Library / Tipiṭaka / д̇ибидага • Tipiṭaka / вибхан̇г̇а-анудийгаа • Vibhaṅga-anuṭīkā

    4. сажжавибхан̇г̇о

    4. Saccavibhaṅgo

    1. суд̇д̇анд̇абхааж̇анийяаван̣н̣анаа

    1. Suttantabhājanīyavaṇṇanā

    уд̣̇д̣̇зсаван̣н̣анаа

    Uddesavaṇṇanā

    189. сажжавинимуд̇д̇ам̣ над̇т̇и бавад̇д̇инивад̇д̇ид̇ад̣̇убхаяахзд̇усанд̣̇ассанавасзна бавад̇д̇анад̇о. сажжзсу гамад̇ийд̇и сажжзсу висаяабхууд̇зсу бавад̇д̇ад̇и. д̣̇зсзд̇аб̣б̣ад̇т̇ависаяаа хи д̣̇зсанаад̇и. зд̇зсу гамад̇ийд̇и зд̇зсу арияасажжзсу барин̃н̃аад̣̇игижжасаад̇ханавасзна бавад̇д̇ад̇и. ‘‘сийласамаад̇хибан̃н̃аасан̇каад̇а’’нд̇и вуд̇д̇ам̣ ад̇т̇асабхаавам̣ гаманагирияааяа гад̇д̇убхаавзна г̇ахид̇анд̇и баагадад̇арам̣ гад̇ваа д̣̇ассзд̇ум̣ ‘‘гим̣ гамад̇ий’’д̇и бужчад̇и. д̇аб̣б̣охаарзнаад̇и д̇ад̣̇убажаарзна. зд̇зна ниббарияааязна ад̇т̇асабхаавам̣ саасанам̣, барияааязна важанасабхааванд̇и д̣̇ассзд̇и.

    189. Saccavinimuttaṃnatthi pavattinivattitadubhayahetusandassanavasena pavattanato. Saccesu kamatīti saccesu visayabhūtesu pavattati. Desetabbatthavisayā hi desanāti. Etesu kamatīti etesu ariyasaccesu pariññādikiccasādhanavasena pavattati. ‘‘Sīlasamādhipaññāsaṅkhāta’’nti vuttaṃ atthasabhāvaṃ kamanakiriyāya kattubhāvena gahitanti pākaṭataraṃ katvā dassetuṃ ‘‘kiṃ kamatī’’ti pucchati. Tabbohārenāti tadupacārena. Etena nippariyāyena atthasabhāvaṃ sāsanaṃ, pariyāyena vacanasabhāvanti dasseti.

    д̇ам̣сабхааваад̇и д̣̇угкаад̣̇исабхааваа. амусаасабхааваад̇и б̣аад̇ханаад̣̇ибхаавзна бхууд̇асабхааваа. ан̃н̃аагаарарахид̇аад̇и аб̣аад̇ханаад̣̇иаагааравивид̇д̇аа. д̣̇вид̇хаад̇и д̣̇угкад̣̇угкад̇аад̇аннимид̇д̇ад̇аахи. рааг̇аад̣̇игилзсабарил̣аахо гилзсад̣̇аахо. санд̇аанасса авибпааригад̇аагаран̣ам̣ буг̇г̇алахим̣санам̣. ад̇д̇ано зва д̇икин̣абхаавод̇и сан̇кад̇ад̇хаммасса ад̇д̇ано сабхаавзнзва руж̇аавахад̇игкабхааво. сарасзнзваад̇и сабхаавзнзва. самбин̣д̣агасса самуд̣̇аяасса, гилзсасанд̇аабарахид̇асса маг̇г̇асса, авибарин̣аамасса нирод̇хасса д̣̇ассанзна яат̇аасан̇кяам̣ д̣̇угкасса сан̇кад̇асанд̇аабавибарин̣аамадтаа аави бхаванд̇ийд̇и ааха ‘‘ид̇арз яат̇ааггамам̣ самуд̣̇аяамаг̇г̇анирод̇хад̣̇ассанзхи аавибхаванаагаараа’’д̇и. б̣яаабзд̇ваад̇и бхаваад̣̇ийсу наанаарамман̣зсу жа висадаа худ̇ваа. анзгад̇т̇ад̇д̇аа д̇хаад̇уунам̣ ‘‘ууханам̣ раасигаран̣а’’нд̇и вад̇ваа буна д̇ад̣̇ад̇т̇ам̣ виварад̇и ‘‘д̣̇угканиб̣б̣ад̇д̇ана’’нд̇и. згавогаарабхавзби хи раасибхууд̇амзва д̣̇угкам̣ ниб̣б̣ад̇д̇ад̇и анзгад̇хаммасамуухад̇о , баг̇зва жад̇убан̃жавогаарабхавзсу. зд̇т̇а жа б̣яаабанад̇т̇ам̣ аагаарам̣, д̇асса жа яа-гаарааг̇амам̣ гад̇ваа самбин̣д̣анад̇т̇ам̣ ааяуухананд̇и бад̣̇ам̣ взд̣̇ид̇аб̣б̣ам̣. нид̣̇ад̣̇аад̇ийд̇и д̣̇угкасса зганд̇агааран̣ад̇д̇аа д̇ам̣ нид̣̇ассзнд̇ам̣ вияа ж̇анзд̇ийд̇и д̣̇ассзнд̇о ‘‘ид̣̇ам̣ д̇ам̣ д̣̇угка’’нд̇иаад̣̇имааха. д̣̇угка…бз… аави бхавад̇и рог̇ад̣̇ассанзна вияа рог̇анид̣̇аанам̣. сам̣яог̇а…бз… д̣̇ассанзхийд̇и сам̣яог̇адто висам̣яог̇асабхаавасса нирод̇хасса, балиб̣од̇хадто нияяаанасабхаавасса маг̇г̇асса д̣̇ассанзна аави бхавад̇ийд̇и ад̇т̇о. д̇зд̇и сам̣яог̇абалиб̣од̇хадтаа.

    Taṃsabhāvāti dukkhādisabhāvā. Amusāsabhāvāti bādhanādibhāvena bhūtasabhāvā. Aññākārarahitāti abādhanādiākāravivittā. Dvidhāti dukkhadukkhatātannimittatāhi. Rāgādikilesapariḷāho kilesadāho. Santānassa avipphārikatākaraṇaṃ puggalahiṃsanaṃ. Attano eva tikhiṇabhāvoti saṅkhatadhammassa attano sabhāveneva rujāvahatikkhabhāvo. Sarasenevāti sabhāveneva. Sampiṇḍakassa samudayassa, kilesasantāparahitassa maggassa, avipariṇāmassa nirodhassa dassanena yathāsaṅkhyaṃ dukkhassa saṅkhatasantāpavipariṇāmaṭṭhā āvi bhavantīti āha ‘‘itare yathākkamaṃ samudayamagganirodhadassanehi āvibhavanākārā’’ti. Byāpetvāti bhavādīsu nānārammaṇesu ca visaṭā hutvā. Anekatthattā dhātūnaṃ ‘‘ūhanaṃ rāsikaraṇa’’nti vatvā puna tadatthaṃ vivarati ‘‘dukkhanibbattana’’nti. Ekavokārabhavepi hi rāsibhūtameva dukkhaṃ nibbattati anekadhammasamūhato , pageva catupañcavokārabhavesu. Ettha ca byāpanatthaṃ ākāraṃ, tassa ca ya-kārāgamaṃ katvā sampiṇḍanatthaṃ āyūhananti padaṃ veditabbaṃ. Nidadātīti dukkhassa ekantakāraṇattā taṃ nidassentaṃ viya janetīti dassento ‘‘idaṃ taṃ dukkha’’ntiādimāha. Dukkha…pe… āvi bhavati rogadassanena viya roganidānaṃ. Saṃyoga…pe… dassanehīti saṃyogaṭṭho visaṃyogasabhāvassa nirodhassa, palibodhaṭṭho niyyānasabhāvassa maggassa dassanena āvi bhavatīti attho. Teti saṃyogapalibodhaṭṭhā.

    зд̇т̇аад̇и зд̇асмим̣ аарамман̣абхууд̇з сад̇и. самуд̣̇аяад̇о вивзго вивзгадто. нирод̇хо жа д̇ан̣хаагкаяабхаавад̇о самуд̣̇аяад̇о вивид̇д̇о, д̇асмаа авивзгабхууд̇асса самуд̣̇аяасса д̣̇ассанзна нирод̇хасса вивзгадто аави бхавад̇и, ниб̣б̣аанаад̇хиг̇амахзд̇убхууд̇ассааби маг̇г̇асса саббажжаяад̇ааяа сан̇кад̇абхаавам̣ бассад̇о аббажжаяасса нирод̇хасса асан̇кад̇адто аави бхавад̇и, д̇ат̇аа маран̣ад̇хаммад̇ааяа д̣̇угкам̣ винассанд̇ам̣ бассад̇о амаран̣ад̇хаммасса нирод̇хасса амад̇адто аави бхавад̇ийд̇и имамад̇т̇ам̣ д̣̇ассзд̇и ‘‘вивзгаа’’д̇иаад̣̇инаа. ид̇арз самуд̣̇аяанирод̇хад̣̇угкад̣̇ассанзхийд̇и зд̇т̇а самуд̣̇аяад̣̇ассанзна ‘‘нааяам̣ хзд̇у ниб̣б̣аанаад̇хиг̇амааяа, аяам̣ бана хзд̇уу’’д̇и хзд̇удто аави бхавад̇и. д̇ат̇аа барамаг̇амбхийрасса нибун̣ад̇арасса д̣̇уд̣̇д̣̇асасса нирод̇хасса д̣̇ассанзна д̣̇ассанадто сукумаруубад̣̇ассанзна жагкуно вияа, д̣̇угкад̣̇ассанзна бана анзгарог̇аад̇урагабан̣аж̇анад̣̇ассанзна иссараж̇анасса ул̣аарабхааво вияа маг̇г̇асса аад̇хибад̇зяяадто аави бхавад̇и.

    Etthāti etasmiṃ ārammaṇabhūte sati. Samudayato viveko vivekaṭṭho. Nirodho ca taṇhākkhayabhāvato samudayato vivitto, tasmā avivekabhūtassa samudayassa dassanena nirodhassa vivekaṭṭho āvi bhavati, nibbānādhigamahetubhūtassāpi maggassa sappaccayatāya saṅkhatabhāvaṃ passato appaccayassa nirodhassa asaṅkhataṭṭho āvi bhavati, tathā maraṇadhammatāya dukkhaṃ vinassantaṃ passato amaraṇadhammassa nirodhassa amataṭṭho āvi bhavatīti imamatthaṃ dasseti ‘‘vivekā’’tiādinā. Itare samudayanirodhadukkhadassanehīti ettha samudayadassanena ‘‘nāyaṃ hetu nibbānādhigamāya, ayaṃ pana hetū’’ti hetuṭṭho āvi bhavati. Tathā paramagambhīrassa nipuṇatarassa duddasassa nirodhassa dassanena dassanaṭṭho sukhumarūpadassanena cakkhuno viya, dukkhadassanena pana anekarogāturakapaṇajanadassanena issarajanassa uḷārabhāvo viya maggassa ādhipateyyaṭṭho āvi bhavati.

    д̇з банзд̇з хзд̇удтаад̣̇игз саруубад̇о д̣̇ассзд̇ум̣ ‘‘д̇ад̇т̇а балиб̣од̇хубажчзд̣̇авасзнаа’’д̇иаад̣̇и вуд̇д̇ам̣. д̇ад̇т̇а балиб̣од̇хубажчзд̣̇авасзнаад̇и самуд̣̇аяаббахаанавасзна. ‘‘маг̇г̇аад̇хибад̇ино д̇хаммаа’’д̇и важанад̇од̇и яасмаа сад̇иби жхаанаад̣̇ийнам̣ аарамман̣аад̇хибад̇ибхаавз ‘‘жхаанаад̇хибад̇ино д̇хаммаа’’д̇и звамаад̣̇и на вуд̇д̇ам̣, ‘‘маг̇г̇аад̇хибад̇ино д̇хаммаа’’ ижжзва бана вуд̇д̇ам̣. д̇асмаа саад̇исаяо маг̇г̇ан̇г̇ад̇хаммаанам̣ аарамман̣аад̇хибад̇ибхааво. д̇знааха ‘‘висзсад̇о ваа аарамман̣аад̇хибад̇ибхууд̇аа маг̇г̇ан̇г̇ад̇хаммаа хонд̇ий’’д̇и. со д̇зсам̣ аагаарод̇и яо маг̇г̇ан̇г̇аанам̣ г̇арум̣ гад̇ваа бажжавзгкан̣авасзна бавад̇д̇ад̇хаммаанам̣ аарамман̣аад̇хибад̇ибажжаяад̇аасан̇каад̇о аагааро, со маг̇г̇асса аад̇хибад̇зяяадто. буримо бана аад̇хибад̇зяяадто сахаж̇аад̇аад̇хибад̇ивасзна вуд̇д̇о. абхисамзд̇аб̣б̣адтод̇и яат̇аавуд̇д̇абийл̣анаад̣̇иад̇т̇амзва бадивиж̇жхид̇аб̣б̣ад̇ааяа згаж̇жхам̣ гад̇ваа вад̣̇ад̇и. д̇зна абхисамаяасад̣̇д̣̇ам̣ гаммад̇т̇ам̣ д̣̇ассзд̇и. абхисамаяассаад̇и н̃аан̣асса. бавад̇д̇иаагаарод̇и бариж̇аананаад̣̇ивисзсаагааро. со хи маг̇г̇агкан̣з асаммохад̇о сид̣̇д̇хо, бажчаа бажжавзгкан̣аад̣̇инаа баагадо ход̇и. аагаароби н̃аан̣зна аран̣ийяад̇о ад̇т̇од̇и вужжад̇ийд̇и гад̇ваа д̇ад̇ияанаяо д̣̇ассид̇о. бийл̣анаад̣̇инаа д̣̇ассид̇о висаяавибхааг̇знаби висаяивибхааг̇о ход̇и яат̇аа ‘‘руубасан̃н̃аа, сад̣̇д̣̇асан̃н̃аа’’д̇и (сам̣. ни. 3.57).

    Te panete hetuṭṭhādike sarūpato dassetuṃ ‘‘tattha palibodhupacchedavasenā’’tiādi vuttaṃ. Tattha palibodhupacchedavasenāti samudayappahānavasena. ‘‘Maggādhipatino dhammā’’ti vacanatoti yasmā satipi jhānādīnaṃ ārammaṇādhipatibhāve ‘‘jhānādhipatino dhammā’’ti evamādi na vuttaṃ, ‘‘maggādhipatino dhammā’’ icceva pana vuttaṃ. Tasmā sātisayo maggaṅgadhammānaṃ ārammaṇādhipatibhāvo. Tenāha ‘‘visesato vā ārammaṇādhipatibhūtā maggaṅgadhammā hontī’’ti. So tesaṃ ākāroti yo maggaṅgānaṃ garuṃ katvā paccavekkhaṇavasena pavattadhammānaṃ ārammaṇādhipatipaccayatāsaṅkhāto ākāro, so maggassa ādhipateyyaṭṭho. Purimo pana ādhipateyyaṭṭho sahajātādhipativasena vutto. Abhisametabbaṭṭhoti yathāvuttapīḷanādiatthameva paṭivijjhitabbatāya ekajjhaṃ katvā vadati. Tena abhisamayasaddaṃ kammatthaṃ dasseti. Abhisamayassāti ñāṇassa. Pavattiākāroti parijānanādivisesākāro. So hi maggakkhaṇe asammohato siddho, pacchā paccavekkhaṇādinā pākaṭo hoti. Ākāropi ñāṇena araṇīyato atthoti vuccatīti katvā tatiyanayo dassito. Pīḷanādinā dassito visayavibhāgenapi visayivibhāgo hoti yathā ‘‘rūpasaññā, saddasaññā’’ti (saṃ. ni. 3.57).

    гужчид̇ам̣ канд̇и г̇арахид̇ам̣ худ̇ваа асаарам̣. ‘‘самааг̇амо’’д̇иаад̣̇инаа анваяад̇о б̣яад̇ирзгад̇о жа сам̣-сад̣̇д̣̇асса сам̣яог̇ад̇т̇аж̇од̇агад̇д̇амааха. ‘‘уббаннам̣ уд̣̇ид̇а’’нд̇иаад̣̇ийсу гзваласса банна-сад̣̇д̣̇асса, ид̇а-сад̣̇д̣̇асса жа баяог̇з уббад̇д̇иад̇т̇асса анубалаб̣бханад̇о, у-сад̣̇д̣̇асса жа баяог̇з убалаб̣бханад̇о со уббад̇д̇иад̇т̇ам̣ д̣̇ийбзд̇ийд̇и ааха ‘‘звам̣ уббаннам̣ уд̣̇ид̇анд̇и зд̇т̇аабий’’д̇и. висум̣ баяуж̇ж̇амаанаад̇и ааг̇ама-ид̇а-бад̣̇зхи винаа баяуж̇ж̇амаанаа. сад̇хаад̇уганд̇и анд̇онийд̇зна д̇хаад̇унаа сад̇хаад̇угам̣. д̇знзва д̇з ‘‘убасаг̇г̇аа’’д̇и жа вуд̇д̇аа.

    Kucchitaṃkhanti garahitaṃ hutvā asāraṃ. ‘‘Samāgamo’’tiādinā anvayato byatirekato ca saṃ-saddassa saṃyogatthajotakattamāha. ‘‘Uppannaṃ udita’’ntiādīsu kevalassa panna-saddassa, ita-saddassa ca payoge uppattiatthassa anupalabbhanato, u-saddassa ca payoge upalabbhanato so uppattiatthaṃ dīpetīti āha ‘‘evaṃ uppannaṃ uditanti etthāpī’’ti. Visuṃ payujjamānāti āgama-ita-padehi vinā payujjamānā. Sadhātukanti antonītena dhātunā sadhātukaṃ. Teneva te ‘‘upasaggā’’ti ca vuttā.

    д̣̇угкавивзгабхааванд̇и д̣̇угкавивид̇д̇ад̇ам̣. нивад̇д̇ияаад̇и ниб̣б̣аанасса. нивад̇д̇зд̇ваад̇и ануббаад̣̇асад̣̇д̣̇зна висзсанавасзна нивад̇д̇зд̇ваа. нирод̇хабажжаяад̇аа нирод̇хасса маг̇г̇асса аарамман̣абажжаяад̇аа. буг̇г̇аласажчигирияаад̇хаммабхаавзхийд̇и буг̇г̇алад̇хаммабхаавзна сажчигаран̣ад̇хаммабхаавзна жа. паланд̇и арияапалам̣. д̇ассаад̇и нидтаанабхууд̇ааяа паласан̇каад̇ааяа д̣̇угканирод̇хаббад̇д̇ияаа абхисамаяабхууд̇ааяа д̣̇угканирод̇хаббад̇д̇ияаа бадибад̣̇ад̇аа д̣̇адтаб̣б̣аа.

    Dukkhavivekabhāvanti dukkhavivittataṃ. Nivattiyāti nibbānassa. Nivattetvāti anuppādasaddena visesanavasena nivattetvā. Nirodhapaccayatā nirodhassa maggassa ārammaṇapaccayatā. Puggalasacchikiriyādhammabhāvehīti puggaladhammabhāvena sacchikaraṇadhammabhāvena ca. Phalanti ariyaphalaṃ. Tassāti niṭṭhānabhūtāya phalasaṅkhātāya dukkhanirodhappattiyā abhisamayabhūtāya dukkhanirodhappattiyā paṭipadatā daṭṭhabbā.

    бадивиж̇жханагаалз ниббарияааязна б̣уд̣̇д̇хаад̣̇исаман̃н̃аад̇и ааха ‘‘бадивид̣̇д̇хагаалз бавад̇д̇а’’нд̇и. д̇ад̇о зваад̇и д̇зна багаасид̇ад̇д̇аа зва.

    Paṭivijjhanakāle nippariyāyena buddhādisamaññāti āha ‘‘paṭividdhakāle pavatta’’nti. Tato evāti tena pakāsitattā eva.

    д̇аннимид̇д̇абхаавод̇и ж̇аад̇иаад̣̇и вияа ад̇хидтаанабхаавзна д̣̇угкасса гааран̣абхааво, на самуд̣̇аяасажжам̣ вияа бабхавабхаавзна. уд̣̇аяаб̣б̣аяабийл̣ид̇абхааво сан̇каарад̣̇угкад̇аа. бавад̇д̇анамзваад̇и бавад̇д̇и зва. гижжам̣ расод̇и расасса гижжад̇т̇ад̇ам̣ д̣̇ассзд̇и. бавад̇д̇инивад̇д̇ийсууд̇и нид̣̇д̇хааран̣з бхуммам̣. авигаарад̇аа вигаараабхааво нижжад̇аа.

    Tannimittabhāvoti jātiādi viya adhiṭṭhānabhāvena dukkhassa kāraṇabhāvo, na samudayasaccaṃ viya pabhavabhāvena. Udayabbayapīḷitabhāvo saṅkhāradukkhatā. Pavattanamevāti pavatti eva. Kiccaṃ rasoti rasassa kiccatthataṃ dasseti. Pavattinivattīsūti niddhāraṇe bhummaṃ. Avikāratā vikārābhāvo niccatā.

    марийжимааяааад̇д̇аананд̇и марийжияаа мааяааяа ад̇д̇ано жа арияан̃аан̣ассаад̇и арияаанам̣ н̃аан̣асса. д̇зна арияаанам̣ маг̇г̇ан̃аан̣аанусаарзна бавад̇д̇анаган̃аан̣амби сан̇г̇ахид̇ам̣ ход̇и. д̇знааха ‘‘авид̇ат̇аг̇аахагассаа’’д̇иаад̣̇и . д̇зсанд̇и бадивзд̇хабажжавзгкан̣ан̃аан̣аанам̣. д̇ад̇т̇а бадивзд̇хан̃аан̣асса бадивиж̇жхид̇аб̣б̣ад̇аа г̇ожарабхааво, ид̇арасса аарамман̣абхааво. бадивиж̇жхид̇аб̣б̣ад̇аа, аарамман̣абхааво ваа бадивзд̇хан̃аан̣асса г̇ожарабхааво, ид̇арасса аарамман̣абхаавова.

    Marīcimāyāattānanti marīciyā māyāya attano ca ariyañāṇassāti ariyānaṃ ñāṇassa. Tena ariyānaṃ maggañāṇānusārena pavattanakañāṇampi saṅgahitaṃ hoti. Tenāha ‘‘avitathagāhakassā’’tiādi . Tesanti paṭivedhapaccavekkhaṇañāṇānaṃ. Tattha paṭivedhañāṇassa paṭivijjhitabbatā gocarabhāvo, itarassa ārammaṇabhāvo. Paṭivijjhitabbatā, ārammaṇabhāvo vā paṭivedhañāṇassa gocarabhāvo, itarassa ārammaṇabhāvova.

    б̣аад̇хагаббабхавабхаавзнаад̇и б̣аад̇хагасса уббаад̣̇агабхаавзна висум̣ г̇ахид̇ад̇д̇аа на д̇ан̣хаа б̣аад̇хагабхаавзна г̇ахид̇аа бавад̇д̇ибавад̇д̇ихзд̇уунам̣ асан̇гаравасзна б̣од̇ханад̇о. зван̃жа гад̇ваа абхид̇хаммабхааж̇анийязби аяамад̇т̇аван̣н̣анаа яуж̇ж̇ад̇зва . яад̣̇иби звам̣ ‘‘д̣̇угкамзва б̣аад̇хага’’нд̇и нияамаанубабад̇д̇и, самуд̣̇аяабхааваббасан̇г̇о жаад̇и жод̣̇анам̣ санд̇хааяааха ‘‘ж̇аад̇иаад̣̇ийнам̣ вияа ваа’’д̇иаад̣̇и. б̣аад̇хагад̇д̇асса б̣аад̇хагад̇д̇з жа нияамод̇и ааха ‘‘д̣̇вид̇хааби б̣аад̇хагад̇т̇аавад̇хааран̣знаа’’д̇и. яат̇аа хи б̣аад̇хагад̇д̇асса д̣̇угкз нияад̇ад̇аа, звам̣ д̣̇угкасса жа б̣аад̇хагад̇д̇з нияад̇ад̇аад̇и. суд̇д̇анд̇абхааж̇анийяз д̇ан̣хааяа зва самуд̣̇аяабхаавасса д̣̇ассид̇ад̇д̇аа д̇ан̣хаавасзна нияамам̣ д̣̇ассзнд̇о ‘‘на д̇ан̣хааяа винаа’’д̇иаад̣̇имааха. суд̇д̇анд̇абхааж̇анийяаван̣н̣анаа хзсаад̇и. ‘‘гусалзхи винаа’’д̇иаад̣̇инаа д̣̇угкахзд̇уд̇ааяа д̇ан̣хааяа бад̇хаанабхаавамааха. д̇ат̇аа хи саа гаммавижид̇д̇ад̇ааяа хзд̇убхаавам̣ г̇ажчанд̇ий висзсзна гаммасса сахагааригааран̣ам̣ ход̇ийд̇и. д̣̇вид̇хааби нияамзнаад̇и маг̇г̇ова нияяаанам̣, нияяаанамзва жа маг̇г̇од̇и д̣̇виббагаарзна нияамзна.

    Bādhakappabhavabhāvenāti bādhakassa uppādakabhāvena visuṃ gahitattā na taṇhā bādhakabhāvena gahitā pavattipavattihetūnaṃ asaṅkaravasena bodhanato. Evañca katvā abhidhammabhājanīyepi ayamatthavaṇṇanā yujjateva . Yadipi evaṃ ‘‘dukkhameva bādhaka’’nti niyamānupapatti, samudayabhāvappasaṅgo cāti codanaṃ sandhāyāha ‘‘jātiādīnaṃ viya vā’’tiādi. Bādhakattassa bādhakatte ca niyamoti āha ‘‘dvidhāpi bādhakatthāvadhāraṇenā’’ti. Yathā hi bādhakattassa dukkhe niyatatā, evaṃ dukkhassa ca bādhakatte niyatatāti. Suttantabhājanīye taṇhāya eva samudayabhāvassa dassitattā taṇhāvasena niyamaṃ dassento ‘‘na taṇhāya vinā’’tiādimāha. Suttantabhājanīyavaṇṇanā hesāti. ‘‘Kusalehi vinā’’tiādinā dukkhahetutāya taṇhāya padhānabhāvamāha. Tathā hi sā kammavicittatāya hetubhāvaṃ gacchantī visesena kammassa sahakārikāraṇaṃ hotīti. Dvidhāpi niyamenāti maggova niyyānaṃ, niyyānameva ca maggoti dvippakārena niyamena.

    важийсажжам̣ сажжаваажаа, д̇ам̣самудтаабигаа жзд̇анаа жаад̇и ааха ‘‘вирад̇исажжзд̇и мусааваад̣̇авирад̇ияа’’нд̇и. гзжи бана ‘‘вирад̇исажжам̣ самаад̣̇аанавирад̇ий’’д̇и вад̣̇анд̇и, д̇зсамби на самаад̣̇аанамад̇д̇ам̣ вирад̇исажжам̣, ат̇а ко самаад̣̇аанаависам̣ваад̣̇анам̣. д̇ам̣ бана бадин̃н̃аасажжад̇д̇аа мусааваад̣̇авирад̇иязва ход̇и. д̇знааха ‘‘на хи ан̃н̃авирад̇ийсу сажжасад̣̇д̣̇о нирул̣хо’’д̇и. сад̇иби д̣̇угкасамуд̣̇аяааваб̣од̇хз яаавад̣̇зва нирод̇хамаг̇г̇аад̇хиг̇амад̇т̇аа бан̃н̃аабхааванаад̇и бажчимад̣̇ваяассзва сажжад̇т̇ам̣ саад̇исаяам̣, д̇ад̣̇ад̇хиг̇амасса жа авиваад̣̇ахзд̇угам̣ суд̇д̇з вибхаавид̇ам̣ д̣̇ассзнд̇о ‘‘д̇асса банаа’’д̇иаад̣̇имааха.

    Vacīsaccaṃ saccavācā, taṃsamuṭṭhāpikā cetanā cāti āha ‘‘viratisacceti musāvādaviratiya’’nti. Keci pana ‘‘viratisaccaṃ samādānaviratī’’ti vadanti, tesampi na samādānamattaṃ viratisaccaṃ, atha kho samādānāvisaṃvādanaṃ. Taṃ pana paṭiññāsaccattā musāvādaviratiyeva hoti. Tenāha ‘‘na hi aññaviratīsu saccasaddo niruḷho’’ti. Satipi dukkhasamudayāvabodhe yāvadeva nirodhamaggādhigamatthā paññābhāvanāti pacchimadvayasseva saccatthaṃ sātisayaṃ, tadadhigamassa ca avivādahetukaṃ sutte vibhāvitaṃ dassento ‘‘tassa panā’’tiādimāha.

    таанам̣ над̇т̇ийд̇и ад̇д̇ано ваад̣̇абад̇идтаабанагааран̣ам̣ над̇т̇ийд̇и ад̇т̇о. ад̇д̇абхаавабадилаабхзнзва сад̇д̇аанам̣ ж̇аад̇иаад̣̇ийнам̣ бад̇д̇и саммукийбхааво жа ж̇ааяад̇ийд̇и ааха ‘‘самбад̇д̇ад̇аа, бажжагкад̇аа жа батамад̇аа’’д̇и. бхаг̇авад̇о д̣̇зсанааггамзнзва ваа батамаад̣̇ид̇аа д̣̇адтаб̣б̣аа.

    Ṭhānaṃ natthīti attano vādapatiṭṭhāpanakāraṇaṃ natthīti attho. Attabhāvapaṭilābheneva sattānaṃ jātiādīnaṃ patti sammukhībhāvo ca jāyatīti āha ‘‘sampattatā, paccakkhatā ca paṭhamatā’’ti. Bhagavato desanākkameneva vā paṭhamāditā daṭṭhabbā.

    бариж̇ананаад̣̇ийхийд̇и барин̃н̃ааббахаанасажчигирияаабхааванаахи, ниссаггаважанан̃жзд̇ам̣ ан̃н̃асад̣̇д̣̇абзгкааяа. д̇хамман̃аан̣агижжанд̇и сабхаавад̇хаммааваб̣од̇хагижжам̣. барин̃н̃зяяаад̣̇ийни зд̇аббарамаанзваад̇и ид̇о барам̣ нзяяам̣ над̇т̇ийд̇и д̣̇ассзд̇и.

    Parijananādīhīti pariññāppahānasacchikiriyābhāvanāhi, nissakkavacanañcetaṃ aññasaddapekkhāya. Dhammañāṇakiccanti sabhāvadhammāvabodhakiccaṃ. Pariññeyyādīni etapparamānevāti ito paraṃ neyyaṃ natthīti dasseti.

    д̣̇угкаад̣̇ийнам̣ арияасажжабхаавасса ануруубам̣ яуд̇д̇ам̣, аажарияабарамбарааг̇ад̇ам̣ ваа саванам̣ ануссаво. суд̇аанусаарзна, ан̃н̃ат̇аа ваа гагкал̣апусанаад̣̇ианижжаад̣̇исабхаавасааман̃н̃аагаарабариг̇г̇ан̣ханам̣ аагаарабаривид̇агго. яат̇аавид̇аггид̇аагаарасса д̣̇идтисан̇каад̇ааяа д̣̇ассанабхууд̇ааяа бан̃н̃ааяа ниж̇жхаанагкаманам̣ рожанам̣ д̣̇идтиниж̇жхаанагканд̇и . аад̣̇ижжо вияа бабхааяа нирод̇хам̣ пусад̇и сажчигарод̇и гилзсанд̇хагаарам̣ вид̣̇д̇хам̣сзд̇и. жад̇д̇аариби сажжаани бассад̇ийд̇и вуд̇д̇ам̣ ‘‘яо, бхигкавз, д̣̇угкам̣ бассад̇ий’’д̇иаад̣̇инаа.

    Dukkhādīnaṃ ariyasaccabhāvassa anurūpaṃ yuttaṃ, ācariyaparamparāgataṃ vā savanaṃ anussavo. Sutānusārena, aññathā vā kakkhaḷaphusanādianiccādisabhāvasāmaññākārapariggaṇhanaṃ ākāraparivitakko. Yathāvitakkitākārassa diṭṭhisaṅkhātāya dassanabhūtāya paññāya nijjhānakkhamanaṃ rocanaṃ diṭṭhinijjhānakkhanti. Ādicco viya pabhāya nirodhaṃ phusati sacchikaroti kilesandhakāraṃ viddhaṃseti. Cattāripi saccāni passatīti vuttaṃ ‘‘yo, bhikkhave, dukkhaṃ passatī’’tiādinā.

    гааланд̇арад̣̇ассананд̇и наанаабхисамаяам̣ вад̣̇ад̇и. згад̣̇ассинод̇и згасажжад̣̇ассино. на яож̇зд̇аб̣б̣аа сияаад̇и яож̇анааяан̃жа саб̣б̣ад̣̇ассанам̣ д̣̇ассананд̇арабараманд̇и д̣̇ассанаанубарамо аабаж̇ж̇зяяа, сажжаанан̃жа наанаабхисамаяз д̣̇угкад̣̇ассанаад̣̇ийхи батамамаг̇г̇аад̣̇иббахзяяаанам̣ сам̣яож̇анад̇д̇аяаад̣̇ийнам̣ згад̣̇зсаббахаанам̣ аабаж̇ж̇ад̇и. д̇ат̇аа жа сад̇и згад̣̇зсасод̇аабад̇д̇имаг̇г̇адтад̇аа, д̇ад̣̇ананд̇аран̃жа бад̇д̇аб̣б̣зна палзна згад̣̇зсасод̇аабаннад̇аа жа аабаж̇ж̇ад̇и, д̇асмаа на сажжаанам̣ наанаабхисамаяо яуд̇д̇о. яат̇аа жа наанаабхисамаяо на яуд̇д̇о, звам̣ аарамман̣аабхисамаяоби. яад̣̇и хи аарамман̣агаран̣зна жад̇усажжаабхисамаяо ижчид̇о, на маг̇г̇о саяамзва ад̇д̇аанам̣ аарамман̣ам̣ гарод̇ийд̇и абарибун̣н̣о сажжаабхисамаяо сияаа. ан̃н̃зна маг̇г̇зна маг̇г̇о ааламб̣ийяад̇ийд̇и барибун̣н̣оваад̇и жз? звам̣ сад̇и язна маг̇г̇зна маг̇г̇о ааламб̣ид̇о, соби ан̃н̃зна, соби ан̃н̃знаад̇и анавадтаанам̣ сияаа, д̇асмаа на аарамман̣абадивзд̇хад̇о жад̇усажжаабхисамаяо яуд̇д̇о, вуд̇д̇анаязнзва бана яуд̇д̇о. гин̃жа барижчинд̣̇ид̇аб̣б̣ам̣ самужчинд̣̇ид̇аб̣б̣ан̃жа ааламб̣ид̇ваа барижчзд̣̇асамужчзд̣̇абхааванаа маг̇г̇ан̃аан̣асса на яуд̇д̇аа д̇ад̇о аниссадабхаавад̇о, саб̣б̣асан̇кад̇авиниссадам̣ ниб̣б̣аанамзва бана аарамман̣ад̇аа яуд̇д̇аа. ахзд̇угад̣̇идти агирияад̣̇идтиг̇г̇ахан̣зна г̇ахид̇аа хзд̇уб̣яаабаарова барамад̇т̇ад̇о гирияаад̇и гад̇ваа.

    Kālantaradassananti nānābhisamayaṃ vadati. Ekadassinoti ekasaccadassino. Na yojetabbā siyāti yojanāyañca sabbadassanaṃ dassanantaraparamanti dassanānuparamo āpajjeyya, saccānañca nānābhisamaye dukkhadassanādīhi paṭhamamaggādippaheyyānaṃ saṃyojanattayādīnaṃ ekadesappahānaṃ āpajjati. Tathā ca sati ekadesasotāpattimaggaṭṭhatā, tadanantarañca pattabbena phalena ekadesasotāpannatā ca āpajjati, tasmā na saccānaṃ nānābhisamayo yutto. Yathā ca nānābhisamayo na yutto, evaṃ ārammaṇābhisamayopi. Yadi hi ārammaṇakaraṇena catusaccābhisamayo icchito, na maggo sayameva attānaṃ ārammaṇaṃ karotīti aparipuṇṇo saccābhisamayo siyā. Aññena maggena maggo ālambīyatīti paripuṇṇovāti ce? Evaṃ sati yena maggena maggo ālambito, sopi aññena, sopi aññenāti anavaṭṭhānaṃ siyā, tasmā na ārammaṇapaṭivedhato catusaccābhisamayo yutto, vuttanayeneva pana yutto. Kiñca paricchinditabbaṃ samucchinditabbañca ālambitvā paricchedasamucchedabhāvanā maggañāṇassa na yuttā tato anissaṭabhāvato, sabbasaṅkhatavinissaṭaṃ nibbānameva pana ārammaṇatā yuttā. Ahetukadiṭṭhi akiriyadiṭṭhiggahaṇena gahitā hetubyāpārova paramatthato kiriyāti katvā.

    бавад̇д̇зд̇ийд̇и саж̇ж̇ад̇и, бавад̇д̇ияаа ваа хзд̇у ход̇и. нивад̇д̇зд̇ийд̇и сам̣харад̇и балаяам̣ г̇амзд̇и, балогад̇аад̣̇ивасзна ваа могкахзд̇у ход̇и. бад̇хаанад̇од̇и багад̇ид̇о, яам̣ ‘‘аб̣яад̇д̇а’’нд̇иби вужжад̇и.

    Pavattetīti sajjati, pavattiyā vā hetu hoti. Nivattetīti saṃharati palayaṃ gameti, palokatādivasena vā mokkhahetu hoti. Padhānatoti pakatito, yaṃ ‘‘abyatta’’ntipi vuccati.

    ‘‘гаало гарод̇и бхууд̇аани, гаало сам̣харад̇ий баж̇аа;

    ‘‘Kālo karoti bhūtāni, kālo saṃharatī pajā;

    гаало суд̇д̇з ж̇ааг̇арад̇и, гаало хи д̣̇урад̇иггамо’’д̇и. –

    Kālo sutte jāgarati, kālo hi duratikkamo’’ti. –

    звам̣ваад̣̇аа гаалаваад̣̇ино. ‘‘ган̣дагасса д̇икин̣ад̇аа, габидтапалаад̣̇ийнам̣ бариман̣д̣алад̇аа, миг̇абагкисарийсабаад̣̇ийнам̣ вижид̇д̇абхаавод̇и звамаад̣̇аяо гзна гаарид̇аа? сабхаавзнзва сид̣̇д̇хаа, звам̣ саб̣б̣амби, на зд̇т̇а гассажи гаамагааро’’д̇и звам̣ваад̣̇аа сабхаававаад̣̇ино. ‘‘лого нияад̇о ажчзж̇ж̇асуд̇д̇аавуд̇аабхзж̇ж̇аман̣исад̣̇исо , на зд̇т̇а гассажи бурисагааро’’д̇и звам̣бавад̇д̇аваад̣̇аа нияад̇иваад̣̇ино, –

    Evaṃvādā kālavādino. ‘‘Kaṇṭakassa tikhiṇatā, kapiṭṭhaphalādīnaṃ parimaṇḍalatā, migapakkhisarīsapādīnaṃ vicittabhāvoti evamādayo kena kāritā? Sabhāveneva siddhā, evaṃ sabbampi, na ettha kassaci kāmakāro’’ti evaṃvādā sabhāvavādino. ‘‘Loko niyato acchejjasuttāvutābhejjamaṇisadiso , na ettha kassaci purisakāro’’ti evaṃpavattavādā niyativādino, –

    ‘‘яад̣̇ижчааяа бавад̇д̇анд̇и, яад̣̇ижчааяа нивад̇д̇арз;

    ‘‘Yadicchāya pavattanti, yadicchāya nivattare;

    яад̣̇ижчааяа сукад̣̇угкам̣, д̇асмаа яад̣̇ижчад̇ий баж̇аа’’д̇и. –

    Yadicchāya sukhadukkhaṃ, tasmā yadicchatī pajā’’ti. –

    звам̣бавад̇д̇аваад̣̇аа яад̣̇ижчааваад̣̇исан̇каад̇аа ад̇хижжасамуббад̇д̇иваад̣̇ино жа зд̇т̇а сабхаававаад̣̇з зва анд̇ог̇ад̇хаад̇и д̣̇адтаб̣б̣аа. ан̣уухи лого бавад̇д̇ад̇ийд̇и ааж̇ийвагаваад̣̇ам̣ санд̇хааяааха. со хи агааран̣абариг̇г̇ахо. ган̣аад̣̇аваад̣̇о бана иссарижчаавасзна ан̣уунам̣ сам̣яог̇авияог̇ад̇о логасса бавад̇д̇инивад̇д̇им̣ вад̣̇ад̇и. бад̇хаанасса аббавад̇д̇ийд̇и махад̇аад̣̇ибхаавзна абарин̣аамо, анабхиб̣яад̇д̇и ваа. ‘‘ахаман̃н̃о, багад̇и ан̃н̃аа’’д̇и звам̣ бавад̇д̇абагад̇ибурисанд̇араж̇аананзна ад̇д̇асукад̣̇угкамохзсу авибхааг̇аг̇г̇ахан̣з нивад̇д̇ид̇з гира вуд̇д̇анаязна бад̇хаанам̣ наббавад̇д̇ад̇и, со вимогкод̇и гаабилаа. звамаад̣̇ийд̇и аад̣̇и-сад̣̇д̣̇зна махааб̣рахмуно самийбад̇аа, сам̣яог̇од̇и звамаад̣̇ийнамби сан̇г̇ахо взд̣̇ид̇аб̣б̣о.

    Evaṃpavattavādā yadicchāvādisaṅkhātā adhiccasamuppattivādino ca ettha sabhāvavāde eva antogadhāti daṭṭhabbā. Aṇūhi loko pavattatīti ājīvakavādaṃ sandhāyāha. So hi akāraṇapariggaho. Kaṇādavādo pana issaricchāvasena aṇūnaṃ saṃyogaviyogato lokassa pavattinivattiṃ vadati. Padhānassa appavattīti mahatādibhāvena apariṇāmo, anabhibyatti vā. ‘‘Ahamañño, pakati aññā’’ti evaṃ pavattapakatipurisantarajānanena attasukhadukkhamohesu avibhāgaggahaṇe nivattite kira vuttanayena padhānaṃ nappavattati, so vimokkhoti kāpilā. Evamādīti ādi-saddena mahābrahmuno samīpatā, saṃyogoti evamādīnampi saṅgaho veditabbo.

    згад̇д̇аад̇и згабхаавад̇о згоби вуд̇д̇о. д̇аяод̇и гижжавибхааг̇зна. д̇аанийд̇и саммааваажаад̣̇исийлаани. чанд̣̇асса сад̣̇д̣̇аханаанугуулааби чанд̣̇анавасзна бавад̇д̇и ход̇ийд̇и сад̣̇д̇хинд̣̇рияасад̣̇д̇хааб̣алзхи сад̣̇д̇хим̣ чанд̣̇ид̣̇д̇хибаад̣̇о вуд̇д̇о. д̇аад̣̇исз гаалз убзгкаанимид̇д̇аануб̣рууханзна убагаараа самаад̇хисса самаваахид̇аавасзна д̇аад̣̇исагижжаава убзгкаа взд̣̇ид̇аб̣б̣аа.

    Ekattāti ekabhāvato ekopi vutto. Tayoti kiccavibhāgena. Tānīti sammāvācādisīlāni. Chandassa saddahanānukūlāpi chandanavasena pavatti hotīti saddhindriyasaddhābalehi saddhiṃ chandiddhipādo vutto. Tādise kāle upekkhānimittānubrūhanena upakārā samādhissa samavāhitāvasena tādisakiccāva upekkhā veditabbā.

    вигхаад̇агад̇д̇аад̇и сам̣харан̣ийяавасзна виханд̇абхаавад̇о.

    Vighātakattāti saṃharaṇīyavasena vihantabhāvato.

    арияасажжад̣̇ваяанд̇и самуд̣̇аяамаг̇г̇асажжад̣̇ваяам̣. д̇знзваад̇и яат̇аавуд̇д̇ад̣̇угкаад̣̇исад̣̇д̣̇аанам̣ барин̃н̃зяяаад̣̇иваажагад̇д̇аа зва. аад̣̇ибад̣̇асан̇г̇аход̇и ‘‘д̣̇угкам̣, на арияасажжа’’нд̇и иминаа жад̇уггз аад̣̇ибад̣̇з сан̇г̇ахо. д̇ад̣̇абзгканд̇и арияасажжасад̣̇д̣̇аабзгкам̣ д̣̇угкасад̣̇д̣̇ам̣. жад̇уд̇т̇абад̣̇асан̇г̇аход̇и ‘‘нзва д̣̇угкам̣, на арияасажжа’’нд̇и иминаа бад̣̇зна сан̇г̇ахо. авасзсагилзсаад̣̇аяод̇и д̇ан̣хааваж̇ж̇агилзсаа авасзсаагусалаа, саасаваани гусаламуулаани, саасаваа жа гусалад̇хаммаа. д̇з хи абхид̇хаммабхааж̇анийяз самуд̣̇аяабхаавзна вуд̇д̇аа, на арияасажжабхаавзнаад̇и ааха ‘‘самуд̣̇аяо, на арияасажжа’’нд̇и. ан̃н̃аани маг̇г̇ан̇г̇аанийд̇и паласаммаад̣̇идтиаад̣̇аяо. иминаа наязнаад̇и зд̇т̇ааяам̣ яож̇анаа – ад̇т̇и самуд̣̇аяо, на арияасажжам̣, ад̇т̇и арияасажжам̣, на самуд̣̇аяо, ад̇т̇и самуд̣̇аяо жзва арияасажжан̃жа, ад̇т̇и нзва самуд̣̇аяо, на арияасажжам̣. д̇ад̇т̇а батамабад̣̇ам̣ вуд̇д̇ад̇т̇ам̣. нирод̇хо арияасажжам̣, на самуд̣̇аяо, д̇ан̣хаа самуд̣̇аяо жзва арияасажжан̃жа, маг̇г̇асамбаяуд̇д̇аа д̇хаммаа сааман̃н̃апалаани жа яасса бахаанааяа бхаг̇авад̇и б̣рахмажарияам̣ вуссад̇и, д̇ад̣̇абхаавад̇о нзва самуд̣̇аяо, на арияасажжам̣. ид̇арасажжад̣̇ваяам̣ арияасажжам̣ д̇асса д̇асса бабхаавагадтзна сияаа самуд̣̇аяо, на бана яасса бахаанааяа бхаг̇авад̇и б̣рахмажарияам̣ вуссад̇и д̇ат̇ад̇т̇зна. ид̇аражад̇уггад̣̇ваязби аад̣̇ибад̣̇ам̣ вуд̇д̇ад̇т̇амзва. сзсзсу самуд̣̇аяо арияасажжам̣, на нирод̇хо, асан̇кад̇ад̇хаад̇у нирод̇хо жзва арияасажжан̃жа, маг̇г̇асамбаяуд̇д̇аа д̇хаммаа, сааман̃н̃апалаани жа яасса сажчигирияааяа бхаг̇авад̇и б̣рахмажарияам̣ вуссад̇и д̇ат̇ад̇т̇зна нзва нирод̇хо, на арияасажжам̣. ид̇арасажжад̣̇ваяам̣ арияасажжам̣, нирод̇хад̇хаммад̇ааяа сияаа нирод̇хо, на бана яасса сажчигирияааяа бхаг̇авад̇и б̣рахмажарияам̣ вуссад̇и д̇ат̇ад̇т̇зна. д̇ат̇аа нирод̇хо арияасажжам̣, на маг̇г̇о, арияамаг̇г̇о маг̇г̇о жзва арияасажжан̃жа, маг̇г̇асамбаяуд̇д̇аа д̇хаммаа, сааман̃н̃апалаани жа яасса бхааванааяа бхаг̇авад̇и б̣рахмажарияам̣ вуссад̇и д̇ат̇ад̇т̇зна нзва маг̇г̇о, на арияасажжам̣. ид̇арасажжад̣̇ваяам̣ сияаа маг̇г̇о убабад̇д̇имаг̇г̇абхаавад̇о, на бана яасса бхааванааяа бхаг̇авад̇и б̣рахмажарияам̣ вуссад̇и д̇ат̇ад̇т̇зна.

    Ariyasaccadvayanti samudayamaggasaccadvayaṃ. Tenevāti yathāvuttadukkhādisaddānaṃ pariññeyyādivācakattā eva. Ādipadasaṅgahoti ‘‘dukkhaṃ, na ariyasacca’’nti iminā catukke ādipade saṅgaho. Tadapekkhanti ariyasaccasaddāpekkhaṃ dukkhasaddaṃ. Catutthapadasaṅgahoti ‘‘neva dukkhaṃ, na ariyasacca’’nti iminā padena saṅgaho. Avasesakilesādayoti taṇhāvajjakilesā avasesākusalā, sāsavāni kusalamūlāni, sāsavā ca kusaladhammā. Te hi abhidhammabhājanīye samudayabhāvena vuttā, na ariyasaccabhāvenāti āha ‘‘samudayo, na ariyasacca’’nti. Aññāni maggaṅgānīti phalasammādiṭṭhiādayo. Iminā nayenāti etthāyaṃ yojanā – atthi samudayo, na ariyasaccaṃ, atthi ariyasaccaṃ, na samudayo, atthi samudayo ceva ariyasaccañca, atthi neva samudayo, na ariyasaccaṃ. Tattha paṭhamapadaṃ vuttatthaṃ. Nirodho ariyasaccaṃ, na samudayo, taṇhā samudayo ceva ariyasaccañca, maggasampayuttā dhammā sāmaññaphalāni ca yassa pahānāya bhagavati brahmacariyaṃ vussati, tadabhāvato neva samudayo, na ariyasaccaṃ. Itarasaccadvayaṃ ariyasaccaṃ tassa tassa pabhāvakaṭṭhena siyā samudayo, na pana yassa pahānāya bhagavati brahmacariyaṃ vussati tathatthena. Itaracatukkadvayepi ādipadaṃ vuttatthameva. Sesesu samudayo ariyasaccaṃ, na nirodho, asaṅkhatadhātu nirodho ceva ariyasaccañca, maggasampayuttā dhammā, sāmaññaphalāni ca yassa sacchikiriyāya bhagavati brahmacariyaṃ vussati tathatthena neva nirodho, na ariyasaccaṃ. Itarasaccadvayaṃ ariyasaccaṃ, nirodhadhammatāya siyā nirodho, na pana yassa sacchikiriyāya bhagavati brahmacariyaṃ vussati tathatthena. Tathā nirodho ariyasaccaṃ, na maggo, ariyamaggo maggo ceva ariyasaccañca, maggasampayuttā dhammā, sāmaññaphalāni ca yassa bhāvanāya bhagavati brahmacariyaṃ vussati tathatthena neva maggo, na ariyasaccaṃ. Itarasaccadvayaṃ siyā maggo upapattimaggabhāvato, na pana yassa bhāvanāya bhagavati brahmacariyaṃ vussati tathatthena.

    санд̇анд̇и самаанам̣. звам̣ ид̇арзсубийд̇и гаад̇аб̣б̣ааби гирияаа гаарагарахид̇аа гзвалам̣ ад̇д̇ано бажжаязхи д̇ааяа бавад̇д̇амаанааяа бажжаяасаамаг̇г̇ий гирияам̣ гарод̇ийд̇и вохаарамад̇д̇ам̣ ход̇и. ниб̣б̣уд̇иг̇амагзсуби зсзва наяо.

    Santanti samānaṃ. Evaṃ itaresupīti kātabbāpi kiriyā kārakarahitā kevalaṃ attano paccayehi tāya pavattamānāya paccayasāmaggī kiriyaṃ karotīti vohāramattaṃ hoti. Nibbutigamakesupi eseva nayo.

    саасавад̇аа асубхад̇аа гилзсаасужибаг̇гхаран̣ад̇о. д̣̇угкаад̣̇ийнанд̇и д̣̇угкасамуд̣̇аяамаг̇г̇аанам̣. самуд̣̇аяаад̣̇ибхаавод̇и д̣̇угкасса самуд̣̇аяамаг̇г̇абхааво, самуд̣̇аяасса маг̇г̇ад̣̇угкабхааво, маг̇г̇асса д̣̇угкасамуд̣̇аяабхааво жа, на бана нирод̇хабхааво д̣̇угкаад̣̇ийнанд̇и самб̣анд̇хо. ан̃н̃аман̃н̃асаман̇г̇ид̇аад̇и д̣̇угкаад̣̇ийнам̣ ид̇арийд̇арасабхааваяог̇о. д̇ан̣хааяаад̇и аад̇хаарз бхуммам̣. бунаб̣бхавассаад̇и бунабхавасан̇каад̇асса ааяад̇ид̣̇угкасса. багад̇иваад̣̇ийнанд̇и гаабилаанам̣. вигаараад̇и махад̇аад̣̇аяо б̣яад̇д̇аа. вибхаавад̇од̇и абхиб̣яад̇д̇ид̇о, барин̣аамад̇о ваа буб̣б̣з. бадиббалийнаа жаад̇и бажчаа багад̇ияам̣ балаяам̣ г̇ад̇аа взсаммам̣ мун̃жид̇ваа сад̇д̇аад̣̇исамабхаавзна анд̇о саморуд̣̇д̇хаа. д̇знааха ‘‘багад̇ибхаавзнзва д̇идтанд̇ий’’д̇и. багад̇ибхаавзнзваад̇и аб̣яад̇д̇абхаавзнзва . самуд̣̇аяабхаавзнаад̇и д̇ан̣хаасан̇каад̇абабхавабхаавзна. ан̃н̃ат̇аа д̇ам̣самбаяуд̇д̇аавиж̇ж̇аад̣̇ийнамби самуд̣̇аяабхааво лаб̣бхад̇зваад̇и. авибхад̇д̇зхийд̇и взсаммавирахзна багад̇ибхаавам̣ г̇ад̇зхи. ‘‘вигаарзхий’’д̇и сааман̃н̃ад̇о вуд̇д̇з ‘‘маханд̇аа’’д̇иаад̣̇инаа саруубад̇о д̣̇ассзд̇и. д̇ад̇т̇а маханд̇од̇и махааб̣уд̣̇д̇хи. д̇ан̃хи гаабилаа ‘‘махаааж̇жхаасаяо’’д̇и жа вохаранд̇и. руубад̇аммад̇д̇аад̣̇аяо бан̃жа д̇аммад̇д̇аа, ахам̣гааро жаад̇и ча ависзсаа. жагку сод̇ам̣ гхаанам̣ ж̇ивхаа гааяо ваажаа баан̣и баад̣̇о бааяу убад̇т̇ам̣ манод̇и згаад̣̇асинд̣̇рияаани. бат̇авий аабо д̇зж̇о вааяо аагаасанд̇и бан̃жа бхууд̇ависзсаа, д̇зхи. ‘‘багад̇ибхаавзнзва тид̇зхий’’д̇и иминаа ‘‘авибхад̇д̇зхий’’д̇и бад̣̇асса ад̇т̇ам̣ вад̣̇ад̇и. саг̇аб̣бхаад̇и саб̣ийж̇аа асун̃н̃ад̇аа. д̇анд̇уусууд̇и суд̇д̇зсу самавааяигааран̣абхууд̇зсу. д̇ат̇аа габаалзсу. д̇ивид̇хан̃хи д̇з гааран̣ам̣ вад̣̇анд̇и убаад̣̇аанагааран̣ам̣ нимид̇д̇агааран̣ам̣ самавааяигааран̣анд̇и. д̇ад̇т̇а д̇уривзмасалаагаад̣̇аяо убаад̣̇аанагааран̣ам̣. д̇анд̇авааяо нимид̇д̇агааран̣ам̣. д̇анд̇аво самавааяигааран̣анд̇и. д̣̇вийсу ан̣уусууд̇и бат̇авийбхууд̇зсу ваа аабод̇зж̇овааяобхууд̇зсу ваа д̣̇вийсу барамаан̣уусу. ид̇хаб̣уд̣̇д̇хивохаараж̇анагод̇и ‘‘ид̇ха д̇анд̇уусу бадо, ид̇ха габаалзсу гхадо, ид̇ха б̣ийран̣зсу гхадо’’д̇иаад̣̇инаа наязна хзд̇упалаанам̣ самб̣анд̇хабхууд̇зна сад̇д̇аанам̣ ид̇хаб̣уд̣̇д̇хивохаараа ж̇ааяанд̇и. со г̇овисаан̣аанам̣ вияа ависум̣ сахасид̣̇д̇хаанам̣ самб̣анд̇хо самавааяо. каан̣усзнаанам̣ вияа бана висум̣сид̣̇д̇хаанам̣ самб̣анд̇хо сам̣яог̇о. д̇ийсу ан̣уусу д̇иан̣угам̣ палам̣ самавзд̇ам̣ згийбхууд̇амива самб̣анд̇ханд̇и яож̇анаа. ‘‘самавзд̇а’’нд̇и зд̇асса ‘‘згийбхууд̇амива самб̣анд̇ха’’нд̇и ид̣̇ам̣ ад̇т̇авиваран̣ам̣. махаабаримаан̣анд̇и маханд̇абаримаан̣ам̣ махаабат̇авийаад̣̇игам̣ згам̣ палам̣, яам̣ д̇з ‘‘гаарияам̣ д̣̇раб̣яа’’нд̇и вад̣̇анд̇и. язхи гааран̣зхи аарад̣̇д̇хам̣ гаарияад̣̇раб̣яам̣, д̇ад̣̇анд̇ог̇ад̇хаани зва д̇аани гааран̣аани ман̃н̃анд̇ийд̇и ааха ‘‘ад̇д̇ано анд̇ог̇ад̇хзхи гааран̣зхий’’д̇и. сад̇и самавааяз хзд̇умхи палам̣ самавзд̇анд̇и палз хзд̇у сияаа, д̇ам̣ над̇т̇ийд̇и д̣̇ассзнд̇о ааха ‘‘самавааяаабхааваа палз хзд̇у над̇т̇ийд̇и хзд̇усун̃н̃ам̣ пала’’нд̇и.

    Sāsavatā asubhatā kilesāsucipaggharaṇato. Dukkhādīnanti dukkhasamudayamaggānaṃ. Samudayādibhāvoti dukkhassa samudayamaggabhāvo, samudayassa maggadukkhabhāvo, maggassa dukkhasamudayabhāvo ca, na pana nirodhabhāvo dukkhādīnanti sambandho. Aññamaññasamaṅgitāti dukkhādīnaṃ itarītarasabhāvayogo. Taṇhāyāti ādhāre bhummaṃ. Punabbhavassāti punabhavasaṅkhātassa āyatidukkhassa. Pakativādīnanti kāpilānaṃ. Vikārāti mahatādayo byattā. Vibhāvatoti abhibyattito, pariṇāmato vā pubbe. Paṭippalīnā cāti pacchā pakatiyaṃ palayaṃ gatā vesammaṃ muñcitvā sattādisamabhāvena anto samoruddhā. Tenāha ‘‘pakatibhāveneva tiṭṭhantī’’ti. Pakatibhāvenevāti abyattabhāveneva . Samudayabhāvenāti taṇhāsaṅkhātapabhavabhāvena. Aññathā taṃsampayuttaavijjādīnampi samudayabhāvo labbhatevāti. Avibhattehīti vesammavirahena pakatibhāvaṃ gatehi. ‘‘Vikārehī’’ti sāmaññato vutte ‘‘mahantā’’tiādinā sarūpato dasseti. Tattha mahantoti mahābuddhi. Tañhi kāpilā ‘‘mahāajjhāsayo’’ti ca voharanti. Rūpatammattādayo pañca tammattā, ahaṃkāro cāti cha avisesā. Cakkhu sotaṃ ghānaṃ jivhā kāyo vācā pāṇi pādo pāyu upatthaṃ manoti ekādasindriyāni. Pathavī āpo tejo vāyo ākāsanti pañca bhūtavisesā, tehi. ‘‘Pakatibhāveneva ṭhitehī’’ti iminā ‘‘avibhattehī’’ti padassa atthaṃ vadati. Sagabbhāti sabījā asuññatā. Tantūsūti suttesu samavāyikāraṇabhūtesu. Tathā kapālesu. Tividhañhi te kāraṇaṃ vadanti upādānakāraṇaṃ nimittakāraṇaṃ samavāyikāraṇanti. Tattha turivemasalākādayo upādānakāraṇaṃ. Tantavāyo nimittakāraṇaṃ. Tantavo samavāyikāraṇanti. Dvīsu aṇūsūti pathavībhūtesu vā āpotejovāyobhūtesu vā dvīsu paramāṇūsu. Idhabuddhivohārajanakoti ‘‘idha tantūsu paṭo, idha kapālesu ghaṭo, idha bīraṇesu ghaṭo’’tiādinā nayena hetuphalānaṃ sambandhabhūtena sattānaṃ idhabuddhivohārā jāyanti. So govisāṇānaṃ viya avisuṃ sahasiddhānaṃ sambandho samavāyo. Khāṇusenānaṃ viya pana visuṃsiddhānaṃ sambandho saṃyogo. Tīsu aṇūsu tiaṇukaṃ phalaṃ samavetaṃ ekībhūtamiva sambandhanti yojanā. ‘‘Samaveta’’nti etassa ‘‘ekībhūtamiva sambandha’’nti idaṃ atthavivaraṇaṃ. Mahāparimāṇanti mahantaparimāṇaṃ mahāpathavīādikaṃ ekaṃ phalaṃ, yaṃ te ‘‘kāriyaṃ drabya’’nti vadanti. Yehi kāraṇehi āraddhaṃ kāriyadrabyaṃ, tadantogadhāni eva tāni kāraṇāni maññantīti āha ‘‘attano antogadhehi kāraṇehī’’ti. Sati samavāye hetumhi phalaṃ samavetanti phale hetu siyā, taṃ natthīti dassento āha ‘‘samavāyābhāvā phale hetu natthīti hetusuññaṃ phala’’nti.

    аахаарабхзд̣̇зд̇и габ̣ал̣ийгаараад̣̇иаахаарависзсз. д̇аббажжаяад̇хаммабхзд̣̇зд̇и аж̇жхохаран̣ийяавад̇т̇усал̣ааяад̇анаавиж̇ж̇ааабхисан̇каарасан̇каад̇з д̇зсам̣ бажжаяабхууд̇ад̇хаммависзсз, ож̇адтамагаруубавзд̣̇анаабадисанд̇хивин̃н̃аан̣анаамаруубасан̇каад̇з ваа д̇анниб̣б̣ад̇д̇ад̇хаммависзсз, д̇з бажжаяаа зд̇зсам̣ д̇хаммависзсаананд̇и д̇аббажжаяад̇хаммабхзд̣̇аа . руубаад̣̇иаарамман̣авасзна ваад̇и яож̇анаа. яаанад̣̇ваяавасзнаад̇и самат̇авибассанааяаанад̣̇ваяавасзна. гин̃жааби маг̇г̇агкан̣з самат̇авибассанаа яуг̇анад̣̇д̇хаава, яат̇аа бана сун̃н̃ад̇аад̣̇исаман̃н̃аа, звам̣ самат̇авибассанаасаман̃н̃ааби ааг̇аманад̇о маг̇г̇асса сияунд̇и ааха ‘‘ааг̇аманавасзна вуд̇д̇о’’д̇и. яасса ваа бан̃н̃инд̣̇рияам̣ ад̇хигам̣, д̇асса маг̇г̇о вибассанаа, ид̇арасса самат̇од̇и звамзд̇т̇а ад̇т̇о д̣̇адтаб̣б̣о.

    Āhārabhedeti kabaḷīkārādiāhāravisese. Tappaccayadhammabhedeti ajjhoharaṇīyavatthusaḷāyatanaavijjāabhisaṅkhārasaṅkhāte tesaṃ paccayabhūtadhammavisese, ojaṭṭhamakarūpavedanāpaṭisandhiviññāṇanāmarūpasaṅkhāte vā tannibbattadhammavisese, te paccayā etesaṃ dhammavisesānanti tappaccayadhammabhedā. Rūpādiārammaṇavasena vāti yojanā. Yānadvayavasenāti samathavipassanāyānadvayavasena. Kiñcāpi maggakkhaṇe samathavipassanā yuganaddhāva, yathā pana suññatādisamaññā, evaṃ samathavipassanāsamaññāpi āgamanato maggassa siyunti āha ‘‘āgamanavasena vutto’’ti. Yassa vā paññindriyaṃ adhikaṃ, tassa maggo vipassanā, itarassa samathoti evamettha attho daṭṭhabbo.

    самаад̇хиж̇аад̇и самаад̇хаанадтова. д̇ад̇о зваад̇и самаад̇хиануг̇ун̣агирияад̇д̇аава.

    Samādhijāti samādhānaṭṭhova. Tato evāti samādhianuguṇakiriyattāva.

    аад̣̇ааяа уухид̇ваад̇и г̇ахзд̇ваа вияа д̇аггзд̇ваа вид̇аггзд̇ваа. д̣̇виннанд̇и саммаад̣̇идтисаммаасан̇габбаанам̣. буримагааласса вияа нид̣̇д̣̇зсо яат̇аа ‘‘згам̣ канд̇хам̣ бадижжа д̇аяо канд̇хаа’’д̇и, ‘‘згам̣ махаабхууд̇ам̣ бадижжа д̇аяо махаабхууд̇аа’’д̇и жа.

    Ādāya ūhitvāti gahetvā viya takketvā vitakketvā. Dvinnanti sammādiṭṭhisammāsaṅkappānaṃ. Purimakālassa viya niddeso yathā ‘‘ekaṃ khandhaṃ paṭicca tayo khandhā’’ti, ‘‘ekaṃ mahābhūtaṃ paṭicca tayo mahābhūtā’’ti ca.

    ог̇аахид̇унд̇и н̃аан̣зна бадивиж̇жхид̇ум̣. г̇ахзд̇ум̣ асаггун̣зяяад̇ааяа сан̣хад̇д̇ам̣. сукумааяа бан̃н̃ааяа г̇ахзд̇аб̣б̣ад̇ааяа сукумад̇д̇ам̣. ид̇ийд̇и иминаа гамзнаад̇и аяамад̇т̇од̇и ад̇хиббааязнааха ‘‘ид̇исад̣̇д̣̇зна виж̇аананаггамам̣ д̣̇ассзд̇ий’’д̇и. звам̣ багаарзхийд̇и звам̣-сад̣̇д̣̇зна ж̇од̇ияамаано зва ад̇т̇о багаара-сад̣̇д̣̇зна вужжад̇ийд̇и ‘‘звам̣-сад̣̇д̣̇зна виж̇аананагааран̣абхууд̇з наяз д̣̇ассзд̇ий’’д̇и вуд̇д̇ам̣. ид̇ийд̇и ваа нид̣̇ассанад̇т̇о. д̇зна вуд̇д̇аббабхзд̣̇з бажжаамасанавасзна нид̣̇ассзд̇и. звам̣-сад̣̇д̣̇о ид̣̇амад̇т̇о. д̇зна звам̣ багаарзхийд̇и ид̣̇ам̣багаарзхи, ийд̣̇исзхийд̇и ад̇т̇о.

    Ogāhitunti ñāṇena paṭivijjhituṃ. Gahetuṃ asakkuṇeyyatāya saṇhattaṃ. Sukhumāya paññāya gahetabbatāya sukhumattaṃ. Itīti iminā kamenāti ayamatthoti adhippāyenāha ‘‘itisaddena vijānanakkamaṃ dassetī’’ti. Evaṃ pakārehīti evaṃ-saddena jotiyamāno eva attho pakāra-saddena vuccatīti ‘‘evaṃ-saddena vijānanakāraṇabhūte naye dassetī’’ti vuttaṃ. Itīti vā nidassanattho. Tena vuttappabhede paccāmasanavasena nidasseti. Evaṃ-saddo idamattho. Tena evaṃ pakārehīti idaṃpakārehi, īdisehīti attho.

    уд̣̇д̣̇зсаван̣н̣анаа нидтид̇аа.

    Uddesavaṇṇanā niṭṭhitā.

    1. д̣̇угкасажжанид̣̇д̣̇зсо

    1. Dukkhasaccaniddeso

    ж̇аад̇инид̣̇д̣̇зсаван̣н̣анаа

    Jātiniddesavaṇṇanā

    190. ‘‘ж̇аад̇иаад̣̇инид̣̇д̣̇зсз’’д̇и иминаа ‘‘д̇ад̇т̇аа’’д̇и бад̣̇асса ад̇т̇ам̣ вад̣̇ад̇и. д̣̇угкамаад̇игаад̇и д̣̇угкад̣̇угкаад̣̇ийнам̣ д̣̇угкависзсаанам̣ уд̣̇д̣̇зсо. бад̣̇ад̣̇ваязд̇и ‘‘барияааяад̣̇угкам̣, ниббарияааяад̣̇угка’’нд̇и зд̇асмим̣ бад̣̇ад̣̇ваяз.

    190. ‘‘Jātiādiniddese’’ti iminā ‘‘tatthā’’ti padassa atthaṃ vadati. Dukkhamātikāti dukkhadukkhādīnaṃ dukkhavisesānaṃ uddeso. Padadvayeti ‘‘pariyāyadukkhaṃ, nippariyāyadukkha’’nti etasmiṃ padadvaye.

    д̣̇угкад̇д̇ааязваад̇и ниббарияааяад̣̇угкад̇ам̣ вад̣̇ад̇и. сабхаавзна наамам̣ висзсзд̇ийд̇и анвад̇т̇асан̃н̃ад̇ам̣ д̣̇ассзд̇и. буримзна сабхаавад̣̇угкаваажагзна д̣̇угкасад̣̇д̣̇зна. со хи висзсанам̣ аважчзд̣̇агабхаавад̇о бажчимам̣ сан̇каарад̣̇угкадтам̣ висзсзд̇и. со хи нивад̇д̇зд̇аб̣б̣аг̇ахзд̇аб̣б̣асаад̇хааран̣ад̇д̇аа аважчинд̣̇ид̇аб̣б̣о. д̇знаад̇и вибарин̣аамаад̇хидтаанаад̣̇ибагаарависзсзна.

    Dukkhattāyevāti nippariyāyadukkhataṃ vadati. Sabhāvena nāmaṃ visesetīti anvatthasaññataṃ dasseti. Purimena sabhāvadukkhavācakena dukkhasaddena. So hi visesanaṃ avacchedakabhāvato pacchimaṃ saṅkhāradukkhaṭṭhaṃ viseseti. So hi nivattetabbagahetabbasādhāraṇattā avacchinditabbo. Tenāti vipariṇāmaadhiṭṭhānādipakāravisesena.

    д̣̇зсзд̇аб̣б̣асса ад̇т̇асса сан̇кибанам̣ ид̇ха сан̇кзбо, со жа д̇аб̣б̣ибхааг̇аанам̣ саад̇хааран̣абхаавод̇и ааха ‘‘сан̇кзбо сааман̃н̃а’’нд̇и. анд̇огарид̇ваад̇и анд̇ог̇ад̇хз гад̇ваа, сан̇г̇ахзд̇ваа ваа. убхаяат̇аабийд̇и сан̇кзбад̇оби вид̇т̇аарад̇оби. саад̇хааран̣абхааг̇аанам̣ вибхаж̇анам̣ вибхааг̇о, вид̇т̇аарод̇и ааха ‘‘вид̇т̇ааро бана висзсо’’д̇и. висзсанд̇аранивад̇д̇агод̇и вибхааг̇анд̇араасан̇г̇аахаго.

    Desetabbassa atthassa saṅkhipanaṃ idha saṅkhepo, so ca tabbibhāgānaṃ sādhāraṇabhāvoti āha ‘‘saṅkhepo sāmañña’’nti. Antokaritvāti antogadhe katvā, saṅgahetvā vā. Ubhayathāpīti saṅkhepatopi vitthāratopi. Sādhāraṇabhāgānaṃ vibhajanaṃ vibhāgo, vitthāroti āha ‘‘vitthāro pana viseso’’ti. Visesantaranivattakoti vibhāgantarāsaṅgāhako.

    191. абарад̇т̇аад̇и бхуммаважанам̣ саамиад̇т̇з яат̇аа ‘‘саб̣б̣ад̇т̇а баад̣̇ага’’нд̇и ааха ‘‘саамиад̇т̇зби хи абарад̇т̇асад̣̇д̣̇о сиж̇жхад̇ий’’д̇и. сид̣̇д̇хи бана ‘‘ид̇араахиби д̣̇иссад̇ий’’д̇и иминаа взд̣̇ид̇аб̣б̣аа. яасмаа жа звам̣ сад̣̇д̣̇о самбхавад̇и, д̇асмаа баал̣ияам̣ саамивасзна вуд̇д̇ам̣ адтагат̇ааяам̣ бхуммавасзна д̣̇ассид̇анд̇и д̣̇ийбзнд̇о ‘‘д̇зсам̣ д̇зсанд̇и ваа’’д̇иаад̣̇имааха. абарассаад̇и абарасса сад̇д̇асса. мануссаад̣̇ибхзд̣̇о убабад̇д̇ибхаво г̇ад̇и, д̇аб̣б̣исзсабхууд̇аа кад̇д̇ияаад̣̇исааман̃н̃аад̇хидтаанаа канд̇хаа ж̇аад̇ийд̇и д̣̇ассзнд̇о ‘‘бан̃жаг̇ад̇ивасзнаа’’д̇иаад̣̇имааха.

    191. Aparatthāti bhummavacanaṃ sāmiatthe yathā ‘‘sabbattha pādaka’’nti āha ‘‘sāmiatthepi hi aparatthasaddo sijjhatī’’ti. Siddhi pana ‘‘itarāhipi dissatī’’ti iminā veditabbā. Yasmā ca evaṃ saddo sambhavati, tasmā pāḷiyaṃ sāmivasena vuttaṃ aṭṭhakathāyaṃ bhummavasena dassitanti dīpento ‘‘tesaṃ tesanti vā’’tiādimāha. Aparassāti aparassa sattassa. Manussādibhedo upapattibhavo gati, tabbisesabhūtā khattiyādisāmaññādhiṭṭhānā khandhā jātīti dassento ‘‘pañcagativasenā’’tiādimāha.

    д̇ин̣аагаарод̇и д̇ин̣авигаббо, д̇ин̣ависзсод̇и ад̇т̇о. званд̇и нид̣̇ассанз. д̇зна вуд̇д̇аббагаарам̣ батамам̣ вин̃н̃аан̣абаад̇убхаавам̣ бажжаамасад̇и. д̇ад̣̇убаад̣̇ааяаад̇и д̇ад̇о бадтааяа. арияабхаавагаран̣ад̇д̇аад̇и арияабхаавагааран̣ад̇д̇аа. гарод̇ийд̇и хи гаран̣ам̣. арияасад̣̇исад̇д̇аа ваа арияасийлам̣. бут̇уж̇ж̇анагаляаан̣агаанамби хи жад̇убаарисуд̣̇д̇хисийлам̣ арияасийласад̣̇исам̣. аагааравигаараад̇и уббаж̇ж̇анаад̣̇иаагааравигад̇ияо. сахуббаад̣̇агаад̇и уббаад̣̇асахид̇аа уббаад̣̇аавад̇т̇аа канд̇хаа. ааяад̇анавасзнаад̇и барибун̣н̣аабарибун̣н̣ааяад̇анавасзна. яонивасзнаад̇и ан̣д̣аж̇аад̣̇ияонивасзна. згзгзнзва бад̣̇знаад̇и яат̇аа д̣̇уд̇ияанаяз ж̇аад̇иаад̣̇ибад̣̇зсу д̣̇вийхи д̣̇вийхи бад̣̇зхи барибун̣н̣аабарибун̣н̣ааяад̇анаяонивибхааг̇зна саб̣б̣асад̇д̇з барияаад̣̇ияид̇ваа ж̇аад̇и д̣̇ассид̇аа, на звамид̇ха. ид̇ха банзд̇зсу згзгзнзва бад̣̇зна авибхааг̇ад̇о саб̣б̣асад̇д̇з барияаад̣̇ияид̇ваа. убхаяад̇т̇аад̇и буримабажчиманаязсу бхааванид̣̇д̣̇зсова яуд̇д̇о. анабхихид̇з вибхад̇д̇ивид̇хаанам̣, наабхихид̇зд̇и. баагадаа ниб̣б̣ад̇д̇ийд̇и абхиб̣яад̇д̇аа ниб̣б̣ад̇д̇и.

    Tiṇākāroti tiṇavikappo, tiṇavisesoti attho. Evanti nidassane. Tena vuttappakāraṃ paṭhamaṃ viññāṇapātubhāvaṃ paccāmasati. Tadupādāyāti tato paṭṭhāya. Ariyabhāvakaraṇattāti ariyabhāvakāraṇattā. Karotīti hi karaṇaṃ. Ariyasadisattā vā ariyasīlaṃ. Puthujjanakalyāṇakānampi hi catupārisuddhisīlaṃ ariyasīlasadisaṃ. Ākāravikārāti uppajjanādiākāravikatiyo. Sahuppādakāti uppādasahitā uppādāvatthā khandhā. Āyatanavasenāti paripuṇṇāparipuṇṇāyatanavasena. Yonivasenāti aṇḍajādiyonivasena. Ekekeneva padenāti yathā dutiyanaye jātiādipadesu dvīhi dvīhi padehi paripuṇṇāparipuṇṇāyatanayonivibhāgena sabbasatte pariyādiyitvā jāti dassitā, na evamidha. Idha panetesu ekekeneva padena avibhāgato sabbasatte pariyādiyitvā. Ubhayatthāti purimapacchimanayesu bhāvaniddesova yutto. Anabhihite vibhattividhānaṃ, nābhihiteti. Pākaṭā nibbattīti abhibyattā nibbatti.

    д̣̇виннам̣ д̣̇виннанд̇и згавогаарабхавз руубааяад̇анад̇хаммааяад̇анавасзна д̣̇виннам̣, жад̇увогаарабхавз манааяад̇анад̇хаммааяад̇анавасзна д̣̇виннам̣. сзсзд̇и бан̃жавогаарабхавз. бан̃жаннанд̇и жагкусод̇аманоруубад̇хаммааяад̇анавасзна бан̃жаннам̣. д̇аани хи руубабхавз бан̃жавогаарз убабад̇д̇игкан̣з уббаж̇ж̇анд̇и. гаамад̇хаад̇уяам̣ бадисанд̇хигкан̣з уббаж̇ж̇амаанаананд̇и яож̇анаа. вигалаавигалинд̣̇рияаананд̇и абарибун̣н̣абарибун̣н̣ааяад̇анаанам̣ сад̇д̇аанам̣. инд̣̇рияавасзнзва хи ааяад̇анаанам̣ взгаллам̣ ижчид̇аб̣б̣ам̣. д̇ад̇т̇а вигалинд̣̇рияасса сад̇д̇аннам̣ наваннам̣ д̣̇асаннам̣ бунаби д̣̇асаннам̣, ид̇арасса згаад̣̇асаннам̣ ааяад̇анаанам̣ васзна сан̇г̇ахо взд̣̇ид̇аб̣б̣о. сад̇д̇аннанд̇и гааяаманоруубаг̇анд̇харасаподтаб̣б̣ад̇хаммааяад̇анавасзна сад̇д̇аннам̣. г̇аб̣бхасзяяаган̃хи санд̇хааязд̇ам̣ вуд̇д̇ам̣. наваннанд̇и жагкусод̇асад̣̇д̣̇ааяад̇анаваж̇ж̇аанам̣ наваннам̣. анд̇хаб̣ад̇хиравасзна хид̣̇ам̣ вуд̇д̇ам̣. д̣̇асаннанд̇и жагкусад̣̇д̣̇аваж̇ж̇аанам̣. буна д̣̇асаннанд̇и сод̇асад̣̇д̣̇аваж̇ж̇аанам̣. анд̇хавасзна, б̣ад̇хиравасзна жзд̇ам̣ д̣̇ваяам̣ вуд̇д̇ам̣. згаад̣̇асаннанд̇и сад̣̇д̣̇аваж̇ж̇аанам̣.

    Dvinnaṃ dvinnanti ekavokārabhave rūpāyatanadhammāyatanavasena dvinnaṃ, catuvokārabhave manāyatanadhammāyatanavasena dvinnaṃ. Seseti pañcavokārabhave. Pañcannanti cakkhusotamanorūpadhammāyatanavasena pañcannaṃ. Tāni hi rūpabhave pañcavokāre upapattikkhaṇe uppajjanti. Kāmadhātuyaṃ paṭisandhikkhaṇe uppajjamānānanti yojanā. Vikalāvikalindriyānanti aparipuṇṇaparipuṇṇāyatanānaṃ sattānaṃ. Indriyavaseneva hi āyatanānaṃ vekallaṃ icchitabbaṃ. Tattha vikalindriyassa sattannaṃ navannaṃ dasannaṃ punapi dasannaṃ, itarassa ekādasannaṃ āyatanānaṃ vasena saṅgaho veditabbo. Sattannanti kāyamanorūpagandharasaphoṭṭhabbadhammāyatanavasena sattannaṃ. Gabbhaseyyakañhi sandhāyetaṃ vuttaṃ. Navannanti cakkhusotasaddāyatanavajjānaṃ navannaṃ. Andhabadhiravasena hidaṃ vuttaṃ. Dasannanti cakkhusaddavajjānaṃ. Puna dasannanti sotasaddavajjānaṃ. Andhavasena, badhiravasena cetaṃ dvayaṃ vuttaṃ. Ekādasannanti saddavajjānaṃ.

    д̇ам̣д̣̇угкабхаавод̇и барияааяад̣̇угкабхааво. д̇ад̇т̇а ниб̣б̣ад̇д̇инивааран̣знаад̇и уббалабад̣̇умаад̣̇ийсу уббад̇д̇ибадигкзбзна абхаавагат̇анзна. д̣̇угкуббад̇д̇игааран̣зд̇и д̣̇угкуббад̇д̇ияаа хзд̇убхууд̇з д̣̇угкуббад̇д̇идтаанз.

    Taṃdukkhabhāvoti pariyāyadukkhabhāvo. Tattha nibbattinivāraṇenāti uppalapadumādīsu uppattipaṭikkhepena abhāvakathanena. Dukkhuppattikāraṇeti dukkhuppattiyā hetubhūte dukkhuppattiṭṭhāne.

    маран̣анид̣̇д̣̇зсаван̣н̣анаа

    Maraṇaniddesavaṇṇanā

    193. канд̇хабхзд̣̇ассаад̇и канд̇хавинаасасса. сод̇и канд̇хабхзд̣̇о. баб̣анд̇хасамужчзд̣̇од̇и баб̣анд̇хасса ажжанд̇асамужчзд̣̇о. д̇аб̣бхаавад̇од̇и саммуд̇имаран̣абхаавад̇о. д̇ад̣̇згад̣̇зсабхаавад̇од̇и д̇ад̣̇аваяавабхаавад̇о. д̇ассзва нааманд̇и асаммохад̇т̇ам̣ вуд̇д̇ам̣ саб̣б̣ассааби згагамманиб̣б̣ад̇д̇аж̇ийвид̇инд̣̇рияаббаб̣анд̇хавижчзд̣̇абхаавад̇о. саммуд̇имаран̣амзва хи ж̇аад̇игкаяамаран̣ам̣, д̇ам̣ бана ж̇аад̇игкаяамаран̣ам̣ убаггамамаран̣ам̣, сарасамаран̣анд̇и д̣̇увид̇хам̣. д̇ад̇т̇а сарасамаран̣амби ааяугкаяамаран̣ам̣, бун̃н̃агкаяамаран̣анд̇и д̣̇увид̇хам̣. звамзд̇зсам̣ д̇ад̣̇згад̣̇зсад̇аа взд̣̇ид̇аб̣б̣аа. яан̃жзд̇т̇а убаггамамаран̣ам̣, д̇ам̣ агааламаран̣ам̣. сарасамаран̣ам̣ гааламаран̣ам̣. маран̣зна сад̇д̇аа яат̇аалад̣̇д̇хаад̇д̇абхаавзна вияуж̇ж̇анд̇ийд̇и ааха ‘‘самбад̇д̇ибхавагканд̇хзхи вияож̇зд̇ий’’д̇и.

    193. Khandhabhedassāti khandhavināsassa. Soti khandhabhedo. Pabandhasamucchedoti pabandhassa accantasamucchedo. Tabbhāvatoti sammutimaraṇabhāvato. Tadekadesabhāvatoti tadavayavabhāvato. Tasseva nāmanti asammohatthaṃ vuttaṃ sabbassāpi ekakammanibbattajīvitindriyappabandhavicchedabhāvato. Sammutimaraṇameva hi jātikkhayamaraṇaṃ, taṃ pana jātikkhayamaraṇaṃ upakkamamaraṇaṃ, sarasamaraṇanti duvidhaṃ. Tattha sarasamaraṇampi āyukkhayamaraṇaṃ, puññakkhayamaraṇanti duvidhaṃ. Evametesaṃ tadekadesatā veditabbā. Yañcettha upakkamamaraṇaṃ, taṃ akālamaraṇaṃ. Sarasamaraṇaṃ kālamaraṇaṃ. Maraṇena sattā yathāladdhaattabhāvena viyujjantīti āha ‘‘sampattibhavakkhandhehi viyojetī’’ti.

    гааран̣ад̇т̇од̇и муулад̇т̇о. муулан̃хи ‘‘аад̣̇ий’’д̇и вужжад̇и ‘‘го жаад̣̇и гусалаанам̣ д̇хаммаанам̣? сийлан̃жа сувисуд̣̇д̇хам̣, д̣̇идти жа уж̇угаа’’д̇иаад̣̇ийсу (сам̣. ни. 5.369). д̇знааха ‘‘санд̇хиб̣анд̇ханажчзд̣̇амуулаганд̇и ад̇т̇о’’д̇и.

    Kāraṇatthoti mūlattho. Mūlañhi ‘‘ādī’’ti vuccati ‘‘ko cādi kusalānaṃ dhammānaṃ? Sīlañca suvisuddhaṃ, diṭṭhi ca ujukā’’tiādīsu (saṃ. ni. 5.369). Tenāha ‘‘sandhibandhanacchedamūlakanti attho’’ti.

    палагирияааг̇аб̣бхаа ийд̣̇исий хзд̇угирияаад̇и гад̇ваа вуд̇д̇ам̣ ‘‘анд̇ог̇ад̇хаа’’д̇и. б̣яасанасса хи аабаад̣̇агзхи аабаад̣̇анам̣ аабаад̣̇зд̇аб̣б̣ааабад̇д̇ияаа сахзва сиж̇жхад̇ийд̇и.

    Phalakiriyāgabbhā īdisī hetukiriyāti katvā vuttaṃ ‘‘antogadhā’’ti. Byasanassa hi āpādakehi āpādanaṃ āpādetabbaāpattiyā saheva sijjhatīti.

    соганид̣̇д̣̇зсаван̣н̣анаа

    Sokaniddesavaṇṇanā

    194. сукам̣ хинод̇и бавад̇д̇ад̇и зд̇знаад̇и сукагааран̣ам̣ хид̇ам̣. бхог̇аб̣яасанаад̣̇ибад̣̇ад̇т̇ависзсанд̇и бхог̇аб̣яасанам̣, сийлаб̣яасананд̇и звам̣ бхог̇асийлабад̣̇аанам̣ васзна ад̇т̇ависзсам̣. самаасависзсанд̇и ‘‘рог̇оязва б̣яасанам̣, д̣̇идти зва б̣яасана’’нд̇и самаанаад̇хигаран̣авасзна самаасависзсам̣. аннабаанавад̇т̇аяаанаад̣̇и барибхун̃ж̇ид̇аб̣б̣ад̇о бхог̇од̇и ад̇хиббзд̇о, со жа д̇хаммасамуухабхаавзна. д̇аб̣б̣инаасаад̇и н̃аад̇ибхог̇аб̣яасанаани вуд̇д̇аанийд̇и д̇з вигаарабхаавзна бан̃н̃аабзд̇аб̣б̣ад̇д̇аа бан̣н̣ад̇д̇имад̇д̇аа. баринибпаннам̣ наама канд̇хабан̃жагам̣. ад̇ам̣сабхаавад̇д̇аа бан̣н̣ад̇д̇и абаринибпаннаа, анибпаннаа жа ход̇ийд̇и вуд̇д̇ам̣ ‘‘абаринибпаннад̇ам̣ санд̇хааяа анибпаннаанийд̇и аахаа’’д̇и. на хи бан̣н̣ад̇д̇и гзнажи нибпаад̣̇ийяад̇и. ан̃н̃ад̇т̇ааби абаринибпаннз анибпаннавохааро ааг̇ад̇од̇и д̣̇ассзд̇ум̣ ‘‘абаринибпаннад̇ам̣язваа’’д̇иаад̣̇имааха. гааман̃жзд̇т̇а абаринибпаннам̣ ‘‘анибпанна’’нд̇и вуд̇д̇ам̣, ‘‘нибпанна’’нд̇и бана на баринибпаннамзва вужжад̇и, нааби саб̣б̣о сабхаавад̇хаммод̇и д̣̇ассзнд̇о ‘‘канд̇хавибхан̇г̇з жаа’’д̇иаад̣̇имааха. нибпаннад̇аа вуд̇д̇аад̇и самб̣анд̇хо. анибпаннад̇аа сабхаавад̇хаммад̇д̇зби гзнажи на нибпаад̣̇ийяад̇ийд̇и гад̇ваа.

    194. Sukhaṃ hinoti pavattati etenāti sukhakāraṇaṃ hitaṃ. Bhogabyasanādipadatthavisesanti bhogabyasanaṃ, sīlabyasananti evaṃ bhogasīlapadānaṃ vasena atthavisesaṃ. Samāsavisesanti ‘‘rogoyeva byasanaṃ, diṭṭhi eva byasana’’nti samānādhikaraṇavasena samāsavisesaṃ. Annapānavatthayānādi paribhuñjitabbato bhogoti adhippeto, so ca dhammasamūhabhāvena. Tabbināsāti ñātibhogabyasanāni vuttānīti te vikārabhāvena paññāpetabbattā paṇṇattimattā. Parinipphannaṃ nāma khandhapañcakaṃ. Ataṃsabhāvattā paṇṇatti aparinipphannā, anipphannā ca hotīti vuttaṃ ‘‘aparinipphannataṃ sandhāya anipphannānīti āhā’’ti. Na hi paṇṇatti kenaci nipphādīyati. Aññatthāpi aparinipphanne anipphannavohāro āgatoti dassetuṃ ‘‘aparinipphannataṃyevā’’tiādimāha. Kāmañcettha aparinipphannaṃ ‘‘anipphanna’’nti vuttaṃ, ‘‘nipphanna’’nti pana na parinipphannameva vuccati, nāpi sabbo sabhāvadhammoti dassento ‘‘khandhavibhaṅge cā’’tiādimāha. Nipphannatā vuttāti sambandho. Anipphannatā sabhāvadhammattepi kenaci na nipphādīyatīti katvā.

    сан̇гужид̇ам̣ жинд̇ананд̇и бийд̇исоманассабадибагкад̇о, д̣̇осасамбаяог̇ад̇о жа аарамман̣з анабхирад̇иббавад̇д̇имааха. анд̇о ад̇д̇ано ниссаяасса нид̣̇д̣̇аханавасзна ваа жхаанам̣ жинд̇анам̣ анд̇ониж̇жхаанам̣. сад̇иби анусожанабхаавз ад̇д̇ано гад̇аагад̇агусалаагусалависаяо мановилзкабхууд̇о виббадисааро гуггужжам̣, яат̇аавуд̇д̇аанд̇ониж̇жхаанам̣ согод̇и убхиннам̣ висзсо взд̣̇ид̇аб̣б̣о.

    Saṅkucitaṃ cintananti pītisomanassapaṭipakkhato, dosasampayogato ca ārammaṇe anabhiratippavattimāha. Anto attano nissayassa niddahanavasena vā jhānaṃ cintanaṃ antonijjhānaṃ. Satipi anusocanabhāve attano katākatakusalākusalavisayo manovilekhabhūto vippaṭisāro kukkuccaṃ, yathāvuttaantonijjhānaṃ sokoti ubhinnaṃ viseso veditabbo.

    ‘‘манод̣̇ваараж̇аванагкан̣з’’д̇и бариб̣яад̇д̇аманд̇ониж̇жхаанам̣ санд̇хааяааха, ид̇арам̣ бана бан̃жад̣̇ваараж̇аванзсуби лаб̣бхад̇зва. д̇знааха ‘‘гааяавин̃н̃аан̣аад̣̇ий’’д̇иаад̣̇и. д̣̇оманассассаад̇и асожанаагаарасса д̣̇оманассасса, сожанаагаарассааби ваа наанаавийт̇игасса. д̇амби хи д̣̇угкамзваад̇и. ан̃н̃ат̇аад̇и манод̣̇ваараж̇аванз зва г̇ахид̇з. д̇ад̇т̇аад̇и гааяавад̇т̇угаманод̣̇вааригзсу.

    ‘‘Manodvārajavanakkhaṇe’’ti paribyattamantonijjhānaṃ sandhāyāha, itaraṃ pana pañcadvārajavanesupi labbhateva. Tenāha ‘‘kāyaviññāṇādī’’tiādi. Domanassassāti asocanākārassa domanassassa, socanākārassāpi vā nānāvīthikassa. Tampi hi dukkhamevāti. Aññathāti manodvārajavane eva gahite. Tatthāti kāyavatthukamanodvārikesu.

    барид̣̇званид̣̇д̣̇зсаван̣н̣анаа

    Paridevaniddesavaṇṇanā

    195. аад̣̇званасад̣̇д̣̇ам̣ гад̇ваад̇и аад̣̇звид̇ваа, вилабид̇ваад̇и ад̇т̇о. буг̇г̇аласса самбхамабхаавод̇и яасса сад̇д̇асса уббаж̇ж̇ад̇и, д̇асса анавадтаанабхааво. самбхамам̣ ваа аб̣бханд̇араг̇ад̇ам̣ д̇асса бажжубадтаабзд̇и баагадабхаавагаран̣знаад̇и самбхамабажжубадтаано.

    195. Ādevanasaddaṃ katvāti ādevitvā, vilapitvāti attho. Puggalassa sambhamabhāvoti yassa sattassa uppajjati, tassa anavaṭṭhānabhāvo. Sambhamaṃ vā abbhantaragataṃ tassa paccupaṭṭhāpeti pākaṭabhāvakaraṇenāti sambhamapaccupaṭṭhāno.

    мудтийхи бот̇анаад̣̇ийни мудтибот̇анаад̣̇ийни.

    Muṭṭhīhi pothanādīni muṭṭhipothanādīni.

    язна д̣̇оманассзна. буб̣б̣з вуд̇д̇ад̣̇угкад̇од̇и ‘‘ад̇д̇ано канд̇хам̣ мудтийхи бот̇зд̇ий’’д̇иаад̣̇инаа вуд̇д̇ад̣̇угкад̇о. д̇ам̣нид̣̇аананд̇и барид̣̇званид̣̇аанам̣.

    Yena domanassena. Pubbe vuttadukkhatoti ‘‘attano khandhaṃ muṭṭhīhi pothetī’’tiādinā vuttadukkhato. Taṃnidānanti paridevanidānaṃ.

    д̣̇угкад̣̇оманассанид̣̇д̣̇зсаван̣н̣анаа

    Dukkhadomanassaniddesavaṇṇanā

    196-7. гааяад̣̇угкаабхибхууд̇асса бад̇игаараабхилаасааяа д̇аад̣̇исад̣̇угкаавахабаяог̇агаалаад̣̇ийсу гааяигад̣̇угкасса д̇ад̣̇убаниссаяад̇аа взд̣̇ид̇аб̣б̣аа. зд̇зна д̣̇угкзнаад̇и анаат̇ад̇аахад̇т̇абаад̣̇ажчзд̣̇анаад̣̇ид̣̇угкзна.

    196-7. Kāyadukkhābhibhūtassa patikārābhilāsāya tādisadukkhāvahapayogakālādīsu kāyikadukkhassa tadupanissayatā veditabbā. Etena dukkhenāti anāthatāhatthapādacchedanādidukkhena.

    убааяаасанид̣̇д̣̇зсаван̣н̣анаа

    Upāyāsaniddesavaṇṇanā

    198. д̣̇угкадтаананисаж̇ж̇аад̣̇ийни д̣̇угкадтаанаад̣̇ийни. д̣̇оманассасса вад̇т̇у ход̇и убааяаасод̇и самб̣анд̇хо.

    198. Dukkhaṭṭhānanisajjādīni dukkhaṭṭhānādīni. Domanassassa vatthu hoti upāyāsoti sambandho.

    аббияасамбаяог̇анид̣̇д̣̇зсаван̣н̣анаа

    Appiyasampayoganiddesavaṇṇanā

    199. ан̃н̃асаабзгкасад̣̇д̣̇о асамад̇т̇асамаасод̇и д̇ам̣ д̣̇ассзд̇и ‘‘язна самаасо, на д̇ассааяам̣ бадисзд̇хаго а-гааро’’д̇и.

    199. Aññasāpekkhasaddo asamatthasamāsoti taṃ dasseti ‘‘yena samāso, na tassāyaṃ paṭisedhako a-kāro’’ti.

    бажчимад̣̇ваяанд̇и ‘‘самод̇хаанам̣ миссийбхааво’’д̇и ид̣̇ам̣ бад̣̇ад̣̇ваяам̣. д̇ад̣̇ад̇т̇авасзнаад̇и самод̇хаанад̇т̇асса, миссийбхаавад̇т̇асса жа васзна сан̇каарзсу лаб̣бхад̇и. ааг̇ад̇зхи жа д̇зхи сан̇каарзхи буг̇г̇аласса сам̣яог̇о ход̇ийд̇и яож̇анаа.

    Pacchimadvayanti ‘‘samodhānaṃ missībhāvo’’ti idaṃ padadvayaṃ. Tadatthavasenāti samodhānatthassa, missībhāvatthassa ca vasena saṅkhāresu labbhati. Āgatehi ca tehi saṅkhārehi puggalassa saṃyogo hotīti yojanā.

    д̇ам̣г̇ахан̣амад̇д̇анд̇и аабаат̇аг̇ад̇аарамман̣аг̇г̇ахан̣амад̇д̇ам̣.

    Taṃgahaṇamattanti āpāthagatārammaṇaggahaṇamattaṃ.

    ижчаанид̣̇д̣̇зсаван̣н̣анаа

    Icchāniddesavaṇṇanā

    201. д̇ам̣ гааланд̇и жуд̇ижид̇д̇анирод̇хад̇о уд̣̇д̇хам̣ гаалам̣. ‘‘яамбий’’д̇и яам̣-сад̣̇д̣̇о гаран̣ад̇т̇з бажжад̇д̇анд̇и язнабийд̇и ад̇т̇о вуд̇д̇о. ‘‘яам̣ ижча’’нд̇и яам̣-сад̣̇д̣̇о яад̣̇аа ижчаабзгко, д̇ад̣̇аа ‘‘на лабхад̇ий’’д̇и зд̇т̇а алаабхабад̇хаанаабхаавад̇о ижчаа висзсийяад̇ийд̇и ааха ‘‘алаабхависидтаа ижчаа вуд̇д̇аа ход̇ий’’д̇и. ‘‘ижчам̣ на лабхад̇и яа’’нд̇и звам̣ гирияаабараамасанабхууд̇о яам̣-сад̣̇д̣̇о яад̣̇аа ‘‘на лабхад̇ий’’д̇и зд̇ам̣ абзгкад̇и, д̇ад̇т̇а г̇ун̣абхууд̇аа ижчаа, бад̇хаанабхууд̇о алаабход̇и ааха ‘‘д̇ад̣̇аа ижчаависидто алаабхо вуд̇д̇о ход̇ий’’д̇и.

    201. Taṃkālanti cuticittanirodhato uddhaṃ kālaṃ. ‘‘Yampī’’ti yaṃ-saddo karaṇatthe paccattanti yenapīti attho vutto. ‘‘Yaṃ iccha’’nti yaṃ-saddo yadā icchāpekkho, tadā ‘‘na labhatī’’ti ettha alābhapadhānābhāvato icchā visesīyatīti āha ‘‘alābhavisiṭṭhā icchā vuttā hotī’’ti. ‘‘Icchaṃ na labhati ya’’nti evaṃ kiriyāparāmasanabhūto yaṃ-saddo yadā ‘‘na labhatī’’ti etaṃ apekkhati, tattha guṇabhūtā icchā, padhānabhūto alābhoti āha ‘‘tadā icchāvisiṭṭho alābho vutto hotī’’ti.

    хирод̇д̇аббарахид̇аа чиннигаа, д̇худ̇д̇игаад̇и вужжанд̇ийд̇и ааха ‘‘чиннабхиннаг̇ан̣знаад̇и ниллаж̇ж̇зна д̇худ̇д̇аг̇ан̣знаа’’д̇и. габбадигаа сиб̣б̣ид̇абилод̇игад̇хаарино.

    Hirottapparahitā chinnikā, dhuttikāti vuccantīti āha ‘‘chinnabhinnagaṇenāti nillajjena dhuttagaṇenā’’ti. Kappaṭikā sibbitapilotikadhārino.

    алаб̣бханзяяаижчанд̇и алаб̣бханзяяавад̇т̇усмим̣ ижчам̣.

    Alabbhaneyyaicchanti alabbhaneyyavatthusmiṃ icchaṃ.

    убаад̣̇аанагканд̇ханид̣̇д̣̇зсаван̣н̣анаа

    Upādānakkhandhaniddesavaṇṇanā

    202. д̇аад̣̇исасса вад̇т̇уно саб̣бхааваад̇и сааман̃н̃ад̇о анавасзсаг̇г̇ахан̣ам̣ санд̇хааяааха.

    202. Tādisassa vatthuno sabbhāvāti sāmaññato anavasesaggahaṇaṃ sandhāyāha.

    ад̇ибаагадзна ад̇и вияа багаасзна д̣̇угкзнаад̇и ад̇т̇о.

    Atipākaṭena ati viya pakāsena dukkhenāti attho.

    д̣̇угкасажжанид̣̇д̣̇зсаван̣н̣анаа нидтид̇аа.

    Dukkhasaccaniddesavaṇṇanā niṭṭhitā.

    2. самуд̣̇аяасажжанид̣̇д̣̇зсаван̣н̣анаа

    2. Samudayasaccaniddesavaṇṇanā

    203. мано вияаад̇и мано-сад̣̇д̣̇асса вияа. ига-сад̣̇д̣̇знаад̇и ‘‘бонобхавигаа’’д̇и зд̇т̇а ига-сад̣̇д̣̇зна. г̇амияад̇т̇ад̇д̇аад̇и н̃аабид̇ад̇т̇ад̇д̇аа. гаран̣асийлад̇аа хи ид̇ха сийлад̇т̇о, со жа ига-сад̣̇д̣̇зна вужжад̇ийд̇и гирияааваажагасса гаран̣асад̣̇д̣̇асса ад̣̇ассанам̣ аббаяог̇о. вуд̇д̇ад̇т̇аанан̃хи аббаяог̇о. сад̇и бажжаяанд̇арасамавааяз бунаб̣бхавасса д̣̇ааяигаа, д̇ад̣̇абхаавз ад̣̇ааяигаад̇и вуд̇д̇аад̇и ааха ‘‘ад̣̇ааяигааби бунаб̣бхавам̣ д̣̇зд̇ижжзваа’’д̇и д̇ам̣сабхааваанад̇ивад̇д̇анад̇о. д̇знзвааха ‘‘самаанасабхаавад̇д̇аа, д̇ад̣̇аанубхаавад̇д̇аа жаа’’д̇и. д̇ад̇т̇а сабхааво д̇ан̣хааяанам̣. аанубхааво бажжаяасамавааяз паланибпаад̣̇анасамад̇т̇ад̇аа. ид̇арзсууд̇и авасидтагилзсаад̣̇ийсу. бавад̇д̇ивибаагад̣̇ааяино гаммасса сахааяабхууд̇аа д̇ан̣хаа ‘‘убад̇хивзбаггаа’’д̇и ад̇хиббзд̇аад̇и ааха ‘‘убад̇химхи яат̇ааниб̣б̣ад̇д̇з’’д̇иаад̣̇и. яат̇ааниб̣б̣ад̇д̇зд̇и ад̇д̇ано бажжаязхи ниб̣б̣ад̇д̇аббагаарз. нанд̣̇анам̣ сам̣уббилааванам̣ абхид̇ассанам̣. ран̃ж̇анам̣ вад̇т̇асса вияа ран̇г̇аж̇аад̇зна жид̇д̇асса вибарин̣ааманам̣, рамаабанам̣ ваа. рааг̇асамб̣анд̇хзнаад̇и рааг̇абад̣̇асамб̣анд̇хзна ‘‘уббаннассаа’’д̇и буллин̇г̇авасзна вуд̇д̇ам̣. руубааруубабхаварааг̇о висум̣ вагкад̇ийд̇и зд̇т̇а вагкад̇и-гирияаабад̣̇ам̣ гаммад̇т̇з взд̣̇ид̇аб̣б̣ам̣.

    203. Mano viyāti mano-saddassa viya. Ika-saddenāti ‘‘ponobhavikā’’ti ettha ika-saddena. Gamiyatthattāti ñāpitatthattā. Karaṇasīlatā hi idha sīlattho, so ca ika-saddena vuccatīti kiriyāvācakassa karaṇasaddassa adassanaṃ appayogo. Vuttatthānañhi appayogo. Sati paccayantarasamavāye punabbhavassa dāyikā, tadabhāve adāyikāti vuttāti āha ‘‘adāyikāpi punabbhavaṃ deticcevā’’ti taṃsabhāvānativattanato. Tenevāha ‘‘samānasabhāvattā, tadānubhāvattā cā’’ti. Tattha sabhāvo taṇhāyanaṃ. Ānubhāvo paccayasamavāye phalanipphādanasamatthatā. Itaresūti avasiṭṭhakilesādīsu. Pavattivipākadāyino kammassa sahāyabhūtā taṇhā ‘‘upadhivepakkā’’ti adhippetāti āha ‘‘upadhimhi yathānibbatte’’tiādi. Yathānibbatteti attano paccayehi nibbattappakāre. Nandanaṃ saṃuppilāvanaṃ abhitassanaṃ. Rañjanaṃ vatthassa viya raṅgajātena cittassa vipariṇāmanaṃ, ramāpanaṃ vā. Rāgasambandhenāti rāgapadasambandhena ‘‘uppannassā’’ti pulliṅgavasena vuttaṃ. Rūpārūpabhavarāgo visuṃ vakkhatīti ettha vakkhati-kiriyāpadaṃ kammatthe veditabbaṃ.

    ‘‘савад̇т̇угам̣ жагку’’нд̇и иминаа сагалам̣ жагкуд̣̇асагамааха, д̣̇уд̇иязна сасамбхааражагкум̣. чид̣̇д̣̇анд̇и ган̣н̣асса чид̣̇д̣̇абад̣̇зсам̣. ган̣н̣аб̣ад̣̇д̇ханд̇и ган̣н̣абаал̣и. ван̣н̣асан̣таанад̇о рад̇д̇агамб̣алабадалам̣ вияа, гижжад̇о муд̣̇усинид̣̇д̇хамад̇хурарасад̣̇ам̣ ман̃н̃анд̇и. сааман̃н̃зна г̇ахид̇аад̇и висаязна ависзсзд̇ваа г̇ахид̇аа. висаяависидтаад̇и жагкаад̣̇ивисаяависидтаа. зд̇т̇а уббаж̇ж̇ад̇ийд̇и самуд̣̇ааяааваяавзхи вияа сааман̃н̃ависзсзхи на наанад̇д̇авохааро на ход̇и яат̇аа ‘‘ругко сим̣сабаа’’д̇и. на хи саб̣б̣о ругко сим̣сабаа. д̇асмаа гирияаабхзд̣̇асаб̣бхаавад̇о ‘‘саяаанаа бхун̃ж̇анд̇и сад̇ханаа’’д̇иаад̣̇ийсу вияа ‘‘уббаж̇ж̇амаанаа’’д̇и зд̇т̇а гирияааяа лагкан̣ад̇аа, ид̇арад̇т̇а лагкид̇аб̣б̣ад̇аа жа вуд̇д̇аа. яад̣̇и уббаж̇ж̇амаанаа ход̇ийд̇и анижчид̇ад̇д̇аа саасан̇гам̣ уббаад̣̇агирияааяа ад̇т̇ибхаавамааха. д̇зна уббаад̣̇з сад̇ийд̇и аяамзд̇асса ад̇т̇од̇и ‘‘уббаж̇ж̇амаанаа’’д̇и зд̇т̇а уббаад̣̇о хзд̇убхаавзна вуд̇д̇о, ид̇аро жа д̇асса палабхаавзнаад̇и ааха ‘‘со хи д̇зна убаяож̇ид̇о вияа ход̇ий’’д̇и. уббаж̇ж̇амаанаад̇и ваа д̇ан̣хааяа д̇ад̇т̇а уббаж̇ж̇анасийлад̇аа уббаж̇ж̇анасабхааво, уббаж̇ж̇анасамад̇т̇ад̇аа ваа вуд̇д̇аа. д̇ад̇т̇зва жассаа уббаж̇ж̇анасийлад̇аа саггааяад̇о ан̃н̃асмим̣ висаяз бавад̇д̇ияаа абхаавад̇о, самад̇т̇ад̇аа бажжаяасамавааязна, ан̃н̃ат̇аа асамад̇т̇ад̇аа, яад̇о гад̣̇аажи на уббаж̇ж̇ад̇и. нивисамаанаа нивисад̇ийд̇и зд̇т̇ааби иминаа наязна ад̇т̇о взд̣̇ид̇аб̣б̣од̇и.

    ‘‘Savatthukaṃ cakkhu’’nti iminā sakalaṃ cakkhudasakamāha, dutiyena sasambhāracakkhuṃ. Chiddanti kaṇṇassa chiddapadesaṃ. Kaṇṇabaddhanti kaṇṇapāḷi. Vaṇṇasaṇṭhānato rattakambalapaṭalaṃ viya, kiccato mudusiniddhamadhurarasadaṃ maññanti. Sāmaññena gahitāti visayena avisesetvā gahitā. Visayavisiṭṭhāti cakkhādivisayavisiṭṭhā. Ettha uppajjatīti samudāyāvayavehi viya sāmaññavisesehi na nānattavohāro na hoti yathā ‘‘rukkho siṃsapā’’ti. Na hi sabbo rukkho siṃsapā. Tasmā kiriyābhedasabbhāvato ‘‘sayānā bhuñjanti sadhanā’’tiādīsu viya ‘‘uppajjamānā’’ti ettha kiriyāya lakkhaṇatā, itarattha lakkhitabbatā ca vuttā. Yadi uppajjamānāhotīti anicchitattā sāsaṅkaṃ uppādakiriyāya atthibhāvamāha. Tena uppāde satīti ayametassa atthoti ‘‘uppajjamānā’’ti ettha uppādo hetubhāvena vutto, itaro ca tassa phalabhāvenāti āha ‘‘so hi tena upayojito viya hotī’’ti. Uppajjamānāti vā taṇhāya tattha uppajjanasīlatā uppajjanasabhāvo, uppajjanasamatthatā vā vuttā. Tattheva cassā uppajjanasīlatā sakkāyato aññasmiṃ visaye pavattiyā abhāvato, samatthatā paccayasamavāyena, aññathā asamatthatā, yato kadāci na uppajjati. Nivisamānā nivisatīti etthāpi iminā nayena attho veditabboti.

    самуд̣̇аяасажжанид̣̇д̣̇зсаван̣н̣анаа нидтид̇аа.

    Samudayasaccaniddesavaṇṇanā niṭṭhitā.

    3. нирод̇хасажжанид̣̇д̣̇зсаван̣н̣анаа

    3. Nirodhasaccaniddesavaṇṇanā

    204. д̇ан̣хааяа вираж̇ж̇анам̣ халид̣̇д̣̇ирааг̇асса вияа балуж̇ж̇ананд̇и гад̇ваа ааха ‘‘каяаг̇аманавасзнаа’’д̇и. вижчиннам̣ нируж̇жхананд̇и вуд̇д̇ам̣ ‘‘аббавад̇д̇иг̇аманавасзнаа’’д̇и. жаж̇анам̣ чад̣д̣анам̣, хаабанам̣ ваад̇и ааха ‘‘анабзгкад̇ааяа жаж̇анавасзна, хаанивасзна жаа’’д̇и.

    204. Taṇhāya virajjanaṃ haliddirāgassa viya palujjananti katvā āha ‘‘khayagamanavasenā’’ti. Vicchinnaṃ nirujjhananti vuttaṃ ‘‘appavattigamanavasenā’’ti. Cajanaṃ chaḍḍanaṃ, hāpanaṃ vāti āha ‘‘anapekkhatāya cajanavasena, hānivasena cā’’ti.

    д̇ад̣̇аббавад̇д̇и вияаад̇и д̇ассаа д̇ид̇д̇аалааб̣уваллияаа аббавад̇д̇и вияа. аббавад̇д̇ихзд̇убхууд̇амби ниб̣б̣аанам̣ д̇ан̣хааяа аббавад̇д̇и вияа г̇аяхад̇ийд̇и ааха ‘‘д̇ад̣̇аббавад̇д̇и вияаа’’д̇и яат̇аа ‘‘рааг̇агкаяо’’д̇и (сам̣. ни. 4.315, 330). аббавад̇д̇ибхууд̇анд̇и д̇ан̣хааяа аббавад̇д̇ияаа бад̇д̇ам̣, бад̇д̇аб̣б̣анд̇и ад̇т̇о. ниб̣б̣аанам̣ ааг̇амма нируд̣̇д̇хааяаби д̇ан̣хааяа бияаруубасаад̇аруубзсу нируд̣̇д̇хаад̇и вад̇д̇аб̣б̣ад̇аад̣̇ассанад̇т̇ам̣ вуд̇д̇аад̇и яож̇анаа. зд̇т̇а жа яасмаа маг̇г̇о, ниб̣б̣аанан̃жа д̇ан̣хааяа самужчзд̣̇асаад̇ханам̣, д̇асмаа ‘‘буримаа ваа убамаа’’д̇иаад̣̇инаа убамаад̣̇ваяам̣ убхаяад̇т̇а яат̇ааггамам̣ яож̇ид̇ам̣, убхаяадтаанияам̣ бана убхаяад̇т̇ааби лаб̣бхад̇зва.

    Tadappavatti viyāti tassā tittaalābuvalliyā appavatti viya. Appavattihetubhūtampi nibbānaṃ taṇhāya appavatti viya gayhatīti āha ‘‘tadappavatti viyā’’ti yathā ‘‘rāgakkhayo’’ti (saṃ. ni. 4.315, 330). Appavattibhūtanti taṇhāya appavattiyā pattaṃ, pattabbanti attho. Nibbānaṃ āgamma niruddhāyapi taṇhāya piyarūpasātarūpesu niruddhāti vattabbatādassanatthaṃ vuttāti yojanā. Ettha ca yasmā maggo, nibbānañca taṇhāya samucchedasādhanaṃ, tasmā ‘‘purimā vā upamā’’tiādinā upamādvayaṃ ubhayattha yathākkamaṃ yojitaṃ, ubhayaṭṭhāniyaṃ pana ubhayatthāpi labbhateva.

    нирод̇хасажжанид̣̇д̣̇зсаван̣н̣анаа нидтид̇аа.

    Nirodhasaccaniddesavaṇṇanā niṭṭhitā.

    4. маг̇г̇асажжанид̣̇д̣̇зсаван̣н̣анаа

    4. Maggasaccaniddesavaṇṇanā

    205. д̇ид̇т̇иязхи габбид̇асса маг̇г̇асса багад̇ибурисанд̇аран̃аан̣аад̣̇игасса. арияам̣ лабхаабзд̇ийд̇и арияам̣ сааман̃н̃апалам̣ лабхаабзд̇и.

    205. Titthiyehikappitassa maggassa pakatipurisantarañāṇādikassa. Ariyaṃ labhāpetīti ariyaṃ sāmaññaphalaṃ labhāpeti.

    д̇аб̣б̣ибагкавирад̇исабхааваад̇и д̇ассаа саммааваажааяа вибагкад̇о мижчааваажааяа вирад̇исабхааваа. бхзд̣̇агарамижчааваажаа бисун̣аваажаа, саб̣б̣ааби ваа мижчааваажаа висам̣ваад̣̇анаад̣̇ивасзна бхзд̣̇агарийд̇и ааха ‘‘бхзд̣̇агарамижчааваажаабахаанзнаа’’д̇и. висам̣ваад̣̇анаад̣̇игижжад̇ааяа хи луукаанам̣ абариг̇г̇аахагаанам̣ мусааваад̣̇аад̣̇ийнам̣ бадибагкабхууд̇аа синид̣̇д̇хабхаавзна бариг̇г̇аахагасабхааваа саммааваажаа д̇аббажжаяасубхаасид̇асамбадиг̇г̇аахагз ж̇анз, самбаяуд̇д̇ад̇хаммз жа бариг̇г̇ан̣ханд̇ий бавад̇д̇ад̇ийд̇и бариг̇г̇ахалагкан̣аа. д̇знааха ‘‘ж̇анз, самбаяуд̇д̇з жа бариг̇г̇ан̣ханагижжавад̇ий’’д̇и. жийварагаммаад̣̇иго д̇аад̣̇исо баяог̇о. гаад̇аб̣б̣ам̣ жийварараж̇анаад̣̇игам̣. нираваж̇ж̇асамудтаабанагижжаваад̇и нираваж̇ж̇асса гад̇д̇аб̣б̣асса, нираваж̇ж̇аагаарзна ваа самудтаабанагижжаваа. самбаяуд̇д̇ад̇хаммз жа самудтаабзнд̇од̇и зд̇т̇а самудтаабанам̣ мижчаагамманд̇абадибагкабхууд̇асса ад̇д̇ано гижжасса ануг̇ун̣абхаавзна самбаяуд̇д̇аанам̣ бавад̇д̇анамзва, угкибанам̣ ваа нзсам̣ гааяигагирияааяа бхааругкибанам̣ вияа. самбаяуд̇д̇ад̇хаммаанам̣, ааж̇ийвассзва ваа висод̇ханам̣ вод̣̇аабанам̣.

    Tabbipakkhaviratisabhāvāti tassā sammāvācāya vipakkhato micchāvācāya viratisabhāvā. Bhedakaramicchāvācā pisuṇavācā, sabbāpi vā micchāvācā visaṃvādanādivasena bhedakarīti āha ‘‘bhedakaramicchāvācāpahānenā’’ti. Visaṃvādanādikiccatāya hi lūkhānaṃ apariggāhakānaṃ musāvādādīnaṃ paṭipakkhabhūtā siniddhabhāvena pariggāhakasabhāvā sammāvācā tappaccayasubhāsitasampaṭiggāhake jane, sampayuttadhamme ca pariggaṇhantī pavattatīti pariggahalakkhaṇā. Tenāha ‘‘jane, sampayutte ca pariggaṇhanakiccavatī’’ti. Cīvarakammādiko tādiso payogo. Kātabbaṃ cīvararajanādikaṃ. Niravajjasamuṭṭhāpanakiccavāti niravajjassa kattabbassa, niravajjākārena vā samuṭṭhāpanakiccavā. Sampayuttadhamme ca samuṭṭhāpentoti ettha samuṭṭhāpanaṃ micchākammantapaṭipakkhabhūtassa attano kiccassa anuguṇabhāvena sampayuttānaṃ pavattanameva, ukkhipanaṃ vā nesaṃ kāyikakiriyāya bhārukkhipanaṃ viya. Sampayuttadhammānaṃ, ājīvasseva vā visodhanaṃ vodāpanaṃ.

    д̣̇идтзгадтаад̇и д̣̇идтияаа сахаж̇абахаанзгадтаа, батамамаг̇г̇асаммаад̣̇идтивасзнзва д̇ам̣ взд̣̇ид̇аб̣б̣ам̣. ‘‘д̣̇идтзгадтаавиж̇ж̇аад̣̇аяо’’д̇иби баато. зд̇асмим̣ багкз жад̇умаг̇г̇асаммаад̣̇идтияаа сан̇г̇ахо гад̇о ход̇и. убаримаг̇г̇асаммаад̣̇идтияаа бана д̣̇идтидтаанз д̇ам̣д̇ам̣маг̇г̇аваж̇жхо маано г̇ахзд̇аб̣б̣о. со хи ‘‘аха’’нд̇и бавад̇д̇иаагаарад̇о д̣̇идтидтаанияо. багаасзд̇ийд̇и гижжабадивзд̇хзна бадивиж̇жхад̇и. д̇знзва хи ан̇г̇знаад̇и д̇знзва саммаад̣̇идтисан̇каад̇зна маг̇г̇ан̇г̇зна. д̇ат̇аабавад̇д̇ид̇зна гаран̣абхууд̇зна, д̇зна ваа гааран̣зна. ан̇г̇а-сад̣̇д̣̇о хи гааран̣ад̇т̇оби ход̇ийд̇и. д̇ад̇т̇аад̇и маг̇г̇з, маг̇г̇ажид̇д̇уббаад̣̇з ваа.

    Diṭṭhekaṭṭhāti diṭṭhiyā sahajapahānekaṭṭhā, paṭhamamaggasammādiṭṭhivaseneva taṃ veditabbaṃ. ‘‘Diṭṭhekaṭṭhaavijjādayo’’tipi pāṭho. Etasmiṃ pakkhe catumaggasammādiṭṭhiyā saṅgaho kato hoti. Uparimaggasammādiṭṭhiyā pana diṭṭhiṭṭhāne taṃtaṃmaggavajjho māno gahetabbo. So hi ‘‘aha’’nti pavattiākārato diṭṭhiṭṭhāniyo. Pakāsetīti kiccapaṭivedhena paṭivijjhati. Teneva hi aṅgenāti teneva sammādiṭṭhisaṅkhātena maggaṅgena. Tathāpavattitena karaṇabhūtena, tena vā kāraṇena. Aṅga-saddo hi kāraṇatthopi hotīti. Tatthāti magge, maggacittuppāde vā.

    имассзваад̇и арияамаг̇г̇абарияаабаннассзва. яад̣̇иби вирамид̇аб̣б̣ад̇о вираманд̇асса жзд̇анааби лаб̣бхад̇зва, вирад̇ияаа зва бана д̇ад̣̇аа бад̇хаанабхаавод̇и ааха ‘‘вираман̣агаалз ваа вирад̇ияо’’д̇и. субхаасид̇аад̣̇ийд̇и асампаббалаабаад̣̇и. аад̣̇и-сад̣̇д̣̇зна абисун̣аад̣̇и сан̇г̇ахид̇аа. бхаасанаад̣̇ийд̇и зд̇т̇а бана гааяасужарид̇аад̣̇и. амаг̇г̇ан̇г̇ад̇д̇аад̇и амаг̇г̇асабхаавад̇д̇аа. д̇амзва жзд̇анааяа амаг̇г̇асабхаавад̇ам̣ д̣̇ассзд̇ум̣ ‘‘згасса н̃аан̣ассаа’’д̇иаад̣̇и вуд̇д̇ам̣. д̇ад̇т̇а саммааваажаад̣̇игижжад̇д̇аяам̣ наама мижчааваажаад̣̇ийнам̣ д̇ин̣н̣ам̣ баабад̇хаммаанам̣ самужчинд̣̇анам̣, маг̇г̇ажзд̇анаа жа д̇ам̣сабхааваа на ход̇ийд̇и на д̇ассаа маг̇г̇агкан̣з саммааваажаад̣̇ибхаавасид̣̇д̇хи. д̇ам̣сид̣̇д̇хияанд̇и гижжад̇д̇аяасид̣̇д̇хияам̣. яат̇аа банассаа буб̣б̣абхааг̇з субхаасид̇аваажаад̣̇ибхааво, звам̣ маг̇г̇агкан̣зби сияаа. звам̣ санд̇з яат̇аа д̇ад̇т̇а згасса саммаасан̇габбасса д̇игижжад̇аа, саммаад̣̇идтиаад̣̇ийнан̃жа згзгаанам̣ жад̇угижжад̇аа, звам̣ згаа маг̇г̇ажзд̇анаа саммааваажаад̣̇игижжад̇д̇аяасса саад̇хигаа бхавзяяа, д̇ат̇аа жа сад̇и маг̇г̇з саммааваажаад̣̇ийни д̇ийн̣и ан̇г̇аани на бхавзяяум̣, чал̣ан̇г̇иго жа арияамаг̇г̇о сияаад̇и д̇аяид̣̇амааха ‘‘згааяа жзд̇анааяаа’’д̇иаад̣̇инаа. яасмаа банзд̇ам̣ над̇т̇и, д̇асмаа маг̇г̇абажжаяад̇ааважанад̇о жа на жзд̇анааяа маг̇г̇абхаавод̇и маг̇г̇агкан̣з вирад̇ияова саммааваажаад̣̇аяо.

    Imassevāti ariyamaggapariyāpannasseva. Yadipi viramitabbato viramantassa cetanāpi labbhateva, viratiyā eva pana tadā padhānabhāvoti āha ‘‘viramaṇakāle vā viratiyo’’ti. Subhāsitādīti asamphappalāpādi. Ādi-saddena apisuṇādi saṅgahitā. Bhāsanādīti ettha pana kāyasucaritādi. Amaggaṅgattāti amaggasabhāvattā. Tameva cetanāya amaggasabhāvataṃ dassetuṃ ‘‘ekassañāṇassā’’tiādi vuttaṃ. Tattha sammāvācādikiccattayaṃ nāma micchāvācādīnaṃ tiṇṇaṃ pāpadhammānaṃ samucchindanaṃ, maggacetanā ca taṃsabhāvā na hotīti na tassā maggakkhaṇe sammāvācādibhāvasiddhi. Taṃsiddhiyanti kiccattayasiddhiyaṃ. Yathā panassā pubbabhāge subhāsitavācādibhāvo, evaṃ maggakkhaṇepi siyā. Evaṃ sante yathā tattha ekassa sammāsaṅkappassa tikiccatā, sammādiṭṭhiādīnañca ekekānaṃ catukiccatā, evaṃ ekā maggacetanā sammāvācādikiccattayassa sādhikā bhaveyya, tathā ca sati magge sammāvācādīni tīṇi aṅgāni na bhaveyyuṃ, chaḷaṅgiko ca ariyamaggo siyāti tayidamāha ‘‘ekāya cetanāyā’’tiādinā. Yasmā panetaṃ natthi, tasmā maggapaccayatāvacanato ca na cetanāya maggabhāvoti maggakkhaṇe viratiyova sammāvācādayo.

    б̣рууханам̣ сукам̣. санд̇асукам̣ убзгкаа. саа хи ‘‘убзгкаа бана санд̇ад̇д̇аа, сукамижжзва бхаасид̇аа’’д̇и (висуд̣̇д̇хи. 2.644; вибха. адта. 232) вуд̇д̇аа. вид̇аггаад̣̇ийнанд̇и д̇зязва абхиниробанаад̣̇аяо баагадабарияааязна вуд̇д̇аа.

    Brūhanaṃ sukhaṃ. Santasukhaṃ upekkhā. Sā hi ‘‘upekkhā pana santattā, sukhamicceva bhāsitā’’ti (visuddhi. 2.644; vibha. aṭṭha. 232) vuttā. Vitakkādīnanti teyeva abhiniropanādayo pākaṭapariyāyena vuttā.

    важийсан̇каарабхаавад̇о важийбхзд̣̇асса убагаараго вид̇агго. ‘‘сааваж̇ж̇аа…бз… убагаараго зваа’’д̇и иминаа важийбхзд̣̇ад̇ам̣ самудтаабагажзд̇анаанам̣ вияа вирад̇ияааби висзсабажжаяо вид̇аггод̇и д̣̇ассзд̇и. важийбхзд̣̇анияаамигаа ваажаад̇и важийд̣̇ужжарид̇авирад̇имааха. саа хи саммааваажаабхууд̇аа мижчааваажаасу сам̣яаминий. д̇ад̇т̇а яат̇аа висам̣ваад̣̇анаад̣̇имижчааваажад̇о авирад̇о мижчаагамманд̇ад̇оби на вирамад̇зва. яат̇ааха – ‘‘згам̣ д̇хаммам̣…бз… агаарияа’’нд̇и (д̇ха. ба. 176). д̇ат̇аа ависам̣ваад̣̇анаад̣̇инаа саммааваажааяа тид̇о саммаагамманд̇амби буурзд̇иязваад̇и ааха ‘‘важийбхзд̣̇а…бз… убагааригаа’’д̇и. д̇хаммаанам̣ бавад̇д̇инидтаабхаавад̇о яат̇аа г̇ад̇ийд̇и ниб̣б̣ад̇д̇и вужжад̇и, звам̣ бавад̇д̇ибхаавад̇о расалагкан̣аанибийд̇и ааха ‘‘гижжаад̣̇исабхаавз ваа’’д̇и.

    Vacīsaṅkhārabhāvato vacībhedassa upakārako vitakko. ‘‘Sāvajjā…pe… upakārako evā’’ti iminā vacībhedataṃ samuṭṭhāpakacetanānaṃ viya viratiyāpi visesapaccayo vitakkoti dasseti. Vacībhedaniyāmikā vācāti vacīduccaritaviratimāha. Sā hi sammāvācābhūtā micchāvācāsu saṃyaminī. Tattha yathā visaṃvādanādimicchāvācato avirato micchākammantatopi na viramateva. Yathāha – ‘‘ekaṃ dhammaṃ…pe… akāriya’’nti (dha. pa. 176). Tathā avisaṃvādanādinā sammāvācāya ṭhito sammākammantampi pūretiyevāti āha ‘‘vacībheda…pe… upakārikā’’ti. Dhammānaṃ pavattiniṭṭhābhāvato yathā gatīti nibbatti vuccati, evaṃ pavattibhāvato rasalakkhaṇānipīti āha ‘‘kiccādisabhāve vā’’ti.

    абхинанд̣̇ананд̇и д̇ан̣хаад̣̇ивасзна абхинанд̣̇анам̣.

    Abhinandananti taṇhādivasena abhinandanaṃ.

    ваажуг̇г̇ад̇агаран̣ам̣ уг̇г̇ахо, ад̇т̇абарибужчанам̣ барибужчаад̇и д̇ад̣̇убхаяам̣ саванаад̇хийнанд̇и ааха ‘‘саванан̃аан̣з зва аварод̇хам̣ г̇ажчанд̇ий’’д̇и. н̃аан̣зна барижчинд̣̇ид̇ваа г̇ахан̣ам̣ бариг̇г̇ан̣ханам̣.

    Vācuggatakaraṇaṃ uggaho, atthaparipucchanaṃ paripucchāti tadubhayaṃ savanādhīnanti āha ‘‘savanañāṇe eva avarodhaṃ gacchantī’’ti. Ñāṇena paricchinditvā gahaṇaṃ pariggaṇhanaṃ.

    д̇ассаад̇и баяог̇асса.

    Tassāti payogassa.

    сод̇и гаамавид̇аггаббавад̇д̇ияаа гааран̣абхууд̇о субханимид̇д̇з аяонисоманасигааро. д̇ассаад̇и гаамавид̇аггасса. г̇ад̇ам̣ г̇аманам̣ бавад̇д̇и, д̇асса убааяод̇и г̇ад̇амаг̇г̇о.

    Soti kāmavitakkappavattiyā kāraṇabhūto subhanimitte ayonisomanasikāro. Tassāti kāmavitakkassa. Gataṃ gamanaṃ pavatti, tassa upāyoti gatamaggo.

    бахаад̇аб̣б̣азгад̇д̇анд̇и бахаад̇аб̣б̣ад̇аасааман̃н̃ам̣.

    Pahātabbaekattanti pahātabbatāsāmaññaṃ.

    маг̇г̇абхаавзна жад̇уб̣б̣ид̇хамби згад̇д̇знаад̇и сод̇аабад̇д̇имаг̇г̇аад̣̇ивасзна жад̇уб̣б̣ид̇хамби маг̇г̇абхаавзна згад̇д̇зна сааман̃н̃ад̇о г̇ахзд̇ваа ‘‘ассаа’’д̇и згаважанзна вуд̇д̇анд̇и ад̇т̇о. саб̣б̣асса маг̇г̇асса ан̃н̃аман̃н̃ам̣ сад̣̇исад̇аа, д̇ат̇аа асад̣̇исад̇аа жа згажжасад̣̇исад̇аа жа жхаанан̇г̇авасзна саб̣б̣асад̣̇исасаб̣б̣аасад̣̇исазгажжасад̣̇исад̇аа, со зва висзсод̇и яож̇зд̇аб̣б̣ам̣. вибассанаанияаамам̣ д̇хурам̣ гад̇ваа аахаад̇и самб̣анд̇хо. ид̇ха банаад̇и имиссаа саммохавинод̣̇анияам̣. саммаси…бз… нивад̇д̇анад̇од̇и батамад̇т̇зраваад̣̇ам̣ вад̣̇анд̇о д̇ад̣̇аж̇жхаасаяам̣ бурагкад̇ваа вад̣̇ад̇ийд̇и ад̇хиббааязна вуд̇д̇ам̣. ид̇арат̇аа ид̇араваад̣̇аабзд̇т̇а д̣̇ассид̇аа зваад̇и. баад̣̇агаж̇жхаананияааманд̇и баад̣̇агаж̇жхаананияаамам̣ д̇хурам̣ гад̇ваа аахаад̇и яож̇анаа. ‘‘вибассанаа …бз… д̣̇адтаб̣б̣о’’д̇и гасмаа вуд̇д̇ам̣. на хи д̇ассаа ид̇ха бадигкзбад̇аа ад̇т̇и. д̇ат̇аа хи вуд̇д̇ам̣ ‘‘гзжи вудтаанаг̇ааминивибассанаа нияаамзд̇ийд̇и вад̣̇анд̇ий’’д̇и? наяид̣̇амзвам̣. ид̇хаабийд̇и ид̇ха баад̣̇агаж̇жхаананияаамзби вибассанаанияаамо на бадигкид̇д̇од̇и аяан̃хзд̇т̇а ад̇т̇о. д̇знзвааха ‘‘саад̇хааран̣ад̇д̇аа’’д̇и. ‘‘ид̇ха банаа’’д̇и иминааби батамад̇т̇зраваад̣̇о сан̇г̇ахид̇од̇и взд̣̇ид̇аб̣б̣о. яад̣̇и звам̣ гасмаа вибассанаанияаамо висум̣ г̇ахид̇од̇и? ваад̣̇ад̇д̇аяаавид̇хурад̇аад̣̇ассанад̇т̇ам̣. ан̃н̃з жаажарияаваад̣̇аад̇и саммасид̇аж̇жхаанабуг̇г̇алаж̇жхаасаяаваад̣̇аа.

    Maggabhāvena catubbidhampi ekattenāti sotāpattimaggādivasena catubbidhampi maggabhāvena ekattena sāmaññato gahetvā ‘‘assā’’ti ekavacanena vuttanti attho. Sabbassa maggassa aññamaññaṃ sadisatā, tathā asadisatā ca ekaccasadisatā ca jhānaṅgavasena sabbasadisasabbāsadisaekaccasadisatā, so eva visesoti yojetabbaṃ. Vipassanāniyāmaṃ dhuraṃ katvā āhāti sambandho. Idha panāti imissā sammohavinodaniyaṃ. Sammasi…pe… nivattanatoti paṭhamattheravādaṃ vadanto tadajjhāsayaṃ purakkhatvā vadatīti adhippāyena vuttaṃ. Itarathā itaravādāpettha dassitā evāti. Pādakajjhānaniyāmanti pādakajjhānaniyāmaṃ dhuraṃ katvā āhāti yojanā. ‘‘Vipassanā …pe… daṭṭhabbo’’ti kasmā vuttaṃ. Na hi tassā idha paṭikkhepatā atthi. Tathā hi vuttaṃ ‘‘keci vuṭṭhānagāminivipassanā niyāmetīti vadantī’’ti? Nayidamevaṃ. Idhāpīti idha pādakajjhānaniyāmepi vipassanāniyāmo na paṭikkhittoti ayañhettha attho. Tenevāha ‘‘sādhāraṇattā’’ti. ‘‘Idha panā’’ti imināpi paṭhamattheravādo saṅgahitoti veditabbo. Yadi evaṃ kasmā vipassanāniyāmo visuṃ gahitoti? Vādattayāvidhuratādassanatthaṃ. Aññe cācariyavādāti sammasitajjhānapuggalajjhāsayavādā.

    ‘‘ааруббз д̇игажад̇уггаж̇жхаанам̣…бз… на логияа’’нд̇и ид̣̇ам̣ т̇зраваад̣̇з ааг̇ад̇ам̣ бораан̣адтагат̇ааяам̣ д̇анд̇им̣ гад̇ваа табид̇анд̇и адтасаалинияам̣ сан̇г̇ахзд̇ваа вуд̇д̇анд̇и ааха ‘‘вуд̇д̇ам̣ адтасаалинияанд̇и ад̇хиббааяо’’д̇и. язсууд̇и бажчимаж̇жхаанаваж̇ж̇аани санд̇хааяа вад̣̇ад̇и. д̇ад̇т̇а хи аруубуббад̇д̇ияам̣ сам̣саяо, на ид̇арасмим̣. ‘‘жад̇уггабан̃жагаж̇жхаана’’нд̇и вуд̇д̇з ависзсад̇о саасаваанаасавам̣ абзгкийяад̇и, нивад̇д̇зд̇аб̣б̣аг̇ахзд̇аб̣б̣асаад̇хааран̣аважанзнзд̇т̇а саасавад̇о аважчинд̣̇анад̇т̇ам̣ ‘‘д̇ан̃жа логуд̇д̇ара’’нд̇и вад̇ваа нивад̇д̇ид̇ад̇хаммад̣̇ассанад̇т̇ам̣ ‘‘на логияа’’нд̇и вуд̇д̇анд̇и д̣̇ассзнд̇о ааха ‘‘самуд̣̇ааяан̃жа…бз… аахаа’’д̇и. ид̇арат̇аа б̣яабхижаараабхаавад̇о ‘‘логуд̇д̇ара’’нд̇и висзсанам̣ нирад̇т̇агам̣ сияаа. д̇аяо маг̇г̇аад̇и д̣̇уд̇ияамаг̇г̇аад̣̇аяо. д̇аж̇жхааниганд̇и д̇игажад̇уггаж̇жхаанигам̣ сод̇аабад̇д̇ипалаад̣̇им̣. ан̃н̃ажхаанигаабийд̇и д̇игажад̇уггаж̇жхаанад̇о ан̃н̃ажхаанигааби жад̇уггаж̇жхаанигааби маг̇г̇аа уббаж̇ж̇анд̇и. би-сад̣̇д̣̇зна д̇аж̇жхаанигааби д̇игажад̇уггаж̇жхаанигаад̇и ад̇т̇о. яад̣̇и звам̣ жад̇увогаарабхавзби бан̃жавогаарабхавз вияа маг̇г̇асса д̇игажад̇уггаж̇жхаанигабхаавз гзнасса жхаанан̇г̇аад̣̇инияаамод̇и ааха ‘‘жхаанан̇г̇аад̣̇инияаамигаа буб̣б̣аабхисан̇каарасамаабад̇д̇ий’’д̇и. буб̣б̣аабхисан̇каарасамаабад̇д̇ийд̇и жа баад̣̇агабхууд̇аа ад̇д̇анаа ад̇игганд̇ад̇хаммавирааг̇абхаавзна вибассанааяа буб̣б̣аабхисан̇каарагаарий аруубасамаабад̇д̇и, паласамаабад̇д̇и ваа. д̇знааха ‘‘баад̣̇ага’’нд̇и. на саммасид̇аб̣б̣аад̇и на саммасид̇аб̣б̣аа самаабад̇д̇и жхаанан̇г̇аад̣̇инияаамигаа саммасид̇аб̣б̣аанам̣ д̇игажад̇уггаж̇жхаанаанам̣ д̇ад̇т̇а ануббаж̇ж̇анад̇о, ид̇арад̇т̇а жа висзсаабхаавад̇о. палассабийд̇и жад̇уд̇т̇абан̃жамаж̇жхаанигапалассаби.

    ‘‘Āruppe tikacatukkajjhānaṃ…pe… na lokiya’’nti idaṃ theravāde āgataṃ porāṇaṭṭhakathāyaṃ tantiṃ katvā ṭhapitanti aṭṭhasāliniyaṃ saṅgahetvā vuttanti āha ‘‘vuttaṃ aṭṭhasāliniyanti adhippāyo’’ti. Yesūti pacchimajjhānavajjāni sandhāya vadati. Tattha hi arūpuppattiyaṃ saṃsayo, na itarasmiṃ. ‘‘Catukkapañcakajjhāna’’nti vutte avisesato sāsavānāsavaṃ apekkhīyati, nivattetabbagahetabbasādhāraṇavacanenettha sāsavato avacchindanatthaṃ ‘‘tañca lokuttara’’nti vatvā nivattitadhammadassanatthaṃ ‘‘na lokiya’’nti vuttanti dassento āha ‘‘samudāyañca…pe… āhā’’ti. Itarathā byabhicārābhāvato ‘‘lokuttara’’nti visesanaṃ niratthakaṃ siyā. Tayo maggāti dutiyamaggādayo. Tajjhānikanti tikacatukkajjhānikaṃ sotāpattiphalādiṃ. Aññajhānikāpīti tikacatukkajjhānato aññajhānikāpi catukkajjhānikāpi maggā uppajjanti. Pi-saddena tajjhānikāpi tikacatukkajjhānikāti attho. Yadi evaṃ catuvokārabhavepi pañcavokārabhave viya maggassa tikacatukkajjhānikabhāve kenassa jhānaṅgādiniyāmoti āha ‘‘jhānaṅgādiniyāmikā pubbābhisaṅkhārasamāpattī’’ti. Pubbābhisaṅkhārasamāpattīti ca pādakabhūtā attanā atikkantadhammavirāgabhāvena vipassanāya pubbābhisaṅkhārakārī arūpasamāpatti, phalasamāpatti vā. Tenāha ‘‘pādaka’’nti. Na sammasitabbāti na sammasitabbā samāpatti jhānaṅgādiniyāmikā sammasitabbānaṃ tikacatukkajjhānānaṃ tattha anuppajjanato, itarattha ca visesābhāvato. Phalassapīti catutthapañcamajjhānikaphalassapi.

    д̣̇угкан̃аан̣аад̣̇ийнанд̇и д̣̇угкасамуд̣̇аяан̃аан̣аанам̣. д̇ам̣д̇ам̣гусалаарамман̣аарамман̣ад̇д̇аад̇и гаамааважараад̣̇ийсу язна язна гусалзна сад̣̇д̇хим̣ нзгкаммасан̇габбаад̣̇аяо уббаж̇ж̇анд̇и, д̇асса д̇асса гусаласса аарамман̣ам̣ аарамман̣ам̣ зд̇зсанд̇и д̇ам̣д̇ам̣гусалаарамман̣аарамман̣аа , д̇аб̣бхаавад̇о. д̇ам̣д̇ам̣вирамид̇аб̣б̣аад̣̇иаарамман̣ад̇д̇аад̇и висам̣ваад̣̇анавад̇т̇уаад̣̇иаарамман̣ад̇д̇аа. вийд̇иггамид̇аб̣б̣ад̇о зва хи вирад̇ийд̇и. ‘‘ан̇г̇аана’’нд̇и ид̣̇ам̣ ‘‘нзгкаммасан̇габбаад̣̇ийна’’нд̇и зд̇т̇ааби яож̇зд̇аб̣б̣ам̣ аваяавзна винаа самуд̣̇ааяаабхаавад̇о. висзсабажжаяод̇и бхиннасийласса, абарисуд̣̇д̇хасийласса ваа саммаббад̇хаанаасамбхавад̇о самаад̇хаанасса вияа вааяаамасса сийлам̣ висзсабажжаяо. аяан̃жа ад̇т̇о яад̣̇иби буримасид̣̇д̇хасийлавасзна яуд̇д̇о, сахаж̇аад̇авасзнааби бана лаб̣бхад̇зваад̇и д̣̇ассзнд̇о ‘‘самбаяуд̇д̇ассаабий’’д̇и ааха. сахаж̇амзва жзд̇т̇а ад̇хиббзд̇анд̇и ааха ‘‘самбаяуд̇д̇ассзва жаа’’д̇иаад̣̇и. саммосо бамаад̣̇о, д̇аббадибагко асаммосо аббамаад̣̇о, со жид̇д̇асса аарагкаад̇и ааха ‘‘жзд̇асо рагкид̇ад̇аа’’д̇и.

    Dukkhañāṇādīnanti dukkhasamudayañāṇānaṃ. Taṃtaṃkusalārammaṇārammaṇattāti kāmāvacarādīsu yena yena kusalena saddhiṃ nekkhammasaṅkappādayo uppajjanti, tassa tassa kusalassa ārammaṇaṃ ārammaṇaṃ etesanti taṃtaṃkusalārammaṇārammaṇā , tabbhāvato. Taṃtaṃviramitabbādiārammaṇattāti visaṃvādanavatthuādiārammaṇattā. Vītikkamitabbato eva hi viratīti. ‘‘Aṅgāna’’nti idaṃ ‘‘nekkhammasaṅkappādīna’’nti etthāpi yojetabbaṃ avayavena vinā samudāyābhāvato. Visesapaccayoti bhinnasīlassa, aparisuddhasīlassa vā sammappadhānāsambhavato samādhānassa viya vāyāmassa sīlaṃ visesapaccayo. Ayañca attho yadipi purimasiddhasīlavasena yutto, sahajātavasenāpi pana labbhatevāti dassento ‘‘sampayuttassāpī’’ti āha. Sahajameva cettha adhippetanti āha ‘‘sampayuttasseva cā’’tiādi. Sammoso pamādo, tappaṭipakkho asammoso appamādo, so cittassa ārakkhāti āha ‘‘cetaso rakkhitatā’’ti.

    сийлагканд̇хо жаад̇и жа-сад̣̇д̣̇зна самаад̇хигканд̇хо жа. канд̇иббад̇хаанад̇д̇аа сийласса ад̣̇осасаад̇ханад̇аа, нийваран̣аж̇здтагасса гаамажчанд̣̇асса уж̇увибажжанийгабхаавад̇о самаад̇хисса алобхасаад̇ханад̇аа д̣̇адтаб̣б̣аа. саасананд̇и бадивзд̇хасаасанам̣, ‘‘саасанаб̣рахмажарияа’’нд̇и жа вад̣̇анд̇и.

    Sīlakkhandho cāti ca-saddena samādhikkhandho ca. Khantippadhānattā sīlassa adosasādhanatā, nīvaraṇajeṭṭhakassa kāmacchandassa ujuvipaccanīkabhāvato samādhissa alobhasādhanatā daṭṭhabbā. Sāsananti paṭivedhasāsanaṃ, ‘‘sāsanabrahmacariya’’nti ca vadanti.

    маг̇г̇асажжанид̣̇д̣̇зсаван̣н̣анаа нидтид̇аа.

    Maggasaccaniddesavaṇṇanā niṭṭhitā.

    суд̇д̇анд̇абхааж̇анийяаван̣н̣анаа нидтид̇аа.

    Suttantabhājanīyavaṇṇanā niṭṭhitā.

    2. абхид̇хаммабхааж̇анийяаван̣н̣анаа

    2. Abhidhammabhājanīyavaṇṇanā

    206-214. ‘‘барин̃н̃зяяабхааварахид̇з зганд̇абахаад̇аб̣б̣з’’д̇и гасмаа вуд̇д̇ам̣, нану д̇ан̣хааяаби жагкаад̣̇ийнам̣ вияа д̇ан̣хаавад̇т̇уд̇ааважанзна барин̃н̃зяяад̇аа вуд̇д̇аа. яат̇ааха ‘‘руубад̇ан̣хаа логз бияаруубам̣ саад̇аруубам̣, зд̇т̇зсаа д̇ан̣хаа уббаж̇ж̇амаанаа уббаж̇ж̇ад̇и, зд̇т̇а нивисамаанаа нивисад̇ий’’д̇иаад̣̇и (д̣̇ий. ни. 2.400; ма. ни. 1.133; вибха. 203). д̇аббадиб̣ад̣̇д̇хасам̣гилзсаббахаанавасзна самад̇иггамид̇аб̣б̣ад̇аа хи барин̃н̃зяяад̇аа. зганд̇абахаад̇аб̣б̣ад̇аа жа на д̇ан̣хааяа зва, ат̇а ко авасзсаанам̣ сам̣гилзсад̇хаммаанамби. д̇ат̇аа хи д̇зсам̣ саб̣б̣асо ажжанд̇аббахааяигаа д̣̇ассанабхааванаад̇и? сажжамзд̇ам̣, д̇ат̇ааби яат̇аа ‘‘д̣̇угкам̣ арияасажжам̣ барин̃н̃зяяа’’нд̇и (сам̣. ни. 5.1099) д̇ан̣хааваж̇ж̇з убаад̣̇аанагканд̇хабан̃жагз барин̃н̃зяяабхааво нирул̣хо, на д̇ат̇аа д̇ан̣хааяа, д̇ан̣хааяа бана ‘‘яааяам̣ д̇ан̣хаа бонобхавигаа’’д̇иаад̣̇инаа (вибха. 203; д̣̇ий. ни. 2.400; ма. ни. 1.91, 460; сам̣. ни. 5.1081; махаава. 14; бади. ма. 1.34) самуд̣̇аяабхааво вияа саад̇исаяам̣ бахаад̇аб̣б̣абхааво нирул̣ход̇и д̣̇ассзд̇ум̣ ‘‘барин̃н̃зяяабхааварахид̇з зганд̇аббахаад̇аб̣б̣з’’д̇и вуд̇д̇ам̣. яасса асан̇г̇ахид̇о бад̣̇зсо ад̇т̇и, со саббад̣̇зсо, згад̣̇зсод̇и ад̇т̇о. д̇ад̇т̇аад̇и арияасажжасад̣̇д̣̇з. самуд̣̇аяод̇и самуд̣̇аяад̇т̇о. ‘‘ниббад̣̇зсад̇о самуд̣̇аяам̣ д̣̇ассзд̇у’’нд̇и самуд̣̇аяассзвзд̇т̇а г̇ахан̣з гааран̣ам̣ д̣̇ассзд̇ум̣ ‘‘д̣̇угканирод̇хаа банаа’’д̇иаад̣̇и вуд̇д̇ам̣. д̇ад̇т̇а д̣̇угканирод̇хаад̇и д̣̇угкам̣, нирод̇хо жа. арияасажжад̣̇зсанааяанд̇и арияасажжад̣̇зсанааяамби сажжад̣̇зсанааяам̣ вияа. д̇хаммад̇од̇и д̣̇зсзд̇аб̣б̣ад̇хаммад̇о ниббад̣̇зсаа зва. ‘‘авасзсаа жа гилзсаа’’д̇иаад̣̇инаа д̣̇зсанаабхзд̣̇о зва хи д̇ад̇т̇а висзсо. д̇знааха ‘‘на хи д̇ад̇о ан̃н̃о’’д̇иаад̣̇и. абуб̣б̣о над̇т̇ийд̇и д̇хаммад̇о абуб̣б̣о над̇т̇ийд̇и ад̇т̇о. д̇ассаад̇и самуд̣̇аяасса. саб̣б̣ад̇т̇а д̇ийсуби ваарзсууд̇и адтан̇г̇игабан̃жан̇г̇игасаб̣б̣асан̇г̇аахигабхзд̣̇зсу махааваарзсу, д̇ад̣̇анд̇ог̇ад̇хзсу жа бан̃жасу годтаасзсу. абуб̣б̣ассаад̇и ‘‘авасзсаа жа гилзсаа’’д̇иаад̣̇инаа д̇ан̣хааяа абуб̣б̣асса. авасидтагилзсаад̣̇ийнан̃хи самуд̣̇аяад̇ааважанам̣ ид̇ха абуб̣б̣ад̣̇ассанам̣. д̇асса яад̣̇иби д̣̇уд̇ияад̇ад̇ияаваарзсу висзсо над̇т̇и, бан̃жасу бана годтаасзсу убаруубари абуб̣б̣ам̣ д̣̇ассид̇анд̇и гад̇ваа звам̣ вуд̇д̇ам̣. д̇ан̃хи самуд̣̇аяависзсад̣̇ассанам̣, ид̇арам̣ бана маг̇г̇ависзсад̣̇ассанам̣. д̇асса жа д̇хаммад̇о абуб̣б̣аабхааво д̣̇ассид̇оязва. яад̣̇и звам̣ д̣̇уд̇ияаад̣̇игодтаасзсу, батамагодтаасзби ваа гасмаа д̇ан̣хаа г̇ахид̇аад̇и ааха ‘‘абуб̣б̣асамуд̣̇аяад̣̇ассанад̇т̇ааяаби хий’’д̇иаад̣̇и. гзвалааяаад̇и д̇ад̣̇ан̃н̃агилзсаад̣̇инирабзгкааяа. д̣̇зсанаавасзна на вуд̇д̇од̇и на д̇хаммавасзнаад̇и ад̇хиббааяо. д̇асмаа д̣̇угкаад̣̇ийни д̇ад̇т̇а арияасажжад̣̇зсанааяам̣ саббад̣̇зсаани д̣̇ассид̇аани хонд̇и барияааязнаад̇и д̣̇адтаб̣б̣ам̣. абхид̇хаммад̣̇зсанаа бана ниббарияааяагат̇аад̇и гад̇ваа адтагат̇ааяам̣ ‘‘ниббад̣̇зсад̇о самуд̣̇аяам̣ д̣̇ассзд̇ум̣’’ижжзва вуд̇д̇ам̣. бажжаяасан̇каад̇анд̇и бажжаяаабхимад̇ам̣ бажжаяабхууд̇ам̣, бажжаяагодтаасам̣ ваа.

    206-214. ‘‘Pariññeyyabhāvarahite ekantapahātabbe’’ti kasmā vuttaṃ, nanu taṇhāyapi cakkhādīnaṃ viya taṇhāvatthutāvacanena pariññeyyatā vuttā. Yathāha ‘‘rūpataṇhā loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisatī’’tiādi (dī. ni. 2.400; ma. ni. 1.133; vibha. 203). Tappaṭibaddhasaṃkilesappahānavasena samatikkamitabbatā hi pariññeyyatā. Ekantapahātabbatā ca na taṇhāya eva, atha kho avasesānaṃ saṃkilesadhammānampi. Tathā hi tesaṃ sabbaso accantappahāyikā dassanabhāvanāti? Saccametaṃ, tathāpi yathā ‘‘dukkhaṃ ariyasaccaṃ pariññeyya’’nti (saṃ. ni. 5.1099) taṇhāvajje upādānakkhandhapañcake pariññeyyabhāvo niruḷho, na tathā taṇhāya, taṇhāya pana ‘‘yāyaṃ taṇhā ponobhavikā’’tiādinā (vibha. 203; dī. ni. 2.400; ma. ni. 1.91, 460; saṃ. ni. 5.1081; mahāva. 14; paṭi. ma. 1.34) samudayabhāvo viya sātisayaṃ pahātabbabhāvo niruḷhoti dassetuṃ ‘‘pariññeyyabhāvarahite ekantappahātabbe’’ti vuttaṃ. Yassa asaṅgahito padeso atthi, so sappadeso, ekadesoti attho. Tatthāti ariyasaccasadde. Samudayoti samudayattho. ‘‘Nippadesato samudayaṃ dassetu’’nti samudayassevettha gahaṇe kāraṇaṃ dassetuṃ ‘‘dukkhanirodhā panā’’tiādi vuttaṃ. Tattha dukkhanirodhāti dukkhaṃ, nirodho ca. Ariyasaccadesanāyanti ariyasaccadesanāyampi saccadesanāyaṃ viya. Dhammatoti desetabbadhammato nippadesā eva. ‘‘Avasesā ca kilesā’’tiādinā desanābhedo eva hi tattha viseso. Tenāha ‘‘na hi tato añño’’tiādi. Apubbo natthīti dhammato apubbo natthīti attho. Tassāti samudayassa. Sabbattha tīsupi vāresūti aṭṭhaṅgikapañcaṅgikasabbasaṅgāhikabhedesu mahāvāresu, tadantogadhesu ca pañcasu koṭṭhāsesu. Apubbassāti ‘‘avasesā ca kilesā’’tiādinā taṇhāya apubbassa. Avasiṭṭhakilesādīnañhi samudayatāvacanaṃ idha apubbadassanaṃ. Tassa yadipi dutiyatatiyavāresu viseso natthi, pañcasu pana koṭṭhāsesu uparūpari apubbaṃ dassitanti katvā evaṃ vuttaṃ. Tañhi samudayavisesadassanaṃ, itaraṃ pana maggavisesadassanaṃ. Tassa ca dhammato apubbābhāvo dassitoyeva. Yadi evaṃ dutiyādikoṭṭhāsesu, paṭhamakoṭṭhāsepi vā kasmā taṇhā gahitāti āha ‘‘apubbasamudayadassanatthāyapi hī’’tiādi. Kevalāyāti tadaññakilesādinirapekkhāya. Desanāvasena na vuttoti na dhammavasenāti adhippāyo. Tasmā dukkhādīni tattha ariyasaccadesanāyaṃ sappadesāni dassitāni honti pariyāyenāti daṭṭhabbaṃ. Abhidhammadesanā pana nippariyāyakathāti katvā aṭṭhakathāyaṃ ‘‘nippadesato samudayaṃ dassetuṃ’’icceva vuttaṃ. Paccayasaṅkhātanti paccayābhimataṃ paccayabhūtaṃ, paccayakoṭṭhāsaṃ vā.

    д̇зсанд̇и гусалад̇хаммаанам̣. бажжаяаанам̣ бахаанавасзнаад̇и хзд̇унирод̇хзна паланирод̇хам̣ д̣̇ассзд̇и, д̇аббадиб̣ад̣̇д̇хагилзсаббахаанзна ваа гусалаанам̣ бахаанам̣ вуд̇д̇ам̣. яат̇аа ‘‘д̇хаммааби во, бхигкавз, бахаад̇аб̣б̣аа’’д̇и (ма. ни. 1.240). ид̇и барияааяад̇о гусалаанам̣ бахаанам̣ вуд̇д̇ам̣, на ниббарияааяад̇о д̇ад̣̇абхаавад̇од̇и ааха ‘‘на хи гусалаа бахаад̇аб̣б̣аа’’д̇и. яат̇аа жа гусалад̇хаммзсу, аб̣яаагад̇ад̇хаммзсуби зсзва наяо. нирод̇ханд̇и асан̇кад̇ад̇хаад̇ум̣. аббавад̇д̇ибхаавод̇и яо нирод̇хасса ниб̣б̣аанасса д̇ан̣хаад̣̇иаббавад̇д̇ихзд̇убхааво, д̇ам̣ бахаананд̇и вуд̇д̇анд̇и ад̇т̇о.

    Tesanti kusaladhammānaṃ. Paccayānaṃ pahānavasenāti hetunirodhena phalanirodhaṃ dasseti, tappaṭibaddhakilesappahānena vā kusalānaṃ pahānaṃ vuttaṃ. Yathā ‘‘dhammāpi vo, bhikkhave, pahātabbā’’ti (ma. ni. 1.240). Iti pariyāyato kusalānaṃ pahānaṃ vuttaṃ, na nippariyāyato tadabhāvatoti āha ‘‘na hi kusalā pahātabbā’’ti. Yathā ca kusaladhammesu, abyākatadhammesupi eseva nayo. Nirodhanti asaṅkhatadhātuṃ. Appavattibhāvoti yo nirodhassa nibbānassa taṇhādiappavattihetubhāvo, taṃ pahānanti vuttanti attho.

    гааяагаммаад̣̇исуд̣̇д̇хияаад̇и буб̣б̣абхааг̇агааяагаммаважийгаммаааж̇ийвасуд̣̇д̇хияаа д̣̇уурад̇аруубаниссаяад̇ам̣ арияамаг̇г̇асса д̣̇ассзд̇ийд̇и самб̣анд̇хо. бан̃жан̇г̇игам̣…бз… бавад̇д̇ад̇ам̣ д̣̇ийбзд̇и, на бана арияамаг̇г̇асса бан̃жан̇г̇игад̇д̇аад̇и ад̇хиббааяо. н̃аабаганид̣̇ассананд̇и н̃аабагабхааванид̣̇ассанам̣, зд̇зна ‘‘важанад̇о’’д̇и ид̣̇ам̣ хзд̇уад̇т̇з ниссаггаважананд̇и д̣̇ассзд̇и. важанад̇од̇и ваа ийд̣̇исасса важанасса саб̣бхаавад̇о. бадибад̣̇ааяа згад̣̇зсоби бадибад̣̇аа зваад̇и ад̇т̇о. нид̣̇д̣̇идто д̇хаммасан̇г̇аахагзхи сан̇г̇ааяанавасзна.

    Kāyakammādisuddhiyāti pubbabhāgakāyakammavacīkammaājīvasuddhiyā dūratarūpanissayataṃ ariyamaggassa dassetīti sambandho. Pañcaṅgikaṃ…pe… pavattataṃ dīpeti, na pana ariyamaggassa pañcaṅgikattāti adhippāyo. Ñāpakanidassananti ñāpakabhāvanidassanaṃ, etena ‘‘vacanato’’ti idaṃ hetuatthe nissakkavacananti dasseti. Vacanatoti vā īdisassa vacanassa sabbhāvato. Paṭipadāya ekadesopi paṭipadā evāti attho. Niddiṭṭho dhammasaṅgāhakehi saṅgāyanavasena.

    жхаанзхи д̣̇зсанаабавзсо ‘‘логуд̇д̇арам̣ жхаанам̣ бхаавзд̇ий’’д̇и (д̇ха. са. 277) жхаанасийсзна д̣̇зсанаава. д̇ат̇аа бхааванаабавзсо. баал̣иг̇амананд̇и баал̣ибавад̇д̇и баатад̣̇зсанаа. яат̇аавиж̇ж̇амаанад̇хаммавасзнаад̇и д̇асмим̣ жид̇д̇уббаад̣̇з лаб̣бхамаанавид̇аггаад̣̇ид̇хаммавасзна.

    Jhānehi desanāpaveso ‘‘lokuttaraṃ jhānaṃ bhāvetī’’ti (dha. sa. 277) jhānasīsena desanāva. Tathā bhāvanāpaveso. Pāḷigamananti pāḷipavatti pāṭhadesanā. Yathāvijjamānadhammavasenāti tasmiṃ cittuppāde labbhamānavitakkādidhammavasena.

    абхид̇хаммабхааж̇анийяаван̣н̣анаа нидтид̇аа.

    Abhidhammabhājanīyavaṇṇanā niṭṭhitā.

    3. бан̃хабужчагаван̣н̣анаа

    3. Pañhapucchakavaṇṇanā

    215. д̇ассаад̇и суд̇д̇анд̇абхааж̇анийяасса. звам̣ банаад̇и ‘‘абижзсаа саммаад̣̇идти наама буб̣б̣абхааг̇з наанаагкан̣аа наанаарамман̣аа’’д̇иаад̣̇иббагаарзна. зван̃жа гад̇ваад̇и логуд̇д̇арамаг̇г̇ассзва маг̇г̇асажжабхаавасса ад̇хиббзд̇ад̇д̇аа. д̇знаад̇и д̇зна гааран̣зна, арияамаг̇г̇ассзва уд̣̇д̣̇исид̇ваа нид̣̇д̣̇идтад̇д̇аад̇и ад̇т̇о.

    215. Tassāti suttantabhājanīyassa. Evaṃ panāti ‘‘apicesā sammādiṭṭhi nāma pubbabhāge nānākkhaṇā nānārammaṇā’’tiādippakārena. Evañca katvāti lokuttaramaggasseva maggasaccabhāvassa adhippetattā. Tenāti tena kāraṇena, ariyamaggasseva uddisitvā niddiṭṭhattāti attho.

    бан̃хабужчагаван̣н̣анаа нидтид̇аа.

    Pañhapucchakavaṇṇanā niṭṭhitā.

    сажжавибхан̇г̇аван̣н̣анаа нидтид̇аа.

    Saccavibhaṅgavaṇṇanā niṭṭhitā.




    Next: 5. инд̣̇рияавибхан̇г̇о • 5. Indriyavibhaṅgo




    Related texts:



    д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / вибхан̇г̇абаал̣и • Vibhaṅgapāḷi / 4. сажжавибхан̇г̇о • 4. Saccavibhaṅgo

    адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / саммохавинод̣̇аний-адтагат̇аа • Sammohavinodanī-aṭṭhakathā
    1. суд̇д̇анд̇абхааж̇анийяаван̣н̣анаа • 1. Suttantabhājanīyavaṇṇanā
    2. абхид̇хаммабхааж̇анийяаван̣н̣анаа • 2. Abhidhammabhājanīyavaṇṇanā
    3. бан̃хаабужчагаван̣н̣анаа • 3. Pañhāpucchakavaṇṇanā

    дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-мууладийгаа • Vibhaṅga-mūlaṭīkā / 4. сажжавибхан̇г̇о • 4. Saccavibhaṅgo


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact