| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. සච්‌ඡිකරණීයසුත්‌තං
9. Sacchikaraṇīyasuttaṃ
189. ‘‘චත්‌තාරොමෙ , භික්‌ඛවෙ, සච්‌ඡිකරණීයා ධම්‌මා. කතමෙ චත්‌තාරො? අත්‌ථි , භික්‌ඛවෙ, ධම්‌මා කායෙන සච්‌ඡිකරණීයා; අත්‌ථි, භික්‌ඛවෙ, ධම්‌මා සතියා සච්‌ඡිකරණීයා; අත්‌ථි, භික්‌ඛවෙ, ධම්‌මා චක්‌ඛුනා සච්‌ඡිකරණීයා; අත්‌ථි, භික්‌ඛවෙ, ධම්‌මා පඤ්‌ඤාය සච්‌ඡිකරණීයා. කතමෙ ච, භික්‌ඛවෙ, ධම්‌මා කායෙන සච්‌ඡිකරණීයා? අට්‌ඨ විමොක්‌ඛා, භික්‌ඛවෙ, කායෙන සච්‌ඡිකරණීයා.
189. ‘‘Cattārome , bhikkhave, sacchikaraṇīyā dhammā. Katame cattāro? Atthi , bhikkhave, dhammā kāyena sacchikaraṇīyā; atthi, bhikkhave, dhammā satiyā sacchikaraṇīyā; atthi, bhikkhave, dhammā cakkhunā sacchikaraṇīyā; atthi, bhikkhave, dhammā paññāya sacchikaraṇīyā. Katame ca, bhikkhave, dhammā kāyena sacchikaraṇīyā? Aṭṭha vimokkhā, bhikkhave, kāyena sacchikaraṇīyā.
‘‘කතමෙ ච, භික්‌ඛවෙ, ධම්‌මා සතියා සච්‌ඡිකරණීයා? පුබ්‌බෙනිවාසො, භික්‌ඛවෙ, සතියා සච්‌ඡිකරණීයො.
‘‘Katame ca, bhikkhave, dhammā satiyā sacchikaraṇīyā? Pubbenivāso, bhikkhave, satiyā sacchikaraṇīyo.
‘‘කතමෙ ච, භික්‌ඛවෙ, ධම්‌මා චක්‌ඛුනා සච්‌ඡිකරණීයා? සත්‌තානං චුතූපපාතො, භික්‌ඛවෙ, චක්‌ඛුනා සච්‌ඡිකරණීයො.
‘‘Katame ca, bhikkhave, dhammā cakkhunā sacchikaraṇīyā? Sattānaṃ cutūpapāto, bhikkhave, cakkhunā sacchikaraṇīyo.
‘‘කතමෙ ච, භික්‌ඛවෙ, ධම්‌මා පඤ්‌ඤාය සච්‌ඡිකරණීයා? ආසවානං ඛයො, භික්‌ඛවෙ, පඤ්‌ඤාය සච්‌ඡිකරණීයො. ඉමෙ ඛො, භික්‌ඛවෙ, චත්‌තාරො සච්‌ඡිකරණීයා ධම්‌මා’’ති. නවමං.
‘‘Katame ca, bhikkhave, dhammā paññāya sacchikaraṇīyā? Āsavānaṃ khayo, bhikkhave, paññāya sacchikaraṇīyo. Ime kho, bhikkhave, cattāro sacchikaraṇīyā dhammā’’ti. Navamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. සච්‌ඡිකරණීයසුත්‌තවණ්‌ණනා • 9. Sacchikaraṇīyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 9. සච්‌ඡිකරණීයසුත්‌තවණ්‌ණනා • 9. Sacchikaraṇīyasuttavaṇṇanā
