| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
5. සචෙතනසුත්‌තවණ්‌ණනා
5. Sacetanasuttavaṇṇanā
15. පඤ්‌චමෙ ඉසයො පතන්‌ති සන්‌නිපතන්‌ති එත්‌ථාති ඉසිපතනන්‌ති ආහ ‘‘බුද්‌ධපච්‌චෙකබුද්‌ධසඞ්‌ඛාතාන’’න්‌තිආදි. සබ්‌බූපකරණානි සජ්‌ජෙත්‌වාති සබ්‌බානි රුක්‌ඛස්‌ස ඡෙදනතච්‌ඡනාදිසාධනානි උපකරණානි රඤ්‌ඤා ආණත්‌තදිවසෙයෙව සජ්‌ජෙත්‌වා. නානා කරීයති එතෙනාති නානාකරණං, නානාභාවොති ආහ ‘‘නානත්‌ත’’න්‌ති. නෙසන්‌ති සරලොපෙනායං නිද්‌දෙසොති ආහ ‘‘න එස’’න්‌ති. තථා අත්‌ථෙසන්‌ති එත්‌ථාපීති ආහ ‘‘අත්‌ථි එස’’න්‌ති. පවත්‌තනත්‌ථං අභිසඞ්‌ඛරණං අභිසඞ්‌ඛාරො, තස්‌ස ගති වෙගසා පවත්‌ති. තං සන්‌ධායාහ ‘‘පයොගස්‌ස ගමන’’න්‌ති.
15. Pañcame isayo patanti sannipatanti etthāti isipatananti āha ‘‘buddhapaccekabuddhasaṅkhātāna’’ntiādi. Sabbūpakaraṇāni sajjetvāti sabbāni rukkhassa chedanatacchanādisādhanāni upakaraṇāni raññā āṇattadivaseyeva sajjetvā. Nānā karīyati etenāti nānākaraṇaṃ, nānābhāvoti āha ‘‘nānatta’’nti. Nesanti saralopenāyaṃ niddesoti āha ‘‘na esa’’nti. Tathā atthesanti etthāpīti āha ‘‘atthi esa’’nti. Pavattanatthaṃ abhisaṅkharaṇaṃ abhisaṅkhāro, tassa gati vegasā pavatti. Taṃ sandhāyāha ‘‘payogassa gamana’’nti.
සගණ්‌ඩාති ඛුද්‌දානුඛුද්‌දකගණ්‌ඩා. තෙනාහ ‘‘උණ්‌ණතොණතට්‌ඨානයුත්‌තා’’ති. සකසාවාති සකසටා. තෙනාහ ‘‘පූතිසාරෙනා’’තිආදි. එවං ගුණපතනෙන පතිතාති යථා තං චක්‌කං නාභිඅරනෙමීනං සදොසතාය න පතිට්‌ඨාසි, එවමෙකච්‌චෙ පුග්‌ගලා කායවඞ්‌කාදිවසෙන සදොසතාය ගුණපතනෙන පතිතා සකට්‌ඨානෙ න තිට්‌ඨන්‌ති. එත්‌ථ ච ඵරුසවාචාදයොපි අපායගමනීයා සොතාපත්‌තිමග්‌ගෙනෙව පහීයන්‌තීති දට්‌ඨබ්‌බා.
Sagaṇḍāti khuddānukhuddakagaṇḍā. Tenāha ‘‘uṇṇatoṇataṭṭhānayuttā’’ti. Sakasāvāti sakasaṭā. Tenāha ‘‘pūtisārenā’’tiādi. Evaṃ guṇapatanena patitāti yathā taṃ cakkaṃ nābhiaranemīnaṃ sadosatāya na patiṭṭhāsi, evamekacce puggalā kāyavaṅkādivasena sadosatāya guṇapatanena patitā sakaṭṭhāne na tiṭṭhanti. Ettha ca pharusavācādayopi apāyagamanīyā sotāpattimaggeneva pahīyantīti daṭṭhabbā.
සචෙතනසුත්‌තවණ්‌ණනා නිට්‌ඨිතා.
Sacetanasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 5. සචෙතනසුත්‌තං • 5. Sacetanasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. සචෙතනසුත්‌තවණ්‌ණනා • 5. Sacetanasuttavaṇṇanā
