| Library / Tipiṭaka / ติปิฎก • Tipiṭaka / องฺคุตฺตรนิกาย (ฎีกา) • Aṅguttaranikāya (ṭīkā) |
๕. สเจตนสุตฺตวณฺณนา
5. Sacetanasuttavaṇṇanā
๑๕. ปญฺจเม อิสโย ปตนฺติ สนฺนิปตนฺติ เอตฺถาติ อิสิปตนนฺติ อาห ‘‘พุทฺธปเจฺจกพุทฺธสงฺขาตาน’’นฺติอาทิฯ สพฺพูปกรณานิ สเชฺชตฺวาติ สพฺพานิ รุกฺขสฺส เฉทนตจฺฉนาทิสาธนานิ อุปกรณานิ รญฺญา อาณตฺตทิวเสเยว สเชฺชตฺวาฯ นานา กรียติ เอเตนาติ นานากรณํ, นานาภาโวติ อาห ‘‘นานตฺต’’นฺติฯ เนสนฺติ สรโลเปนายํ นิเทฺทโสติ อาห ‘‘น เอส’’นฺติฯ ตถา อเตฺถสนฺติ เอตฺถาปีติ อาห ‘‘อตฺถิ เอส’’นฺติฯ ปวตฺตนตฺถํ อภิสงฺขรณํ อภิสงฺขาโร, ตสฺส คติ เวคสา ปวตฺติฯ ตํ สนฺธายาห ‘‘ปโยคสฺส คมน’’นฺติฯ
15. Pañcame isayo patanti sannipatanti etthāti isipatananti āha ‘‘buddhapaccekabuddhasaṅkhātāna’’ntiādi. Sabbūpakaraṇāni sajjetvāti sabbāni rukkhassa chedanatacchanādisādhanāni upakaraṇāni raññā āṇattadivaseyeva sajjetvā. Nānā karīyati etenāti nānākaraṇaṃ, nānābhāvoti āha ‘‘nānatta’’nti. Nesanti saralopenāyaṃ niddesoti āha ‘‘na esa’’nti. Tathā atthesanti etthāpīti āha ‘‘atthi esa’’nti. Pavattanatthaṃ abhisaṅkharaṇaṃ abhisaṅkhāro, tassa gati vegasā pavatti. Taṃ sandhāyāha ‘‘payogassa gamana’’nti.
สคณฺฑาติ ขุทฺทานุขุทฺทกคณฺฑาฯ เตนาห ‘‘อุณฺณโตณตฎฺฐานยุตฺตา’’ติฯ สกสาวาติ สกสฎาฯ เตนาห ‘‘ปูติสาเรนา’’ติอาทิฯ เอวํ คุณปตเนน ปติตาติ ยถา ตํ จกฺกํ นาภิอรเนมีนํ สโทสตาย น ปติฎฺฐาสิ, เอวเมกเจฺจ ปุคฺคลา กายวงฺกาทิวเสน สโทสตาย คุณปตเนน ปติตา สกฎฺฐาเน น ติฎฺฐนฺติฯ เอตฺถ จ ผรุสวาจาทโยปิ อปายคมนียา โสตาปตฺติมเคฺคเนว ปหียนฺตีติ ทฎฺฐพฺพาฯ
Sagaṇḍāti khuddānukhuddakagaṇḍā. Tenāha ‘‘uṇṇatoṇataṭṭhānayuttā’’ti. Sakasāvāti sakasaṭā. Tenāha ‘‘pūtisārenā’’tiādi. Evaṃ guṇapatanena patitāti yathā taṃ cakkaṃ nābhiaranemīnaṃ sadosatāya na patiṭṭhāsi, evamekacce puggalā kāyavaṅkādivasena sadosatāya guṇapatanena patitā sakaṭṭhāne na tiṭṭhanti. Ettha ca pharusavācādayopi apāyagamanīyā sotāpattimaggeneva pahīyantīti daṭṭhabbā.
สเจตนสุตฺตวณฺณนา นิฎฺฐิตาฯ
Sacetanasuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๕. สเจตนสุตฺตํ • 5. Sacetanasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๕. สเจตนสุตฺตวณฺณนา • 5. Sacetanasuttavaṇṇanā
