| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
18. අට්‌ඨාරසමවග්‌ගො
18. Aṭṭhārasamavaggo
(184) 8. සද්‌දං සුණාතීතිකථා
(184) 8. Saddaṃ suṇātītikathā
823. සමාපන්‌නො සද්‌දං සුණාතීති? ආමන්‌තා. සමාපන්‌නො චක්‌ඛුනා රූපං පස්‌සති…පෙ.… සොතෙන…පෙ.… ඝානෙන…පෙ.… ජිව්‌හාය…පෙ.… කායෙන ඵොට්‌ඨබ්‌බං ඵුසතීති? න හෙවං වත්‌තබ්‌බෙ…පෙ.….
823. Samāpanno saddaṃ suṇātīti? Āmantā. Samāpanno cakkhunā rūpaṃ passati…pe… sotena…pe… ghānena…pe… jivhāya…pe… kāyena phoṭṭhabbaṃ phusatīti? Na hevaṃ vattabbe…pe….
සමාපන්‌නො සද්‌දං සුණාතීති? ආමන්‌තා. සොතවිඤ්‌ඤාණසමඞ්‌ගී සමාපන්‌නොති? න හෙවං වත්‌තබ්‌බෙ. නනු සමාධි මනොවිඤ්‌ඤාණසමඞ්‌ගිස්‌සාති? ආමන්‌තා. හඤ්‌චි සමාධි මනොවිඤ්‌ඤාණසමඞ්‌ගිස්‌ස, නො ච වත රෙ වත්‌තබ්‌බෙ – ‘‘සමාපන්‌නො සද්‌දං සුණාතී’’ති.
Samāpanno saddaṃ suṇātīti? Āmantā. Sotaviññāṇasamaṅgī samāpannoti? Na hevaṃ vattabbe. Nanu samādhi manoviññāṇasamaṅgissāti? Āmantā. Hañci samādhi manoviññāṇasamaṅgissa, no ca vata re vattabbe – ‘‘samāpanno saddaṃ suṇātī’’ti.
සමාධි මනොවිඤ්‌ඤාණසමඞ්‌ගිස්‌ස, සොතවිඤ්‌ඤාණසමඞ්‌ගී සද්‌දං සුණාතීති? ආමන්‌තා. හඤ්‌චි සමාධි මනොවිඤ්‌ඤාණසමඞ්‌ගිස්‌ස, සොතවිඤ්‌ඤාණසමඞ්‌ගී සද්‌දං සුණාති, නො ච වත රෙ වත්‌තබ්‌බෙ – ‘‘සමාපන්‌නො සද්‌දං සුණාතී’’ති . සමාධි මනොවිඤ්‌ඤාණසමඞ්‌ගිස්‌ස, සොතවිඤ්‌ඤාණසමඞ්‌ගී සද්‌දං සුණාතීති? ආමන්‌තා. ද්‌වින්‌නං ඵස්‌සානං…පෙ.… ද්‌වින්‌නං චිත්‌තානං සමොධානං හොතීති? න හෙවං වත්‌තබ්‌බෙ…පෙ.….
Samādhi manoviññāṇasamaṅgissa, sotaviññāṇasamaṅgī saddaṃ suṇātīti? Āmantā. Hañci samādhi manoviññāṇasamaṅgissa, sotaviññāṇasamaṅgī saddaṃ suṇāti, no ca vata re vattabbe – ‘‘samāpanno saddaṃ suṇātī’’ti . Samādhi manoviññāṇasamaṅgissa, sotaviññāṇasamaṅgī saddaṃ suṇātīti? Āmantā. Dvinnaṃ phassānaṃ…pe… dvinnaṃ cittānaṃ samodhānaṃ hotīti? Na hevaṃ vattabbe…pe….
824. න වත්‌තබ්‌බං – ‘‘සමාපන්‌නො සද්‌දං සුණාතී’’ති? ආමන්‌තා. නනු පඨමස්‌ස ඣානස්‌ස සද්‌දො කණ්‌ටකො වුත්‌තො භගවතාති? ආමන්‌තා . හඤ්‌චි පඨමස්‌ස ඣානස්‌ස සද්‌දො කණ්‌ටකො වුත්‌තො භගවතා, තෙන වත රෙ වත්‌තබ්‌බෙ – ‘‘සමාපන්‌නො සද්‌දං සුණාතී’’ති.
824. Na vattabbaṃ – ‘‘samāpanno saddaṃ suṇātī’’ti? Āmantā. Nanu paṭhamassa jhānassa saddo kaṇṭako vutto bhagavatāti? Āmantā . Hañci paṭhamassa jhānassa saddo kaṇṭako vutto bhagavatā, tena vata re vattabbe – ‘‘samāpanno saddaṃ suṇātī’’ti.
825. පඨමස්‌ස ඣානස්‌ස සද්‌දො කණ්‌ටකො වුත්‌තො භගවතාති, සමාපන්‌නො සද්‌දං සුණාතීති? ආමන්‌තා. දුතියස්‌ස ඣානස්‌ස විතක්‌කො විචාරො කණ්‌ටකො වුත්‌තො භගවතා, අත්‌ථි තස්‌ස විතක්‌කවිචාරාති? න හෙවං වත්‌තබ්‌බෙ…පෙ.….
825. Paṭhamassa jhānassa saddo kaṇṭako vutto bhagavatāti, samāpanno saddaṃ suṇātīti? Āmantā. Dutiyassa jhānassa vitakko vicāro kaṇṭako vutto bhagavatā, atthi tassa vitakkavicārāti? Na hevaṃ vattabbe…pe….
පඨමස්‌ස ඣානස්‌ස සද්‌දො කණ්‌ටකො වුත්‌තො භගවතාති, සමාපන්‌නො සද්‌දං සුණාතීති? ආමන්‌තා. තතියස්‌ස ඣානස්‌ස පීති කණ්‌ටකො…පෙ.… චතුත්‌ථස්‌ස ඣානස්‌ස අස්‌සාසපස්‌සාසො කණ්‌ටකො … ආකාසානඤ්‌චායතනං සමාපන්‌නස්‌ස රූපසඤ්‌ඤා කණ්‌ටකො… විඤ්‌ඤාණඤ්‌චායතනං සමාපන්‌නස්‌ස ආකාසානඤ්‌චායතනසඤ්‌ඤා කණ්‌ටකො… ආකිඤ්‌චඤ්‌ඤායතනං සමාපන්‌නස්‌ස විඤ්‌ඤාණඤ්‌චායතනසඤ්‌ඤා කණ්‌ටකො… නෙවසඤ්‌ඤානාසඤ්‌ඤායතනං සමාපන්‌නස්‌ස ආකිඤ්‌චඤ්‌ඤායතනසඤ්‌ඤා කණ්‌ටකො… සඤ්‌ඤාවෙදයිතනිරොධං සමාපන්‌නස්‌ස සඤ්‌ඤා ච වෙදනා ච කණ්‌ටකො වුත්‌තො භගවතා, අත්‌ථි තස්‌ස සඤ්‌ඤා ච වෙදනා චාති? න හෙවං වත්‌තබ්‌බෙ…පෙ.….
Paṭhamassa jhānassa saddo kaṇṭako vutto bhagavatāti, samāpanno saddaṃ suṇātīti? Āmantā. Tatiyassa jhānassa pīti kaṇṭako…pe… catutthassa jhānassa assāsapassāso kaṇṭako … ākāsānañcāyatanaṃ samāpannassa rūpasaññā kaṇṭako… viññāṇañcāyatanaṃ samāpannassa ākāsānañcāyatanasaññā kaṇṭako… ākiñcaññāyatanaṃ samāpannassa viññāṇañcāyatanasaññā kaṇṭako… nevasaññānāsaññāyatanaṃ samāpannassa ākiñcaññāyatanasaññā kaṇṭako… saññāvedayitanirodhaṃ samāpannassa saññā ca vedanā ca kaṇṭako vutto bhagavatā, atthi tassa saññā ca vedanā cāti? Na hevaṃ vattabbe…pe….
සද්‌දං සුණාතීතිකථා නිට්‌ඨිතා.
Saddaṃ suṇātītikathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 8. සමාපන්‌නො සද්‌දං සුණාතීතිකථාවණ්‌ණනා • 8. Samāpanno saddaṃ suṇātītikathāvaṇṇanā
