| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
८. सद्दसञ्ञकत्थेरअपदानवण्णना
8. Saddasaññakattheraapadānavaṇṇanā
पब्बते हिमवन्तम्हीतिआदिकं आयस्मतो सद्दसञ्ञकत्थेरस्स अपदानं। अयम्पि पुरिमबुद्धेसु कताधिकारो तत्थ तत्थ भवे विवट्टूपनिस्सयानि पुञ्ञानि उपचिनन्तो फुस्सस्स भगवतो काले एकस्मिं कुलगेहे निब्बत्तो वुद्धिप्पत्तो सद्धाजातो तापसपब्बज्जं पब्बजित्वा हिमवन्तम्हि अरञ्ञावासे वसन्तो अत्तनो अनुकम्पाय उपगतस्स भगवतो धम्मं सुत्वा धम्मेसु चित्तं पसादेत्वा यावतायुकं ठत्वा अपरभागे कालं कत्वा तुसितादीसु छसु कामावचरसम्पत्तियो च मनुस्सेसु मनुस्ससम्पत्तियो च अनुभवित्वा इमस्मिं बुद्धुप्पादे एकस्मिं कुलगेहे निब्बत्तो वुद्धिमन्वाय सद्धाजातो पब्बजित्वा विपस्सनं वड्ढेत्वा अरहत्तं पापुणि।
Pabbate himavantamhītiādikaṃ āyasmato saddasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto phussassa bhagavato kāle ekasmiṃ kulagehe nibbatto vuddhippatto saddhājāto tāpasapabbajjaṃ pabbajitvā himavantamhi araññāvāse vasanto attano anukampāya upagatassa bhagavato dhammaṃ sutvā dhammesu cittaṃ pasādetvā yāvatāyukaṃ ṭhatvā aparabhāge kālaṃ katvā tusitādīsu chasu kāmāvacarasampattiyo ca manussesu manussasampattiyo ca anubhavitvā imasmiṃ buddhuppāde ekasmiṃ kulagehe nibbatto vuddhimanvāya saddhājāto pabbajitvā vipassanaṃ vaḍḍhetvā arahattaṃ pāpuṇi.
४३. सो अपरभागे अत्तनो पुब्बकम्मं सरित्वा सोमनस्सजातो पुब्बचरितापदानं पकासेन्तो पब्बते हिमवन्तम्हीतिआदिमाह। तं सब्बं उत्तानत्थमेवाति।
43. So aparabhāge attano pubbakammaṃ saritvā somanassajāto pubbacaritāpadānaṃ pakāsento pabbate himavantamhītiādimāha. Taṃ sabbaṃ uttānatthamevāti.
सद्दसञ्ञकत्थेरअपदानवण्णना समत्ता।
Saddasaññakattheraapadānavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / ८. सद्दसञ्ञकत्थेरअपदानं • 8. Saddasaññakattheraapadānaṃ
