| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
5. ஸச்சயமகங்
5. Saccayamakaṃ
1. பண்ணத்திவாரவண்ணனா
1. Paṇṇattivāravaṇṇanā
1-9. இதா³னி தேயேவ மூலயமகே தே³ஸிதே குஸலாதி³த⁴ம்மே ஸச்சவஸேன ஸங்க³ண்ஹித்வா தா⁴துயமகானந்தரங் தே³ஸிதஸ்ஸ ஸச்சயமகஸ்ஸ வண்ணனா ஹோதி. தத்தா²பி ஹெட்டா² வுத்தனயேனேவ பண்ணத்திவாராத³யோ தயோ மஹாவாரா அந்தரவாராத³யோ ச அவஸேஸப்பபே⁴தா³ வேதி³தப்³பா³. பண்ணத்திவாரே பனெத்த² சதுன்னங் ஸச்சானங் வஸேன பத³ஸோத⁴னவாரோ, பத³ஸோத⁴னமூலசக்கவாரோ, ஸுத்³த⁴ஸச்சவாரோ, ஸுத்³த⁴ஸச்சமூலசக்கவாரோதி இமேஸு சதூஸு வாரேஸு யமகக³ணனா வேதி³தப்³பா³.
1-9. Idāni teyeva mūlayamake desite kusalādidhamme saccavasena saṅgaṇhitvā dhātuyamakānantaraṃ desitassa saccayamakassa vaṇṇanā hoti. Tatthāpi heṭṭhā vuttanayeneva paṇṇattivārādayo tayo mahāvārā antaravārādayo ca avasesappabhedā veditabbā. Paṇṇattivāre panettha catunnaṃ saccānaṃ vasena padasodhanavāro, padasodhanamūlacakkavāro, suddhasaccavāro, suddhasaccamūlacakkavāroti imesu catūsu vāresu yamakagaṇanā veditabbā.
10-26. பண்ணத்திவாரனித்³தே³ஸே பன அவஸேஸங் து³க்க²ஸச்சந்தி து³க்க²வேத³னாய சேவ தண்ஹாய ச வினிமுத்தா தேபூ⁴மகத⁴ம்மா வேதி³தப்³பா³. அவஸேஸோ ஸமுத³யோதி ஸச்சவிப⁴ங்கே³ நித்³தி³ட்ட²காமாவசரகுஸலாதி³பே⁴தோ³ து³க்க²ஸச்சஸ்ஸ பச்சயோ. அவஸேஸோ நிரோதோ⁴தி தத³ங்க³விக்க²ம்ப⁴னஸமுச்சே²த³படிபஸ்ஸத்³தி⁴னிரோதோ⁴ சேவ க²ணப⁴ங்க³னிரோதோ⁴ ச. அவஸேஸோ மக்³கோ³தி ‘‘தஸ்மிங் கோ² பன ஸமயே பஞ்சங்கி³கோ மக்³கோ³ ஹோதி, அட்ட²ங்கி³கோ மக்³கோ³, மிச்சா²மக்³கோ³, ஜங்க⁴மக்³கோ³, ஸகடமக்³கோ³’’தி ஏவமாதி³கோ.
10-26. Paṇṇattivāraniddese pana avasesaṃ dukkhasaccanti dukkhavedanāya ceva taṇhāya ca vinimuttā tebhūmakadhammā veditabbā. Avaseso samudayoti saccavibhaṅge niddiṭṭhakāmāvacarakusalādibhedo dukkhasaccassa paccayo. Avaseso nirodhoti tadaṅgavikkhambhanasamucchedapaṭipassaddhinirodho ceva khaṇabhaṅganirodho ca. Avaseso maggoti ‘‘tasmiṃ kho pana samaye pañcaṅgiko maggo hoti, aṭṭhaṅgiko maggo, micchāmaggo, jaṅghamaggo, sakaṭamaggo’’ti evamādiko.
பண்ணத்திவாரவண்ணனா.
Paṇṇattivāravaṇṇanā.
2. பவத்திவாரவண்ணனா
2. Pavattivāravaṇṇanā
27-164. பவத்திவாரே பனெத்த² பச்சுப்பன்னகாலே புக்³க³லவாரஸ்ஸ அனுலோமனயே ‘‘யஸ்ஸ து³க்க²ஸச்சங் உப்பஜ்ஜதி, தஸ்ஸ ஸமுத³யஸச்சங் உப்பஜ்ஜதி; யஸ்ஸ வா பன ஸமுத³யஸச்சங் உப்பஜ்ஜதி, தஸ்ஸ து³க்க²ஸச்சங் உப்பஜ்ஜதீ’’தி து³க்க²ஸச்சமூலகேஹி தீஹி, ஸமுத³யஸச்சமூலகேஹி த்³வீஹி, நிரோத⁴ஸச்சமூலகேன ஏகேனாதி லப்³ப⁴மானஞ்ச அலப்³ப⁴மானஞ்ச க³ஹெத்வா பாளிவஸேன ச²ஹி யமகேஹி ப⁴விதப்³ப³ங். தேஸு யஸ்மா நிரோத⁴ஸ்ஸ நேவ உப்பாதோ³, ந நிரோதோ⁴ யுஜ்ஜதி, தஸ்மா து³க்க²ஸச்சமூலகானி ஸமுத³யஸச்சமக்³க³ஸச்சேஹி ஸத்³தி⁴ங் த்³வே, ஸமுத³யஸச்சமூலகங் மக்³க³ஸச்சேன ஸத்³தி⁴ங் ஏகந்தி தீணி யமகானி ஆக³தானி. தஸ்ஸ படிலோமனயேபி ஓகாஸவாராதீ³ஸுபி ஏஸேவ நயோ. ஏவமெத்த² ஸப்³ப³வாரேஸு திண்ணங் திண்ணங் யமகானங் வஸேன யமகக³ணனா வேதி³தப்³பா³. அத்த²வினிச்ச²யே பனெத்த² இத³ங் லக்க²ணங் – இமஸ்ஸ ஹி ஸச்சயமகஸ்ஸ பவத்திவாரே நிரோத⁴ஸச்சங் தாவ ந லப்³ப⁴தேவ. ஸேஸேஸு பன தீஸு ஸமுத³யஸச்சமக்³க³ஸச்சானி ஏகந்தேன பவத்தியங்யேவ லப்³ப⁴ந்தி. து³க்க²ஸச்சங் சுதிபடிஸந்தீ⁴ஸுபி பவத்தேபி லப்³ப⁴தி. பச்சுப்பன்னாத³யோ பன தயோ காலா சுதிபடிஸந்தீ⁴னம்பி பவத்தியாபி வஸேன லப்³ப⁴ந்தி. ஏவமெத்த² யங் யங் லப்³ப⁴தி, தஸ்ஸ தஸ்ஸ வஸேன அத்த²வினிச்ச²யோ வேதி³தப்³போ³.
27-164. Pavattivāre panettha paccuppannakāle puggalavārassa anulomanaye ‘‘yassa dukkhasaccaṃ uppajjati, tassa samudayasaccaṃ uppajjati; yassa vā pana samudayasaccaṃ uppajjati, tassa dukkhasaccaṃ uppajjatī’’ti dukkhasaccamūlakehi tīhi, samudayasaccamūlakehi dvīhi, nirodhasaccamūlakena ekenāti labbhamānañca alabbhamānañca gahetvā pāḷivasena chahi yamakehi bhavitabbaṃ. Tesu yasmā nirodhassa neva uppādo, na nirodho yujjati, tasmā dukkhasaccamūlakāni samudayasaccamaggasaccehi saddhiṃ dve, samudayasaccamūlakaṃ maggasaccena saddhiṃ ekanti tīṇi yamakāni āgatāni. Tassa paṭilomanayepi okāsavārādīsupi eseva nayo. Evamettha sabbavāresu tiṇṇaṃ tiṇṇaṃ yamakānaṃ vasena yamakagaṇanā veditabbā. Atthavinicchaye panettha idaṃ lakkhaṇaṃ – imassa hi saccayamakassa pavattivāre nirodhasaccaṃ tāva na labbhateva. Sesesu pana tīsu samudayasaccamaggasaccāni ekantena pavattiyaṃyeva labbhanti. Dukkhasaccaṃ cutipaṭisandhīsupi pavattepi labbhati. Paccuppannādayo pana tayo kālā cutipaṭisandhīnampi pavattiyāpi vasena labbhanti. Evamettha yaṃ yaṃ labbhati, tassa tassa vasena atthavinicchayo veditabbo.
தத்ரித³ங் நயமுக²ங் – ஸப்³பே³ஸங் உபபஜ்ஜந்தானந்தி அந்தமஸோ ஸுத்³தா⁴வாஸானம்பி. தேபி ஹி து³க்க²ஸச்சேனேவ உபபஜ்ஜந்தி. தண்ஹாவிப்பயுத்தசித்தஸ்ஸாதி இத³ங் து³க்க²ஸச்சஸமுத³யஸச்சேஸு ஏககொட்டா²ஸஸ்ஸ உப்பத்தித³ஸ்ஸனத்த²ங் வுத்தங். தஸ்மா பஞ்சவோகாரவஸேனேவ க³ஹேதப்³ப³ங். சதுவோகாரே பன தண்ஹாவிப்பயுத்தஸ்ஸ ப²லஸமாபத்திசித்தஸ்ஸ உப்பாத³க்க²ணே ஏகம்பி ஸச்சங் நுப்பஜ்ஜதி. இத³ங் இத⁴ ந க³ஹேதப்³ப³ங். தேஸங் து³க்க²ஸச்சஞ்சாதி தஸ்மிஞ்ஹி க²ணே தண்ஹங் ட²பெத்வா ஸேஸங் து³க்க²ஸச்சங் நாம ஹோதீதி ஸந்தா⁴யேதங் வுத்தங். மக்³க³ஸ்ஸ உப்பாத³க்க²ணேபி ஏஸேவ நயோ. தத்த² பன ரூபமேவ து³க்க²ஸச்சங் நாம. ஸேஸா மக்³க³ஸம்பயுத்தகா த⁴ம்மா ஸச்சவினிமுத்தா. தேனேவ காரணேன ‘‘அரூபே மக்³க³ஸ்ஸ உப்பாத³க்க²ணே தேஸங் மக்³க³ஸச்சங் உப்பஜ்ஜதி, நோ ச தேஸங் து³க்க²ஸச்சங் உப்பஜ்ஜதீ’’தி வுத்தங். ஸப்³பே³ஸங் உபபஜ்ஜந்தானங் பவத்தே தண்ஹாவிப்பயுத்தசித்தஸ்ஸ உப்பாத³க்க²ணே தேஸங் தத்தா²தி தேஸங் தஸ்மிங் உபபத்திக்க²ணே தண்ஹாவிப்பயுத்தசித்துப்பத்திக்க²ணே சாதி ஏவமெத்த² க²ணவஸேன ஓகாஸோ வேதி³தப்³போ³. அஞ்ஞேஸுபி ஏவரூபேஸு ஏஸேவ நயோ. அனபி⁴ஸமேதாவீனந்தி சதுஸச்சபடிவேத⁴ஸங்கா²தங் அபி⁴ஸமயங் அப்பத்தஸத்தானங். அபி⁴ஸமேதாவீனந்தி அபி⁴ஸமிதஸச்சானந்தி. இமினா நயமுகே²ன ஸப்³ப³த்த² அத்த²வினிச்ச²யோ வேதி³தப்³போ³.
Tatridaṃ nayamukhaṃ – sabbesaṃ upapajjantānanti antamaso suddhāvāsānampi. Tepi hi dukkhasacceneva upapajjanti. Taṇhāvippayuttacittassāti idaṃ dukkhasaccasamudayasaccesu ekakoṭṭhāsassa uppattidassanatthaṃ vuttaṃ. Tasmā pañcavokāravaseneva gahetabbaṃ. Catuvokāre pana taṇhāvippayuttassa phalasamāpatticittassa uppādakkhaṇe ekampi saccaṃ nuppajjati. Idaṃ idha na gahetabbaṃ. Tesaṃ dukkhasaccañcāti tasmiñhi khaṇe taṇhaṃ ṭhapetvā sesaṃ dukkhasaccaṃ nāma hotīti sandhāyetaṃ vuttaṃ. Maggassa uppādakkhaṇepi eseva nayo. Tattha pana rūpameva dukkhasaccaṃ nāma. Sesā maggasampayuttakā dhammā saccavinimuttā. Teneva kāraṇena ‘‘arūpe maggassa uppādakkhaṇe tesaṃ maggasaccaṃ uppajjati, no ca tesaṃ dukkhasaccaṃ uppajjatī’’ti vuttaṃ. Sabbesaṃ upapajjantānaṃ pavatte taṇhāvippayuttacittassa uppādakkhaṇe tesaṃ tatthāti tesaṃ tasmiṃ upapattikkhaṇe taṇhāvippayuttacittuppattikkhaṇe cāti evamettha khaṇavasena okāso veditabbo. Aññesupi evarūpesu eseva nayo. Anabhisametāvīnanti catusaccapaṭivedhasaṅkhātaṃ abhisamayaṃ appattasattānaṃ. Abhisametāvīnanti abhisamitasaccānanti. Iminā nayamukhena sabbattha atthavinicchayo veditabbo.
பவத்திவாரவண்ணனா.
Pavattivāravaṇṇanā.
3. பரிஞ்ஞாவாரவண்ணனா
3. Pariññāvāravaṇṇanā
165-170. பரிஞ்ஞாவாரே பன ஞாதபரிஞ்ஞா, தீரணபரிஞ்ஞா, பஹானபரிஞ்ஞாதி திஸ்ஸோபெத்த² பரிஞ்ஞாயோ லப்³ப⁴ந்தி. யஸ்மா ச லோகுத்தரத⁴ம்மேஸு பரிஞ்ஞா நாம நத்தி²; தஸ்மா இத⁴ த்³வே ஸச்சானி க³ஹிதானி. தத்த² து³க்க²ஸச்சங் பரிஜானாதீதி ஞாததீரணபரிஞ்ஞாவஸேனேவ வுத்தங். ஸமுத³யஸச்சங் பஜஹதீதி ஞாதபஹானபரிஞ்ஞாவஸேன. இதி இமாஸங் பரிஞ்ஞானங் வஸேன ஸப்³ப³பதே³ஸு அத்தோ² வேதி³தப்³போ³தி.
165-170. Pariññāvāre pana ñātapariññā, tīraṇapariññā, pahānapariññāti tissopettha pariññāyo labbhanti. Yasmā ca lokuttaradhammesu pariññā nāma natthi; tasmā idha dve saccāni gahitāni. Tattha dukkhasaccaṃ parijānātīti ñātatīraṇapariññāvaseneva vuttaṃ. Samudayasaccaṃ pajahatīti ñātapahānapariññāvasena. Iti imāsaṃ pariññānaṃ vasena sabbapadesu attho veditabboti.
பரிஞ்ஞாவாரவண்ணனா.
Pariññāvāravaṇṇanā.
ஸச்சயமகவண்ணனா நிட்டி²தா.
Saccayamakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / யமகபாளி • Yamakapāḷi / 5. ஸச்சயமகங் • 5. Saccayamakaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 5. ஸச்சயமகங் • 5. Saccayamakaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 5. ஸச்சயமகங் • 5. Saccayamakaṃ
