| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၉. သစ္ဆိကရဏီယသုတ္တံ
9. Sacchikaraṇīyasuttaṃ
၁၈၉. ‘‘စတ္တာရောမေ , ဘိက္ခဝေ, သစ္ဆိကရဏီယာ ဓမ္မာ။ ကတမေ စတ္တာရော? အတ္ထိ , ဘိက္ခဝေ, ဓမ္မာ ကာယေန သစ္ဆိကရဏီယာ; အတ္ထိ, ဘိက္ခဝေ, ဓမ္မာ သတိယာ သစ္ဆိကရဏီယာ; အတ္ထိ, ဘိက္ခဝေ, ဓမ္မာ စက္ခုနာ သစ္ဆိကရဏီယာ; အတ္ထိ, ဘိက္ခဝေ, ဓမ္မာ ပညာယ သစ္ဆိကရဏီယာ။ ကတမေ စ, ဘိက္ခဝေ, ဓမ္မာ ကာယေန သစ္ဆိကရဏီယာ? အဋ္ဌ ဝိမောက္ခာ, ဘိက္ခဝေ, ကာယေန သစ္ဆိကရဏီယာ။
189. ‘‘Cattārome , bhikkhave, sacchikaraṇīyā dhammā. Katame cattāro? Atthi , bhikkhave, dhammā kāyena sacchikaraṇīyā; atthi, bhikkhave, dhammā satiyā sacchikaraṇīyā; atthi, bhikkhave, dhammā cakkhunā sacchikaraṇīyā; atthi, bhikkhave, dhammā paññāya sacchikaraṇīyā. Katame ca, bhikkhave, dhammā kāyena sacchikaraṇīyā? Aṭṭha vimokkhā, bhikkhave, kāyena sacchikaraṇīyā.
‘‘ကတမေ စ, ဘိက္ခဝေ, ဓမ္မာ သတိယာ သစ္ဆိကရဏီယာ? ပုဗ္ဗေနိဝာသော, ဘိက္ခဝေ, သတိယာ သစ္ဆိကရဏီယော။
‘‘Katame ca, bhikkhave, dhammā satiyā sacchikaraṇīyā? Pubbenivāso, bhikkhave, satiyā sacchikaraṇīyo.
‘‘ကတမေ စ, ဘိက္ခဝေ, ဓမ္မာ စက္ခုနာ သစ္ဆိကရဏီယာ? သတ္တာနံ စုတူပပာတော, ဘိက္ခဝေ, စက္ခုနာ သစ္ဆိကရဏီယော။
‘‘Katame ca, bhikkhave, dhammā cakkhunā sacchikaraṇīyā? Sattānaṃ cutūpapāto, bhikkhave, cakkhunā sacchikaraṇīyo.
‘‘ကတမေ စ, ဘိက္ခဝေ, ဓမ္မာ ပညာယ သစ္ဆိကရဏီယာ? အာသဝာနံ ခယော, ဘိက္ခဝေ, ပညာယ သစ္ဆိကရဏီယော။ ဣမေ ခော, ဘိက္ခဝေ, စတ္တာရော သစ္ဆိကရဏီယာ ဓမ္မာ’’တိ။ နဝမံ။
‘‘Katame ca, bhikkhave, dhammā paññāya sacchikaraṇīyā? Āsavānaṃ khayo, bhikkhave, paññāya sacchikaraṇīyo. Ime kho, bhikkhave, cattāro sacchikaraṇīyā dhammā’’ti. Navamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၉. သစ္ဆိကရဏီယသုတ္တဝဏ္ဏနာ • 9. Sacchikaraṇīyasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၉. သစ္ဆိကရဏီယသုတ္တဝဏ္ဏနာ • 9. Sacchikaraṇīyasuttavaṇṇanā
