| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৮. অট্ঠারসমৰগ্গো
18. Aṭṭhārasamavaggo
(১৮৪) ৮. সদ্দং সুণাতীতিকথা
(184) 8. Saddaṃ suṇātītikathā
৮২৩. সমাপন্নো সদ্দং সুণাতীতি? আমন্তা। সমাপন্নো চক্খুনা রূপং পস্সতি…পে॰… সোতেন…পে॰… ঘানেন…পে॰… জিৰ্হায…পে॰… কাযেন ফোট্ঠব্বং ফুসতীতি? ন হেৰং ৰত্তব্বে…পে॰…।
823. Samāpanno saddaṃ suṇātīti? Āmantā. Samāpanno cakkhunā rūpaṃ passati…pe… sotena…pe… ghānena…pe… jivhāya…pe… kāyena phoṭṭhabbaṃ phusatīti? Na hevaṃ vattabbe…pe….
সমাপন্নো সদ্দং সুণাতীতি? আমন্তা। সোতৰিঞ্ঞাণসমঙ্গী সমাপন্নোতি? ন হেৰং ৰত্তব্বে। ননু সমাধি মনোৰিঞ্ঞাণসমঙ্গিস্সাতি? আমন্তা। হঞ্চি সমাধি মনোৰিঞ্ঞাণসমঙ্গিস্স, নো চ ৰত রে ৰত্তব্বে – ‘‘সমাপন্নো সদ্দং সুণাতী’’তি।
Samāpanno saddaṃ suṇātīti? Āmantā. Sotaviññāṇasamaṅgī samāpannoti? Na hevaṃ vattabbe. Nanu samādhi manoviññāṇasamaṅgissāti? Āmantā. Hañci samādhi manoviññāṇasamaṅgissa, no ca vata re vattabbe – ‘‘samāpanno saddaṃ suṇātī’’ti.
সমাধি মনোৰিঞ্ঞাণসমঙ্গিস্স, সোতৰিঞ্ঞাণসমঙ্গী সদ্দং সুণাতীতি? আমন্তা। হঞ্চি সমাধি মনোৰিঞ্ঞাণসমঙ্গিস্স, সোতৰিঞ্ঞাণসমঙ্গী সদ্দং সুণাতি, নো চ ৰত রে ৰত্তব্বে – ‘‘সমাপন্নো সদ্দং সুণাতী’’তি । সমাধি মনোৰিঞ্ঞাণসমঙ্গিস্স, সোতৰিঞ্ঞাণসমঙ্গী সদ্দং সুণাতীতি? আমন্তা। দ্ৰিন্নং ফস্সানং…পে॰… দ্ৰিন্নং চিত্তানং সমোধানং হোতীতি? ন হেৰং ৰত্তব্বে…পে॰…।
Samādhi manoviññāṇasamaṅgissa, sotaviññāṇasamaṅgī saddaṃ suṇātīti? Āmantā. Hañci samādhi manoviññāṇasamaṅgissa, sotaviññāṇasamaṅgī saddaṃ suṇāti, no ca vata re vattabbe – ‘‘samāpanno saddaṃ suṇātī’’ti . Samādhi manoviññāṇasamaṅgissa, sotaviññāṇasamaṅgī saddaṃ suṇātīti? Āmantā. Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe….
৮২৪. ন ৰত্তব্বং – ‘‘সমাপন্নো সদ্দং সুণাতী’’তি? আমন্তা। ননু পঠমস্স ঝানস্স সদ্দো কণ্টকো ৰুত্তো ভগৰতাতি? আমন্তা । হঞ্চি পঠমস্স ঝানস্স সদ্দো কণ্টকো ৰুত্তো ভগৰতা, তেন ৰত রে ৰত্তব্বে – ‘‘সমাপন্নো সদ্দং সুণাতী’’তি।
824. Na vattabbaṃ – ‘‘samāpanno saddaṃ suṇātī’’ti? Āmantā. Nanu paṭhamassa jhānassa saddo kaṇṭako vutto bhagavatāti? Āmantā . Hañci paṭhamassa jhānassa saddo kaṇṭako vutto bhagavatā, tena vata re vattabbe – ‘‘samāpanno saddaṃ suṇātī’’ti.
৮২৫. পঠমস্স ঝানস্স সদ্দো কণ্টকো ৰুত্তো ভগৰতাতি, সমাপন্নো সদ্দং সুণাতীতি? আমন্তা। দুতিযস্স ঝানস্স ৰিতক্কো ৰিচারো কণ্টকো ৰুত্তো ভগৰতা, অত্থি তস্স ৰিতক্কৰিচারাতি? ন হেৰং ৰত্তব্বে…পে॰…।
825. Paṭhamassa jhānassa saddo kaṇṭako vutto bhagavatāti, samāpanno saddaṃ suṇātīti? Āmantā. Dutiyassa jhānassa vitakko vicāro kaṇṭako vutto bhagavatā, atthi tassa vitakkavicārāti? Na hevaṃ vattabbe…pe….
পঠমস্স ঝানস্স সদ্দো কণ্টকো ৰুত্তো ভগৰতাতি, সমাপন্নো সদ্দং সুণাতীতি? আমন্তা। ততিযস্স ঝানস্স পীতি কণ্টকো…পে॰… চতুত্থস্স ঝানস্স অস্সাসপস্সাসো কণ্টকো … আকাসানঞ্চাযতনং সমাপন্নস্স রূপসঞ্ঞা কণ্টকো… ৰিঞ্ঞাণঞ্চাযতনং সমাপন্নস্স আকাসানঞ্চাযতনসঞ্ঞা কণ্টকো… আকিঞ্চঞ্ঞাযতনং সমাপন্নস্স ৰিঞ্ঞাণঞ্চাযতনসঞ্ঞা কণ্টকো… নেৰসঞ্ঞানাসঞ্ঞাযতনং সমাপন্নস্স আকিঞ্চঞ্ঞাযতনসঞ্ঞা কণ্টকো… সঞ্ঞাৰেদযিতনিরোধং সমাপন্নস্স সঞ্ঞা চ ৰেদনা চ কণ্টকো ৰুত্তো ভগৰতা, অত্থি তস্স সঞ্ঞা চ ৰেদনা চাতি? ন হেৰং ৰত্তব্বে…পে॰…।
Paṭhamassa jhānassa saddo kaṇṭako vutto bhagavatāti, samāpanno saddaṃ suṇātīti? Āmantā. Tatiyassa jhānassa pīti kaṇṭako…pe… catutthassa jhānassa assāsapassāso kaṇṭako … ākāsānañcāyatanaṃ samāpannassa rūpasaññā kaṇṭako… viññāṇañcāyatanaṃ samāpannassa ākāsānañcāyatanasaññā kaṇṭako… ākiñcaññāyatanaṃ samāpannassa viññāṇañcāyatanasaññā kaṇṭako… nevasaññānāsaññāyatanaṃ samāpannassa ākiñcaññāyatanasaññā kaṇṭako… saññāvedayitanirodhaṃ samāpannassa saññā ca vedanā ca kaṇṭako vutto bhagavatā, atthi tassa saññā ca vedanā cāti? Na hevaṃ vattabbe…pe….
সদ্দং সুণাতীতিকথা নিট্ঠিতা।
Saddaṃ suṇātītikathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৮. সমাপন্নো সদ্দং সুণাতীতিকথাৰণ্ণনা • 8. Samāpanno saddaṃ suṇātītikathāvaṇṇanā
