| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៩. សច្ឆិករណីយសុត្តំ
9. Sacchikaraṇīyasuttaṃ
១៨៩. ‘‘ចត្តារោមេ , ភិក្ខវេ, សច្ឆិករណីយា ធម្មា។ កតមេ ចត្តារោ? អត្ថិ , ភិក្ខវេ, ធម្មា កាយេន សច្ឆិករណីយា; អត្ថិ, ភិក្ខវេ, ធម្មា សតិយា សច្ឆិករណីយា; អត្ថិ, ភិក្ខវេ, ធម្មា ចក្ខុនា សច្ឆិករណីយា; អត្ថិ, ភិក្ខវេ, ធម្មា បញ្ញាយ សច្ឆិករណីយា។ កតមេ ច, ភិក្ខវេ, ធម្មា កាយេន សច្ឆិករណីយា? អដ្ឋ វិមោក្ខា, ភិក្ខវេ, កាយេន សច្ឆិករណីយា។
189. ‘‘Cattārome , bhikkhave, sacchikaraṇīyā dhammā. Katame cattāro? Atthi , bhikkhave, dhammā kāyena sacchikaraṇīyā; atthi, bhikkhave, dhammā satiyā sacchikaraṇīyā; atthi, bhikkhave, dhammā cakkhunā sacchikaraṇīyā; atthi, bhikkhave, dhammā paññāya sacchikaraṇīyā. Katame ca, bhikkhave, dhammā kāyena sacchikaraṇīyā? Aṭṭha vimokkhā, bhikkhave, kāyena sacchikaraṇīyā.
‘‘កតមេ ច, ភិក្ខវេ, ធម្មា សតិយា សច្ឆិករណីយា? បុព្ពេនិវាសោ, ភិក្ខវេ, សតិយា សច្ឆិករណីយោ។
‘‘Katame ca, bhikkhave, dhammā satiyā sacchikaraṇīyā? Pubbenivāso, bhikkhave, satiyā sacchikaraṇīyo.
‘‘កតមេ ច, ភិក្ខវេ, ធម្មា ចក្ខុនា សច្ឆិករណីយា? សត្តានំ ចុតូបបាតោ, ភិក្ខវេ, ចក្ខុនា សច្ឆិករណីយោ។
‘‘Katame ca, bhikkhave, dhammā cakkhunā sacchikaraṇīyā? Sattānaṃ cutūpapāto, bhikkhave, cakkhunā sacchikaraṇīyo.
‘‘កតមេ ច, ភិក្ខវេ, ធម្មា បញ្ញាយ សច្ឆិករណីយា? អាសវានំ ខយោ, ភិក្ខវេ, បញ្ញាយ សច្ឆិករណីយោ។ ឥមេ ខោ, ភិក្ខវេ, ចត្តារោ សច្ឆិករណីយា ធម្មា’’តិ។ នវមំ។
‘‘Katame ca, bhikkhave, dhammā paññāya sacchikaraṇīyā? Āsavānaṃ khayo, bhikkhave, paññāya sacchikaraṇīyo. Ime kho, bhikkhave, cattāro sacchikaraṇīyā dhammā’’ti. Navamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៩. សច្ឆិករណីយសុត្តវណ្ណនា • 9. Sacchikaraṇīyasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៩. សច្ឆិករណីយសុត្តវណ្ណនា • 9. Sacchikaraṇīyasuttavaṇṇanā
