saccapariyāpannā sacce samudāgatā sacce ṭhitā sacce patiṭṭhitā.
ধম্মচক্কন্তি কেনট্ঠেন ধম্মচক্কং? ধম্মঞ্চ পৰত্তেতি চক্কঞ্চাতি – ধম্মচক্কং। চক্কঞ্চ পৰত্তেতি ধম্মঞ্চাতি – ধম্মচক্কং। ধম্মেন পৰত্তেতীতি – ধম্মচক্কং। ধম্মচরিযায পৰত্তেতীতি – ধম্মচক্কং। ধম্মে ঠিতো পৰত্তেতীতি – ধম্মচক্কং। ধম্মে পতিট্ঠিতো পৰত্তেতীতি – ধম্মচক্কং…পে॰… অমতোগধং নিব্বানং পরিযোসানট্ঠেন ধম্মো। তং ধম্মং পৰত্তেতীতি – ধম্মচক্কং।
Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammacariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ…pe… amatogadhaṃ nibbānaṃ pariyosānaṭṭhena dhammo. Taṃ dhammaṃ pavattetīti – dhammacakkaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ১. সচ্চৰারৰণ্ণনা • 1. Saccavāravaṇṇanā
